خشوا بسرعة يا بنات ليبيا و احكولي الحكاية

[RAWAD]

السلام عليكم
كيف حالكم يا حبوبات كلكم و بدون تخصيص
نخش في الموضوع طول لاني من امس نحاحي ههههههههههههههه


الموضوع : اني مهووسة بالرجيمات و الرشاقة "اللى فاقدتها طبعاً"
و ديما عيوني على اي منتج جديد او مستحضر او اي شيء يساعد في هالهم اللى حاملاته على قلبي .


بأختصار اول امس نحكي اني واحد من طرابلس قالتلي على طين طبي تحطيه
على الاماكن مثل الذراعين و الافخاد و الارداف اللى صعب انها تفقد الوزن بسهولة
بالاضافة الى انها تترهل بسرعة من الرجيم ..
المهم مهمة الطين انه يشد الاجزاء هادي و بسرعة مذهلة
بالاضافة الى انه ينحي السموم اللى تكون موجودة في الطبقة الشحمية و صعب انها تزول بالرياضة .


قالوا انه كيف نازل في ليبيا
من اللى سمعت عليه او جرباته تحكيلنا بالله عليكم

[الساجدة لله]

لا والله ماسمعتش به واذا سمعت او لقيته رح نقولك

[RAWAD]

شكراً عالرد يا ساجدة ..
انتي في طرابلس ؟؟
على العموم . لو كنتي من ذوات القد الممشوق مش حتسمعي بيه
لان هذا اهتمامات الباحثات عن الرشاقة بس ههههههههههههههه

على اي حال صحيتي
و اني توا قالولي حاطين اعلان في السوق المفتوح
تو نمشي ندوره

[RAWAD]

خيركم يا بنات مطنشين الموضوع
كلكم رشيقات ما شاء الله ؟؟؟

[خدوج]

انى دبة يارواد
بس مش ساكنة فى طرابلس
لو لقتيه دلينى عليه تربحى ههههههههههه
لانه اخر مكان يمكن يفكرو يبعتوه ليه فى الصحراء
وانى من سكانها
صحراوية مهووسة 2

[أمـ ساره]

أول مرة نسمع بيه حبوبة

ان شاء الله يكون كلامك مزبوط خلي ندوره

بس لازم تتأكدي لو كان مجرب أولا ما تجازفي حبوبة


ولو جربتيه ونفعك قولي لنا عليه خلي نستفيدوا معاك

[RAWAD]

السلام عليكم
اهلين خدوج صار حتي انتي دبة
و لا يهمك اول واحد نازل لطرابلس يجيبهولك .. غير نحصلوه
الحق اني اول مرة في حياتي نوصل للرقم 80 و نفوته بكيلو
الامر اصبح خطير


ام سارة يا هلا انضمي للفريق هههههههه



حبيت انقوللكم اني لقيت الاعلان في السوق المفتوح
و خديت الرقم .. و كلمت اختى باش تتصل بيهم
و اللى حيصير تو نقولهولكم .. كان تبوا طبعاً
لاني شفت ان ما فيش هلبة متحمسات زي ..

[نسمه ليبيه]

مش سامعه بيه بس ماحبيت نطلع من دون مانرد ان شاء الله ربى يجبر بخاطرك ويكون جسمك جسم مانيكان

[RAWAD]

هههههه
صحيتي يا نسمة
الله يجبر بخاطرك

حتى مش زي المانيكان .. المهم مش دبة و خلاص
حويجاتي قعدوا في خاطري
و اني من العام للعام نلبس فيهم

[Om Amory]

أنى رشيقه ههههههههههههههه

[sweet nona]

انشالله اتحصليه يارواد ...عل قولتك جماعة اريجيم
مهووووسين بها الحاجات زي ماني مهووسة بكريمات الماركات
حشيشتي انجرب ..المهم اني اختي امجربة حبوب زين الاتات
لقطع الشهية والحق ماشالله الي ايشوفها ميعرفهاش
وكان سمعت شي توا انقولك..وربي ايعاون حملة موفقة

[نجوته]

ههههههههههههههههههههه

عجبتني الي قالت اني رشيقة


بس والله ما فيه زي تسكير الفم

واسألو امجربة

خخخخخخخخخخخخخ سكري السنون

وتريضي

وهذا أحسن الحلوووول

وربي ايوفق الجميع

[أم أيوب]

ما سمعتش بيه رواد بس من رايي

ان الحاجات اللي تنحف موضعي مش تمام

في من قبل اعلنو على منتج تخسيس موضعي وصحبتي جرباته

صح نقصت لكن المكانات اللي حطت فيهن العلاج قعدو زي المحروقات

لون البشرة فيهم دكن وقعد مش حلو

افضل شي حمية صحية عند دكتور تغذية كويس

وللشد مافيش كيف الرياضة

أو سلموا للامر الواقع زي حالاتي هههههههههههه

سمنت بعد زواجي ومعاش ضعفت

الا بعد ولادتي بايوبي نقصت واجد من الرضاعة

[المهندسة روبي]

حتى انا مسمعتش بيه

لكن معتقدش نتيجته مضمونة لانه موضعي

اختي مشت لدكتور الحق عطاها نظام مشت عليه في خلال 10 ايام نزلت 7 كيلو

ومع الوقت بدت تنقص كانت اسمن مني توة مولية عرض الورقة ههههههههه تنفخيها اطير

يعني تبيلك مع الوقت تنقصي الاكل باش معدتك تاخد على قلة الماكلة وتتقلص

انا لا ضعيفة ولا سمينة بس ميزتي طويلة

لكن لازم نحافظ وكان لقيتيه ومشي معاك معنديش مشكلة نجرب

وصحيتي

[RAWAD]

بارك الله فيكم على الردود يا غاليات
تخسيس الجسم فعلا لازم من تنقيص الاكل و الرياضة .
لكن تقعد بعض الاماكن صعب انها تنحف
و السبب هو السموم المتراكمة بين الطبقات الشحمية و السيلوليت
و هادي هي مشكلتنا

بالنسبة لموضوع الطين .. هذا يوضع على الجلد من الخارج و يساعد على تدويب السيلوليت اللى ما ينفعش فيه حتى الرياضة
بصراحة دورته و قريت عليه ..
و طلع كله اعشاب عادية مش مضرة
و لزيادة التأكيد تأكدت من انه يباع في بريطانيا في محلات الاعشاب .. بس غالي نار

على اي حال مشكورات على النصائح
و ان شاء الله ما يصير سو .