[استفسار] مشتريات منزليه

[شاطئ بلا رمال]

السلام عليكم حبوبات
كل سنه وانتم طيبين بخير
طلبي هو نبي نسأل على نوع من السفر متع التقديم عصير وإلا شاهي وإلا أي حاجه
متع اللي يقدمو فيهم للضيوف تكون السفره القاع متاعها اللي تنحط عليه الطاصه عباره عن مرايه (مرآة) وما ينحطش عليها مفرش وهذا هو سر جمالها روووووووعه ما شاء الله
والجناب حواف السفره ( الإطار) منقوشه فضه وإلا خشب ماعادش نتدكر نازكات نازكات هلبه هلبه
الصراحه شفتهم عند كنة خالتي كنت ماشيتلها نباركلها وأول مره نمشيلها الصراحه تحشمت نسألها من وين ممكن يكونو من برا مش عارفه.
المهم لو أي وحده فيكم شايفتهم في مكان يبيعو فيهم وإلا عندها منهم تقولي وين عجبوني هلبه الحق.

[ام انس]

السلام عليكم
عزيزتي السفر اللي تحكي عليهم انا شايفة نوع ثاني قاع السفرة مرايا والاطار مفيش اصلا يعني مسطحة بدون حواف جانبية ..متوفرات عزيزتي في هلبا محلات واخر مرة شفتهم في محل في منطقة الدريبي.

[خدوج]

حطيتهم فى خاطرى
ان شاء الله يفيدوك وتستفيدو
حتى احنى معاك

[ام ليبيه حره]

ياربي تحصليها

[زهرة البنفسج]

السفرة اللي تحكي عليها عند اختي نفس ماتحكي من ليبيا في منها صح ماشاء الله عليها لاكن انا بعيدة وامتى مانكلم اختي انقولك لاكن هي شاريتها من 4 سنين ان شاء الله قاعدين ايبيعو فيها

[شاطئ بلا رمال]

مشكورات على ردودكم أم أنس إن شاء الله نمشي ندير عليهم دوره مشكوره على إهتمامك والحبوبه خدوج إن شاء الله حتى إنتي تحصلي زيهم وام ليبيه حره إن شاء الله بارك الله فيك والحبوبه الغربه صعبه مشكوره على إهتمامك نستنى فيك تسألي وخيتك وسامحيني على تعبك (أني مشيت لكنة خاتي الحق في هالأزمه اللي كنا فيها يعني الشهور اللي فتت ممكن شهر 4 وهيا عروسه جديده أكيد واخدتهم جديد) مش عارفه إن شاء الله نلقى والموضات سبحان الله ديما متجدده وديما فيه حاجات حلوه مشكورا جميعا
أستودعكم الله

[Om Amory]

حبيبه فيه منهم أكيد تلقى والجناب موردات صح ولالا؟؟قصدى منقوشه نقش ورد؟؟

ممكن لأن البضاعه توا قعده ناقصه بس

[شاطئ بلا رمال]

صح يا ام عموري
كيف حالك توا إن شاء الله بخير وكيف حال عموري يتربى في عزكم إن شاء الله
وبوسيلي عموري ربي يحفظهولك وتربيه على إيدياتك

[تجويد]

عزيزتي شاطئ بلا رمال اني شايفتهم في محل المواد المنزلية اللي في ابو مليانة كانك عارفتيه اللي جنب سمرقند متع ملابس الرجال زمان وشفتهم في طريق عين زارة بعد صالة النواعم بشوية يجيك على اليمين فيه حاجات نازكه ومش غالية هلبة وسعرهم في جو 65 ممكن والله ناسية وان شاء الله تحصلي منهم والله شفتهم فيه بعد التحرير يعني توا مش بعيد هلبة .