استفسار عن البازلياء

[ام انس]

السلام عليكم اخواتي من فضلكم نبي نسال عن طبيخة البازلياء في اللي اطيب فيها بحيث تتقلى البازلياء في الزيت كويس مع البصل وتذبل شويا قبل ما ينحط الطماطم وبقية الدباير.
نبي نعرف لو في وحدة منكم اطيب فيها بالطريقة هذه وهل فعلا اتجي طعمتها احلى من الطريقة المعتادة في تتطييبها.

[أمـ ساره]

حبوبة اني اندير فيها هالطريقة ومنزلتها في المنتدى

بس شنو قصدك بأحلى يعني في الطعم ؟؟


هو الفرق ان لما تحطي البازيلاء فيى الأول مع البصل شوي

بعدين تزيدي ماء وملح وتخليها لين قريب اطيب نص طياب

هذا ما يخليها تنظرس منك (( يعني وحدة طايبة وحدة لا ))

هذا الي نعرفه أني

[خدوج]

انى طريقتى عادية
بعد مانحط البصل نحط اللحم ونقلى الطماطم زين نحط البازلياء
ونضيف المية ونحط ثوم..فلفل اسود..اذا حبيتى فلفل اخمر وملح
فقط باش تطلع نكهة البازلياء ..
نحبها موت البازلياء خاصة السكرية
وللعلم فيه بازلياء سكرية
وفيها عادية
السكرية احلى واطعم وابن وطبيختها تجى تهبل
والعادية مش هذيك البنة
وانى مع طبيخة بازلياء نقرض الجزر مكعبات ونضيفه
مانحكيلكش خاصة توا فى الشتاء
دويت هلببببببببببببببببببببه
منك السماح
وان شاء الله افدتك

[المصراتيه]

اني ندير في نفس طريقه خدوج يعني منحطش فيها مع البصل لان هيا البازيلا ماتاخدش وقت واجد عنار يعني فيسع مطيب
واني نقولك ان نفس الطعمه حتعطي معتقدش في اختلاف واجد ،،،

[sweet nona]

طريقتي عادية نفس طريقة خدوج
ماشالله ماقصرت
ومجربتها حتى لما تحطيها مع البصل
مفيش اختلاف وتحطي الطماطم والبهار
واكيدة قطيعات لحم وطني ياسلالالالالالالام
ومرات كان ماعنديش جزر انديرلها مكعبات بطاطا
عيوووووووووووني البازيلا
وتوا سؤالي لخدوج كيف في نوعين بازيليا
ياريت تقوليلي؟؟وكيف نعرفها

[روح مغتربه]

اقتباس:
المشاركة الأصلية كتبت بواسطة sweet nona http://www.libyan-kitchen.com/kitchen/Pinksky/buttons/viewpost.gif (http://www.libyan-kitchen.com/kitchen/showthread.php?p=78677#post78677)
طريقتي عادية نفس طريقة خدوج
ماشالله ماقصرت
ومجربتها حتى لما تحطيها مع البصل
مفيش اختلاف وتحطي الطماطم والبهار
واكيدة قطيعات لحم وطني ياسلالالالالالالام
ومرات كان ماعنديش جزر انديرلها مكعبات بطاطا
عيوووووووووووني البازيلا
وتوا سؤالي لخدوج كيف في نوعين بازيليا
ياريت تقوليلي؟؟وكيف نعرفها
انا انقولك الي نعرفه البازيلا السكريه طعمتها حلوه كانها فيها السكر والي نعرفه اني البازيلا السكريه اتكون لونها اخضر داكن وطريه يعني كانها مطبوخه شويه لما تاكليها نيه والله اعلم وان شاء خدوج اتزيد اتفيدنا وبنسبه لطبيخة البازيلا انا ما نقليش فيها يعني انجهز المرقه ونصب البازيلا المجمدة والا الطازه اذا كانت متوفره عندي وتطلعلي مش عاديه وانت جربي واحكمي افضل

[زهرة البنفسج]

انا نقلي فيها شوية لاكن الطعمة انحس فيها عادية زي الطبخ العادي

[ام تغريد]

ما شاء الله الاخوات وفو وكفو شرحهم واضح ما يستحقش اكثر بس حبيت انظيف

انه البازيليا السكرية احلى واطعم لانه فيها نسبة سكر وموجودة في السوق ولما نبعت نشريها طبعا تسالي عليها ويدوقوها قبل ما يشروها

[ليبية طيوبة]

ماشاء الله البنات كفو ووفو لكن فى حاجة انا نعرف امى اتحطلها فى الكرات مع اللحم والبصل ولما اتحطيلها اميتها اتحطى البازيلياء اتجى زى العسل

[الساجدة لله]

تبو الحق الموضوع جي على الجرح هههههههههه ماعنديش روووح معها البازيليا نحبها زي ماهي نية طايبة مجمدة سكرية مش سكرية كل الطرق تؤدي الى المعدة هههههههههه

انا ندير فيها بكل الطرق بيضاء يعني مرات من غير طماطم حكة نديرها بالطماطم الاخضر او هكي ومرات بالسيبيا والكاليماري والجمبري نحبهااااااااا مووووووووت بس مافيش فرق بين الطريقتين سواء قليتيها او حطيتيها في المرقة الاتنين الطعم يمي يمي