محتارة ونبي من يساعدني (دردشة عن الحضانات)

[ليبية]

بسم الله الرحمن الرحيم

السلام عليكم ورحمة الله وبركاته:


حبيبتي وخيتكم حايرة وتراجي من يحللها مشكلتها وقلت ما عندي غير وخياتي في هالمنتدى الرائع

اول شيئ نحب نسأل : اللي تخدم فيكم وين تحط في صغارها؟؟؟
تاني شيئ: هل انتوا مقتنعات بالحضانة ولا لا؟
ثالث شيئ: هل تعرفوا حضانات مضمونات وكويسات ونظاف؟؟؟ظ
رابع شيئ: شن تنصحوني لأني بنحط وليدي في حضانة؟؟؟


وشكرا ليكم ولكل وحدة تساعدني

دعواتكم لأني والله محتااااااااااارة وتعبانة

[ღ¸¸حرة فوق راس حر¸¸ღ]

ربى ايعينك يآرب
انا برا البلاد
ان شاءلله البنات ايفيدوك

[حنان]

السلام عليكم
اختى ليبية بالنسبة ان احنا مقتنعين بيها ولالا اكيد مش مقتنعين
لان سلامة الاطفال وخصوصا الصغار بكل متقدريش تتقى فى حد الا فى شخص قريب منك
امك او اختك او ام زوجك وهكدا يعنى شخص قريب منك ومن وليدك ولو انتى معندك من يسعدك لضرف معين اكيد
تطرى وتستعينى بالحظانة وفى حظنات كويسات بس اسعارهم شوية غاليات
وبالنسبة انهم نضاف ولالا الله اعلم كيف يتعاملو مع الاطفال
وانتى استخيرى واتوكلى على الله احسن
معليش طولت عليك
الله ايكون فى عونك ان شاء الله

[ليبية]

يعطيك الصحة يا حرة والله يردك سالمة وغانمة يارب

حبيبتي حنونة صحيتي يا غالية فعلا اني مضطرة وكان هذا شن اللي يخليني نباعد في وليدي عليا
تعرفي لدرجة اني نفكر اني مانوليش للعمل من جديد والله المستعان

باهي شن هما الحضانات اللي تعرفيهم حتى غاليات مش مشكلة المهم عندي النظافة والأمانة

ويارب استرني واستر على وليدي واحفظه من كل شر
دعواتكم وخياتي والله عقلي خلااااااااااااااااااااااااااااااااااااااص بيتفجر من كثر التفكير

[فضااوي]

الله يعينك ليبيه

طبعاا الحضانه ضروريه للي يشتغلن بس اهم شي
تكون الحضانه نظيفه

انا حاليا خارج البلاد كلهاا كم يوم وراجعه نسألك ونرد عليك

[أم أيوب]

ليبية حبيبتي

والله ما نعرف حاجة على موضوع الحضانات بس نبي نقولك

أنا خريجة حضانة تعينت من عمري 40 يوم

لعند ما وصل عمري 5 سنوات لأن ماما كانت طالبة

وماما تحكيلي ان الحضانة وفرت عليها تعب واجد

وساعدتها واجد

بس الكلام هذا من زمان

الله أعلم عالحضانات توة

اللي أهم من كل شي من وجهة نظري المشرفة اللي عالأطفال

لأن في اللي تمسك الموبايل زي ما نسمع وتقعد تهدرز

والعويلة انشالله يقلبو الدنيا ما تعدلش عبيهم

أهم شي المشرفة اللي عالأطفال تكون كويسة وتحب شغلها

[ليبية]

حبيبتي فضاوي الله يرجعك بالسلامة
حبيتي زهورة يعطيك الصحة يا حلوة والله طمنتيني شوية لكن قاعدة موغوشة والله يستر
الحق لقيت روضة مش عادية اسمها الأقدام الصغيرة بس قالولي حضانة ماعندهمش لكن بعون الله اول ماولدي يكبر لو قعدت على نفس المستوى التعليمي والنظافة راح نسجله فيها

[حنان]

السلام عليكم
اختى ليبية انتى وين قاعدة باش ننعتك
وانقولك على اماكن معينة

[سحابه صيف]

والله اتمنيت انساعدك ويا ما تعرضت لزي موقفك لكن في غربة كش في بلادي تمنيت في حد مطمون جنبي اشدلي صغاري وانا نقري لكن في غربه صعب اتحصلي حد مضمون ونتمنالك كل خير

[ليبية]

حبيبتي حنان اني نسكن في زاوية الدهماني
وتعرفي صايرلي تلخبيط مش عادي
الحمدلله اني زوجي حالته المادية ولله الحمد كويسة لكن اللي صايرلي اني متلخبطة مرات انقول حرام سنين القراية و التميز والتراتيب اللي كنت ناخذ فيها وبعدين نقعمز في الحوش وفي المقابل نقول صغاري اهم مش المفروض نقعمز بحداهم بدال حد براني
ةفي نفس الوقت نقول انخاف يمر الزمان عليا ونقول ياريتني خدمت لأنه زي ماتعرفوا بدي الشغل الكويس الواحد صعب انه يحصل
ومرات نقول كان نحطه في حضانة وتصير في صغيري حاجة اللوم كله حيجي عليا اني لأن الناس في رأيها انه مش ضروري اني نخدم لطالما راجلي حالته المادية كويسة


ساعدوني ساعدكم الله والله محتااااااااااااااااااااااااااااااااااااااااااااااا ااااااااااااااااااااااارة

[ليبية]

اختي سحابة الله يعينك ويعاونك ويحفظلك صغويرتك

[الساجدة لله]

مجبرا اخاك لابطل حبيبة توكلي على ربي وحطي وليدك في حضانة لانك مضطرة بس دوريها تكون كويسة وشوفي الاخت حنان اعتقد ان عندها خبرة في موضوع الحضانات وان شاء الله تقدر تساعدك

[ليبية]

شكرا اختي الساجدة والله يحفظك
ياريت اي وحدة عندها اي معلومة عن حضانة كويسة تقولي
في مكان العمل في حضانة بس مشكلتها مافيهاش تهوية وعدد الصغار هلبة والدار صغيرة لكن الميزة اني نقدر ندير طلة مرة مرة على صغاري فهل تشجعوني عليها ؟؟؟

[الساجدة لله]

شكرا اختي الساجدة والله يحفظك
ياريت اي وحدة عندها اي معلومة عن حضانة كويسة تقولي
في مكان العمل في حضانة بس مشكلتها مافيهاش تهوية وعدد الصغار هلبة والدار صغيرة لكن الميزة اني نقدر ندير طلة مرة مرة على صغاري فهل تشجعوني عليها ؟؟؟

تعرفي انا مانشجعكش على انك تحطي وليدك في مكان مافيشي تهوية لان ياحبيبة لاقدر الله ياخد عدوة وانتي عارفة الصغار والامراض اللي ممكن ياخدوها بالعدوة وان شاء الله ربي يوفقك وتحصلي حضانة كويسة ووقتها ماتحتاجي انك اديري حتى طلة لانك حتكوني مرتاحة ومطمنة وياحبيبة بااذن الله نسئلك على حضانة كويسة

[أمـ ساره]

ان شاء الله ربي ايريحك وخيتي

والله معاك حق مسؤولية صعبة

[ليبية]

صحيتي يا اختي ساجدة وبارك الله فيك
شكرا يا ام سارة والله يحفظلك سارة