المساعد الشخصي الرقمي

مشاهدة النسخة كاملة : [مشاركة فى مسابقة صاحبة أجمل فكرة مطبخية ] من بنات افكاري من لوبا



luba
05-14-2012, 05:26 PM
السلام عليكم ورحمة الله وبركاته

http://www.libyan-kitchen.com/gallery/images/hanoie.gif


هدي من بنات افكاري يعني مافي شي نرميه وادا ماترمي شي لازم تكوني مرتبه يعني تحطي هالحاجات
في اماكن معينه لمدة قصيرة وادا مااستفدتي منها ارميها لانك لو خليتي كل شي بديري حوسه لروحك
الترتيب اساس الحياة في كل شي

من مدة درت بسكويت علي شكل هلال بسكويت جوز الهند ويبي تزيين خطوط يعني كل مانقدم منه لازم نزينه ولو ماتبي عادي بدون لكن اني عندي بالتزيين احلي ودرت اقماع وتشركن وتبهدلت منهم ماهو صاحبتكم ايديها الاتنين ايسار لين جت هالفكرة علي بالي
نستعمل شرنقه ( متاع استعمال المستشفيات) والله ماعرفتلها اسم ونعبيها شكولاته ونحفظها في كيس نايلون في التلاجه وكل مانبي منها نحطها لتواني في الميكروويف او نخليها برة ونزين بيها وهكدا

http://www.libyan-kitchen.com/gallery/images/img0000040.jpg


وفي بعض الحاجات اللي نشروها ونستفيدوا منها وخليكم مع الصور تشرح اكتر

http://www.libyan-kitchen.com/gallery/images/img000ddd.jpg



وهدا صحن عادي ونستعمل فيه لحافظه لي الكيكات وفي منه من الحجم الصغير حتي كبير قريب 6 احجام نحط الكيكه علي الغطاء ونغطيها بالصحن يعني بالعكس

http://www.libyan-kitchen.com/gallery/images/img000uou.jpg http://www.libyan-kitchen.com/gallery/images/img000vev.jpg


وهده نصيحه من زوجي وين كنت نقطع البصل والله لدرجه ننصاب بالدوخه لين قالي لازم تقصيه تحت الميه علي نصفين بس والباقي كملي بره علي اللوحه والحمد لله معاد نعرف دموووع
وجربوا وقولولي

http://www.libyan-kitchen.com/gallery/images/img000ama.jpg

وهدي شوية دردشه من افكار بنت عمي الله يناولها اللي في بالها
1- مررة ماعندها معدنوس تبي ادير براك دارت بديل له في الاكل اعشاب الجزر وكلوها وعجبهم ولكن ماخبرت حد لو اني مكانها مانديرها علي معرفتي بخوتها
2- تقلب في طاوله بلاستيك صغيره وتزرع فيها في القمح وتضيفه في السلطات مقرض رقيق ( هدي تو تعجب الساجدة لله الامر صحي )
3- تزرع النباتات في احواض تفساس اللي يحمي في التلفزيونات والتلاجات

وســــــــــــــــــــلام

مغتربة 7
05-14-2012, 05:37 PM
http://www.libyan-kitchen.com/gallery/images/img0000040.jpg

عجبتني هلبة الفكرة هذه

ماشاء الله عليك يالوبا قاموس افكار
كل فكرة احلى من اختها
يسلموا يااحلى لوبا
مشاركة رائعة وتستحق التقيييييييم
فى انتظار المزيد

بنت حواء
05-14-2012, 06:25 PM
ماشاء الله أفكارك حلوة وساهلة........... بالتوفيق ان شاء الله

sweet nona
05-14-2012, 07:58 PM
لبنى شكراا عالمشاركات وافدتينا

موفقة

وكل الشكر ليك ...قيمتك

أمـ ساره
05-14-2012, 09:17 PM
سلمها يا ربي وسلم افكارها الحلوة

بجد افكار مميزة وبسيطة واغلبها نقدروا نستخدموها

مشاركة مميزة لوبا

ونستنوا المزيد والجديد منك

om_adnan
05-14-2012, 09:33 PM
وين يالوبا سرعة صاروخ,انا توا قاعدة نعصرفى عقلى بيش نطلع فكرة,خليتينا لازم نفكروا أكثر,ليك أحلى تقييم.

بنت الاشراف
05-14-2012, 11:48 PM
بارك الله فيك افكار رائعة

luba
05-14-2012, 11:55 PM
شكرا لكل من قيم ومر وشارك بارك الله فيكن
يا ام عدنان هدا مش مني من التنقل وخيتك ماتبي تشري هلبه حاجات
ووين نتنقل مانرفع في شي والله في بريطانيا خليت وراي دبش لين عيطت عليه
بتقوليلي روحي بيه شنو بتروحي بالملابس والا بالهدايا ولعيلتين وشوفي عددنا اليبيين
اما بالنسبه لفكرة الشرنقه ماجت لين قريب فسدت نص فازو شكلاته
المهم في نتيجه
ماترمي شي اول ماتشريه وخاصه الحاجه المتينه اللي تتحمل
كان تبي افكار العاب صغار لتعليم الحروف والارقام نعطيك هههههه بس فيها هروله
منها رياضه ومنها يشغل دماه

أم خديجه
05-15-2012, 04:55 AM
ما شاء الله ايوه طلعن الافكار
بارك الله في صاحبة فكرة المسابقه
والتي عن طريقها اكتشفنا
المختره لوبا

لوبا طلعي مازال عندك اكتبيلنا افكار لعب الاطفال خلينا نستفيدوا من خبرتك
ربي يسلمك لعيلتك

luba
05-15-2012, 09:42 PM
http://www.libyan-kitchen.com/gallery/images/img000axa.jpg

هذي الاوراق نعلقوها متلا في حجرة تانيه تكون قريبه من نقطه الانطلاق للهروله

http://www.libyan-kitchen.com/gallery/images/img000kpk.jpg

هدي القصاصات نقلبوها ونطلعوا الحرف والطفل يقراه وتجري انت وياه من ايجيبها هو الاول ولما يلقاه تخليه يقراه مرة تانيه
ويقري الكلمه اللي تحت لازم تكون مرسومه وتقوليله شوف الكلمة وين الحرف متلا الف وهوه يحط صبعه عليه وتقولي كلمه اسد تبدي
بحرف الالف
ونفسها الارقام وان شاء الله تعجبكم من بنات افكاري

زهرة البنفسج
05-25-2012, 08:09 PM
ماشاء الله عليك وعلى افكارك اللي تهبل

الصابرة
09-19-2012, 11:05 AM
فكرة حلوة حبيبة واستفدت منها هلبة
احلى تقييم

المصراتيه
09-19-2012, 11:32 AM
افكار حلوه
وعجبتني فكره بنت عمك " الجزر"
تسلمي يا حلو

ام عبسي
09-21-2012, 01:03 AM
مشكورة ع لأفكار الحلوة
في طريقة للبصل ممكن اتقطعيه قريب من الغازوهو والع
وهذي مجربتها وفكرةاللعبة حلوة توا انجربها مع اوليدي
سؤال:confused:هذي ماشرحتي ليش نستعملوها
وبارك الله فيك


http://www.libyan-kitchen.com/gallery/images/img000ddd.jpg

luba
09-22-2012, 01:45 AM
بارك الله فيكم علي المرور الرااائع

ام عبسي نورتي الموضوع ونورتي المنتدي

هادي الصورة تم حدفها لانها تخلطت مع صورة تانيه وهاليومين

حنوريك فيش استعملتهم هاليومين ان شاء الله ونبعتلك الرابط

شكرا علي الاهتمام