علاقتك مع ام زوجك..

[دانية]

السلام عليكم ...كل رمضان وانتو بألف خير ...

حابة ندردشوا شوية مع بعضنا .. نستفيدوا من خبرات بعضنا ..

شن رايكم كل وحدة اتقولنا شن نوع العلاقة بينها وبين ام زوجها ؟؟؟

يعني مش بالتفاصيل ..عشن ماتقولنش قصقاصة لكن بشكل مختصر وواضح ..

خليني نبدا بنفسي .. علاقتي مع ام زوجي علاقة احترام او بمعنى اصح رسميات ممكن ايكون هذا الصح بس عن نفسي انا انحب العلاقة اتكون واضحة ويكسوها الحب والمعزة الحقيقية ..

وفي ناس اتأيد الرسميات .. يعني كل واحد في حاله ..ها شن رايكن ؟؟ هيا همتكن معانا :rolleyes:

[om_adnan]

وعليك السلام دانية....كل عام وانتى والامة الاسلامية بخير,أول ما قريت اسم الموضوع,قعدت نضحك,والله يادانية الموضوع هذا خطييييييير,انا أم زوجى الله يرحمها,ولكن نصيحة لكل وحدة ,طبعا انا حنتفلسف لانى مش فى نفس الوضع,اولا عامليها كيف ما انتى تحبى ان تعاملى,بعدين تبى شوية صبر وشويةعد م التركيز على كلامها,صدقونى لما تكون علاقتك ناجحة معها,حيكون زوجك مبسوط والا شنو رايكم.

[الصابرة]

عجبني الموضوع بس ياخسارة اني ام زوجي الله يرحمها من قبل مااتزوجه بهلبة
وكثيرا كنت اتمنى وجودها حتى لو كانت صعبة الله يرحمها

[luba]

الحمد لله علاقتي بيها كويسة وممتازة نعامل فيها زي مانحب الاخرين او نسوان خوتي يعاملوا امي

وزي ماقالت ام عدنان اني ماشية بيه معاها مش حتخسرن شي خليكن حنونات وطيبات

اي حد تعامليه بحنية وطيبه مش نقصد بس ام الزوج لا حتي السلفات والحماوات او الاقارب
معاملتك اللي بتعامليهم بيها يعاملوك بيها ويحبوك من خلالها

وعاد لو حصلتن في وحدة مش طبيعية فوتنها وماعاد تردوا عليها وعلي هدرزتها
بس الا ام الزوج حتي لو كانت قاسية مرات نوع من الغيرة انك خديتي منها ولدها
عاملوهم باحسان عشان يجيكن اليوم وتلقن من يعاملكن باحسان

طولت عارفة روحي سلام ليكن ولام زوجي ربي يعطيها الصحة وطول العمر
وان شاء الله تسامحنا لو قصرنا معاها في يوم

[om_adnan]

قولى لولو ..ام زوجك مشتركة معنا فى المنتدى...كلامك صح,ولكن فى زمن الان محتاجة شوية قوة مع احترام ضرورى,لان ممكن طيبتك تفهم ضعف .

[luba]

ههه ام عدنان ياريت مشتركة وتعرف فيه
واللي قلتي عليهن موجودات بس مانستعملش فيهم معاها

[مغتربة 7]

ماشاء الله عليك يالوبا ربي يكملك بعقلك حتى اني نفس رايك

للأسف عزوزتي متوفية الله يرحمها

لكن ديمة الوحدة تعامل ام الراجل زي ما تحب امها تعامل وتخاف الله فيها حتى لو كانت ام الراجل واعرة توسع بالها معها
وتحاول اتخش فيها وما تخليش العلاقة رسمية لانها زي امها وراح تربح فيها اجر وحب الزوج

تقبلي مروري

[دانية]

ماشاء الله عليكن بصدق عجبني ردودكن اللي فعلاً تدل على وعي ...

انا مع الرأي اللي تكون المعاملة رسميات واحترام مع ود وبالتالي مافيش واحد يمسك عليك حاجة ...

لكن ام الزوج حالة خاصة شوية يعني ديما الوحدة تتذكر انها في يوم من الايام حتكون في نفس الموقع..

وربك موجود والزمان دوار ... لكن الوعي الديني واضح من خلال ردودكن ..ربي يحفظكن ...

[نسمه ليبيه]

دانيه شفتى من حساسية الموضوع عدد المشاهدات 196 والردود 7 دليل ان الموضوع حساس ههههههههههه

وانا رايي معليش مانتكلمش فى السياسه:o

[أم أيوب]

السلام عليكم ورحمة الله

موضوع خطيييييييييييييير يا دانية ههههههههههههههههه

أم زوجي متوفية الله يرحمها من قبل ما يتزوجني بـ10 سنوات

بس الحاج عمي متزوج وحدة تانية ومش كبيرة بالعمر واجد عمرها توة 50 سنة وعندها منه صغار

الحق انها طيبة وخدومة ووقت نمرض والا نكون تعبانة يجيني أكلي لعندي وأنا نسكن معاهم في نفس الفيلا بس في الدور العلوي

أول ماجيتهم ماكنتش فاهمة طباعها كويس لانها خليط مسكينة مولودة ومتربية في مصراته وجت للبيضاء بعض العادات اختلفت عليها

وأنا متربية في بنغازي في اسرة متعلمة جامعية وعزوزتي يا ناري لا قرت ولا كتبت عمرها في حياتها

المهم قعدت فترة باش فهمت طبعها والحق انها انسانة عشرتها طيبة

ما يخلوش الأمر من بعض العيوب بس كل شخص فيه عيوبه حتى عن نفسي فيا عيوب

بس حسناتها وعملها الطيب معايا غطى على عيوبها البسيطة

الله يسامحها وكل الخير تلقاه في صغارها يارب

[ام امير]

السلام عليكم
كيف حالكم بنات اليوم
زى ماقالت امايوب الموضوع خطير شوية ويبى الى يرد يكون حدر وصادق انى ام زوج حية وطيبة لين خلاص وديمة الضحكة على وجهها هدا لايعنى عندها قرصة مرة مرة خفيـــفة
المهم انى نعامل فيها باحترام لاربعة حاجات اول حاجة ام راجلى حبيبى وتاج راسى تانى حاجة حنة صغارى وهى تحب صغارى بالدات الكبير لان هو الى خلاها حنة ثالث حاجة زى مانبى توعامل امى نعامل فى عزوزتى ورابع شئ الدنيا دوارة وانى عندى ولاد ماعنديش بنات نبى كناينى زى بنياتى و يعاملونى زى امهم

[موودة]

احم احم

عارفة حتقولولى شن قاعدة اديرى هنا ههههههه

بس بنحكى حتى انا على حماتى المستقبلية

طبعا من خلال الزيارات حسيت انها طيوبة واجد بكل وتريحتلها واجد

بعدين مهما طلعت كفاية انها ام الغالي اكيد حنحطها فوق راسي

[دانية]

ماشاء الله على نسمة السياسة مش اختصاصها:o

تسلمي ياأم ايوب كلامك صريح ووصادق

ام امير ردك زين العقل فعلاً العقل زينة

موودة ربي يحفظك الباين عليك عااقلة;)

وربي ايهني ايامكن ويسعدكن ديما

[slma]

السلام عليكم
اهم حاجة في علاقة الاحترام
انا متزوجة من 4 سنوات الحمد لله امورنا تمام
فكرة انك ماتخديش ولده منها في مرة وحدة وتنسيه امه، لا تخليه يسال عليه ويطل عليه كل يوم ويشوف كان تبي حاجه
وديه بحاجه حلو ولا حارة من ايدياتك
اكسبي قلبها بافعالك الزينة
يامداير يا لاقي علي قولتهم