[استفسار] مكان بيع وتركيب اثاث المطابخ الايطالية

[مى مى مى]

السلام عليكم

كيف حالكم يابنات ..

جايتكم يابنات وايدى بزناركم "على قولة اخواننا السوريين ربى ينصرهم " هوا طلب صغيرون وياريت الى تعرف ما تبخلش عليا بالمعلومة ..طلبى خاص بالمقيمات فى طرابلس والزاوية ..نبى عناوين معارض اثاث خاصة بالمطابخ الايطالية ..نبى نركب مطبخ جديد ونبي ستايله ايطالى ياريت الى تعرف تقولى باش نعرف راسى من رجليا لان لازم مانستقر على مطبخ معين باش نقدروا نخدموا تمديدات المجارى والمية لانى بنعطيهم المطبخ فاضى وهما يديرولى تصور وتصميم ليه ..ان شاء الله تكونوا فهمتونى وتساعدونى ..عشمى فيكم كبير ..وفى انتظار ردودكم الحلوة ..

[دانة ليبيا]

وعليك السلام اختي ميمي
اني نبي نفيدك بتجربتي ف مطبخي ,هي بس ليها فترة اكثر حوالي من خمس سنوات ,مطبخي حادماته في محل في النجيلة وتحديدا الطريق المؤدي من جنزور الى حي عمارات النجيلة ,على ما اظن المحل اسمه الانوار مش متفكرة كويس :confused:,بس بصفة عامة الشارع يحتوي عدة محلات لتجهيز المطابخ, اغلبها تحتوي على مطابخ ذات ذوق رفيع وخامة ممتازة, ومطبخي نال اعجاب كل من رءاه وبعض من اقاربي استفادوا من تجربتي وخدموا مطابحهم في نفس المحل ,يس نبي نعاود انقولك ان الكلام هذا من فترة بس انت لو تقدري تمشي للجهة هذيكا واتديري دورتك غادي تتفرجي وتسالي ممكن تحصلي اللي انت تبيه وانشاء الله انكون افدتك

[عهود]

اختي عليك وع سوق الثلاث وين في الجزيرة الى احدا قاعة الشعب سابقا
السوق الكبير

بري الدور الاول بعد تفوتي المواد الغذائية وين يبيعو في العصافير والببغاء وصناديق الحوت
قدام المحل الكبير يبيعو في القهوة الطازة
وتحت السلم الكهربائي تلقي مطابخ وفي منها عروض
احلى تفصيلات ع احلى اسعار بسعر المصنع ع احلى خامة ومتينة
يجو ياخذو المقاس وانتي اطلبي لي تبيه ع االكتالوج واللون الى يعجبك
وكان تبيه بالغاز والثلاجة يخدمولك تبيه من غير يخدموه

نصيحتي فكك من الخشب في المطبخ

[أمـ ساره]

ان شاء الله الاخوات يفيدك

حبوبة تم النقل للركن المناسب

وتم تعديل العنوان حسب القوانين والشروط

حتى يدل العنوان على المضمون