رد الفعل للوهلة الأولى

[نعومي نت]

السلام عليكم ورحمة الله وبركاته
الأخوات حرائر ليبيا
حرائر المنتدى
أرجو من كل حرة تقراء الموضوع وتتفاعل معانا وتقول شن كان رد فعلها أول ما سمعت بخبر إعتقال المشفشف لا لا نسيت مش في الحلقة الأخيرة طلع أصلع وبعدين لما شافت صورته وهو ميت المهم ومن الاخير تحكيلنا شن ردت فعلها من إللي صار اليوم من تعاقب للأحداث ويلا نبداء بسم الله

[تجويد]

اني بصراحة كانت مشاعري غريبة مش عارفة نقدر نوصفها بتناقض مشاعر وهو فرحانة بشدته ومش فرحانة بموته وفي نفس الوقت ما نبيش ثوارنا يلطخوا ايديهم بدمه المعفن خلوه يموت جيفة حاشاكم لكن الله واكبر ولله الحمد ويارب الوقت الجاي خير من السنين اللي فاتوااللهم اميييييييييييييييييين .

[أم أيوب]

لقيت روحي ننقز ونطير ونسيت اني حامل

فرحة ما نقدرش نوصفها

دموع وعياط وهتاف وسجود وتكبير معش عرفت شني بندير

اللهم لك الحمد كما ينبغي لجلال وجهك وعظيم سلطانك

[نعومي نت]

اني اليوم كانت عندنا عزومة في حوش ام الجميلات وعابيه عليا بنطيب الغدي وقبل ما نبداء في التطيب أتحفني عمي بالخبر السعيد لكن والله ما صدقت صار معاي زي ما صار مع الراعي والذئب شدوا سيف لا ما شدوشي خميس مات لالا ما ماتش اعتقلوا معتصم لا ما اعتقلوشي المهم شوية والدنيا قريب إنقلبت شي كلاكس وشي رصاص ركبت لحوش العيلة اكدلي ولد حماتي الخبر ما نحكيلكمش علي شعوري هديكا اللحظة نبكي ونضحك نركع ونسجد لربي المهم الغدي ما نحكيلكمش كيف طيبته ما نعرفش كيف طاب أصلاً إيد في الغدي وإيد في التلفون نتصل بالعية والاصحاب نتصل ونزغرط ونسكر المهم طاب الغدي ولله الحمد وطلع حلو والحمد لله والله يا ناس ما مصدقة بيني وبين نفسي إنقول بالك غدوا إن شاء الله كان نوضت نلقاه خبر كاذب وبعدين إنقول لنفسي كاذب حتى بعد ما شفتي صورته ميت ها الجيفة علي قوله جوجو يذكرها بالخير.......
والله اكبر الله أكبر الله أكبر ولله الحمد..........

[Om Saga]

مشكورة على موضوعك الحلو فرحت وين لقيته
هذا ياحنانه إست أم سجى مقعمزة مادة وجهاها قدام الاب توب نسمع في الكلاكصات نقول ماشاء
الله اليوم عراس هلبة إلعفو وشن يكلكصو في النهار شكلهم الشباب يهيجوووووووو شوفو الغباء
ههههههههههههه ونسمع في الرصاص نسحابة في رتل مروح من بن وليد بيمر على غريان وإنتم عارفين
موتية الكاميرا بتصور الست أم سجى الرتل هههههههههههههه غبية مافيش كلام
فاتحة منتدى المطبخ لقيت أم عموري تبارك بالمشفش شنووووووووووووو شدوه نضت نجري للرموت
غيرت العربية لقيت الخبر الجزيرة لقيت الخبر قريب طلعت البلاكونة بلا وشااااااااااح إمتع وحدة بتسأل الشباب
خلاص معاش فيا عقل ههههههههههههه حتى الحجاب نسيته طلعت نشبح في السيارات ونسمع في الرصاص
قلت أه وأني نقول شنو هذاااااااااااا
خشيت نجري حشاكم كلمتني جارتي قتلي زعمك حق قتلها إن شاء الله أني طبعا على طول درته حق حسيت روحي فرحانة هلبه ومصدقة الخبر
تمنيت عندي كلاشن نبي نفرغ في الهواء عندهم حق ثوارنا من الفرحة يفرغو في الهواء حسيت بشعورهم
ماأكثر دوتي هههههههههههههههه والله قريب طرت نبي نطير خلاص وقتلكم كان لقيتو وحدة إطير راني أني
وين شبحت الصورة والفيديو قعدت إنقز من الفرحة ونصفق بروحي زي المهبولة ههههههههههههههههه
ولدي يشبح فيا يناري يقول ماما خيرها إتصلت بإبن عمي لقيتة قريب يطير فرحاااااااااااان
كلمتني أم عموري قتلي الدنيا قريب إطير فرحانين الشباب
وبعدين في الليل عملت كيكة بمناسبة النصر
وكملت قصتي ههههههههههههه

[أمـ ساره]

والله يا حبيبة اني قصتي مختلفة شوي عليكم

هذا يا حنة وخيتكم راقدة 8 الصبح من التعب والوجع قعدت راقدة ما نندري على روحي

حتى بنتي عند حناها بعثتها الصبح باش نرقد

وبعدين نضت على صوت تليفونات اترن

سلفي وراجلي يتصلوا بيا وكل واحد في مكان هم

رديت على سلفي وعيوني مسكرة حسبته راجلي

قلت له خيرك تتصل على التيلفونات الزوز والحمد لله سلفي جنبه دوشة ما سمعني كويس

قال لي شوفي شنو فيه في التلفزيون قلت له ان شاء الله خير

قالي شوفي وبشريني فتحت التلفزيون ولقيت الخبر

اتسمرت في مكاني حاشاكم حتى بنتصل براجلي ما عاد عرفت كيف

اتصلت بيه وجي خبر القبض على القذافي قالي مازال مش اكيد ما تقولي شيء

وطول الوقت وبدون وعي نكبر وندعي

فتحت النت وشادة الريموت في ايدي نقلب في المحطات ونتصل بالتليفون الارضي بأمي واختي

وبراجلي وسلفي بالنقالات -- حتى المراسلين ما داروا زيني اليوم


والله يا بنات حتى مرضي ووجعي نسيته (( في الليل بس ولى علي الوجع ))

حتى الماكلة ما درت شيء كلينا خفيف بعد المغرب



والله اكبر الله اكبر الله اكبر ولله الحمد

[مغتربة 7]

(عياااااااااااط على طول صوتي وانزغرط ليييييييييين بحيت)

فى البداية

اتصلت بيا صاحبتي وقالت افتحي معمر شدوه طبعا فى الاول بكل ما صدقتش
بعد ما اتصلت بامي الغالية ولقيتها تزغرط على جنابها قولت لا الموضوع حق
وبعدين بشوية بشوية بديت نستوعب
فتحت المسنجر مع امي واخواتي وتزغريط وغني على طول حسي قسما بالله ليييييين صوتي هرب واننقز راني بنطير من الفرحة
الله ما اجملها من لحظات مش بس للشعب الليبي ولكن للامة الاسلامية بالكامل حمدت الله وسجدت وشكرت رب العالمين
اللهم لك الحمد والشكر ربي يولي علينا خيارنا ويبعد عنا شرارنا ..اميييييييييييييييين

[بنية بوها]

تعالوا لقصتي مالا اني اوخيتكم رقدت الساعة 5الا طفيت اللابتوب 4ونص بتوقيت ليبيا كان الساعة
10 الصبح طبعا احني رقدنا ونوضتنا بنتي الساعة اتنين مشي فتحنا النت القينا الاهل معانا هدرزنا وشفنا الاخبار
ونعسنا وراحت علينا نومة الساعة 9الا اللي هوا في ليبيا قريب الساعة3 نسمع في راجلي يقولهم خيركم
مكلميني شن فيه على اساس مسكرين والامور تمام وعشرين مكالمة من ليبيا ييقولهم شدوه واني ننقزز ماندريش علي روحي كيف وصلت الصالة ونعيط طول جاب عقلي القدافي شدوه ونجري بين الفيس بوك والاتصالات
وشعور لتوا بنطيررررررررر مش عارفة نوصف الحق والحمدلله وهده نهاية كل طاغية ولله الحمد
نجيهم توارنا ياربي بدون تخصيص وطبعا سبلة والقيتها راهو اليوم مش خاشة للمطبخ مشت اوخيتكم بنية بوها
ضربتها في الصيني ليييييييييين داخت وررررررررروووووووووووووررررررري وسلام

[ليبية]

تكبير يا بنات تكبير
الله اكبر الله اكبر الله اكبر ولله الحمد


الحمدلله رب العالمين

والله شعوري ماينوصفش بجد


تعرفوا اني كنت في حوش بابا


اول ماسمعت الخبر سمعت بخبر تحرير سرت بس اتصلت بيا وحدة قريبتي وقالتلي عليه

فرحت بالخبر وقعدت نكبر والله اكبر


بعدين قعدت نتصل بالتليفونات

كلمت حماتي وكانت فرحااااااااااااااااااااااااااانة

وقعدت نكلم في العويلة

قلت خلي نفتح الأخبار

وبعدين جي خبر القبض على الطاغية لكن بدون صور

بصراحة قعدت نكبر ونهلل ونعيط ونزغرط المهم جاني خوي قالي ياسر بلا هبال خلي نتأكدو قبل

نضت قلتله تعرف معاك الحق (احني الليبيين يا اما نية يااما ما نتخذوش العبرة)
يعني على قد ماكذبوا علينا وعلى قد ماطلعت اخبار كذب على قد ما قدرتش نشد روحي زغرطت تاني

قعد يشبحلي خوي وخواتي الصغار هذي (خيرها؟؟)

اتصلت بسلفتي نباركلها تحرير سرت ناضت قالتلي شفتيه وين شدوه؟

وين شدوه؟؟ (نكلم في روحي من هو؟؟؟) قالتلي راح في حالة ( قلت اه اكيدة المعتصم ) قالتلي مالا بوبكر يونس

شكله في حالة

تعرفوا هبال يوم امس عالمي


ويارب يتمم علينا بالهني على بلادنا والخير


ومبارك عليكم



تكبير

[ناني2007]

والله انا نتفرج سمعت بتحرير سرت اول شئ ...في خاطري قلت ان شاء الله يلقو الطاغية

بعدين شفت الخبر اول ماكتبوه في ليبيا الاحرارمن غير مانشعر جيت واقفة وحسيت برعشة في جسمي وبعدين

قعدت نغير في القنوات حتى نتأكد من الخبر...والله من غير مبالغة ساعة وانا واقفة كل مابنجي نقعمز نلقى روحي

واقفة...وكل مرة يتصل بي حد من احبابي يباركو على مقتل الطاغية...بصراحة كان يوم غير عادي

[بنت طبرق]

صباح الحرية
والله نحنا امس في الحوش حاله غريبة بكل
كنت برا الحوش في الصبح وشفت خبر تحرير سرت في تلفزين محل روحت للحوش واتصلت بخوي في بنغازي نسأل عن اخبار شبابنا اللي في سرت وفجأة نشوفوا عالتلفزيون خبر الاعتقال وماصدقت بكل في الاول لأني كنت نقول ان معمر خارج ليبيا مش في ليبيا بكل
وقعدت الاخبار تتوالى وانا نتصل بزوجة خوي واختى لأنهن امهات شهداء ونفرح فيهن بالخبر لعند جابوا الصورة
انقلب حزننا على عبد السلام وابو بكر فرحة فرحة بان دمهم ماراح وخلصنا فيهم وفي كل ليبيا
وبعدها شفنا اولادنا في سرت عالشاشة يكبروا ويحمدوا في الله
امس كان يوم خاص وتاريخي في حياة كل الليبين واهل الشهداء بشكل خاص
ربي يرحمهم ويدخلهم فسيح جنانه ومعمر الي جهنم وبئس المصير

[نعومي نت]

ههههههههههههههههههههههههههه
هههههههههههههههههههههههههه
والله نقراء في ردود فعلكم نضحك ونبكي مش مصدقة يا ناس والله نضت نجري للتلفزيون قلت بالك ماصارش وبيقولولنا ماصارش إنبصروا عليكم عندهم فيه و الله فرحانة بردود فعلكم تعرفوا قبل لما يطلع في المسيرات المليونية إمتعة كنت إنقول حي علينا شوره أحني بس إللي ما نبوشي
الحمد لله يا رب الحمد لله بالله عليكم ما تبطلوش تكبير حتى في ردودكم خلوا أخر حاجة تكتبوها
الله اكبر الله أكبر الله أكبر ولله الحمد

[تجويد]

الله اكبر الله أكبر الله أكبر ولله الحمد
صباح الخيرات والايام الحلوات يارب اني اليوم نضت وما لقيتش زوجي في الحوش قلت اكيد اشبح شنو صاير اللي طالع بكري زعمه شدو بو صبع ولاشنو مش عارفة مش مصدقة وبعدين قعدت اندور في الموبايل ولا القيته المهم لقيته حاطاته تحت المخدة واتصلت بيه خيرك طالع بكري شنو فيه شنو صار والقذافي دار العار هههههههههههههههه نبصر عليكم قلتله شنو في قالي هههههههههههه شورك كنتي مع المشفشف البارح صابحه تقولي في نفس كلمته بعد 8 شهور يقوللهم شنو في خيركم هههههههههههههههه لا سلامتك ما في شئ ههههههههههه المهم قالي بري ارقدي اني طلعت بنجيب سفنز وجاي وهذا مقلب اليوم والله من الرعاش مانا عارفين شنو بنديروا ههههههههههههههههه ربي يدوم علينا الفرح والهني قولوا اللهم امييييييييييييييييييين .

[الساجدة لله]

اما انا نضدت الصبح الساعة 8 وفتحت على فتافيت ووكل راس ساعة نفتح نشوف اخر الاخبار على سرت والحق نستنى في برنامج ايام من مصراته جت الساعة 11 ومعها قلت خلي نشوفه من الاول لقيت في المباشر تحرير سرت زغرطت وناديت على عزوزتي وسلفاتي وقعدنا نزغرطو
اول ماقريت صكيتها زغروطة مش مفهوووووومة على طول حسي

بعدين اتصلت بعيلتي في مصراته اكدو الخبر قعدت من مكان لمكان ومن الرواشن نطلع في راسي ونزغرط هههههههههههههههههههههههههههههههههه

بعدين دورت زوزي قالولي في الشارع راكب فوق سيارته وينقز هههههههههههههههه


عيلة ماصدقت هههههههههههههههههههههه

[ام تغريد]

اما عنى انا نايضة بكري وفالحة مش وليت نقري فى العشية غصبا عني نايضة بكرى ومتفلحة ضامة الحوش

ومطيبة الغدى مكرونة مسقية والامور مية مية وبنتى الصغيرة كل يوم اتقولى ياماما ارفعينى معاك للمرسة

درتها فى بالى درتلها دوش ولبستها ولبست وقبلها بشوية درت طلة على التلفزيون اخر الاخبار لقيتها سرت تحررت
قلت الحمد لله لكن مش باين خبر على القردافى واولاده.......يالله واحنى بنطلعو الدنيا انقلبت مابين رصاص

وكلاكسات وبعدين 14.5..........وبنتى في قولت هيا يا ماما

قعدت واقفة حايرة مابين نطلع والا لا ....والله مانى قالقة من روحى على رصاصة طايشة

والحكاية زادت قلت طول على العربية ...الحكاية مش بلاش ولقيت الخبر قدامى

والله ما وسعتني الدنيا من الفرحة واخيرا بوشفشوفة مقملة طلع صلعة بين ايدين الثوار

الحمد لله ياربي والله من الفرحة حتى كان مانعرفش انزغرط زغرطت

وهذا كله وبنتى فى قولت هيا ياماما...وين تلقيني مازال فيه طلوع طول النهار قدام التلفزيون واخر الاخبار

مانبوش لقطة تفوتنا .............والله اكبر الله اكبر الله اكبر الله اكبر والله ينصر ثوارنا الاحرار

والدعاء والرحمة لشهداء ثورة ليبيا والله اكبر