الخدامات وارتفاع اسعارهن موضوع للنقاش [الأرشيف]

فضااوي

12-05-2010, 12:20 PM

السلام عليكم ورحمة الله وبركاته

انريد انتناقشو ع موضوع ارتفاع اسعار الخدماات اللي يذبح ذبح

طبعاا انا من قبل ماكنتش مقتنعه بالخدامة لكن بعد مادرت عمليه اضطريتلهاا

وطبعاا الاسعار ادوخ الفيل مثلا اذا جبتيهاا باليوميه تاخذ اقل شي 20 دينارر
واذا شهرية مش اقل من 350 دينار

الحاصل

نبي رايكم في الخدمات واذا هالظاهر اللي انتشرت اخيرا عندنا في ليبيا

مزبوطه والا غير فشخره زايده يعني بس مظاهر لازم تقول ان عندها خدامه

انا عن نفسي قلتلكم اني مضطرة بعد عمليتي على ظهري الف حاجة واحله فيها بس المسكينه قاعده فوق راسهاا

ننتظر ارائكم

أم أيوب

12-05-2010, 02:06 PM

مرحبة فضاوي كيف حالك

ولاباس عليك ان شاء الله

شوفي حبيبة أنا مقتنعة بالخدامة

بس مش كل يوم

يعني يكفي تجيني يوم بالأسبوع أو يويمين بالكثير

لو في عجاج ويبي تنفيظ

أو يوم فالاسبوع تدير حملة نظافة بسيطة

خاصة اللي تقعد يد وحدة زي حالاتي ما عندهاش من يساعدها

لكن متاع كل يوم وتقعد تغسل حتى الدبش

مش مقتنعة بيها

أنا ممكن بعد حملت احتجتلها أكثر شي

لأني كنت ناخد في تثبيت وقالتلي الدكتورة الزمي الراحة

لكن قبل نكلمها لما يكون عندي تقليب أو غسل فرش

غير هكي مكفية حوشي وموفية

والأسعار مجبر أخاك لا بطل

أنا عندي تاخد اللي تبيه

بس تشتغل زي ما أنا نبي

يعني الحاجة نمر عليها قبل ما تمشي لو ما عجبنيش شغلها لازم تعاود عليها

وربي طيحني في وحدة كويسة بكل انسجمت معاها

الحاصل وقت الضرورة مافيش باس منها

لكن كل يوم لاااااااااااا

تحياتي

سحابه صيف

12-05-2010, 03:01 PM

انا مش مقنعه بيها نهائيا مدامني منشتغلش وصحيحة منخليش وحدة غريبة اتخش حوشي

وكلوحدة ليها طروفها والف سلامه عليك يا فضاوي وزهورة

ليبيا قلبى

12-05-2010, 03:05 PM

انا منقتنعش إلا بتنظيفى
وعندى خواتى ربى يحفضهم
لما نتعب ايجن يساعدنى
بس كان فى يوم احتجت لها
حنجيب وحده بس مره مره

kittygago

12-05-2010, 04:06 PM

موضوعك حلو

الحق يا حبوبة اني معاك ....انه الواحد مادامه بصحيحته يدير حاجته بروحه

لأنه الحق اني ما نحبش الا حاجتي بايديا

لكن لو اضطر الأمر ... زي عملية و الا جياب و الا اي عائق و ما قدروش حتى عويلتك يعاونوك ... تقدري تستعيني بيها الفترة اللي تبيها

لكن انها تقعد خدامة عندي ... الحق يا رب ما نحبش حد يديرلي حاجتي

و بالنسبة للظاهرة هذه

بدت متفشية هلبة

تلقيها حتى بتنكت دار الصغار تجيب شغالة

و لو تسأليها علاش جبتيها و انتي كويسة و الدار ما فيها شيء يستاهل باش تعاونك فيه

تقولك اييييه قداش مني بنديرها كلها من بيعاوني

و الا اللي يجيبو في شغالة يوم العيدالكبيرة و ينظفولهم في البطون و ياخدو عليهم في الشيء الفلاني من الفلوس

و بعدها لما بيجو يديرو عصبان يغسلو البطون من اول و جديد

الحق ظاهرة تفشت و ما عرفوش كيف يستخدموها

و ربنا يكفينا شرهم

نوارة ليبيا

12-05-2010, 04:16 PM

يعطيك العااافية يافض فض على الموضوع
الأسعار غالية حبيبتي لأن فيه من يدفع لهم ^_^

احني الحوش يخدمه اهله هههه ماعمرنا جبنا خدامه ...عندناخالاتي يجيبوا في مصرية معرفة ...وايح ديما
واحني في قولت تعالي عاودي هاذي

المهم اني مش مقتنعة بيهم .....بس عندي خالتي حوشهااااا كبير ماشاء الله يبي خدامات مش خادمة وحدة

وجابت وحدة سودانية ماشاء الله ...وماتاخذ في فلوس شفط يعني مقتنعة باللي يعطوهوله
لكنها روحت للسودان <<<<< قصة طويلة

المهم وجابت بعدها 3 او 4 .....لقت روحها ديما تلود عليهم

واخر شئ عطيتها رقم اللي قلتي لي عليها ....الله اعلم كلمتها أولا

ووووووووووطولت عليك هههههه اسفة

ويعطيك العافية على الموضوع مرة ثانية

أمـ ساره

12-05-2010, 04:19 PM

والله ظاهرة للأسف انتشرت وصارت فيه حتر شركات خاصة تجيب لك شغالات كيف ما تبي

وخليكم عاد من الاسعار

ما نكذب عليكم لو عندنا مناسبة عرس أو لا سمح الله وفاة

طبعا لازم منهم لأنهم بصراحة يعاونوا هلبة بس طبعا بسعر معقول

أما نجيب وحدة باش اتنظفلي حوشي لحد توا والله ما درتها

لكن زي ما قالت زهورة لو الوحدة مضطرة الله غالب ومرة بعد قداش وبتكون تحت اشرافي أكيد

والباقي سلم وخياتي وراجلي

وربي يعاون الجميع

فضااوي

12-05-2010, 07:26 PM

مشكورات يالغوالي على المرور العطر

وانا مع ان الخدامة ضرورية في الازماات بس بصراحة من حوالي اربع سنوات

انها ملازمتني لان هلي كلهم في الشرق وظهري في حاله قبل وبعد العملية

لكن مع هذا كله انا فوق راسهاا وعلى قولت ديري بس انها توصل تنكت دواليب لا
انا انطبق وانوازي الحوايج وهي تردهم للدولاب
والمطبخ لا انا اللي انطيب وكل شي بس هي تغسل مواعين الغداء وتنظف المطبخ
بس فعلا ذبحناا الاسعار

في رمضان ماحصلتش وحده بعد الافطار ولما كلمت شركه للنظافه قالي بس على غسل المواعين
تدفعي 600 دينارر

هذا غسل مواعين اذا جبتهاا يومياا معناها كم تاخذ

بس بعد رمضان حصلت وحده صوماليه رووووعه واقامتها معاها والمبيت برا تجي الصبح وتمشي بعد العصر
وكل شي اديره ماعاد التطيب وغسل الحوايج انا اللي اندرهم

وربي ايردلي صحتي وما نحتاج لحد

ابريكه

12-05-2010, 08:26 PM

فضاوي لباس عليك حبيبة
واني ماعمري جربت
لكن لما رجعت زيارة لليبيا اهلي صارتلهم مناسبة فرح ليوم واحد
فقالو نجيبو وحدة تساعدنا
وجابوها
وللضروة اكيد تحتاجي من يساعدك
موضوعك جداً حلو ومهم للنقاش
موفقة حبيبة

زينب محمد

12-05-2010, 08:55 PM

ألف لا بأس عليك حبوبة

طهور ان شاء الله

للضرورة القصوى احكام

التا ئبه لله

12-05-2010, 09:07 PM

السلام عليكم
الفالفالف لباس عليك حبيبتى
بنسبه لموضوع الشغالات والله بدت فى بلادنا حشه البعض الا تفاخر انى عندى شغاله اطقطقى على الباب تفتحلك الشغاله والله
كله تقاليد الاعمى بغض النطر على
المناسبات الاجتماعيه الامطريين انجيبوهم ولكن والله هدى حاجات واقعيه
كلها بدت تمارى فى بعض
تقليد الاعمى والله المستعان
الله يعطينا صحيحتنا وضى عوينتنا

فضااوي

12-05-2010, 09:49 PM

الله لا يوريكم بااس

يعني كلناا نتفق للضروره وبس

فضااوي

12-05-2010, 09:52 PM

التائبة لله

معاك حق في وحدات عندهم الخدامة فشخره زايده وتقليد
اعمى

فلانه عندها شغاله ليش ما انا انجيب شغاله

الله المستعان

الساجدة لله

12-05-2010, 10:23 PM

موضوعك فض فض حلو وان شاء الله لاباس عليك انا نشوف في الشغالة ضروري منها للمحتاجها

فضااوي

12-06-2010, 05:20 PM

يسلموووو على المرور

الساجده لله

نورتي

أمـ ساره

12-06-2010, 05:40 PM

ان شاء الله لاباس عليك وخيتي

وربي يشفيك ان شاء الله

وفعلا وجه الظهر واعر هلبة وعندك حق اتجيبي شغالة تعاونك

والله المرض صعب ومعاه تعب الحوش

والي مجربة تعرف أكيد أني ما ما جبت بنتي

حاشاكم جاني وجع في المفاصل مش طبيعي لدرجة ما نقدر نتحرك

وبنتي تقعد عند حناها في اول النهار

اما الحوش والله ما نحكيلكم يا دوب نلحق اندير حاجة وحدة في اليوم

وما فيه شغلات عندنا

والله ايامات فاتوا عليا ان شاء الله ما تشوفهم حتى وحدة يارب

وربي يشفيك وخيتي فضاوي يارب ويعينك على أجور الشغالات

أم إيناس3

12-06-2010, 07:09 PM

ربى يشفيك والف لاباس عليك والله الشغالة مرة فى الاسبوع تساعد فى التخميل ولكن اللى عنده ضرف وتعبان تعتبر ضرؤرية

فضااوي

12-06-2010, 10:16 PM

ام سارة

الف الف لاباس عليك

وفعلا الالام المفاصل والظهر صعبة

واذا انتي تعبانه لي هالدرجة جيبي وحده تساعدك

فضااوي

12-06-2010, 10:18 PM

ام ايناس

اللهم امين ويشفي مرضانا ومرضى المسلمين

وانا نتفق معااك عند الحاجة لابد منهاا

ليبية

12-07-2010, 12:32 AM

يابنات لا اعتقد انها فشخرة
يعني معقولة فشخرة لا مش معقولة
اعتقد انه للضرورة احكام
بالنسبة ليا اني انجيب فيهم وقت الضرورة
وكان نلقا وحدة كويسة بسعر كويس يوم في الأسبوع لكن اسعارهم ولت نااااااااااااااااااااار 25 و30 و35 هذا شنو؟ يحسابونا نطبعوا فيهم

نسمه ليبيه

12-07-2010, 01:09 AM

يابنات وسيدات

انا تعجبت ليش انتوا رافضين فكرة الخادمات

اولا اسعارهن يذبحن لانهن بصرلحه يتعبن وشغلتهن مش ساهله يكفى بس اهانتهن لكرامتهن

وبعدين انا مقتنعه بفكرة الخدامه 100 فى 100 بشرط انها للتنظيف والغسل فقط اما الطعام فطبعا لا

وانا حاليا نجيب فيها للضرورة لكن لما نبقى غنيه نبى نجيب وخده مستديمه(الحمد لله مانك غنيه):p

ويسلموا فضاوى عالموضوع واحلى تقييم لعيونك

وماتنسوش انه حتى ايام الرسول كلن فى خدم ونحن كنا خساره فينا الراحه؟:D

أم أيوب

12-08-2010, 01:15 AM

نسمة عندي تعقيب على كلامك بسيط جدا

هو ان اللي تجي تخدم شغلها شغل شريف ومافيهش اي اهانة لكرامتها

بالعكس نحترمهن لأن وحدات تانيات كان ممكن يمشن في طريق تانية

عشان يحصلن فلوس

بس هذين يتعبن ويشتغلن على حساب صحتهن

وتهيالي اللي يطلبوه يستاهلوه

فضااوي

12-08-2010, 11:41 AM

ليبية

يالغاليه والله اللي هو الله نعرف وحداات اللي يجيبن فيهن بس عشان يقولن انهن عندهن خدامه
انا ماني معترضة على الخدامه بالعكس اللي عندهاا ضروره من تعب او مرض شفاكم الله مافيها شي
والاسعار شنو انقول على اللي يستغلوو في حاجة الناس

فضااوي

12-08-2010, 11:43 AM

نسمة ليبيه

انا زي ما قلت مش معترضة على الخدامة انا معترضه على ارتفاع الاسعار ومعترضة على اللي ماعندها حاجة بالخدامة ليش اتجيبهاا

اللي تجيبهاا يوم في الاسبوع معقول لانه الحوش مش كل يوم تريدي تنكتيه من اوله لاخره

فضااوي

12-08-2010, 11:44 AM

زهورة كلامك صح 100%

بس الاسعار مبالغ فيهم

تسلم يالغلا على المرور

ليبية

12-09-2010, 09:54 PM

أم أيوب

12-09-2010, 10:51 PM

الله المستعان
تعرفوا اني في وحدة قالتلي المفروض احني الليبيات نقوفوا ايد وحدة ونرفضوا المبالغ الكبيرة( واللي تقدر تعيش بقلته تقدر تعيش بلاه)
يعني يا يوافقوا على المبلغ زي قبل 15 و 20 ولا نستغنوا على خدماتهم

شن رايكم في كلامها؟؟؟؟؟؟؟؟؟؟؟؟؟؟؟؟؟

حبيبة

لما تكلمي وحدة تنكت المطبخ فوقي تحتاني

وترفع تقيل وتحرك دولاب من مكان لمكان

وتركب عالسلم وتغسل السيراميكا من فووق لتحت

والله نقعد كليت حقها لو عطيتها 15 أو 20

أنا ديما نحط روحي مكان اللي جت وتعبت

هل نرضى ان مقابل تعبي وجهدي وصحتي ناخد هكي مبلغ

أنا نحب نقدر الفلوس على قصاد الشغل

والله اللي ياخدوه حلااااااال عليهم لأنهم يتعبوا بصراحة

والا تجيك وحدة في عزومة تقعد ثلاث أربع ساعات يديها في المية والصابون والكلوركس

تغسل المواعين وتجففهم وتجلى الغاز وتنظف الأرضية والله مش حق تعبها 15 أو 20

أنا معاك لو كان الشغل اللي اشتغلاته خفيف وما يستاهلش ممكن نعطيها المبلغ هذا

لكن لما تشتغل شغل واجد وواعر والله حرام عليا نعطيها أقل من تعبها

ليبية

12-15-2010, 12:57 AM

والله ممكن معاك الحق يا زهورة
ولكن معاش عرفنا
يالله ربي يدوم علينا صحتنا ومانحتاجوا لحد الا ليه سبحانه وتعالى

أمـ ساره

12-16-2010, 10:36 PM

http://www.libyan-kitchen.com/kitchen/tahasoft.com_1/misc/quotes/quot-top-left.gif اقتباس http://www.libyan-kitchen.com/kitchen/tahasoft.com_1/misc/quotes/quot-top-right.gif
http://www.libyan-kitchen.com/kitchen/tahasoft.com_1/misc/quotes/quot-by-left.gif المشاركة الأصلية كتبت بواسطة فضااوي
http://www.libyan-kitchen.com/kitchen/tahasoft.com_1/misc/quotes/quot-by-right.gif
http://www.libyan-kitchen.com/kitchen/tahasoft.com_1/misc/quotes/quot-top-right-10.gif

ام سارة

الف الف لاباس عليك

وفعلا الالام المفاصل والظهر صعبة

واذا انتي تعبانه لي هالدرجة جيبي وحده تساعدك

http://www.libyan-kitchen.com/kitchen/tahasoft.com_1/misc/quotes/quot-bot-left.gif
http://www.libyan-kitchen.com/kitchen/tahasoft.com_1/misc/quotes/quot-bot-right.gif

الله لايوريك باس وخيتي

ايه والله صعبة وخاصة مع وقفة المطبخ لكن الحمد لله على كل حال

وبالنسبة للشغالة لو نلقى اكيد نجيب وحدة على الاقل يوم بالاسبوع

لكن هني في مسرته مافيه بالله ربي يعاوني

والحمد لله زوجي مقدرني وما يتعب فيا هلبة

أمـ ساره

12-16-2010, 10:37 PM

زهورة يا حلوة كلامك مزبوط لو كانت الشغالة مثل ما تقولي

وربي يكون في عون الجميع والله

فضااوي

12-17-2010, 12:01 PM

مشكورات يالغوالي على التاجد والتفاعل

omhammam78

12-26-2010, 02:29 AM

لابأس طهورا أنشالله أختي

بنية بوها

12-26-2010, 03:22 AM

اخت فضاوي الف لاباس عليك انشالله وفعلا اللاسعار غالية الحق
وادا مضطرة جيببها عالاقل نص نهار هي صح الاسعار غالية لكن مدامك تعبانة كيف بتديري يااختي
ربي يسهلك انشالله وتوا اصبحت الناس ماتستغنى عنهم في المناسبات وفي الظروف الصعبة

نعومي نت

12-26-2010, 06:45 PM

الموضوع شيق وكل ما نكتب فيه تطلعلي نافدة مكتوب فيها غير مسجل 0000 الخ
زعلت معادش بنكتب

ام الحلوين

01-07-2011, 05:51 PM

السلام عليكم
فضاوى انشاءالله لاباس عليك وربى يفرج عليك وعليه وعلى كل المسلمين بالنسبة للشغالات والله موضوع شيق تعرفى وانى راى من راى البنات حاجتى نديرها بروحى لكن للضرورة عادى والله اللى نسمعو بيه صاير فى الخليج وبالدات السعودية تحرمى دخلى شغالة لحوشك لكن وضعكانتى فللضرورة احكام

اناواخواتي

01-08-2011, 05:59 PM

السلام عليكم الف لاباس عليك اوخيتي
بالنسبة للشغالاتمن يومي امي وحناني الزوز عندهم شغالاتومهيش ظاهرة جديدةلحد اول السبعنات كان كل عيلة كان مش شغالة اتنين وهدا معروف للطرابلسيات لكن جت فترة معينة منعوهم وهدا حتى هو امر معروف
بالنسبة ليا اتجيني وحدة اتعاةن فيا مرة في الشهر وكان عندي اعزومةلكن اتجي تمسحلي علي قلبي الصراحة انضيفة وتقيم الرزين الصالون اطلعة كلة برة وتردة العربية حتى هي المطبخ المهم كلة اديرة الا داري النوم والتطييب و الحق تاخد في 20في اليوم لان حوشي مش كبير هلبةلكن اتجيني من التمانية وتروح الستة وكان القضية مش هلبة امتا ما اتكمل اتروح
وربي ايكرن في عونك يا فضاوي