نبي افكار للعروسه شن اطيب في اول شهر زواج

[ايمان]

السلام عليكم اخواتي

انا زواجي الاسبوع الجاي انشاءالله

نبي منكم افكار للوجبات اللي بنديرهم الاسبوع الاول من الزواج اكيده جاهز في الاسبوع الاول بس مرات يطلب مني اكله قولولي افكار تعجب زوجي علي فكره خطيبي مايحبش الرقيق هلبه يعني يبي طبيخه ومعاه شئ تاني عاد انتم اعطوني خبارتكم ومنكم نستفيد

ونبي نقوللكم اني جيده في الطبخ والحمدلله بس نبي افكار ممكن تكون جديده مانعرفهاش وخاصه الحلو ومن عندها موقع ناخد منه افكار ياريت تكتبلي الرابط وبارك الله فيكم عارفه طولت عليكم بس الله غالب ماتبخلوش عليا باافكار ولو بسيطه

وزي مايقولو

--عبي البطينه تستحي العوينه ---

[وردة الربيع]

اول شئ الف مبروك وانشاءالله ربي يعقد عسلكم
وبالرفا والبنين
وردى بالك من زوجك الشهر هذا دلعيه على قد ماتقدرى
عاد هذا شهر العسل هههههههههههههه شوفى جوك
وانشاء الله تستفيدى ويفيدوك

[ايمان]

الله يسلمك ام ربيع والله يبارك فيك

انت وين افكارك تعالي هنا

[خدوج]

مبروم ياعروسة
فى موضوع شن الغداء اليوم
خشى عالحبوبات واطرحى سؤالك؟؟ واستفيدى من الموضوع
والافضل يندمج الموضوع
واحنى فى منطقتى من عاداتنا العروسة تدلع الاسبوع الاول مطيبش ابدا
وتوا اكثر بدو الصديقات يبعثوا فى غدى والا عشى مقوم
وان شاء الحبوبات يفيدوا
وربك يهنيك مع عريسك ياحبيبة

[وردة الربيع]

انا فى بداية زواجى ركزت اكثر شئ على الكيكات
وهو طبعا يحب هالشئ
كنت دائما ندير فى كيك متنوع باشكال واحجام مختلفة
وطبعا البريوش فى الصبح ردى بالك تنسيه
البريوش الجاهز او من صنع ايديك
اما بالنسبة للغذاء شوفى هو شنى يحب واعمليله شوربات او طواجين وبالتوفيق انشاءالله
http://www.libyan-kitchen.com/kitchen/D:%5C%C3%98%C2%AE%C3%98%C2%A7%C3%98%C2%B5%20%C3%98 %C2%AC%C3%98%C2%AF%C3%98%C2%A7

[ايمان]

الله يسلمك خديج اكيد الاسبوعين اللي في الاول عسل انا نبي بعدين

[ايمان]

صحيتي ورده الربيع افكار حلوة

في انتظار افكار تانيه

[وردة الربيع]

بالتوفيق انشاءالله

[بنت حواء]

أولا : ألف مبروك للأخت

ثانيا : بالنسبة للشهر الأول أعتقد أن نصفه الأول كله إما طعام جاهز أو (ذوقة) من هنا وهناك هذا مايحدث عادة لكن لو الأمر بالنسبة لك مختلف فأعتقد أن (البيتسا) من الأكلات السهلة واللذيذة والكل يحبها وأنواع (الأرز) أيضا والشوربات كلها لاتأخذ من الوقت الكثيرحتى محشي الخضروات سهل وسريع أيضا
طبعا أنا أتكلم عن تجربة شخصية
وطبعا يجب أن تعرفي ماذا يفضل (العريس) وتعملي (بروفة) من قبل الزفاف ولا أعتقد أنك ستطبخين (العصبان والرشدة) في الأسابيع الأولى !!

[وردة الربيع]

ووواك عصبان ....مستحيل من الاسبوع الاول حرام عليه
تعرفى انا امس راجلى جابلى 2 كيلو وقالى نبيه اليوم
يعنى غسله وتنظيفه هو المشكلة ورائحته مانحكيلك يعنى قعدت فيه نص نهار باش كملتهhttp://www5.0zz0.com/2012/02/05/16/282201878.gif

[وردة الربيع]

انا قدمتلك الديك الرومى هذا ياريت تقبليه

[وردة الربيع]

شوفى زى ما قالتلك الاخت خليها عالارز والبيتزا والشوربات والمعجنات
لا باس لما تكون دجاجة محمرة محشية مزينة السفرة مرة مرة مش هلبة
هكى هلبة عليك انتى عروس قعدة
حتى حنتك تمشى من المية

[ايمان]

بنت حواء بارك الله فيك علي قولتك بيتسا وشربات

اما عصبان استحاله ورده الربيع ربي يعونك وخلاص

[أمـ ساره]

مبارك عليك وخيتي وربي يتمم لك على خير يارب


أول حاجة طبعاً بتشوفي زوجك شنو يفضل أكلات

وثاني شيء المفروض ما تقعدي وقت طويل بالمطبخ


بالنسبة للأفكار

انتي قلتي انه يحب الطبايخ

يعني يوم اديري بازيليا وهذا وقتها توا ويوم فاصوليا ويوم ادير طباهج

أو استيك لحم بالمرقة مثل الصوص يعني

أو اتيسك لحم لوحده وومكن اديريه زي الشاورما أو كنتاكي دجاج

أو دجاج محمر بالكوشة أو أضلع الخروف بالخضار في الكوشة توفر هلبة وقت



وتقدري اديري ارز طبعاً مع الطبيخة مرة أصفر ومرة مبهر

أو أرز المخلط بالخضار ( المقلوبة )

أو ممكن اديري الرز الأبيض بالمكسرات

والمشقشقات زي البيتزا والمبطن وطاجين الجبن



والسلطات طبعا لازم منها كتنوع مثل السلطة المشوية

وسلطة الباذنجان


وطبعاً أغلب هالأكلات موجودة في المنتدى بس وسعي بالك وابحثي عليها


وزي ما قالت لك خدوج شوفي موضوع شنو الغذاء اليوم

أكيد يفيدك هلبة



بس ننصحك الشهر الأول يكون كل شيء خفيف ولو من برا أفضل

حتى تستمتعي بحياتك وترتاحي وبعدها تبدي في الجديات


وربي يهنيك حبيبة ويجمع بينكم بالخير والمحبة يارب

[وردة الربيع]

والله يام سارة هذا وقتها تدلع وترتاح هالشهر هذا
وانشاءالله ايامك كلها راحة وعسل

[الساجدة لله]

حبوبة تعالي ديري دورة في المنتدى ورح تطلعي بعدة افكار صدقيني المنتدى يزخر بالابداعات

بس حبيت نقولك في نهاية الاسوبع التاني بعد الزواج ديري تورتة متلا وزينيها بالفراولة والكريم شانتيه نوع من التغيير ولو كان الحجم صغير وديري شمعة وحدة واعلني بداية الشهر الاول من الزواج وهكدا وكل مرة ديري حركة زي عزومة بدل التورتة او عشوة برا الحوش مع نهاية كل شهر وانت ودوقك حبيبة

[ايمان]

بارك الله فيك ساجده فكره حلوه متاع الطورطه باذن الله انديرها

[ايمان]

ام ساره صحيتي علي الافكار باذن الله حطيتهم في بالي وسجلتهم خلي ماننساش

[مغتربة 7]

الف مبروووك يا موني ربي يباركلكم يارب ويجمع بينكم بالخير ويعقد عسلكم يارب
ماشاء الله البنات ماقصروا

[slma]

الف مبروك و انشالله ربي يكمل عليك بالخير
من اطباق ممكن اديريها
1- لحم (قلاية)مفضلة عند الجميع رجال او لحم مبوخ
او في فرن مع شوية خضرة +سلاطات +ارز +خبزة +شوربة
2-مفروم اسهل حاجة ممكن ديري به كباب او همبرغر او ديره مع معكرونه
3-عدا متنسيش الحويتات (طبعا يكونوا نضيفات تتبيلة و بس)هذاك السيلفر في الفرن علي طول ماتنسيش السلاطات
ربي يهنيك