[استفسار ] كيف تتصرفين مع العزومة المفاجئة

[أمـ ساره]

السلام عليكم ورحمة الله وبركاته


حبوبات طبعاً أغلبنا ان لم نكن كلنا قد تعرضنا لمثل هذا الموقف

انه يجيك ضيوف بشكل مفاجئ أو زوجك أو خوك أو والدك يتصلوا ويقولوا لك

انهم جايبين ضيوف معاهم للحوش

كيف تتصرفي في مثل هالموقف

طبعا مع الظروف الصعبة الي تنحطي فيها

انه ما يكون متوفر لحم كويس أو ما فيه خضرة كاملة

أو تكوني مطيبة الغذاء ويكون عادي مثل مكرونة مبكبكة



على فكرة اني ديمة معرضة لمثل هالمواقف

وهذا الي خلاني نطرح الموضوع نبي تشاركوني افكاركم

ونستفيدوا من بعض


مثلاً لو تجهيز مسبق كيف يكون

لكن مع مراعاة ان مش الكل يحبذه


وأيضاً البعض ما يحب نوع من اللحوم أو الخضار


والبعض ما يفضل أكلات معينة



ونبي افكار بالنسبة للحلويات مع الشاهي أو القهوة

أغلب الاحيان نبعث نجيب الجاهز من المحلات

مثلا نوع بسكويت راقي أو كيكات ايطالية جاهزة وما الى ذلك

هذا لو فيه من يجيب طبعاً



يا ريت نلقى تفاعل بالموضوع لأنه والله يسبب الاحراج

[sweet nona]

السلام عليكم
ام سرو موضوع والله عالخاطر فعلا كلنا متعرضين لها
المواقف وكلما تنبهي وتعاودي مفيش فايدة
اني طبعا بحكم اني بنوتة مش مدام
بس الوالد بطبيعت عمله ربي يحفظه واحني الليبين معروفين بالكرم والجود
بس في راي على قولت منال التجهيز المسبق
اني ديما ينقذ فيا الحوت لانه انتبل اول مايوصل
وانحط في الفريز تطييبه سريع
والصراحة طاجين البيتزا الكهربائي سريع
متلا تقلي بطاطا باذنجان
وليا عودة ندكر حالات طوارئ صايرة معانا
هههههههه
وانشالله ديما مستورين

[شرقاويه بنت بوادي]

اعتقد ان التجهيز المسبق هوا الحل لو تطيبي بطاطا مبطنه تحطي منها في الفريز حتي بعض المعجنات توضع في الفريز ...
ربي يساعدنا في هذك اللحظه

[أمـ ساره]

ياريت والله نقدر ندير سمك بس زوجي ما يحبه

يعني ممنوع انديره وبالنسة للخضرة هذا موضوعها ساهل

نحطها في طاجين ونبلها وندخلها الفرن ديمة اندير فيها



شرقاوية

بالنسبة للتجهيز المسبق ممكن يكون حل لبعض الحاجات مش كلها

وخاصة الي ما يحب البايت

[أمـ ساره]

بالنسبة لي لو عندي وقت مثلاً ساعتين أو أكثر شوي

يا دوب نلحق اندير حاجة مسقية بس هذا طبعا يعتمد على اللحم

لو كان خروف الموضوع ساهل ويطيب بسرعه



ومرات اندير في لحم في الكوشة سواء لحم ضلوع أو لحم بالعظم

وطبعاً أسهل شيء دجاج مشوي في الكوشة

وطبعاً معاهم خضرة أما مع اللحم نفسه أو مقلية أو مشوية


واندير معاه رز أبيض بالخضرة اذا كان لحم بس

أو رز أصفر أو متبل


ومعاهم طبيخة بازيليا أو فاصوليا أو كان ما عندي اندير شربة



ولو لحقت اندير بيتزا بعجينة العشر دقايق في حالة عندي صالصة جاهزة

[ام سحر]

السلام عليكم
نوضوع قيم وما يدورك الا اللي يبيك وانتي تفرحي بحيته وكان تلقي تحطي مالذا وطاب
زي ما قالت الاخت البيتسة في طاجين البيتسة الكهربائي ما تعطلبش واعجني العجينة ودفي الكوشة وحطي العجينة فيها مثل تبلي دجاج والا شاورما وتحطيها في الفريز ما تاخدش وقت في تتطيبها وطبيخة فاصوليا بالدجاج اخترت الدجاج ما يعطلش في التتطيب
ربي يونسك بعويلتك

[الساجدة لله]

ام سريوة نبي نقولك انك لو تجهزي متلا دجاج متبل او لحم متبل او بصل مفروم او تكون عندك كمية من البيتزا الجاهزة فقط لتسجين بالميكروييف او سلاطات متلا متبل او مشوية وتفرزيها وعند قدوم اي زائر او عزومة ممكن تستخدميها بس على شرط تكون كميات مفصولة بش تقدري تاخدي حاجتك والباقي يقعد في الفريز انا هكي ندير والحلويات نكون مجهزة بسكوت او محنشية وتكون جاهزة وطايبة وقد نحتاجها على طووول نطلعها ونفك التجميد في الميكروييف الحق انا ماعنديش بس عزوزتي عنده فنستعمل فيه , وحتى بوريك الجبد او البف نستعمل فيهم مرات طازة تكون عندي نحشيها ونطيبها وهكي تكون طازة اما الحشوة فبستمرار عندي لحم مفروم او مرقاز او سلك وبعدين الرز عيلتي تستهلك في الرز هلبه لدلك ديما عندي وصدور الدجاج لازم عندي نستعمل فيهم وانا اكتر المفاجئات عندي هي من العائلة بس الحمدلله ننستر معهم وكل ماندكر حاجة انقولها

[أمـ ساره]

أم سحر


مشكورة على تفاعلك وخيتي ربي يبارك فيك

بالنسبة للبيتزا اندير فيها وفكرتها سريعة وتستر

أما العجينة فندير في عجينة الـ 10 دقايق أسهل شيء


وبالنسبة لفكرة الدجاج في الفاصوليا خير معاك حق


ولو تفكرت شيء ياريت اتقولي لي عليه






سجودة

ماشاء الله أفكار حلوة حبوبة

ان شاء الله نطبقها

مع اني بديت هاليومين هذه نجهز في بعض الحاجات تساعدني

مثل عجينة البف باستري ( المنتفخة ) ورقائق السمبوسة والبوريك


وجهزت لحم مفروم طيبته وتبلته بالملح بس وحطيته في الفريز


وان شاء الله ندير نفس الشيء مع الدجاج



لكن البيتزا بنكتفي بالصلصة بس والباقي ساهلة بعجينة الـ 10 دقايق



وياريت تزيدي تفيدني من خبرتك حبوبة

[sweet nona]

طبعا سجودة ماشالله كفت ووفت وقالت الي في خاطري
بس ام سارة انتي هاك ماشالله عليك قلتي بالنسبة للعجاين مانوحلش فيهم
في كدا نوع وكدا طريقة وهلبا تشكيلات
بالنسبة لينا فالحوش البيتزا لا يخلو الفريز منها اكتر الاحيان والحمدلله
واتجيك زي الرحمة وتسترك عجينة العشر دقايق ماقصرت هههه
اديري منها البريوش والخبيزة والبيتزا
والله اليوم درت منها 3 حاجات وجت رهيبة حاجة احلا من التانية
واهم حاجة التتبيلة ديما واتية فالفريز
ماشالله كل شي والميكرووويف مامعاه بايت اقل حاجة في جيت الضيف
وتو نرجع

[أمـ ساره]

بارك الله فيك سويت


المشكلة مش في المعجنات المشكلة في الوقت

نقدر اندير بيتزا عادي لكن ما نلحق اندير معاها شيء ثاني


لهذا السبب نبي افكار للحلو والمالح وكل شيء ممكن اندير قبل الوقت


اني نفكر اني اندير سلة او تارت صغير وندسه في الفريز ولما يجي ضيف يكون جاهز عندي

لكن شنو الحشوات الي ممكن انجهزه غير الشوكولا طبعاً

لأنها يوم عندي ويوم لا وخاصة اني ما نبي نشريها ديمة والسبب بنتي طبعاً

[أم أبرار]

اهم حاجة تكون عندك طنجرة ضغط لان تقدري تطيبي فيها الطبيخة واللحم المكمور وحتى المحشي
وبعدين مايضرش لو جهزنا شوي موالح وحلويات في الفريز وحتى البصلة نحطها في الفريز ولابد لما يجيب لك لحم تخلي تحطي في الفريز لحمات كويسات للضيف
ولي عودة بإذن الله

[أمـ ساره]

أم ابرار طنجرة الضغط ما نحبها بكل نحس الطعمة تفرق فيها


بالنسبة للموالح شنو نقدر نحط في الفريز وكيف نفرزه

أما الحلويات ساهلة نقدر نفرزها ان شاء الله


وبالنسبة للحم ان شاء الله ناخذ بنصيحتك وخيتي

مع انه توا يا لطيف شايطة فيه النار هو والبيض ربي يلطف وخلاص

[أسماء القائد]

والله ياسارة أنا ديمة هالمواقف اتصير معاى ولكن الحمد لله الفريز حلاال الأزمات ديمة إندس فى حفاظة بوريك باللحم والسلك مع الجبنة بالعجينة المنتفخة وطبعا محشى بدون تتطيب انثلجه في الأول في صفرة ولما يثلج انحطه طبقات فى الحفاظة وبين كل طبقة وطبقة نايلون ..وكل ما انكون فاضية نعجن عجينة العشر دقائق وإندير منها كرواسان محشي تن وبصل أخضر وطماطم أخضر وهريسة وكسبر أخضر وزيتون وشوية مايونيز رررررهيبة ..وهاذى اندسها طايبة هى والصفيحة إندير فيها دوائر صغيرة ..والبيتزا الأغلب للضيوف إندير فيها مرواح منظرها حلو وتكون طايبة تسخين بس ..
والمبطن محشى ( الحشو ايكون طايب ) ومقلي وانحط فيه في أكياس ..وكروكيت الدجاج طريقة منال العالم هادى تقعد حتى شهور في الفريز وتكون ملبسة بالبيض والخبزة المرحية بدون قلي .. والجلاش أصابع محشي بالدجاج وجبنة الشرائح وملبس بيض وخبزة مرحية وندسه بدون قلي .. والسمبوسة نعجنها ونحشيها اما مفروم أو جبنة مثلثاث وبصل مذبل فى شوية زيت فيها بنة فظيييييييعة وندسها مقلية

والشاورما تندس ملفوفة كاملة من مجاميعه لفيه في السلفر وأنسيها
(كل مانديرها اصغارى مايهنوش روحهم حتى يقضوا عليها)
وممكن ادسي خبزة الشاورما بدون حشو ..والكباب يكون جاهز تسخين بس ..والكنالونى محشى وملفوف بدون صالصة لما تبي اتسخنى ديري الصالصة والجبنة ..وصالصة البيتزا أنطيب كمية وتكون عاقدة هلبة ولما انطيبها منزيدش مية لآنها لما اتخش الفريز تفرز المية ... مكثر دوتى هههههه

والحلو تقدري أديرى أي كيكة ملبسة بالشوكلاتة ودسيها وتكون مقصوصة قبل ..وتقدري اديرى الحلويات الليبية الجافة لآنها تصبر....زودتها ههههههه

إن شاءالله انكون أفدتك ولو بالشئ البسيط جدآ

[أمـ ساره]

هههههههههههههههههههههههه

عادي اسماء زيدي على جوك


ماشاء الله عليك ربي يحفظك شكلك فالحة وست بيت


والله نصائح مقومة وتنفع هلبة ماشاء الله

باذن الله اندير حاجات واندسها

لكن كم نقدر نخليهم في الفريز المدة يعني



وربي يعطيك ما تتمني ويبارك فيك ياااااااااااااااااااااارب

انتي وكل وحدة ردت عليا ونفعتني

[أم ميوسة]

عزيزتي أم سارة بالله شن نحكيلك لنحكيلك على العزومات المفاجأة رغم أنه ما تصرليش هلبة لكن لما تصير نبدأ حايرة

بحنعطيك أنا كيف نتصرف بصفة عامة في العزايم لأني نحب يوم العزومة نفضى فيه يعني نطيب قبلها يوم او اتنين ويوم العزومة نلهى بنفسي ويتنسيق البيت

بالنسبة للبوريك بعجينة الباف نحشيه وندسه في الفريز على شكل طبقات وبين كل طبقة وطبق نايلون وحاولي لما تحطيهم ما تحطيهمش ملتصقات وصدقيني احلى حاجة في الباف لما يكون من الفريز للكوشة طوالي يجي هش ومنفخ وانا نحب نحطه في الفريز قبل ما نطيبه

للمبطن نقليه ونخليه في الفريز حتى هو يكون على الصالصة بس والكوشة

للبيتسا نوتي الصالصة ونبشر الجبنة والباقي ساهل وندير بيتسا وحاجة تانية بنفس العجينة

للدجاج نتبله ونحطه في الفريز وبعدين للكوشة طول

للكباب تبليه وحطيه في اسياخ وفي الفريز وبعدين الكوشة

تقدري ديري خلطات للسمبوسك وتحطيها للفريز بعدين قلي وخلاص

كفتة دجاج و السكالوب كذلك تبليه وغلفيه والفريز وبعدين القلي وحيجيك احلى من نفس الوقت

هادا اللي ندكر فيه توه انا عادة هكي ندير لاني مانحبش حاجة الفريز يعني تكون اللمسة الأخيرة في الكوشة مش تسخين بس حتى تطلع بنة الفريز من الطعمة وتكون الماكلة ة طازجة

ليا عودة أن شاء الله واتمنى نكون افدتك في بعض الافكار

[أم ميوسة]

حاجة تانية أم سارة

بالنسبة لصديقي وقت الأزمات والعزومات المفاجأة هو المايكروف

لما بندير طاجين جبن نأخذ البطاطا ونملحها بشوية ملح

ونحط عليها شوية زيت ونخلطه حتى يوصل في كل طروف البطاطا

ونغطي الصونية ونحطها في المايكروف يمكن عشرة دقائق

تختصرلي الطريقة هادي وقت القلي وتجي الطعمة ما تختلفش

وطبعا بالنسبة للحم في العزومة المفاجأة لو عندك لحم وطني يكون أفضل مسقي

ولو دجاج بيكون رز بالخلطة ومعاه دجاج محمر وبيتسا او حاجة تناية وشربة عدس او عربية او اي نوع من الشربة او الطبايخ

ولو كنتي مدايرة مبكبة عادي لانه الناس اللي جايين عارفينك موتية غداك ومش متوقعتيهم فديري معاهم حاجة او اتنين والله غالب ههههههه هادا جونا حنا الليبين انا ماما ديمة في العزايم المفاجأة تتزرق وتتخضر وكان مبكبكة تحولها للمسقية لو الضيف براني وتبدا تحرق في دمها فالتجهيز المسبق افضل شئ للي تصير معاه مقالب العزومات المفاجأة

[sweet nona]

ام ميوسة ماشالله كفت وفت
وواسماء حتى هيا بدري بدري
بس توا حتى اني بنسأل ههه
ام ميوسة لو عندك طريقة عجينة الباف ياريت اتنزليها اوخيتي خاطري نتعلمها
وتوا عندك كل الفكار ياام سر
الصفائح حتى هيا روووعة وتستر
وماشالله البنات
قالو كل شي
حتى اني استفدت معاك

[أم أيوب]

موضوع يهبل خلي نحكيلكم على ام ايوب

طبعا لما يجيني تليفون من ابو الشباب ويقولي ضيف عالغداء

وجهي يهرب منه الدم ولساني يرتبط بس كويس انه يصير هكي عشان ما نشيط في وجه المسكين

وحواجبي يعقدوا مع بعضهم وتصير فيا حالة

ونقعد عشر دقايق ربع ساعة مصدومة خاصة لوماعنديش حاجة جاهزة

او على قول البنات مرات اللحم مايسواش

هي الحق صارتلي ممكن ثلاثة أو اربع مرات الحاجة هدي

نقول لراجلي معناها اخر جيته شي نص ساعة او أكثر على موعد الغداء

مرات يكون غدايا رز أبيض على قطعتين لحم مثلا

ندير معاه بازيلاء بصلصة الطماطم وغالبا تكون عندي مخزنتها في مرحوم الوالدين (( الفريز ))

وندير سلاطات ممكن متاع الفاصولياء حتى هيا غالبا تكون مخزنة عندي

وسلاطة مقليات وسلاطة خضراء يعني نغطي شوية بالسلطات

ولو لحقت ندير شريبة عربية حتى هي ما تعطلش

أنا متعودة على أصحاب راجلي ما يركزوش عالموالح والمعجنات يدوروا بس في الأكل التقيل

والحلو على بال ما تغدوا نجهز بسبوسة ماتعطلش ونديرلها عسل حقاني ومكسرات

ويمشي الحال

بعد ما يمشي الضيف نستلم أبو الشباب ياناري

بس غالبا نحب نخزن حاجات في الفريز

مثلا كفتة لحم أو دجاج وممكن شاورما طايبة بس بدون الخبزة لأن مشكلتها محلولة يبيعوا فيها جاهزة

ومرات مبطن

بس لو كان عندي علم مسبق بالعزومة يعلم الله اني نحب نشكل ونلون

بس على قول ام ميوسة قبل العزومة بيوم عشان يومها نقعد نفسيا مرتاحة وما نرهقش روحي

مرة قلت لراجلي تخيل انت مكاني قاعد في الحوش ونكلمك نقولك معايا ضيفة عالغداء

قالي ساهلة نقولك جيبي غداك من اول مطعم على طريقك ههههههه

[أمـ ساره]

الله يبارك فيكن ويرحم والديكم حبوبات


والله معلومات روووووعه وان شاء الله يكون هالموضوع مرجع لي


لكن نبي نعرف حاجة لو بنخزن حاجة طايبة

كم الفترة الي ممكن نخليها فيها مثلا بطن محشي بدون قلي

أو لو كفتة أو حلويات ياريت تحددوا لي الفترة حتى نعرف


وبالنسبة للفريز يا أم أيوبي

مجهزاته للبازيلياء والفول والفراولة والخوخ ان شاء الله

ولو قعد فيه مكان اندس حاجاتي فيه


وربي يبارك فيكن ويعطيكن ما تتمنوا ياااارب ويستركن دنيا وآخرة

لكن الي تتفكر حاجة نرجع وتكتبها راهو مش توقفوا

[sweet nona]

ههههههههههههه
ام ايوب والله ضحكتيني بجديات
اصله اكيدة معندهمش مشكلة في شي
انقولك حاجة حتى ردي مرة من المرات
وقوليلا جيب غداك معاك
هه
بس الافكار ماشالله
وكلها على قولت البنات تبي تجهيز مسبق وفي الفريز وسبحان الله
اتجيك زي الرحمة اتقول حد واععطيهولك بلاش
والصراحة نبو هالصفحة ديما شغالة
كل مرة وحدة تفيدنا
وتذكر حاجة

[المغتربه]

حبيبتى دائما خلى عندك عجينة جلاش جاهز فى الفريز وخلى عندك جبنه ولما يقولك فكيه فى الميكروييف على السريع وشكليه سمبوسه ولما زوجك يشريلك خضرة احرصى على عمل المخللات راهى تستر الصفره
وقطعى الكرنب الملفوف شرائح صغيره وحطيها فى الفريز ولما تحتاجيه فكيه فى الميكرويف وابشرى عليه جزر ومايونيز وشوية ثوم ورشة سكر وملح وشوية حليب هذا نوع وجهزى سلاطه خضرا وضيفيلها قطع برتقال او قطع جبنه ورشة نعناع
واللحم والله الدجاج اللى عندك طايب غطسيه فى دقيق مخلوط بفلفل احمر وبعدها بيض وبعدها بشماط ومعاه كورن فلكس مرحى واقليه وزينيه فى صحن بروحه تلقى صفرتك امتليت
وما تنسيش انه تزيين وتنسيق الصفره بروحه يفتح النفس والعين تاكل قبل الفم ولفى مناشفك لفه حلوه
وحطى فى كاس الميه زهر
وقدمى الفاكهه بشكل حلو
تلقى عزومتك ميه الميه

[أمـ ساره]

ماشاء الله على افكارك الحلوة وخيتي المغتربة

بجد تنفع هلبة وعلى قولتك تملا السفرة

ان شاء الله ناخذها بعين الاعتبار

وياريت لو تفكرتي حاجات جديدة تجي وتكتبي الله يبارك فيك

[المصراتيه]

هلا حبوبه
هالورطه صدقتي والله ديما تصير ولكن الجود من الموجود هههه
اني نقول والقول ساهل مش كيف الفعل ولكن بالك تستفيدي مني حتي شويا
بالنسبه للحم كل ما تشري لحم خلي منه لحمه كويسه ودسيها في الفريز من لوطا وانسيها وهكدا في نهايه الاسبوع تلقي روحك عندك لحم هههه
بالنسبه للمكرونه بالعكس معظم الرجاله يحبو فيها متلا لو كان اللحم علي قولتك مش متع تطليع لو كان مطيبتيها بلحم احمر طلعي من المدسوس وديريه شوايا عالسريع ولو كان دجاج طلعي دجاج ودوبيه في الميكرويف عالسريع وتبليه في الميه عالنار حتي ١٥ دقايق واقليه تحمير وحطيها فوقها وياسلام وحمص كان عندك حكه واتيه...
بالنسبه في حوش اهلي امي الفالحه عاد ديما ادس يعني ظروري من الحكاك كيف الحمص والتن والبازيلا ضروري ماتلقيه والعصير وووو
نجو للمعجنات المبطن زي ماقالولك بس الصراحه اني منحبش المبطن من الفريز لان حاجه البطاطه تتغير لو طولت والاحسن تخلي المفروم واتي بس وتستفيدي منه في اكتر من حاجه ولكن المعجنات الاخري كيف السليله الحاره والتزدان والبيتزا هدينا ديما خليهن في الفريز ويقعدن بالشهرين يطلعهن كانهن جدد.
البيتزا خليها واتيه عالتسخين بس وديري في ١٠ دقايق حاجه تانيه بدل توتايتها احسن
الفتات ديريه طبقات ونايلو بين الطبقه والطبقه وحطيه في الفريز مش عادي في وقت الحاجه
بالنسبه للحلو كيف ماقلتي انتي ديري تارت وخليهن عالحشوه بس والحشوا مش ضروري شكولاته تقدري تحشي اي شي ان شاءالله حتي مهلبيه وتحطي عليها حبه لوزه تجي حللوه او حليب محلي والشكولاته انتي خلي عندك نوتيلا ودسيها علي سرو زين بدون ماتعلم بيها هههه
والله الصراحه موضوعك مش عادي نستفيدو منا كنا وان شاءالله كل مانتفكر حاجه نخش ونكتبها
طلعت فالحه في الكتيبه لكن كان تجي تشبحي فريزي ماتلقي شي واتي ههههههه من هم الغربه

[أمـ ساره]

ههههههههههههههه

يعطيك الهني يا مصراتية صار ندس النوتيلا على سرو

ان شاء الله حبوبة ولا يهمك

بجد اضافة روووووووعه وخيتي ربي يبارك فيك

و تفكرتي حاجة تعالي وقوليها لي

[كيمو 2010]

السلام عليكم
يابنات انا من بنغازي وجيين لاختي عرب يبو اتممو على الخطبة ويتفقو جيات 5صبايا حشا اعيونكن نبي اخلر انواع من الموالح اتكون جديدة واخر شوكلاطة نازلة لسوق وافكار حلوة منكن يا صبايا وكل وحدة عدت الخطبة اتقول شن الحاجات الي تقدمن

[المصراتيه]

موضوع كويس
خيرا سكت؟؟؟؟؟؟؟؟؟

اكتبي يا لوبا لما تجيك الاجنبيه علي غفله كيف تتعاملي معاها ههههه

[همسة حنان]

حني نتعرضو هلبا لهكي مواقف في الحوش ونسهلو في الكسكسي كونه سريع ومايبيش وقت هلبا

[الصابرة]

السلام عليكم
اني مش في العزومة المفاجئة اني مشكلتي مع راجلي اللي مايتفكرش ان في ناس بيجوه او متفقين على عشاء او غذاء الاقبلها بساعتين وهو تلقيه عند العلم قبلها بيوم
لكن الحمدلله اصحاب راجلي مايفضلوش المعجنات يحبوا المقليات والمكرونة المبكبكة والسلايط
طبعا ديمة اللي تستر فيا في وقت الضغظ المكرونة المسقية او الكسكسي نطلع اللحم من الفريز
ولاني نغسل في اللحمقبل تفريزه فما عنديش مشكلة في تذويبه
انحطه في الطنجرة ونحط عليه البصل بتاع البصلة والحمص وماء بس ونحطه على نار عالية
ونخليه نين الحمص والبصل يذبل واللحم يطيب انحط البهارات والطماطم والزيت
ونقص على النار نين ثتكاثف الطبيخة واتحصل على دهن وهذه اسمي فيها البصلة السريعة
اندير ديما سلاطة سريعة ومخلل طماطم وكان عندي سلاطة خضراء انديرها معاهن
ومرات اندير امسير في ربع ساعة
بالنسبة للمقالي لاني عارفة راجلي ونسيانه للعزومة ديمة عندي صدور دجاج مسلوقة ببهارات الدجاج
ونفرمه ونكيسه ونحطه في الفريز ولما يجوني ضيوف نحطه في المايكرويف حتى يفك تجميده
وبعدها اضع عليه بهارات العادية وبيضة وخبز مرحي ونكوره او انديره اصابع وعلى طول القلي
وبطاطا مقلية الله يخليها ديمة تستر فيا ومرات تكون عندي اصابع الكروكيت في الفريز وخصوصا هيا
طلعي من الفريز واقلي طول
او اندير كفتة البطاطا اللي اندير فيها من بشر البطاطا بدون سلقها سريعة ومتاخذش وقت
وبالنسبة للحلو عادتا نوع واحد يوفي بالغرض
ومرات ماعنديش اندير محلبية وانزينها مكسرات وشوكلا ولو الجو شتاء نقدمها دافية ولو صيف نقدمها باردة
اعذروني اطلت في الحديث
ولي عودة

[أمـ ساره]

بارك الله فيكم على الافكار المفيدة والمنوعة





سلمها المصراتية الي نشطت الموضوع

ياريت والله نشوفوا أفكار وطرق سريعة تسترنا يارب




صابرة

ماشاء الله عليك ديمة نويشطة وأفكارك اتهبل

اني راجلي ما يحبها المكرونة المسقية ولحد الآن عمري ما درتها في حوشي

وأيضاً المخلالات ما ناكلوها ولا نديروها مع انها حل كبير وسريع بصراحة


بالنسبة للمكرونة ندير في طاجين مكرونة بالخضرة في الفرن

ومعاه مشقشات سريعة

ولما تكون عندي خضرة بطاطا وقرعة وطماطم وبصل ندير طاجين خضرة زي فكرة طاجين الجبن

من غير ما نقلي الخضرة نديرها صغيرة ونخلطها ونحطها في الفرن أهم شيء التوابل متاعها

تغطي حتى على اللحم لو مش متوفر









يا بنات ياريت الي عندها أفكار للعجينة المنتفخة تقولنا عليها

سبحان الله ما تجيني حلوة على قد ما جربت فيها

نبي فكرة لحشواتها سواء موالح او حلو

[زوبة الطيوبة الحبوبة]

أنا امي ماتعرف شئ على الحوش لانها مريضة وديما احنا اللي نتولوا
امور الضيوف وفعلاً الحكاية هاذي ديما تصير
وبكل صراحة ومصداقية دائماً نلجاوؤا للمسقي
لان الرجالة يحبوا المسقي اللي بالبصلة ( كسكسي أوأرز مسقي او رشدة كسكاس على السريع ) أو البازين حللّل المشاكل والا ديما فيه فاصوليا مطبوخة مجمدة في الفريز او بازلياء ( حتى هيا في الفريز ) لو مش وقتها ( حكة ) ومعاها
بطاطا مقلية والدجاج ديما مكيس في الفريز ومتبل يعني واتي
نحطه في السلفر ونقص عليه قطع بطاطا ونحطه في ماكينة البيتسا فيسع مايطيب او دجاج مقلي ومعاه شوية رز بلاو وندير معاهم شوية
سلاطات زي سلاطة عربية ( خيار وطماطم ) او سلاطة بازلياء مع قطع بطاطا وزيتون او سلاطة باذنجان وفلفل مسير
يعني اللي موجود وبسرعة
ولو فيه نساويين هنا المشكلة
لكن ديما فيه صالصة البيتسا واتية في الفريز نطلعها ونسخنها وندير عجينة العشرة دقايق
ومرات فيه مفروم نتبله ونديره اصابع يعني كباب ونكيسه حسب الوجبة ونحطه في الفريز
او ندير كفتة البطاطا المبشورة بسرعة ونقليها او طاجين جبن
والحلو لو ماعنديش اي حاجة واتية فيسع نخلط كيكة
ونحطها في الكوشة ولو مافيش وقت وفيه شوية فاكهة ندير سلطة فواكه حتى هيا تستر
وبكل صراحة مافيش احسن من الحوت ( حاشا عيونكم ) اول مايجي نغسله ونتبله ونقسمه ونكيسه
واول مايقولو ضيف ندير طاجين حوت في الكوشة وشربة حوت ومعاها شوية مقليات زي بطاطا وباذنجان وكوسة وفلفل اخضر وندير كفتة حوت
او مكرونة مسقية بالحوت او بازين بالحوت
او كسكسي بالحوت ومعاها سلايط وحوت مقلي وشوية بطاط مقلية وكوسة وباذنجان وفلفل مقلي نزين بيهم الصونية...
ان شاء الله افادتكم بهالافكار ..