[تمت الإجابة][طلب] ريجيم سريع ومجرب

[أم لينه]

السلام عليكم ورحمة الله وبركاته إلى جميع أخواتي في المنتدى اللي تعرف ريجيم كويس وهي مجرباته ياريت تعطيهولي وعندي طلب للأختين زهرة البنفسج وأم جنى ياريت تعطوني ريجيماتكم وبرنامجكم بالزبط بصراااااااااااااااااااااااااحه وزني زاد هلبا من الحمل والولاده ونبي حل ياريت تساعدوني وبارك الله فيكم

[أم لينه]

شن صااااااااااااااااااار يا صباااااااااايااااااا

[أم أبرار]

أحسن ريجيم
إفطار عادي
غداء قللي النشويات ويكون خضار وفواكه ومشويات
العشاء بدونه
ولو جعتي بكل تفاح أو جزر
وربي يقدرك ع الصبر

[فنان]

السلام عليكم ورحمة الله وبركاته
والله اول مشفت موضوعك قلت لازم انجاوب
رغم اني نأيد من يبي يدير رجيم يمشي لإخصائيين افضل
وجبة الافطار:
1/كوب حليب متوسط الدسم يفضل خالي (رغم اني نفضل المتوسط بش منعذبش نفسي هلبا ونفقد عزيمتي;))
2/واحيانا نستبدل بفنجان شاي اخضر بدون سكر(اني نأخذ في شاهي الكيس بنكهت الليمون او نعناع لنفس السبب الاول)
3 /بعض قطع بسكويت المالح هوشكله مستطيل خفيف وهش واسمه tuc
4/كوب عصير طبيعي يفضل جريب فروت(اضن انه ليم الشفشي)
وتوا حضك اعصري البرتقال وبالصحه
اما الغذاء
هو نفسه خوذي 5ملاعق كثري من السلاطه الخضراء وحطي فيها عصرات ليم
اما العشاء
خبز الشعير او توست الشعير اوالعادي
وتن /جبنة ريكوطا/دحي مطبوخ/ فواكه/سلاطة طماطم (شرموله)
وهذه بعض النصائح:
ابتعدي عن المشروبات والعصائر

[فنان]

اكثري شرب الماء من2الي3 لتر يوميا اني كنت ناخذ في شيشه ونقيس بها كم شربت وكنت ناخذ يوميا في كوب زبادي الصغير مرات بنكه ومرات بدون عادي
وضروري من الرياضه ولو نصف ساعه في اليوم
اني درت رجيم في شهر 4يعني في بداية الثورة ومكنتش نقدر نطلع نتمشي فبديت نقول لخواتي وسعوا ضمان الحوش كله عليا واحيانا نركب في السطح نأخذ حبل ونبدا ننقز بيه(نتذكر في ايام الطفوله)وخواتي يقولو شن ضربات الناتو بديت الحق الحوش تحتي كله يخبط:d
واخر نصيحه اهم حاجه ياختي العزيمه ومتضحكيش علي روحك وتقولي لاوزني باهي وتصيري في خبر كانا
مرات حيجي نيتك بطرف مبطن طرف بيتسا اني كنت ناخذ لكن في وقت الغذاء ولو ندسه لتاني يوم المهم العشاء خفيف وبعد المغرب يعني بعد صلاة العشاء مناكل شئ وناخذ ياغورت اكتيفيا لما ناكل حاجه مش في النظام متعي وردي بالك تاخذي شاهي الاعشاب
الصيني ينقص صح لكن تاثيرات الجانبيه حدث لا حرج
كنت نلبس48 50 واني بنت والحوايج معش القيت في سني الحكايه سمبتيك
وتوا نلبس 40 42العيله كلها لما شافتني انصدمت يعني وزني مع طولي ممتاز وانشاء الله انكون افدتك ومطولتش عليك

[زهرة البنفسج]

بالنسبة ليا ريجيمي غير صحي كل فترة على حاجة مرة خضرة ومرة على الفواكة وانا توا ماشية على الفواكه مثل البرتقال والتفاح والكمثرى والبطيخ والدلاع وهدا مستريحة عليه لاني انحب الفاكهة لاكن مش بكمية كبيرة لاكن المهم تقريبا ننقص نصف كيلو في اليوم ومرة مرة نسرق في الماكلة ويفسد الريجيم هدا اللي طولي المدة ولاكن ننصحك بريجيم اسامة حجازي تلقيه في قوقل اعطيته لاختي مع السرقة طبعا نقصت 15 الكيلو في الشهر وهو في الاصل الدكتور قال ينقص من 20 الى 30 كيلو وربي يوفقك واهم حاجة هي الارادة اللي ماعنديش ربي يساعدنا ويفكنا من هالشحمة

[سنيورة]

حبيت نرد على الموضوع لانى كنت نعانى من نفس المشكلة

اولا شرب الماء بكثرة مفيد جدا وصحى وخاصة فى الريجيم وخاصة الماء الدافى فى الصبح على الخواء قبل الفطور بنصف ساعه

اما بالنسبة للفطور فـ كوب عصير وجبنة اى نوع مع جبزة شعير او بسكويت مالح

والغداء ابتعدى على المكرونة والارز بقدر الامكان يعنى قللى منهم على قد ماتقدرى وكثرى من الخضرة بانواعها

العشاء الافضل انك تعتمدى على اكل تفاحه لانه ممتازة للريجيم واى حاجة خفيفه خالية من النشويات والدهون

مع شرب الشاى الاخضر وخاصة فى الليل قبل النوم لانه يحرق الدهون المتراكمة على الجسم

وابتعدى على الزبادى واللبن نصيحة منى ليك بالرغم من انه الاغلبية ينصحو بيه وحتى الاخصائيين فى الريجيم لكن انى نقولك يا وخيتى كانه تبى تضعفى وجسمك يكون متناسق اتبعدى حاليا على الزبادى والبن لانه اتطيح الكرشه يعنى مرات تضعفى وبطنك يكون منظرها مش متناسق مع الجسم او يصعب حرق الدهون فيها ولابد بعدين من ممارسة رياضة اقل شى ساعه ونصف يوميا وهاذى نصيحة قالهالى دكتور المانى يعرف خالتى جى قبل للطبى مع الطاقم اللى جاب المعدات
المهم وفيه طريقة لو تجربيها شهر بس وحتنصدمى فى روحك

وهى الملفوف

اطبخيه شوية فى ماء بحيث يكون سخون ومايكونش مطبوخ هلبه يعنى نص نص بعدين حطي ورقة الملفوف على بطنك ولفى بطنك بطرف وارقدى بيه او خليه مش اقل من ساعة ونص او ساعتين ديريها كل ماترقدى لمدة اسبوع وحتلاحظى الفرق لانه يحرق الدهون وخاصة لو درتى الطريقة هادى واعتمدتى حتى اكل سلاطة الخس
طبعا الخس يحرق فى الدهون بشكل رهيب وحتلاحظى بطنك تبدا تخش وتدوب

وفيه حتى الاناناس لو ماتحبيش التفاح لانه حتى هو يحرق فى الدهون بشكل كبير



ولو انتى من النوع اللى تجوعى هلبه وماتقدريش تقاومى ننصحك بحبوب من مستخلص الاعشاب اسمهم سيبوتريم وهادو جربتهم انى شخيصيا اول ماقتلى ماما فيه ناس بيجوك هههههههههه

المهم الحبوب هاذو فيه منهم 10م وفيه 15 م انى مشو معاى 10 بالرغم من انه ال15 المفروض يكون مفعولهم اقوى لكن انى مشو معاى 10 افضل

فايدتهم انهم مايخلوكيش تاكلى وتحسى نفسك شبعانة وفى نفس الوقت يحرقو فى الدهون وتاخدى حبه فى الصبح مع طاسة عصير او حليب و حبة قبل ماترقدى

هادو افضل شى بالنسبة للحاجات اللى تتباع فى الصيدليات
انى قبل خديت (فيا اناناس) اللى يديرو عليهم فى دعاية فى قناة لبنانية ولقيت دوتهم فاضية بالرغم من انه الشريط الواحد 120 دينار وبدون نتيجة

اما سيبوتريم اللى قتلك عليهم فجربتهم وكانو معاى ميه ميه والحمد الله ضعفت هلبه بيهم وحتى سعرهم مش غالى
10م == 6 دينار وكان 5دينار الشريط
15=== 7.5 وكان 6 الشريط

ان شاء الله يارب تضعفى وتحصلى الجسم اللى تبيه واحلى

[المصراتيه]

ماشاءالله علي الغاليات كفن ووفن وبارك الله فيك علي السؤال هكي استفدنا كنا وان شاءالله نريحو كيف مانتمنو...

[ليبية طيوبة]

السلام عليكم ماشاء الله البنات كلهم عندهم معلومات قيمة انا جربت

ريجيم الكربوهيدرات تلقيه فى النت . . . كويس هلبة وفيه ماكلة منوعة يعنى مش حتنحرمى من شى

واهم شى الرياضة امشى على الاقل فى البداية نص ساعة ومع الايام زيدى زيدى نص

ثانية وردى بالك اتفكرى تنقصى بسرعة راهو حترجعى تسمنى بسرعة وبالتوفيق

[أم أيوب]

أم لينة ننصحك لو تبي تديري ريجيم صحي ما يسببلك اي مضاعفات تمشي لاخصائي تغدية

في عندهم طريقة حسب فصيلة دمك يعطيك الريجيم ونجحت مع كم وحدة نعرفها

بس كحاجتين ممكن يساعدوك في تنقيص الوزن ولهم فوائد مالاحد لجسمك

ننصحك تنضي الصبح بدري وتشربي كوبين مية دافيه عالريق

واقعدي بعدها ساعتين ماتاكلي شي

الحركة هدي شفتها مرة في برنامج تغذية ومن فوائدها انها تحافظ

على جهازك الهضمي من الامساك وتغسل الكلى وتنقي الدم

والحاجة التانية الرياضة ولو حتى تمشي كل يوم نص ساعة

[سنيورة]

حبيت اليوم نرجع نوضحلكم شى على حبوب السيبوتريم اللى قلتلكم عليهم

http://forum.mn66.com/imgcache/2/8966alsh3er.jpg


هذا باكوهم

وهذا اقتباس من احد المواقع الطبية يوضح فعالية الحبوب

دواء سيبوترم :
يحتوى على مادة سيبوترامين هيدروكلورايد و هى المادة الموصى بها من قبل هيئة الأدوية و الأغذية العالمية من حيث التأثير الفعال فى إنقاص الوزن و الأمان فى الاستخدام.
يعمل على تقليل الشهية و الوصول إلى حالة الشبع سريعا.
يساعد على حرق الدهون الزائدة و إمداد الجسم بالطاقة اللازمة مما يعطى الإحساس بالنشاط و عدم الشعور بالتعب و الإرهاق مع إتباع الأنظمة الغذائية الخاصة.
يساعد على تقليل نسبة الكوليسترول الضار و بالتالى يساعد على الوقاية من تصلب الشرايين.
لا يسبب اى اضطرابات بالمعده أو الامعاء ولا يحدث منه إسهال أو غازات
طريقـة الاستعمـال:
العلبه فيها 30 حبه كل يوم حبه واحده قبل الفطور بنصف ساعه وليس لها اضرار أو أثار جانبيه


موانع الاستخدام … يمنع من تناول الحبوب الحالات الاتية:
- الحامل - المرضعة
- من يعانى من أمراض ( الضغط – القلب – الكبد – الكلى – السكر)




وزى ماقلتلكم انى جربتهم من قبل وكانت نتيجة رائعة وفى وقت قياسى ننصحكم بيهم

[ريمة]

السلام عليكم
بنسبة لي في الصبح ناخد جبن او بيضة وخبز شعير ولو مافيش تست شعير وشاهي قليل السكر ولو اخضر احسن وحليب ايكون قليل او خالي من الدسم
وغداء ناخد ثلاث ملاعق من كان رز او معكرونة مع اللحمة او محشي او عصبان ناخد خمسة قطع حسب الحجم وباقي الصحن سلاطة (جزر لفت فجل كرنب طماطم كمون جرجير ...)الي عندك وبعدين مع ساعة 4 ناخد 1/2 ساعة مشي في الحوش وبعدين 50 مرة رياضة البطن و خمسين مرة رياضة الدراجة وانتي راقدة على ظهرك ورجليك فوق وكان مزال مسكرتيش ساعة كمليها مشي وفي العشي تفاحة و لو جعتي جبن ريكوتة وخبز شعير وردي بالك تاكلي بين الوجبات وكان جي خاطرك في عشاك الي درتي خليه غداك لليوم التاني مع السلاطة
و ننصحك تاخدي ميزان و توزني نفسك كل نهاية اسبوع
وهدا الي درتى ورياضة الي قتلك اعليه خديتها من حماتي خاشة في مركز رياضة
واهم من هدا كله انك ادومي على الرياضة
هدا رجيمي لاني عندي شوية زيادة مش هلبة

[ريمة]

السلام عليكم
بنسبة لي في الصبح ناخد جبن او بيضة وخبز شعير ولو مافيش تست شعير وشاهي قليل السكر ولو اخضر احسن وحليب ايكون قليل او خالي من الدسم
وغداء ناخد ثلاث ملاعق من كان رز او معكرونة مع اللحمة او محشي او عصبان ناخد خمسة قطع حسب الحجم وباقي الصحن سلاطة (جزر لفت فجل كرنب طماطم كمون جرجير ...)الي عندك وبعدين مع ساعة 4 ناخد 1/2 ساعة مشي في الحوش وبعدين 50 مرة رياضة البطن و خمسين مرة رياضة الدراجة وانتي راقدة على ظهرك ورجليك فوق وكان مزال مسكرتيش ساعة كمليها مشي وفي العشي تفاحة و لو جعتي جبن ريكوتة وخبز شعير وردي بالك تاكلي بين الوجبات وكان جي خاطرك في عشاك الي درتي خليه غداك لليوم التاني مع السلاطة
و ننصحك تاخدي ميزان و توزني نفسك كل نهاية اسبوع
وهدا الي درتى ورياضة الي قتلك اعليه خديتها من حماتي خاشة في مركز رياضة
واهم من هدا كله انك ادومي على الرياضة
هدا رجيمي لاني عندي شوية زيادة مش هلبة

[سنيورة]

عاجل


بالنسبة للحبوب كنت نشرى فيهم من صيدلية النوفلين اللى قدام حوش عائشة بنت معمر والشريط كان ال10مل ب5دينار وال15مل بـ6.5 دينار لكن فى بداية الثورة انقطعو ولغاية امس سئلت عليهم صاحبتى تشتغل فى صيدلية قتلى منعوهم توة فى طرابلس من الشركة نفسها قتلى لو تحصلى حد فى الشرق يجيبهملك

وصاحبتى هادى نصحتنى بحبوب قتلى مفعولهم اقوى من السيبوتريم نزلت بيهم 4 كيلو فى اسبوعين علما بانه اكلها عادى يعنى مانقصت شى من ماكلتها العاديه
لكن نسيت اسمهم وانى توة بعتلها مسج باش ناخد اسمهم ونقوللكم عليهم طول
قتلى متوفرات توة لكن حقهم غالى شوبة الباكو فيه 3 اشرطة ب65 دينار

اما بالنسبة لتجربتى انى مع السيبوتريم فى الشهر 6 كيلو نزلت

بس ملاحظة توة مرات لما تمشو للصيدلية تقوليلهم نبو سيبوتريم يقولولك مافيش لكن فيه باكوتريم زيهم نفس المفعول لكن ردى بالك تاخديهم دوتهم فاضيه هادو ومايديرو شى مش زى السيبوتريم

امس عييت وانى ماشية جاية على الصيدليات باش جبتلكم المعلومات هادى:o

[أم لينه]

بارك الله فيكم أخواتي وجزاكم الله خيرا

[أم لينه]

بارك الله فيك حبوبه سنيوره
بس عندي ملاحظة عن حبوب سيبوتريم
الشركة المصنعة لهذا الدواء وقفت إنتاجه لأنه يحتوي على ماده تسبب السكته القلببة
ولو لقيتوه في أي مكان ردو بالكم تشروه
وبالنسبة لمصدر معلوماتي هو زوجي لأنه طبيب وعنده شركة إستيراد أدوية
يعني مصدره من الشركة مباشرة
وبارك الله فيك وسامحين ي على تعبك
وبالنسبة للحبوب اللي قالتلك عليهم صديقتك ياريت تكتبي اسمهم باش نستفسر عليهم ونفيدكم إن شاء الله

[أم لينه]

وييييييييييييين الدواء يا سنيووووووره

[سنيورة]

مش عارفه شنى بنقولك يا ام لبنى ربى يخليك و

فعلا بارك الله فيك على التنبيه وربى يخليك لينا يارب


بالنسبة للحبوب التانيات اسمهم شيتوكال وهادو تاخد فيهم نفس البنت صاحبتى صيدلانية قتلى فى اسبوعين 4 كيلو ونص نزلت

وانى حاليا نجرب فيهم مكتوب عليهم شيتوكال مكمل غذائى وليا 4 ايام وحاسه انه فيه شوية فرق يعنى ليهم تأثير

الباكو متعهم فيه 3 اشرطة بـ35 دينار وكل شريط فيه 10 حبات

بالرغم من انها قتلى 60 او 65 حقهم

لكن لقيتهم فى صيدلية تانيه بـ35 ماعرفتش شنى الفرق

ياريت تفيدينا يا ام لبنه


مستنية ردك وربى يحفظك ويخليك لينا

[ام تغريد]

موضوع قيم جدا اخواتي وقريت ردودكم ولكن تبو الحق اهم شئ لانقاص الوزتن هو قوة العزيمة والصبر وهادو اني ماعنديش ....كل مرة نفكر انقص لكن ما قدرتش والمشكلة الكبيرة وزني معقول ولكن البطن هي مشكلتي الكبيرة وتو قريت وحدة من الردود علي ورق الكرنب ان شاء الله انجربه وياريت لو وحدة تعرف طريقة ثانية اتقولي عليها واكون لها ممتنة

وان شاء الله يارب انشوفكم كلكم رشيقات

[أم لينه]

بإذن الله حبيبتي سنيوره حنسأل زوجي عليهم

ونفيدكم بإذن الرحمن وبارك الله فيك على ردك الطيب
وجزاك الله خيرا وأعطاك ماتتمنين
وسامحيني على تعبك حبوبه

[أم لينه]

حبيبه ننصحك بكتاب ثورة التنحيف الكامل لبوب غرين
كتاب رائع وننصحك تقريه لأن يساعد أي شخص يبي ينقص وزنه ويغير حياته في ثلاثة شهور بس هدا الكتاب لمدرب أوبراه وينفري اللي ساعدها على انقاص وزنها وحتلقي قصة اوبراه والعديد من الشخصيات فيه

[نجوته]

السلام عليكم

ياودي لو تاخدو الراي والدبارة اتفكوكم من الحبوب وغنتهم

العزيمة والصبر

سكرو فمكم معاش تاكلو واتريضو

الرياضة هي باب التنقيص الوزن والصحة في نفس الوقت

ما فيش حبوب ما عندهمش مضار وسلبيات

افتكو من الفارينة وبأنواعها

وغظو العشب بأنواعه

والفاكهة بنظام

وربي ايعاون الجميع

ويهني الله بلادنا

[فراولة]

السلام عليكم

ننصحك انك اتركزي على الملفوف نقصد الملفوف الورق اللي زي الصلاطة مش الكرنب اللي يقلوا فيه المهم ديمة كوليه يااما ني يعني تغشليه وتفرميه زي الصلاطة وتحطيه في صونية مع صحن غداك بس تكون صلاطة الملفوف اكثر من صحن الغدي متعك ويمكن اديري من الملفوف شربة مع شوية صدر دجاج وياسلالالالالالالالالام طيبة طعمتها وفايدة الملفوف انه يحرق الدهون ويبان مفعوله بسرعه وانا مجرباته الملفوف

[فراولة]

نجوته شكلك من الجماعه الرشيقه اللي مفتكين من الشحم . احنا السمان انتعلقوا بقشة المهم ننقصوا والحق انا انمل من الريجيمات بسرعه كان نلقى ريجيم في يوم وننقص ماعنديش صبر بيش نقعد ايام وشهورررررررر

[لوتي]

ياأختي أني مننصحكش بالريجيم اللي ينقص الوزن بسرعة هدا فيه مضرة بصحتك لازم فيه حد معين تنقصيه كل أسبوع والمسئلة تبيلها شوية صبر أني ننصحك أنك تاكلي خمس وجبات في اليوم الوجبات الرئيسية ومعاهاوجبتين خفيفة وأهم شيي وجبة الفطورلأني سمعت انحها تساهم في حرق سعرات أكتر وحاولي العشاء يكون خفيف وقبل النوم بساعتين لأن نسبة الحرق تقل في الليل وابتعدي عن الأكلات الدسمة وخدي منتجات خالية من الدسم وكثري خضرة و فواكه واشربي ماء ومارسي رياضة لأنها تساهم في حرق الدهون والحفاظ على شكل الجسم وأني شخصيا نمارس في رياضة المشي السريع انحسها تشد الجسم وأهم حاجة تحافضي على الوزن اللي تفقديه

[سعيدة]

مننصحكش بالرجيم لانه مضر ولكن عن تجربه مني متتعشيش وشوفي كيف ايصير وزنك