المساعد الشخصي الرقمي

مشاهدة النسخة كاملة : خبرتكم يالمبتعثين بالهدايا


Moony heart
10-27-2011, 07:47 PM
بسم الله الرحمن الرحيم
اللهم صل على محمد وعلى آله وصحبه أجمعين


صبايا كل وحده اتخش اتقول شن شرت هدايا واين روحت لي اهلها واهل زوجها
انا في امريكا ومحتاره شن نشري



المره الاوله واين روحت خديت لي امي و امه خراص من سامس و خديت ساعات من ويل مارت وروايح ومكياج لي خواتي وخوات زوجي وسلفتي كل وحده حاجة واخواني ساعات واخوان زوجي روايح والعاب لي الاطفال وشكلاطة من بق لوكس ارخص مكان فيه شكلاطه وحلوة متع بكوات اللي تلقها عنده بي 4 عند ويل مارت بي 7



توا نبي انغير معاش عرفت ومش واخد هلبا بنحسب امي وامه وبوه وخواته مش متزوجت واختي مش متزوجه

وامه كبيره في السن حترت شن نخدلها
وعجبتني تعليقه من موقع امزون فكرت نخدها لي
امه اتقولي مش دهب :confused:لانه فضه مغطشه في دهب 24 مني
جربت شرت منه الموقع :p

وامي خايفه نخدلها رايحة او كريمات خواتي ايهنو عليهم ههههه


كل وحده اتخش نقول شن خدت هدايا ومن واين ؟؟؟
نعومي نت
10-27-2011, 09:40 PM
أسفة يا moony اني مقيمة في ليبيا
ما نقدريش إنفيدك في هذا الموضوع
موفقة بإذن الله
ام صهيب
10-27-2011, 10:55 PM
ووووووووه على هم الهدايا

انا فى بريطانيا والحق موقع امازون ما شريتش منه قبل لكن نشرىمن الايبى وكل حاجة اتجينى اتهبل الحق

الحمد لله عويلتنا صغيرة ايقولوا الكثرة تحرم الود
فى مرواحتى الاولى امى زوجى اخديتلها ماليا من مارك سبنسر وتجاكة من دبنهامز وكانت موصية على كنادر واطيه
اما بوه شريته زوز سوارى وبنطلون من مارك سبنسر وكندرة من كلارك
وسلفى اتجابوطوا وحماتى قفطان وفانليا صوف تجاكة فرواواكسسوارات
امى كانت اهنا اخدت اللىفى خاطرها لكن اخديتلها فانليا من هوس فريزر وبدلة من انن هرفى
خوتى اخديتلهم فانليات كانوا حتى هما معى ماما
اما بابا اشريتله زى شبانية وزدت عليهم بدلة

اماكان روحت توا
ماعارفة مازال ما فكرتش لكن مبداءيا
حماتىلانها انخطبت موصية على لبس
اما عزوزتى ناخدلها كاب صوف وساد وماما كبوط وامازال انخمم
خوتى وسلفى ناخدلهم سبيدروات من كلارك
وشبانيةوبابا نسالهم اريحلى
ومازال القصة حتىانا وصغارى نبى وربى ايعاون
Om Saga
10-27-2011, 11:23 PM
وووووووووووووك من الهدايا
أنا كنت في الأردن وين روحت شريت الهدايا
كل عيلة منها 3 أو 2 المهم نحسب شخصين أو شخص منهم
والهدايا كانو مدايرين في الأردن التصفية المريكية رخيص اللبس
وشريت للي يقرو حاجات قراية بسيطة مش واو
المهم حسبت كل شخص مثلا ألونات محايات غريبة سبونج بوب
وطبعا أم عموري شريتلها عباية وجتها صغيرة خسارها
المهم الواحد المهم يحسب
وحسبت أهل زوجي زي ماحسبت أهلي بالضبط
باش نفتك من الكلام الزايد مع إنا زوجي الحمد لله ماعنداش على الدوة الزايدة ولله الحمد
وربي يعينك
امتنان
10-30-2011, 03:48 AM
كيفك موني

انا في امريكا لما روحت المرة الاولة زيارة رفعت معايا هلبة هدايا عطور واكسسوارت وملابس واحدية نوعت يعني والعاب اطفال وشكولاته وحقائب
وخواتي خديتلهم ساعات واكسسوارت عندهم احلي من ليبيا عند فيفرت 21 وكولز يهبلو هما غالين شوي بس تلقي عندهم تخفيض
وامي خديتلها لبسة كاملة مع عطر ومع حذاء
واخواني الاولاد ساعات وعطور
والاطفال خديتلهم ملابس مع العاب
وحماوتي خديتلهم اطقم بدلة كاملة متاع ميسز واحدية هديم اللي مش متزوجات
والمتزوجات شنطة مع عطر وسلفاتي نفس الشي واولادهم ملابس واللعاب
ورفعت معايا لكل بيت كاميرا نوعية كويسة
انا بصراحة كترت من العطور في ناس تحشمت منهم
والله تعبني الهدايا مابين واحد يرضي واحد لا
وان شاء الله كان روحت نهائئ
مانرفع للعيلة كله ممكن اهلي واهل زوجي والباقي ْx

سريب الهدايا يدوخ وماتنسي نفسك
انشاء الله نكون فدتك
79nana
10-30-2011, 09:59 AM
والله بالنسبالي كل مايجي حدد يزورنا هني في امريكا نبعت معاه حاجات خفيفة زي مكياج روائح والاكتر دواوات زي ادوية للبرد وعلاجات لاي حد من العيلة ييها وخاصتا امي وعزوزتي الله يحفظهم كنت نبعتهلهم في الاسبرين ودواء الشيباني وشروبوات اليه قوية ومليحة مش زي البلاد ومتلا اتجاكات بوتات شخاشير غلاض وهكي طيعا شكلاطة للصغار وحاجات الوصاية
ولاكن لما زرتهم رفعت العاب للصغار اخواتي ووبديلات للصغار وللكبار تازدانات حلوة ومكياج وروائح ويارغان لماما وصتني عليه ولاكن انقولللكم والله الواحد ياخد كل شي ماخف وزنه اني كانت مشكلتي في الوزن الزايد والله اتبهدلت وزيادت مصاريف لين ضاعت علينا الطيارة الواحد المفروض يرفع الحاجات الي خفيفة وحلوة وماتخدش مكان
ولاكن اني عاد زي الهبلة ماخليت ماجبتش من فرحتي حتى من العاومات الكبار للصغار جبتهم الواحد وزنه قريب 3 كيلو وووووشناطي وغيرة
ولاكن في الجديد بادن الله بنشري خويتمات ولا حديدات ولا خناقات ولا روائح وهكي اما الصغار كان في العاب خفيفة باهي وكان هدا بصراحة حلوة وشكلاطة ولا كنيدرات وهكي يعني ماخف وزنه باش منتليعش في الوزن من جديد
المهم الواحد يشوف اماليه ويفرح بشوفتهم والا ممكن الواحد يشحنهم شحن خير مايرفعهم معاه

هدا راييي
مغتربة 7
10-30-2011, 11:40 PM
اهلين حبيبة
واااااك من الهدايا وسريبهم
بصراحة اني نرفع كل ما يخطر على البال ههههههههه
عطور ملابس ساعات شناطي احديا العاب
ممكن لاب توب مرات دهب لو نحصل بالتخفيظ يخفظوا فى الالماس هو دهبهم ما ينفعش لكن مع الدايمنت حلو
مكياج ومن الصيدليا ناخد ادويا متع زكمة وفايتمين طبعا الكريمات خشيشتهم ههههههههههه
والشوكلاته
ربي يعينك يارب
Moony heart
10-30-2011, 11:51 PM
الله يعطيكم الف الف عافيه وان شاء الله ترجعو لي الاهل سالمين يارب
استفد منكم هلبا مشاء الله هدايا حلوة
وصح الوحدة تخلي روحها خفيفه اني نوزن في الشناطي بعد انسكرهم قبل الرحله بي يومين مش نعرف كم وزنهم

توا كلهم عرفت شن بناخدلهم وخاصه توا تخفيط
مزال عزوزتي ووووووووووووك معاش عرفت هيا كبير وسمينه معرفتش شن نخدلها ؟

نورتو صفحتي:)
ام رواسي
10-31-2011, 12:46 AM
بنسبة ليا انى مقيمة فى بريطانيا توا ليا 11 السنة الحق قعدت 7 سنين الاولى مروحتش ولما روحت اول مروحة منحكلكمش على الهدايا والله بصدق حسبت العيلة كلها حتى من الجيران القريبين طبعا وحدة فرحنة واول نزلة للبلاد وسبعة سنين وانى اندس ولكن السنين يللى بعدها والله منكذب عليكم نحسب فى الاى وشبانية وسلفى وامى وباقى العيلة حكة شوكلاطة وكان سمعت بحد انزاد علية عويل من العيلة نرفعلة هدية وكان حد وصنى على حاجة نخدهلة الصراحة سريب الهدايا ادوخ الراس والحرجان اكثر من الرضيان القيت يللى اوصينى على حاجة احسن حل وكنهدا الشوكلاطة يا سلام ؟؟؟؟؟؟؟ اتنحى اوجاع الراس واقل وزن
79nana
10-31-2011, 10:28 AM
اني نقول لعزوزتك احسن حاجة كنادر وشناطي وصنة واتجاكت مقاس كبير هدا كانا اني هكي اندير لان امريكا احسن شي تشريه الكنادر والشناطي والروائح
ان شاء الله افدتك
الساجدة لله
11-01-2011, 02:56 PM
بارك الله فيك على الموضوع المميز والمفيد
مغتربة 7
11-03-2011, 07:19 PM
الله يعطيكم الف الف عافيه وان شاء الله ترجعو لي الاهل سالمين يارب
استفد منكم هلبا مشاء الله هدايا حلوة
وصح الوحدة تخلي روحها خفيفه اني نوزن في الشناطي بعد انسكرهم قبل الرحله بي يومين مش نعرف كم وزنهم

توا كلهم عرفت شن بناخدلهم وخاصه توا تخفيط
مزال عزوزتي ووووووووووووك معاش عرفت هيا كبير وسمينه معرفتش شن نخدلها ؟

نورتو صفحتي:)


كان كبيرة فى السن
خوديلها فساتين حوش فى عندكم اكيد محلات مقاسات كبيرة يكونوا قطنيات تفرح بيهم وشبيشب وعطر
وكان تبي دواء ولا حاجة من الصيدلية وخلاص
ايه اوزني الشناطي قبل السفر
شاطئ بلا رمال
11-03-2011, 09:48 PM
السلام عليكم
كيف الحال حبوبات
ربي يعينكم أنا مقيمه في ليبيا بس لما نسافر والا حد يجي من المقيمين برا فيه أفكار للهدايا كثيره مع الدوخه طبعا
شموع معطره جبتها من ألمانيا الحق نازكه هلبه تجي على شكل هديه وإكسسوارات شنط أحذيه عطور ملابس مستحضرات البشره ومكياج كريمات للجسم ومعاهم الصابون ملابس النوم بيجامات وارواب نازكه شنط مدرسيه للأطفال هلبه خيارات الحق وفيه حاجات مش موجوده هني وتكون نازكه وبسيطه على حسب الشخص وفيه االلي يطلب حاجه معينه الشكلاطه لا زم منها.