تهنئة لكل الليبين

[ام هداية]

الله اكبر الله اكبر ولله الحمد مبروك على يابلادى نبارك لكل الليبين على الانتخابات وربى يجعلها فاتحة خير على بلادنا ونهنى المنتدى وابلة زينب
والمشرفات والعضوات وكل المنتدى الله يحفظكم جميعا فى ليبيا الجديدة

http://im30.gulfup.com/2012-07-07/1341673085311.jpg (http://www.gulfup.com/show/X6lljhgykgyye)

http://im30.gulfup.com/2012-07-07/1341673085342.jpg (http://www.gulfup.com/show/X6lloyq1i2v9x)

[حبيبتهم]

ان شاء الله تعود الانتخابات بالخير على بلادنا

[نسمه ليبيه]

الـــــــ ف مبــــــــــــــــــــــــــــــــــــــروك علينا الحريه اللى كنا ندرسها ومانعرف معناها واليوم بس عرفنا معناها



يارب عوض ليبيا برئيس يخافك فينا ومن علينا بالامن والامان


امين

[بسمة مصراتة]

الله اكبر دم الشهداء لم يضيع هباء

[أمـ ساره]

مبارك لكل الليبين وان شاء الله ربي يهني البلاد والعباد

وهالانتخابات تكون فاتحة خير على كل الليبين

وربي ان شاء الله يرزقنا برئيس يخافه ويكون كفوء ويستحق مكانته

[بنت حواء]

مبارك لليبيا ........ مبارك لكل الليبيين
اللهم ولي علينا خيارنا
واجعل بلدنا آمنا مطمئنا وسائر بلاد المسلمين
آآآآآآآآآمين

[الصابرة]

يارب ان شاءالله تكون الانتخابات خير على بلادنا
وينعاد لها الاستقرار والامان
ونمارسوا الديمقراطية الحقيقية

[بنت الاشراف]

اللهم ولى علينا خيارنا من يحب الله والرسول ويتق الله فينا وأحفظ الإسلام وثبتنا على الحق وأحفظ ليبيا من كل سؤ

[بنت الاشراف]

اللهم ولى علينا خيارنا من يحب الله والرسول ويتق الله فينا وأحفظ الإسلام وثبتنا على الحق وأحفظ ليبيا من كل سؤ يارب العالمين

[om_adnan]

مبارك علي ليبيا،ربي يحفظ بلادنا ويحميها،،بنتي شرحتي لي علي الانتخابات حبيت انشاركم،لدينا٤ مجموعات اساسيه.
حزب العداله والبناء عنده ٧٣ مرشح برئاسه محمد صوان ،شعارهم الفرس.
حزب الوطن عنده ٥٩ مرشح، يدعمه الشيخ الصلابي وليس لديهم رئيس الذي سوف يحدد لاحقا ، من الاعضاء البارزين عبد الحكيم بالحاج.
حزب تحالف القوي الوطنيه عنده ٧٠ مرشح، برئاسه محمود جبريل،شعارهم نبات الصبار.
حزب الجبهه الوطنيه عندهم ٤٤ مرشح، برئاسه المقريف
حزب الاتحاد من اجل الوطن عنده ٦٠ مرشح، برئاسه السويحلي.
حزب الامه الوسط عنده ٤٣ مرشح، من الاعضاء البارزين سامي الساعدي.
حزب الوطن للتنميه والرعايه الاجتماعيه عنده ٥٠ مرشح.
بالنسبه لدور المراه اكثر في الاحزاب ولكن هناك٨٤ مراه،وهناك ٢٤١٧ رجل من المرشحين المستقلين

[sweet nona]

امييييييييييييييييييييين

يارب فرج على بلادنا واتكون هالانتخابات فاتحة خير علينا

وتزهر بلادنا بالخير

وهلا بام هداية

[luba]

واخيرا شفنا حبر انتخابات في اصابع الليبيين ان شاء الله يكونوا ناس يخافون الله ويحبون رسوله بقلب صافي وعقبال ماتفرج علي الشعب السوري اللهم حقق لهمالامن والامان اللهم زلزل الارض تحت بشار واعوانه واجعل كيدهم في نحرهم اللهم ا نصر جيش سوريا الحر وابعت لهم العدد والعدة من عندك ياالله وانتقم لهم في كل طفل وامرأة وشاب ومسنين انتقاما شديدا يكن عبرة عبر التاريخ ياالله ياالله سوريا تستغيث سوريا تنزف سوريا تموت يالله مد لهم العون عاجلا غير اجل اسفه علي الاطاله الدعاء لهم رجاااءا فقد كانوا يوما منهم من بكي ودعا معنا لوطننا وشهدائنا

[ترهونيه حره]

كل عام وكل الليبيين بالف خير
اليوم عيد وفرحه مانقدرنوصفها
ليبين صوابع زرقه....مافى فرقه....كسره فى فيدرالى برقه
عاشت ليبيا حره

[خدوج]

ان شاء الله فاتحة خير على ليبيا
وربى يمن علينا بالامان والاستقرار وراحة البال
لكل ليبيى وليبية
ولكل مسلمين العالم

[نسمه ليبيه]

فرحانات قريب نطيروا ..............اول انتخاب نديروا

[أم أيوب]

الله أكبر يا ليبين ويا ليبيات

الحمد لله اللي عشنا هاليوم السمح

اللي عاجبني الكف اللي حصلوه حشاكم جيف الفيدرالية والله قروهم تريس بنغازي

حيا الله الامن الوطني وحيا الله أبطال كتيبة درع ليبيا اللي وقفوهم عند حدهم

بابا يحكيلي لين دموعي نزلو بعد ما بدو المجرمين الفدراليين يهاجموا في المقرات الانتخابية

تعرفو الناس قعدو يديروا في حواجز بشرية قدام مقرات الانتخاب

عشان ماحد من هالهمج يخش لجوة ويدير فوضى

قالي حتى اللي ينتخب ما يروحش يجي يشد مكان حد تاني

ماشاء الله على رجالك يابلادي

موت موت مجلس برقة ...... صبعي في الحبارة الزرقة

على فكرة حتى ايوبي غطسوله صبعه في الحبر خخخخخخخخخخخخخ

[الساجدة لله]

ياصبعي ياااخطييييييير يامشارك في التغيير

ام ايوب فرحنا ببنغازي وتريس بنغازي ربي مايفرقنا يارب

ولايحرمنا من بعض

[om_adnan]

أخواتى اقول كلمة حق فى اهل الفيدرالية وهم لا يمتوا لى بصلة لا من قريب ولا من بعيد ,مع اختلافى معاهم ولكن هم مهما كانت افكارهم فهم لا ينادوا بالتقسيم ولو اردوا ذلك لكن سهل عليهم السنة الاولى من الثورة,انا لا اعرف اى شى عنهم الا انهم لا ينادوا بالتقسيم.

[luba]

سواء من تنادوهم جيف او طحالب فهم ابناء ليبيا ولن نكون متلهم في مناداتهم لنا بالجردان ونحن كلنا لي ليبياوماعندنا مانقولولهم الا ربي يهديكم يارب وينور بصيرتكم ويبعد عنكم وساوس الشيطان وفتنه

[أم أيوب]

أم عدنان يا غالية أنا قاعدة في مدينة البيضاء واهلي في بنغازي يعني قاعدة وسط تمركز الفدراليين

الاخوة الفدراليين مش بس دعاة تقسيم نبي نشرحلك حاجة عليهم

عارفة من هم اللي مشاركين في مجلس برقة ؟؟؟ هم اللي كانو سابقا يقولولهم القيادات الشعبية اللي كانو يهتفوا لمعمر في اجتماعاته وندواته

مالقوش لروحهم مكان في ليبيا الحرة الجديدة التموا حوالين الخائن احمد الزبير السنوسي وداروا ما يسمى مجلس برقة

في واحد منهم اسماه النمر من مدينة سلوق يوم الرتل هجم على بنغازي الليلة اللي قبلها القانقا وولد معمر الجيفة المعتصم كانوا متعشيين في مزرعته في سلوق

وقريبة ماما تشهد على هالشي دبحلهم خرفان عشان يلقو جهد يمسحو بنغازي والشرق الليبي تاني يوم

الناس اللي حتى العلم غيروه وخدو منه اللون الاسود بالنجمة والهلال فقط ي حين علم ليبيا الاحمر والاسود والاخضر

وهنا زوجي من عرب مصراته وسلفي مرشح روحه للمؤتمر الوطني تعرفي شني يديروا

يخشو لمركز الاقتراع ويقولو اي حد من عرب الغرب مانبوش نصوتوله ولو كان نبي تخيلي

هدوما مش بس دعاة تقسيم هدوم دعاة فتنة وكراهية لاهل الغرب بس ربي اقوى منهم بادن الله وحيجعل تدبيرهم تدميرهم

لوبا يا حبوبة يوم اللي وصفتهم بالجيف فهم يستحقو الوصف لانهم عاثوا فساد في بنغازي وقتلو شخصين واحد منهم طيار قتلوه وهو في طيارته في الجو والسبب انه ناقل صناديق اقتراع لمدينة الابيار

وقتلو شخص تاني في مدرسة غرناطة لانه فيها مركز اقتراع وضربو شيباني وضربو ابلة في مدرسة جنب حوش اهلي

يعني ماهم سوا معانا ولا مع شرفاء ليبيا

انتم رافضين الانتخابات قاطعوهم بطريقة سلمية بس بدون تعدي على الغير ولا قتل ولا تخريب

وهدا دليل واضح ما يقبل شك انهم من بقايا نظ ام المقبور لان هدا اسلوبهم اللي مانبيهش نقمعه بالحديد والنار

[om_adnan]

اختى أم أيوب للاسف حظك انك شفتى هذه المجموعة ولكن الناس اللى انا نعرفهم فى البيت الواحد تلقى من بنغازى وخوالهم من الشرق واعمامهم من الغرب ومشوا كلهم انتخبوا ما فيش حد ضايقهم,ان شاء الله نحسبه شهيد ولكن اختى تصحيح لمعلوماتك اللى مات لما ضربوا الطيارة المتجه للابيار هو مش الطيار وبالنسبة للزبير كان من يكون فانا لا اعرفه ولا اشهد فيه ولكن سجن ٣٠ سنة منهم ٩ سنوات انفرادى هل شخص عان مثل هذا الظلم يرضاه لغيره وهو كذلك متحصل على لقب اقدم سجين سياسى فى العالم,نحترم وجهة نظرك,الاختلاف فى الراى لا يفسد للود قضية.

[أم أيوب]

حبيبة أم عدنان فهمتيني غلط في قصة الانتخاب انا قلتلك ان سلفي رشح نفسه في المؤتمر الوطني افراد هنا في البيضاء وهو الاصل من مصراته

الناس هنا في البضاء مابوش يصوتوله مع انه دكتور جامعي وسمعته طيبة وله اصدقاء واجد والسبب ان دعاة الفدرالية غدوا مشاعر الحقد في قلوب الشراقة على عرب الغرب

وصديق خالي امس مر على مجموعة فدراليين كانوا نتجمعين عند جزيرة الجعب في بنغازي (( قريب من حوش اهلي ))

الشخص هدا من مصراته مقيم عمره كله في بنغازي وحاول يتفاهم معاهم ساله الفدرالي هدا قاله انت لمن في العرب قاله من عيلة فلان

تعرفي شني رد عليه وللأسف الفدرالي هدا شيباني قاله والله نطلعوكم من برقة يا غرابة يا يهود بدبشكم اللي لابسينه

ثانيا الزبير هدا لو كان فيه خير كان لقاه منه عمه الملك ادريس الله يرحمه حاول ينقلب عليه ونفاه الملك في العراق وتوسطوله اشخاص معينين

رد ليبيا ولما دار المقبور انقلابه المشؤوم انضمله وبعد سنة حاول يدير عليه انقلاب وحبسه ثلاثين سنة

الفكرة انه الزبير خاطره يقعد رئيس بالطول بالعرض

اللي مش عاجبني أكثر وأكثر انه هالاشخاص من عطاهم الصلاحية يحكو بلسان اهل برقة ومن نصبهم حكام عليها

يعني من وين جتهم الشرعية اللي شكلو بيها كيان سياسي زي هالكيان ويقولو من اللي انتخب المجلس الانتقالي ومن وين مستمد شرعيته؟؟؟

يعني ينهوا على الفعل وهما يديروا زيه

[om_adnan]

علينا بالدعاء ,المفروض الاشخاص اللى مثل سلفك ندعمهم,,ربى يوفقه لما فيه الخير,ان شاء الله ربى يقوى كل من يريد الخير لليبيا,ويكشف لنا اعدائنا ويرد كيدهم فى نحرهم .