ساعدونى بتغير فى مطبخى [الأرشيف] - المطبخ الليبي لزينب محمد

مشاهدة النسخة كاملة : ساعدونى بتغير فى مطبخى

ليبيا قلبى

01-05-2011, 09:49 AM

السلام عليكم

الكل عارفين انى على وشك الولاده
ونبى انغير اشويه فى المطبخ يعنى لمسات
وتغير بسيط
فى الفرشه
ومفرش الطاوله
نبى نعرف اللون يلى يمشى مع المطبخ
انا انوريكم المطبخ وانتم ساعدونى ياحلوين

http://img105.herosh.com/2010/11/03/617292866.jpg
http://www.libyan-kitchen.com/gallery/images/111111eve.jpg
http://www.libyan-kitchen.com/gallery/images/222222ede.jpg

واخيرآ

ليبية

01-05-2011, 10:44 AM

حبيبتي بسم الله ماشاء الله عليك بالهني مطبخك تحفة تبيدي وتجددي ان شاء الله
ملاحظاتي ليك:
اول شيئ مطبخك بني والميوليكة بيج والحلو في الموضوع انه عندك هلبة مكانات باش تحطي تحف
يعني لو اخديتي اي لون تحبيه وخديتي بيه كل شي من مفارش وتحف حيطلع حلو
اني نقولك شن الألوان اللي انا لو كنت مكانك اخترتها في مطبخك:
البيج طبعا والبني هذا من غير كلام
البرتقالي الهادي وهذا يطلع مش عادي

حبيبتي عندي بعض التعليقات ياريت ماتنزعجيش مني :
اول حاجة فرشات الأرضية لو تاخذيلهم نفس لون مفرش طاوة واكسسوارات يطلعوا حلوات لكن هكي يعني تحسي انه المطبخ ملخبط شوية
وتاني شي ناقصك ستار تعرفي حيطلعلك حلو ويغير في المطبخ بشكل كبير
ثالث شيء البنبولينة انا نحط فيها في دار الخزين وسلفاتي يحطوا فيها تحت الحوض
ورابع شي لو خذيتي علاقات للطواسي اللي بحدا المية يطلع شكلهم حلووووووووووووووووووووووو

سامحيني على جرأتي بس مطبخك مش عادي وناقصه شوية تعديلات ولكن نهنيك على ذوقك رائع مثلك يا قمر

ليبيا قلبى

01-05-2011, 10:57 AM

http://www.libyan-kitchen.com/kitchen/tahasoft.com_1/misc/quotes/quot-top-left.gifاقتباسhttp://www.libyan-kitchen.com/kitchen/tahasoft.com_1/misc/quotes/quot-top-right.gifhttp://www.libyan-kitchen.com/kitchen/tahasoft.com_1/misc/quotes/quot-by-left.gifالمشاركة الأصلية كتبت بواسطة ليبيةhttp://www.libyan-kitchen.com/kitchen/tahasoft.com_1/misc/quotes/quot-by-right.gifhttp://www.libyan-kitchen.com/kitchen/tahasoft.com_1/misc/quotes/quot-top-right-10.gifحبيبتي بسم الله ماشاء الله عليك بالهني مطبخك تحفة تبيدي وتجددي ان شاء الله
ملاحظاتي ليك:
اول شيئ مطبخك بني والميوليكة بيج والحلو في الموضوع انه عندك هلبة مكانات باش تحطي تحف
يعني لو اخديتي اي لون تحبيه وخديتي بيه كل شي من مفارش وتحف حيطلع حلو
اني نقولك شن الألوان اللي انا لو كنت مكانك اخترتها في مطبخك:
البيج طبعا والبني هذا من غير كلام
البرتقالي الهادي وهذا يطلع مش عادي

حبيبتي عندي بعض التعليقات ياريت ماتنزعجيش مني :
اول حاجة فرشات الأرضية لو تاخذيلهم نفس لون مفرش طاوة واكسسوارات يطلعوا حلوات لكن هكي يعني تحسي انه المطبخ ملخبط شوية
وتاني شي ناقصك ستار تعرفي حيطلعلك حلو ويغير في المطبخ بشكل كبير
ثالث شيء البنبولينة انا نحط فيها في دار الخزين وسلفاتي يحطوا فيها تحت الحوض
ورابع شي لو خذيتي علاقات للطواسي اللي بحدا المية يطلع شكلهم حلووووووووووووووووووووووو

سامحيني على جرأتي بس مطبخك مش عادي وناقصه شوية تعديلات ولكن نهنيك على ذوقك رائع مثلك يا قمر
http://www.libyan-kitchen.com/kitchen/tahasoft.com_1/misc/quotes/quot-bot-left.gif

http://www.libyan-kitchen.com/kitchen/tahasoft.com_1/misc/quotes/quot-bot-right.gif

الله يسلمك ويهنيك ويبارك فيك ياغاليه
عادى هاهاهاها مانزعلش على شى
لانا كل واحد شاطر فى حاجه
وانا مش شاطره فى فى الديكور وتغير الحاجات
والله نصيحتك فدتنى واجد ياحلوه
انشاء الله انغير فيه الحاجات وانحط الصور
ومشكوره وبارك الله فيك
اسعدنى ردك

سحابه صيف

01-05-2011, 11:52 AM

ليبيا مطبخك مش عادي وملاحطاتي نفس ملاحطات لبيبيه بدات في فرش اللارضية ستار للروشن
بس بنسالك من وين تلقي الشنترات هدوم ههههههههه الي علي الطاله شكلهم تاكم كامل وعجبوني هلة الراحه

ليبيا قلبى

01-05-2011, 12:06 PM

أمـ ساره

01-05-2011, 01:48 PM

ماشاء الله ليبيا مطبخ حلو ايهبل

اتبيديه بالهني يارب

واني زيك الصراحة ما نعرف في الديكور هلبة

وبصراحة اني من النوع الي نحب الوساع ما نحب نعبي المطبخ هلبة

نبي نبرطح فيه على راحتي

ان شاء الله لما يجي دوري واندير مطبخ على ذوقي يارب

وربي يتمملك حملك على خير وتولدي بالسلامة وتشري شن تبي ان شاء الله

ليبيا قلبى

01-05-2011, 01:50 PM

ام ساره الله يسلمك ياغاليه ويبارك فيك
انشاء الله اديرى مطبخ على ذوقك اقريب
يارب
اسعدنى مرورك الجميل

ام الجميلات

01-05-2011, 03:41 PM

الصراحة مطبخك حلو وعجبني لكن انتي تبي من يعطي رائيه وبصراحة
مفارش المطبخ موزعيتهم هلبة في المبطخ لين هربتي منظره وبعدين طاولة المطبخ من رائي تخليها من غير مفرش لان جمال خشب الطاولة خبيتيه وسجادة المطبح لونها مش راكب مع المطبخ من رائي تكون السجادة قهوي داكن سادة او بيج سادة
والغاز او البوتاقاز او الفرن كان يتعلى برجلين مثل رجلين الدولاب بحيت يكون مستوى واحد هو والمطبخ حتى انتي تكوني مرتاحة في الطبخ لما يستوي مع الدولاب
وسقطار الصواني الافضل يكون بجانب شيشمة المية احسن وجانب الفرن حطي سكريات للبهارات يكون لونها مقارب لمطبخك
وفترينة المطبخ كان تلغي المفارش اللي فيها تطلع احلى
هدا من رائي وتقبلي مروري
تحياتي وان شاء الله بالخلاص وخيرة الناس

ليبيا قلبى

01-05-2011, 03:44 PM

ام الجميلات

بارك الله فيك على النصيحه
لانى انا ماعنديش خبره هلبه فى الموضوع هذا
استفدت من صيحتك ياغاليه
وبارك الله فيك اسعدنى مرورك

فضااوي

01-05-2011, 07:55 PM

ليبيا قلبي

ماشاء الله يبارك الرحمن مطبخك روووعه بس عندي ملاحظات على طقم المطبخ

انحسة مداير حوسة ههههههههههه ماتزعليش غاليتي

غيري المفارش حتى اللي داخل الارفف

http://up.arab-x.com/Oct09/Ij467578.jpg

شفتي في انواع زي هذي حاليا في الاسواق حتى من غير ما يكون فيها رسماات

وحاولي تخلي ستارة المطبخ بسيطة
http://img.timeinc.net/aolhome/i/design/sl/04/02/SL0402110g_1_y.jpg

تعطي المطبخ ديكور جمالي اكثر من الكاملة

والطاولة ماتحطيش عليها مفرش في ديكورات بيضاوية ومربعات في محلات المواعين
للطاولات

وفي تلبيسات لشيش المية والسخانات يعني حاولي يكون الديكور بيج في بني
ودخلي فية شوي برتقالي

ان شاء الله انكون افدتك

أمــل

01-05-2011, 07:55 PM

السلام عليكم
وماشاءالله عليكم يعجبني تبادل الآراء وحب التعلم
وماشـــــــاء الله علي مطبخك ياليبيا
والله أكثر شي يعجبني في المطابخ الإضاءه والرواشن

أول شي أوخيتي ليبيا إن شاءالله اتنوضي بالسلامة وما تكوني الا راضيه عن مطبخك
وثاني شي اللي لفت نظري في مطبخك هو الغاز من غير رجلين
حسيت ظهري وجعني وقلت كيف ياليبيا هكي ؟
معقوله اتطيبي بالشكل هدا؟
بعدين لاحظت غطاء الفرن !! والمساحة ضيقة ما تسمح
باهي ليش ما اتنحي غطاء الفرن وتجربي ، لو منظره ما تأترش نحيه وركبي رجلين الغاز اريح لك
وتوا تشوفي شكله كيف يحلو لما يتساوا مع الدولاب اللي في جنبه

بعدين الستار ضروووري جداً للمطبخ
لو اديري ستار عالبني ومفارش صغيرات للطاوله وبساط عالبني
وطلعي كل الأزرق من مطبخك حتى البريموس هههههههه
ايولي ايهبببببببببببببل تبارك الرحمن
سامحيني اوخيتي ليبيه ، كترت عليك
وحتى اني ما نفهم هلبه في الديكورات وتوا انحطلكم مطبخي وتشيروا عليا
وماتنسي اتورينا شن صـــار ؟ وشن غيرتي
وإن شاءالله على خير وربي يهنيك ويسهل عليك

الجبليه

01-07-2011, 03:14 PM

ما شاء الله مطبخك جميل والبنات ماقصروا
أهم شيء الالوان تكون هاديه ورسمة الفرش تكون بسيطه والحلو لو ادخلى لونين فى بعض
وكذلك الستاره تعطي منضر حلو ومتكثريش من نفس المفارش فى المطبخ
شوفى الاخت سنابل حاطه ستائر حلوة
http://www.libyan-kitchen.com/kitchen/showthread.php?t=915

وجميل لو درتى تغليفه لشيشة الماء او مفرش حلو ينزل عليها
خلى الون برتقالي هادى حتى يعطى انارة للمكان
وصوريلنا مطبخك بعد ما تجهزيه فى انتظارك
وزى ما اقترحت ام الجميلات ارفعى الغار حتى بطوله خشي وغطي الطرق بنفس القماش يلى بتستخدميه فى المطبخ
على فكرة ابعدى على القماش يلى ايكون كله فواكه اختاري نقشه بسيطه وهاديه

ليبيا قلبى

01-08-2011, 05:11 PM

بارك الله فيكم على الرد
والنصيحه
انشاء الله اغير منه واحط الصور

guidona

01-08-2011, 06:07 PM

حبيبتي ليبيا اني من راي الاخوات الي فات منظر الغاز لو يكون منعلي احلي وحتشوفي والازرق الغيه نهاتيا من مطبخك وكدلك المفرش لو نتحيه احلي اونزك والستار اختاري لونه ايكون امناسب علي لون الفرشه وبالهني والصحيحه وربي اكملك ولادتك علي خير

ام سريوات

01-08-2011, 07:03 PM

مشاء الله ياليبيا
مطبخك حلو وانشاء الله تقومى بالسلامة
وتحوسى فيه

ابريكه

01-12-2011, 04:03 AM

ماشاء الله مطبخك روعة تبارك الرحمن ان شاء الله اديري فية غير المناسبات السعيدة يا ليبو
واني ملاحظاتي قريبة من ملاحظات البنات خاصة فرش المطبخ بعد فترة غيرية للون يكون قريب من لون الدولاب
والبريمس غلفية وحطي تحت منة حاجة حتى ما يصديلك السراميكا
ومطبخك ماشاء الله لون وتفصيلة روعة
وكل مرة ديري حويجة وكلنا يا ليبو نتعلمو من بعض وكل يوم نستفيدو حاجة
والحلو في موضوعك انك خليتينا نستفيدو وناخذو افكار جديدة من البنات
بارك الله فيك يا احلى ليبو

طمطم

01-17-2011, 09:15 PM

ليبيا ما شاء الله ولا قوة إلا بالله مطبخك غاية في الروعة وأحلى مافيه انه مربع تربيع مريح

آراء البنات كلها حلوة واني معاهم
بس أهم شي نقصي من المفارش اللي في النيش واللتلاجة والغاز والطاولات
ممكن تحطي تاكم تاني يكون أقل في عدد القطع والطاولة من غير مفرش أو بمفرش صغنون تحت الفازة بس يكون حلو

أما الألوان: نتوقع اللون البرتقالي يطلع حلو هلبة مع لون مطبخك والخوخي حتى هو مش عادي.... بس يكون على هادي

شوفي التاكم هذا لو عندك حد شاطر في الخياطة ممكن تجيبي قماش مناسب للمطبخ وتفصليه

http://www.libyan-kitchen.com/gallery/images/kitchesqs.jpg

فيه الستار والمريقة ( كخخخخخخ مانعرفش اسمها) وقوانتي الفرن حلوين وألوانهم هادية
وفرشة الأرض عندي تكون عالبيج أفضل

ولو اضيفيله مزروعات صناعية او طبيعية تعطيه منظر غير....

وماتنسيش توريهولنا بعد التغييرات

وربي يهنيك بمطبخك وينوضك بالسلامة ويرزقك طفل يكون قرة عين آمين يارب

طمطم

01-17-2011, 09:40 PM

شن رأيكم بنات كل وحدة تحطلنا مطبخها وتورينا كيف منسقاته باش الكل يستفيد؟؟؟

أني مطبخي قاعد فاضي مادرنالاش الدولاب سكنت فيه شوية حوشي وسافرت ومابيتش ندير فيه أي شي قلت لما نمكل ونروحو نشوفو لأني نحتاج وقت باش نقرر الألوان اللي نبيها وقاعدة لحد توا حايرة تو نحطلكم صورة لو لقيتها وانتم اعطوني أفكار

Om Saga

01-24-2011, 07:29 PM

ليبيا قلبي مطبخك حلو
وقرأت الردود ولقت كلام ليبيه ممتاز
خلي فيه تناسق في الألوان
وحاجه تانيه ماتخليش المطبخ معبي هلبه أني من طبعي زي أم ساره حاجه مرات ساده
والمفرش إلي على الطاوله وكان تغيريه أفضل وتخليه مفرش مشبك أو قصير مش طويل
لكي تحسي إن فيه وسع وأعملي بنصيحيتي وحتشوفي
والباين إن في جيهة الثلاجه معبيه ماتخليش إلا الضروري والباقي حطيه في الدولاب
الستار مادريش ستار يكون القماش شتوي لا خليه شيفون لأن لاحظت إن إضاءة المطبخ
مش قويه وكان بديريه شتوى بيزيد بيظلم المطبخ فنصيحه أعمليه شيفون
والحاجات إلي على الغاز قصدي على زر إلي نولعو منه حوليهم ولا نجيك هههه
والمفارش إلي في الولاب غيريهم إلي نفس نوعية إلي على الطاوله
غيريهم وخلي لونهم متناسق مع فرش المطبخ
وكان فيه معلومه تانيه توهنجيك نجري
بس الصراحه والشهاده لله عجبني المطبخ والباين إنو مخدوم خدمه نظيفه
الله يباركلك فيه ويحفظكم يااااااارب

حساسة والدمعة الماسة

01-26-2011, 03:29 PM

الصراحة مطبخك حلو وعجبني ... لاكن عندك الاضاءة مش بكل ... ديري استار خفيف ... والمطبخ فيه ضيق شوي ... وغير فرشة الارضية مش راكبة عالمطبخ
مطبخك حلو... ربي يقومك بالسلامة يارب

ميراس

02-01-2011, 09:49 AM

السلام عليكم ورحمة الله وبركاته،،

أول حاجة مطبخك حلو ربي يهنيك إن شاء الله

حاولي ديما تخلي فوق الرخامات فاضي يعني ما تكثريش الحاجات

حتى تقدري تحوسي فيه لما تبي اديري حاجة

و بالنسبة للمفرش و الستار وبساط المطبخ ديريه بيج في الأحمر

و بما أن طاولتك صغيرة فتقدري تستغني عن المفرش

أو إنك اتحطي قدام كل كرسي مفرش صغير يتناسق مع البساط والستار

ربي يهنيك أوخيتي

بنية بوها

02-11-2011, 11:09 PM

ماشاء اللله مطبخك حلووووووو والشعب ماقصر ههههههههه قصدي البنات
وتولدي بالسلامة

انسام الحرية

11-13-2011, 06:50 PM

مساء الخير عليك وكل عام وانت بخير ياحبوبة عندى شوية ملاحضات بصراحة المطبخ حلو لكن لو تغيرى مكان البريمس وقردل الكناسة حاشاك يكون احسن وتحطى بدلهم ثلاجة المية هدا مجرد راى وعندى راى ثانى لو تغيرى لون المفرش للبرتقالى حيفتح المطبخ والسجادة حتى هى وملاحظتى الاخيرة على الاكسسوار اللى حاطيه على الطاولة انا نقول لو تبدلى المترد يكون احلى والقنينات تحوليهم من على الطاولة وتحطيهم على الرخامة اللى تحت الروشن مع ستار حيتغير ويصبح احلى وانشاء الله تقومى بالسلامة وسامحينى على جرأتى:)

الساجدة لله

11-13-2011, 08:08 PM

ماشاء الله مطبخك تفصيلته قنينة والاخوات ماقصروش معاك وان شاء الله يكون حالك باهي واطمنينا عليك

زهرة البنفسج

11-16-2011, 11:16 PM

ماشاء الله مطبخك روعة روعة بالنسبة لي مانحبش كترة الشنتروات وتبي ستار وانحب الكوجينة فاضية من الماعين اللي فوق الرخامات ويكون فوقهم ىتححف بسيطة وحتى انا مانعرفش في الديكور وان شاء الله ينولني مطبخ زيك وانوريهولكم باش تشوفولي ديكوره امين