المساعد الشخصي الرقمي

مشاهدة النسخة كاملة : لأجل ثوارنا في الجبهات يرجى الدخول بالله عليكم



أمـ ساره
09-18-2011, 10:32 PM
السلام عليكم ورحمة الله وبركاته



مهم جداً جداً جداً

للأسف أغلب السياسين واصحاب المراكز والمعارضين السابقين وبعض الشخصيات

وبعض الناس وكل القنوات الليبية الجديدة لا هم لها إلا الانتقادات والحكومة الجديدة

وسب وشتم بعض الشخصيات أو تشكيل الحكومة ومن يحق له ومن لا يحق له المشاركة


في الوقت الذي من المفروض ان يصب الاهتمام لثوارنا الأشاوس المرابطين بالجبهات

ليس بالكلام فقط ولكن بالفعل والعمل لأن هذا من واجبهم وواجبنا نحن أيضاً


لأنهم يحتاجوا للدعوات وللتموين ولكل شيء ممكن أن الواحد يتخيله والله مساكين يعانوا

كثيراً كثيراً كثيراً وخاصة ان اليوم مشت قافلة من مسلاته لأحد الجبهات مليانة بالمؤن والغذاء

والماء والملابس على اساس مساندتهم ورفع معنوياتهم ولكن وللأسف وجدوهم يعانوا كثيراً

من قلة الغذاء والمؤونة وحتى الماء وهذا بلسانهم هم قالوا بأنهم لا يجدون حتى من يؤمن لهم

الماء والله حالتهم يرثى لها

فـ ياريت ياريت نديروا لهم الأولوية لأن لولاهم لما تحررنا ولما عشنا لحظات الحرية وشمينا

نسيمها

فـ بالله عليكم أخواتي لكل من يستطيع أن يعمل جمعية أو حفل خيري او اي شيء لمساعدتهم

وجمع التبرعات والمؤن وكل ما يلزمهم

أو أضعف الايمان تنظيم مظاهرة حتى يلتفت لهم المجلس الانتقالي والمكتب التنفيذي



الله ينصر ثوارنا ويحفظهم يارب ويردهم لأهلم سالمين





لا حول ولا قوة الا بالله




بالله انشروها

سحابه صيف
09-18-2011, 10:48 PM
والله صدقتي تعرفي

وخاصة في هل القنوات الجديدة الي ما فيها كان فتنية وهنا احرف منقناة القنفود

فالحين كان ايجيبو في اغاني ودوة فاطية والتوار دمهم ينزف بدل ميجيبو تكبيرات وادعية خاصة هل ايام او اوعو

الناس كيف يساعدو التوار وكيف يوصلو لمؤن و محتيجات التوار الضرورية وهما شادينها كان هداكه متسلق

وهداكه طحلب هدا مش وقته كله المفروض ايشد ايدن بعض لين ايحرور هلي المدن الي مش متحررة وايحاولي

اصورة الصورة الكويسة للمجلس باش الناس ترتاح ويطمنوهم بان البلاد ماشية كويس مش كل يوم طالعينا

وايقولو هداكة باهي وهداكة لا هدا كله مش وقتااااااااااااااااااااااااااااااا


وربي يهدي

سحابه صيف
09-18-2011, 10:51 PM
بالنسبة للعشاء الخيري حنا هنا ديما انديرو وايقولو يبعتو فيها للتوار وان اشاء الله ربي ايقدرنا وانزيدو انساعدوهم

اكتر

زينب محمد
09-18-2011, 10:51 PM
بارك الله فيك ام سرو

الكل ينتقذ والكل يتسابق من اجل نيل كرسي ونسوا الشباب الذين قاموا بهذه الثورة والذين لازالوا في الجبهات

ولايصل اليهم شيء الا من خلال التبرعات والاعمال الخيرية

الله يهديهم ويصلح رأيهم ويسدد رمي ثوارنا ويحفظهم وينصرهم

أمـ ساره
09-18-2011, 10:55 PM
بارك اللهم فيكم وخياتي

والله لو تشوفوا الصور متاعهم كيف ياكلوا وفرحانين بالمؤن الي رفعوها ليهم

والله منظرهم يقطع القلب قسماً بالله

ربي يهدي الجميع يارب ويلتفتوا للأمور المهمةوالضرورية توا



حسبي الله ونعم الوكيل الواحد شنو بيقول غير هالجملة هذه

ليبية
09-19-2011, 03:29 AM
حسبنا الله ونعم الوكيل في اللي كان السبب

والله ربي يهدي العباد وربي يقدرنا على فعل الخير

الساجدة لله
09-19-2011, 03:49 AM
بارك الله فيك على اللفته الطيبة وبااذن الله مانقصرو معاهم بس لازم الجهات المختصة توقف وقفة بجد مش مجرد وعود وبس وبعدين احنى نبو ولادنا مش نبو فلان والا علان يقعمز على الكرسي المهم التوار والجرحى بعدين كل شئ انديروه وعلى مااعتقد ان هده اخر فرصة للجهاز التنفيدي لان لو الشئ هدا استمر مش حنسكتو ولادنا ورجالتنا تبهدلو وهما مقعمزين في التكييف

79nana
09-19-2011, 04:04 AM
والله ياوخياتي كلامكم زين الكلام والله في ناس نسمع بيها شن اتدير لين راسي يسخن ونمرض اما هالقناوت وخاصتا لبيا الاحرار نسمع منه في ناس تدوي نقول شورها من جماعته مش من التوار لين نمشي نتاكد من العويلة في البلاد ويقولولي مافيش هداي الدوة نفرح وبعدين لما لقيتهم زادو علي ماوصوه معادش نفتح فيها مرة وحدة
الواحد يبي بلاد فيه الخير والهني خير والهني مايجيش بالخبت والتسلق وغيره يجي بالتقرب من الله في كل كبيرة وصغيرة نتبعو فيها سنة حبيبنا محمد والشرع باش نتقدمو اما مش بالتسلق والتملق الله يارب يهدهيهم ماعلينا الا الدعاء وتقديم النصيحة لكل من نعرفه والتدكير

بارك الله فيك اختي ام سارة واختي زينب على التدكير والله والله كل يوم يزيد حبي ليك في الله وسعادتي بمعرفتك

اعتدر جدا على عدم تواصلي بسبب الضروف ولاكن بادن الله اعدكم اول ماتتحسن ضروفي ساتواصل معكم قلبا وقالبا

تحياتي ليكم جميعا اخواتي التائرات في القلب والجيب والبدن

تحياتي للجميع

ام عبدالمعز
09-20-2011, 05:28 PM
بارك الله فيك ام سارة

وان شاء الله ربي يقدرنا جميعاً علي فعل الخير

وربي يهدي الناس زي ماقلتي مش وقته

حنان
09-20-2011, 08:29 PM
لله ينصر ثوارنا ويرحم شهدائنا يارب والله يابنات الا حالة
ناسين الثوار ويتجارو فى جرة الكرسى
وها الفتنة الى صايرة بين الناس الله المستعان
انا والله ماهامنى غر الثوار بس وكل ما نسمع بمعاناتهم نمرض
يارب يفرج عليهم يا بنات مفروض نظمو مسيرة
من اجل اعانة الثوار هدا احسن حل

guidona
09-22-2011, 09:11 AM
السلام السلام عليكم ورحمة الله وبركاته
يعطيك الصحه ياام سرو علي هلكلام الزين والله اني مسببلي مرض ومرضت منه الموضوع هدا الناس الي امقعمزه في قنادق خمسه انجوم يتسابقو علي الكراسي وبدل ميساندو الثوار والمناظق الي تعاني ينقدو في بعض والله يحكيلي زوجي لما كان في الجبهه ان كل منطقه اخشولها الثوار الناس تفرح وكيف كانو الثوار اعانو في الشمس ويقسمو في الخبزه مع بعض والميه لما يشربو كان لما يلقوها تمت كل واحد اودها لخوه الثاني والله مواقف شجاعه وكل من مشي للجبهه مكان نيته لافي كرسي ولا في منصب ولا مال كلهم لبو نداء بلادهم من الداخل والخارج وربي ينصر توارنا في كل مكان ويفرج علي بلادنا وتتحرر كلها يارب

ناني2007
09-22-2011, 01:41 PM
مشكورة اختي ام سارة وجزاك الله كل خير

الله ينصر ثوارنا ويرحم شهدائنا ...ربي يقدرنا على فعل الخير

Om Saga
09-22-2011, 03:18 PM
فعلا أختي أم سارة
الفتن في القنوات والكلام على الفيس بوك على الحكومة و المجلس ليس
في وقته بكل
فيه ثوار جرحى فيه أسر متشردة فيه ناس حتى الفلوس ماعندهمش باش يشرو
ضروريات الحياة توه المفروض التركيز على الألويات مش إلي هاد يبي يستفيد
هدا معمر شن ربي فيهم حب الأنانية وأنا مانتكلمش على ثوارنا أني نتكلم على المتسلقين
والله نتمنى نساعد بلادي الغالية بكل ما أملك ربي عالم
وراح ننشرو الخبر أم سارة
وشكرا لكلامك ووطنيتك

نسيبة
09-22-2011, 03:53 PM
لا يزال الكثير من ابناء شعبنا يعانون من جراء نقس الكثير من المعونات
و المساعدات الطبية والثوار يسابقون الزمن لتحرير
مالم يتم تحريره من كثائب الطاغية
كم نحتاح الى مد يد المساعدة لكل محتاج
و التسايق على المناصب و الكرسي ليس بالوقت المناسب
هدى الله الجميع لما فيه خي ليبيا الحبيبة

snaaaa
09-22-2011, 11:52 PM
اخواتى خلو كلامنا عملى يعنى بنشر متل هدة التنبيهات عن توار الجبه او تقديم المساعدات الماليه وانا افضل لو ايكون فى حساب فى احد المصارف الناس تودع فيه ما كتب الله لمساعدة الثوار فى الجبهه او ايصال طعام ومؤن او اى فكرة اخرى يتم تطبيقها على ارض الواقع فى هدا الوقت

أمـ ساره
09-23-2011, 12:16 AM
بارك الله فيكم اخواتي وجزاكن الله كل خير

وربي يقدرنا نقدموا ولو الشيء البسيط لبلادنا الحبيبة وثوارنا الأشاوس



بالنسبة لإقتراح الأخت سنا

فهو رأي جيد ومقترح كويس جداً

ولو فيه حد يقدر يفتح حساب معين ويتم التبليغ برقم الحساب حتى نساهموا فيه


أما بالنسبة لإيصال المؤن والطعام والماء والحاجيات اللازمة

فهذه تتوقف على كل منطقة يتفقوا أهلها مع بعضهم ويرسلوا قوافل


وهذا الي قاموا بيه أهل مسلاته والحمد لله

لكن لازم أغلب المدن والمناطق تتحرك لأن الجبهات متعددة ولازم يتم تغطيتها كافة




ومن عندها فكرة ياريت تطرحها هنا أو تبلغنا بأي فكرة أو عمل قائمة به جهة معينة حتى يتم التعميم

ام عبد الله السلفية
09-23-2011, 05:44 PM
بارك الله فيك ام سارة على مواضيعك المميزة والنافعة

وان شاء الله ربي يقدرنا جميعاً علي فعل الخير

وربي يهدي الناس زي ماقلتي مش وقته شى يحرق الدم يعلم الله بحالنا...... الله المستعان ولاحول ولاقوة الا بالله

بنية بوها
09-27-2011, 04:27 AM
اي والله صدقتوا ربي يفرج علي توار بلادنا ويحررها ياااارب ويهدي نفوس الشعب الليبي

ملكةالرومانسيه
09-28-2011, 04:58 AM
السلام عليكم ورحمة الله وبركاته
بارك الله فيك ام سارة

وان شاء الله ربي يقدرنا جميعاً علي فعل الخير

وربي يهدي الناس زي ماقلتي مش وقته

أم إيناس3
09-29-2011, 07:57 PM
السلام عليكم
بارك الله فيك ام سارة
انشاالله ربى يقدرنا ونساهموا فى بناء ليبيا الحبيبة والله الصراع اللى صاير ماوقته
المهم يجنا الشخص الكفؤ واللى يخاف الله والصادق واللى قلبه على ليبيا واللى يهمه مساعدة الليبين

saliamr
10-07-2011, 08:01 AM
السلام عليكم
بارك الله فيك اختي ام سارة والله الثوار محتاجين دعم منا.. خوي ربي يحفظه في جبهة سرت بس قال ان في ناس واجد تساعد فيهم والوكال والشرب يجيهم من كل مكان.. الأهم من هذا كله هو الدعم النفسي لما يحسوا انهم ماشيين بيش يحرروا ليبيا ويوحدوا كلمتنا، بس للأسف ان كل مجموعة تبي مصالحها وبس والله تميت كل ما نفتح الفيس نفسيتي تتعب من اللي نقراه قاعدين غير يتعاركوا ع الفاضي,, مع هذا كله متفائلة ان بكرة حيكون احسن بعد تتحرر كل ليبيا..
يارب انصر ثوارنا واحفظهم وتقبل كل من يموت شهيد عندك واجعل مثواهم الفردوس

ام بيلسان
10-07-2011, 08:12 AM
ايه والله حق وصدقتي ياام سارة
وربي ينصر ثورنا ويجوبو بوشفشوفة ويكره مع هذب عيونه

ملكه بنقابي
10-07-2011, 05:50 PM
الله يكون في عون البلاد والعباد

إيمان ليبيا
10-10-2011, 01:57 AM
السلام عليكم:شكرا أم ساره على الكلام الرائع وأنا نوقف معاك فى كلماتك التى قلتيها على الثوار ألاسود...

Om Amory
10-12-2011, 07:45 AM
بارك الله فيك على الموضوع حبوبه

وان شاءالله ربـــى يكون معاهم ياااارب

lolo1971
10-15-2011, 01:38 PM
اصلا الى واخذعاى حاجه يبيها لان بوشفشوه زرع فيهم حاجات مش من طبع الليبين الطيبين وربي ينصر ثوارنا وتنجح ثورتنا

سيدة ليبية
10-16-2011, 03:35 AM
ومش عارفة ايش بنقولوا ع عرض الازياء بالملابس الخليعة اللي غريبة عن مجتمعنا ... عرض ازياء كلمة جديدة وغريبة وغير مقبولة في الوقت الحالي ... والدماء تسكب من غير حساب واليهودي لازال حر طليق ...ونشهد في طرابلس عرض ازياء اليوم كانت بلنسبة ليا صدمة ... لالاوالنساء الليبيات اللي حاضرات لابسات محتشم وهم قاعدين يتفرجوا ع عرض لبنات واشباه الرجال ... بملابس غريبة ع تقافتنا ...
لاحول الله

بنغازية
10-16-2011, 12:16 PM
اللهم المدد المدد يا الله اللهم ان كان ثوا رنا ضعفاء فقوهم وان كانوا جياعًا فاطعمهم وان كانوا عطاشا فاروهم
بشربةً لا يضمأوا بعدها أبداً وردهم الينا سالمين غانمين يالله

guidona
10-16-2011, 01:37 PM
يارب يحمي البلاد ويبعد عنا الفتنه يارب