للاهم
02-18-2011, 08:02 PM
خير يا بنات
انشاء الله كلكن طيبات وهلكن طيبين
وكل شي على مايرام
قالوا النت مقطوع عندكم
لعند ما تفرج ويفتح من جديد
يسمعني ربي عليكن الاخبار الطيبة
http://www.libyan-kitchen.com/gallery/images/ln47.jpg
اليوم جايبتلكم كيكة لفتت نظري هنا يشتهر بأعداها اهل جنوب امريكا من اصول افريقية وبالذات في لويزيانا المشهورة بالاكل الحار والمختلف اللي يمتزج فيه المطبخ الفرنسي والافريقي مع الامريكي في خليط لذيذ وقريب من مذاقنا
تدخل الباميا بشكل واضح في اكلاتهم
والكاكاوية وجوز العند من المطبخ الافريقي
وعندهم رز حااار يندار بالدجاج اصفر مبزر يرقد اللسان مديور من احر نوع فلفل موجود على سطح الارض اسمه جمبلايا شي مرة ننزله لكم
المهم الكيكة هذي حمرة واااجد لونها يلعلع يجيب من وين
ذقتها وراهي حلوة وخفيفة وما زايد عليها الا اللون من السهل اعدادها
ويسموها الكيكة الحمراء المخملية
المقادير
2 ونص كوب دقيق
وكان عندكن الكاس المقسم اوزان خير عشان تضبطن المقادير
1ونص كوب سكر
1 ملعقة صغيرة كربوناتا ( بيكربونات الصوديوم )
1 ملعقة صغيرة ملح ناعم
1 ملعقة صغيرة كاكاو
1 ونص كوب زيت ذرة
1 كوب لبن رايب بدرجة حرارة الغرفة
بيضتان حجم كبير بدرجة حرارة الغرفة
2 ملعقة صغيرة لون طعام احمر
1 ملعقة صغيرة خل ابيض
1 ملعقة صغيرة روح فانيليا سائلة او ظرف فانيليا
3 طاوات فرن9 في 1 ونص انش دائري - فكن انتن عاد هاللغز- مدهونات زيت المهم هن تلاتة طواجين صغار بيش اديرن كيكة من تلات طبقات
او طاجين كيك كبير حسب الطريقة اللي تبن تقدمن بيها الكيكة
تغليفة الكيكة هي كريمة الجبنة والطريقة تحت
لوز خزايني مجروش للزينة
الطريقة
سخنن الفرن الي درجة حرارة 350 فهرنهايتية ومش عارفة شنو مقابلها في افرانكم
ادهنن الطاوات بالزيت وغلفنهن بالدقيق كالمعتاد
في صحن غريق غربلن الدقيق مع السكر والكربوناتا والملح والكاكاو
في صحن الخلاط او صحن غريق اخر اخفقن الزيت مع اللبن والبيض واللون الاحمر والخل والفانيليا
اضيفن المكونات الجافة اللي غربلتنهن بالتدريج احسن خير ماتقلبن الدنيا عجاج
مش ناقصنا تنضيف واعادة رسم العين وغسل الشعر
اخفقن لعند الوصول الي خليط ناعم
وتعرفن عاد قوام الكيكة
قسمن المقدار على التلات طواجين اوكله في طاجين كبير
حطن الطواجين على مسافات متساوية من بعضهن في الفرن
خلنهن يرتفعن
مع تدوير الطواجين من حين لأخر طول عملية الطياب
شكلهن مش حينفشن من حلة باب الكوشة باعتبار ان الكربوناتا اقوي من البايكنق باودر
بس اللي خاف سلم
ما تحلنش عالكيكة نين تطمنن انها مش حتهبط
تهيالي يديروا هكي بيش يطيبن مع بعضهن وبالتساوي
لما تحسن ان الكيكة بدت تسحب من جوانب الطاجين معناته طابت هكي يقولوا
اما انا نجرب بتخشيش موس نين يطلع معايا ناشف
وراكن عاد تثخنن الكيكة بالطعنات نين تتكسر النصال على النصال
هههه حالة حرب في العالم العربي كله مأثرة عليا
يستر الله ويحفظ الجميع
المهم الكيكة تاخذ نص ساعة طياب
وراهو مغير سبقت ف الكلام لأني حالة صفحتين نقرا من الانجليزية ونترجملكن طول في الوورد
ان شاءالله نحج ديما بصلتي محروقة
قالو بزوا الكيكة بعود سنون بيش تشوفوا كان طابت والله لا
شفتن الفرن هم بزة ونحن طعن بالسكاكين
واك
طلعن اليكات من الفرن وسرحنهن بالدور الداير بموس وهابا كان تيفال عدن فيها
اقلبنهن في صواني وبعدين ردن حطنهن عالشباك يبردن عالاخر
مش الروشن
اكيدة تعرفن شن نقصد
توا جا دور التلبيسة
مقاديرها
علبة جبنة كريمة مخفوقة بيش تلين تهيالي فيلادلفيا كويسة
4 كوب سكر ناعم
كوب زبدة غير مملحة رطبة
ملعقة صغيرة فانيليا
اسمعن ان ذايقتها جماعة هنا غالي عليهم الكريمة الدسمة نين مرات ماتقدرن تاكل اكثر من فويم
نصيحتي وتهايلي خليكن عالكريم شانتيه والا استمرن مع الطريقة الاصلية دق ووثق
خلطن الجبنة مع السكر والزبدة لعند تصبح ناعمة ومهوية فلفي يعني حوالي خمس دقايق
وعاد مع انزال ماعلق في جوانب صحن التخليط والحاقها بالخفق بالسباتولا الكاشيك المطاطي عرفتنا ؟ كان عرفتنهن قولنلي شن اسمها بالعربي تربحن
خففن سرعة الخلاط وزيدن الفانيليا وعلن السرعة من جديد مع كحت الجوانب بعمتك السباتولا
حطن التلبيسة في التلاجة لعند تتماسك
قالو ممكن تقعد ف التلاجة تلات ايام
معناته الوحدة منكن ديما يكون عندها من تلبسة جبنة الكريمة جاهزة كل ما خطرلها ادير الكيكة الحمرة
ابدن عاد مدن الكريمة علة اول دائرو من الكيكة
بموس التمليس طبقة عالية شوية
وحطنا الدائرة التنانية وكريمة والدائرة التالتة
وافردن باقي الكريمة على الكيكيات وملسنها كويس
ورشن الخزايني المجروش عليها من فوق او على الاجناب كيف ما تحبن
وانا اكيدة انكن حتتفنن فيها نين وتطلعن باشكال جديدة
ربي يحفظ الاهل والاحباب ويجيب اللي فيه الخير للبلاد
انشاء الله كلكن طيبات وهلكن طيبين
وكل شي على مايرام
قالوا النت مقطوع عندكم
لعند ما تفرج ويفتح من جديد
يسمعني ربي عليكن الاخبار الطيبة
http://www.libyan-kitchen.com/gallery/images/ln47.jpg
اليوم جايبتلكم كيكة لفتت نظري هنا يشتهر بأعداها اهل جنوب امريكا من اصول افريقية وبالذات في لويزيانا المشهورة بالاكل الحار والمختلف اللي يمتزج فيه المطبخ الفرنسي والافريقي مع الامريكي في خليط لذيذ وقريب من مذاقنا
تدخل الباميا بشكل واضح في اكلاتهم
والكاكاوية وجوز العند من المطبخ الافريقي
وعندهم رز حااار يندار بالدجاج اصفر مبزر يرقد اللسان مديور من احر نوع فلفل موجود على سطح الارض اسمه جمبلايا شي مرة ننزله لكم
المهم الكيكة هذي حمرة واااجد لونها يلعلع يجيب من وين
ذقتها وراهي حلوة وخفيفة وما زايد عليها الا اللون من السهل اعدادها
ويسموها الكيكة الحمراء المخملية
المقادير
2 ونص كوب دقيق
وكان عندكن الكاس المقسم اوزان خير عشان تضبطن المقادير
1ونص كوب سكر
1 ملعقة صغيرة كربوناتا ( بيكربونات الصوديوم )
1 ملعقة صغيرة ملح ناعم
1 ملعقة صغيرة كاكاو
1 ونص كوب زيت ذرة
1 كوب لبن رايب بدرجة حرارة الغرفة
بيضتان حجم كبير بدرجة حرارة الغرفة
2 ملعقة صغيرة لون طعام احمر
1 ملعقة صغيرة خل ابيض
1 ملعقة صغيرة روح فانيليا سائلة او ظرف فانيليا
3 طاوات فرن9 في 1 ونص انش دائري - فكن انتن عاد هاللغز- مدهونات زيت المهم هن تلاتة طواجين صغار بيش اديرن كيكة من تلات طبقات
او طاجين كيك كبير حسب الطريقة اللي تبن تقدمن بيها الكيكة
تغليفة الكيكة هي كريمة الجبنة والطريقة تحت
لوز خزايني مجروش للزينة
الطريقة
سخنن الفرن الي درجة حرارة 350 فهرنهايتية ومش عارفة شنو مقابلها في افرانكم
ادهنن الطاوات بالزيت وغلفنهن بالدقيق كالمعتاد
في صحن غريق غربلن الدقيق مع السكر والكربوناتا والملح والكاكاو
في صحن الخلاط او صحن غريق اخر اخفقن الزيت مع اللبن والبيض واللون الاحمر والخل والفانيليا
اضيفن المكونات الجافة اللي غربلتنهن بالتدريج احسن خير ماتقلبن الدنيا عجاج
مش ناقصنا تنضيف واعادة رسم العين وغسل الشعر
اخفقن لعند الوصول الي خليط ناعم
وتعرفن عاد قوام الكيكة
قسمن المقدار على التلات طواجين اوكله في طاجين كبير
حطن الطواجين على مسافات متساوية من بعضهن في الفرن
خلنهن يرتفعن
مع تدوير الطواجين من حين لأخر طول عملية الطياب
شكلهن مش حينفشن من حلة باب الكوشة باعتبار ان الكربوناتا اقوي من البايكنق باودر
بس اللي خاف سلم
ما تحلنش عالكيكة نين تطمنن انها مش حتهبط
تهيالي يديروا هكي بيش يطيبن مع بعضهن وبالتساوي
لما تحسن ان الكيكة بدت تسحب من جوانب الطاجين معناته طابت هكي يقولوا
اما انا نجرب بتخشيش موس نين يطلع معايا ناشف
وراكن عاد تثخنن الكيكة بالطعنات نين تتكسر النصال على النصال
هههه حالة حرب في العالم العربي كله مأثرة عليا
يستر الله ويحفظ الجميع
المهم الكيكة تاخذ نص ساعة طياب
وراهو مغير سبقت ف الكلام لأني حالة صفحتين نقرا من الانجليزية ونترجملكن طول في الوورد
ان شاءالله نحج ديما بصلتي محروقة
قالو بزوا الكيكة بعود سنون بيش تشوفوا كان طابت والله لا
شفتن الفرن هم بزة ونحن طعن بالسكاكين
واك
طلعن اليكات من الفرن وسرحنهن بالدور الداير بموس وهابا كان تيفال عدن فيها
اقلبنهن في صواني وبعدين ردن حطنهن عالشباك يبردن عالاخر
مش الروشن
اكيدة تعرفن شن نقصد
توا جا دور التلبيسة
مقاديرها
علبة جبنة كريمة مخفوقة بيش تلين تهيالي فيلادلفيا كويسة
4 كوب سكر ناعم
كوب زبدة غير مملحة رطبة
ملعقة صغيرة فانيليا
اسمعن ان ذايقتها جماعة هنا غالي عليهم الكريمة الدسمة نين مرات ماتقدرن تاكل اكثر من فويم
نصيحتي وتهايلي خليكن عالكريم شانتيه والا استمرن مع الطريقة الاصلية دق ووثق
خلطن الجبنة مع السكر والزبدة لعند تصبح ناعمة ومهوية فلفي يعني حوالي خمس دقايق
وعاد مع انزال ماعلق في جوانب صحن التخليط والحاقها بالخفق بالسباتولا الكاشيك المطاطي عرفتنا ؟ كان عرفتنهن قولنلي شن اسمها بالعربي تربحن
خففن سرعة الخلاط وزيدن الفانيليا وعلن السرعة من جديد مع كحت الجوانب بعمتك السباتولا
حطن التلبيسة في التلاجة لعند تتماسك
قالو ممكن تقعد ف التلاجة تلات ايام
معناته الوحدة منكن ديما يكون عندها من تلبسة جبنة الكريمة جاهزة كل ما خطرلها ادير الكيكة الحمرة
ابدن عاد مدن الكريمة علة اول دائرو من الكيكة
بموس التمليس طبقة عالية شوية
وحطنا الدائرة التنانية وكريمة والدائرة التالتة
وافردن باقي الكريمة على الكيكيات وملسنها كويس
ورشن الخزايني المجروش عليها من فوق او على الاجناب كيف ما تحبن
وانا اكيدة انكن حتتفنن فيها نين وتطلعن باشكال جديدة
ربي يحفظ الاهل والاحباب ويجيب اللي فيه الخير للبلاد