سر الطبخ " دعوة للمشاركة"

[آمال]

السلام عليكم ورحمة الله
أخواتي الطباخات الماهرات أو تحت التدريب

سر الطبخة
تمييز وابداع

من أسرارك الخاصة
التي تتميزي بها

أتمنى من كل أخت تدخل لتوقع في هذه الصفحة عن سر طبختها فمن المعلوم إن كل واحدة له أسرار فأرجو منكن لا تبخلوا علينا بسر من أسرار الطبخ
خاصة أكلة شاع صيتها إن فلانة الله ايبارك عليها

ولكم منى جزيل الشكر


أبدأ بنفسي
تعالوا أخواتي أدنوا مني سوف أكتشف لكن عن سر من أسراري
هيا ادنوا لا أريد من أحد أن يسمعني
نعم .... نعم لا أريد المنتديات الأخرى تسمعني

سر هريستي العربية


أنـــا عندما أعمل الهريسة العربية الكل يقول لي هريسة رائعة هل تعرف لماذا

لان هريستي أطبخ فيها على النار وقبل أن أنزلها أضع قليل من الكسبر المرحي وأغم عليها لفترة من الزمن
هذا مما يجعل هريستي مميزة

والآن من التالي
ليكشف لنا عن سر من أسرار الطبخ عنده
إننا ننتظر
ولا تجعلونا ننتظر كثيرا
ورمضان على الابواب

والسلام عليكم ورحمة الله

[om_adnan]

وعليك السلام أم رميصاء,بارك الله فيك والله عندى حب للمنتدى كأنه بيتى الثانى ,وأتمنى يكون أحسن منتدى,وهو كذلك بناسه الطيبة وليس وصفات فقط,شنو انقولك ,توا لا اتذكر,لكن نقطة مهمة مدة الطهى مهمة وغالبا المحشى والعصبان يحتاجوا ٤٥ دقيقة فقط ولما اتطولى المدة تأثر فى الطعم,كذلك خبز المعجنات التوقيت له علاقة بقوة الفرن,يعنى أولا ما تتحمر من تحت تحمرى من فوق وطلعى,فيه أفران تأخذى ١٠ دقائق,ممكن هذا مش سر ولكن شاركت بيه.

[آمال]

جزاك الله خيرا أختاه أم عدنان
بالعكس يبدوا إنه سر لاني أنا كنت لا أعبئ كثير بزمن الطبخ
الله المستعان
بوركت

[luba]

ام رميصاء الموضوع حلو ممكن البعض مايدلو بدلوه لانك قلتي سر
والسر ماينقال هههه
المهم خطرت عليا وممكن كتير يعرفها
لما ندير طعميه و بنكورها في ايديا مانضغطش عليها مجرد نرميها من
يد للتانيه وهيا تتشكل كورة وضغطه خفيفه عليها من فوق ونرميهافي النار
تتطلع خفيفة زي المطاعم وكانه الهواء فيها

[آمال]

جزاك الله خيرا أختاه
شكرا على هذا السر

ولكن مطبخنا الغالي يستاهل ما فيه أسرار معه

[barney]

بارك الله فيك اخت ام رميصاء الموضوع رائع ومهم
لا يحضرني شيء ولكن ممكن انفيد وممكن مايعجبش حد المهم ديما ايقولولي عجينة الرشدة اللي اندير فيها مش عاديه لما كنت في ليبيا كنت ديمه نعجن للاعراس وماتتكسرش مني وتقعد ع طولها ولما جيت لامريكا جاراتي عجبتهم عجينتي والسر في العجينه اني لما نعجن ما انديرش في ملح في العجينه ويعدين انعدل الملح في الطبيخه وبالطريقه هذي العجينه ماتتكسرش مني

[آمال]

جزاك الله خيرا على الفائدة
بإذن الله سوف اعتمده في المستقبل

هذا سر خطير وحلو

[نسمه ليبيه]

الله عليكم وعلى اسراركم المفيده بس انا طماعه:p


ونبى من ام رميصاء طريقة الهريسه بالتفصيل

ومن لوبا طريقة الطعميه اللى خاطرى نديرها وتكون طايبه من الداخل

وبالنسبه ليا حنتذكر اسراري المطبخيه ونعاود

[الصابرة]

الله يبارك فيك اختي ام رميصاء موضوع غاية في الافادة
بالنسبة للاسرار ماعليكم سر
انا اكثر حاجة اندير فيها والكل يقولي طعمته مش عادية وتهبل المسير لما انديره خصوصا اللي يطيب على قيس من مهله يعني بالماء البارد
انحط فيه كروية حب واذا ماحصلتهاش احط مطحونة وياسلام لما يبقى عندي كسبر مطحون بصراحة ممكن في هلبة يعرفوها هذا سر نكهة المسير بتاعي واذا اذكرت شئ لي عودة

[آمال]

أختاه نسمة ليبيا : بارك الله فيك وطلب أوامر
ادللي ولا يهمك اذا قدر الله سوف انزلها بإذن الله
*"*"*"*"*"*
&&&&&&&&

أختاه : صابرة : بارك الله أخيه منك استفيد


جزاكن الله خيرا على التفاعل فأنا أتابعكم بشغف

[luba]

عزيزتي نسمة نزلت في قسم المقبلات العالميه طريقتي في الطعمية بالتفصيل
وان شاء الله تعجبك واهلين وادللي من عيونا

وشكرا يالصابرة لي المسير ان شاء الله نجربة

وماتنسي الهريسه يا ام رميصاء في انتظارك

[آمال]

بارك الله فيك أختي لوبا
وجزيت خيرا
يبدوا إنكم سوف تنتظرون كثير لاني الآن مشغولة جدا
لكن ان قدر الله سوف أعملها وانزلها سوف يتم ذلك
والمشكلة اني كيف عاملة مقدار
يعنى ..

المهم : اختي الساجدة انقدتني وجدتها عاملة هريسة مثل هريستي
سبحان الله
بارك الله فيك أخيه ونفع بك
فيه فرق واحد فقط
هو اني لا اضع كروية أما الكسبر زي ما قلت في سر الطبخة اضعه في الاخيرة واغم على الهريسة
وهذا رابط موضوع الساجدة
http://www.libyan-kitchen.com/kitchen/showthread.php?413-%C7%E1%E5%D1%ED%D3%C9-%C7%E1%E1%ED%C8%ED%C9-%E3%E4-%E3%D8%C8%CE-%C7%E1%D3%C7%CC%CF%C9-%E1%E1%E5
وهكذا أخواتي هربت منكن فعل

[آمال]

السلام عليكم ورحمة الله

سر طبختي في الطباهج
وهذه طريقتي الخاصة

طبعا حتى الطباهج الكل لما ياكلوها يقول أممم يشهي كيف تعملِ فيه
وهذا حقيقة سر ما قلت لحد
لكن المطبخ الليبي يستاهل

أولا : استعمل خضروات فقط بطاطا - كوسا - بيت ذنجال

ثانيا : اقطعها مكعبات متوسطة الحجم واضع قليل من الملح واقليها واتركها جانبا

ثالثا: الصلصة :
اخذ الثوم وبعد تحميره اضيف عليه حب الطماطم وبعد قليل اضع الفلفل الاخضر ولا ننسى قليل من الملح .فقط ثم اسكبها على الخضروات الملقية واخلطها .

رابعا :وهنا السر
أضعه في الفرن للتحمير واتخلص من الزيوت الزائدة انا اضعها في الفرن الفرنسوي " بورديم"
حتى تتحمر قليل


حقيقة تأتيك شهية
والسلام عليكم

[أم أسيل]

بصراحة فى هلبة افكار او اسرار والموضوع شيق وخدى هدا السر من اجل مكرونة امبكبة زى العسل لما تطيبى فى يوم بصلة او اى حاحة امسكية من الكسكى والارز طبعا بيفضل عندك المرقة يعنى الطبيخة الفاضلة من الكسكسة او الرز دسيه لغدو ودير ى بيها البكبوكى وطوقى البنة ولما تكملى البكبوكى عاد راك تنسى الشبت والحبق فى النهاية والتومة والفلفل الاخضر ودا سر البكبوكى
رشدة الكسكاس كان متبيهاش تلصق فى الكسكاس ادهنى الكسكاس بالزيت سهلة هدى
طاجين الجبن باش ميلصقش فى الطاجين حطى الطاجين فية الزيت وخلى الزيت يسخن كئنك بتقلى حاجة وبعدين اعطى صدمة لطاجين بوضع الحشوة ( اى الطاجين ) وساوية وبعدين على الكوشة
الكوسة لما بتحشيها لازم تدهنيها بالملح وشوفى الفرق
دهشت ........... طاسة امية لعفو .................. شن تانى اه.................. الشربة متع رمضان حوطى فيها عودان المعدنوس ايطيبو معاها اللحم بجميع انوعة لما اطيبية مديرش الملح فى البداية لن يعطل طيابه اسمعو .................. هدا اخر سر اه .............. المسير كان تبيه يصبر هلبة ديريله ..................... سر عاد الله غالب ولا صلو على النبى باش انقول هيا ............. حطوله قطعة صغيرر من الشب ولية عودة

[نسمه ليبيه]

مكشكورات على لمساتكن السريه

من احد لمساتى لما ندير مكرونه بالباشميل لما نحضر الباشاميل نخليه غليظ ووثقيل شويا ولما نكمل تخضيؤه نضربه فى الخلاكط مع طريفين جبنة كيرى وبيضه



وسر بسبوستى ان احد اكواب السميد اضع نصفها او اكثر فول سودانى مطحون جربوها وشوفوا طعمتها

[الصابرة]

تفكرت سر
طبعا اندير في البيتزا طول العام لكن عندي سر اندير فيه بس في شهر رمضان
عشان يكون في تميز
وكلهم لما ياكلوا فيها يقولوا سبحان الله البيتزا بتاعت شهر رمضان ديمة تختلف عن الاشهر الثانية ليش
انقولوهم هذا سر لكن المطبخ الليبي يستحق انقول وهووووووووووووووو
اني انحط مع الفطر والزيتون والفلفل الاخضر الحلونحط معاهم فلفل امسير مقطع صغير او خيار مخلل ونقطعه صغير عشان مايعرفوشي
وصدقوني حديروا بيتزا متميزة وطعمتها مش عادية

[آمال]

ماشاااااااء الله
موسوعة رائعة
بارك الله فيكن على التفاعل

بالفعل المطبخ الليبي يستاهل
انحبك يا ليبيا

[مغتربة 7]

عجبوني اسراركم يابنات الله يبارك فيكم يارب

ام اسيل الله يسعدك ضحكتيني واني ما عنديش نية نضحك

اهو جبتلك عصير بلي ريقك وكملينا اسرارك

http://t0.gstatic.com/images?q=tbn:ANd9GcSj9qjKBWyUjtStH_zJ0RE4OwCLOxToa FBc8gHpImTBQqMUxaBPzw


واني لي عودة ان شاء الله حاليا دماغي طاير منه كل شي

[خدوج]

ماشاء الله عليكم
شن بنتفكر..شن بنتفكر
اه ..المسير
باش مايذبل بعد ماتسيرية ضيفى عليه كمية وسط من الخل
ويقعد مقرمش لين يتم
مش تحطى قطرة وتقولى ذبل لالا يعنى؟؟
المكرونة نحبها بالثوم والفلفل الاسود الصافى يعنى هذه بهاراتى فيها
ولمن بطفى عالصلصة متاعك حطى رشة سكر
غريبة شوى بس صدقونى حتعجبكم ان شاء الله

[om_adnan]

حنحكى لكم قصة العسل او القطر او الشربات له مسيمات عدة والمعنى واحد ,وطريقة تبى شوية صبر بس مضمونة ويقعد كيف ما هو مدة طويلة ,تاخذى السكر الكمية اللى تبيها وتحطيه فى طنجرة على حسب كمية السكر,يعنى لما ايكون فى الطنجرة ,يكون اقل شوية من طول صبعك الصغير,بعدين اتغطى السكر بالماء بحيث تكون اعلى من السكر,اقل شوية من طول صبعك الصغير,وتحركى الى ان يذوب السكربالكامل,ثم اتضيف عصير ليمون,حوالى ملعقة كبيرة,اكثر شوى مش مشكلة,وتخليه يغلى ١٠ دقائق ,بس مش فوران,بعدين اتوطى النار الى ان يصل للسمك اللى اتحبيه لانه يعتمد على كمية السكر,المرحلة هذه مهمة وتاخذ وقت وخصوصا اذا كنتى تبى تحتفظى بيه مدة طويلة,للنكهة,يمكن اضافة عود قرنفل او قرفةمن البداية,وفى الاخير انضيف القليل من العسل الطبيعى,ممكن قبل استعماله مباشرة انضيف قليل من الروزاته,مش قلت لكم قصة,بس ما حببت ننسى شئ.

[luba]

في الصالصة اني كيف خدوج لازم نضيف في اخرها سكر
بالدات لانه يحول في الحموضه اللي من الطماطم

والباقي كله ان شاء الله نجربوة
وشكرا وبارك الله فيك ام رميصاء

[لوتي]

بارك الله فيك أم رميصاء علي طرح الموضوع أستفدت من الأخوات وإن شاء الله تعالى نجرب منهم

أما عن السر إإللي عندي تعلمته من ماما ربي يحفظها ويطول في عمرها هو لما تطلعي المعجنات بيتزا أو أي نوع من المعجنات من الفرن (الكوشة) طول غطيه بسفرة (سفرة الأكل ) وخليه تبرد حتلاحظي إن البخار رجع عليها وخلاها رطبة وهذي الطريقة معتمدتها مع جميع أنواع المعجنات وبعض الطواجين وحتلاحظي هذا في مواضيعي
لي عودة بإذن الله تعالى لسر أخر لما نتذكر

[آمال]

ماشااااء الله عليكم يا ينات ما قصرتن مع المطبخ الليبي
الله يحفظكم
شكرا لتفاعلكن

عندي سؤال

اني المسير دائما يعمل في طبقة بيضاء مثل الصوف ما السبب خاصة بعد ما افتحه

[om_adnan]

أختى العزيزة أم رميصاء...هذه الطبقة عبارة عن بكتيريا أو فنقص وهو غير خطير وتتخلصى منه وينتج عن التعرض للهواء أو استعمال ملعقة مبللة,أهم شى هو الرائحة والفلفل مش مرطرط-والله حاولت نبحث عن كلمة مناسبة أكثر هههههه-وان شاء الله البنات يكون عندهم معلومات زيادة.

[آمال]

بارك الله فيك أم عدنان
أنا فهمت قصدك مرطرط - يعنى رطب زايد عن اللزوم
صح

[om_adnan]

مزبوط أم رميصاء.:o

[المروالوردي]

السلام عليكم

من اسرار نجاح الكيكة وخفتها نحط رشة ملح مع البيض لما نخفقه

[آمال]

بارك الله فيك أخيه على هالسر

[سهام الجهمي]

اولا ضيفى الخل على جميع معجناتك فتحصلى على هشاشه غير عاديه. ثانيا ضيفى للمكرونه الباشميل لماء السلق قليل من البزار والقرفة ومرقة ماجى وشوفى الفرق ثالثا بعد ماتطفى على صلصة البيتزا ضيفى لها الزعتر وقليل من الكاتشب وقليل من السكر وتمتعى باحلى بيتزا والكل حيسالك عليها

[عهود]

مسـ الخيرات ـاء

مشاءالله افدتوني ربي يبارك فيكم ويعطيكم الخير

اسراري هلبة :p ع اساس ست بيت من الدرجة الاولى ;):D

اي اكلة فيها طماطم ديما نحطلها ع طرف الكاشيك سكر بيش ماتبداش قارصة وبالاخص الصالصة
وقريتها المعلومة هذه في اكثر من رد
لاكن كنت بنكتبهالكم من قبل مانقراها

واي طبخة ع النار ديما نختمها بمكعب ماجي بتعطي طعمة مش عادية وبالاخص ماجي الدجاج

وغير نتذكر نزيدكم من خبراتي الكثيفة اللامحدودة ====:: واحدة مغرورة وتنفخ في روحها ههههه
نبصر عليكم علي قدي ياناري عليا
نتعلم منكم صاحبات الخبرات القيمة مشاءالله عليكم

[آمال]

بارك الله فيكن أخواتي جميعا على هالاسرار
عهود أنا ايضا ما زلت اتعلم
ألم تلاحظ تطبيق تطبيق تطبيق
نادر ما افصم شيء من راسي

[المروالوردي]

أم رميصاء كلنا نتعلمو ومهما تعلمتي دائما تكتشفي اشياء ما كنتيش تعرفيها

ومن النت تعلمنا أشياء كثيرة وما زلنا نتعلمو والقصة كلها هوايات

[آمال]

بارك الله فيك أختاه
قلتيها بنفسك هويــــــــــــــــــــات اااه
ان شاء الله خير

[om_adnan]

لما شربتنا اطيب على طول اعصرى ليمون,بيش ما تخثرش,اتضيفى حاجة بسيطة فلفل اكحل وقرفة مع النعناع,للحصول على بشاميل من دون كالكيع,فى البداية كثرى السائل سواء حليب وممكن ماء ,يعنى اتكون جارية بيش تأخذى راحتك فى تذويب الدقيق وبعدين تقدرى اتوصليها للقوام اللى انتى اتحبيه وكذلك تحمير الدقيق جيدا على نار هادية حتى يعطى لون على سمار,يعطى طعم حلو للبشاميل.

[أمـ ساره]

السلام عليكم ورحمة الله وبركاته

ماشاء الله تبارك الله على بنات بلادي الفالحات

اسرار حلوة وافكار تساعدنا لأننا كلنا نتعلموا


بالنسبة للي خطر في بالي

لما نطبخ المكرونة ونسلقها في المية نحط معاها ملح وزيت وفلفل اسود وقرفة وبزار

لأني بصراحة نحسها تطلع متبلة وفيها بنة زيادة

سواء للمكرونة الصالصة او طاجين مكرونة بالخضار أو باشميل اوي اي نوع للسلق




وبالنسبة للبيتزا طريقتي نعجنها بالحليب الدافيء بس

او بالحليب المجفف النيدو وتطلع خفيفة وحلوة

لأننا نحبوها رقيقة وهشة وتطلع روووعه حتى ثاني يوم نسخنها في الميكرويف بس



بالنسبة للباشميل

طريقتي اني نضيف السائل تدريجياً حتى لو كان بارد ما تفرق

ونحركها بالمضرب اليدوي حتى نصب الكمية كلها بالشوي بالشوي

وبعدها نتبلها بالملح والفلفل الاسود وشوي بزار وقرفة لأن جوزة الطيب محرمة شرعاً

وبعدين نضيف لها الجبنة حتى تذوب فيها كويس وتطلع رووووعة




وان شاء الله لو ربي قدرني نزيد نشارككم ببعض الافكار والاسرار

[المروالوردي]

* لما تطيبي الكبدة ما تضيفيش الملح الا بعد ما تطفي عليها لان الملح يخلي الكبدة قاسيةو يابسة

* أي نوع سلطة أو الملفوف لازم تنقعيها في ماء وملح أو ماء وخل لمدة ساعة لضمان التخلص من أي طفيليات قد تكون عالقة بها

[بنت الاشراف]

السلام عليكم ورحمة الله وبركاته
كبدة الجمل خليها على النار عند طهيها 5دقائق فقط اى بعد غليانها لانها كلما بقت على النار مدة طويلة لاتنضج حتى لساعات
كبدة البقر لاتقطعيها إلا بعد وضعها فى الفريز لتتماسك ثم قطعيها لو قطعت قبل وضعها فى الفريز تكون متعبة معلومة مررى السكين على النار قبل التقطيع

[بسمة مصراتة]

السلام عليكم ورحمة الله وبركاته
انى عندى معلومة على صلصة البيتسا بعد متطيب انصب عليها القليل من حليب حكة حوالى ربع فنجان قهوه حتى يصبح لون الصلصه فاتحه وطعمتها مش عادية

[آمال]

بارك الله فيكن
أصبحت عندي موسوعة على اسرار المطبخية
بارك الله فيكم
وهذا مما يميز المطبخ الليبي
صدق المعلومات عند المنتسبين

[om_adnan]

عند طبخ العصيدة,عند تعصيدها تانى مرة,ضيفى شوية زيت حيساعدك فى التعصيد .

[أمة الله]

معلومات ماشاء الله
سر طبخي للحوت في الكوشة الحوت الكبير هو زيت الزيتون كمية كبيرة وثومة وملح وبصل مقرض جوانح زي البصلة لكن رقيقة تكون وحطيه في الطاجين وسلفريه بدون كمون حوت وشوفي الفرق في البنة والله العظيم ابن من لما ايكون فيه كمون حوت

وسر عصبان أم زوجي انها اتخلط الخضرة كلها مع المعلاق والشحم وتخلط الدباير بروحهم مع الزيت لكن بدون بهارات ويكون طعمته تحفة اتقول لما انحطوا البهارات اتريح طعم باقي الحاجات وحتى أنا بديت انطيب بلاه في العصبان

[آمال]

بارك الله فيكن على هذه الاسرار

شكرا لتفاعلكن

[الصابرة]

اليوم جبت معاي سر خطير ماينقالش غير لمنتدانا الغالي اه اسمعن معاي
صلصلة البيتزا انطيبها عادي بحسب المقدار اللي نبيه وناخذ طرف او طرفين جبنة شرائح وندوبهن بشوي ماء ماتستغربنش ادوب وقبل منطفي بدقيقتين نسكبه ونحرك ثم القليل من حليب المكثف {الحكة}ونحرك ونطفئ النار
تلقن طعم لصلصة البيتزا ماحصلش وصدقني لما انديرها مرات يعدي نصها وانا اندوق من كثرت طعمتها مش عادية
ها متقولوش لحد وبصراحة مانديرش في الصلصة هذي الا في رمضان او العزايم بيش يبدا فرق في الطعمة بين الشهر الكريم والايام العادية والعزومات لازم تفنني وتتميزي فيها
وكل مايدوق حاجاتي في شهر رمضان من العيلة يقولوي سبحان الله ديمة في طعمة اكلك في شهر رمضان عن الايام الاخرى
سامحوني طولت عليكم

[آمال]

ماشااااء الله عليك

يا صايرة

جبنة شرائح وحليب مكثف
أكيد جاري التطبيق

[آمال]

جزاكن الله خيرا
لقد استفدت كثيرا

[نسمه ليبيه]

رغوة النسكافيه لما تبي تحتفظى بيها ماتحطيها فى اسفل الثلاجه بل جمدوها وقولوا نسمه قالت

[آمال]

بارك الله فيك على هالمعلومة ...
ولكن كيف رغوة النسكافيه هل تقصد الرغوة فقط أو النسكافيه المضروب كله !!!

[نسمه ليبيه]

قصدى المضروب كله

[آمال]

بارك الله فيك ونفعع بك

[نسمه ليبيه]

امال معليش شن معنى المعلاق؟


وشن معنى الدبابير

[زوبة الطيوبة الحبوبة]

أختى نسمة ليبيا .. معنى كلمة المعلاق ( يعني قلب وكبدة ورئة الخروف ومايتبعها )
ومعنى كلمة الدباير بالليبي وهى تقصد هنا ( البهارات ) يعني زي الفلفل الاحمر والبزار وغيرها من بقية التوابل

[زوبة الطيوبة الحبوبة]

وأنا من أسراري أنه
لما تطيبي مرق الحوت لاتضعي كمون الحوت منذُ بداية الطبخ
ولكن قبل متطفي علي المرق بخمس دقائق حتى لايعطي مرارة للمرق
كذلك ماتحطيش كمية الثوم كلها في البداية او في النهاية بل قسميها نصفين النص الاول في البداية والباقي اثناء وضع كمون الحوت وشوفي النكهة ..
لما بتديري البصلة اعرفي ان البصل الاصفر اسرع في النضج من البصل الاحمر
لما بتديري حاجة حلوة زي الكيكة او البسبوسة اذهني الطاجين بالطحينة
لما تديري سلاطة مشوية وبعد شوي الفلفل غميه بكيس نايلو باش يسهل تقشيره
لما تديري بيتسا خلطي جبنة موزاريلا وشيدر ورشي عليهم رشة دقيق

أن شاء الله نكون أفادتكم..

[آمال]

بارك الله فيك ونفع بك أخيه

[آمال]

يرفع
لأني طامعة في المزيد من خبراتكم بارك الله فيكم