خاص لتهنئة ليبيا الحره

[الكتومه]

السلام عليكم..
اخواتى هنا حبيت اننا نجتمعوا معا من شرق ليبيا وغربها لتهنئة ليبيا الحره وشعبها الأصيل
بعيدها الأول عيد الحريه
وحابه انى انترحم على ارواح الشهداء
يارب احفظ ليبيا وابعد عنها كل من يريد تخريبها وتفريق شعبها الطيب
يلا حبيبات فرحتنا وحده ياريت نفرحوها معا..

[أمـ ساره]

الله يهنيك بعيدك يا ليبيا

الله يهنيك بشبابك يا ليبيا

الله يهنيك ويعزك بشيابك يا ليبيا

الله يحفظك ويحميك بأحفادك يا ليبيا


مبروك عيدك وعيدنا وان شاء الله الفرحة تعم الجميع

وربي يتمم علينا وعليك يا ليبيا بالأمن والأمان والإستقرار



وربي يرحم شهدائنا ويغفر لهم ويجعل مثواهم الجنة يارب

[مغتربة 7]

يررررررررررررررووووووووووووووووورررررررررررررررررر رررررررررررري
الف مبروك عيدك يا ليبيا
الله يرحم شهدائنا الابطال الى سطروا التاريخ بدمائهم الزكية
ويحفظ بلادي ويولي علينا خيارنا

يا ثورتنا عام وصلتي *****وخشوم الطغاة كسرتي

قرب يا ثورتنا عيدك***** عز وقيمه ربي يزيدك

.الجمعه فرحتنا ب فبراير*** عاود ياربي البشاير

ياطحلوب ابكي بالدمعه*** عيد بلادي يوم الجمعه

[ترهونيه حره]

الله اكبر الله اكبر الله اكبر ولله الحمد
اترحم على شهدائنا الابرار وادعو لهم بالمغفره والرحمه
ليبيا مغلاك علي ليبيا يااجمل شىء
يااحلى كلمه على لسانى يانبض وساكن وجدانى:):):)
ليبيا مغلاك على ليبيا يااجمل شىء

[فنان]

اللهم إني أستودعك أهل ليبيا
رجالها و شبابها .. نساءها و فتياتها .. اطفالها و شيوخها
اللهم انى استودعتك ممتلكاتها و مبانيها و منشآتها
اللهم انى استودعتك اراضيها و خيراتها
اللهم انى استودعتك امنها و امانها و ارزاق اهلها ...
اللهم انى استودعتك ...حدودها و بحورها و جنودها .....
فاحفظهم بحفظك يا من لا تضيع عنده الودائع و أنت خيرالحافظين

الف مبروك لكل الشعب الليبي بمناسبة العيد الاول لثورتنا المجيده

[المصراتيه]

الف مبروووووووووووووووووووووك لشعبنا الحبيب
اول عيد بطعم الحريه
ربي يرحم شهدائنا ويشفي جرحانا يارب
والف مبروك لكل ليبي وليبيه حره والحمدلله علي هالنعمه.....

[زهرة البنفسج]

الف مبروك عليك ياليبيا ربي يحفضك ويخليك ويرحم شهدائنا ويشفي مرضانا ويجمع المفقود هله يااااااااااااااااااارب العالمين وربي يهنينا من كل ضالم

[بنت الاشراف]

اللهم مااحفظ ليبيا وشبابها اللهم من يريد بها شرا فاجعل تدبيره تدميره اللهم ماالف بين قلوبنا اللهم ماولى علينا خيارنا اللهم ماتبثنا على الدين يارب العالمين

[أحلآم الدنيا]

ـألف مبروك عيدكـ يا ليبيا
ومبروكـ عليك الحريه

يارب ان يعم الامن والامان ليبيا الغاليه

مشكورة طمطم :)

[أم أبرار]

بكرة نهار جديد نفرح بيه ويفرح بينا
نزرع الأرض مواعيد حب وأمل وين مامشينا
بكرة تجمعنا الأيام ع الخير والسلام
يارب أحم بلآدنا واحفظها من كل من يريد المساس باأمنها
وكل عام وبلادنا بخير

[ام هداية]

الله اكبر الله اكبر الله اكبر ولله الحمد

مبروك عيدك يا بلادى اللهم احفظ بلادنا واصلح حال بلادنا الى ماتحبه وترضاه اللهم ارحم شهدائنا اللذين ضحوا بانفسهم من اجل هذا الوطن الغالى ومن اجل ان نتحرر ونعيش سعداء اللهم ارزقهم الفردوس الاعلى من الجنة واشفى جرحانا وبارك لنا فى بلادنا واهلها

وكل عام وبلادنا واهلها بخير

[زينب محمد]

نهنيك يا ليبيا على ما درتى .. خيرك سبق عالكل ما قصرتي ..
الله عطاك .. اولادك تريس وشانهم علاك ..
في كل جبهة صامدين ضناك .. الله والنبي بالله ما كبرتي ..
فيك رجال .. أوقات الشدايد صامدين ابطال ..
أولاد فخر مايعرفوا موحال .. ديما علي مبدأك ما غيرتي ..
في ايام زمانك .. ماتوا أولادك ظلم في وديانك ..
جابوا جيوش و فتشوا حيشانك .. ابروحك علي ظلم الطواغي ثرتي ..
ما القيتي والي .. أيام دمعك كف يدك مالي ..
ديما علي كلمة أنا ما تسالي .. ولا يوم عمرك للفخر دورتي ..
نهنيك يا ليبيا علي ما درتي ..

[زينب محمد]

عامك يا ثورة فبراير علينا نايـر .. ريحنا من عهد الجاير ..
عامك يازيـن الثورات ... علينا طل بالخيرات .. جاب بشاير لبلاد الثورة والثاير ..
عامك يا ثورة فبراير علينا ناير .. ريحنا من حكم الجاير ..
عامك يا ثورة الامجاد .. علينا جاد .. بفضل اللي منزل الكتاب ..
الرحمة نزلت عالبلاد .. اجعلها دايم تدوم علينا هالبشاير ..
... عامك يا ثورة فبراير علينا ناير .. ريحنا من حكم الجاير ..
عامك يا ثورتنا هـل علينا طل .. خير ونعمة وبيها اكمل ..
ثورتنا ياسمين وفل .. ونورها تكبير الثاير ..
عامك يا ثورة فبراير علينا ناير .. ريحنا من حكم الجاير ..
عامك مبروك .. ارتحنا من ظلم المهلوك ..
شبابك هبوا وثاروا وجوك .. ليبيين اولاد حراير
عامك يا ثورة فبراير علينا ناير .. ريحنا من حكم الجاير ..
عامك يا الثورة الليبية .. هل علينا بالحرية ..
والعقبة لسوريا الأبية تتطعم معنى الحرية .. وتتريح من هالقهاير ..
عامك يا ثورة فبراير علينا ناير .. ريحنا من حكم الجاير ..

[مني المهدي]

الله أكبر الله أكبر الله أكبر الله أكبر الله أكبر الله أكبر الله أكبر تحية الي كل ليبي حر ونسأل الله أن يتقبل أبنائنا من الشهداء تحية الي بلدي العزيزة علي قلبي الزنتان الصامدة والي كل حرائر الزنتان وأمهات الشهداء في الزنتان وفي كل ربوع بلادي الغالية الله أكبر الله أكبر الله أكبر

[أم ميوسة]

كل عام وأنت بخير وكل عام وليبيا الحرة بألف خير

عام قد مضى على ثورتنا على الظلم والطغيان

وهاهي الأفراح تنير سماء وارض بلادي

هاهي الأعلام ترفرف بحب وحرية فلم يجبرونا على إقتنائها أو التلويح بها

كنا في عهد الطاغي تعطى لنا الأعلام مجانا ولا نرفعها

كنا في عهد الطاغي يجبروونا على الأحتفال ولا نحتفل

كنا في عهد الطاغي تزين المدينة بزينة خرقاء ولكن القلوب والأرواح والوجوه تبدو مكفهرة

كنا في عقد الطاغي يريدوننا أن نحتفل عنوة بترانيم وأناشيد وأهازيج لانرددها ولا نستمع إليها

ولكن اليوم هو يوم أخر يوم ثورة يوم 17 فبراير

يوم الحرية يوم الأمل يوم الدماء الزكية التي عطرت تراب هذا الوطن

بلادي تتزين ليس فقط بالاعلام التي ترفرف أو بالزينة

بلادي تحتفل وتتزين بفرحة أبنائها الذي يشعرون أن هذا اليوم هو عيدهم

الأعلام ترفرف ببهجة والأناشيد تصدح والكل يترنم بها

الأبتسامة على الثغور والبهجة على الوجوه

لم يجبرونا على الخروج خرجنا بانفسنا لنحتفل ببلادنا التي أصبح وأخيرا حرة

ما أروعك يا ليبيا ما أروعك يا بلادي وما أغلاك



كل عام وانت يا ليبيا مسلمة حرة أبية

كل عام وليبيا بسواعد أبنائها بألف خير

[انسام الحرية]

الله اكبر على كل من طغى وتجبر عاشت ليبيا حرة ابية وكل عام ديما افراح ودم شهدائنا ماراحش هباء وتحية لليبيا وابطالها وتحية للزاوية الحرة ونقوللها استاحشك يازاوية واستاحشت بلادى ليبيا

[أم ملك]

كل عام وانتم بخير
ثورة مباركة اللهم ارحم شهدائنا الابرار اللي خلونا نقدرو نتنفسوا نسيم الحرية
والله اشفي الجرحى وعوضهم خير يارب
وثبت الثوار على تجاوز كل المحن يارب

[نجلاء الخالدية]

الله الله عليك ياليبيا
كل عام وأنت بألف خير وكل أهلك من شيوخ ورجال ونساء وأطفال
الله ايدوم علينا الأفراح ويحفظ بلادنا من كل سوء
الله ماأحلى حب الوطن وحب تراب الوطن وحب كل ذرة فيه شعور رااااااااااااااائع كنا حاسدين عليه المصريين وكيف لما يحكوا على مصر
الله يرحم شهدائنا وربي يتقبلهم يارب القبول الحسن ويكون في عون الامهات والاباء ويصبر قلوبهم
ويشفي جرحانا ويعافيهم
وعاشت ليبيا حرة أبيه

[نسيبة]

كبير انت ايه الوطن الشاسع ببراحك الاصيل بشعبك الابي الشامخ بمجدك و تاريخك

هنيئا لشعبك بذكرى ثورة انبلاج فجرك بعد عتمة الكبت و ظلمة الاستبداد

اكفنا تدعو بالمغفرة و الرحمة لشهداؤك و بالشفاء للجرحى من ابناؤك و بوحدة صف رجالك

ونساؤك قلوبنا فرحة لطالما انتظارنا و دائما للظلم جولة و يزول

اللهم احمي هذه البلاد الابية من شرور الاشرار و كيد الفجار

[ام ساره وعبدالعزيز]

الله اكبر الله اكبر وللة الحمد
مبارك علينا الثورة وان شاء الله تكون بداية جديدة لليبيا الجديدة بعيدا عن الواسطة والمحسوبية
وعاشت ليبيا حرة مستقلة دوما وابدا

[نجوته]

الله اكبر الله اكبر ولله الحمد

طيب والله فينا الي ربي فرج علينا هالغمة

ويااارب هني بليدتنا واحفظ وليداتنا وبنياتنا

واطفي نار الفتنة

ياااارب

وما اتشمت فينا لا عدو لا حبيب