[استفسار] عن مركز تحميل الصور

[لوتي]

السلام عليكم ورحمة الله وبركاته
أني نبي نسأل عن مركز تحميل الصور وين نلقاه ولما انزل الصور من النقال وين انحطهن بيش يطلعولي لما انزل الموضوع وكيف
انحط الرابط امتع الموضوع الأصلي لما بنزل تطبيق واللي بتجاوب بتوسع بالها معاي شويا لأن كل مرة نواجه حاجة صعبة شوية وكان ملقيتلهاش حل راني بنسأل مرة تانية وشكرا مقدما لكل من بيساعدني وبيرد عليا

[أمـ ساره]

ماشاء الله وخيتي المصراتية ما قصرت وجاوبت عليك


حبوبة في ركن الاعلانات الادارية فيه موضوع عن مركز التحميل

فيه بعض روابط لمراكز التحميل المنوعه بس اغلبها صورها مؤقتة

والأخت زينب وضعط رابط لموقع مفيد جداً ولا يحذف الصور ابداً


شوفي الموضوع واختاري الي يناسبك


أما بالنسبة لوضع رابط الموضوع في التطبيق

ما عليك الا انك تفتحي الموضوع وتنسخي الرابط الموجود في اعلى الصفحة

ومن ثم تلصقيه في موضوعك أي ( كوبي بست )


وأي استفسار تفضلي ان شاء الله العضوات ما يقصروا

[زينب محمد]

يابنات مركز التحميل منبوش نرفعوا عليه صور

لذلك حذفناه من الرئيسية

لان مساحة المنتدى المتبقية قليلة جداً

ومازال على تجديد الاضافة 6 شهور

يعني نصف المدة

فرجاءً ماترفعوش عليه وشوفوا مركز كويس مثل مركز ترايدنت مثلاً او مركز

http://register.photobucket.com/

[لوتي]

أول شيي شكرا جزيلا ليكم(أخواتي مصراتية وأم سارة و زينب محمد ) لأنكم رديتو عليا لكن مركز التحميل وين أنتم تلقوا فيه يعني تنسخوا فيه في كمبيوتركم وإلا عنده صفحة في المنتدى انخش عليها لما انحمل والعنوان اللي قولتولي انسخيه وين مكانه في الصفحة اني خشيت علي مواضيع دورت عناوينها ملقيتيش عنوان وأني نوع جهازي نوكيا حملت منه صور ونزلتهم في مجلد علي سطح المكتب وكتبت الموضوع في ملف ورد والصور نسقتهم زي موضوع الأخت ليبيا ببرنامج الرسام ودرت الطول والعرض 30 توا خطواتي صح وإلا لا وأسفة على التطويل لكن هادي أول مرة أنزل موضوع

[زينب محمد]

حبوبة مادمتي نسقتي صورك وصغرتيها

ادخلي على هذا الموقع بالضغط على الرابط

http://register.photobucket.com/ (http://register.photobucket.com/)


وسجلي فيه

تلقي بعدين كلمة ابديت بالانجليزي في مستطيل اخضر ا

ضغطي عليها واختاري الصورة من جهازك فتتحمل الصورة

ثم اضغطي كلمة سيف بالانجليزي

تفتح صفحة اخرى تلقى فيها الصورة

حطي الماوس على الصورة تظهر تحتها عدة روابط

انسخي اخر رابط والصقيها في صندوق الكتابة في المنتدى

والافضل لو تلصقيه في ملف نصي تكست في جهازك حتى لايضيع تعبك لو صارت مشكلة ومااعتمدش الموضوع

وكملي رفع باقي الصور بنفس الطريقة

[لوتي]

أكتر من مرة خشيت علي الرابط حاولت انسجل يطلعلي خطأفي التسجيل بالله عليك وريني بالتفصيل كيف اسجل فيه وكيف ننشيء ملف نصي

[مغتربة 7]

بالعكس حبيبة اسئلتك تسعدنا

انتي لو صغرتي الصور وما عرفتيش من المراكز الى حطاته زوبة

تقدري تدخلي على اي مركز ثاني اني نستخدم فى العملاق

[لوتي]

شكرا ليك مغنربة 7 لكن عندي سؤال مركز العملاق ميصكرش الصور بعد فترة وإلا ديما تقعد مفتوحة

[مغتربة 7]

تسلمي حبيبتي

هو صح سنة وتصكر الصور تعاودي تحمليها


خاطري انشوف مواضيعك

[زينب محمد]

لا انصح بمركز العملاق لانه يحذف الصور بعد سنة

حبوبة التسجيل في المركز هذا بسيط جدا

ولو تبي نسجلك ارسلي لي بياناتك في رسالة خاصة وانا نسجلك

ايميلك واسم دخولك وكلمة مرورك

[لوتي]

شكرا مغتربة علي ردك وزوبة اديري فيا معروف لو اتسجليني إنتي قوليلي كيف نبعتلك رسالة والبيانات هي نفسها اللي انخش بيها المنتدى والا عادي انغيرها وإن شاء الله توصلك رسالتي وإن شاء الله في ميزان حسناتك

[زينب محمد]

حبوبة ارسلي لي رسالة خاصة

تجدي عندك فوق تحت الجديد رسائل خاصة

اكتبي اسمي واكتبي بياناتك وارسلي

اسم المستخدم لابد بالانجليزي ومن كلمتين يكون

[لوتي]

معناها نفتح رسائل خاصة وندير ارسال رسالة خاصة جديدة ونكتب في المستلمين اسمك ونكتب البيانات وندير اعتمد الرسالة هكي صح وإلا لا و البيانات عادي مش نفس البيانات اللي انخش بيها المنتدى

[زينب محمد]

صح

ارسلي الايميل وكلمة المرور اللي تبيها

واسم الدخول لابد يكون انجليزي ومن كلمتين

[لوتي]

أني كتبت ووين بنرسل يقولي اكتب عنوان للموضوع كيف اندير ووين نكتب

[زينب محمد]

اكتبي البيانات

[لوتي]

أني كتبت في مستطيل اللي تحت المستلمين اسمك وفي المربع الكبير اللي فيه من فوق حجم الخطوط وتنسيقها (صندوق الرسالة يعني) البيانات ودرت ارسال مباش يرسل بالك اني غالطة في حاجة

[نرمين عمر]

فهموني بس كيف نشارك معاكم وانتم مسكرين عليا:confused:

[مغتربة 7]

نرمين حبيبتي تفضلي شن الى تبي تفهيه

لو تبي تفتحي موضوع ساهل جداً
ادخلي الركن الى راح تنزلي فيه موضوعك وديري اضافة موضوع جديد

واكتبي موضوعك وطبعا الصور تكوني مصغرتهم وكاتبة عليهم اسمك

وتحمليهم فى مركز التحميل وتدرجي الموضوع

ولو تدخلي لركن الدعم الفني راح تلقي مواضيع هلبة تشرح كيف تنسقي الموضوع وتنزليه


واي استفسار تفضلي حبيبة

[لوتي]

نيرمين مفهمتش شن مشكلتك لوعندك استفسار قوليه وإن شاء الله الأخوات يفيوك وميقصروش وأني حتى أني قاعدة نسأل ونتعلم ويا زوبة أني بعت الرسالة هل تبقى متاحة للمشاهدة يعني اللي يخش لملفي ايشوفها وإلا هي مخفية ولو كانت متاحة كيف نخفيها أو نمسحها

[مغتربة 7]

حبيبتي لوتي الرسائل الخاصة مايقدر يشاهدها حد الا الشخص الى انتي بعتيله الرسالة

وزوبة راح ترد عليك

موفقة حبيبة فى انتظار مواضيعك

[لوتي]

شكرا ليك مغتربة 7 اليوم تعبتي معاي سامحيني لكن حتى اللي يخش ملفي معناها ميشوفهاش وسؤال تاني عن لوحة التحكم امتعي هل يقدر أين حد ايشوفها وإلا اني بس وأخر سؤال معليشي عادي نسألك عن مجموعة ليبيةحرة وإلا لازم اندير موضوع بيش نسأل فيه وشكرا

[مغتربة 7]

مافيش تعب حبيبتي لوتي

الى يخش لملفك يشوف رسائل الزوار فقط مش الرسائل الخاصة مثلا لو تدخلي ملفي تقدري تقري رسائل الزوار لكن الخاصة لا وتقدري تسكريهم رسائل الزوار لو تبي يعني ما يشوفهم حد الا اصدقائك الى انتي ضايفتهم فى قائمة الاصدقاء


والسؤال الثاني لوحة التحكم متعك مايقدر حد يشوفها الا انتي اصلا كل عضوة ولوحة التحكم متعها من خلالها تعديل توقيعك وتعدلي الملف الخاص بيك


والسؤال الاخير المجموعة تقريبا تسكرت وراح تاكدلك زينب على الموضوع هذا

واي استفسار تفضلي

[لوتي]

مشكورة هلبة مغتربة 7 علي مساعدتك وبخصوص المجموعة ياريت زينب اتقوللنا ليش اتسكرت وهل بتولي والا لا

[زينب محمد]

المجموعة حبوبة اقفلت

لان مساحة المنتدى المتبقية قليلة

ومازال 5 شهور حتى نستطيع تجديد الاستضافة

لذلك طلبنا عدم التحميل على مركز المنتدى

واقفلت المجموعة لكثرة الهدرزة

اللي حتأخذ مساحة من المساحة القليلة المتبقية

[آمال]

بارك الله فيكم على المساعدت ووسعة بالكم وجزاكن الله خيرا