[تمت الإجابة][طلب] طريقة كبة البطاطا

[فراولة]

نبي نسال عن اكلة مش عارفه اسمها لكن نتدكر ان فيها بطاطا مهروسه وتعجن بالبيض ومعها ظرف خميرة حلويات المهم يطرحوا عجينة البطاطا في طاجين وبعدها المفروم وتغطى بباقي عجينة البطاطا وتنحط بيضه فوقها وتنحط في الكوشة انا نبي حد يدير فيها يقولي على اسمها ويعطيني مقاديرها وياريت مع الصور لان في وحده حكتلي عليها ضايقتها قدا ناس لكن ماجانتش نتيجة مانشدتش كيف دايرينها

[مغتربة 7]

هلا حبيبة
الصراحة ما نعرفهاش الاكلة هذه
نعرف بيتزة البطاطا
تقلي بطاطا دوائر
وتحطي طبقة من تحت وبعدين كيمة المفروم وجبنة وفوقها بطاطا وصالصة وجبنة وتنحط فى الفرن

وان شاء الله البنات ايفيدوك

[الساجدة لله]

مش عارفة حبيبة ممكن قصدك بيتزا البطاطا بنفس طريقة مغتربة ؟ بس انت ديري جولة في المنتدى ممكن تلقي اللي ادوري فيها

[jolia]

حبيبتى هذة الاكلة اسمها كبة البطاطا وماعندهاش مقادير لانك بحطيها فى الطاجين اول حاجة تسلقى البطاطا اللى عندك وبعدين تنحى قشرتها وتضيفى لها ملح وفلفل اكحل وبعدماتبرد ضيفى ملعقة زبدة سائلة ويبضة وبقسماط حتى تصبح متماسكة جيبى الطاجين وادهنى بالزيت ورشى طبقة بقسماط ثم ادهني بالزيت كل مرة يديك وافردى نصف الكمية وطبعا اللحم المفروم اللى مطيبتيه تحطيه فوق البطاطا وتحطى باقى كمية البطاطا فوقها ثم خودى بيضة واخلطيها كويس وصبيها فوق الطاجين ودخلى الفرن لين تطيب\\\\\\\متحطيش بيكنج بودر لانه يخلي البطاطا تتفترش\\\\ خلى الطاجين لين يبرد تماما وبعدين قصى لان الطاجين يتفترش كان انقص وهو ساخن

[أمـ ساره]

حبوبة فراولة يا ريت تتقيدي بكتابة العنوان حسب شروط وقوانين المنتدى


انا عدلته لك حبوبة

وهكي حتى يكون الطلب واضح ومفهوم

وان شاء الله طريقة جولي تعجبك


انا شخصيا ما نعرفها

[الصابرة]

انا نفس ماحكت ليك اختي جولي لكن مع فارق بسيط انا اضع مع البطاطا القليل من المعدنوس والكسبر يعطيها طعمة احلى والحشو اندير فيه حتى دجاج ولقيت الدجاج احلى من اللحم {اسلق الدجاج واتركه يبرد ثم انسله واضع في طاجين القليلمن البصل واشوحه مع الزيت ثم اضيف الدجاج والبهارات واخلط واتركه يبرد ثم اضيفه فوق البطاط واضع النصف الاخر لكن مااضع بيضة فوق البطاطا لان في البطاطا بيضونحن نسميها {طاجين البطاطا } اتمنى اكون قد افدتك

[فراولة]

صحيتي يالصابرة هده هي اللي نقصدها بارك الله فيك

[خدوج]

ماشاء الله
الحبوبات ماقصروا
نفس طريقة جولى بس اندير فيها مقلية
ونسموا فيها بوريك بطاطا

[خدوج]

ماشاء الله
الحبوبات ماقصروا
نفس طريقة بس اندير فيها مقلية
واسمها بوريك بطاطا