بنات أنا تعبانة

[طمطم]

بنات والله تعبت من القراية ومن الغربة
وهذا الموضوع منعكس سلبياً على تركيزي.....
ذاكرة ضعيفة..... نسيان......عدم تركيز....... بسرعة نمل لما نكون مقعمزة نقرا.... ونمشي لأي حاجة تانية ممكن تلهيني على قرايتي

توا كل اللي نقول فيه... اني ندير في شي ماكانش المفرروض نديره.... اني المفروض في حوشي مرتاحة ومستقرة وخالية البال وياسر عليا زوجي وصغاري وبيتي

بس بعدين نتفكر بوي وأمي وأملهم فيا وحلم بوي إني نكون دكتورة .... نحس روحي بنموووووووووووت واني خلاص معاش قدها

بس لو في حد يقدر يساعدني بالنسبة لقلة التركيز وضعف الذاكرة والنسيان.... بالك ترجع ثقتي في نفسي ونكمل على خير

أني توا مضغوطة لأني لو قدرت ندير ديزاين لتجربتي نقدر نروح لليبيا في4 ..... ونقعد غادي فترة.... على الأقل نلقى من يساعدني في الصغار شوية..... ونرتاح في حوشي شوية.... ونركز في قرايتي أكتر... مستاحشة حوشي والضمّان اللي على أصوله والتشميس والتنضيف والتسييق.... مش زي هني الحياش لوح وما فيش حاشاكم بالوعات والبساطات لاصقات في الأرضية والحياش زي الحكة

ادعولي بنات وشيرو عليا شن ندير؟؟؟؟؟؟؟؟؟؟؟

[نعومي نت]

طمطم صبا ح الخير وبعيد السوء عليك
فترة
وتهون وهذا كله شيطان تعودي منه كل ما جاك هذا الشعور وتفكري فرحة ميمتك واوبيك لما ترجعيلهم دكتورة
والله تعبك كله يهون لما إتشوفي الفرحة مرسومة في عيونهم
وبعدين السنةإتخش من أهني تطلع من اهني
و الضمان وين هاربة منه بالله جايتيه جايتيه
توكلي علي ربي وإن شاء الله ربي يوفقك

[طمطم]

تسلمي نعومي.... بارك الله فيك
كلامك ريحني هلبة

[ام سريوات]

طمطم
السلام عليكم ورحمة الله وبركتة
عزيزتى نصيحتى لك ما تخيبى أمال بوك وأمك
وأن تستعينى بالله أولا ولا تستسلمى الى الوساوس
وكملى قريتك وربى معك ويحافظك أنشاء الله

[نعومي نت]

ما عنديش فيه جميل حبيبة
وما تنسيش إنك طالبة العلم
و طالب العلم مجاهد في سبيل
سعدودك اعطالك ربي بالله

[طمطم]

بارك الله فيكم بنات .... والله كلامك زي البلسم

يخليكم ليا يارب

[أمـ ساره]

طمطم حبيبة

اني توا انقول ياريتني نقدر نقرأ حتى لو دورات بس

بس طبعا زوجي رافض الفكرة

لهذا حمدي ربي ان الي عندك يمنوه هلبة غيرك

فكري بايجابية وخيتي وقولي الحمد لله ان ربي اعطاني هالنعمة

اول شيء حاجة كويسة ليك وأيضا لأهلك وزوجك وأطفالك

وقولي اني متغربةومغربة صغاري فلازم نقدملهم ونقدم لروحي أفضل شيء

وبالنسبة للغربة والحياش هذا شيء مؤقت وبيفوت باذن الله


وفكري ان هلبة ناس هني تجري على المنح الدراسية وانها تكمل قرايتها برا



ونصيحة ليك اول شيء توكلي على ربي

وكل ما تتضايقي ويبدأ الشيطان يوسوسلك نوضي توضي وصلي ركعتين وادعي


ربي يوفك ويفتح عليك وينجحك يارب

[السمحة]

اهلا طمطم
وسعى بالك وتعدبى من الشيطان ودراستك هى سلاحك فى الحياة والاب والام عندهم حق ردى بالك اتضيعى فرصتك فى اكتمال دراستك فى اللى يتمنا يدرس من جديد وانتى بسم الله دكتورة كملى حبوبو والله امعاك واقرى قرأن افضل شئ عند ضيق العلم
واغلى نعناع ويانسون ايهدن لعصاب وسلم زوجك واصغارك
وربى ايرح بالك

[أم أيوب]

طمطومة يا حبيبة وسعي بالك

قولي الحمد لله انك ماشية فترة وتبي ترجعي

في اللي طلعوا من البلاد بسبب ظروف معينة ومش عارفين أمتى يقدروا يرجعوا من جديد

وليهم سنوات 10 وأكثر من هكي سنين ما شافوش أهلهم الا بالصور بس

لكن انتي الحمد لله فترة وتمر بسرعة وتلقي روحك وسط أهلك وأحبابك

تعرفي عندي خويلة اخت ماما والله العظيم قعدت 9 سنوات ما جت للبلاد

تخيلي توفت أمها (( بعيد السو عليك )) وأخوها الله يرحمهم وما شافتهم

تخيلي العذاب اللي كانت تتعذب فيه غادي بس مشت الحياة زي ما يبي ربي

واهي السنة انشاء الله تبي تروح نهائي وتستقر في ليبيا... اللي يشوف حال

أسوأ من حاله يقول الحمد لله... بعدين انتي متغربة عشان تقري وتاخدي شهادة

وتحققي حلم أهلك وباباك وامك صدقيني بروحه هالشي المفروض يعطيك دافع

حاجة تانية كل ما ركزتي واهتميتي بدراستك أكثر مدة قعادك قي الخارج حتقل

لكن لو أهملتي وتباعدتي على قرايتك هالشي حيأخر رجعتك للبلاد...... ربي يوفقك حبيبتي

ويسرلك طريقك يارب ويهون عليك غربتك يارب... كولي اللوز الخزايمي (( الجوز )) يقوي الذاكرة

والعسل مع حبة البركة وتعوذي من الشيطان كل ما حسيتي بضيق؟؟؟ موفقة انشاء الله

[المغتربه]

الصراحه ربي يكون فى عونك ويسهل غربتك
بس حطى فى بالك انه بيجيك يوم وترتاحى وانه هالفرصه مية وحده تتمناها وان صغارك لما يكبروا يفتخروا بيك

كثرى من ذكر الله (الابذكر الله تطمئن القلوب)
اما بالنسبه للذاكره فى الدراسه كل لما تبدى تنبي تقرى اقرى سورة الاعلى وكرري اية سنقرئك فلا تنسى 21 مره وربي يسهلك ان شالله
وقبل ما ترقدى وانتى فى سريرك
قولى سبحان الله والحمد لله ولا اله الا الله والله اكبر ولا حول ولاقوة الا بالله العلى العظيم 33 مره وشوفى نهارك ثانى يوم كيف يكون

[طمطم]

أم سارة شكرا حبيبة على كلامك .... نتمنى لكل المسلمين كل خير.... والحمد لله على كل نعمه عليا







شكرا سمحة على نصيحتك وكلامك وإن شاء الله نجرب النعناع واليانسون







زهورة صحيتي حبيبتي.... عندك الحق في من انحرم يشوف أهله عمر كامل... اني عندي ولاد اعمامي اتنين واحد قعد ماشافش أهله فوق ال10 سنين.... والتاني من حين اني كنت صغيرة ماندكرش ولحد الآن والله ماجي ولا شافوه وبوه مات من سنين وخوه واخته ماتو بعد فترة من موت بوهم ولا شاف حد فيهم ياناري







الحمد لله على نعمه







ربي يهون عليها خالتك .... ويعوضها خير ويكون ملتاقاها معاهم في الجنان يارب







مغتربة حبيبتي.... بارك الله فيك على النصيحة وكلامك هنكتبه ونعلقه بحدا سريري.... الله يبارك فيك






بارك الله فيكم وخياتي لقيتكم لما احتجتكم

[مغتربة 7]

اختى طمطم والله العظيم حاسة بيك لكن انت مشاء الله تبارك الله حا تاخدى شهادة ترفعك فوق وتمنها انك تصبرى وتجاهدى وان شاء الله فترة وحا تمشى على حالها وتلقى شهادتك حتى صغارك يرفعو روسهم بيك وتفيدى بيها امة محمد (لا يستوى الدين يعلمون والدين لا يعلمون) حبيبة والغربة كلنا فيها نفس الشى بس تحملى شوية وحا تكملى ان شاء الله انديرولك حفلة كبيرة ...........................

[خدوج]

حبيبتى طمطم
ثقى وتاكدى ان الشيطان يجرى فى البنى ادم كما يجرى الدم فى عروقنا
فكل ذلك وساوس الشيطان(اعوذ بالله منه)
من يتوكل على الله يرزقه من حيث لايحتسب
من يتوكل على الله فهو حسبه
استعودى من الشيطان
وحطى فى بالك ان فى ناس هلبه يتمنوا يكونوا مكانك
وانى وحدة من الناس امنيتى عمرى نتغرب لكن؟؟؟
تمر الايام ويقعدلك ذكرى وتقولى (ليت الزمان يعود يوما)
توكلى على الله
وخلى قدام عيونك الهدف اللى جيتى علشانه
باش تروحى وراسك مرفوعة وشهادتك بين ايديك
وتفرحى بصغيورتك
والله يخفف عنك غربتك ويحفظك

[طمطم]

مغتربة 7 ... خدوج... بارك الله فيكم ....والله صح كلامكم

[بنية بوها]

لالالا ياطمطم لالالالا انتي انسانة واعية ومتعلمة وانتي اكبر من اللي انتي فيه توا ماتستلميش للشيطان وتعودي منه اقربي من الله
وصلي صلاتك هدا هو الشيطان يزن عليك انتي واصلا لمرحلة مافيش انسان مايتمنهاش كملي واقهري االشيطان وارفعي راس اهلك
وصغارك وزوجك هدا فترة وتزول مش حتقعدي ديمة تقري وخليهم يفتخروا بيك وزي ماقتلك زهورة اللوز الخزايمي كتري منا وكل ماتحسي
بي شعور الملل سيبيها كتاباتك شويا وديري جو لروحك متلا حاولي انك تطلعي حتى تديري دورة في السيارة وارجعي لكتاباتك وخلينا حتى احني نفتخروا بيك بنت بلادنا دكتورة وفي وسط المنتدى دكتورة المنتدى وربي يسهل ويهون عليك

[*الليبية*]

السلام عليكم
ياحبيبة أني مجربة الغربة وعارفة قديش اتعاني لكن انشاء الله يفرجها عليك الحاجة الوحيد انك تطلبي ربي ديمة انا يسهل عليك امورك والحياة هنا ديريها وكانها انك واخده امتحان وبتتفوقي فيها والله لما شفت حفلة تخرج زوجي منيش مصقة قديش يعني هنا القراية ليها قيمة وقديش في الاخير الكل يفرحلك الله توصلي للاخر محلاها ونتمنالك التوفيق والنجاح ياحبيبة والحمدلله حتى احني تغربنا لكن هانت قريب انروح اني ماروحت حتى زيارة كله عشان راحة زوجي كوني واتقة من نفسك وادعمي دماغك ديمة قوله اني نقدر الشي هدا عشان الدماغ حتى هوا يوعى وكان على التركيز كتري من شرب النعناع كويس ومرة مرة خودي راحة طلعة انت زوجك وصغار والله الطلعة معاهم رح تنسيك اشويفي امان الله حبيبة وبالتوفيق والنجاح

[ليبية]

طمطومة يا طمطومة انا نعرفك من ردرودك ديما ماشاء الله عليك قوية:rolleyes:

حبيبتي نقولك حاجة وديري تحتها خطين عراض مافيش بني ادم مرتاح (استغفر الله) كلنا نتململوا وكلنا مش عاجبنا حالنا وهذا ماهو الا وسوسة من وساوس الشيطان باش يباعدنا على التفكر بالنعمة وقول الحمدلله حمدا كثيرا مباركا فيه ملأء السماوات والأرض

حبيبتي انا وحدة من الناس اللي نتمنى ان زوجي يقتنع بفكرة العمل او الدراسة بالخارج ولكن الله غالب ( شن رايك نبدلوا؟؟؟؟؟؟؟؟؟) :D

والله يا طمطومة ومن وسط قلبي نقولك سيبي عليك هالوساوس واستعوذي من الشيطان وصدقيني المتغرب هاليومين احسنلها الغربة من القعدة في البلاد تعرفي علاش

الطلعات بدت يالطيف الطف لو مشيتي تشوفي وتسمعي العجب وتروحي متضايقة من اللي شفتيه وسمعتيه وقولتيه
والمناسبات بالأجماع سواء كانت عرس ولا لمة ولا حتى عزي حاشاكم كله بدي يدره الكبد استغفر الله
لا وكان مامشيتيش ايييييييييييييييييييييييييييييييييييه تلقي ماتسمعي لومان وحرق دم :eek:

تصدقي انه في وحدة جابت مشيتلها بعد ماجابت ب 10 ايام تعرفوا شن قالت عليا :(
قالت: يالطيف فلانة(اللي هي اني) بكل بصراحة حرقتلي دمي تصدقوا اني مشيتلها بعد ماجابت بيومين وهي جتني ب 10 ايام
:eek::eek::eek::eek::eek::eek:
تو بالله عليكم مش شي يحرق الدم؟؟؟؟
مش الغربة خير من دراه الكبد هذا

والله انك مستريحة يا طمطومة
استغفري ربك
وبالنسبة للذاكرة اني زمان (على فكرة حتي انا دكتورة) من الحاجات اللي كانت تساعد فيا

هي المذاكرة بعد صلاة الفجر صدقيني ليها سحر على الذاكرة جربي وادعيلي

وياربي يوفقك ويردك سالمة غانمة يارب

[طمطم]

تسلمي بنية بوها... وربي يكبر مقدارك..... وزي ماقلتي مش هنقعد طول عمري نقرا.... هما سنتين ونكمل ونرتاح بإذن الله تعالى






والله أني نفتخر بأخوتكم وحبكم ليا... والله اني أحبكم في الله






وهذا هو اللي محتاجتله والله........ اني نجدد علاقتي بربي






وبالنسبة للوز الخزايمي أني عقلي وتوا ماعنداش حجة زوجي لما نقوله هاتلي مكسرات (ديما حجته نقص.... يسمنو ههههههههه) بس بنركز على اللوز هذا وربي يسهل








الليبية صح كلامك والله.... خاصة لما حضرت حفلات صاحباتي اللي كملو الماجستير السنة هادي.... كانت لحظات روعة..... يارب .... يارب يجي يوم ونعزم الكل على حفلتي يارب.... وهنواضب عالنعناع ومعاه اليانسون اللي قالت عليه السمحة.... وربي يجازيكم عني كل خير








ليبية ما شاء الله انتي دكتورة.... شن تخصصك؟






صح والله ياليبية... اني ديما نسأل في نفسي... يعني أني نقدر نقعد هكي من غير قراية؟ يعني لو اني توا قاعدة في الحوش ومانقراش كنت هنرضى بحالي؟؟؟؟؟؟؟؟ لا والله.... أني زي كل البشر ديما يتهيألنا إن حالنا أسوأ حال وان فلان مرتاح وياريتني زيه... وكل واحد يقول في نفس الكلام وما فيش حد راضي على قولتك (أستغفر الله)






وبالنسبة لكلامك عن الناس والله صح..... هني ماحد يلوم حد مشيتي لحد بارك الله فيك .... قطعتي روحك يقولو عذرك القراية وكل الناس هني متفهمة وضع بعضها... لا حد يلوم عليك لو ماقدمتيش شي مية مية لو جاك ضيف... ولا حد يلوم لو ما مشيتيش






يالا الحمد لله






والقراية الفجر... الحمد لله أني أغلب قرايتي قبل الفجر لحد ما ينوضو الصغار الصبح.... انوض بكري شوي ونقعد نقرا لحد مايدن الفجر نصلي ونرتاح شوي ونكمل لين ينوضو الصغار.... بس أول ماينوضو اني ستوب ممنوع نمسك أي قلم أو كتاب








شكرا ليكم حبيباتي على ردودكم وتشجيعكم ونصايحكم.... ربي مايحرمني منكم ومن ونستكم

[ليبية]

يالله يا طمطومة فترة وتعدي وربي ينجحك ويوفقك

انا دكتورة اسنان ومتخرجة من فترة

[ابريكه]

طمطومة توة شفت موضوعك
وسعي بالك حبيبة واستعوذي من الشيطان
واقري المعوذات
وديري خلطة العسل بالمكسرات وخوذي منها ملاعق بالصبح وقبل ماترقدي
والله غيرك يتمنى يطلع برة ويدرس
وهذة فرصة ما اضيعيها
راهو هي حالة كلنا مرينا بيها
ولكن شوي وتمر
يلا يلا بلا دلع يا احلى طمطومة نوضي تنشطي واقري وان شاء الله تتخرجي وتروحي لبلادك مرفوعة الرأس
ونبو نديرولك هنا بالمنتدى حفلة كبيرة بعد اتخرجي ان شاء الله
امتى ما تضايقي صلي ركعتين وتوكلي على الله
وان شاء الله ربي يوفقك ويسهلك كل أمورك
ما تنسي اطمنينا عليك ماتخلينا مشغولين عليك

[ام الحلوين]

بعيد السو عليك من التعب تعرف طمطم دكرتينى فى صاحبتى قريب تفر مسكينة تعرفى هديكة لما جابت تخايلى جابت يوم الجمعه وباهى السبت والاحد عطلة 4 يوم ماشية للجامعه البونطوات والموليات شماته والمشكلة امتحانات والصغار انشاءالله ربى يعاونكم ويخفف عليكم تعب الغربة البنات ماقصروش قالو اللى فى خاطرى كله والله اول ماقريت موضوعك تفكرت صاحبتى انشاءالله ربى وفقك فى قرايتك ويوفق زوجى وكل اللى تغربو ويقرو وانشاءالله نفرحو بيك يوم التخرج يارب