[ تجربة ] لحفظ الاوراق الخضراء مثل النعناع,المعدنوس والشبت ,,,وغيرها لمدة طويلة

[bent libya]

بسم الله الرحمن الرحيم



اليوم حبيت انفيدكم بتجربتي الخاصة لحفظ الأوراق الخضراء مثل المعدنوس والشبت والنعناع والبصل اللأخضر والكرافس وكل اللأوراق الخضراء لمدة طويلة تصل الي اسبوعين وتقعد زي ماهي خضراء ومنعنشة
صدقوني والله ليا سنة ونصف واني معتمدتها في بيتي


الطريقة


هي انك تاخذي العشبة الخضراء زي ماقلنا اي نوع الي تبي تحتفضي بية وتنزعي العيدان وتخلي الأوراق ولازم اتكون جافة شارتيها من السوق وبعدين تاخذي الأوراق وتحطيها في خفاضة وتسكري عليها كويس بغطاء الحفاضة ,بحيت انك ماتخلي الهواء يدخلها وتحطيها في احد رفوف الباردة في الثلاجة وهكي اتطول معاك لمدة تصل اسبوعين او اكتر صدقوني جربوها وتسهل عليكم هلبا في المطبخ


وهذه صورة النعناع في بيتي هذا النعناع ليه اسبوعين امبارح صورتهولكم


http://www.libyan-kitchen.com/gallery/images/clipimbpb.jpg







وان شاء الله حتستفيدو منها وادعولي :)

[الساجدة لله]

بارك الله فيك على النصيحة وجزاك الله كل الخير ياغالية

[mnona]

مشكورة ياغالية حتى اني نتبع في نفس الطريقة ولكن نغلف في الحافظة من داخل بالمناديل الورقية الخاصة بالمائدة ( الكنينكس الكبير المرسوه عليه وردة ) والحق تقعد الخضرة زي ماهى

مشكورة

[ام ليبيه حره]

بارك الله فيكم على هذه المعلومة

[مغتربة 7]

روعة معلومة مفيدة جداً
ان شاء الله انجربها
بارك الله فيك وجعله فى ميزان حسناتك

[ام ثواب]

مشكورة اختي وأنا انقوللك عن تجربتي ومضمونة هي الاخري بعون الله وهي تاخذي الخضار الورقية حبق -نعناع- كسبر -معدنوس.......وتغسليه جيدا ثم توضع في المصفاة حتي ينزل عنها أغلب الماء ثم تفرشي مفرش قماش علي سفرة وتضعي علية الخخضار وتصبري عليه شويا وممكن اتطبطبي عليها بقطة قماش تمتص الماء وبعدين تلف بورق المطبخ المناديل الورقية السميكة الخاصة بالمطبخ وبعدين كل نوع لفيتية في المناديل يوضع في كيس الثلاجة النايلون ويوضع في حافضة محكمة الاغلاق واذا كان وضعتي الخضار مع بعض في نفس الحافضة عدا ىالنعناع طبعا حتي تعرفي كل كيس ماذا بداخلة اتطلعي منة ورقة في كيس النايلون يعني برا المنديل ...... انشاء الله فهمتي قصدي ايضا نحب نعطيك فكرة وحتي هي تساعد في عدم فساد الخضار قبل الاستفادة منه وهي يوم الاربعا ء اويوم الخميس ندير منها عجة اوطعمية او خبزة خضار وهكي تعطي الفايدة للاسرة من الخضار الخضراء ايضا سلطة مشكلة تفرمي الخضار صغيرا ومعها طماطم وخيار وجرجير وخس يعني اللي عنك وتعصري عليهم ليمون +خل+زيت زيتون وعلي فكرة حطي معهم فجل وبصل اخضر وجربي والله الاطفال يكلوها وما يخلو منها شيء بالذات كلنا نعاني من عدم تناول الاطفال الخضار وبهكي نطمن علي صحتهم

[ام ثواب]

اسفة يابنيت ليبيا الخط طلع يفجع

[guidona]

مشكوره بنت ليبيا وام تواب بارك الله فيكم

[بنت طبرق]

بارك الله فيكن
أستفدت من خبراتكن

[نسمه ليبيه]

بارك الله فيك ان شاء الله حنجربها لانى ديمه ضميرى مانبنى على المعدنوس والكسبر مرات يفسدوا فى الثلاجه وماعنديش مانديرلهم

[ام تغريد]

تسلمي بنت ليبيا وام تواب علي الفكرة الرائعة

[bent libya]

مشكورين هلبا هلبا هلبا وخياتي وبارك الله فيكم جميعا وخيتي mnono و ام ثواب علي الافكار .وان شاء الله حنجربهم .

http://www.libyan-kitchen.com/gallery/images/clipimage0.gif