المساعد الشخصي الرقمي

مشاهدة النسخة كاملة : [دردشة مطبخية ] يومياتك يا ليبية في الكوجينة



الصفحات : 1 [2]

نسمه ليبيه
08-06-2012, 06:31 AM
هههههههههههههه شن رايكن فى الصوره






http://www.lakii.com/vb/attachments/a-7/127004d1343825449-a-.jpg

موودة
08-06-2012, 12:14 PM
السلام عليكم ورحمة الله وبركاته
كيف حال كل الحلوات ستات البيوت الرائعات
وحدة وحدة يارب تكونو بخير ويصحة وعافية

امس كانت عندنا اختى وزوجها اول زيارة رسمية لنا بعد فرحها
والفطور كان

شربة
محشى براك فلفل كوسة
بطاطا امبطنة
رز بالخلطة
عصبان
بوريك اللحم
كيمياء
كرة البيض باللحم
طربوش الفلفل الحار
السلاطة والمصير

طبعا الأكل هذا كله ......................

ههههههه اكيد مش انا ..كله دراته ماما والعصبان خالتى

وانا والله كنت ماسكة الحوش كله خاطى حوسة المطبخ والمواعين مافيش الا انا

كنت عابية نصور بس والله نسيت



سلامى للجميع

نسمة

هههههه خطيرة الصورة

ام امير
08-06-2012, 01:39 PM
ههههههههههههههههه
فضيعة الصورة نسمة يعطيك الهنى
هكى اديرى انتى ههههههههههههه:d

أمـ ساره
08-06-2012, 03:30 PM
السلام عليكم حبوبات كيفكم اليوم وشنو اخباركن


نبدوا في ابراج المطبخ الليبي للحاضرات



أم أمير

الايام بسرعة ما تمشي وخيتي وما تستغربي شيء



خواطر حساسة

مرحبتين بيك وخيتي نورتينا وربي يعينك حبيبة ويسهل عليك وحم ورمضان هلبة

بس اهم شيء صحتك لو ما تقدري تصيمي افطري وعاودي بعد رمضان ان شاء الله براحتك




نسومة

ماشاء الله سفيرة دايمة ان شاء الله وعامرة بأهلها

والحمد لله عزومتك جت زي ما تحبي وكيف ماتبي وربي يسترك دنيا وآخرة ان شاء الله

وشفتها الصورة ورتهالي عوزوتي وقالت لي هذه تمشي معاي ههههههههههههههههههههه




موودة

ماشاء الله ربي يونسكم بوخيتكم ويتمم عليك حتى انتي بالخير يارب

عزومة مقومة

وسهفتوني وانتم تقولوا عصبان واللخ خاطري فيه لين خلاص



أما الغايبات فوينكم يا حلوات

وخاصة بارني ليها فترة مش مبينة ان شاء الله المانع خير يارب




شنو بديتوا في حلوات العيد أو مازال

نخمم نديرهم لكن خايفة يفسدوا قبل العيد نحس ما زال الوقت

ولو بندس في حافظات في الفريز قداش بندير

لهذا قلت خلي نلهى بالحوش هالفترة ونكمل حوسته

وبعدها نبدأ في الحلويات باذن الله



بالنسبة للفطور لو كتب ربي

سلك وفلفل وكوسا محشيات

طاجين التركي قداش لي بنديره وما سخر ربي

بيتزا أكيد

ولو سد الوقت ندير وردات البطاطا للمرحومة السمحة

الله يغفر لها ويجعل مثواها الجنة يارب



والحلو ممكن البانكوتا للصابرة


وسليمتكم

ام تغريد
08-06-2012, 03:44 PM
السلام عليكم كيفكم اخواتي في المطبخ كلكم باش ما ننسى حد

والله قلبي معاكم ونخش نتصفح والوقت مش سايعني في رمضان وزادها الرد من الوضع المتطور مرات نكتب ونكتب ونلقى روحي ناسية ونضلل وبننسخ نلقى روحي نسيت الضغط علي النسخ ويريح اللي كتبته كله فنقعد متابعة تهدريزكم والله ما شاء الله عليكم ومنورين زي ما عرفتكم عيلة وحدة ووخيات ربي يحفظكم ويعطيكم ربي صحيحتكم وينولكم كل ما تتمنو

وليكم مني سلام حار

أمـ ساره
08-06-2012, 11:56 PM
مساء الخيرات على بنات بلادي الراقدات

تي وينكم شوره غارقيين في الاسواق

ربي يهنيكم وين ما كنتوا حبوبات



اليوم فرحانة قريب نطير اني واخيراً كليت العصبان من مدة طويلة طويلة




فطوري اليوم كان

محشي ورق السلك والفلفل الحلو والكوسا

طاجين تركي حتى هو واخيراً درته وجي ايهبل

وبيتزا

وعزوزتي درات الشريبة

وجارتنا حسبتنا في العصبان ربي يبارك فيها ويعطيها ما تتمنى يارب


والحلو درتها بعد آذان العشاء جي في خاطري وتعرفوا الوحم شنو يدير

طبقت الهريسة المصرية للصابرة ونستنى فيها تبرد توا






أم تغريد

مرحبتين بيك حبيبة وياريت تنزرينا كل يوم

بالنسبة للرد اتعودنا خلاص ونضغطوا طول على الوضع المتطور
لك
ن حتى لو ما نسختي فيه حاجة اسمها استعادة المحتوى المحفوظ

نهاية مربع الكتابة تحت على اليمين

ديري كنترول وحرف v وترجع كتابتك من جديد



وان شاء الله تنحل المشكلة قريب

نسمه ليبيه
08-07-2012, 04:20 AM
السلام عليكم جميعا شن اخباركن


اليوم الحمد لله انتهيت من حاجات العيد بالكامل طبعا للصغار

مازلت انا

لكن راسي صداع من السوق والحمد لله انى تميتهم فى يوم واحد
وكل عام وانتوا بخير

om_adnan
08-07-2012, 04:22 AM
أهلين بيكم يابنات ,كلها كم يوم ويبدأ العد التنازلى للعيد,اعاده الله على الجميع بالخير.

احلى حاجه منك يا أم ساره القهوه,شوفتها بس تعدل الدماغ,الف مبروك نجاح خوك وان شاء الله يروح هو واهلك طيبين وفائزين,الحمد لله وسلم جارتكم اللى جبرت بخاطرك,كله الا البيبى.
حبيبتهم...فى انتظار بسبوسه جديده.
الصابره ...تقبل الله منك صالح الاعمال, والحق ما قصرتى نعم الاخت والقدوه.
ام امير...وين تورتة النجاح حتى وكان جاهزه عادى,قولى من وين وشنو نكهتها ,واذا عجبتك.
بنت حواء..اكيد عندك طريقه حاجه كده والا كده صحيه,والا تلقيت انتى وحد بعد الفطور,سلامتى ليك.
دانيه ...اللهم صلى وسلم عليه,ربى ايدوم صحبتنا الطيبه.
خواطر حساسه..مرحبتين بيك,كله بأجره ,ربى ايعنيك.
نسمه...ماشاءالله ,العزومه جت فيسع ,الحمد لله انسترتى وامورك مشت تمام,والله لولا الغساله ,شنو ايصير,لو على نبى اتنين مش وحده.
والا الصوره فظيييييييعه.
مووده...ربى ايكون فى عون امك فرحين ورا بعض,ان شاء الله حوشكم ديمه عامر بالافراح.
ام تغريد...لكى منى احلى سلام,ونحن عيله واحد بوجودك معانا.

دانية
08-07-2012, 02:30 PM
سلامات لكل الحلوات

امس فطوري شيش طاووق وشربة وكبدة وفروبي لوز بالتمر وعصبان دزوه لي عيت عمي
(اهل زوجي) ولدي وبنتي امس كانو صايمين 10 سنوات و 8 سنوات ..وهما اللي طلبو مني شيش طاووق .. ولقمة القاضي
اليوم انفكر اندير افخاذ الدجاج الكذابة ...

لما انخش الكوجينة ممكن تتغير الافكار.. سلامي للجميع.

وصلن على رسول الله..

anhr
08-07-2012, 08:50 PM
السلام عليكم,ومساء الخير,اشتقتلكم كلكم,مع ان اليومين الا فاتو راحات هههه,3ايام راجلى فاطر بره,وانى انسخن فى البايت,و الخزن فى الثلاجه ههه,المهم وخيتكم انحس فى روحى تعبانه وما عندى خلوق لشىء,سبحان الله,انحس عندى التهاب المسالك وراكبنى وسواس,ومحصلت موعد لاسبوع الجاى, دعواتكم,اليوم افطور ى كانولى مقلى بدجاج,خاطرى فيه,وراجلى يبى طاجين دجاج فى الكوشه وشربه وبتسا,ومرات
بندير طعميه, وحوايج العيد مازال الى اخر اسبوع , وسليمتكم

الصابرة
08-07-2012, 11:59 PM
السلام عليكم
كيف حالكم وحال الصيام وتعب المطبخ معاكم
ليا هلبة ماخشيتش على الدردشة والله قلت فضوة يدوب انخش انرد على المواضيع
ونزل كذا موضوع
والبركة في وخيتي مش مقصرات
انسلم عليكم نفر نفر للحاضر والغايب
اليوم فرحانة اهلي جوا فطروا عندي من زليتن
وتوا طلعوا للسوق يدهوروا
واني قاعدة مع راجلي ماعنداش شغل فقلت مانبيش نخليه بروحه
وفطورنا كان
بيتزا اقراص / الكرشة لزنوبة / ميني برجر / الشربة الليبية للوبا / طاجين بطاطا ودجاج
والحلو درت الجلجلانية لاختي ام هداية تهبل ماشاءالله عليها واعتمدتها ان شاءالله بنديرها من خطة حلويات العيد
والفرحة الثانية كان عندي حاسوب محمول شاشته عاطلة تبي تغيير نهائيا ليه سنة واليوم راجلي حاصلي شاشة وركبه وتوا قاعدة
مرتاحة ومخمخة ونتصفح منه
وشوي اخرى نبي انوض اندير مهلبية الارز باللوز عشان اهلي غالية عليهم
وفي نفس الوقت يحبوا ياكلوها في السحور
اطلت عليكم لكن اليوم رايقة واموري تمام الحمدلله
اه نسيت انقول ليكم يوم الجمعة عديت للسوق شريت بدلت عيدي وغيرت جو ادهورت بعد فترة طويلة
وليا عودة لو لقيت حد يرد عليا

ام امير
08-08-2012, 12:12 AM
الصابرة ربى يونسك بيهم صار اليوم عندك عيد ياريت انى اماليا يجو يفطرو عندى
ومبروك ماشريتى تبيديهم بالهنى ومبروك شاشة الاب توب
فطورى كان شربة حوت حااااااااشاكم وخبيزة مظفورة محشية بالتن وبيتزا قريصات وشيش طاووق وشوية مكرونة بشاميل طالبها ولدى الصغير حشيشته الماكلة الغليظة زى الشيابين

الصابرة
08-08-2012, 12:20 AM
ايه مش مغير عيد وان شاءالله اهلك يجو يفطروا عندك
او اهلك من النوعية ما يحبوش يفطروا غير في حوشهم
سلمك وخيتي ام امير وصحيحة علي ولدك
باهي ياكل ويطلب بالصحة على قلبه
كيف حالك انتي

الصابرة
08-08-2012, 01:13 AM
شكل البنات مشغولات في السوق يعني اليوم رايقة وفاضية وخاطري بنهدرز مالقيتش حد مش مشكلة حصل خير
ومارد عليا حد غير ام امير بارك الله فيها

ام امير
08-08-2012, 01:28 AM
تنشد عليك الصحة كيف حالك انتى ااااكيد باهى بلمة اهلك ..هو الباين مافى حد اليوم الا انى وانتى كلهم فى السوق الباين .. والله انى قاعدة ماخممت نشرى للاولاد ولدى الكبير والكبير الله قالى السنة هده بنشرى بروحى انى كبرت هو عمره 14 ومداير روحه راجل مع ان الفكرة مش راكبة دماغى ان يطلع بروحه لكن الواحد شنى بدير فى كساحة دماغ ولاد توة ماقعدلى الا امير واسلام امير عمره 12واسلام 7 سنين

الصابرة
08-08-2012, 01:38 AM
ايه شكله مافي حد غير اني وانتي
وربي يحفظلك اولادك باهي انتي عمره 14 سنة امنا خوتي واحد عمره 11 سنة والاخر 10 سنين
وحتى هم مسكرين راسهم يختاروا بروحهم لكن يطلعوا مع بابا وماما
اصلا اني مانخليهمش يمشوا بروحهم
المفروض تغصبي عليه شوي مرة بالضغط ومرة بالين طالما انك خايفة عليه

أمـ ساره
08-08-2012, 02:05 AM
مساء الخيرات على بنات بلادي السهرانات

اني جيت


ماشاء الله الصابرة منورتنا اليوم في الهدرزة

ربي يونسك بأهلك وخيتي ونيالك اني مستاحشة اماليا هلبة والله

ومبارك ما شريتي تبيدي بالهني ان شاء الله والعقبة لما تشري لصغارك يااااااااااااااااااااااااااااااااارب

عاجل غير آجل



ومرحبتين بأم أمير وربي يحفظلك وليداتك يارب ويفرحك بيهم



أني اليوم دارها فيا الضيء حاشاكم 3 ساعات اليوم وراء بعض

قبل يهربوا فيه في اليوم مرة او 2 مرتين ويومين وبعدها يومين لا

وهالايامات الاخيرة كل يوم يهرب حالة والله ربي يعننا

مش عارفة خير بلاهم علينا ما يصلحوه شنو ناقصهم مش عارفة

بجد بدي شيء يفدد وكثروه على ما وصوه




واليوم فطوري كان

كراوسان بالجبنة والنعناع وطبقت الكرشة لزوبة من الصابرة

وسلفي عجباته هلبة ودرت بنفس الحشوة كفتة مقلية

والحلو كان الهريسة للصابرة درتها البارح وجت اتهبل

حتى العيلة عجبتهم هلبة سلم ايدياتك صبورة

ومش عارفة امس واليوم فطوري متأخر المغرب يذن واني مش طافية النار

مع اني نخش تقريباً في نفس الوقت زي قبل

الصابرة
08-08-2012, 02:14 AM
امين ياوخيتي ام سارة
وان شاءالله ربي حتى انتي يونسك باهلك يارب قريبا ويجيبهم صيحين وطيبين يارب
والضي حتى احنا اول امس كانت عندي عزومة زتحشمت مع ضيوفي تقولي يلعبوا عليه قطعوه اربع مرات وامس مرتين
واليوم الحمدلله مرة

الصابرة
08-08-2012, 02:17 AM
وصحة فطورك ام سارة وصحيحة الهريسة والكرشة
ومعاملتك مع سلفك فكرتني بمعاملتي مع سلفاي
حتى هما ماشاءالله عليهم
ديمة يحبوا اي حاجة انديرها حار او حلو

أمـ ساره
08-08-2012, 02:25 AM
ان شاء الله يارب وخيتي الصابرة

ربي يرجعهم سالمين يارب



وبالنسبة لسلفي هذا الصغير وديمة يشجع فيا مسكين

يقولي شنو مدايرلتينا اليوم

ولما تعجبها حاجة يقولي حلوة ومش عادية

والحلو يحبه هلبة ويقولي تعرفي اديري حلويات ديمة كثري

وبصراحة اني ما نقدر نقصر معاه لأنه ماشاء الله عليه ديمة مدورني

ويحسبني في كل شيء وما ينقص عليا حاجة واي شيء نبيه يقولي حاضر

ربي يبارك فيه ويفتح عليه ويعطيه ما يتمنى يارب



وعجباته الكرشة هلبة حتى اسمها عجبه هههههه

شنو مازال اماليك سهرية في السوق ؟؟

الصابرة
08-08-2012, 02:29 AM
ان شاءالله ربي يحفظه ويحفظ سلفاي حتى اني ماشاءالله عليهم
ايه مازالو في السوق
وحتى راجلي اللي قعدت عشان خاطره جاه تليفون وطلع هذا وين جي

دانية
08-08-2012, 02:32 AM
سلامات لكل الحلوات .. اليوم درت فطوري بيتزا ومجبنة وشربة وكيميا

والحلو كان بسبوسة من عطر ليبيا بصراحة اتهبل خذيتها معاي لحوش عمي

وخواتي كانن غادي عجبتهن ..

الصابرة.... آنسوك هلك وان شاء الله ديما فرحانة ومبروك جديدك اتبيديه بالهنا

ام امير.... سلملك صغارك بجد الذكور متعبين حتي انا ولدي عمره 10 سنوات عنيد لكن ربي يخليهم

ام سارة.... شن اخبارك ديما يعجبني هداريزك ايهبلن ربي يحفظك..

بكرة قررت انا وزوجي نبدو في تكساي الصغار كل سنة وانتو طيبين وبصراحة خايفة من التعب مع الصغار ربي يخليهم..

أمـ ساره
08-08-2012, 02:33 AM
آمين يارب وخيتي الصابرة

وربي يونسك بأهلك وزوجك حبيبة

أمـ ساره
08-08-2012, 02:35 AM
أهلا بدانية الحلوة

ربي يحفظك حبيبة ويبارك فيك يارب على كلامك العسل


وربي يعينك على الطلعة غدوة

اني نقولك

صغار + زحمة + نو (حرارة) + الضيء يهرب


تمشي الطلعة 100% هههههههههههههههههههههههه



ربي يسهل عليك ان شاء الله وتجيك الطلعة خفيفة نظيفة

وتلقي كل شيء قدامك يارب

حبيبتهم
08-08-2012, 04:14 PM
السلام عليكم

مساء الخير

المنتدى هذي الايام امكسد
اكيد كلكن مشغولات ربي مايشغلنا الا في طاعته

ام امير ودانية و انهار
ربي يكون في عونكم وتحصلوا حاجات حلوة

الصابرة
انسوك اهلك
ومبروك عليك تصليح اللابتوب

ام سارة
ماشاء الله عليك
وصحتين فطوركم

ام عدنان
اهلا بك حبيبة
ساد منها البسبوسة مرة واحدة زوجي مايحبنيش انديرها ايقول اتسمن ههههه


وسلامي لكل البنات الحلوات الحاضرات والغايبات

أمـ ساره
08-08-2012, 05:23 PM
مساء الخيرات عالى الغاليات


أم عدنان

ربي يبارك فيك حبيبة على كلامك الطيب وصحيحتين القهوة يارب

ووينك حبيبة تغطسي فترة وتجي شوي وتمشي ليك وحشة والله




نسومة

ماشاء الله تهنيتي على حوايج الصغار في يوم سعدودك ويلبسوهم بالهني يارب

شنو بديري لحلويات العيد




انهار

حبيبة ديمة استغفري وتوكلي على ربي وادعي واقري المعوذتين وآية الكرسي وربي يبعد عنك الوسواس

راهو هو في حد ذاته مرض ردي بالك وخيتي



حبيبتهم

سلمها الحلوة وسلم كلامها الي زي العسل

وين ابداعاتك ما عاد وريتينا شيء جديد والا تجهزي للعيد توا





وباقي الغاليات وين

لوبا

مغتربة

بارني

موودة

لوتي

ساجدة

خواطر حساسة


وان شاء الله ما نسيت حد

ربي يطمنا عليكم حبوبات خشوا بس قولوا السلام واطلعوا


اليوم فطوري ان شاء الله

بديت في التجهيزات قبل العصر

عجنت البيتزا وبوريك الجبد لأم هداية

وبندير أصابع البطاطا المحشية لـ ابريكة ربي يطمنا عليها

ولو لقيت وقت بندير فلفل امبطن والحلو نفكر في كيكة باردة ان شاء الله

وسليمتكم

تجويد
08-09-2012, 12:17 AM
حبيبياتي التهنئة جت متاخرة لكن والله من اول رمضان واني متابعة معاكم ونقرا في ردودكم لكن في خلل في الشبكة عندنا وكنت نكتب في الردود وما توصلش واليوم بس نجحت المحاولة المهم رمضانكم مبر وك وان شاء الله ربي يتمم علينا بالخير والله نكتبلكم ودموعي على خدي وتمنيت انكون في ليبيا اليوم ونحضر يوم عشرين معاكم والاحتفال بالتحرير وانتقال السلظة للمؤتمر الوطني خلي نحسو بالسلطة الفعلية ونجاح اختيارنا يارب هنينا وان شاء الله ربي يعوضنا خير ويهدي الناس اللي قاعدة متشبته بالماضي .
خلينا في دردشتنا كيف حالكم جميعا دون ذكر الاسماء واللي فاضية تخش نهدرزو شويه ههههههههه

الصابرة
08-09-2012, 01:42 AM
مشكورات وخياتي دانية وام سارة وحبيبتهم
واهلين بيك وخيتي تجويد
والسلام على كل الغايبات وربي يحفظكن كلكن ويخيليكن يارب
الغايبات والحاضرات

luba
08-09-2012, 04:44 AM
وعليكم السلام هاني جيت

كيف حالكن كلكن نفرة نفرة - زولة زوله - بنبيه ومريه مريه

مبروك علي اللي شري للعيد تبيدوهم بالهني وكل عام وانتم بخير

انهار شكلك مغتربه والله نفس الحاله من ايام كنت منكدة علي روحي ديمه هكي حالي وين تقرب العيد

بنتمحمط بنطير وندكر في ايام اللمات والطلعات والتعييدات خليني ساكته وخلاص ربي يعينا ويفتح علينا

ويصبرنا وربي يشرح صدرك ويفك ضيقنا وضيقك

الصابرة بالصحة اللاب وتبيديه بالهني والصحه ومرحب باهللك ومنورين طرابلس اسمعي كبري الخط عندك ديريه 5
خيره رقيق هلبه

ام امير مازال فيها اعناد اني من عمره 4 وياما يسكر في راسه انقول تو يكبر وحاله يتعدل شنو قصدكم
ربي يخليلك الصغار وتشوفيهم عرسان حي مايسمعني عمر 14 الا يزعل تقول الصغار وانا راااجل

دانيه ان شاء الله لباس التقوي والصحه عليك وعليهم ربي يحفظهم ليك

كيف الحال حبيبتهم شن الجو اراجوا في حلويات العيد عليهم مسابقة ان شاء الله
نزليهم مانيش مدايرة لين نشوفك شنو بديري ديري بكري بيش نطبقوا كان مشت
مع مزاج العيله لانه ماعندي حد ياكلهم غيري اني واللي في البيت

ام ساره كيف حالك وحال البنوتات وكيف حال ولي العهد ديري بالك عليه
ربي يقومك بالسلامه وبتقولي من قالك ولي عهد انقولك انفاولوا الفال وعلي الله الكمال

مقررة للحلويا ان شاء الله كان ماتغيرتش الخطه

كعك التمر لي زينب

بسكويت الانكشير وهاده قداش ليا خاطري فيه اول واحد بنبدي فيه واكيد بنتمه قبل العيد نحبببببه

اقماع الصابرة وممكن نغير حشوتها ا ندير حشوتين منها

قرينات لي زينب

وان شاء الله مانغير الخطة لانه مزاجي مش رايق بكل اني العيد والجمعه والسبت والاحد

والاتنين ووووالمولد والعاشوراء ووووو كلها ايام كيف بعض لايوجد اختلاف وان شاء الله نحاول

نغير في الجو حتي بروحي يارب يامعين

وسلامي للكل الحاضر والغايب

anhr
08-09-2012, 06:05 AM
السلام عليكم,يامورات,صابره انسوك عويلتك,ان شاء الله ديما ملتمين على الخير,ام ساره,شكرا حبيبتى,والله حتى هالغربه زايده الطين بله,الحمد لله,لوبا شكله الحال من بعضه,والله مرات نشرى اخر يوم,ولبنيتى منحصل لين ايطيحو رجليه,تو امنزلين ملابس العوده للمدارس يعنى اكتره كاجول وافطور اليوم شربه خضار وشاورماومكرونه بصله بلقديد لراجلى,وعندى بيتسا من امس,قررت انقصد الاكل حاجتين وياسر,حاشاكم تاكله فيه غير الكناسه ربى ايسامحنى,وباقى الحبوبات ان شاء الله اموركم تمام,وسلامى

الساجدة لله
08-09-2012, 02:34 PM
السلام عليكم

وقتي مضغوووووط بشكل نحس في روحي بيصيرلي انهيار عصبي من قلة النوم ههههههه

نرقب منع 8 او 7.30 في الصبح وانا نهدرز انا والمحروس زوزي

ونفيق متاخرة نحس في روحي تعبااانة بصدق

الحاجة الوحيدة المفرحتني هي اني ختمت القران مرتين

واليوم بااذن الله نبدا في التالتة .

الحمدلله الحاجة هده فرحتني هلبه

بالنسبة للحلويات واخيييييييرا سجودة بدير حلويات

وان شاء يعجبوكم

بصراحة رمضان الحاجة الوحيدة درتها كانت التراميسو

بصدق مادرتش غيرها اللي عندي مش وكالين حلو

ليا 3 ايام الكهرباء تنقطع عليا وقت التطييب من العصر للمغرب

فنفطر على الشربة بالشوفان ولبن وتمر سلاطة عادية
ومعهم بيتزا للامانة بعد مايجي المغرب نطيبها ونلحق نحطها

وندير في محشي سلك ومحشي فلفل ,

ياريت كل وحدة تقولنا شن بدير حلويات خلي نتشاورو مدابيا اليومين اهما

لاني ناوية بااذن لله ندير حلويات السنة هده بما انها اول عيد الشفشوفة ميت

وتوا بنقوللكم فطورنا اليوم شن بيكون

طاجين البرجر خاطري فيه على الاخـــــــر
شربة بالشوفان

سلاطة ومش عارفة شنو تاني؟

موودة
08-09-2012, 02:38 PM
ام سارة

ام تغريد

نسمة ليبية

ام عدنان

بارنى

لوتى

لوبا

بنت حواء

ام امير

دانية

حبيبتهم

الصابرة

انهار

تجويد


كيف حالكن كلكن وحشتونى
انا ندخل لازم ع الصفحة الحلوة هذه مع الصحبة الحلوة بس مرات مافيش وقت نرد
وانا ديما معاكن ومشغولة بأخباركن ومبارك الدبش الجديد والعقبة للى مازال وربي يخليلكن اولادكن وهلكن
واللى فى الغربة ربي يردها بلادها قريب وتأنس هلها وناسها

انا شريت حاجات جديدة ونبى رأيكن فيه وحنحطها فى موضوع استعدادات العروس

تحياتى

موودة
08-09-2012, 02:43 PM
الساجدة لله

ربي يعطيك الصحة والعافية ويسلم ايديك

وماشاء الله تبارك الله عليك وفى حفظه ورعايته

بالنسبة لــ فطورك اليوم ما اظنى حنساعدك واجد
بس ديرى اى حاجة فيها بطاطا:d

حبيبتهم
08-09-2012, 04:15 PM
السلام عليكم

كيف حالكن اليوم جميعا

ام سارة

سلمك يا غالية
والله لتوا مافكرتش في حلويات العيد وماعرفتش شنو بندير

تجويد
اهلا بك وان شاء الله تقدري تهدرزي معانا مرة ثانية


الصابرة
اهلا بك وشنو تفكري بتديري للعيد


لوبا
هههه بتنقلي مني
انتي اهو امدايرة خطة حلوة
اني مازال حايرة
ونفكر في حبيبتي غريبة الحلقوم ;)
بجد والله ماعرفتش شنو بندير


انهار
ربي يسهل عليك الغربة


الساجدة
وعليكم السلام
ردي بالك من قلة النوم وربي يكون في عونك من الضي اللي ديمة يقطعوا فيه
وان شاء الله تاكلوهن بالهني الحلويات
صدقتي والله السنة العيد فيه الزايد مافيش شفشوفة :cool:


مودة اهلا بك حبيبة
شنو ماعاد في تطبيقات جديدة تفرحينا بيها


وسلامي لكل البنات

موودة
08-09-2012, 04:30 PM
حبيبتهم

عليكم السلام ياغالية كيف حالك

بالنسبة للمطيخ ماتخافوش عليا ندخل مع ماما ونساعد فيها صح مش تطييب 100% لكن نكتب معاها

واول مانحصل فرصة حنزل تطبيق من هالمنتدى الحلو حتى لو بعد رمضان

توة زايطة فالسووووق هههههههه

barney
08-09-2012, 05:49 PM
السلام عليكم ورحمة الله وبركاته
كيف حالكن وسلم احوالكن ويتقبل ربي صيامكن وقيامكن ودعاءكن يارب العالمين

اني جيت نوارة البيت :d

سلمهن ياربي امنورات الصفحه اخسارة انحرمت من اللمه والسبب كمبيوتري عطل امس بس جابوهللي من الصلاح والله ابنهبل وعقلي قداكن وامس ماكلمتكنش لاني روحت تالي جارتي امروحه لليبيا دايرة لمت وداع انشاء الله ع خير وانشاء الله فيها خيرة وتوا خلوني ابنبدأ التحيه بالاسماء وانشاء الله ماننساش حد يعتب عليا:-

لوتي عظم الله اجركم في صاحبتك وانشاء الله مثواه الجنه اكثري من الدعاء ليها خطرتي عليا صاحبتي الله يرحمها ويرحم جميع موتى
المسلمين.

ام امير انشاء الله الف مبروك ع اوليدك وانشاء الله تفرحي بيه واتشوفيه في اعلى المراتب في الدنيا والاخرة يارب

ام عدنان الله لا اتغيبك يانوارة لمتنا سلمها ياربي اول وحدة فقدتني وحست بغيابي انشاء الله ربي يحفظلك اصغارك وايهنيك بيهم

ام سارة اكتشفت انك اكثر وحده مشار كات في المنتدى اكثر حتى من زينب الله يذكرها بالخير صاحبت الموقع سلمها يارب انشاء الله ديمة
حاضرة وانشاء الله مبروك ع اوخيك النجاح وعليه وعلي اهلك العمرة وانشاء الله ربي يكتبلنا اجمعين زيارة بيته الحرام يارب ومبروك
جديدك وانشاء الله بالهني

الصابرة انسوك اهلك واكيد بتقولي مقدمك لكن الله غالب هذا وين لحقت ودرتها البكلاوة مرتين طلعت اتهبل وجاراتي اخدوا طريقتها مني
وطبقوها وعجبتهم واجد حتى اهلي في ليبيا عطيتهم الطريقه وداروها حلوة ومالحه وعجبتهم ربي ايسلم ايدياتك ومبرك اللاب تب
وانشاء الله اتبيديه بالهني

دانيه سلمها اللي فقدتني وانشاء الله ديمه ملتمين وربي يتقبل منك في هالشهر الكريم

نسمة ليبيا واخيرا درتي عزومتك انشاء الله ديمه عامرة اديارك يارب انت وكل الموجودات اتهبل الصورة اللي منزلتيها ضحكت عليها واجد

مغتربه وحبيبتهم وانهار وموده والساجدة وتجويد وبنت حواء وخواطر حساسه و ام تغريد و لوبا وام ايوب انشاء الله ماننسى حد انسلم عليكن ويحفظكن ربي ويتقبل منكن ويعطيكن لين يرضيكن قولن آميـــــــــــــن

وخطرها يالوبا انهار جارتك حتى هيا في كندا شوفن ارواحكن بالك تطلعن جارات

يامحوني طولت لكن مليانه نبي انفرغ بس وليا عودة بعدين بعد الفطور اللي مازال ما خططت شن بنديره

وسلامتكن

luba
08-09-2012, 06:06 PM
حبيبتهم ديري كيف الخطة متاعي والا موضتهم طايحه
ماتقدريش اديريهم ههههه

انهار حتي اني توه نبضع لي ولدي في ملابس المدرسه وطالبين مني قائمه
وشي عرفناه وشي ماعرفناه والعيد عادي حتي اخر يوم مافيش من ايداعك فيا هني لاني شبه بروحي هههه

الساجده ربي يعينك ويساعدك ومبروك عليك الختمه ربي يتقبل منا ومنكم

واهلين بي بارني منورة الهدرزة ووين التطبيقات تفوتي فيهم علينا قولي نساعدوك في التنزيل

الصابرة ممكن اندير زي بقلاوتك الحلوة في العيد غير اني بلفهم لف ربي مايحرمنا منك ويعطيك حتي يرضيك

مودة يا عروسة ماتكتري ملابس من توه هادوا صيف وعرسك خاش علي شتي وبعدين شي تلبسيه وشي لا
ومرات تزيدي عليه وزن او ............... ههههه ماتكتري اسألي مجرب ولا تسالي طبيب
ربي يهنيك يارب ونفرحوا بيك

ام ساره ووووين اليوم مش متعودين الغياب اكيد توه في المطبخ ونبوا خطة الحلوات متاعك

موودة
08-09-2012, 06:18 PM
بارنى

الحمدالله ع سلامة الكومبيوتر واهلا بيك منورة بحسك

لوبا

عزيزتى كيف حالك
مش قاعدة فى سوق الدبش قاعدة فى سوق المواعين هههههههه
الدبش ان شاء الله حنشريه بعد العيد حيكون شوى ارخص واقل زحمة ان شاء الله
وشكرا ع النصائح بس الصراحة ماعتديش روح مع الدبش ههههه

barney
08-09-2012, 08:56 PM
السلام عليكن ورحمة الله وبركاته
مرحبتين بلوبا والله قعمزت نبي انزل من الكاميرا شوي طلعن الصور اكبار حاولت فيهن ماعرفتش انصغرهن ع اساس راجلي بيساعدني بعدين عطل الكمبيوتر

اهلين مودة ما اتكتريش دبش شهرين وتسمني عليه وخاصة كان حملتي بكري يقعد امعلق في الدولاب وهو جديد كيف حالاتي خودي شويا وفي حوش راجلك خودي ع مقاسك كل فترة

الساجدة لله
08-09-2012, 09:11 PM
صحة فطوركم وخياتي

اليوم كان فطورنا ( مع العيلة )

طاجين البرجر + كفتة دجاج + سلاطة عادية بيتزا + محشي فلفل وباذنجان

وبلاهي عليكم قولونا افكاركم لحلويات العيد ضروري هاليومين بلوسع على الاقل نطلعو ناخدو المكونات بالراحة خير من زحمة اليومين الاخيرين في رمضان

ورح نرجعلكم بعد12 انزل الكفتة والفروبي والبرجر

بنقوللكم ماتنسوش دعواتكم لسمحة بالرحمة والمغفرة

الصابرة
08-09-2012, 09:35 PM
السلام عليكم
كيف حالكم وحدة وحدة وحدة

الله يبارك فيكن ويخليكن لي يارب
وان شاءالله اللي شرت تبيدهم بالهني هيا وصغارها
ومشكورات وخياتي على الدعاء عشان البقلاوة
وبارني مازالت انراجي في الصور والحمدلله ربي سترك هذه المرة
وين وخيتي ام عدنان فقدتها والله وام سارة مهناش اليوم
بلكي بدت في الحلويات بتاعت العيد
خطتي للحلويات ليا عودة انرد على المواضيع

دانية
08-10-2012, 03:22 AM
مرحبتين بكل المتابعات ..

امس كنت مشغولة مع العيال في السوق وبصراحة جيت متصدعة ورجلي ينقحو علي ...

مازال حاشاكم الكنادر والمساسيك :D اكيدة تستغربوا بس انا المساسيك عندي متعبات شريتهن زي الدبش العادي

والسوق زاحم.. ام زوجي قالتلي اطلعو في النهار اخف زحمة بس الحمو قطيعة ومن بيديرلي الفطور :(

اليوم ماطلعتش للسوق خذيتها راحات ممكن بكرة بأذن الله ..

والدردشة امعاكن اتهبل وياريت اتكون مستمرة حتى بعد رمضان .. وانتن طيبات .. لأنها بجديات ممتعة :rolleyes:

الصابرة
08-10-2012, 03:27 AM
اهلين وخيتي
وبالصحة ماشريتي يارب
وبالنسبة الطلعة في النهار عادي تحملي شوي عشان تفتكي من الزحمة
واما علي فطورك ياحبيبة ديري حاجاتك من الليل قبل ماترقدي
وماتكثريش يعني حاجتين ساد
لان اكيد راجلك عارفك حايسة في السوق

حبيبتهم
08-10-2012, 03:50 AM
السلام عليكم

كيف حالكن يا بنات

اليوم ام سارة غايبة مش من عوايدها ان شاء الله خير


الصابرة
شنو اخبارك وشنو صار في حلويات العيد شنو فكرتي بالك انقلوا منك


دانية
ربي يكون في عونك ومبارك عليكم وتبيدوه بالهني

بنسألك شنو المساسيك ؟؟؟


الساجدة
صحة فطوركم
نراجوا في جديدك

بارني
شوفي المواضيع في المنتدى تلقى مواضيع كيف تصغري الصور


مودة
ربي يهنيك ويسعدك
وان شاء الله تاخدي كل اللي خاطرك فيه

لوبا
هههه ضحكتين شنو موضتهم طايحة
اني مادخليش في موضتهن المهم بنتهن





وسلامي لكل البنات الموجودات والغايبات

دانية
08-10-2012, 04:18 AM
تسلمي اختي الصابرة وهي فعلاً فكرة الفطور انديره من الليل

حبيبتهم المساسيك مش عارفة انتم شن اتقولو عليهن بس انوصفهن لك :confused:
اللي هن تربطي بيهن شعر البنات الصغار

يعني التوكات بالمصري .. :o يكونن من الاستك ان شاء الله الوصف واضح عزيزتي ;)

barney
08-10-2012, 05:14 AM
السلام عليكم ورحمة الله وبركاته

يتقبل الله صيامكن وقيامكن ودعاءكن انشاء الله يارب العالمين


ام ساررررررررررررررررررررررررررررره و ام عدنااااااااااااااااااااااااااااااااان :eek: وينكن مستاحشاتكن وين امغيبات انشاء الله المانع خير يارب

الصابرة سلمك نشاده وانشاء الله ماتفقدي غالي يارب

حبيبتهم المساسيك هما التوكات اللي ايشدوا بيهن الشعر واحني يادانيه انقولولهن توكات او مساسيك كله ماشي وانشاء الله اندور في المنتدى كيف انصغر الصور وبارك الله فيك

دانيه انشاء الله اتبيدوا بالهني ومبروك ماشريتوا اني اول عيد ليا مع زوجي شريت , ومنه توا ليا 4 سنوات متزوجه ماشريت في عيد لان العيد في الغربه مافيشي بنه وسامط بديت انفوت في موضوع الدبش والجو هذا لكن
نشري لولدي اعليوة وبنتي لجين ما انديروش في لمات في العيد ونادر مانتلاقوا العرب في الجامع مرات ع صلاة العيد نمشوا النسوان وانعيدوا ع بعض وانروحوا يعني الموضوع كله ممكن نص ساعه بعد الصلاة وكل واحد
ع حوشه , وفكرة الصابرة للفطور مريحه جدا لكن المشكله في الحمو مافيشي حل ربي ايعاون انشاء الله

اليوم فطوري لازانيا فقط خاطري فيها وزوجي ما ايحبهاش لان زوجي فاطر برة اليوم درتها ومعاها مشروب بيبسي مع اني محرماته المشروب ع روحي ليا 6 سنوات لكن اشتهيته

وسلامتكن

نسمه ليبيه
08-10-2012, 05:31 AM
السلام عليكم







كيف حالكن

شدن الهمه فى العشره الاواخر
وماتنسنيش من الدعاء
وكل عام وانتن بخير

موودة
08-10-2012, 12:52 PM
احلى سلام على احلى سيدات

يارب الجميع بخير نسلم عليكن بالوحدة

وسلام خاص لأم سارة وام عدنان وام امير ونشوفوكن قريب ان شاء الله

حبيبتهم
08-10-2012, 03:00 PM
لسلام عليكم

كيف حالكن اليوم

دانية
فهمت ققصدك التوكات احني نقولوا توكات


بارني
شكرا لك عالشرح


نسمة ليبية
وين هالغيبة
وان شاء الله ربي يكتبنا من عتقاء رمضان


مودة
كيف حالك الييوم


ام سارة وام عدنان
ان شاء الله خير هالغيبة

ام ميرال
08-10-2012, 03:22 PM
السلام عليكم
كيف حالكم بنات انا عضوة جديدة طازة اليوم طحت في المنتدى بالصدفه
متغربه ومكسدة انشاء الله مع الايام نتعرف عليكم بالوحدة وتكون معرفة خير
رمضان كريم علينا اجمعين وانشاء الله من المقبولين يارب العالمين
اغتنموا العشرة الذهبيات يا بنات وما تلهيكم الدنيا عن طاعته

ام ميرال
08-10-2012, 04:11 PM
بنات معليش عندي سؤالين
اولا كيف نقدر نشارك في السفر الرمضانيه؟؟؟؟
وثانيا من وين تحملو في الصور يعني فيه مركز تحميل خاص بالمنتدي والا تحملو من مواقع ثانيه والا ينزلن طول والا كيف؟؟؟

om_adnan
08-10-2012, 11:16 PM
أهلين أوخياتى......أستاحشتكم هلببببببببه,وحنستاحشوا اتهيدرزات رمضان,نعاد على الجميع بالخير,
بالنسبه لحلويات العيد مازال ما فكرت ولكن فى راسى توا القرينات والكليوه متاع لوبا,وبنتى تحب اتدير حلويات غربيه ,سريعه وسهله,ممكن اتدير ٤ او ٥ اصناف,ربى يحفظها ويفتحها عليها,بالنسبه للمطبخ لا يخلو الامر ,بصراحه انحب انطيب فى رمضان,وبناتى لانهن هن اينظفن المطبخ,ديما ايقولوا حوستك واجده ,وفى الايام الاخيره يبوا شربه والطبق الاساسى,وحاجتين فقط,بالنسبه لشراء حاجات العيد,فى الغربه اقل ضغط,فى اختيارات اكثر,وصغارى توا كبروا يشروا بروحهم,ومرات يشروا حتى لى,شنو نحكيلكم تانى,وان شاء الله ربى يفتحها على ليبيا من أوسع أبوابه فى هذا الشهر الكريم.

توا هيا مع الابراج الدردشيه.

دانيه....ام ساره عطاتك انذار قبل ما تبدى تشرى ولكن معاه فال حلو ,ان شاء الله امورك مشت تمام,ديمه الشرا ء للبنات أصعب لان حاجاتهم اكثر,بس الفرحه على وجهم اتنسيك كل التعب -مع ان صغار توا مش ساهلين والنكته عارفين بالزبط شنو يبوا-,محلاهم مساسيك الصغار ان شاء الله اتحصلى ما تبى.

انهار طمنينا عليك واشربى مياه واجد واجد,وان شاء ربى يؤنسك فى غربتك بناس طيبه,خلينا انشوف مشاركاتك,عجبتك صورة لقمة القاضى بطريقتك.

الصابره...يا أحن أخت,ديما تشاركى بحاجه أحلى من التانيه,ان شاء الله دادى إنبسطت من الزياره وشرت اللى خاطرها فيه,ربى يحفظكم لبعض,ون شاء الله اتبيدها بالهناء لبسة العيد.

ام امير...احمد سنه مناسب يقرر دبشه بروحه,نحن الامهات ديما هكى مشغولات على صغارنا,الاهم من ذلك الطريقه كيف ,يعنى فيه عدة ميزات.تعلمه المسئوليه والاعتماد على النفس,والاهم التعلم من الاخطاء,تخليه يشعر بقمية القرش,لان الصغار ما يحسبوش طلباتهم تكلف,بس كونى ذكيه عطيه مبلغ معقول,بحيث ما تزعليش لو شراء حاجه ما تعجبكش,ديما شجعيه وتأكدى مستحيل يكون ذوقكم واحد بس الاهم انه مبسوط ,تفلسفت هلبه,ساد.

ام ساره...امتى العويله ايروحوا من العمره,بعد العيد؟,سمعت انه فى حاجه اتشوفيها على التلفيزون ,لما الضغط يرقى على المولد,بحيث الناس تخفف الاستهلاك وما يطفش الضى؟صح,بالنسبه للفطور ,كل يوم يقدم وحتى انتى قدمى دخولك للمطبخ ,شنو قررتى بالنسبه للحلويات .

حبيبتهم...الحق بسبوسه خطيره,شكرا على السؤال,والواحد تعب ولكن والله حلو وعزيز على القلب,نحس فى ليبيا لانهم يحتاجوا كميات كبيره ,وماشاء الاختيارات هلبه ومضمونه ,الغالب يوصى على الحلويات.

ياريت اتنزلوا موضوع على التوصيات ,بيش الكل يستفيد.
تجويد ...مرحبتين بيك,وربى يتقبل دعائك,كلنا قلوبنا معهم,فرحانه اول مؤتمر فى رمضان,اهو الشاطين محبوسه والناس مكثفه الدعاء,شنو أخبار العيد عندكم.

لوبا...اختك الكبيره,اتقولك أحلى عيد مع راجلك وعيالك وانتى اللى تبى تفرحيهم,هى نشطى روحك,توا مع الكمبيوتر كأنك معهم ,مرات ما تلقى ما تحكى وتشوفى كل شى ,شنو صار فى عزومتك ,حلوياتك اختيار موفق,ماتنسيش اتزينى الحوش للصغار,ممكن اتديرها لهم مفأجاه لما يرقدوا ويصبح عيد حيفرحوا بيها.

الساجده....ونعم الصديقه انتى,الله يرحم السمحه ويغفر لها,هل كان لديها اطفال,قصتها جدا حزينه,الى الان محتاجين التوعيه بالنسبه للتعامل مع الاشياء الخطيره ,فى ليبيا ربى يحفظها ماشين بالبركه وما فيش احسن منها,بالنسبه للحلويات الاساس فكرى فى حاجه معسله وحاجه بالشكولاطه وحاجه بالسكر الناعم والباقى كيف ما تحبى.

موودة ..اهلين بعروستنا,استعدادات على قدم وساق,ربى يكمل على خير.

بارنى...الله ايخليك على السؤال,حتى انا مليانه زيك هههه,الغربه تبى تهبلنا,وزيك كنت مدمنة ببسيى بالذات وبطلت ليا فتره,ردى بالك تعاودى ليه.

نسمه...بارك الله فيك على التذكير,كل عام وانتى بخير.

ام ميرال...مرحبتين بيك فى بيتك التانى,تقدرى تخشى على الاطباق الرئيسه الليبيةوتضغطى على اضافة موضوع تلقيها فوق وتكتبى العنوان مشاركه.وفى قسم الدعم الفنى تلقى شرح الصور , لفت نظرى اسم ميرال ,اسم حلو وهو اسم تركى للغزال الصغير,صح؟.

الى لقاء قريب ...ان شاء الله,ربى ايدوم صحبتنا الطيبه.
أحبكم فى الله.

ام امير
08-11-2012, 12:18 AM
السلام عليكم

كيف حالكم يابنات نفرة نفرة زولة زولة كيف ماقلت لوبا والله ضحكت وانى نقرا فيها دكرتنى بهضاكة الراجل الله لا ترحمه:p

انهار .. لوبا .. تجويد .. مغتربة 7 ..بارنى ربى يعينكم على الغربة ويرجعكم سالمين لليبيا وتعوضو ايام الغربة

الساجدة لله ماشاااااااااااء الله ختمتين للقران ربى يفتح عليك ان شاء الله

بارنى صحيتى حبيبة ان شاء الله يارب نشوفهم فى اعلى المراتب ومعاها حفظ كتاب الله

موودة كيف حالك نستنو تورينا شنى خديتى من جديد

ام ميرال اهلا بيك انستينا وان شاء الله نكونو من المقبولين

تجويد مرحبتين حبيبة

ام ساااااااااارة وينك مغطسة ان شاء الله لابس

واخيرا ام عدنان والله كلامك كله صح هو المفروض مرة مرة ياخد على دوقه باش يتعلم يعتمد على نفسه ويثق فى دوقه لكن مشكلة مش انى الى مانبيشى يطلع ويختار بروحه بوه خايف عليه وحتى لما طلع ماهناشى بالطلعة وهو كل شوية تليفون انت وين وامتى بتروح وهى وقت يعنى مانقولكش المهم شرى والدوق قريب من الى نبوه حنى

اليوم فطورى رز بالبصلة بسسسسس لان طلعت الظهرية كملت حوايج الاولاد

حلاوات العيد نخمم بندير غريبة وقرينات ومقروض يعنى زمنى

om_adnan
08-11-2012, 12:35 AM
ما فيش احلى من الزمنى ام امير,وراجلك مازال ما تعود ان ابنه كبر وحيكون اسهل مع اخوة احمد,انتى حاولى تشغليه لغاية مايروح احمد ولكن فى نفس الوقت مع احمد ديمه قولليه بوك عنده الحق فى كل شى,لان الاولاد لما يبدوا يكبروا يعز عليهم كلام أمهم ,وانا فطورى اليوم من امس ماعدا الشربه,وكل عام وانتوابخير.

barney
08-11-2012, 05:56 AM
السلام عليكم ورحمة الله وبركاته


تقبل الله صيامكن وقيامكن ودعاءكن يارب وانشاء الله ربي ايعيد علينا وعليكن الشهر بالخير والهني يارب العالمين

بالنسبه للحلويات الموضوع ممسوح من راسي لأربع اسباب :

السبب الاول :- ماعنديش من بيجيني بيش انقدمهن يعني الحكايه بايته لاخشه ولا طلعه وماعنديش جارات اقريبات والحكايه بالرسميات

السبب الثاني :- ولو اني درتهم من ابياكلهن راجلي ما ياكلش في الحلو واصغاري ممنوع عليهم الحلو بجميع انواعه ومرات بالخمبه ع بوهم نعطيهم بشكوط او اي حاجه حلوة وناذر جدا

السبب الثالث:- وحتى لو اني درتهم ماعنديش وين بندسهن ماعنديش افريز الثلاجه يادوب رافعه اللحم ولي امتى بندسهن

السبب الرابع والاهم :- اني اصلا مانيش فالحه فيهن ومانعرفش اندير حلو وماعنديش وسعت بال ليه

اليوم فطوري كان ( شربه + امبطن الزنبقة + خبزة محشيه + بيتزا + رز بالشاورما + وسلطه) فغط ع قولت خوتنا السوادين الله يفتحها علينا وعليهم يارب

الله عليك يا ام عدنان محلاك ومحلا هدرزتك والله لا تمل ياريتك جارتي انشاء الله ربي ايسلمك وايسلملك ابنياتك وانت عاده ما اتكثريش عليهن سادهن تعب مسكينات ابيخ حاجه ضمت الحوسه

ام امير شوي من الحن وشوي من رطابت الإيد ع قولت اشيابينا زمان يعني ماترخيلاش الحبل وما اتعقديشي بلعكس مش اصغير ويقدر يعتمد ع نفسه ع قولت اختي ام عدنان وممكن بوه خايف عليه ع خاطر قلت الامان في لبلاد انشاء الله ربي يفتحها ع بلادنا وايهنينا بيها ياربي وانشاء الله ربي

ايسلملك اصغارك وايهنيك بيهم وانشاء الله عيدكم مبارك واتبيدوا بالهني يارب

وينك يا ام سارة انشاء الله المانع خير لابد معتكفه انشاء الله ربي يتقبل منك

انشاء الله ليا عودة مضطرة انسكر توا


وسلامتكن

om_adnan
08-11-2012, 06:13 AM
وينك يا أم ساره,ان شاء الله المانع خير,حتى وانتى مريضه ومشغوله كنتى تكتبى.....

أختى بارنى...طريقة الاحتفال بالعيد,حتى بحلويات بسيطه,مثلا عندك الجيلى صحى جدا والعاده الاطفال يحبوه,او سلة فواكه بطعم مختلف ,يعنى طريقة تزيين,
عمرك ما تقولى ما نعرفش,ما دام غيرك دارها معناها ممكن اتديرها,
فيه طرق حلويات سهله,مش لازم الحاجات الزمنيه,هى كلها فى الجو,وانقولك نصيحه من مجرب,عمرك ما اتقولى راجلى وصغارى ما يحبوش,حتتفأجى بيهم لما اتديرلهم حلوات.ودير كميه بسيطه,بالنسبه للكوب ,استعملى طاسة الشاهى,هى ديرى حاجه,حتى على خاطرنا.

الصابرة
08-11-2012, 06:50 AM
السلام عليكم
طولت عليكم لكن عدت توا عشان الحلويات
كيف حالك ام عدنان ليك وحشة
واهلين بوخياتي كلهن وحدة وحدة
وبندير ان شاءالله
حلو اسمه عيون المها و المقروض بتاع زينب طبعا ولسان العصفور
وبسكويت محشي بامارنج
ومازلت انشوف منال العالم شنو بدير حلويات في الايام الاخيرة لاني كل سنة لازم اندير نوع حلو لحلويات العيد من منال العالم
وعلى فكرة عيون المها من منال العالم اندير فيه ليا 4سنين مش عادي

om_adnan
08-11-2012, 06:58 AM
وعليك السلام الصابره,اختياراتك كلها حلوه,شفت اكلة عيون المها,انتى كيف اتشكليها,لو درتها ايكون لانها حتذكرنى بيك فقط.

luba
08-11-2012, 06:11 PM
يف الحال الكل نكتب باللمس اكيد في اخطاء املاء ونسيان
ام ميرال مرحب بيك ومنورة المنتدي وخشي علي الدعم الفني فيه كل شي البنات مش مقصرات فيه

والكل ليكم وحشة
بارني نفس حالتك اني ندير في حفاظات صغيرات وزي ماقالت ام عدنان عمرك ماتقولي ماياكلش تو تشوفيه وين يعدي لي ليبيا ويحصل من يقدمله ماهو قايل لا حتي اني يقول مااديريش ماناكلش ندير ونجيبه مع اي سوائل يكمل الصونيه واني اختياري لحلوياتي من النوع اللي يحبه وشي جديد عليه بيش نشوف ردة الفعل والله مافي راجل ماياكل غير انت ديري بدون قول توه في الايام العادية ينشد مافيش حاجه حلوة من يوم درتله عبمبر من زينب ربي يبارك فيها مع انه ماجاني بيرفكت بس هو عجبه والخطأ مني قريب حرقته من تحت واكيد بنعاودة ونصورة


ام عدنان كلامك جواهر وربي يخليلك اللؤلؤات اللي عندك ويحفظهم بس عندي طلب لو داروا بنات حلو كندي
اسمهsnow ball cookies
ياريت تنزليه في المنتدي مرة بعتوه ليا وين عرفوا بدينا في شهر رمضان بعتولي حفاظه كبيرة وهو بارد مافيشي تطييب
ممكن عزومتي عالعيد لانه قاعدة نكمل في المربوعه في البيت الجديد



سلمك ربي مايحرمنا منك ومن كلامك الحلو الطيب وكلنا نستفيدوا منه
الصابرة اختيارات حلوة وفي انتظارك اكيد
ام امير صدقتي تعرفي ديمه نخمم في تربية الاولاد اكتر من البنات ربي يحفظهم من كل سوء

om_adnan
08-11-2012, 07:00 PM
شنو لولو فى مشروع تحويل فى رمضان,ربى يساعدك,بالنسبه للحلو اللى سألتى عليه,هل ملبس بالشكولاته,هل فيه سيرال,او جوز هند,فيه عدة طرق نفس الاسم.

luba
08-11-2012, 08:20 PM
ايه ام عدنان فيها كاكاو و حليب وسكر وزبدة وملبسة بجوز الهند ويطيبوا فيها في طنجرة علي النار شوية
وكان مش مقررينها بينه فوتيها

مغتربة 7
08-11-2012, 08:52 PM
السلام عليكم
كيف حالكم يابنات كلكم نفرا نفر
ليكم وحشة كبيررررررررررة

ام نسيبة 78
08-12-2012, 03:30 AM
https://p.twimg.com/A0D33IXCUAAM2Rn.jpg

ام نسيبة 78
08-12-2012, 03:33 AM
https://fbcdn-sphotos-b-a.akamaihd.net/hphotos-ak-ash4/s480x480/384715_400275866699021_1751749611_n.jpg
(http://www.facebook.com/photo.php?fbid=400275866699021&set=a.156323021094308.33202.156298194430124&type=1&ref=nf)
الحرية في ليبيا تعطيك طريحة بالشبشب متع نباش القبور وبعدين تخوزقك في عينك بصوابعها

نسمه ليبيه
08-12-2012, 04:28 AM
السلام عليكم


شن اخباركم




ام عدنان ولوبا ودانيه والصابره وحبيبتهم وام امير ولوتى وام ساره والساجده وام ميرال وموده وبنت حواء ونسيبه
انا زعلانه ان شهر رمضان قريب ينتهى والله زعلانه
ونزعل اكثر من بعض الناس اللى يقولوا رمضان السنه ثقيل
معقوله هذا كلام؟
فى حديث شريف مامعناه(لو علمت امتى ما فى رمضان من خير لتمنت ان تصيم الدهر كله)
بعض النساء يقولن امتى ينتهى كله تعب
باهى انت شن جابرك عالتعب ديرى شكل واحد وارتاحى
والا انتن شن رايكن اخواتى

barney
08-12-2012, 05:56 AM
السلام عليكن ورحمة الله وبركاته


تقبل الله صيامكن وقيامكن ودعاءكن واعاد الشهر الكريم علينا وعليكن بالخير قولن آمين

نسمة ليبيا والله كلامك ذرر يسلم فمك مع انك سميتي الكل الا اني ..... وفعلا هو شهر فيه كل شيء من غفران للذنوب وراحه للنفس والتقرب من الله وطهارة القلوب وصحه وراحه للجسم وتغيير للروتين يعني رمضان ايهبل مهما

كان طويل حمو بلا ضيء المهم هو شهر في السنه تتقرب فيه لربك

ام عدنان انحس فيك شجعتيني انشاء الله نوعدك بنحاول اندير مقادير صغيرة وعجبتني كلمتك ....عمرك ما تقولى ما نعرفش,ما دام غيرك دارها معناها ممكن اتديرها,.... انشاء الله ربي ايسلمك وايسلملك اصغارك ياربي انت وين

موجودة حاليا ؟ اللي فهمته انك برة من ليبيا ما اتقوليش في كندا كلكن غادي؟ نسأل وانجاوب ههههههههههههههه

لوبا شن المربوعه اللي اتوتي فيها اماله بتقيمي في كندا مانكش عابيه ع مرواح شكلها عجباتك الغربه . والله يا لوبا مرة درت غريبة قرفه وغريبه عاديه وبيتي فور واقرينات طبعا كله من النت والله كان كثر كلي منهن طرفين طرفين

والباقي كل ما انجيبله يشرب الشاهي او العصير او القهوة والحلويات يقعدن في مكانهن تعرفي قعدن قريب عام في الثلاجه واني انجيبله وانرجعهن بجمادهن في الاخير لوحتهن الحلويات حشاك وحشا القاريين في لكناسه

واضيوف نادر جدا جدا الناس اتشوب من الشقق وتفاصيلهن وضيقهن والجيران الي كان مشيتي ايدقوا عليك من لوطا ايقولولك نقصي مشيتك والله حاله دايرين حوشانهم من اللوح دبت النمله تنسمع فلهذا كل واحد شاد حوشه

ام سارة وينك شكلك معتكفه حقه انشاء الله المانع خير.

مغتربه والساجدة لله والصابرة ودانيه وحبيبتهم وام امير ولوتي ومودة وبنت حواء ونسيبه صحه اشريبتكن وانشاء الله المانع خير

بكرة جارتي جايه من ليبيا بعد ما رمضنت مع اهلها ومحتارة شن بنطيبلها هيا مش جارتي مليح مشوار بالسيارة لكن بتروح تعبانه ياروحي قلت انوتيلها افطيرها ه وراجلها اقترحوا عليا؟؟؟؟؟

اليوم فطوري نفس امس بالضبط سخنته وطيبت شربه بس امعاه

وسلامتكن

الصابرة
08-12-2012, 07:14 AM
السلام عليكم
كيف الحال للجميع
الله يبارك فيك وخيتي ام عدنان وفعلا مش عادي
وخيتي لوبا الحلو اللي تحكي عليه على حسب المكونات احنا انقولوا عليه سوكسيه
ومشكورات وخياتي على الاهتمام
بس عندي عتب شوي عليكم ليش تفاعلكم مع المواضيع اصبح قليل في بداية الشهر ماشاءالله
في تشجيع وردود حلوة و يخليني اقدم اكثر لكن اللي صدمني ان بعض المشاركات اجد بها ردين او ثلات ردود
نحس في تعبي او تعب غيري بصراحة يعدي هباء لان مافيش تشجيع
ووخيتي ام نسيبة 78 اضحكتيني اضحك الله قلبك
ونسومة ليبية معاك الحق والله كان تقعد عليا انتمناه اكثر من شهر
وعمري ماقلت عليه تعب وهيا قولتك ماحد ضاربهن على ايديهن يديرن اكثر من حاجة
هو شهر عبادة مش شهر زوادة
وربي داره عشان نقتصدوا في طعامنا وشرابنا ونحن درنا العكس اسراف وتبدير ماله حد
وعلى فكرة نسمة ليبية درت الكانلوني بتاعك اللي من غير بيض جاء مش عادي ومافيش فرق هلبة في الطعمة بينه وبين بتاع البيض
فعلا سلمت دياتك حبيبة

الصابرة
08-12-2012, 07:16 AM
بكرة جارتي جايه من ليبيا بعد ما رمضنت مع اهلها ومحتارة شن بنطيبلها هيا مش جارتي مليح مشوار بالسيارة لكن بتروح تعبانه ياروحي قلت انوتيلها افطيرها ه وراجلها اقترحوا عليا؟؟؟؟؟
وخيتي بارني ربي يفتحها عليك يارب وكل شئ باجره
حبيبة ممكن اديري شربة ونوع او اثنين معجنات ماتكثريش الكمية
وممكن اديري معاه ارز ممكن بالخلطة او اي نوع
وان شاءالله باقي العضوات يردن عليك

om_adnan
08-12-2012, 07:08 PM
أهلين با أحلى ناس....

أم ساره ...ان شاء الله المانع خير.

لوبا....كل عام وانتى بخير,رمضان ٢٠١٢,ليه ذكرى خاصه و ان شاء الله بعد ما يكبرو الصغار,نحكوا مع بعض على ذكرياتنا فى رمضان.

أم نسيبه...عايشه جو ليبيا مايه الميه مع انك فى الغربه.

نسمه....والله انا مثلك,دائما عندى خوف هل هذا اخر رمضان لى,وعندى حب لهذا الشهر لا يمكن وصفه,وانا اقول هذا حال الاغلب من الناس,اختى هونى فى حكمك على الاخرين,صدقينى نحن النساء انقولوا كلام ولا نقصده,شوفى كلامنا للصغار,اللى يحكوا هكى,يحكوا وخلاص ,لو شفتى فرحتهم فى بداية رمضان تفهمى,فى الغالب,ما تلقيش من يقدر يعبر عن شعوره بوضوح,الملاحظ النساء تحب الصيام اكثر من الرجال حتى فى باقى السنه,ولو حد يحكى قدامك,حاولى اتذكريها بالحاجات الحلوه فى رمضان ,لان كل شئ معدى حتى الشعور الجميل او شعور الاحباط وفى الاخير تكونى انتى كسبتى,فى الغربه ,نكون جدا منتبها لحكايه كيف نحكى على رمضان,ولكن فى ليبيا الكل الكل اختى يعرف ميزة رمضان ويحبوه,بس فيه ناس ما تعرفش تحكى فقط.

بارنى....سلم الجاره اللى ترد بالها من جارتها,مش مهم شنو اتدير,يكفى انك اتفكرتيها,وحتى انا زى لوبا فى كندا,شنو عجبوك عرب كندا,بالنسبه للغربه يابارنى,شى مكتوب وما فيش انسان يقدر يضمن نفسه فى الموضوع هذا, بس اللى انقوله فى مقوله ان الغربه واليتم اصعب شئ فى حياة الانسان.

الصابره...عندك حق فى قلة الردود ولكن هنا ديما نكتب لك,وسألتك على تشكيلة عيون المها,انا من رايى المجتمع الليبى احسن من زمان من ناحية التبذير,لو تسألى امك,ناس قبل مستحيل تأكل بايت وخصوصا الرجاله,توا بالعكس ايقول ما اتطيبش لو فيه بايت وكذلك كثرت طلبات الحياه ,فالناس قعدت تفكر اكثر كيف اتوفر,صعب تختفى الظواهر السلبيه بالكامل ولكن الاهم وجود الوعى, أختى دائما الكل يتطلع لمشاركاتك الحلوه وفى انتظار مشروعك اللى بعد رمضان.

الساجدة لله
08-12-2012, 07:17 PM
حبيباتي متاسفة جدا على قلة تواجدي معكم

بااذن الله نعوض تقصيري وانزل الاكلات اللي عندي

حبوبات عايشة في سباق مع الزمن من يغلب انا او الكهرباء

ياكهرباء مقطوعة يانت متلف هههههههه


بسرعة خشيت درت المشمشية متع زوبة

اسمعو قررت بااذن الله بندير غريبة اللوز وغريبة بندق

وغريبة الحلقوم ومعها بااذن الله قرينات وسليلات

اما راجلي شاد يبي مقروض مع اني مانعرفش انديره

بس بنتوكل على ربي وبندير طريقة زوبة الكل يمدح فيها وهي تجربة

شن افكاركم للعيد

om_adnan
08-12-2012, 07:25 PM
مرحبتين بالساجده...ربى يكون فى عونك وان شاء الله تكونى انتى الغالبه,كويس بكل ٦ اصناف حلويات,ياخوفى ايخش العيد وانا ما عنديش علم ,ولكن حندير كميات بسيطه ساهل,حتى انا كيفك قرينات اكيده,والباقى؟,كل عام وانتى بخير.

الصابرة
08-12-2012, 09:24 PM
السلام عليكم

كيف حالكم اليوم

الساجدة لله ....

ربي يكون في عونك وخيتي الساجدة لكن لما تشوفي هم السنة اللي فاتت في الضي تقولي الحمدلله على الساعات اللي ينقطع فيها الضي توا
فالحمدلله
بس قوليلي وخيتي الساجدة خيرك حلوياتك كلهن غريبة غير النكهة متغيرة او عندك العيلة يحبوا الغريبة
وبالنسبة لمقروض زينب توكلي على الله وديريه حيزبط معاك لاني من لما درته وراجلي يقولي على قد مادرتي ليا من مقروض هذا افضل مقروض اديريه
وقعد يقول اني تميت اسطى على قولته في المقروض لانه معنداش روح مع المقروض

ام عدنان....

سامحيني وخيتي ام عدنان والله ماركزت وعارفاتك حبيبة انتي تردي على مشاركاتي وماقصرتي بارك الله فيك

تشكيل عيون المها

حبيبة انشكل في عيون المها بيديا ناخذ كورة ونبدا انشكل فيها من الجانبين لتعطيني شكل العين يعني بيضاوي بس الجوانب مدببات
قبل هكي اندير فيه وتاخذ مني في وقت الصراحة خصوصا انا المقدار اللي نشتغل بيه كبير
لكن الاخت ام هداية لما نزلت الجلجلانية وتشكيلة البكلاوة اللي حطت بيها لوزة
حسيتها ساهلة فقلت ان شاءالله اندير نفس الطريقة في التشكيل مع الزيادة بيديا اندبب الحواف شوي ليعطي عين وطبعا تضعي حبة فستق لكن انا مرات نحط في لوز

وان شاءالله كمبيوتري يصلح قبل العيد عشان ناخذ المواضيع اللي فيه وانزله قبل نهاية الشهر
وخصوصا ان اللاب توب بتاعي مافيشي اي برنامج تصغير وبصراحة خايفة انزل برنامج يطلع فيه فيروس يضره
واني ماصدقت صلح
وان شاءالله انزل حلوياتي بتاعت العيد في المسابقة وياريت يا وخياتي نلقوا مشاركات
ووخيتي ام عدنان طالما اديري في حلويات حبيبة ماتنسيش تصوري وتشاركي معانا

حبيبتهم
08-12-2012, 10:05 PM
السلام عليكم

كيف حالكن يا بنات

سلامي ليكن كلكن

نسمة
اهلا يا حبيبة والله رمضان من احلى شهور السنة والناس كلهم ايحبوه ويراجوا فيه لكن كيف ماقالت لك ام عدنان في ناس ماتعرفش تحكي
وان شاء الله ربي يتقبل منا منكم الصيام والقيام ويبلغنا رمضان القادم ونحن وبلادنا بخير حال



بارني
ربي يكون في عونك
وبارك الله فيك انك فكرتي في جارتك اكيد بتكون واصلة تاعبة وانتم ادرى بتعب السفر والطائرة والرحلات الطويلة خصوصا


الصابرة
كيف حالك وماتعزليش من قلة الردود صح لما مافيش ردود تحسي انه مافيس من امقدر تعبك في التصوير والتصغير والرفع وكتابة المواضيع وحتى الجهد اللي تبذليه بيش توصلي المعلومة للاخوات لكن الفترة هذي الاغلبية مشغولات تعرفي العشرة الاواخر زيادة في العبادة والطاعة وتجهيزات للعيد بالذات اللي عندها هلبه عويلة وانتي واحتسبي الاجر لله وربي يرزقك على قيس نيتك يا غالية
وبنقولك علي برنامج تصغير اكيد عندك الرسام لان كل الاجهزة فيهن والا نزلي برنامج فوتوسكيب كان تبي رابط مضمون نبعتهلك
ونراجوا في حلوياتك للعيد اكيد حلوات كيف كل حاجاتك الروعة


ام عدنان الغالية
كيف حالك يا غالية كلامك درر وجواهر
وربي يكون في عونك في الغربة
لكن الغربة ليها فوائد كيف ماقال سيدنا علي ابن ابي طالب


تَغَرَّبْ عَنِ الأَوْطَانِ فِيْ طَلَبِ العُلَى =وسافِرْ ففي الأَسْفَارِ خَمْسُ فَوَائِـدِ

تَفَرُّجُ هَـمٍّ، واكتِسَـابُ مَعِيْشَـةٍ =وَعِلْمٌ ، وآدابٌ، وصُحْبَـةُ مَاجِـدِ

فإن قيلَ في الأَسفـارِ ذُلٌّ ومِحْنَـةٌ =وَقَطْعُ الفيافي وارتكـاب الشَّدائِـدِ

فَمَوْتُ الفتـى خيْـرٌ له مِنْ قِيامِـهِ =بِدَارِ هَـوَانٍ بيـن واشٍ وَحَاسِـدِ

وربي يرزقك خيري الدنيا والاخرة ويعود عليك رمضان سنين عديدة


الساجدة
ربي يكون في عونك
وحالنا من حالك نفس الشئ كهرباء مقطوع او نت مقطوع
وصحتين عالمشيميشة
و ان شاء الله تاكلوهن بالهني الحلويات
وجربي المقروض ماتقوليش مانعرفش المقروض المهم طريقة مضمونة والباقي ساهل
واكيد طريقة الحبيبة زينب مضمونة لانها ماتنزل في شئ الا ويكون مضمون



بالنسبة ليا اني
شنو قررت في الحلويات
يمكن قاعدين في يمكن
بسكويت اللانكشير وغريبة عربية
او في حلوية شايفتها قبل في النت لكن مش امجربتها اسمها العوينة بالك انديرها


وسلامي للجميع

الصابرة
08-12-2012, 10:19 PM
مشكورة وخيتي حبيبتهم على الكلام الحلو
والرسام مش نازل عندي في اللاب توب
والفوتو سكيب امنزلته في جهازي الاخر العادي لكن صايرتله شوي مشاكل
وراجلي رافعه يصلح فيه المشكلة ان معظم المواضيع فيه
ومانسحاباش بيطول هكي
لاني حتى على الفلاش مانقلتش مواضيع هلبة
وان شاءالله مايعطلش

الصابرة
08-12-2012, 10:24 PM
اه حبيبتهم
نصيحة
لما تبي تاخذي وصفة من النت او من كتاب ومافيش حد مجربها
ديري نصف المقدار لو المقادير كبيرة
عشان ماتخسريش مكوناتك

الساجدة لله
08-13-2012, 02:40 AM
حبوبة صبورة انا الغريبة ماعنديش الرووووووووووووح معها الوالد الله يرحمه يحبها هي والمقروض

وبيني وبينك انا نموت فيها باي شكل من الاشكال واي نكهة اما المقروض متع زوبة عارفته مضمون بس

انا اللي عارفة روحي من قبل دايرة طريقة لقيتها في منتدى لك لوحدة

المهم فشل معاي فشل دريييع ومنها معش جربت مقروض بس ناوية بااذن الله نجرب متع زوبة

الحق يشكرو فيه ومافيش حاجة درتهالها الا وماشاء الله مش عادية

luba
08-13-2012, 05:21 AM
اهلين بالكل الحاضر والغايب

نسومة والله صدقتي وبارك الله في ام عدنان ردها جواهر ومانزيد عليه

الا سنشتاق لك يا افضل الشهور

بارني ديمه هدا حالي نشري ونخلي لغيري من بعدي نادر مانرفع اني المفروض
سميت روحي الرحاله الصغير حتي الكهربائيات نشري ونخلي وشن لو نقعد سنتين في مكان لازم نكون
مرتاحه اتنين صعبه غربه وقلة راحة لا اهم شي راحتي وبالنسبة للحياة بره مش عارفه ربك كريم بس حاليا لا
كيف قلت يالله ويارك الله فيك في حقك علي المسافرين ديريلها شربة و بيتزا ومبطن او سمبوسة ورز بالخلطه

الصابرة هل نوع المها هدا يعسل لو يعسل ةعلي حسب ماحكيتي هدا
من زماااان يديروا فيه في ليبيا ويسموا فيه عين الجمل ويحطوله لوزه ونفس ماانتي قلتي في التشكيل وتعسل
في انتظار مواضيعك معليشي البنات طايبات من التدهوير في السوق الرجلين منفوخات والراس يكفخ

حبيبتهم شنو قررتي اديري كيفي الانكشير شوفتك فيه صح هههه

الساجدة كان الله في عونك وربي يفتحها عليك وحلوياتك اختيار موفق

مغتربه ليك وحشة ومخليه مكانك مع دلك انت معانا في قلوبنا

ام عدنان والله صدقتي دكري خاصة وتعلمت وتعرفت فيها علي هلبه اشياء وبارك الله فيك ويا بخت مغتربة بيك

سلامي للجميع

وين دندونه ( دانية ) شكلها قاعدة لتوا ادور علي التوكات ان شاء الله هكي هنا صاعبات هههه سلامي للشارق في بناته

نسمه ليبيه
08-13-2012, 05:44 AM
السلام عليكم


كيف حال الجميع اسفه بارنى انى ماذكرتش اسمك وادى بوسه على راسك امووووووووووووووووووواه

ام ساره وينها ان شاء الله غيابها خير


ام عدنان كلامك صح بس ماتنسيش اننا نحاسب على مانلفظه بالسنتنا

anhr
08-13-2012, 06:32 AM
السلام عليكم,اهلا حبايبى,ان شاء الله كلكم كويسات وبخير,مشغولين من غير شغل ,واخير شريت ملابس العيد,ومع الراجل والصغار منحكيلكم ,مزال احديت الصبايه,بنت تبى كعب وهى 6 سنين,كيف بنتعامل معها,ربى يحفضهم,ام ساره ان شاء المانع خير والله مخليه مكانها,وكل الغايبات,غدوه عندى عزومه رجاله,المره هدى مصره منكترش,بعد منخش للكوجيه اشبح ههه,اليوم درتها على الحلويات,درت غريبة الفقاع ةحلو المرسيدس محشى مكسرات ومعسل ,وكنافه فى قوالب الكب كيك حشيتها كستر د وقشطه وجت نازكه,قررت منديرش كيكات,لان الرجال مش زينه هههه,ولا شنو رايكم,يلا سلام امورات,نرجعلكم بعد بكره كان احيانا ربى,وكل عام وانتم بالف خير يارب,

الصابرة
08-13-2012, 07:12 AM
السلام عليكم

ربي يعطيك الصحة سجودة اني الغريبة مانحبهاش وكان كليتها طرف مانكملاش
والغريبة الوحيدة اللي ناكل فيها من ديات مرت خوي تعجب فيا هلبة عشان لما ناكلها ماتحصلش في لهاتي (اعلى الفم)
وطالما انك من عشاق الغريبة في نوع غريبة تركية اسمه سكرباري ان شاءالله بنزلها في مسابقة حلويات العيد لعيونك قبل بنخليه بعد العيد لكن لما شفت عشقك للغريبة قلت خلاص انديره لعيونك

حبيبتي لوبا ايه عيون المها نوع معسل وايه يشبه النوع اللي قلتي عليه ويسمى جمل اما تحطي لوزة ولما تحطي فستق يسمى المها عشان العيون خضر هههههه

وخيتي انهار راكي تفوتينا وماتوريش لينا الحلويات
لكن انحس فيك كثرتي حلو المفروض درتي نوعين نحسهم فيهم سادت لكن شكلك زيي تحبي عمل الحلويات

دانية
08-13-2012, 03:30 PM
سلامات للغاليات ...

من فترة ماخشيتش لأحلى ركن .. والله لكم وحشة ,, وتسلمي يا لوبــــــــــــــــــا عالسؤال اللي فعلاً اسعدني ..

التوكات ياحنة مازلت ماجبتهم قلت خليهم مع العطور وحاجاتي انا بالمرة..

امس فطرت عند هلي مش عارفة واعية في الصبح وخاطري في لمة هلي على عالة الشاهي وهداريزهم .. لمة باتي و أمي وخوتي الشباب .. خذيت معاي مجبنة الغالية الصابرة وخذيت معاي ليالي لبنان للأخت زينب عشن بنات خالي جايات لأمي ..
واليوم مازلت انخمم في الفطور شن بندير ؟؟

مازال ماخططت شي انعاني في الصغار هذا يبي يلبس وهذا يبكي .. وربي يعينا ... سلامات

om_adnan
08-13-2012, 07:47 PM
مرحبتين بكل العيون اللى حتقرأ كلامى ,اهلين بصحبتى فى هذا الشهر الفضيل.

الصابره...ان شاء الله يصلح الكمبيوتر بدرى,واكيد بإذن الله حتكون لى مشاركه معاكم يا أحلى منتدى فى العالم.

حبيبتهم...شكرا ياغاليه على الشعر,فعلا نحن ظالمين لغتنا واجد واجد ومقصرين فى حقها.

لوبا..ديما لما تخلى حاجه وراك,انويها اجر,بيش تلقوها فى ميزان حسناتكم ,شنو درتى لانكشير والا مازال.

نسمه...سلم جبارت الخاطر,صح نحاسب ولكن النيه اهم.

أنهار...ان شاء الله تنسترى فى عزومتك,والله زمن توا حتى الرجاله يفهموا فى الحلويات,وانتى ماشاء الله ما قصرتى.

دانيه...ماشاء الله,محلاها لمة العيله,ربى يحفظهم لك وتفرحى بخوتك ان شاء الله.

الصابرة
08-13-2012, 09:20 PM
السلام عليكم وخياتي

صح فطوركم للي فطر واللي مازال مقدما يعتبرها
اليوم جاية ومعبية دوة
اني ليا ايام نفطر في حوشي لكن بالعكس نسحروا بدل مانفطروا
راجلي مايفطرش ياكل تمر ويشرب عصير وبعدين يقعد لبعد المغرب بحاجة ساعتين يدخن ويشرب قهوة هذا فطوره
وبعدها يطلع لشغله مايروح الا قبل السحور ومرات نطلع معاه ومرات نقول نقعد اندير حاجة في الحوش
والتطييب بديت انطيب مرات بعد المغرب وقعدت اندير
حاجة حارة ووجبة
يعني زي اليوم درت حاجة اسمها الكوينية شفتها واني نصفح في الفيس بوك عجبتني ولما درتها جت تهبل
ودرت طبيخة فاصوليا وارز ابيض بس وطبعا للسحور ناكلوه
شفتي الجو اللي اني فيه والسبب قعادي في الحوش نفطر هو ان خوي عنده شغل في طرابلس وقاعد معاي
وهو في الاكل زي راجلي بالزبط غير هو يدخن على طول
وهذا ليش مانحبش نفطر في حوشي جو اهل راجلي مش عادي واني نحب نفطر عندهم

om_adnan
08-13-2012, 10:06 PM
سلم دوتها,بالعكس دوتك مش واجده والا هى حلوه لدرجة ما نحسو بطولها,بنت أصول اللى تحب صلة الرحم واللمه,يقال طريقة راجلك أصح بس لو تحذفى التدخين,شنو مازال خلاص كم يوم,ينعاد على الجميع بالخير,اهو عندك فرصه اتديرى حلواتك برواق.

الصابرة
08-14-2012, 04:23 AM
السلام عليكم
الله مايحرمني منك ياجبارة خاطري
فعلا اندير الحلويات برواقة
اليوم نويت النية والحمدلله بندير ثاني نوع
ماصار شئ الضي هرب زي العادة مع انهم ليهم ايام منظمين في جهتنا يقطعوا فيه في النهار ويجيبوا فيه قبل المغرب
مش عارفة اليوم شنو صحلهم
ربي يعطينا الصبر والحمدلله على كل شئ

om_adnan
08-14-2012, 04:35 AM
وعليك السلام الصابره,الحمد لله على كل حال,رب ايكون فى عون الجميع,لو الضئ يبى ينقطع,ليش ما يعطوا علم للاهلى ,هذا اقل شى,بيش الناس ترتب امورها,سمعت ايجيبوا فى العداد على التلفيزيون ,بيش لما يفوق المدى اللى ايقدر يتحمله,الناس اتخفف,صح الكلام هذا؟,كل عام وانتى بخير,

حبيبتهم
08-14-2012, 04:45 AM
السلام عليكم مساء الخير كيف حالكن جميعا يالصابرة ربي يعاونك في حلوياتك وان شاء الله تاكلوهن بالهني _ دانية ربي يسعدك وان شاء الله ديمة ملتمة مع اهلك واحبابك. ام عدنان الغالية ربي يسعدك وين ماكنتي ياغالية مؤشر استهلاك الكهرباء يعرضوا فيه في قناتي العاصمة والوطنية ويوضح نسبة استهلاك الكهرباء من نسبة قدرة الشبكة وكيف ماكاتبين ان تخفيض الاحمال يبدا لما توصل النسبة 100% وهي النسبة في اغلب الوقت فوق 100% تقول كان دايرين تحدي بيش يوصلوا لاكبر نسبة قبل ليلتين تقريبا شفتها 130% وربي يهني بلادنا وسلامي للجميع

الصابرة
08-14-2012, 05:08 AM
السلام عليكم
زي ماقالت ليك حبيبتهم والمشكلة ان بداية رمضان كان المؤشر باهي مايرقاش هلبة لكن من 10الاخيرة ويوصل لارقام غريبة زي ماقالت حبيبتهم تقول دايرين مسابقة
الله يسامحهم نسوا الضي والسنة اللي فاتت
والله احنا اللمبات موفرات للطاقة والسخانة مطفيينها واذا شغلنها منشغلوش حاجة تصرف ضي حتى انطفوها
والثلاجة عندنا الحمدلله بخارية من موفرات الطاقة
والمكيفات مضبزظات على 25
والحمدلله حتى الفرن منشغلش فيه في النهار ساعات الذروة ديما حاجتي اندير فيها من بعد الساعة 12
احنا انديروا اللي نقدروا عليه وحتى الجيران اللي في حومتنا متفقين كلهم على هكي عشان ينقطع علينا الضي في اضيق الحدود
والحمدلله في البداية كان ينقطع بعد يومين ساعة
لكن توا يقطعوا فيه كل يوم لمدة 2 الى 3 ساعات

نسمه ليبيه
08-14-2012, 05:58 AM
السلام عليكم

كيف حال الجميع

دانيه تو نوريك نقرا فى مشاركتك ونقول اكيد كاتبه انى انا كنت عندهم لقيت مش كاتبتها (طلعن على وجهى خطوط ماروكو) لكن مش مشكله تو انا نقولها

يابنات انا كنت عند اهل دانيه:mad:
الصابره فرحتينى انك جربتى الكالونى متاعى وياريتك صورتيه
وعلى فكره اصبحتى مشهزره فى عيلتنا عندى مراة خويا واخذه منك طريقة المجبنه ومسميتها مجبنة الصابره حتى لما يسالها حد عن الفطور تقول مجبنة الصابره ويومتها خطم علينا خويا وانا واياها نهدرزوا قال طبعا الصابره حتى هو صار يعرفك(ربى يجعل كل ماتقدميه فى ميزان حسناتك

اليوم انا كنت واخده فطور لاهلى طبعا هذى عاده فى الشرق ان البنت المتزوجه لازم تشيل لاهلها لحم ومايتبعه وتتعشى عند اهلها هى وراجلها
اليوم جيتهم انا وبكره اختى
سامحونى مره مره نقعد ثرثاره
وينك ام ساره؟

barney
08-14-2012, 06:19 AM
السلام عليكم ورحمة الله وبركاته

تقبل الله صيامكن وقيامكن ودعاءكن . عدا رمضان يا اوخياتي الله انحس انه رمشت عين سبحان الله عليك شهر خفيف ظريف انشاء الله ينعاد علينا بالصحه والهني واللمه لينا , والراحه وحقن الدماء والمصالحه والخيرات لبلادنا الحبيبه ويجعل اقلوبنا ع بعض يارب ويجعلنا يد وحدة في كل ازمه وانشاء الله ربي ما ايجيب ازمات لبلادنا يارب.

"آميـــــــــــــــــــــــــــــــــــــــــــــــ ــــــــــــــــن"

الصابرة انشاء الله ربي ايعينكم ع الكهرباء وياريت كل المناطق اينضموا كيفكم ع الاقل ايساعدوا اشويا والوضع هذا في كل ليبيا امس اهلي ايكلموا فيا قالولي انكلموا فيك في الظلام انشاء الله فيها خيرة . وانشاء الله ربي ايونسك بوخيك ويحفظلك زوجك بس ياريتهم ايسيبوا الدخان وانشاء الله ربي ايعاونهم علي تسييبته والله حتى اني خويا

اول مايفطر دخان بس لسحور انشاء الله رربي يرزينا فيه هالدخان وفي نهار رمضان تلقيه مش مستحمل حاجه اعصابه في راس خشمه ماتقدريش اتكلميه نفرحوا لما يرقد معليشي تفلسفت اشويا :o . انشاء الله ربي ايعينك ع حلويات العيد .

ام عدنان صحه فطورك وانشاء الله من عواده ياربي وماشاء الله عليك انت اللي جبارت الخواطر لسانك عسل واقليبك احنين انحب نقرا هدرزتك انشاء الله ربي يفتحها عليك ويرزقك من حيث لا تحتسبي ويكتبلك حسن الخاتمه واينولك ماتتمني وايعاود عليك الشهر يالخير واليمن والبركات يارب هيا خودي هي جاتك دعوة سمحه قولي آمين

لوبا اييييه بالله ابتحكيلي ع موضوع الرحيل من شقه لشقه واشري الاجهزة والمواعين والعاب الصغار الحال من بعضه لكن الحمدلله اني تقريبا استقريت في شقه انشاء الله وبإذن الله لين انروحوا واحني فيها . وفيك بارك الله بالنسبه للمسافرين ماعنديش فيه جميل احني اسرة وحدة والغربه اتخليك تشبح البعيد قريب اتصدقي الحاجه هذي لابده

عندكم حتى انتم في كندا , مهما ايصير في ليبيا من مشاكل بين القبايل في الغربه بالعكس القبايل كلها متحابه مافيش حاجه اسمها قبيله بكل في الغربه الحمد لله العقبه لينا في ليبيا ننسوا حاجه اسمها قبيله ونتعاملوا بالاسلام بدل ما انقولوا هذا ولد عمي ومن قبيلتي انقولوا هذا خويا مسلم سامحيني تفلسفت مرة ثانيا شورني مليانه :o

نسمة ليبيا سامحيني انبصر عليك حتى كان ماسميتيني لكن ما لاحظتيش التحسن في كلمت انشاء الله هذا بفضلك وفضل ام اسراء وام عدنان وانشاء الله في ميزان حسناتكن

امس درت فطوري لعزومت جارتي بيتزا وشربه عربيه ورز بالكبدة واللوز ودجاج امحمر وبكلاوة حارة وبوريك وكيكه حارة واليوم نفسه الفطور غير درت شربه جديده.

حبيبتهم والساجدة وانهار ودانيه وام سارررررررررررررررررررره وام امير ومودة ومغتربه ونسيبه ولوتي وووووووووو......... انشالله المانع خير




وسلامتكن

الصابرة
08-14-2012, 06:52 AM
السلام عليكم

كيف الحال نسومة وبارني
ان شاءالله باحسن حال
صار تميت مشهورة عندكم نسومة باهي الحمدلله في الخير غير ماتنسيش الدعاء مرة مرة لوخيتك الصابرة
وبارني الحمدلله ربي سترك مع جارتك
وبالنسبة للدخان اما خوي سبحان الله والحمدلله هو في وادي والعصبية في وادي اخر نين تستغربي من هدوء اعصابه
وراجلي عصبي صح لكن بمزاجية لو كان طلع من الحوش انقول ياساتر ونقعد انساير فيه زي البيبي واذا قاعد في الحوش ياسلام عليه
وماتضحكوش عليا من كثر ما نساير فيه زي البيبي نحس فيه مرات انه ولدي
وخيتي بارني تفلفسي زي ماتحبي خوذي راحتك امنا ليش اسمها دردشة
واللي مشغولات على ام سارة زيي توا اطمنت عليها من الاخت زينب وقالت لي النت عندها مقطوع بس والحمدلله مش حاجة ثانية

حبيبتهم
08-14-2012, 03:57 PM
السلام عليكم

كيف حالكن يا بنات اليوم

معليشي توا مستعجلة بس شفت مؤشر استهلاك الكهرباء
تذكرت كلام الغالية ام عدنان عن مؤشر الاستهلاك صورته بيش تشوفه
واليوم العذر في قطع الكهرباء موجة الحرارة التى تشهدها بلادنا
الايام الماضية بسبب خلل في خطوط نقل الكهرباء بين اجدابيا وبريقة

كل يوم في عذر
وفي الشتي اللي فات بسبب موجة البرد


هذي الصورة
الساعة 3:49 قبل العصر

http://im12.gulfup.com/2012-08-14/1344952352671.jpg (http://www.gulfup.com/show/X2cm6h811k6hwo)

anhr
08-14-2012, 07:14 PM
السلام عليكم
وان شاء الله الكل بخير,الحمد لله العزومه جت تمام وربى استرنى,والمره هده حسيتهم كلو,ودرت شربه طبعامع ان عقتى الشربه بمقدر كبير ههه,وزر منعرفش شنو بنسميه,ههه هو رز بلاو متبل يعنى مش ابيض مع البزيليا وزينته من فوق قطع لحم صغير وجزر مكعبات مقلى,وفلفل اخضر واحمر حتى هم مكعبات وقليتهم شويه,لا الصراحه عيينه من رز المكسرات والكبد وين ما تمشى تلقيه,وفلفل محشى وبكلاو الحاره وحبزه كسكاس حشيتها شورمه,ومبطن بطاطا,وكفته دجاج,وبريك الجبد,ودلاع وقرعاوى,صابره بالعكس درت حلويات الى ممكن تصبر,زى الغريبه والمرسيدس,يعنى يقعدو حتى للعيد,مش زى الكيكات,والكنافه اكتر كليته انى هههه ما عنديش الروح معاه,ممكن اول مره تنجح معاى,شكرا ام عدنان لاكن اكتر الرجاله مياكلوش كان خدو حاجه مزيهم حد,لوبا و صلتك الرساله,بنسبه للكنافه نشرى فيها من المحلات العربيه, و سلامتكم

anhr
08-14-2012, 08:49 PM
انسيت انقولكم على السلايط,سلاطه عادى ومشويه وسلاطة البطاطه والميونيز,ننصحكم ادجربوها,وهى عبارة بطاطه مطبوخه وتقطع مكعبات متوسطه والخلطه ليمون ومايونير وشويه ماسترد صوص الخردل وشبت مفروم وملح وفلفل وشويه بصل اخر مفروم انى زتها حتى فلفل حار اختيارى

موودة
08-15-2012, 12:41 PM
السلام عليكم ورحمة الله وبركاته

وحشتونى سيداتى الغاليات ونتمنى تكونو بخير وبصحة وعافية
انا قااعدة نساعد فى ماما فى حلويات العيد
يعنى هى ادير العجينة وانا ندير الباقى وحنحط صورهن ان شاء الله

وكل سنة والجميع بخير

تحياتى الحارة جدا لكل وحدة فيكم

ام ميرال
08-15-2012, 02:33 PM
السلام عليكم
كيف الاحوال انشاء الله الكل بخير
حابه نشكر كل الاخوات الي ردو ع استفساراتي بارك الله فيكم وجزاكم الله خير وعذرا ع التأخير لان كان عندي مشكلة في الرد السريع
ام عدنان معني الاسم صح وهذا من ذوقك وبالنسبه لميرال مازال ما جت قاعدة في الطريق ادعولي ربي يسهللي ونجيبها بالسلامه

ام ميرال
08-15-2012, 02:37 PM
انهار انشاء الله ديما مستورة وربي يسترنا فوق الاض وتحت الارض ويوم العرض يعطيك الصحه مكثرة الاصناف
مودة ربي يعينك حبيبتي ويحفظلكم الغاليه ويطوللكم في عمرها

om_adnan
08-15-2012, 07:05 PM
اهلين بالكل وكل عام وانتم بخير بمناسبة قرب عيدنا المبارك


وعليك السلام حبيبتهم...شكرا على الصوره,سلمك يارب,تعرفى الوزير ذكى,لانه بهذى الفكره ,حمل الشعب معاه المسئوليه واثبت انه بيش تنجح البلاد,لازم انكونوا ايد وحده,ولكن هل هناك من مستجيب.

وعليك السلام الصابره...ان شاء الله تخاوى ولدك ههههه,عاجل غير اجل ,وصفك ينطبق على معظم الليبين,شكرا اللى طمنتينا على ام ساره وسلم زوبه اللى ما ايجى منها الا الخير.

وعليك السلام نسمه ماروكو...ضحكتينى حتى وانا ما نعرفش من هو,وعندك الحق تزعلى,كملتى وقلتى شنو رفعتى طبق حلو,نبى نسأل مش نفس البرنامج فى المنطقه الغربيه,انا انقول اكيد حتى ولو بطريقه تختلف,احلى ثرثره من نسومه.

وعليك السلام بارنى......
..............اميييييييين..........
اتخيلتك عيونك يضحكو وانتى تكتبى انشاء,توا جا وقت الفلسفة,مش عيب ان انكونوا قبائل وقد ذكرها الله فى كتبه,والقبيله مهمه للفرد,مثلا ممكن انسان يخطئ وعنفوانه يمنعه يصلح الخطأ وهنا ممكن هو يقول على خاطر قبيلتى اندير اى حاجه,القبيله سند للافراد الضعفاء فيها,ولكن ما يحدث فى ليبيا هو, حاشا الاغلبيه, هو تعنت الجاهليه ,وديننا ايقول (ولا تزر وازرة وزر أخرى ) ,هذا فعلا لا نلاحظه فى الغربه,قلبى طار من الفرحه على الدعوه الحلوه,الله ايخليك أوخيتى.

وعليك السلام انهار....كويس انك كسبت فى نفس الوقت حلاوات العيد,كانت عزومه وليمه,ما شاء الله,ومعاك ما ياكلوش ولكن ينتبوه لكل شى ,مش كيف زمان,يعطيك الصحه وبيتكم ديما عامر بالخير .

وعليك السلام مووده...شنو جوكم هل العريس جابو لك عيدك والا ممكن العرس قريب؟,سلم اللى تساعد فى امها,اذا كنتى اخر بنت فى الحوش,ردى بالك من امك,لانه صعب الحوش يفضى عليها حتى لو ماتبيش تعترف بيها,ربى ايهنيك عروستنا.

وعليك السلام ام ميرال...ربى ايكملك على خير وسلامه وركزى على ولدك بيش ما يغارش ,وهذا شعور طبيعى لاى حد فى سنه,ممكن عندك نفس الفكره ,اشرى له هديه وعطيها له لما تروحى من المستشفى وقولى له هادى من اختك.

دانية
08-16-2012, 02:51 AM
سلامات للجميع ...

نسمة راك تزعلي ...اعلان هام يابنات نسمــــــــــــــــــة كانت عندنا في حوش هلي اللي هو ايكون حوش عمتها وفي نفس الوقت حوش خالها...:d

كيف حالكن كلكن يارب اتكونن بألف خير كيف جيت توا هلي كانو عازمين عالعيلة كلها هذي عادة أمي ربي يطول في عمرها كل رمضان في نفس التوقيت يوم 27 من رمضان وكانت لمة اتهبل ...

ان شاء الله رمضان الجاي البلاد متهنية ومتريحة يارب .. وكل وحدة فيكن فرحانة وامنولها ربي كل اللي في خاطرها ..قولن آآآمين..

om_adnan
08-16-2012, 02:58 AM
امييييين دانيه,ياسعد نسمه بيك,ماشاء الله تبارك الرحمن على احلى لمه.

luba
08-16-2012, 06:00 AM
معقولةهكي يابنات يصير منه هالكلام الردود شبه معدومة في المواضيع الاخيرة

للرقي بمنتداكم يجب الرد علي المواضيع والمشاركة بمواضيع منكن

دانية ربي يجعلها لمة فرح وحب دايمةودكرتيني بلمة امي ربي يعطيهن الصحة وطول العمر

موودة
08-16-2012, 10:55 AM
ام ميرال
تسلمى يارب ويحفظك لزوجك وبنوتك الجاية على خير وسلامة يارب

ام عدنان
عزيزتى الغالية كيف حالك
اه جابولي عيدى وربي يخليلي عميمة تهبل الصراحة
وانا اخر واصغر وحدة وماما شايلة هم الدنيا ومرات تقعد تبكى عشان بيفضى عليها الحوش ومعش عرفت شن اندير انا دلوعتها ومتعلفين واجد ببعضنا
ووعدتها انى ديما حنجيك انا واختى

دانية
ربي يخليك ويحفظك وين ما اتجهتى وكل سنة وانت بخير

لوبا
الصبايا قاعدات فى الوقت بدل الضائع اللى تشرى واللى توتى فالحلويات واللى معتكفة فى منزلها
بس اللى عارفته كويس المنتدى هذا محد يقدر يطول عليه وتفوته الصحبة الحلوة هذه


وكل عام والجميع بألف خير

موودة
08-17-2012, 01:17 AM
صبايا احلى ستات

اين انتن؟؟

رايفت على تهدريزكن

anhr
08-17-2012, 06:04 AM
[*=center]السلام عليكم,وينكم مغطسات زعمه هدا كله سوق وحلوات ربى يعونكم جميعا,شكلها الحلقه الاخيره قربت,نقصد بتسكروها التهدرزه زعمه,هههه,والله اشتقت لطلتكم,هو استعفر الله اليومين الاخيرات من لصيام الوحد يحس بلارهاق,على كلا كل عام والجميع بالف خير,اليوم كملت حاجات الصغار,وعمكم الراجل قالى خديلهم العاب,قبل نبى نخدهم يوم العيد,والعيال سمعو عجبتهم الفكره,وقالوى انضمولك الحوش ترفعينا,فقلت باهى هههه,وسلامى

الصابرة
08-17-2012, 07:19 AM
السلام عليكم
كيف حالكم وخياتي كلكم وحدة وحدة
بالنسبة ليا لاهية في الحلويات
وتعبانة على الاخر لاني درت نوع بكمية كبيرة لاسباب
وان شاءالله ربي ينولني مانويت له
وان شاءالله سوف انزله لكم الليلة لانه لازم يبقى ليلة كاملة في العسل

ام امير
08-17-2012, 09:34 AM
السلام عليكم
كيف حالكم يابنات كل سنة وانتو طيبين وصحة وسلامة وينعاد عليكم وعلى بلادنا بالخير ياااااااااارب
الايام الى فاتت ماقدرتش انخش لان وخيتكم كانت مريضة واخدة بردة وشوفو الحالة مع الصيام مع فى حد فى الحوش يعاون فيك الحمد الله على كل حال المهم كيف حالكم وحدة وحدة

موودة
08-17-2012, 12:05 PM
انهار
كيف الحال عزيزتى والله عجبتنى فكرة يضمولك الحوش هههههه تو نديرها مستقبلا ههههه
ربي يخليلك عيالك ويحفظهم

الصابرة
كيف حال عزيزتى .. ربي يعينك ويعطيك على قد نيتك ويحفظك

ام امير
الف الف لاباس عليك ماتشوفى شر يارب .. طمنينا عليك توة شن جوك؟؟

وكل سنة وكلكن طيبات

om_adnan
08-17-2012, 02:31 PM
اهلين باأحلى بنات.....وصلنا لمسك الختام,كل عام والجميع بخير.


اكيد فى اخرالشهر الالتزامات تكثر ويقل الدخول للمنتدى,ربى يكون فى عون الجميع,والاهم ربى ينصر اخوتنا فى سوريا عن قريب,توا انهدرز على البنات المتواجدات وسلامى لاخواتى الغايبات.

لوبا...ان شاء الله ايكون حبى للمنتدى مثل محبتك.
مووده....شنو بدأ العد التنازلى...شنو شعورك,ربى ايكون فى عون امك ,والاهم انها اتهنت عليكن.
انهار...وعليك السلام...فى الغربه لازم انعوضوا الصغار,وصغار توا اذكياء يعرفوا كيف يأخذوا حا جتهم.
الصابره...وعليك السلام....ربى يتقبل دعاءك ,ويعطيك الصحه.
ام امير...وعليك السلام....ان شاء الله لابأس,ارتاحى بعدين كل حاجه مقدور عليها.

الساجدة لله
08-18-2012, 03:39 AM
كل سنة وانتم طيبين ياغاليات

سامحوني غبت عليكم الكهرباء دايرة شوووووووط فينا بس الحمدلله

امس درت قرينات بس شكله الدقيق خفيف المقدار كله تفترش للاسف

بس الحمدلله

اليوم درت غريبة لوز وعجنت غريبة البندق والدقيق استعملت دقيق الكيسة الكبيرة متع الجمعية وطلعت ماشاء الله ادووووب دوبان

بكرة حنخش انزلكم شن درت بالتفصيل والكر الكبير لزوبة الحبوبة اللي طبقت طريقتها

مغتربة 7
08-18-2012, 05:54 AM
السلام عليكم
كيف حالكم يابنات
كل عام وانتم بالف خير
اكيد غدوة ان شاء الله الكل راح يكون مشغول وكذلك بعد غدوة قولت نعيد عليكم من توا
كل سنة وانتم طيبين


http://gallery.moshax.com/data/media/30/c3331d358aa36130bcdf56996de5ee2c.jpg

الصابرة
08-18-2012, 07:44 AM
http://www.iraqna1.com/vb/storeimg/Iraqna1_1314630561_118.gif



http://www.iraqna1.com/vb/storeimg/Iraqna1_1314630533_491.gif






http://www.iraqna1.com/vb/storeimg/Iraqna1_1314630533_850.gif

موودة
08-18-2012, 12:42 PM
ام عدنانو
نجيها اللى حاسة بيا قاعدة بالورقة والقلم

سيداتى العزيزات كل سنة وانتن طيبات وبالصحة والسلامة يارب

وماقصرتن

http://www.libyan-kitchen.com/gallery/images/48lxl.jpg

طبعا انا كفاية عليا الأغائة لكن اللى فى الصفوف الأمامية فى الجبهة كانت ماما ربي يحفظها

ويحفظ كل الأمهات اللى تعبت عشان تفرح اهلها بأطيب واحلى انواع الأكل

حبيبتهم
08-18-2012, 04:31 PM
السلام عليكم

كيف حالكن يا بنات اليوم


كل عام وانتن وعائلاتكن بخير

و ان شاء الله يعود علينا رمضان بالخير لينا ولبلادنا

دانية
08-18-2012, 04:49 PM
كيف حالكن يابنات كل من موجودة في المنتدى الرائع ان شاء الله كل سنة وانتن طيبات ...

وبلادنا بخير يارب واتكون ليبيا كلها في امن وسلام ورضا من الرحمن ..

ويشهد الله على حبي لهذا المنتدى .. وكل حرف فيه يجعله ربي في موازين حسناتنا ..ويعتق رقابنا من النار

ياعزيز يا جبار..

الصابرة
08-18-2012, 09:13 PM
السلام عليكم

كيف الحال ربي يدوم علينا المحبة يارب

ياوخياتي حبيت انبهكم اني ضفت صور لمشاركتي في حلويات عيدنا بسكويت بجوز الهند

وياريت انشوفوا مشاركتكم حتى بعد العيد عشان نستفيدوا منها
لان نحن الليبيات مانرتبطوش بعيد عشان انديروا حلويات
لان ماشاءالله علينا انديروا فيهن حتى عشان هدرزة عشية

حبيبتهم
08-18-2012, 11:19 PM
السلام عليكم

كيف حالكن اليوم
اكيد توا كل واحدة فيكن مشغولة
ديمة ليلة العيد فيها الشغل هلبه

ان شاء الله عيد مبارك عالجميع

ام امير
08-19-2012, 03:03 AM
كـــــــــــــل سنة وانتو بخيــــــــــــــــــر





http://i620.photobucket.com/albums/tt283/dj28988/Events/Eid/Flash/2.swf (http://i620.photobucket.com/albums/tt283/dj28988/Events/Eid/Flash/2.swf)

ام نسيبة 78
08-19-2012, 04:14 AM
تقبل الله منا ومنكم
وكل عام وانت بخيييييييييييييييييييييييييييييييييييييييير

ام نسيبة 78
08-20-2012, 06:29 AM
إن ذكر الموت واحدٌ من أنفع أدوية القلوب وأسباب حياتها وصلاحها؛ ولهذا المعنى العظيم كان النبي صلى الله عليه وسلم يوصي أمته بالإكثار من ذكر الموت: (أكثروا ذكر هادم اللذات).

وقد وعى السلف رضي الله عنهم وصية نبيهم صلى الله عليه وسلم فجعلوا الموت أمام أعينهم، فقصرت آمالهم، وصلحت أعمالهم وقلوبهم.

انظر إلى الربيع بن خثيم رضي الله عنه وهو من هو صلاحًا وعلمًا وزهدًا يقول: (لو غفل قلبي عن ذكر الموت ساعة واحدة لفسد قلبي).

إن الحقيقة التي لا مراء فيها أن الموت حتم لازم، لا تمنع منه حصانة القلاع، ولا ارتفاع الأسوار، ولا يحول دونه الحجَّاب، ولا ترده الأبواب. {أَيْنَمَا تَكُونُوا يُدْرِكْكُمُ الْمَوْتُ وَلَوْ كُنْتُمْ فِي بُرُوجٍ مُشَيَّدَةٍ}.... (النساء:78).

الموت لا يستأذن
ولا يحتاج الموت إلى مقدمات ولا إلى استئذان، فإن الأمر لحظة، فقد يدخل النَّفَسُ ولا يخرج، وقد يخرج ولا يدخل: {كُلُّ نَفْسٍ ذَائِقَةُ الْمَوْتِ}... (آل عمران:185). {فَإِذَا جَاءَ أَجَلُهُمْ لا يَسْتَأْخِرُونَ سَاعَةً وَلا يَسْتَقْدِمُونَ}... (الأعراف:34).

وإن كل يوم يمر من حياتنا فإنه يقربنا من آجالنا ولقاء ربنا، فمن كانت الأيام والليالي مطاياه سارت به، وإن لم يسر!
نسير إلى الآجال في كل لحظة.. ... ..وأيامنا تطــوى وهـنَّ مـراحــلُ
ولـــم أرَ مثـــل المـوتِ حقًّا كأنَّه.. ... ..إذا ما تخطتـه الأمــاني باطــلُ
وما أقبح التفريط في زمن الصبا.. ... ..فكيف و الشَّيْبُ للرأس شاعلُ
ترحلْ من الدنيا بـزادٍ من التقى.. ... ..فعمــرك أيَّــام وهــنَّ قــلائـــلُ

لقد دخلت فاطمة رضي الله عنها على أبيها رسول الله صلى الله عليه وسلم وهو يجود بنفسه، فقالت: واكرْباه.. فقال لها الرسول صلى الله عليه وسلم: (يا بنية! إنه قد حضر بأبيك ما ليس الله بتارك منه أحدًا...).

أخوتـــــــاه:
بعد قليل يمسك اللسان، ويزول العرفان، وتنشر الأكفان، ويُفارَقُ الإخوان، ونُنقل إلى الأموات، وتصف علينا اللبنات، ألا فلنذكر هادم اللذات ومفرق الجماعات ومنغص الشهوات، وقاطع الأمنيات، وميتم البنين والبنات، حريٌ بالعبد أن يكثر من ذكر الموت، فإن ذلك يدفعه إلى الصالحات وترك المنكرات، حذرًا مما هو مقبل عليه من أهوال الموت والسكرات.

إن كثرة ذكر الموت ينبه العبد من غفلته، وهذا هو عين المطلوب:
تنبه قبل المــوت إن كنت تعقـــلُ.. ... ..فعمــا قــليــل للمقــابـــر تُنقــــــلُ
وتمسي رهينًا في القبورِ وتنثني.. ... ..لــدى جــدث تحت الثــرى تتجندل
فـــريدًا وحيدًا في التــــرابِ وإنما.. ... ..قرينُ الفتى في القبر ما كان يعملُ
ومايفعل الجسم الوسيم إذا ثوى.. .... وصــار ضجيـــع القبر يعلــوه جَنْدلُ
وبطنٍ بــدا فيه الردى ثم لو تــرى.. ... ..دقيــق الثــرى في مقـــلةٍ يتهرولُ
أعيناي جــودا بالدمــــوع عليكما.. ... .. فحزني على نفسي أحق وأجملُ
أيــا مــدعي حُبي هلــمَّ بنــا إذا.. ... .. بكى الناس نبكي للفــراق ونَهْمَلُ
دعي اللهو نفسي واذكري حفرة البلى.. ... ..وكيـــف بنا دود المقــابـــر يفــعــلُ
إلى الله أشكو لا إلى الناس حالتي.. ...إذا صِرْتُ في قبــري وحيـدًا أُمَلْمَلُ

ليس يأسا من الحياة
إننا حين ندعو أنفسنا والناس من حولنا إلى الإكثار من ذكر الموت فليس ذلك بسبب اليأس من الحياة أو التشاؤم، لكنه التذكير بالكأس الذي لابد لكل منَّا أن يشربه وهو عنه غافل لاهٍ.

فإن الموت إذا نزل بساحة العبد نسي ما كان فيه من اللذة والنعيم: {أَفَرَأَيْتَ إِنْ مَتَّعْنَاهُمْ سِنِينَ . ثُمَّ جَاءَهُمْ مَا كَانُوا يُوعَدُونَ . مَا أَغْنَى عَنْهُمْ مَا كَانُوا يُمَتَّعُونَ}... (الشعراء: 205-207) قرأ بعض السلف هذه الآيات فبكى وقال: إذا جاء الموت لم يغن عن العبد ما كان فيه من اللذة والنعيم.

ولهذا وجدنا السلف يتواصون بالإكثار من ذكر الموت واستحضاره، مع أنهم فتحوا مشارق الأرض ومغاربها، وسادوا الدنيا بطاعة الله، وجاءهم الموت فكانوا أفرح بقدومه من الأم بقدوم ولدها الغائب.

فوجدنا منهم من يقول وهو على فراش الموت: (واطرَبَاه!! غدًا نلقى الأحبة محمدًا وحزبه).

وآخر يقول: (مرحبًا بالموت؟ زائر مُغبٍّ (قليل الزيارة) جاء على فاقة).

وآخر يقول: (اللهم إني إليك لمشتاق).

ولا عجب فإن العبد إذا كان على فراش الموت بُشر إما بجنة وإما بنار، فإن العبد يموت على ما عاش عليه، والخواتيم مواريث الأعمال.

luba
08-20-2012, 06:35 AM
كل عام وانتم بخيروصحه وسلامه السنه هدي حسيت بالعيد لانه ولدي صار يفهم حفظناه المعايده وشريتله حوايج مدرسه وعيدوهديه معتبره وادوات تزيين البيت وهواللي ساعدني وهو اللي قص الحروف وعلقناهم علي الشباك هابي عيد وكل عام وانتم بخير وعلقنا الاشرطةالدهبيه واضواء الزينه والبالونات ولماناض الصبح عطيته عيديته فلوس وعطيته تانيات وقتله هدي وحده من حني امي وهدي من حني نعيمه وهدي من جدك الغالي وفرح بيهم وقالي هيا نكلموهم وعزمت جارتنا وعيدنا جميع ودرت العزومه كسكسي وعصبان وسمبوسه وبفتيك ومحشي فلفل وسلطة وفواكه وحلويات العيد وغبت يومين سيت بروحي غايبه هلبه لي عودة وغدوة بنزور ابلات ولدي وبعض اصدقاء زوجي ونعطوهم حلويات وبنعرفوهم بي عيدنا ولبسنا وعاداتنا

ام نسيبة 78
08-20-2012, 06:44 AM
قال الله تعالى ((كل نفس ذائقة الموت ))
وقال سيدنا رسول الله صلى الله عليه وعلى آله وسلم ( اكثروا ذكر هاذم اللذات, قالوا: وما هاذم اللذات يا رسول الله؟ قال:الموت .)

قال الإمام القرطبي في كتاب التذكرة بأحوال الموتى وأمور الآخرة (قال الدقاق: من أكثر من ذكر الموت أكرم بثلاثة أشياء:
1_ تعجيل التوبة.
2_ وقناعة القلب.
3_ ونشاط العبادة.
ومن نسي الموت عوقب بثلاثة أشياء: تسويف التوبة، وترك الرضى بالكفاف، والتكاسل في العبادة.)

وأخرج الطبراني في الأوسط عن السيدة عائشة رضي الله عنها قالت: قال رسول الله صلى الله عليه وسلم"من قال في يومٍ خمسًا وعشرينَ مرةً: اللهم بارِك لي في الموتِ وفيما بعدَ الموتِ ثم ماتَ على فراشهِ أعطاهُ الله أجرَ شهيدٍ" وذكره الحافظ السيوطي في كتاب داعي الفلاح في أذكار المساء والصباح .

وكان سيدي الربيع بن خيثم قد حفر في داره قبرا فكان إذا وجد في قلبه قساوة دخل فيه فاضطجع ومكث ما شاء الله ثم يقول رب إرجعون لعلي أعمل صالحا فيما تركت يرددها ، ثم يرد على نفسه يا ربيع قد رجعت فاعمل.
وسبحان ربك رب العزة عما يصفون وسلام على المرسلين والحمد لله رب العالمين.
_________

ام نسيبة 78
08-20-2012, 09:29 AM
حوار قتاة مع الشيطان اثناء سكرات الموت



بسم الله الرحمن الرحيـم



وَجَاءتْ سَكْرَةُ الْمَوْتِ بِالْحَقِّ ذَلِكَ مَا كُنتَ مِنْهُ تَحِيدُ

معقول أن أموت ... غير معقول .. إني مازلت صغيره على الموت ..أنا في
الرابعه والعشرين فقط لاشك أنني أحلم .. أكيد سوف سيأتي الطبيب الآن
.. أكيد سوف يأتي.. أريد كأسا من الماء لقد جف ريقي .. لماذا لايرد
علي أحد ؟ أبي .. أمي .. لماذا لا يسمعني أحد..؟

أنا أسمعك.. ولا أحد غيري
يسمعك

أنت... أين أنت ؟ ومن أنت؟


أنا قرينك .. أنا الشيطان000 بكل روعته وجماله


أعوذ بالله منك ما هذا المزاح .. لابد أن هذا كابوس وسوف أصحو منه

أعوذ بالله ؟!.. أعوذ بالله ؟! الآن .. الآن أعوذ بالله..الآن
تذكرينها ؟!! لماذا لم تذكرينها طوال حياتك ؟ لماذا لم تذكرينها عند
نزواتك؟ الآن وأنت في سكرة الموت .. الآن..أعوذ بالله ياللوقاحه

موت .. أي موت ؟ .. إنني مازلت صغيرة على الموت

ومنذ متى يعرف الموت صغير أو كبير ؟ إن الموت لا يعرف إلا الأجل
(( فَإِذَا جَاء أَجَلُهُمْ لاَ يَسْتَأْخِرُونَ سَاعَةً وَلاَ
يَسْتَقْدِمُونَ))

الآن ارتاح منك بعدما أنهيت مهمتي

مهمتك!! ماهذا الذي تقول.. ما هي مهمتك ؟

مهمتي التي بدأت منذ خلق الله عزوجل آدم يوم أقسم إبليس بإن يغوي بني
أدم ومنذ ذلك الحين وانقسم الخلق إلى حزبين .. حزب الله وحزب الشيطان

ويحك ما هذا الكلام الذي تقول ؟

هل هو كلام جديد عليك ؟ .. أعذريني إنه خطأي فقد عودتك على سماع
الأغاني وكل حرام

أعوذ بالله منك .. أنا من حزب الله أنا.. أنا أفضل من غيري كثيرا

أنا أفضل من غيري .. أنا أفضل من غيري.. ما أجملها من جمله أعلمها
لإمثالك ..أنظري... اللذين في جهنم في الطبقه الرابعه يقولون نحن أفضل
من غيرنا أهل الدرك الأسفل.. وكلهم في النار..كلهم في ضلال ولا فرق
بين ضلال بعيد وضلال قريب

ولكن أنا ليس لي ذنوب أنا مسلمه ..أنا مسلمه أنا ذنوبي صغيره

لا يا رفيقة العمر إن ذنوبك عظيمه ولكني كنت أصغرها في عينيك وأزينها
وأهونها

(( فَزَيَّنَ لَهُمُ الشَّيْطَانُ أَعْمَالَهُمْ فَهُوَ وَلِيُّهُمُ
الْيَوْمَ وَلَهُمْ عَذَابٌ أَلِيمٌ))


وما كان لي عليك من سلطان إلا أن دعوتك فاستجبتي لي وأنا أزين الحرام
. مثلا. الطبيب يعالج والمدرسه تدرس وأنا عملي أزين الحرام لإبن أدم
أعمل بهذا منذ فجر الإنسانيه.. أ****************.. ألهيك .. أنسيك.. أجعلك تسوفين
في كل توبه ..إنك تطلبين الجنه مرة وأنا أطلب لك النار ألف مرة

(( لَأَمْلَأَنَّ جَهَنَّمَ مِنَ الْجِنَّةِ وَالنَّاسِ أَجْمَعِينَ ))

وما ذنوبي يا رفيق الشؤم ويا عشرة الندامه

أولها وأكبرها وأحبها إلى قلبي ترك الصلاة .. أنا جعلتك تؤخرينها ..
أنا جعلتك تؤجلينها .. ثم جعلتك تهملينها .. ثم أنا جعلتك تتركينها ,
إلى أن مات قلبك إن العهد بين المسلم والكافر الصلاة فمن تركها فقد
كفر وياله من إنجاز

لعنة الله عليك وهل لك غير هذا عندي ؟
غير هذا كثير وكلا منها يكفيني

أتحداك لو أن لي غيرها.. مع أنها الطامة الكبرى

مهلا .. مهلا.. قتل الإنسان ما أكفره ... سوف تموتين وأنت مسجل عليك
أنك زانيه أكثر من مئة مره

أتحداك .. في حياتي كلها لم أعرف رجلا أبدا

صحيح ولكن.. ألم تخرجي في يوم كذا ويوم كذا إلى السوق متعطرة بعطرك
الثمين
نعم وماذا في ذلك ؟

لقد شم عطرك فلان .. وفلان .. وفلان.. ألم تعلمي بإنه أيما إمرأة خرجت
متعطرة فشم الناس عطرها فهي زانيه

ولكنه مجرد عطر

(( وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ))


اتريدين المزيد فوق هذا ؟

وما المزيد فوق هذا ألا يكفي ؟

لايكفي أبدا .. أنا لا أريد لك دخول جهنم فقط بل أريدك في الطبقات
السفلى منها

لعنة الله عليك ..لعنة الله عليك.. ما أشد حقدك على إبن أدم.وماذا
جنيت أيضا؟

عليك إثم فلان .. وفلان .. وفلان .. والقائمه طويله

كذبت فأنا لا أعرف منهم أحد .. فكيف أحمل إثمهم ؟!!

معقول .. معقول .. ما أشد نسيانك ؟ أنسيتي يوم كذا... ويوم كذا ...
خرجت بعباءه ضيقه... متمايلة... متبرجة... ويومها حلت عليك أللعنه في
السماوات والأرض وفتنتي فلان .. وفلان .. وفلان من عباد الله عزوجل
وفتنتهم بك من نظرة إليك بل أفسدت توبة بعضهم وطبعا لك ذنوبا مثل
ذنوبهم

(( وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ ))

ما أشد حساب الله عزوجل .. أنت نار أنا أشعلتها ... أنت سهم أنا رميته
أصيب بك عباد الله

.. لا... سأتشهد لعلي أموت على الشهادة

(( حَتَّى إِذَا جَاء أَحَدَهُمُ الْمَوْتُ قَالَ رَبِّ ارْجِعُونِ))


إنها أقدم كلمة سمعتها من أمثالك ... هيهات هيهات لو كان قبل اليوم
ولكنها الآن أثقل من الجبال على لسانك ... أتحداك أن تنطقينها آن
الأوان لكي نفترق لقد صاحبتك منذ صغرك وذهبت معك كل مكان إلا القبر
فإذهبي إليه وحدك وليظلم عليك وحدك وليضم عليك وحدك

لعنة الله عليك أفسدت علي الدنيا
والآخره

ألا إنهم قادمون.. ألا إنهم قادمون

من ؟..من ؟ .. أهلي ..أهلي

ويلك هذا يوم لاينفع
فيه الأهل ..أنظري جيدا إنهم الرعب بعينه إنهم ملائكة العذاب معهم
حنوط من نار مآ أنتن ريحه .. الم يكشف عنك غطآءك بعد

(( لَقَدْ كُنتَ فِي غَفْلَةٍ مِّنْ هَذَا فَكَشَفْنَا عَنكَ غِطَاءكَ
فَبَصَرُكَ الْيَوْمَ حَدِيدٌ))إنهم يقولون أخرجي أيتها النفس الخبيثه أخرجي إلى غضب وسخط من الله عز
وجل

(( وَلَوْ تَرَى إِذِ الظَّالِمُونَ فِي غَمَرَاتِ الْمَوْتِ
وَالْمَلآئِكَةُ بَاسِطُواْ أَيْدِيهِمْ أَخْرِجُواْ أَنفُسَكُمُ
الْيَوْمَ تُجْزَوْنَ عَذَابَ الْهُونِ بِمَا كُنتُمْ تَقُولُونَ
عَلَى اللّهِ غَيْرَ الْحَقِّ وَكُنتُمْ عَنْ آيَاتِهِ
تَسْتَكْبِرُونَ ))


خاتمه


أختاه واحد سنتيميتر من قلبك فقط 000إجعليه لله... ساعه واحده فقط من
وقتك من يومك000 للصلاة أختاه من يكون
معك في كل وقتك ؟ 000ومن تلجئين إليه في كل أمرك؟000 من سيكون معك عند
وفاتك ؟ 000من سيكون معك في قبرك أنت والظلام وهو ؟ من يكون معك في
المحشر ومن سوف يكون معك هناك على الصراط.. هناك... فوق جهنم وهي تحتك
تستعر000 ويملأ أذنيك صوتها000 وصوت من يصرخ
فيها .. وهي تشتاق إليك ؟.. هناك الله وحده وسوف تنادين 000يارب وما
أحلاها من كلمة 000لو كانت في الدنيا لو تعرفتي على الله عزوجل والله
لتعيشين في سعاده 000 هل الملتزمين والملتزمات يعيشون في حزن وشقاء
إسأليهم .. والله إنني أعلم أناس إذا جاء الليل خرجت منهم الأهات شوقا
لله ويمنون أنفسهم بالنظر إلى جمال وجهه يوم القيامه

أختاه ألا تعلمين أن الله عزوجل مشتاق إليك ..إلى توبتك نعم أنت000
فلانه بنت فلان الله بجلاله وحنانه مشتاق إليك000 إالى متى قسوة القلب
هذه على الله لو علمتي مدى شوقه إلى توبتك وفرحه برجوعك لذوبتي إليه
شوقا.. والله لتذوبين شوقا إليه ولا تعجبي وأعلمي أنه بينك وبينه...
توبة أربعة حروف... فقط... أربعة حروف وتدخلين دنيا لم تدخلينها من
قبل 000 دنيا عجيبه000 ولا تملي توبي ثم توبي ثم توبي وابدأي الآن
وصلي أول فرض يمر عليك وقولي لنفسك كفى اليوم سأغير حياتي....اليوم
سأعود إلى الله



أنشرها لعلك تكون سببا وما يدريك

(( وما يدريك لعله يزكى* أو يذكر فتنفعه الذكرى ))

om_adnan
08-20-2012, 03:43 PM
بسم الله الرحمن الرحيم


كل عام وانتم بخير


ينعاد عليكم بالخير,كل عام وانتى بخير اختنا زينب ,ربى ايخليك ويهنيك,كل عام واعضاء منتدانا الحبيب بخير,احببتكم فى الله ,ربى ايدوم صحبتكم الطيبه,من اجمل ذكرياتى كانت معاكم فى رمضان وكنتوا لى وطن فى الغربه,لى عودة احبتى مع عيدى فى بيتى.

om_adnan
08-20-2012, 03:47 PM
اختى ام نسيبه...لم افهم القصد من كلامك عن الموت فى موضوع دردشه ولكن بعد اذنك,هل فى امكانيه تحذفيه ,ممكن اتنزليه فى موضوع خاص بيك,ان شاء الله من انكون ثقلت عليك,عيدك سعيد ان شاء الله.

om_adnan
08-20-2012, 04:27 PM
طبعا مره تانيه....كل عام وانتوا بخير

الساجده....جيبى لى القرينات نأكلهم حتى وكان يتفترشوا,صحتين وعافيه حلاواتك.
مغتربه.......يا عسسسسسسسسل.
الصابره......تهنئتك وصلت للقلب.
مووده......اخر عيد فى العزوبيه على خير.
حبيبتهم....وعليك السلام...سلمها,اللى مع انشغالها,كتبت معايده.
ام امير......ايجنن الفيديو...عجببببببنى.
ام نسيبه....تقبل الله منا ومنك الاعمال الصالحه.
لوبا.......ماشاء الله,فعلا وفقت مع ولدك فى العيد,ان شاء الله حوشكم ديما عامر.

ام امير
08-22-2012, 08:09 PM
طق طق طق عويــــــــلة
كيف حالكم تى وينكم
ام عدنان
الصابرة
ام سارة
مغتربة 7
دانية
حبيبتهم
لوبا
ام ميرال
موودة
لوتى
بارنى
نسمة
الساجدة
انهار والله استاحشتكم واستاحشت تهدريزكم :(

om_adnan
08-22-2012, 09:02 PM
اهلين ام امير,ما تستاحشى غالى ,شنو اموركم بعد العيد,رجعنا للروتين الاول,شهر رمضان كان ضيف خفيف,ينعاد على الجميع بالخير,انفكر نبدأ نصيم من جديد,بإذن الله,سلامى لكى وللجميع.

نسمه ليبيه
08-24-2012, 05:35 AM
السلام عليكم

كل عام والجميع بخير

ان شاء الله يعاود عالجميع بالصحه والعافيه

ليا ايام عالمنتدى
رايفت عليكن كلكن
وتو عن اذنكن نشوف شن هلبنى من اطايبكن

ام ميرال
08-30-2012, 02:38 PM
السلام عليكم
كيف الغاليات انشاء الله الكل بخير
وكل عام وانتم بالف خير ولو متأخره
كنت ناسيه الباسوورد هذي مشكلتي المعتاده
ام امير تشكري ع السؤال اميره بذوقك والله
ام عدنان والله صادقه ولينا للروتين الممل محلا رمضان وتعب رمضان عنه
ههههههههههههه نسمه ليبيه اانا شفت من برا ان زاد عليك مولود خاشه مندفعه بنبارك بس ما القيت الخبر هنا فدورت القيت الخبر قديم والبيبي مااشاء الله توا
عموما 1000 مبروك مزيودك ويتربى في عزكم يا رب

دانية
08-30-2012, 03:57 PM
سلامات لكل الغاليات ... ان شاء الله الاخبار كلها عال العال ..

شنو شكلكن هجرتن الكوجينة والا كيف صار معش حد ايخش عالدردشة امتاعت الكوجينة..

مع انه بجديات الركن هاذا كان الركن الاحلى عندي ...

عالعموم المنتدى دائما مشرق بعضواته الناشطات ...

luba
08-30-2012, 04:27 PM
اهلين بيكم منورات وانتم طيبات وسعيدات

دندونه ماهجرناه المطبخ اهو مازال في نشاطه بس شكلك انت اللي هاجرتيه

هيا ورينا حتي من غداك وعشاك وخاصة الشرق تختلفوا علينا مرات في الطريقه

وحاجات عندكم ماعندنا فطامعين منك ومن نسومه تورونا شنو في عندكم في شرقنا العزيزالغالي

سواء معجنات او اطباق راني اراجي فيك وبيكم ومعاكم يرتقي المنتدي وبدون الرود والمشاركات يخمل ويتعب من الداخل والخارج

om_adnan
08-30-2012, 09:12 PM
اهلين لوبا....يعز مقدارك بمعزة اهل الشرق,حتى انتم تعزوا علينا,انتى بس تأمرى,يعطيك الصحه ماقصرتى فى المنتدى.

barney
08-30-2012, 09:48 PM
السلام عليكم ورحمة الله وبركاته
كيف حالكن ليا زمان ع الصفحه هذي لكن انخش للمنتدى يوميا وانشوف في اكلاتكن ماشاء الله عليكن
صارت امعايا حاجه في المنتدى نبي نحكيها وقبل مانحكيها نبي نترحم ع (السمحه) وان شاء الله ربي يجعل مثواها الفردوس الاعلى ويتغمدها برحمته ويرحم جميع موتانا وموتى المسلمين . ونبي نشكر (نسمة ليبيا وام سارة وام عدنان وزينب) الله يفتحها عليهن ويكتبلهن الاجر العظيم يارب العالمين لانهن كانن ديمة ايصلحللي في كلمة ان شاء الله والحق ماكنتش فاهمه شن اللي يبني ما انلصقاش لانه حرام كنت نكتب فيها بهالطريقة (انشالله) فكنت نحسابهن يقصدن اني ما انلصقش الله في انشاء نحساب روحي عدلتها قعدت نكتب فيها بهالطريقة (انشاء الله) لعند نزلت امبطن الزنبقه وعلقت عليه زينب ان السمحه الله يرحمها ويرحمنا اجمعين امنزلاته فلما فتحت ع صفحت المرحومه بإذن الله
القيت العبارة هذي


http://forum.hawahome.com/nupload/10153_1285699730.gif

ففهمت البنات شن يقصدوا بارك الله فيكن اجمعين وآسفه عالاطاله
واللي خلاني نكتب تجربتي القيت (ام ميرال) ربي ايسلمها كاتبتها نفس خطئ اني( انشالله) ارجو التعديل يا ام ميرال وان شاء الله في ميزان حسناتك
والسلام عليكم ورحمة الله وبركاته

om_adnan
08-30-2012, 09:56 PM
وعليك السلام بارنى ,شفتى من المنتدى,السمحه خذت اجر حتى وهى متوفيه,اطال الله فى عمر الجميع, ونحن اخوات انذكرو بعض ,ونعم الصحبه الطيبه.

luba
08-30-2012, 10:32 PM
اهلين ام عدنان استفقدناك هاليومين خش وطلعه عالسريع

بارني بارك الله فيك وربي يرحمها ويغفر لها كيف حالك وصدقتي علي الخبزة

حتي اني كيفك اه محلاها ومحلا صنتها وهي جايه سخونه من الكووووشه

barney
08-30-2012, 10:32 PM
ربي ايسلمك يا ام عدنان وانت ديمة حاضرة الله لا اتغيبك كيف حالك وحال ابنياتك
ان شاء الله بخير ياربي مع اني نتمنى نعرف من شن توفت السمحه الله يرحمها
ابعتيلي صورة من الجلي اللي قلتيلي مفيد للصغار وايحبوه
ربي ايسلمك يارب