(دعوة للمشاركة) ملف كامل عن تفريز وتجميد الأطعمه

[شاطئ بلا رمال]

السلام عليكم ورحمة الله تعالى وبركاته
كيف حالكم ياحبوبات إن شاء الله بخير:)
لأحظت في المنتدى إنه مافيش أي موضوع يتعلق بالتفريز وتجميد الأطعمه خصوصا إنه حفظ الأطعمه صار شئ أساسي الكل عارف اهمية حفظ الأطعمه سواء كان لست البيت في الأيام العاديه او المقبلين على الزواج وخصوصا فى العزومات المفاجئة ومهم أيضا في المناسبات وعند الأستعداد لإستقبال الشهر الكريم

فحبيت نفتح هذا الملف وأرجو منكم مشاركتنا جميعا كل وحده بتجربتها الخاصه لتعم الفائده ونتبادل الخبرات جعله الله في ميزان حسناتنا جميعا
يللا نبدو مع بعض ونبي نشوف تفاعل حلو:cool: من كل المشتركات اللي تخش الموضوع ماتبخلش علينا ولو بمشاركه بسيطه هيا يافالحات وروني شطارتكم ;)
[/COLOR]

[شاطئ بلا رمال]

باش نحمسكم للمشاركه في الموضوع حبيت نقوللكم على مميزات التجميد


فوائد التجميد في حفظ الطعام





يعتقد الكثير من الأشخاص أن الأطعمة المحفوظة تختلف تماماً عن الطازجة، ولأن وتيرة الحياة باتت متسارعة لهذا تعتبر الأطعمة المحفوظة ضرورية، ومن أهم ميزاتها نذكر:



1ـ السهولة: يُعتبر التجميد عملية سهلة، وذلك لمتطلباته البسيطة نسبياً. ففي البيوت مثلاً لا تتعدى هذه المتطلبات السكين وقدر ماء مغلي وآخر لماء بارد مع الثلج وأكياس من البلاستيك ومشتقاتها من البولي إثيلين والنايلون والسيلوفين وعبوات أخرى مناسبة ووجود مجمِّدة بحالة جيدة.




2ـ النوعية العالية للأغذية المجمّدة: إن المواد الغذائية المجمدة لا تختلف من حيث النكهة والطعم والقوام واللون والقيمة الغذائية عن المواد الطازجة إلا القليل جداً، وقد يصعب للشخص الاعتيادي تمييز الفرق بينهما وبين الأغذية غير الجيدة قبل حالة تجميدها. فكل ما تفعله عملية التجميد هو الحفاظ على النوعية التي كانت عليها الأغذية قبل التجميد.




3ـ الاحتفاظ بالقيمة الغذائية: دلّت الكثير من الدراسات التحليلية للمواد الغذائية المجمّدة بأن تعريض الأغذية للتجميد لا يؤثر على قيمتها الغذائية إلا القليل وذلك حسب نوعية المواد وطريقة الإعداد وفي بعض الأحيان يحسن التجميد من قوامها كما يحدث في حالة اللحوم فتكون سهلة الهضم نسبياً مقارنة مع اللحوم الطازجة وذلك لأن تمدد الماء في خلايا أنسجة الأغذية يشقِّق بعض جدرانها فيساعد على طراوتها.




4ـ سلامة الأغذية المجمدة: إن درجات الحرارة المنخفضة المستعملة في تجميد الأغذية لا تسمح للأحياء المجهرية (خاصة المرضية منها) بالنمو، وقد يموت البعض منها عند التخزين لفترات طويلة، ولذلك فإن المواد المجمدة صالحة للاستعمال من الناحية الصحية إذا تم الاحتفاظ بها بصورة مجمدة طيلة فترة التخزين.




5ـ التقليل من عملية الأكسدة: تسبب الأكسدة تزنّخ الدهون كما في اللحوم والأسماك أو تغيير لون الفاكهة والخضروات وخاصة إذا كانت الأغذية قد غلفت جيداً لتمنع اتصالها بالهواء.




6ـ توفير أغذية متنوعة في مختلف المواسم: تسهل المجمدات المنزلية الحصول على المواد الغذائية وبحالة شبه طبيعية بأوقات غير مواسمها الاعتيادية وذلك إذا تم تجميدها في أوقات انخفاض أسعارها وتوفرها في الأسواق بأنواع جيدة قابلة للتجميد.




7ـ استغلال أوقات ربة البيت: يمكن تجميد الأغذية المطبوخة أو نصف المطبوخة والاحتفاظ بها لفترة من الزمن، حيث تستطيع ربة البيت (التي تشعبت مسؤولياتها العائلية كثيراً) من استغلال أوقات فراغها لإعداد وجبات من الطعام مطبوخة أو نصف مطبوخة تكفي لأيام عدة، وبذلك تساعدها هذه الطريقة على توزيع أوقات عملها بين بيتها وأطفالها وراحتها.




8ـ تجنب تذبذب الأسعار: تساعد المجمدات المنزلية وتجميد الأغذية في التخفيف من مشكلة تذبذب أسعار المواد الغذائية في الأسواق في بعض الأوقات، وذلك لخزن بعضها في موسم توفرها بكثرة وطرحها في الأسواق في أوقات أخرى.




9ـ قلّة الذهاب إلى السوق: تساعد المجمدات المنزلية (إذا أحسن استعمالها) رب العائلة على تغيير نمط حياته اليومية، فلا حاجة له للذهاب يومياً إلى السوق لشراء متطلبات العائلة من لحم وخضروات وفاكهة وبذلك تكون المجمدة قد ساعدت أفراد العائلة على توفير وقت إضافي للراحة أو لقضاء أمور أخرى

[شاطئ بلا رمال]

ونبدأ بنفسي
تجميد الخضار
البازيليا من ما يجمدش فيها نشريها في موسمها نفصصها ونغسلها وننظفها ونحطها في المصفاه ونتخلص من الحبيبات الغير صالحه ونقسمها وجبات في أكياس نايلون ونجمدها، بصراحه روعه.
السلاطه المشويه والبابا غنوج
تفريز متبل الباذنجان..(البابا غنوج)
يشوي الباذنجان على عين الغاز وينظف ويوضع في الفريزر حطي كل حبه وحده مشويه في كيس مغلق ولا ترمي السائل فطعمه رائع.... وعند الحاجة اخرجيه قبلها بساعه ثم اهرسيه وضعى عليه ليمون وثوم وطحينه وزيت زيتون وكأنك توا شاوياته.
وطريقة اخرى
انك إديريه وتحطي عليه كل شئ وتجهيزه عادي وبعدين تحطيه فى الفريزرفي كيس نايلون أو حافظه لوقت الحاجة
صلصة البيتزا نطيبها عادي مع زيت الزيتون والحبق كأني بنسعملها وقتي ونديرها في فازوات ( برطمانات ) ونجمدها ولما نبي ندير بيتزا ننزل فازوا نخليه في الثلاجه وناخذ منه حاجتي يقعد حتى أيام في الثلاجه مايصيرله حتى حاجه كأنك توا مطيبتها (مريحه الطريقه ) خصوصا للي ديما يحبو يديرو البيتزا.
الموزاريلا نبشرها ونقسمها في أكياس وتتجمد.
الفليفله لونبي نستعملها على البيتزا حتى هيا نقطعها ونجمدها (جربتها كويسه)
تجميد اللحوم
الدجاج نتبله ويكون واتي للتحمير في الفرن على طول
ولي عوده إن شاء الله

[خدوج]

ماشاء الله ياشاطى موضوع مميز
ونزيد على كلام بما ان معظم العنصر النسائى يشتغل خارج البيت
عملية التجميد توفر الكثير الكثير من الوقت
ونبدا باشياء بسيطة مثلا الفاصولياء الجافة طهيها يحتاج وقت
ومش كل مابديرها نغلى ونعاود وتاخد وقت
فندير منها كمية كبيرة ونقسمها على اكياس ونجمدها
الثوم نقشر كمية كبيرة ونحطها فى الفريز
وقت الزوم ناخد فصوص حسب اللى نبيه ونحطها فى مية اقل من خمس دقائق
ونفرمها
البصل فى الشهر الكريم نبشره ونجمد كميه ويساعدنى هلبه
الطماطم نفرمه ونديره اكياس ونلقاه جاهز لمن بندير البيتسا او الطبيخة
وطبعا اللحوم زى الدجاج واللحم الاحمر ناخد كمية ونقصه ونحطه فى الثلج حسب رغبتى
ووجبتى اللى بنطيبها
ووغيره كثير
ولى عودة باذن الله كل مانتفكر حاجة نرجع ونكتبها
اه تذكرت رشدة البرمة كنت نجفف فيها بس بعدين لقيت فى تطيبها تبدا كاسحة شوفى
فلقيت طريقة التفريز افضل
بعد مانقصها نفورها شوى فى الكسكاس ونحطها اكياس وعلى الفريز
ولمن بنديرها عادى كان كيف قصيتها بس نزيد كاشيك دقيق معها
باش تعطى بنة
الباميا نفورها شوى وعالفريز
ولى عودة باذن الله

[شاطئ بلا رمال]

صباح الورد يا دوجي
ماشاء الله ديما حضورك ومشاركاتك وأسلوبك مميز أثريتي الموضوع
وفعلا ذكرتيني حتى أني ندير فيها الفاصوليا، بس الرشته طريقتك جديده عليا وإن شاء الله حانجربها وفعلا مريحه أني كل ما بنديرها نعجن
وربي مايحرمنا من مشاركاتك المميزه

[guidona]

ماشاء الله موضوع في قمة الفائده روعه الله ابارك فيك شاطي بلا رمال
بنسبه ليا طبعا نشتغل وفي غربه يعني نستحق ونستفيد من افكار هلبه زي هده
اعتقد متل خدوج غل اني بدل الرشده المبوخه
لانه اهني مفيش رشده واتيه ومش متوفره اندير بالوجبتين
يعني تعجن مقدارين او مرات حتي تلاته حسب ونكيسها في الفريزر ولما نبي اندير رشده انطلعها
وعندي طريقه حلوه لسلق وللملفوف
بدل ياحبايب مديرو السلك في الطنجره والملفون وهديك ريحة الملفوف في الحوش مش محبده لدي
اني لما نشري سلك او ملفوف
نغسلم كويس ونحطعم في الفريز
ولما انفكر اندير ضولمه انطلعهم يعني اكونو دابلات وساهل حشوهم بدون ريحه وسخني الميه واتني الملفوف نين يدبل
والطماطم اندير هلبه باش لما تبي اندير معجنات انطلع هديك الصلصه ساهله
وتوا كان تفكرت حاجه حنقولها

[شاطئ بلا رمال]

صباح النور والأنوار ياغيدونا
وفيك بارك الله حبوبه
فعلا فكرتك جديده وحلوه متع الملفوف والسلك
أثريتي الموضوع وربي يعاونك إن شاء الله
مشكوره على المشاركه وموفقه إن شاء الله

[زهرة البنفسج]

بالسبة ليا رشدة البرمة بعد مانقطعها طبعا بماكينة الرشدة نحط عليها شوية دقيق وطول للفريز والله تطلع كأنها كيف درتها

والمعدنوس والكسبر والشبت نقطعهم ونغسلهم وانحطهم في اكياس وانحطهم في الفريز وهدا يكون اكتر شي للفاصوليا والشربة و والكيما وغيرها ومرات ندير منه حتى العصبان لاكن طبعا الطازة خير

[مغتربة 7]

موضوع رائع
حتى اني نحتاج فى الفريز لبعض الاشياء
الفاصوليا
البازيلاء
الفول الاخضر
الهريسة

وزي ما قالت الغربة مرات المعدنوس لما يكون كمية كبيرة ومش محتاجتها نقرضه ونحطه فى الفريز

موضوعك حلو وكان ادكرت حاجة تانية ان شاء الله نكتبها
تقبلي ودي

[ام ساره وعبدالعزيز]

بسم الله
اول شى الطماطم نحب نفرز زي ما هو ولم نحتاجة نطلع من والبطاطا نحطها في امية وخل ونسيبها شوي وبعدين نقليها نص قليا ونحطها مفرودة على سفرة مدهونة وبعد ماتجمد نحطها في كيس والثوم حتىهو نحط فية بعد نضربة مع شوي زيت وملح فى ست البيت
والليمون نحط فية زي ماهو بعد نحتاجة نحطة في امية ساخنة والفواكة نجيب حسب الموسم وتقطع وتخلط بسكر وليمون وحتي القطايف وبلح الشام نخليهم جهزين علي قلي
هذا ماعندي حاليا ولم نذكر حاجة توا نقولها

[الساجدة لله]

والله ماعندي مانزيد عليكم لان تقريبا كل سيدات المطبخ بهده الكيفية ومش العاملات بس حتى اللي قاعدات في الحوش انا الاولة نحب نفرز كل شئ لان مرات حد يجي على غفلة وانا مش مطيبة ماعنديش حلويات مدايرتهم
لذلك لقيت التفريز مساعدني هلبه هلبه متلا الزمالة الصويبعات البيتي فور البسكوت السابليه كله نفرز فيه بالنسبة للحلويات المعسلة مانعسلهاش الا وقت التقديم زيها زي السليلة نفرزها ووقت التقديم نطلعها ونخليها تفك بعدين نسخنها شوية ونحشيها ونقدمها

المعجنات زي البيتزا كانها الميني نديرها ونوتيها بالصوص ونطيبها ونخليها تبرد ونفرزها عند التقديم نطلعها ونسخنها بعدين انكمل التزيين متعها والبوريك متع الجبدة والبوريك العادي لما اديره عزوزتي ادير كمية ونفرزوها وامته نبو نطلعو ونحشوه ونطيبوه ومعجنات البف بستري كدلك نطيبها ونفرزها

السلاطات زي المشوية والبابا غنوج كذلك ندير كمية ونفرز وعندك خضرة شربة الخضرة نغليها غلوة زي البازيلا والجزر والكوسا والبروكلي ونبردها بعدين نجففها ونكيسها ونفرزها

مرقة الدجاج او اللحم ندير في كميات بعظام الدجاج او قطع اللحم مع العظم وعند النضوج نبردها ونقسمها في طواسي بلاستيك ونفرزها ولما نبيها نطلعها ونحول الطبقة الدهنية اللي على السطح , كدلك شوربة العدس نطيب كميات خصوصا في رمضان نطيب ونبرد ونقسم على طواسي البلاستيك البيض ونفرز وكل مانبي نطلع طاستين او اكتر ونخليها تفك بعدين نسخنها ونضيفلها التوم والكمون او اي شئ

طبعا بالاضافة للبرجر الدجاج او اللحم والمرقاز والسمك نوتيهم في الحوش ونجهزهم ونحطهم في سفرة واسعة ونحط عليها نايلون ونحطهم في الفريز وبعد ساعتين او اكتر نقيمهم ونحط مابينهم اكياس نايلون زي مااندير لبورق البوريك ونحطهم في تابروير ونفرز

والموضوع مفيد وكويس ولي عودة ان شاء الله

[بنية بوها]

والله موضوع رااااااااااائع جداا وكل ستات يحتاجوا وانا الباميا نقطعها ونغسلها ونحطها فيالفريز
واللوبياءالخضراء حتى هيا نفس الشي والمبطن كنت بس تضمني انا ماتوصلاش مية لان كان هدا
سلامتك شن ثاني يابنية بوها تفكريفيسع وراك طابورهههه ماشاءالله البنات ماعقبن جهد
وصلصة البيتزا والبصلة حتى هيا نبوخها دقيقتين مع الحمص ونديرها كويسات ونحطها فيالفريز
وكان تفكرت لنا عودة

[mnona]

http://www.libyan-kitchen.com/gallery/images/gallerhhh.gif

ماااااااااااااااااااا شا الله موضوع مش عادي بكل وعجبني هلبااااااااااااااااا هلبااااااااااااااا
وح نضيف عليكم حاجة ثانية
الكوسة المحشية ( نغسلها كويس ونوتيلها حشوتها ونحشيها وبعدها نطيبها نص طياب وبعدها ناخد بالكوسة بالوحدة
نغلفها بالسلفر ونحطها في كويسات ( نقسمها وجيبات وجيبات ) ونحظها في الفريز ، ولما نبيها نطلعها وطول نبوخها تبويخ تجي بنتها تهبل والرز ميصيرله شئ

الفليفلة المحشية بمفروم الدجاج او اللحم ( نغسلها ونقطعها جرار جرار يكون غليط شوية ونوتيلها حشوتها ويفضل بمفروم الدجاج تبليه كويس وتطيبيه وبعدين تحشي بيه دوائر الفلفل وبعدها تغمسي في الدقيق والبيض والخبزة المرحية وبعدها تقليها ، وبعدين تغلفي كل وحدة بروحها بالسلفر وستفيها في الفريز ولما تبيها اطلعيها وتسخني الفرن وتستفيها في الفرن وتحطي فوقها جبنة شرائح واديريلها صالصة وتشربيها بيها وخليها لين تشرب صالصتها وكوليها بالهني عليك

وهلبا حاجات الحق اندير فيها ونستفيد منها وبإذن الله كل مانتفكر حتى اني نجيكم ونقوللكم بااااااااااااهي

ومشكورة هلبااااااااااااااااااااااااا هلباااااااااااااااااااااا شاطئ بلا رمال على الموضوع

[شاطئ بلا رمال]

ماشاء الله على المبدعات كل وحده عندها أفكار جديده ومختلفه ومعلومات قيمه
ربي يحفظكم بارك الله فيكم على الإفاده فعلا أثريتو الموضوع وزدتو التشويق وخليتوه مفيد للجميع، في ميزان حسناتكم إن شاء الله

[ام ليليا]

ما شاء الله كلها افكار كويسة و عندي طريقة نستعمل فيها لتفريز الحاجات باش ماتاخدش مكان كبير في الفريز متلا الصالصة متع البيتزا نعبيها في كياس و نحطها علي صفرة و نمسح عليها باش تولي طبقة رقيقة و نحطها في الفريز و لما تجمد تولي زي الورقة و لما تبي تاخدي منها كسريها بصوابعك تجي ساهلة و تاخدي الكمية اللي تبيها و تردي الباقي , الطريقة هادي كويسة انك لما تبي شوية مش لازم اتدوبي الكيس كله و نفس الوقت ماتاخدش مكان في الفريز مش لما تنحط صمصومة مع بعضها هكي ، و الطريقة هادي ندير فيها لكل شي الصالصة متع البيتزا ، الجبنة المبشورة ، المرقة .. هادا اللي علي بالي توا كان اتفكرت حاجة تانية توا انضيفها .

[mnona]

اهلا شن الاخبار
تفكرت حاجة ثانية
الكبة ( نديرها ونوتيها ونكركبها ونحطها كويسات كويسات في الفريز او نستفها في حافظة ولما نبيها نطلعها وهى متجمدة نغلفها بشوية دقيق
وطول في القلاية وضروري القلاية تكون سخوووووووووونة وخليها لين تتحمر ويتحول منها الثلج )

[ام رواسي]

ماشاء الله
موضوع راااائع ومفيد
بارك الله فيك

[ام زكريا]

مشكوووووور والله يعطيك الف عافيه

[Om Amory]

السلام عليكم

طبعا أنى نجمد فى رشدة الكسكاس زي طريقة خدوج نبوخها شوي وبعدين للفريز

والبزيليا حتى هيا نفصصها ونحطها فى الفريز

[Om Amory]

ماشاءالله موضوع مهم

بارك الله فيك

[المستعينة بالله]

حبيبتي في موضوع للتفريز والتجميد بالمنتدي
لكن لان موضوعك كان به دعوة للمشاركة من العضوات ومن خلال تجاربهم الشخصية
نال التميز وسوف يتم تتثبيته وتسلمين ياقمر وبانتظار المزيد من المشاركات

[bent libya]

بسم الله الرحمن الرحيم

[bent libya]

والله تجربتي اني مع البصلة في الفريز

ناخذ كمية من البصل والحمص انطيبهم عادي كاني بندير بصلة وبعد مايبردو نخاطهم مع بعض ونكيسهم وجبات ولما نبي انطيب انطلع الكويسة ونخليها لين تفتر وتطيبها عادي والله كانها طازة


جربوها ودعولي

[نسمه ليبيه]

مشكورات جميعا استفدت من افكاركن

بارك الله فيكن

[نسيبة]

اني نجب الطماكم الصيفي البنة و الصنة بكل الطرق عصر قطع يابسيعد
تجفيفه و الفلفل الاخضر الصيفي مش متع الصبات خاصة في الشتي الصغير روعة
العسلوز ديما لازم فيه حصيصة منه وقت جي الخاطر فيه خاصة انه موسمه قصير

البقوليات الكبة بكل انوعها الصلصات الفاصوليا اليابسة بعد التطيب و الخضراء بعد

تنظيفه المعجنات حتى البهارات تقعد طازجة الفمروم و الاسماك بعد تنظيفها و اللحم المكيس الجاهز و القديد اللي من غير قلي

الفريز عامل مهم جدا للربات البيوت رشدة الكسكاس متع الحوش البصلة و الحمص

صحيتي غالية

[fidaa]

السلام عليكم
الموضوع حلو وشيق نحب انفرز الازانيا سو كانت روال او عادية وتقعد حتي شهر اهم شئ تغطيه زين حمص نغاليه و ان صفيه ونكيسه وكانه معلب وفوكه بصف عامه (نطربه بالماء اوالحليب او زبادي او بتلج او بروحه بالخلط العمودي) كسكس ماما تبرم فيه وتبوخ تبوخ واحد وتحط في الفريز من غير شمس كانه اخضر دجاج نتبله وتخله ساعه في تلجه وبعده نفرز المرق الحم او دجاج اوحوت نطيبه ونخليه تختر وكانه مرق ماجي وحتي مرق الاحمر بحضه في اكيس ونفرز ممكن نستعمليه في مكرونا مع اضفة الخواضراو رشده مع ايضفة الباقوليات او اي شئ يخطل في بالك السبانخ نقلي بصل مفروم ونحط السبانخ وفرز ولم نبه نحطيف نكه لتعجبني فيه
وانشاءالله نفيدكم

[بنت الاشراف]

بارك الله فيك على هذا الموضوع المفيد

[الصابرة]

السلام عليكم

مشاركتي مش عارفة في حد يعرفها هي على اللحم طبعا احنا راس ورويس ومايجوناش ضيوف هلبة يعني بعد وين وين
لكن راجلي من النوعية لما يشري اللحم يشري مايكفي من2الى 3شهور
بالنسبة للدجاج اقطع منه واضعه في كيس لضيف فجائه
واخذ الصدر اعمله لوحده في حالة نبي ندير بيه حاجات حارة
والاجنحة اجمعها لاعمل كمية كويسة وفي وقت من الاوقات نسلقهم بالبهارات ونديرلهم تتبيلة بالزبادي والبهارات ونحطهم في الكوشة
ومع سلاطة وبطاطا مقلية يجي عشاء ياسلام
اما بالنسبة للحوم الحمراء لتسهيل عليا الوقت اقطع لحم صغير بتاع العصبان والبراك ونكيس ونحط في الفريز
طبعا لحم المسقي اندير فيه كبير شوي نكيسه ونحط في الفريز
لحم المكرونة والطبيخة والشربات برضوا كل واحد بروحه
ونقطع شرايط طويلة للشورما ونتبله ونكيس
وطبعا مايخلاش الموضوع من الشواء
اما بالنسبة للسمك كنت انضف فيه واكيس الطاجين بروحه وبتاع الكسكسي بروحه وبتاع القلي بروحه وبتاع الشواء بروحه كنت هكي لكن مرة بتاع السمك اللي يبيع فيه قال لراجلي لما اتنظف السمك لا يحفظ في الفريز اقل من اسبوع كنهدا يقعد من غير فايدة لكن احفظه من غير تنظيف يقعد 3 شهور
فدرت هكي واليوم اللي قبل نطيب فيه سمك نطلعه ونظفه ونخليه في الثلاجة من تحت لعند ثاني يوم انطيب فيه
طبعا هذا كله نجيب في اللاصقة الطبية البيضة بتاعت الجرح اللي نستخدموا فيه للحنة نلصق قطعة منها على كل كيس ونكتب عليها لحم بتاع شنو بحيث اني نعرف الكيس اللي نبيه على طول وطبعا هذه الافكار ندير فيها حتى مع خروف العيد
اتمنى اني قدمت معلومات جديدة ومفيدة

[مغتربة 7]

ماشاء الله عليكم يابنات افكار مش عادية

فى انتظار المزيد من التفاعل:)

[آمال]

جزاكن الله خيرا

اظن ما خلتونا شيء
لكن تذكرت انا الدقيق والخبزة المرحية " بقسماط" هذا على طول على الفريز والعصير الطبيعية مثل الفارولة والليمون وغيره ايضا على طول في الفريز

بوووركتم أخواتي