المساعد الشخصي الرقمي

مشاهدة النسخة كاملة : [وصفة للكعك الحلو ]مبتكرة من مطبخ أم يمنى



أم يمنى
11-23-2011, 12:36 AM
http://www.libyan-kitchen.com/gallery/images/fmfopo.gif


السلام عليكم ياحلوات :

اليوم جبتلكم وصفة مبتكرة , وان شاء الله نأخذ عليها براءة اختراع من
أخواتى العضوات , وان شاء تكون جديدة عليكم وما شفتوها قبل , شوقتكم : هيا

للمقادير :

المقادير عادية متع الكعك الحلو الليبى , بتقولوا وين الاختراع :

تابعونى .

المقادير :

كوب زيت
كوب الا ربع مية مذاب فيها سكر ( حسب ماتبى حلو هلبة أو سكر خفيف )
ملعقة بيكنج باودر
نص الملعقة كربونات
ذرة ملح
شوية كمون حلو
دقيق مايعجن .

خلى العجينة ترتاح مدة ربع ساعة .

الى هنا وكل شئ عادى ,

بس شوفوا الصور ح تفهموا القصة .

هذه الاداة ندير بيها فى المعمول من الجهة الاخرى , ولما قلبتها تخيلت فيها الكعك وفعلا كان منظره ولا أروع .







نحط شوية سكر فى الدائرة وبعد مانبرم العجينة نلفها فى الدائرة وقلبها فى ايدى ونحطها فى السفرة .



http://www.libyan-kitchen.com/gallery/images/2nxn.jpg



http://www.libyan-kitchen.com/gallery/images/3wmw.jpg


http://www.libyan-kitchen.com/gallery/images/4cjc.jpg





وبعدين فكرت فى دوائر الكعك العادية , وقلت كيف نخليها دائرة متساوية كلها حجم واحد : اليكم الطريق اللى خطرت عليا :


حطيت كوب عادى وبرمت العجينة ولفيتها ع الكوب , وبعدين رفعت الكوب لقيت اللفة متساوية , وبالتالى كل الكعك جى متساوى فى الحجم .


وبالصدفة وانى نطيب فيه , جيت جارتى , وتبعتها الثانية والثالثة , قلتلهم شوركم شميتوه , وحطيته سخون , ودرت معاه طويسات شاهى ,

والصغار درتلهم شاهى بالحليب , ومافيه حد ماريتش فى ايده كعكة , والصغار سلامتهم اللى يأكل واللى يفترش ع السجاد , واللى يحرج يحذف

الثانى بطرف مكسر , وانى نشبح وساكتة , شن بنقول معاهم أمهاتهم ,


وبعد ما خلو الدنيا حالة , حليب مبزع وكعك مفترش , روحوا , وانى نيمت الصغار ولهيت فى الحوسة , وأهو توا الساعة 2 ونص , منزلة

موضوعى ( طازة ) . ان شاء الله يعجبكم .



http://www.libyan-kitchen.com/gallery/images/5zcz.jpg




http://www.libyan-kitchen.com/gallery/images/6sms.jpg




http://www.libyan-kitchen.com/gallery/images/81rkr.jpg




http://www.libyan-kitchen.com/gallery/images/82grg.jpg




http://www.libyan-kitchen.com/gallery/images/111odo.jpg


http://www.libyan-kitchen.com/gallery/images/112nln.jpg


http://www.libyan-kitchen.com/gallery/images/12uuu.jpg


وشوفوا بعد ماأجهزوا عليه , صحيحة على قلوبهم .هذه الصونية الثانية ,

http://www.libyan-kitchen.com/gallery/images/141oro.jpg


http://www.libyan-kitchen.com/gallery/images/142hfh.jpg




وهذا اختراعى ليكم نقدمه بكل تواضع .( تقولى اختراع زويل لمكرو الثانية ).

كالعادة (((أم يمنى تريد تشجيع وتقييم ))) على وزن الشعب يريد .

وسلامتكم حبوبات .

الساجدة لله
11-23-2011, 12:52 AM
واووووووو فعلا براءة اختارع ههههههههههههههه الحق فكرتك قنينة انا كنت قبل حايرة في شن يستخدموها من الخلف الة المعمول وفكرت بس ماوصلتش اني ندير بيها كعك خخخخخخخخخخخخخ
طبعا انا نقرا ونضحك على الجارات والصغار اللي يحدفو وياكلو ويفترشو خخخخخخخخخخ
بصراحة موضوعك خفيف زي دمك وربي يعطيك صحيحتك بالنسبة لتقييم في مشكلة في النت مش قادرة نقييمك بس التمييز حاضر من غير كلام

تجويد
11-23-2011, 12:54 AM
ما شاء الله تسلم الايادي اللي تتلف بحرير غير ابعتيلي صونيه ومعاها طويسة شاهي اخضر بالنعناع .

شاطئ بلا رمال
11-23-2011, 01:05 AM
قاعده ساهره ربي يعطيك الصحه
بالنسبه لقالب المعمول عندي زيه بالظبط وفعلا الجهه متع الكعك تقدري إديري فيها حتى كعك الحلقوم وكعك التمر
أما بالنسبه لطريقة الكوب أول مره نشوفها وتستاهلي برأة إختراع وأحلى تقييم وصحتين على قلوبكم وربي يعقد عسلكم أنتي وجويراتك
تسلم الأيادي كعيكات يجو في الخاطر ياسلام يميييييييي
لالالا غدوه لازم نفيق من الصبح إندير كعك بإذن الله
أحلام سعيده

شاطئ بلا رمال
11-23-2011, 01:12 AM
http://www.libyan-kitchen.com/kitchen/tahasoft.com_1/misc/quotes/quot-top-left.gifاقتباسhttp://www.libyan-kitchen.com/kitchen/tahasoft.com_1/misc/quotes/quot-top-right.gifhttp://www.libyan-kitchen.com/kitchen/tahasoft.com_1/misc/quotes/quot-by-left.gifالمشاركة الأصلية كتبت بواسطة تجويدhttp://www.libyan-kitchen.com/kitchen/tahasoft.com_1/misc/quotes/quot-by-right.gifhttp://www.libyan-kitchen.com/kitchen/tahasoft.com_1/misc/quotes/quot-top-right-10.gifما شاء الله تسلم الايادي اللي تتلف بحرير غير ابعتيلي صونيه ومعاها طويسة شاهي اخضر بالنعناع . http://www.libyan-kitchen.com/kitchen/tahasoft.com_1/misc/quotes/quot-bot-left.gifhttp://www.libyan-kitchen.com/kitchen/tahasoft.com_1/misc/quotes/quot-bot-right.gif

تجويد إنتي هني شورك شميتيه الكعك :cool:على قولة أم يمنى وسابقتني على الكعك
قاعده ساهره يعطيك الصحه غدوه بتفيقي بكري عندك ماإديري :D
أحلام سعيده:)

مغتربة 7
11-23-2011, 03:05 AM
ماشاء الله عليك حبيبة
افكارك تجنن
حتى اني عندي منها الفورمة ان شاء الله انطبق كعكك
الله يسلم الايادي الى تلتف بالحرير
ولا يحرمنا جديدك

خدوج
11-23-2011, 07:30 AM
يسلموا ايديك ام يمنى
فعلا براءة اختراع
يسلموا ايديك
وفعلا فكرة بالنسبة لقالب المعمول
بس على حكاية الطاسة جربتها مرات ومرات
بس مش ماشية معاى
وماننحرم من وصفاتك الحلوة ام يمنى
بانتظار جديدك دوما

بنغازية
11-23-2011, 04:24 PM
يسلموا ايدياتك ياام يمني ماشاء الله عليك نلقنك مره ثانيه احسبيني في طويسة شاي وحليب حتى مع الصغار مش مشكله الموهم طريف كعيكة امعاها ولا اثنين ولا ثلاته مافيش مانع هههههههولا السفره كلها
تعرفي سهفتيني ان شاء الله جاري التطبيق

التا ئبه لله
11-23-2011, 05:09 PM
يعطك الهنى بس يا ام يمنى نقراء فى الموضوع ونضحك سلامتهم الصغار يبو راس من حديد

وبنسبه للكعيكات ماشاء الله تسلم ايديتك وحقوق الاختراع محفوظه

ام رواسي
11-23-2011, 05:31 PM
سلم ايدياتك على الكعكات ايسفهوووووو

ام ماريا
11-23-2011, 08:07 PM
شكرا جزيلا طريقه سهله صحتين

نسيبة
11-23-2011, 11:10 PM
بجد روعة ام يمنى الكعيكات روعة
سلم ادياتك حبيبة

أم يمنى
11-24-2011, 07:36 AM
السلام عليكم ورحمة الله وبركاته :

سجودة : بارك الله فيك ع التشجيع .
لا وشنى الجارات جايين بيرفعونى نديروا رياضة , ولما تجمعوا طاحوا فيها هدرزة مع الشاهى والكعك نسوا الرياضة , ونادوا صغارهم بعدين وعكسوا عندى .

تجويد : يسلمك ربى , وتفضلى شاهيك عندى ع رأسى من فوق .

شاطيء : يسلمك ياربى والفكرة نقصد بيها السكر لما حطيته فى الفورمة وحطيت عليه العجينة .
وصحيتى ع التقييم .
وجاراتى لما بيروحوا قالولى : ذهبتى شيرتنا ع الرياضة ما صارش منها اليوم .

مغتربة : مشكورة ع الرد حبيبة نراجوا فى التطبيق .

خدوج : تسلمى , بس علاش مامشتش معاك حركة الطاسة , ( معناها موضوعى طلع تعرفوه مش جديد ).

بنغازية : محسوبة حبيبة : تعالى نضيفك أحلى ضيافة , عندنا محبة خاصة لهلكم راهو .

التايبة : ربى يديم عليك الضحكة وتسلمى .
أم رواسى , أم ماريا , نسيبة : حبيباتى تسلموا ومشكورات ع الرد .

خدوج
11-24-2011, 07:52 AM
ام يمنى
بالعكس موضوعك ماشاء الله قنين
بس مش معناه مش جديد
صح نعرفها فكرة الطاسة
بس شوفى ماشاء الله اهو استفادوا منها هلبه
وبالعكس انى نحب نتعلم ونستفيد
واستفدت هلبه من المنتدى ومن مواضيعك ومواضيع باقى العضوات
وتعرفى شن مشكلتى في الطاسة
لمن نحلق اللفة عالطاسة ونسكرها نجى بنحى الطاسة
تاخد معاها هواء وتعبنى ان شاء الله فهمتينى
وانى شاغلنى هلبه نبى نعرف طريقة يجوا الكعكات متساويات
فى المالح والسكر
فشن ندير نحط موس خضرة ونقيس عليه
ومش عاجبتنى الطريقة(القياس بالموس) نبى احسن(وخيتك ركيكة)ههههه
وتسلمى عالموضوع
وبانتظار مواضيعك ومشاركاتك

nonna
11-25-2011, 10:05 AM
تسلم ايديكي

بنية بوها
11-28-2011, 05:48 AM
يسلموا ايدياتك وصحتين علي قلوبكم والجو الحلو

Om Saga
12-06-2011, 05:29 PM
هههههههههههههههههههه سلامتهم سلامتهم
ربي يونسك بيهم ههههههههههههه
مشكورة على الفكار الروهة الصراحة
وزي ماقالت ساجدة موضوعك خفيف دم زيك
وأحلى تقييم ليك وللموضوع

ام تغريد
12-06-2011, 07:07 PM
تسلم ايديك ام يمنى علي الكعيكات وعلي جوك اللي مش عادي
وربي يونسك بجاراتك كان تسلفيني وحيدة انحب اللمة وجو الجيران
ونتحمل حوستهم المكنسة الكهربائية شن قاعدة ادير؟؟؟
وصحتين علي قلوبكم

بنت طبرق
12-06-2011, 07:11 PM
ههههههههه:)
ضحكتيني على حوسة الشاهي والكعك من الصغار
وانتى تتفرجي وتاكلي في روحك
فكرتيني بحالي بعد يجونا اصغار ونقعد ناكل في روحي وهما يكبوا العصير والمية والشاهي
والحلويات المعسلة عالصالون وامهاتهم يضحكوا ويهدرزوا وماكأن شي صاير
يعطيك الصحةعالكعيكات والصبر عالصغار :p

بنت الاشراف
02-24-2012, 07:26 AM
ماشاء الله سلمت يداك

نجوته
02-25-2012, 10:55 AM
الله واحد عليك

يسلمو ايديتك

وسبع اصحايح عليك وعلي جاراتك

بس والله نتعقد من الي ايجيب اصغيويرته وما يهتمش بيهم

ههههههههههههه الله المستعان وخلاص

أسماء القائد
04-28-2012, 02:23 AM
تسلم الأيادى

om_adnan
05-16-2012, 01:49 PM
والله محظوظات جاراتك بيك, هادى كلها ذكريات طيبة,الا شفته من الصور يعتبر حوسة مرتبة,فعلا أفكار تستحق أفضل تقييم.

الصابرة
07-04-2012, 03:51 AM
http://akhawat.islamway.com/forum/uploads/post-19496-1155500579.gif

luba
11-02-2012, 07:46 PM
http://www.karom.net/up/uploads/132533875712.gif

المصراتيه
11-03-2012, 12:11 PM
ماشاءالله
كعيكات يهببببببببببببل

نسمه ليبيه
03-01-2014, 12:33 AM
فكره جديده تستاهلى براءة اختراع عليها

زوبة الطيوبة الحبوبة
04-13-2014, 10:30 AM
ماشاء الله

كنوز
06-04-2014, 10:39 AM
تسلمي اختي ام يمني الله يعطيك الصحة
طريقة روعة

كيميائيه
06-04-2014, 12:58 PM
ماشاء الله منظرة حلو والطعم اكيد احلى وذكرتينى بفكرتى اللى مازال ماجربتها وهى الكعك فى الة الدوناتس