الجدول اليومي لغذاء طفلي

[أم أيوب]

السلام عليكم ورحمة الله وبركاته

حبوبات كلكم تعرفواأيوبي بسلامته

توه عمره تم 8 شهور وخش الشهر التاسع يطولي في عمره

من مدة شهرين حطيتله نظام غذائي ماشيين عليه باليوم

الا لما يكون مريض ماياكلش الا النص بس

المهم نبي من اللي عندهم خبرة يقولولي اذا كان كويس أم لا

أنا ما نحبش الطفل السمين اللي كله شحوم

نحب الطفل اللي يكون عظمه ماشاء الله ويكون نشيط خديداته حمر

ما نطولش عليكم

الساعة 8 ونص الصبح بالكثير 9 نعطيه رضعة حليب

الساعة 11 ونص لما ينوض ما نوكلش طول نعطيه نص ساعة

بعدين ناخد في صفار دحية مسلوقة نص طياب ولازم يكون دحي وطني

نخلط الصفار مع ربع ملعقة صغيرة عسل وملعقة صغيرة زيت زيتون

نوكلهوله ونعطيه معاه طرفين جبنة كيري

ياخد مية ونخليه للساعة 2 ونص لوقت الغداء

نعطيه شوربة خضروات فيها جزر وبطاطا وكوسا وحبيبات بازيلاء وربع صدر دجاج

وفيها قرعة وسن ثوم وملعقة زيت زيتون ورشة بسيطة جدا ملح

ونحط معاهم تفاحة وثلاث حبات تمر لأنه أيوبي ما يحبهمش بروحهم

ونحط معاهم في حبة طماطم وملعقة كبيرة عدس أصفر

نخليهم قريب ساعة عالنار ونبردهم ونرحيهم في الخلاط

هذي وجبة الغداء نعطيه منها تقريبا فنجان شربة صغير

ونسقيه مية بعدها وغالبا يرقد فترة قيلولة

بعد ثلاث ساعات من وجبة الغداء نعطيه رضعة حليب

مع الساعة سبعة في الليل نعطيه وجبة سيريلاك

مع الساعة 9 ونص نعطيه رضعة حليب

مع الساعة 11 ونص او 12 نعطيه نص موزة مهروسة مع كوب زبادي

الساعة 2 نعطيه رضعة حليب فيها رز مطحون متاع الأطفال

قولولي لو هالنظام فيه شي غلط أو يسبب سمنة زيادة

لاحظو اني ركزت عالألياف والبروتين والكالسيوم أكثر شي

[نسمه ليبيه]

ام ايوب ماشاء الله ربى يخليه لك وتفرحى بيه بس عندى ملاحظتين

الاولى العسل لا يعطى للطفل الا بعد سنه

ورز الاطفال المطحون ان شاء الله مايكونش رز ريري لانه مش كويس

غير هكى ماشاء الله نحس فيه نظام متكامل

[أم أيوب]

بارك الله فيك نسمة ويخليلك عويلتك

تعرفي العسل من عمره شهرين باته يعطي فيه له

ما يكثرش منه وصارله غازات

رفعته لدكتورة أطفال قالتلي بالحق ماياكلش العسل الا بعد السنة

بس لما يفوت ست شهور عطيه شوية بكل ما تفوتيش كشيك صغير

ومايكونش دغري يعني خلطيه مع حاجة تانية

لان العسل مضاد لبكتيريا الجهاز الهضمي

وفعلا معاش تعبه ولا دارله نفخة ولا غازات

بس رز ريري نعطي فيه له من عمره 4 شهور يا نهاري

ليش مش كويس

[الساجدة لله]

حبوبة عندي نظامك نحسه كويس ومغدي بس عندي ملاحظتين بس اولهم العسل لايعطى لطفل اقل من سنة

والتانية هي الملح لايعطى ايضا لطفل اقل من سنة لان الكلى لازالت في حالة نمو ومش عارفة العدس اذا يمشي او لا وياريت تستشري طبيب لان زي ماتعرفي هو يتعب شوية في الهضم بس بالاجمالي ماشاء الله نظام غذائي كوييييس وكان نشده نقطعله خدوده الحمر ههههههه سلمهولي ياربي

[أم أيوب]

سجودة نورتي حبيبة والا تقطيع الخديدات

العدس قالي عليه دكتور أطفال في بنغازي

قالي الطفل محتاج كم نوع من البروتين واحد منهم متوفر في العدس

والكمية ماهي واجدة يعني كشيك عدس في شوربة خضروات تكفيه يومين

الملح ما سألتش عليه دكتور بس قريت عليه في مقالة في جريدة ان جسم الطفل

يحتاج كمية بسيطة جدا من ملح الطعام لأن فيه صوديوم والصوديوم مفيد

لعضلة القلب بس توة نسأل عليه دكتور أيوبي بس نمشي لبنغازي

العسل والله أنا معاكم انع تقيل شوية بس خديت بكلام الدكتورة

ان شاء الله نوقفه له لبعد السنة

مشكورات حبيبات على رايكم وربي ما يحرمني منكن

[مغتربة 7]

ماشاء الله عليك يا ام ايوبي دكرتيني بصغاري لما كانوا صغار زي ايوبي السمح ربي يحفظه ويكبره فى طاعته

حتى اني نفس الملاحظات
العسل ما ينعطاش بعد السنة وسئلت عليه هلبة زمان لانه سبحان الله فيه شفاء للناس
بس قالوا العسل فيه مادة ما يتحملوهاش بعض الاطفال تسبب فى اعراض خطيرة اللهم احفظنا.

والملح
بما انك تحطي فى تمر وتفاح يعني الملح ما فيش ليه داعي اصلا
لانه هكي اضرارها اكثر
طبعا يقولك حتى حجم عدسة من الملح ياكله الطفل يأثر على الكلوى اللهم احفظ

وبالنسبة للعدس روعة اعطيه كله حديد وزمان الدكتورة قالتلي ضروري تعطيه بالذات الاحمر

وربي يعينك يارب

[الساجدة لله]

لالا اهم شئ الخدود ياام ايوبي انا زمان صغاري نعطي فيهم العدس ومرات نرحي في حبة او اتنين حلبة ومتخافيش مافيهاش ريحة , والتفاح والخوخ والفواكه هده ضروري والشوربة متع الخضروات احسن شئ ليه عشان الفيتامينات وبالنسبة للملح انا متاكدة منها المعلومة انه ضار للكلى متع البيبي ردي بالك حبوبة

[أم أيوب]

مغتربة بارك الله فيك على معلوماتك

ان شاء الله حنوقف الملح والعسل لبعد السنة

ايكفي الملح اللي في الجبنة والزبادي

تعرفي قريت على الحليب متاعه نعطي فيه بيبيلاك

لقيت من ضمن تر كيبته صوديوم

يارب ما يضرش اللي خداه لتوة نهاري

[أم أيوب]

سجودة حذاري وشديقات ايوبي هههههه

(( نحن عرب الشرق نقولوا للخدود شدوق وندلعوا فيها شديقات هههه ))

الحلبة قريت عليها انها تقوي جهاز المناعة للطفل وتقوي الدم تعرفي من عمره شهرين

كنت نديرله في خلطة

ناخد تمرة نحط عليها رشة صغيرة كمون حلو وزيها حلبة

ونغلي مية ونصبها عليها ونغطيها لعند ما تبرد

نصفيها ونعطيها له تعرفي كانت تخلي فيه يرقد كويس

لا غازات لا نفخة بس بعد مابديت شوربة الخضرة

قعدت نحط التمر والحلبة ومرات رشو كمون حلو فيها

نورتي يا عسل ومنك نستفيد

[مغتربة 7]

ام ايوبي انسيت انقولك
بدل العسل حطي جبنة فيلادلفيا مع صفار الدحية
وبوسيه

[أم أيوب]

يوووووووووصل

فكرة الجبنة مع صفار البيض والله

نعطي فيها له بعد الدحية

المرة الجاية ان شاء الله نخلطهم

صحيتي يا قمورة

وايوبي يسلم عليك ودزلك بوسة هههههههه

[الدلوعة]

نبى نسال ؟ ؟؟ شكللك ماتطلعيش من الكوجينة ربى يعطيك الصحة

[أم أيوب]

نبى نسال ؟ ؟؟ شكللك ماتطلعيش من الكوجينة ربى يعطيك الصحة

ههههههههههههه ضحكتيني

مشكورة على مرورك

[Om Amory]

ماشاءالله البنات ماقصروا

لكن نحس فيه هلبه

هكى بطلعيه دب ههههههههههههههههه

[DREAM]

السلام عليكم ورحمة الله وبركاته
وخيتي ام ايوب انقول علي بعض النصائح من تجربتي مع صغاري
اول حاجة البيض للاطفال لازم ايون طهي كامل لان زي ما تعرفوا البيض فيه بيكتيريا
تاني حاجة العسل زي ما قالو البنات ما ينعطيش للاطفال قبل السنة
تالت حاجة الملح والسكر ما ينعطيوش للاطفال قبل العام او ل ما عودتي الطفل من غيرهم قبا العام افضل
رابع حاجة الزبادي لازم تعطيه ليه بعد وجبة الغدي متلا لانها اثقل وجبة لانه يهظم الاكل وعلى فكرة الطفل في العمر هدا محتاج للزبادي اكتر من الحليب يعني ايكون افضل لو اتنقصي من وجبات الحليب ونعوضيها بزبادي
وان شاء الله اتشوفيه عريس هههههه

[أم أيوب]

ماشاءالله البنات ماقصروا

لكن نحس فيه هلبه

هكى بطلعيه دب ههههههههههههههههه

هههههههه صحيتي ام عموري السمح

تعرفي دايرة روحي ما نبيشي يطلع سمين ومشحم نبيه يكون عظمه قوي ويدير عضلات ههههههه

لاحظي ما ركزتش واجد عالنشويات وندور الفيتامين والبروتين والمعادن والكالسيوم

[أم أيوب]

السلام عليكم ورحمة الله وبركاته
وخيتي ام ايوب انقول علي بعض النصائح من تجربتي مع صغاري
اول حاجة البيض للاطفال لازم ايون طهي كامل لان زي ما تعرفوا البيض فيه بيكتيريا
تاني حاجة العسل زي ما قالو البنات ما ينعطيش للاطفال قبل السنة
تالت حاجة الملح والسكر ما ينعطيوش للاطفال قبل العام او ل ما عودتي الطفل من غيرهم قبا العام افضل
رابع حاجة الزبادي لازم تعطيه ليه بعد وجبة الغدي متلا لانها اثقل وجبة لانه يهظم الاكل وعلى فكرة الطفل في العمر هدا محتاج للزبادي اكتر من الحليب يعني ايكون افضل لو اتنقصي من وجبات الحليب ونعوضيها بزبادي
وان شاء الله اتشوفيه عريس هههههه

يسلمك دريم ويحفظلك صغارك ياربي

بالنسبة للملح والعسل وقفتهم له من أول ماقالولي البنات مش كويس

البيض انا نوكل فيه بيض وطني من مزرعتنا يعني طازج يوم بيوم

ومن قبل قريت مقال ان البيض الصحي هو اللي يكون مش طايب لين خلاص

يعني الصفار يكون طري شوية

الزبادي في ايام وراء بعضهم كنت نعطي فيه كبايتين زبادي

صارله التهاب حفاظ

شكيت في نوع الدايبر مع انه ممتاز وماشية بيه من هو بيبي

ماباش يبطل

لما سألت دكتورة أطفال قالتلي بروحها تعطي فيه زبادي واجد

قلتلها اها قالتلي هو سبب الالتهاب لانه فيه خمائر واجد

ولما يزيدوا عن حدهم يسببو تسلخات للبيبي لان الخمائر

تزيد تتخمر في المعدة وجزء منهم يطلع مع البراز حشاك

خليه له مرة في اليوم لعند ما يفوت عمر سنة

بعدين عطيه اكثر من مرة

[DREAM]

سبحان الله شكله كل بيبي وطبعه
اني بنتي توا عمرها سنة وتلاتة شهور من عمرها 4 اشهور ماترضعش طبيعي مع اني انفضل الرضاعة الطبيعية لكن هي اتعودت عالرضاعة وكرهت الطبيعي لغاية ما جف الحليب ومن اول ما بديت نوكل فيها 6 اشهور بديت تكره الرضاعة وتعودت عالاكل قعدت نغصب فيها ونعطي فيها ليها وهي راقدة ولما سألت الدكتورة قالتلي احسن هي محتاجة في العمر هدا للزبادي اكتر من الحليب وبديت نعطي فيها الزبادي 3 وجبات في اليوم وبعد كملت السنة سبحان الله زي ماقالت الدكتورة البيبي بعد السنة تلقائيا يرجع للسوائل وفعلا بعد السنة بديت نعطي فيها الحليب في الاول انخلط فيه بعصير المانجا وبعدها قعدت انقص في العصير بالشوي وتوا نعطي فيها حليب مع ملعقة صغيرة عسل واهم شي البيبي ايكون عظمه صحيح
اسفة عالاطالة

[روح مغتربه]

ما شاء الله ام ايوب ربي يخليه ويحفظه ويرزقك بره
بس انا مش من النوع الي ايفضل الحليب الصناعي وبما انك درتيها بدري الله غالب احسن من بلاش وبنسبه لرز الاطفال هو فعلاً مش كويس تعرفي ولدي الاول سالم ربي يهديه عطيته من الرز وسببله امساك مع اني ما نكترش يعني وجبه في اليوم وتقريباً كاشيكين ومع هاذا سببله امساك كرهت اي حاجه جمصنعه واصبحت نحرص علي الوجبات الي انحضرهن بنفسي زي الفواكه المهروسه والخضروات

[الكتومه]

بارك الله فيك

[بنغازية وافتخر]

ايوبي ماشاالله عليه ونظامه الغذائي ممتاز مع اعتراضي عالعسل والملح بس يا ريته يبدا يمضغ عشان نخششوه عاللحم والعصابين , ولازم تبدي تعودي فيه علي الاكل بدون طحن عشان تتطور قدرته عالبلع مع اني عارفة هو ما يحبش يتعب روحه

[المغتربه]

حبيبتىالدحى الوطنى بروحه يكفى العسل حاولى تعطيه له بعد السنه والتفاح والتمر حاولى تخليهن مع وجبة فاكهه زى (موز وتفاح وتمر )تغليهم فى ميه على النار نين يهبزو بدون اى اضافات حطى التفاح والتمر وقبل ما تطفى ب10 دقايق حطى الموزولما يبرد فى الخلاط
لان وجبتك غريبه وثقيله على معدة طفل والغى العدس وحطى قطعه صغيره صدر دجاج عشان تكون فيها بروتين
هذا ما نصحنى بيه الدكتور والعدس يسبب انتفاخ معده ودائما احرصى على الكوسه لانها تمنع الانتفاخ
وتقدرى البكيوه تحطى معاها موز كوجبه مستقله
مش مهم انك تسمني طفلك المهم صحته

[أم أيوب]

ايوبي ماشاالله عليه ونظامه الغذائي ممتاز مع اعتراضي عالعسل والملح بس يا ريته يبدا يمضغ عشان نخششوه عاللحم والعصابين , ولازم تبدي تعودي فيه علي الاكل بدون طحن عشان تتطور قدرته عالبلع مع اني عارفة هو ما يحبش يتعب روحه

خالة ايوبي انت عارفة طبعه كويس

العصابين بينا وبينهن ياما ههههههههههههههههه

[أم أيوب]

حبيبتىالدحى الوطنى بروحه يكفى العسل حاولى تعطيه له بعد السنه والتفاح والتمر حاولى تخليهن مع وجبة فاكهه زى (موز وتفاح وتمر )تغليهم فى ميه على النار نين يهبزو بدون اى اضافات حطى التفاح والتمر وقبل ما تطفى ب10 دقايق حطى الموزولما يبرد فى الخلاط
لان وجبتك غريبه وثقيله على معدة طفل والغى العدس وحطى قطعه صغيره صدر دجاج عشان تكون فيها بروتين
هذا ما نصحنى بيه الدكتور والعدس يسبب انتفاخ معده ودائما احرصى على الكوسه لانها تمنع الانتفاخ
وتقدرى البكيوه تحطى معاها موز كوجبه مستقله
مش مهم انك تسمني طفلك المهم صحته

ان شاء الله نجربله التفاح مع التمر والموز بكرة

العدس نصحتني بيه دكتورة قالتلي ان البروتين اللي فيه يختلف عن بروتين الدجاج

والطفل محتاج كدا نوع من البروتينات

هدفي مش تسمين وليدي نبيه بس تكون بنيته كويسة وعظمه قوي

نورتي يا مغتربة وشكرا جزيلا على نصائحك المفيدة

[زهرةالعمر]

شكرا والله جدول ممتاز انا استفدة منة بمعلومات اضافية

[barney]

سامحوني ممكن الموضوع ليه فترة لكن اني في امريكا والدكتورة قالتلنا ان العسل واللحم قبل العام ممنوع لان الجهاز الهضمي ما يقدرش يهضمهن والدحي حتى هو قبل العام لا. لازم الطفل ايسكر العام ربي يحفظلك اوليدك وبعدين تعطيه العسل واللحم والبيض

[nosa-83]

شكرااا وبارك الله فيك

[cute girl]

​http://www.alqaly.com/vb/mwaextraedit4/extra/75.gif