دعوات للاهم لبنات المطبخ الليبي من ارتفاع 7000 قدم فوق سطح البحر - خشن شوفن

[للاهم]

خير يا بنات
هذك اليوم خشيت ولأول مرة في هدرزة من هدرزاتكن الحلوات وكانت الهدرزة رقم 13 وانسجمت عالاخر مع زهورة الامورة وباقي الحاضرات يمسيهن بالخير
وقلتلهن اني مضطرة نطلع عشان راجلي قال وتي روحك بيش نمشوا للجبل
والجبل علي ارتفاع 7000 قدم
قالن لي البنات الهدرازات ادعيلنا وقالت لي – انظني ام رواسي – اسجدي لأن السجدة في مكان غير مطروق لها اجرها وثوابها والحمدلله
يا خسارة الهدرزة 13 مسكرة كان هذا جبتلكن منها اقتباس
المهم ماصارش من المشية هذك اليوم السبت – كان قايلة عندي وليل متأخر عند البنات الا بريكة لأنها في نفس مكاني - ممكن ابعد شوية
الحصيل علي ما طلعنا وعبينا بنزينا حسينا ان الوقت تاخر والدنيا بدت اتظلم والجبل بعيد وضباب فوق
يعني مخاطرة ورحلة بلا فايدة كان نبي نصور
أجلناها لتاني يوم
وقلنا نسقدوا من الصبح بدري
الاحد عالساعة 10 ونص كنا طالعين
مفيش شمس
مفيش غيوم باينات
بس السما مغطية بطبقة متساوية
والاضاءة رمادية
لما بدينا نرتفعوا ف الجبل ظلمت وكثر الضباب لدرجة معاد حقينا شي
حتى السيارات الجايات من الجيهة الاخرى للطريق مانشوفوا من ضيهن الا نقطة صفرة باهتة
نعمشوا عيونا ونلصقوا ف قزاز السيارة بيش نشوفوهن
ركبني الرعب
وكرعي يبسن من كتر ما ندير في فرنينلوات وتخفيف سرعة بكرعيا
ومش انا اللي نسوق
ههههههه
حتى خط الطريق مانشوفوه لما يلف في الكورفة الا ماحوتك
والطريق كلها منعطفات وكورفات حادة
ياساتر استر
خفت واجد وقلت لراجلي فكنا خلينا نردوا
نحنا حتى سلاسل عجل ما عندنا كان خطر للتلج ينزل توا يا قعادنا
ايشيخلصنا
اصر علاستمرار
وقويت انا من عفس الفرينلوات وتخفيف السرعة الوهمي
وكز سنوني
وميشنا علي هالحال نصيب
لعند ما فجاءة زرقت الشميسة ودفى الجو اللي كان شي خمس درجات تحت الصفر
سبحان الله يابنات
بعد ارتفعنا فوق مستوى الغيوم الكثيفة
بانت علينا الشمس
الحمدلله
هذا وين تهنى بالي
وارتخيت
وطلقت كرعيا المتيبسات
وبديت نتفرج عالتلج في كل مكان
مش عادي
له سحر خاص
المهم محد يحصل فيه او يسكن يالاه
نزهة بس ممكن
وصلنا للبحيرة اللي نبوا نشوفوها
وحذاها شوية مطاعم وكفتيريات
طبعا التوتر سبب لنا الجوع
نزلنا وقلنا ناكلولنا شي حاجة عالسريع
ونشربوا قهوة


http://www.libyan-kitchen.com/gallery/images/img7944.jpg


خذينا سندويتشات شرائح ديك رومي مدخن مع سلاطة وبصل وطماطم وماستردة
وقهيوة


http://www.libyan-kitchen.com/gallery/images/img7948.jpg
وراني مانسيتكنش
اهن حلويات ودونات لعيونكن
http://www.libyan-kitchen.com/gallery/images/img7952.jpg


http://www.libyan-kitchen.com/gallery/images/img7951.jpg


http://www.libyan-kitchen.com/gallery/images/img7950.jpg


طلعنا من المطعم


وبدينا نتمشوا
وانا نفكر فيكن
نبي مكان خاطي
مفيهش ناس
مش معفوس
جوا الغابة
بيش نسجد
وندعيلكن
هضبت بين الشجر


http://www.libyan-kitchen.com/gallery/images/img7927.jpg


مرة نطيح
مرة ينغرسن كرعيا لعند ركبيا
مرة نزحف
لعند لقيت تريكينة ناعمة آمنة
ودعيتلكن من كل قلبي وسط كل هالبياض الرباني
يالا يا بنات المطبخ الليبي لزينب محمد
يعدلها لكن ربي وكل وحدة تنال ما تتمنى
ويحفظلكن صحتكن وهلكن وعويلتكن ورجالتكن
ويرزق اللي ما عندها راجل والا عيل والا حوش والا اي شي ما خطرش عليا
ويكثر ابداعكن المطبخي
ويقربكن اكثر للاكل الصحي
ويشهر هالمنتدي
ويحصل عالترتيب الاول بين المنتديات
قولن آمين
ونسيت ما دعيت لروحي
بس ما نسيتش نوقع اسم المنتدى على ارتفاع 7000 قدم فوق سطح البحر


http://www.libyan-kitchen.com/gallery/images/img7965.jpg


اتبقن علي خير

[التا ئبه لله]

السلام عليكم

هههههههههههههههههههههههههههههههههه

والله مك عاديه يعطيك الهنى بس
شن جابرك على هاالمغامره هههههههههههههه

الله يجزاك خير ولكى بالمتل

الله يحفطك يا عسل

[أم أيوب]

الله على منظر الثلج للاهم

مرة جانا في البيضاء ثلج واجد

خاصة منطقة سيدي الحمري في أول شتاء ليا هنا

من كثر ما انفعلت نين قريب اهبلت شعور روعة وانتي وسط الثلج

يابال في المكان اللي انتو فيه

ربي يوفقك ويقبل دعائك بس عندي تعليق بسيط

المفروض سجدتي في وسط اللي قاعدين عشان يعرفوا انك مسلمة

[ليبيا قلبى]

ووووووووووو
حسنى جمدت والله صقعدت
هاهاههاهاها
ماشاء الله
انشاء الله ايامك كلها حلوووه
وبارك الله فيك

[ام رواسي]

والله يا للاهم كنتى فاضيعة والرحلة مع الخوف يللى كان فيها لكن شكلها كانت ممتعة وبارك الله فيك على الدعوات وان شاء الله لما تدعينا فى بيت الله ؟؟؟

[كلمات]

السلام عليكم ...

للأهم >> منظر الثلج رووووعة .. عمري ماشفته في أرض الواقع كان في tv أو الصور زي هالصورة اللي حاطيتيها .. ماشفت غير التبروري عندنا :D
بس الحمد لله

تسلمِ وخيتي ع الصورة وع الدعوات وليك المثل ان شاء الله ..

[مغتربة 7]

الله الله يا حبيبة قصة مش عادية نتخايل فيك الحمد لله على السلامة وبارك الله فيك على الدعوات الحلوة وان شاء الله ربى يقبل وان شاء الله ربى يجبر بخاطرك

[تجويد]

عزيزتي للاهم الصور تعبر على انك استمتعتي بالرحلة وفكرتيني برحلة قمت بيها انا كانت في الفلبين بس مافيهاش ثلج كانت على قمم بركانيه عالية تصدقوا ان السحاب كان يمر من تحتنا والله بلا مبالغة وان شاء الله نرجع للصور وكان لقيت فيهم صور نقدر نوريهالكم توا نزلهم لان معظم الصور اغلبها كانت فيديو لكن والله فاتني ما دعيت حتى لنفسي .

[اريناس]

ههههههههههههههههه

عطك عصيده فى هاااجو المصقع

وجزاك الله خير

وان شااء الله ايامك ديمه زهااااء

[بنية بوها]

ههههههههههههههههههههه طبعا اني عشت معاك الجوو كخخخ وخفت في الاول قات انشالله غير يردوا
ههههههههه المهم انتي مش عادية وصحة ليه زوجك انا كمل الطريق وياربي يفتح عليكويعطيك كل ماتتتمني
ومنورة وااجد مش شويا

[طمطم]

هههههههههههههههههههههههههه يعطيك الهناء ياللاهم
فتحت موضوعك وانشغلت نرقد في ولدي رقدت معاه نضت نساوي في روحي لقيت موضوعك وليت نشطت

ضحكتني هلبة حكاية الفرينوات..... فكرتيني بموقف اميمتي تعصبت يوم على بوي وقالت له بلكنتها الليبية المكسرة بالمصري: حسن معاش تجري كدة هلبة... خفف شيوية ... انت تجري وانا ندوس فيرينوات راهو.... شن جابلي تعب الركب غيرك
وبدت عندنا زي الطرفة كل ما يجري بوي ويحسنا خفنا يقول شيدو فرينو شدو

الله يهنيك ويجازيك خير على دعوتك لينا....... لكن حكاية الدعوة فوق جبل هادي امممممممممممم جديدة علي

[ام اسر]

ممتعه كالعاده في طريقة الالقاء
بارك الله فيك وربي يناول كل وحده مافي بالها يارب
والعقبه لما تدعي في مكه يارب

[ابريكه]

والله ماك عاااااااااااااااادية انتي واسلوبك وهدرزتك ووسلمك دعاية يا سمحة واجرك حاصل ان شاء الله
وربي يعطيك لين يرضيك
والله الثلج هالايام مغطينا وحابسنا بالبيت خاصة اني اوخيتك صقاعة خاصة بالصبح مكرهني بالطلوع
بانتظار مواضيعك القنينة العفوية اللي تقراها وانت مبتسم ربي ما يغيب الابتسامة من حياتك

[للاهم]

ما هو ما بيتش نسجد جنب الناس اللي جايين يزلجوا ويفسحو ف كلابهم انا خشيت في مكان خاطي بالعاني عشان يكون طاهر
نسيت انقوللكن ان جاني شد عضلي من يومين وانا ماني قادرة نطبس نجيب حاجة ولا حتى نتقلب في الفارش
كل حركة بعيطة
كنت مستغربة منيش نين اذكرت حكاية الفرينلوات واذكرت لما زمط التلج كرعيا واضطريت نزحف بيش نطلع من الحفرة
عطك حبيبة انتِ وامك يا طمطم -
كنت نحساب الالم اللي قاصم لي ضهري بسبة الالم الللي حذرني الطبيب انه حيصير لي لما اجلت عمليتي
اليوم خذيت حبة مسكن تريحت وقدرت ندير لقة سلاطة مشرشحة ونسخن من غداء امس وراجلي يبحتلي بنص عيني وانا نبحت فوق ونصفر :)
شكرا علي تعليقاتكن وانسجامكن مع موضوعي هذا رفعتنلي معنوياتي
ربي يعطيكن ما تمنيتن
خطرها عالدعوة من فوق اعلاها جبل
ماهو انا ديما يوصوا فيا لما نطير فوق المحيط اني ندعيلهم
قلت شنو الفرق ماهو الجبل هذا اعلي مرات من الارتفاع اللي توصله الطيارة المهم النية واصلة

[طمطم]

يسلم كلامك العسل يا عسل وألف سلامة ليك حبيبة ما تشوفي شر...... ايش عندك بالضبط؟ علاش تبي عملية؟

وبالنسبة لزوجك... كملي ديريروحك مافاهمةشي لين تبري من هالشد العضلي

ولو عندك زيت كافور أو تقدري تحصليه ادهني بيه من غير مساج قوي...... وألف سلامة ياعسل

[أمـ ساره]

للاهم ربي يفتح عليك ويوفقك يارب

والله مواضيعك تريح النفس وتهدي المتعصب وتفرح القلب

واسلوبك ماشاء الله عليه في السرد عفوي وبسيط وايهبل والله


وعجبتني لقطة الفبرينوات هذه لأنه مرات اندير فيها حتى اني

وصحيتي على الزردة الحلوة والله عيشتينا معاك فيها وخاصة مع الأكل والحلو الي صورتيه لينا

وبارك الله فيك على الدعوات الحلوة واطمني الي يدعي بي يرزقه نفس الدعوات



ربي يبارك فيك وفي أهلك وزوجك وأطفالك يارب

[Om Amory]

ان شاءالله أيامك كلها فرح وسعاده

خاطرى فى التلج لين خلاااااااااص

موفقه حبيبه

[للاهم]

مراااارتي انفقعت طمطومتي

[للاهم]

ههههه ام سارة ماهو حتى كزت السنون فرينلوات عضوية
بدال ماتعدي للمية بيش ماترديش رد تندمي عليه لما يعقدك حد كزي سنونك هههه سنوني مشرشرات يتعجب فيهن الطبيب
ويقلوا مفيش حد اطيبواهدي وارق من للاهـــــــــــــــــــــــــــم
أه يا سنيناتي
هههههههه

[للاهم]

وايامك كلهن فرح وزهى ام عموري
حتى انا يا ما قلت خاطري فيه من وانا صغيرة واجد اشفته
واهو ربك كريم جابني الايام وشفته
عقبالك خيتي

[زينب محمد]

ولك بالمثل حبيبة حتى لو نسيت نفسك من الدعاء

بارك الله فيك والحمد لله على وصولكم بالسلامة

[*الليبية*]

مشكورة ياحبيبة على الدعوات الحلوة وانشاء الله ربي حي كافيك متلها بارك الله فيك وحمدالله على سلامتك وانشاء الله استمتعتي برحلة ربي يحفظك

[السمحة]

الله عليك للاهم مغامرة بالفعل انتى وزجك رحلة موفقة
وبارك الله فيك على الدعوات ولكى مثلهم حبيبتى

[فضااوي]

جزاك الله خيرا يالغاليه

ولك بالمثل

[ام سريوات]

الحمد الله عالسسسسلامة

[الساجدة لله]

يعطيك الهني ياغالية الصراحة اي رحلة مهما كانت صعبة مع اسلوبك وكلامك رح تكون عسل ويارب ندعولك عند بيت الله

[ranaa]

بارك الله فيك والحمد علي السلامه