المساعد الشخصي الرقمي

مشاهدة النسخة كاملة : [دردشة مطبخية ] يومياتك يا ليبية في الكوجينة



الصفحات : [1] 2

أمـ ساره
07-21-2012, 01:04 AM
السلام عليكم ورحمة الله وبركاته


عضواتنا الحلوات الغاليات

صحة شريبتكم

وربي يتقبل صيامكن وقيامكن يارب

[فقط الأعضاء المسجلين يمكنهم رؤية الروابط]

[فقط الأعضاء المسجلين يمكنهم رؤية الروابط]

هنا

موضوع خاص بالدردشة والفضفضة بعد تعب المطبخ وحوسته

كل وحدة تخش تقولنا على يومها شنو دارت وشنو مفكرة بدير

وكيف تقسم في يومها ووين تفطر ومع منو ؟؟؟ يعني قصقصة من الأخير

وبعد المغرب تنظف حوستها طول او تشرب قهوتها وترتاح شوي ))))) زي حالاتي

[فقط الأعضاء المسجلين يمكنهم رؤية الروابط]

[فقط الأعضاء المسجلين يمكنهم رؤية الروابط]
وربي يقويكم ويقوينا ويتمم رمضان علينا بالخير والهني


هي خشوا ووسعوا خاطركم في أي وقت نهار ليل زي بعضه

الي تفضى شوي تجي اطل علينا راكم تنسوا


واني رح نرجعلكم بعدين اليوم النت حالة مقطوع طول النهار

سليمتكم توا

ام ساره وعبدالعزيز
07-21-2012, 01:21 AM
ام سارة رايفت عليك احبيبة
كيف حالك وحال بنوتاتك وكل سنة وانتى طيبة
نا اليوم فطرت عند اعربي بكرة ان شاء الله نحكيلك بالتفصيل قوليلي شن تبي اديري فطور بكرة عشان نقل منك:p

ام ساره وعبدالعزيز
07-21-2012, 01:35 AM
وينكم يلا بلا ش كسل شاركنا

أمـ ساره
07-21-2012, 01:45 AM
مرحبتين بالغالية أم ساره وعبد العزيز

بارك الله فيك وخيتي ويهنيك ويعطيك ما تتمني

تقبل الله صيامك وقيامك أختي


بالنسبة لي غدوة عندي عزومة لو ربي كتب

وقاعدة نفكر شنو بندير حايرة

الأكيدة ان شاء الله الشربة والبيتزا والبوريك هذا ضروري

ونفكر في المحاشي لو ربي كتب

والباقي يصير خير في النوم نفكر فيه


ولو لحقت انصور ان شاء الله

وانتي شنو مفكرة وشنو درت اليوم وصورتي او مازال ؟؟

أمـ ساره
07-21-2012, 01:46 AM
ايه معاك حق اليوم كلهم مش موجودات مش عارفة وين هاربات

حتى احني صايمات راهو

تعالي انتي وياها وياها خير لكم




بالنسبة لي لو فصلت معنها النت دراها فيا

اغلب النهار ما عنديش

الساجدة لله
07-21-2012, 01:53 AM
اااه رجليا ورجليا ورجليا

يقول اول مرة نوقف في المطبخ

المهم اليوم فطوري كان فروبي + شربة عربية + شربة شوفان + طاجين جبن بالبطاطا امي بعتتهولي + سلاطة باذنجان تركية + سلطة باذنجان جديدة رح انزلها ساهلة وبسيطة ومتاخدش وقت بكل + سلاطة عربية + بوريك بف بستري بالسبانخ + بيتزا وخبيزة ملفوفة +بوريك بالمفروم عادي + بوريك بالبطاطا + حجيبات بالجلاش واحجيبات بالبف بستري+ رز مخلط ضروري يوميا ندير رز فااستفتحت بالرز المخلط + السحور كان كاسترد بالموز من امبارح باقي عندي + جيلو فرواولة وموز

هذا انا كان فطوري هكي , طبعا عزوزتي الله يحفظها لازم اول يوم تلم كناينها ونفطورو مع بعض وهي تفطر مع ولادها في سفرة الرجالة

اول يوم كان يهبل يهبل بس متعب متعب

يالله باانتظار فطوركم ياسمحات

ام ساره وعبدالعزيز
07-21-2012, 01:57 AM
ربى يساعدك ويتم العزومة على خير انا اليوم فاطرة برة وبكرة ان شاءالله نحكيلك
والله يا ام سارة انشوف فى المنتديات ماشالله ماينفتح الموضوع نين يوصلوا لصفحة مية ونحن نقعدوا في الصفحة الاول سنة

ام ساره وعبدالعزيز
07-21-2012, 02:01 AM
الساجدة ماشاء الله ان شاء الله ديمة ملمومين ونبى منك طريقة سلاطة الباذنجان

الساجدة لله
07-21-2012, 02:12 AM
انا درت 2 بالباذنجان اي وحدة وحدة مدايرتها من قبل في الركن عندي تو نعطيك الرابط

[ مشاركة في مهرجان الصيف ] سلطـةالباذنجان من مطبخ الساجدة لله ([فقط الأعضاء المسجلين يمكنهم رؤية الروابط]مشاركة-في-مهرجان-الصيف-سلطـةالباذنجان-من-مطبخ-الساجدة-لله)

اما السلاطة الجديدة مبتكرة مني عجبت العيلة

وهي باذنجانات مشويات ومقشرات واطحنيهم بالمووس + فص توم + لبن رايب مقدار بالعين يعني لعند ماتحسي ان السلاطة تكونت عندك

واندمجت + 1 ملعقة مايونيز لايت + ملح + رشة كسبر مرحي وعند التقديم ديري على الوجه شوية زيت زيتون وحتى في الخليط زيت زيتون

وتقدم راهي قنينة رح انزلها في موضوع بروحها في الركن عندي

مغتربة 7
07-21-2012, 03:04 AM
السلام عليكم وصحتين شربتكم
ماشاء الله على الناشطات والفالحات

اني اليوم زوجي مش فاطر معنا مسافر غدوة يروح ان شاء الله
درت فطوري اني وصغاري

شربة وبيتزا وسمبوسك وبطاطا مبطنة

وغدوة مازال مافكرت حتى بالكذب شن حا اندير

أمـ ساره
07-21-2012, 03:19 AM
أم ساره وعبد العزيز اصبري وان شاء الله تلقي هلبة مشاركات

قاعدين الجماعة ينضموا في وقتهم شورهم

ان شاء الله نشوفوا هلبه مشاركات


ماشاء الله ساجدة عزومة كبيرة صحة على قلوبكم

وحلوة لمة العيلة في رمضان والزحمة والدوشة

الصابرة
07-21-2012, 04:23 AM
السلام عليكم
اني ديمة نمشي نفطر في حوش العيلة اهل راجلي
ومانفطرش في حوشي الا لما يكون عندي ضيوف
لكن ديمة اندير في حاجات نرفع فيهن معاي
ودرت فطيرة خضراء وعسلة بنزلها توا
والفطيرة كان فضيت انزلها
لاني اني معكوسة الحكاية عندي انتوا ترقدوا تنوضوا اديروا فطور
اني اندير اللي بنرفعها بعدين نرقد تخيلوا اني نكتب ونشتغل في الكوجينة
هذه حكايتي

وخيتي الساجدة سلاطة الباذنجان اللي قلتي عليها اني اندير فيها بس بدل اللبن اندير في زبادي طبيعي وفعلا طعمتها تهبل

ترهونيه حره
07-21-2012, 05:33 AM
مرحبا اخواتى بالنسبه لليوم الاول العيله كلها ملتمه
وعلى قد ما كان متعب بس حلوه اللمه والماعين ماتموش ابدا ههههههه
وبالنسبه لفطورنا شربه وكفتاجى وبوريك ومبطن وحلزونه
وبيتزا وكفته دجاج ومحشى وطاجين جبن اما بالنسبه للحلو
لقمه والتمريه وتشيز كيك واكيد المهلبيه

om_adnan
07-21-2012, 05:50 AM
وعليك السلام الساجدة ...شنو انقولك,مع إنى انحبه وانموت فيه,لكن نحن الليبيات وخصوصا أعضاء المنتدى ,مانريحوش روحنا,فى رمضان نبوا انديرو كل حاجة,فطرنا فى حوشنا بروحنا كالعادة,اليوم فطورنا ,شربتنا الليبيه,ابراك درناوى؟,مبطن كرنب,سندوتشات تن,مقلوبة,فتوش ,بصراحة لو فيه فيديو معاى فى المطبخ أوكى لكن تصوير صعبه شوية,وحوستى سلم بناتى,واليوم ما فيش حلو,كان خاطرى اندير لقمة لكن ماصارش,إلى اللقاء غدا.

luba
07-21-2012, 06:28 AM
صحة صحة علي الكل ام ساره تسلمي علي هاللمة

ام عبدالعزيز وساجدة وترهونية يابختكم تفطروا جميع ماحلاهم هاللمات
نموت عليهم وحتي تعبهم مانحسة
صحة علي الكل
فطوري كان شربة عدس وارز بالشاورما والبيض الاسكتلاندي والكريب باللحم وسلطة سبانخ
وقبل بندير بوريك النشا مالحقتش
بنااااات اعلان نزلت صور فطوري في الاطباق الرئيسية هالله هالله علي الردود وخشوا انتم
فاطرين لانكم معزومين علي السفرة

واااو كلكم راقدات في المطبخ من الصبح شكلكم تخشوا العفو ماخليتن شي لباقي الشهر ههههه

أمـ ساره
07-21-2012, 10:14 AM
ماشاء الله يا بنات

ان شاء الله سفركم عامرة يارب

وبالهي والعافية الي درتوه وكلوته سلم ايدياتكم


نبي مساعدتكم عندي عزومة ونبي نشكل ونوع فيها

شنو تنصحوني وخياتي

الطيب قلبي
07-21-2012, 02:03 PM
السلام عليكم
كل عام والجميع بخير
اليوم تاني يوم في رمضان شنو ناويين اديروا فطوركم

آمال
07-21-2012, 03:11 PM
أخواتي :

بالنسبة لي كما تعرفون أنا تحت التدريب أو سنة أولى مطبخ :
المهم
أولا : أولا نسقت مع الشيخة اللي في المسجد شبه قريب مني من أجل مراجعة حفظ القرآن .ويستر الله بسبب الهبوط في السكر على هذا الاتفاق اللهم يسر أمري
ثانيا : اختكم دوختني هذه المعجنات هذه للبتزاء وهذه للخبزة الملفوفة وهذه ل ... وهذه ل .... والله العظيم دخت من كثترة الوصفات فقررت ان اكلم احد الخبيرات في المعجنات وهي تعتبر طباخة ماهرة عندنا في الحي لذي اسكن فيه وكبيرة في السن جزاه الله عني كل خير ذهبت اليها و قلت لها بالله عليك اعطيني وصفة معينة أنا دخت من كثرة الوصفات وشرحت لها كيف تلخبطت من كثرة الوصفات وريحني اختك مشغولة وهبطلي السكر

نظرت لي وقالت طيب :
مع العلم هي تعزني ودائما تساعد في .

سوف اعطيك وصفة للحار والحلو والحمد لله كانت هذه الوصفة ممتازة ومفيدة واسم الوصفة ""* عجينة كل شيء """* والله يا أخواتي ارتحت وهذه الوصفة تعتبر سر طبختها . واذا سنتحت لي الفرصة سوف اضعها ولكن لا اعرف اين في أي قسم أضع الوصفة اسمها """*عجينة كل شيء للحار والحلو """"*...

وأسئل الله أن يشفيني وان الله يسر امري

والسلام عليكم ورحمة الله

om_adnan
07-21-2012, 03:15 PM
اليوم عرفت روحى أكيد امس كنت صايمه,لانى دخلت على اساس انه موضوع الساجدة,ان شاء الله ياأم ساره تنسترى وتجيك عزومه كيف ما تبيها,انا متأكده ان حتكون امورك تمام,بس طبعا لازم من التعب,اليوم مش عارفه شنو اندير,فيه ابراك من امس,ممكن اندير بوريك فى الفرن ,بيتسا,...انشوف,نحب انقول لجماعة طرابلس ربى ايهنيكم برمضان وفرحانه ليكم وعندى امل حتى لاهلنا فى سوريا,السنه اللى فاتت كانت قلوبنا معاكم,رمضان اللى فات ,يخلى الانسان يشعر بقيمة اشياء كان دائما يعتقد انها من البديهيات

om_adnan
07-21-2012, 03:20 PM
وعليك السلام أم رميصاء...خيرك شغلتينا عليك,ردى بالك من نفسك,حتى لو اضطرتى تفطرى-ولا تلقوا بانفسكم الى التهلكه-,توا النهار طويل,اول مره من ٣٣ سنه,عليك بالخشاف ممتاز ,ربى يشفيك أخيه.

luba
07-21-2012, 03:24 PM
ام ساره ديري بيتزا وشربة ورز مخلط او براك ومعاهم بوريك الباف او النشا
سلاطات متلا عادية الخضرة وتانية جرجير او سبانخ او الجزر اه ديري
.فطائر الدجاج لي زينب وديري عصيرسمودي لي ام عدنان ماديريش هدا كله اختاري مايناسبك وربي يعاونك ويعينك

آمال
07-21-2012, 03:29 PM
بارك الله فيك أختي أم عدنان

لا تنشغلي علي
أصلا اليوم تعبت كثيرا مع العلم اني ...

الحمد لله
بارك الله فيك على سؤالك

الساجدة لله
07-21-2012, 03:53 PM
بعيد السو عليك ام رميصاء بعيد السوووو
حبيبة عليك بقمر الدين والخشاف وبالذات قمرالدين

الوصفة احدفيها برشادة اهني اكتبيها ولما اطبقيها حطيها في واحد من اركان المعجنات

الساجدة لله
07-21-2012, 04:03 PM
ام سريوة ديري شريبة ورز بالخلطة وبوريك البف بالسبانخ واخر بالمفروم

وبيتزا ونفس العجينة متع البيتزا احشيها دجاج وديريها زي التارت او ديري طاجين البف برجر ( الهامبرجر) او تارت الدجاج متع ام عبدالعزيز وكانيلوني

والسلاطات ديري سلاطة عادية وسلاطة مشوية

اما اليوم فطوري

شريبة عربية + رز مخلط من امبارح قاعد عندي بنسخنه + صدور دجاج محشية + بوريك بف باللحم والسبانخ + بيتزا + سلاطتين متع امس بنديرهم هما اليوم + مش عارفة شن تاني
يالله خلي نغطس ونولي تاني

آمال
07-21-2012, 04:13 PM
بارك الله فيك اختي ساجدة

سوف اضع وصفة لخبيرة في المعجنات وعندما اطبقها سوف اضع الوصفة بعون الله

عجينة كل شيء

سر طباخة حيينا بارك الله فيها أعانتني في رمضان

3 أكواب دقيق _ 3 ملاعق حليب مجفف - ملعقة كبيرة خميرة بيرة - ملعقة كبيرة بيكنج بودر - 1/3 كوب زيت - 1/3 كوب سكر في الحلو وملعقة في الحار - كوب ونصف ماء .

ملاحظة الدقيق احيانا يشرب الماء لا تتقيد به
واذا اردت ان يكون الدقيق فاخر اضيف ملعقة نشا الى كيلو دقيق .

وموفقات اخواتي

luba
07-21-2012, 06:41 PM
ان شاء الله لاباس ام رميصاء كولي هلبه زيتون
اني سألتلك دكتور قال بيكونوا اللي عندهم هبوط مالهمش نية في الاكل وخاصة الحلو
فقالك كولي زيتون مالح هلبه واشربي مية وبعدين كولي حلو زي حاجة معسلة او عصير الباكوات زي العنب
هدا كله ساهل عدي طبقي فوا مادمتي .............ام رميصاء هيا انفضي عليك التعب وتعالي معانا وانشطي لي اهل بيتك
ربي يدوم عليك الصحة

luba
07-21-2012, 06:45 PM
ساجدة صحة فطوركم وكله قنين لكن وين صور السفرة مش معانا هكي انت وام عدنان
تسمعونا وماتورونا

اني اليوم فطوري ان شاء الله مازال مابديتش فيه
عصير خوخ من زينب
وكفتة الارز من زينب
وارز من امس بنسخنه هو والبيض الاسكوتلاندي
وشربة وبيتزا او ممكن ماندير الكفته مازال حايرة
لانه نصبحوا عطشانين اكتر من جيعانين وكله بقعد ومانسحروش الا حليب
او قليل من الفطور
وشن صار في ام ساره

أمـ ساره
07-21-2012, 06:48 PM
أم رميصاء ان شاء الله طهور وخيتي

وربي يشفيك ويسهل عليك الصيام يارب




حتى اني اليوم تعبت وعطشت من الساعة 12 واني في المطبخ

درت تشييز كيك ومهلبية التوفي وان شاء الله بعدين بندير سلاطة فواكه لو لحقت

هذا الحلو مع القهوة بعد صلاة العشاء



والفطور

شربة ليبية وبيتزا وبوريك محشي دجاج وبطاطا وطاجين بطاطا ودجاج ودرت محاشي فلفل وضولمة

وبندير سلاطتين وحدة مشكلة وحدة باذنجان

ودرت بوريك الباف باللحم المفروم لكن خسارة طاب هلبة من تحت

ونفكر ندير رز أصفر زوجي يحبه


وتوا مازال البيتزا بس مش طايبة والباقي شبه جاهز كله ولله الحمد

والعصير طبيعي ان شاء الله ممكن اندير نوعين واحد خوخ والثاني كيوي وليمون




وربي يبارك فيكم وخياتي على الإقتراحات الحلوة لكن ما قدرت نخش بكري

ونقرا ساحوني ان شاء الله ناخذهم للأيام الجاية كان ما انتكست وتعبت من جديد



أم عدنان الله يبارك فيك ويهنيك وخيتي

luba
07-21-2012, 06:57 PM
صحة عليهم
وعليك ربي يدوم صحتك وكلهم يهبلوا اللي دايرتيهم ها ماتنسيش
اتصوري السفرة ولو نصها ونزلينا المهلبيه بالتوفي عشان نطبقها مانعرفهاش

آمال
07-21-2012, 07:05 PM
جزاكم الله خيرا
شكرا لوبا على النصائح
ان شاء اتبعها بوركتم

والان اعمل في الخشاف لأختنا زينب محمد
وشربة باكو عصير عنب يستر الله
والحمد لله

لوتي
07-21-2012, 07:22 PM
جيت موخرة أمس قريت ومرديتش منورات الليبيات الفالحات ربي يعطيكن الصحة
لا باس أم رميصاء عندك فقر دم وإلا شنو طهور إن شاء الله تعالى
أما أني فوضعي مختلف في المطبخ عامل مساعد إنخش إندير حاجة أوإتنين حسب الجو ومرات مندير شي واليوم درت المهلبية وقوارب التونة لزوبة وبديت إنوتي في سفر الفطور وتوا إمقعمزة نقرا قي يومياتكن الحلوة
أم سريوة الأخوات ما قصرن ربي معاك إن شاء الله وتنستري في عزومتك لكن زي ما قالت لوبا نبو طريقة مهلبية التوفي

الساجدة لله
07-21-2012, 08:03 PM
السلام عليكم

رح نحاول نصور سفرتي قبل الهجوم عليها من 4 محاور

هههههههههههههههههههههههههههه

بنت حواء
07-21-2012, 11:49 PM
ماشااااااااء الله على موضوعك ياأم سارة
وماشاء الله على سفيراتكم وفطوراتكم الحلوة تبارك الرحمن


شنو ياساجدة هذا عشاء أول يوم ولا مهرجان؟؟
[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])




ومغتربة ماشاء الله هذا راجلها مهناش امال لما يجي كيف


[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])




هههههههه صحة وهناء على قلوبكم ياحبوبات سهفتونييييييييييي
بنمووووووووت من الجووووووووع والعطششششش

[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])



ههههههههه

أنا ياوخياتي راجلي خطرله بيدير برنامج صحي & رجيم
ومافيش ولا حاجة طايبة
وأنا بنسايره طبعا
إهئ إهئ إهئ

[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])




كل الأكل عبارة عن:

فاكهة _ تمر _ لبن _ زبادي _ بسيسة باللوز _ قهوة عربية
وبسسسسسسسسسسس

[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])





يوم في الأسبوع نمشو للعيلة (أهل راجلي) ناكلو مالذ وطاب ههههههه
وبعدها

[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])








خلااااااااااااااااااص



كان لحقت وصورت حويجة يوم نمشو باهي وكان هذا
إهئ إهئ إهئ إهئ

[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])

إهئ إهئ إهئ آآآآآآآآ أهاااااي



هههههه يلا سلااااااااااام
ورمضانكم مبارك وكل عام وأنتم بخير

أمـ ساره
07-22-2012, 12:11 AM
حاضر يا لوبا ويا لوتي ان شاء الله انزل تطبيقي للمهلبية

وعلى فكرة اني منزلتها من قبل لكن بنزل صور اليوم ان شاء الله


وبالنسبة للسفرة الحمد لله لحقت صورتها في الأخير ان شاء الله انزلها لكم


وتوا كيف كملت التشيز كيك وماظال شوية حوسة في المطبخ باقي الماعييين

سبحان الله هي الكوجينة زي صالة الولادة ما تنضم بكل



بنت حواء

معقولة رمضان كله هكي بتمشيه والله ربي يصبرك



باقي وخياتي

صحة شريبتكم كلكم وربي يتقبل منا ومنك ان شاء الله

الساجدة لله
07-22-2012, 01:25 AM
لاياسمحة مش مهرجان مايغركش الاحتفال متع اول يوم لان المحروس ماياكلش وباقي افراد الكتيبة متاعي

يدللو وبصدق ماياكلوش الا في السلطات هههههه لدلك اللي طيبته من امس قاعد منه الرز وعجينة البيتزا قسمتها على امس واليوم

يعني مايغلبونيش بس يبو التنويع ومايبوش الكترة اخخخخخخخ طبعا الاستاد يبي يوميا رز والسلاطات لازم منهم نقعمز في المطبخ

نعصر دماغي ونقلب التلاجة واللي مانلقاشي نبعت لعزوزتي كان مالقيتاشي نبعت طوول لدكان

ربي يعينا وخلاص

أمـ ساره
07-22-2012, 03:12 AM
ربي يعينك سجودة ويعين دماغك على كثرة التفكير

لكن بجد كويس انهم يحبوا السلطات فيها فائدة


تعرفوا يا بنات من كثرة التعب لين ليقيت روحي راقدة بكري ومخلية بنتي تلعب جنبي

وتوا نضت كليت وبنولي نرقد شوي قبل الفجر ان شاء الله


وأحسن شيء ان فطوري غدوة واتي

ناقصه الشربة والبيتزا بس

ياسرني اليوم من الساعة 12 الظهر واني نجري في الكوجينة

لين رجليا يسطروا من كثرة الوقوف

الساجدة لله
07-22-2012, 03:38 AM
صحة صحة ام سريوة

الحمدلله فطورك واتي , باهي في من رجالة يتشرطو في الاكل هلبه لين يفددو المراة

انا مايتشرطش ويتشرط في نفس الوقت يعني يعطيك الحاجات اللي يحبها ويقولك نوعي بيها

متلا الرز يبي كل يوم رز بس يبيه كل مرة نوع وهكدا والمشقشقات هادم انا ووقتي بس اللي لازم منه

سلاطات اليوم كررت سلاطة الباذنجان التركية ودرت سلاطة مشوية ومعهم سلاطة عادية

بس بكرا اكيد في تغيير

بلاهي عليكم خشو بكرة بدري بش نتشاورو في شن نبو نطيبو

تفكيري اصابه التصحر

الصابرة
07-22-2012, 05:59 AM
السلام علكم وخياتي
شكلي فايتني الجو كله
بحكم اني نفطر في حوش العيلةانروح موخر
وان شاءالله الف لاباس عليك ام رميصاء
وان شاءالله ربي يعينك ام سارة
والله تنحسدي وخيتي الساجدة ياريت يتشرط راجلي المهم ياكل
ما فيش ماكلة بكل وهو نازل النص من الخدمة
وعييت جربت جميع طرق التسمين الصحية ماصار شئ
وبالصحة والعافية لوبا
وصحة ليك لوتي من قدك حلوة خشت الكوجينة بالطربات
معقولة بنت حواء بتقضي رمضان كله هكي ربي يكون في عونك هو يدير رجيم وانتي كوليها في عظامك

om_adnan
07-22-2012, 06:27 AM
يابنات شنو قصة الرجلين,حاله من نقدرش نوقف,مش عارفة المشكلة وين,هذا مع بناتى ايساعدوا فى ومازال,انصبر فى نفسى انقول كم يوم و نتعود على الجو,اليوم درت لقمة قاضى جت مش عادية مع انى درتها مستعجلة.

الصابرة
07-22-2012, 06:59 AM
بالصحة عليك وخيتي ام عدنان
وقصة الرجلين لان نحسوا في ضغط علينا ونجروا من حاجة لحاجة عشن الصيام
فترة بس وبعدين يصبح الامر عادي

بنت حواء
07-22-2012, 10:54 AM
ماشاء الله ربي يعاونكم وصحة وهناء على قلوبكم

لاباس طهور ان شاء الله ياأم رميصاء

أم سارة عندك حق أنت تاعبة وزايدة روحك تعب تريحي شوية
مافيها شيئ كان كلو حاجات فاضلة
غير الشربة بس لازم تكون طازجة

سجودة ماشاااااااااء الله على عويلتك اللي ياكلو في السلاطات
وين تلقي اللي ياكلوهم
أنا خاطي السلاطة العربية متاع خيار وطماطم وخس ولا مسير مايحبو حاجة
سلاطة البطاطا هه يعني وماتجرأتش نديرها للضيوف كل مانجي بندير سلاطة
يقوللي راجلي لا لا مايعرفوهاش مرات ماياكلوهاش (شوفو التشجيع) هههههههه

على فكرة سجودة جربي سلاطة البطاطا ساهلة وحلوة راهو (دعاية) ههههههه
هذا كان مش دايرتيها طبعا ياموسوعة الأكل الصحي ;)

أنا الله غالب عليا توا صيامي بعد رمضان بننتقم فيه من الأكل :p


وهيا بالصحة عليكم وربي يبلغكم رمضان صيام وقيام
ومطبخ :o

سلاماااااااااات

أمـ ساره
07-22-2012, 03:27 PM
سجودة

معاك حق المفروض نخشوا بكري ونكتبوا شنو مفكرين

حتى نستفيدوا من بعض




صابرة

ان شاء الله ما يفوتك شيء اول ما تروحي خشي وهدرزي عادي



أم عدنان اسكتي رجلي لحد اليوم يوجعوا من التعب نايضة 12 ونص الظهر



بنت حواء

الله يسلمك وخيتي ونحاول نرتاح اليوم مقعمزة بالسيف

والله ربي يعينك على رمضان هذا كيف صابرة من غير تطييب




اليوم فطوري ان شاء الله

شربة وبيتزا وبندير بوريك دجاج وبطاطا

وعندي رز وظولمة وفلفل محشي وطاجين بطاطا ودجاج من أمس

ومعاهم سلاطة مشكلة وطبعا العصير الطبيعي

موودة
07-22-2012, 04:09 PM
كيف حالكم انا جديدة هنا ونقوللكم الحق
مغصوبة
اكيد معرفتكم كنز
لـــــــــــكــــــــــــــــن " المطبخ" انا وياه عداوة دائمة وكره ازلى
لكن لأن فرحى بعد العيدين مضطرة نتعلم
وبجد فرحت لما شفت منتدى ليبي خاص بالمطبخ
ليــــــش؟
عشان مليت من تحميل كتب فيها وصفات غريبة ومفردات اغرب ومكونات حتى كان موجودة ماعندى من يجيبها ليا
لذلك اخواتى عزيزاتى انتن منقذاتى
اولا
ياريت تقبلونى معاكم ودفونى حتى دف عشان نتعلم لأن ماما مش مساعدتنى عالتعلم وتحب تطبخ بروحها وحتى لما امس دخلت معاها المطبخ وبديت نصور فيديو كيف تطبخ تعقدت منى ولما نقوللها شنو المقادير تقولى عينك ميزانك؟؟؟
وانا وين عينى وين ميزانى
اول حاجة نبيها خطوة خطوة وين نلقى الوصفات الليبية العادية للمكرونة والرز والشربة والطبايخ بأنواعها
ساعدونى بيش حتى انا نهدرز ونقوللكم شن سويت
اختكم
مودة

دانية
07-22-2012, 04:09 PM
انا اليوم واعية تعبانة من الصداع لكن لازم بنصبي واندير الفطور ...وفطوري اليوم شربة طبعاً سيدة السفرة,, وكفتة دجاج ,, وقلاية كبدة ,, ومكرونة بشاميل ,, وبيتزا ملفوفة ,, وماننساش خبزة الحوش بنتها فايحة بالكمون الحلو,, وعصير فريش في الخلاط ممكن موز بالحليب ..

ولازم حاجة حلوة عشن (سي السيد) يحب لما ايجي من التراويح يلقى حاجة حلوة .. انفكر اندير لقمة القاضي من زينب محمد ...

بنت بلادي
07-22-2012, 04:13 PM
ربي يعطيكم الصحة ... ويقويكم
أختي أم رميصاء ... وآمال ان شاء الله لابأس عليكم ... كفارة ذنوب بعون الله
أم رميصاء للهبوط خوذي تفاحة واضربيها في الخلاط مع كوب عطر وشوية سكر أو عسل زي ما تحبي
أو خوذيلك سفة من حب الرشاد ... وبالشفي على قلبك

بنت حواء
07-22-2012, 05:48 PM
(بنت بلادي)
شكرا على اهتمامك بأخواتك والوصفة الرائعة لكن ماقلتيش شنو عشاك :confused:

(دانية)
صحة شريبتك وخبيزتك ولقيمتك وفطورك كله رمضانك مبارك ان شاء الله

(مودة)
أهلا بيك بيناتنا
في المطبخ الليبي تجدي مايسرك ويعلمك بسهولة ان شاء الله
تصفحي الأقسام والوصفات الرائعة
وستجدينها بإذن الله مصورة خطوة بخطوة موضحة بالمقادير
ويتهيألك الطبخ صعب والمطبخ ممل
لكن لما اديري حاجة واتنين وتتعلمي تبقى زي الهواية والفن
وعادي تغلطي مرة واتنين والثالتة تجي باهية
(من أخطائنا نتعلم)
ومرات من الأول تجيك باهية
هيييييييييه عليك محاضرة درتها بتدوخك :o
ومبروك الفرح مقدما

ويلا يلا بندفوك زي ماقلتي :D

خشي بسرعة وديريلنا حاجة وصوريها ونزليها

وكل عام وأنتم بألف خيييييييييييير

luba
07-22-2012, 07:15 PM
اهلين بكل البنات وان شاء الله نطمنوا علي الغايبات

ام ساره مش كويس الوقوف ليك هلبه ياريت تنقصي خوفا علي صحتك
وجسمك من التعب والتغيرات وخاصة في هده المراحل

مبروك الاسم الجديد ام رميصاء حلو امال وساهل وسريع في الكتابة

بنت حواء سلمك ربي اليوم اللي نزلتيه لينا ماشاء الله طاغي ريحته في
المنتدي كله ومرة مرة فوتيله حاجه دسمة قوليله مش في رمضان الروجيمات

منورة الصابرة وسلمك ربي انت وحلوياتك اللي دوختينا بيهم في هالرمضان

اهلين بي ام عبدالرحمان وصحة شربتكم

ام عدنان كيف الحال وسبب الالم في الرجلين للوقوف الطويل
في نفس المكان بحركة قليلة ماتنسيش اتنزلينا لقمة القاضي تبعك

اهلين بي دانيه ومرحب بيك وصحة شربتك حتي اني اليوم ناوية علي حلو ممكن زلابية
من زينب محمد

مراحب بي مودة والف مبروك وان شاء الله علي خير
عزيزتي من توة تعلمي قبل تعدي وننصحك تشوفي اول شي ركن الاطباق
الرئيسية الليبية وشوفي المقادير وحاولي انتقصي النص منهم مرات بعض منهم لي عائلات كبيرة
وصدقيني حتي اني تعلمت هلبه من المنتدي بارك الله في صاحبته ومانسجمت
الا هني لانهم ناس تتكلم وتاكل وتهدرز وتلبس كيفي
وتفضلي في اي وقت اسألي اللي تبي في ركن الاستفسارات وان شاء الله مانخلوك
للعرس الا وانت شيف درجة اولي

luba
07-22-2012, 07:19 PM
بنخبركم علي فالطة فطوري اولها شيطت كالعادة
عصير الخوخ

وتاني حاجه فطرت من اكل المطعم رز بالشريم مع ما فاضل من فطوري
اليوم اللي قبله

في ناس جنبي عندهم خلل كهربائي طفوا عليا الضي من الساعه 3 لحد ادان المغرب
وكل شي اللي امس ماصار منه وبداية موفقة كانت بالتشييط ليوم رمضاني جديد

om_adnan
07-22-2012, 09:06 PM
والله دوختنى لولو,انتى تحكى على امس, بعيد السو عليك من الشياط,عين وطارت ,امس كان فطورى شوشو,مكرونة مبوخة, كرنب امبطن وابراك من امس,سندوتشات ,بوريك بالبطاطا مقلى,بوريك باللحم بالفرن,بيتسا بالشوفان جيدة للى ايدير ريجيم فقط ,اليوم حندير امبطن وشربة فقط,طبعا تحياتى للجميع ومرحبتين بالجدد انستوا ونورتوا.

om_adnan
07-22-2012, 09:13 PM
يابنات اليوم مغتربة عندها عزومة رجال,ادعو لها تمشى امورها تمام.

لوتي
07-22-2012, 09:17 PM
ديما نوصل موخرة أن في عالم وإنتم في عالم تاني شن صاير لا باس أم سويرة خيرك طمنيني عنك والله أمس قلتي المطبخ زي صالة الولادة وصدقتي أمس انضم مع أهلي في الماعين ونقول خيرا مبنش ايتمن والرجلين نفس الشي بعد طلعت من المطبخ طايبات رغم إني مدرتش هلبا حاجات
وأم رميصاء خيرها أمس سألت وماجاوبتش طهور ياوخيتي كان فقر دم كولي الزبيب والتفاح والموز وكبدة الدجاج فيها نسبة حديد أعلى من الانواع التانيات والله أعلم
مودة مرحبتين بيك يازين ماخترتي فعلا صاحبات حنينات زي الاخوات ربي يجمعنا في الأخرة تحت ظله يوم لاظل إلا ظله كما جمعنا في الدنيا اللهم أمين أما عن الأمهات كلنا زي بعض حتى أمي تقول منكيلش عيني ميزاني وأني ميمشيش معاي هكي لازم كيل فلما اتطيب حاجة نبي نتعلمها نوقف حداها ونقعد إنعد وإسألي هني ميقصروش معاك ربي يتمملك علي خير ونصيحة تعلمي من توا وغصبي علي روحك بعدين معرضة للعزومات ولكل شي وإنتي بروحك وفي المنتدى من لما تشوفي الوصفات الحلوات تجري للمطبخ جري تبي اتطيبي يشجعو ويشوفو
بنت حواء ربي يعينك علي الرجيم ياوخيتي
سجودة ربي ينجيك تشوفي للأكل الصحي

لوتي
07-22-2012, 09:25 PM
مكتر دوتي قريب كتبت جريدة انسيت ارحب بباقي الأخوات الجدد مرحبتي بيكم وأم عدنان صحا صحا نبوها البيتز نزليها ومبروك اللقب تستاهلي وغروبة ربي يسترك خبرينا شن صار معاك إنتي شطورة مينخافش عليك متملوش مني بقوللكم أني اليوم درت جلي بافواكه وكيكة باردة بالأناناس والفالطة إللي صارت أني حطيت الكيكة في طاجين التارتوفي الكوشة وشوية انشم في الشياط واندور ملقيت شي وبعدين فتحت الكوشة ويرقا معاي الدخان أتاري الطاجين سرب من تحت فطيبت الكيكة وبعين نظفت الكوشة أما الجلي فحرب الضي مرتين مسقعش لما ولا حطيته شوية في الفريز بيش صقع شوفتي يالوبا كلنا في الهوا سوا سامحوني علي الإطالة

بنت حواء
07-22-2012, 11:08 PM
ليش نملو يالوتي هذي صفحة دردشة نبوها الهدرزة وبالتفصيل
آنستي ونورتي

أم عدنان مبروك اللقب وصحة فطوركم

مغتربة ان شاء الله أمورك تمشي تمام وبالصحة عليهم وعليكم

أمـ ساره
07-22-2012, 11:32 PM
مراحب وخياتي وصحة فطوركم


ومرحبتين بالغاليات الي شرفونا يا ريت تكثروا الجيات عندنا وما تغيبوا

والي تبي تتعلم الطبخ الليبي ما عليها الا الاقسام الليبية

وصدقيني وخيتي فيه أغلب أكلاتنا التراثية لين ادوخي

وكل مدينة وطريقتها عندنا ان شاء الله اطبقيها وتنجحي فيها يارب



لوبا

ههههههههههههههههههه ضحكتيني بمقلب الشياط والله

حتى اني البارح هرب الضي وقت الحوسة الساعة 9 وقعد ساعتين

نسيت ما حطيت الفواكه للمعازيم يا دوب لحقت حطيت الحلو

وحوسة المطبخ عاد ما نحكيلك عليها حالة والله


لوتي حبيبة

خوذي راحتك في الهدرزة وفضفضي عادي امالا ليش فاتحين الدردشة

واطمني وخيتي حالتي طبيعية ما فيها خوف


مغتربة ربي يعينك حبيبة ويقويك وتجي عزومتك زي ما تبي وأحسن

وربي يسترك مع ضيوفك ان شاء الله مع انه مافيه خوف عليك ماشاء الله

وعزايم الرجالة عندي أسهل من عزومة النساوين لأن بتحوسي فيها براحتك




اليوم يا حنة فطوري كان

شريبة ليبية وبيتزا الكسكاس ودرت بوريك بالدجاج والبطاطا المهروسة

والباقي فاضل من أمس

طاجين بطاطا ودجاج وفلفل محشي وضولمة وسلاطة مشكلة ورز أصفر

والعصير كان تفاح وكمثرى ولا أحلى بصراحة طبيعي 100%


وغدوة مش عارفة مازال ما فكرت الا في البيتزا والشربة طبعا

ونفكر اندير مكرونة بشاميل لو ربي كتب

خلي نشوفوكم شنو بديروا بالك اندير زيكم


وان شاء الله من غدوة نبدأ انزل في المواضيع والمشاركات في المسابقات وصور سفري اليومين الي فاتوا

اليوم نكمل تعديل جهازي ان شاء الله وبعدين اتحملوا ما يجيكم مني >>>>>>> هههههههه مصدقة روحي

om_adnan
07-22-2012, 11:45 PM
احلى حاجه فى الدردشه,تحسى كلنا شكل بعض,نفس التفكير,نفس التعب,تهون عليك كل شئ,بصراحة ما شاء الله علينا,ربى ايخليكم يارب يا أحلى بنات فى العالم.

أمـ ساره
07-22-2012, 11:56 PM
ايه والله أم عدنان كلنا زي بعض وليبيات نفهموا في بعض والحمد لله

ربي ما يحرمنا من بعض يارب

وان شاء الله نشوفوا هلبة عضوات معانا يشاركونا أكلاتهم و

مواقفهم وايامات رمضان عندهم

اني بنطلع شوي ونرجع ان شاء الله نلقاكم ملتمين

لوتي
07-23-2012, 12:07 AM
فعلا أم عدنان نفهمو علي بعض
صدقتي أم سارة عزومت الرجالة بروحهم أحسن من رجال ونسوين مع بعض

نسمه ليبيه
07-23-2012, 01:44 AM
السلام عليكم

تصدقوا من كم يوم نتهرب منكم عارفه روحى لما نشوف الحاجات اللى منزلاتها بننجن وانا مقرره انى السنه مانكثرش طبق رئيسئ وشربه ونوع او اثنين موالح بالاضافه للسلاطه والحلو مش كل يوم لكن لا مفر مانتحملش بلاكم وزادت حمستنى دانيه (بنت خالى) وقالت لى المنتدى حافل ماشاء الله

باركولى واخيرا تحقق الحلم امس راجلى جابلي غسالة صحون (الحمد لله الذى رزقنيه من غير حول منى ولاقوة)

أمـ ساره
07-23-2012, 01:59 AM
nbvjhfyhfgb

أم أيوب
07-23-2012, 04:47 AM
السلام عليكم ورحمة الله

منورات يا بناويت كيف حالكن

نحكيلكم على يومياتي آآآآآآآآآآآآآآآآآآآآآآه من يومياتي

يومي باختصار يكمل جري وراء جري وراء جري

نوض الصبح ديما عالساعة 12 جري جري نجهز فطور أيوب عشان أول ما ينوض نفطره

ندير برمة سريعة جدا صاروخية على شقتي وبيها مانتمش في كل حوستها

ينوض في البداية مصعب أفندي يرضع نديرله حمام نلفه ونحطه في القعاد

ينوض الريس أيوب بسلامته ولدي أول ما ينوض ينطلق زي الصاروخ يعوض في الوقت اللي خداه راقد مالعبش فيه ولا نط

بعد التصبيح والاحتفالات انه ناض طيب (( مهرجان كل صبح خخخخخخخخخخخخخ ))

نديرله حمام والحمام عندنا يعني لعبة مصارعة بالمية والصابون ... نفطره تكون الساعة قريب 1 ونص

ندير دوش سريع ونلبس ونلم شنطتنا وجري ننزل لحوش عمي

وتبدا المرحلة الثانية والمتعبة أكثر من الأولى

يد مع عزوزتي في الفطور واليد الثانية مرة ترضع ومرة تغير ومرة ترقد ومة تغدي وهكذا

فجأة نسمع اذان المغرب ونلقى روحي قريب نطيح من طولي ههههههههههههههه

بعد المغرب الحق ما نغسلش في المواعين لأن البنات الشابات في الحوش هن اللي يضمن وشرينا غسالة المواعين الحق تدير في حل

بكرة نقوللكم شني فطورنا كان سخر ربي

لوتي
07-23-2012, 12:30 PM
صباح الخير علي الكل
نسومة ألف مبروك علي الغسالة تبيديها بالهني
أم أيوب ربي يخليلك أيوب ومصعب هدا حال الصغار هكي كلهم إللي مدايرين رجلين من لما ينوضو حركة ولعب مستمريين
يلا وين العضوات الحلوات

أمـ ساره
07-23-2012, 01:02 PM
السلام عليكم وخياتي الحلوات


البارح على قد ما حاولت نرد لكن الرد ما يبي يمشي خساره

ولما خربشت طلع يجري وحاولت نعدله ورفض

ما علينا


مرحبتين أم أيوبي وربي يكون في عونك وخيتي

ويحفظ لك صغارك وتفرحي بيهم يارب

أصلا لو مش هكي معناها مش طبيعين خلي يجروا ويلعبوا ويعيشوا وقتهم



مرحبتين لوتي

شنو اخبارك حبيبة وشنو مدايرة على الفطور اليوم

وخيتكم هالشهر بتكمله بروحه لكن طبعا لازم انطيب على الاقل حاجتين في اليوم

لو قدرت اليوم ندير مكرونة بشاميل خاطري فيه ونفكر في بيتزا مشوية وطبعا شريبة

أمـ ساره
07-23-2012, 01:09 PM
مرحبتين نسومة

منورة حبيبة وليش تهربي منا ما عندك مفر

لازم تخي وتكتبي شنو اديري كل يوم

وحتى اني توا بندير زيك بنقص العدد

مع اني مبدئ انوع في الأكل لكن الكميات قليلة من كل نوع

لأن كل واحد وشنو يحب والي يفضله



ومبارك عليك الغسالة وخيتي تبيديها بالهني يارب

ربي يرزقك خيرها ويكفيك من شرها يارب

وهي مريحة جداً بصراحة وتساعدك هلبة

آمال
07-23-2012, 02:38 PM
بارك الله فيكم

قررت اليوم ادخل للمطبخ
اعمل شربة - ومعكرونة ناشطة وجارية - و بوريك - ومهلبية لوبا بالقشطة والكاكاو وسلطة وحليب بعصير اللوز فقط

هذه قرار سوف ادخل للمطبخ واطبخ ما قررته خاصة احس اني بخير والحمد لله والجو عندنا رااائعة اليوم

ادعولي الله يوفقني

سوف اترككم لأدخل للمطبخ

أم ميوسة
07-23-2012, 02:41 PM
السلام عليكم ورحمة الله وبركاته

انا جيت واخيرا ان شاء الله بنفضى

كيف حالكم يا بنات استمتعت جدا بقراءة يومياتكم

بالنسبة ليا اليومين اللي فاتوا ما فضيتش بكل

زوجي روح من السفر تاني يوم رمضان

طبعا فطرت عند أهل زوجي

وامس زوجي مستاحشاهلي وتهدريزاتهم وطويسة الشاهي قالي بنفطروا غادي

واليوم في حوشي واخيرا رجعت لكوجينتي واماعينتي

لكن السبيزة الرمضانية مافيش :eek: الكوجينة مافيهاش المستلزمات اللازمة لاني ما فضيتش نطلع

لهذا عطيت زوجي قائمة بالمشتريات اللي تفوتني اليوم بس

والليلة ان شاء الله تلقوني في المهاري نحوس غادي

لكن الصيام المرة هادي متعبني هلبة مع السحر مخلين حيلي مهدود ومرات ما نتحرك الا بالسيف

بالنسبة لفطورنا امس كسكسي حوت حاشة عيونكم وحوت مقلي وشربة حوت

وخبيزة بالتن وضولمة وبوريك الباف

والحلو بسبوسة وبكلاوة لكن جاهزات

اليوم حندير حلو وبنزله في المنتدى ان شاء الله

وعندي وصفة كان سخر ربي بنزلها حتى هيا

سلامي ليكم كلكم عضوة عضوة

ومرحبتين بالعضوات الجدد

وسجودة جو انتي والسلايط حتى انا عندي اليوم نية بندير سلاطة لكن ماليهاش علاقة بالقسم تبعك ههههههههه

بنت حواء اما ريجيم في رمضان ربي يقوم يعزمك انا غير بس نخش المنتدى نجري للكوجينة نفش خلقي فيها

لوتي شفتي من كاتب جريدة ههههههههه

سلامات ليكم توه ونتلاقوا بعدين

دانية
07-23-2012, 03:14 PM
سلام ياغاليات .. كل يوم نوعى نفكر شن بندير الفطور ولما نسأل ( سي السيد) شن تبي الفطور يزيدني حيرة ايقول: انت كريمة واحنا نستاهلوا ...

المهم اني عجنت الخبزة ووتيت البطاطا يعني قشرتها عشن المبطنة .. والشربة لازم .. ولما انخش للكوجينة الافكار يبدن ايهلن تلقائياً

ومرات انطل عالمنتدى الحلو انقول مرات العضوات الناشطات يعطوني اي فكرة شن بندير .. والحلو اليوم كنافة واعية خاطري فيها وصيت زوجي عليها.. وتوا بناخذ غطسة في الكوجينة .. ونسيت انقول العصير اليوم قمر الدين ...هيا بنمشي للكوجينة ... باااي

الصابرة
07-23-2012, 04:42 PM
السلام عليكم
اليوم اني قاعدة انراجي في راجلي بيش نمشي لحوش العيلة
دايرتلهم ارز مقلوبة و كاساديا بالطريقةالتركية
فقلت انطل عليكم قبل مانعدي لان تأخر
وخيتي نسومة مبروك عليك الغسالة ان شاءالله تبيديها بالهناء
ومرحبتين بأم ايوب وهذا حال الصغار كان مادروش شيطانةليش اسماهم اصغار
وربي يونسك براجلك اختي ام ميوسة
كيف حالك لوبا وام سارة ولوتي وبنت حواء ودانية
وسامحوني اذا نسيت وحدة

أمـ ساره
07-23-2012, 04:57 PM
مرحبتين بأم ميوسة الحلوة

الحمد لله على سلامة راجلك وخيتي وربي يونسك بيم يارب

يعني توا بنشوفوا ابداعاتك الحلوة زي ما عودتينا



دانية مرحبتين بيك وخيتي

اغلبنا زيك بعد ما نخشوا تبدأ تطلع الأفكار والاختراعات معانا


صابرة حبيبة ماشاء الله نيالك لمة العيلة حلوة في رمضان




وشكله اليوم مش صاير من البشاميل مازال ما حصلت بضاعتها

تو نخش للكوجينة ونفكر بالي عندي وخلاص

luba
07-23-2012, 05:08 PM
اهلين بكل الحلوات جوكم جو

والله حتي امس نفس العملة دارولي الله يخرب بيتهم سكروا
عليا الضي باهي دخلت بكري وردوه بعد الادان بساعه

هدا قالك في حادت في قبينة الضي وفسد مجموعة بيوت
اليوم بنشري غاز وهما يديروا في اعلان انه الضيي بيسكر غير اني مانعلمش

وامس فوته بيتزا مسقعه وبوريك النشا من بنت حواء مسقع والشربة ماكملتش
تطييبها

وكفتة لحم ومالحقتش علي كفتة الارز من زينب وعلي عصير السمودي من
ام عدنان ربي يخليها هيا وبناتها الفالحات و سكروا الضي فيهم

اليوم من الصبح بندير كسكسي مسقي بس والباقي من امس

قريب امس ضغطي رقي اسكر هلبه واختارولي وقت فطوري

luba
07-23-2012, 05:16 PM
لوتي دكرتيني بأيامي زمان نخش مساعد الله محلاها
والا تغسلي المواعين

مبرووووك علي كل من شرت غسالة الصحون هنا موجودة
في كل بيت ولكن لم استعملها لحد الان

دانية ربي يساعدك علي السباحة ان شاء الله مش في العميق ههههه

ام عدنان لازم اتنزلينا من فطورك حتي ولو اخر السفرة وشكرا لتطمينك
لينا علي معتربة 7 قلت وينها ماعاد نتلاقوا مع انه الوقت قريب مني

مغتربة 7 ان شاء الله تنستري معاهم ويمسحولك الصحون عشان
تحسي ان تعبك مامشاش سدي مش كيف النسوان تحلفيهم تحليف
وهو دلع تخليهن بروحهن ياكلن حتي الصواني ههههه
وان شاء الله ماتحسي بتعبها

ام ساره اكيد في انتظار مواضيعك الحلوة اللي كيفك

نسومة كيف حالاتي اني هكي وجبة رئيسية ومرات شربة
ومعاها حاجة او اتنين ومرات عاد نطلعوا من القاعدة

ام ميوسة اهلين ومرحبتين بيك وينك غاطسة من بيت لي بيت صحة صحة
والحمد لله علي سلامة زوجك

توا سلام

لوتي
07-23-2012, 05:42 PM
مرحبتين بالعضوات الحلوات
لوبا توا كنت انشوف في الترايفل متعك تحفة توا مستعجلة وبعدين إنخش إنرد إن شاء الله تعالى وربي يردلكم الضي يارب وصدقتي في كلامك علي النساوين تتعبي في الحاجة ودوب ماياخدو منها داير روحهم في احياشهم مياكلوش ووسعي بالك إن شاء الله لاضغط لا سو
صبورة كيف الحال تتهني بلمة العيلة الحلوة
دندونة صحتين علي الكنافة
أم ميوسة الحمد لله علي سلامت راجلك نورتي اللمة
أم سويرة كيف حلك اليوم
غروبة يلا خشي طمنينا عنك
أما أني اليوم علي المقالي متبرعة إندير البوريك والفركاسي امتع زوبةودرت سويسرول حار من كوين وتوا نستاذن بنمشي نقلي اللي جهزتهم إن شاء الله تعالى

بنت بلادي
07-23-2012, 06:23 PM
السلام عليكم ... منورين وخياتي
اليوم فطورنا شربة دشيشة لأختنا زينب محمد مع خبزة زيتون ومحشي بصل وامبطن وسويسرول دجاج وكباب
وبوريك انديره يومياً لأني انحبه ... وسلاطة مشوية وسلاطة عادية " خس وطماطم وخيار وزيتون "
والحلو بلح الشام وبسبوسة ليها يومين ما تبيش تكمل
تقبل الله طاعتكم ... وعتق رقابكم
اللهم اغفر لي ولوالداي و جميع المسلمين والمسلمات الأحياء منهم والأموات

luba
07-23-2012, 09:16 PM
لوتي اهم شي عجبك والله حتي زوجي مايحب المرطبات الكريمات
لكن هدا عجبه وان شاء الله لو جي ضيف علي غفلة نشري كيك واتي
ونضرب الكريم وخلاص وساعه ونص في التلاجة ساده تعرفي تقدري اديريه في اليوم الاول
لوعارفة عندك ضيف وتخليه ماطلعيشي من الفريز الي اليوم التاني ماتصيرله شي
اني مرة هكي صارله قعد يوم كامل في الفريز
وصحة شريبتك ها ماتنسيش التصوير راهو خاش في المسابقات كلهم التطبيقات
علي الصورة النهائيه
وعندنا اقسام التطبيق هيا ورونا

بنت بلادي اهلين بيك وصحة شربتك صورينا عشاك في قسم الاطباق الرئيسيه نزليه
او تطبيق في اقسام المسابقات زي وخياتك

أمـ ساره
07-23-2012, 10:02 PM
السلام عليكم يا بناويت

وصحة شريبتكم وفطوركم وخياتي

اليوم فطوري كان شريبة وبيتزا مشوية وفركسي بنفس العجينة وطاجين خضرة

وعزوزتي بعثت لي ضولمة وسمبوسة

أمـ ساره
07-24-2012, 01:33 AM
السلام عليكم يا بناويت

جبتلكم فطوري اليوم تقول واكلة في مطعم بوفيه مفتوح

الله غالب وحدة فاطرة بروحها شنو بندير هي

ردوا بالكم وحدة فيكم تعجب


[فقط الأعضاء المسجلين يمكنهم رؤية الروابط]

أم أيوب
07-24-2012, 03:45 AM
السلام عليكم كيف حالكم يا عرب الحوش

اليوم كان فطورنا شريبة عربية وشربة عدس وأرز بالخلطة وشاورما لحم

وفطيرة الجلاش والبطاطا من المصراتية وعجة خضروات وكانيلوني ومحشي فلفل وملفوف

وسلاطة عربية وسلاطة بادنجان زي الي حكت عليها سجودة بس قليت البادنجان قلي ومعاهم فتات

والحلو تيراميسيو وتشكيلة كنافات بس الكنافة جاهزة

om_adnan
07-24-2012, 05:32 AM
وعليك السلام أم أيوبى....صحتين فطوركم,ام سارة,صحنك ماشاء الله معتبر,اللى واكله منه فركاسيه؟,اليوم فطورى مش من العاده مافيش طبق رئيسى,لان من يومين ما حد كلى المكرونه المبوخه,درت شربه,محشى كوسا وفلفل,بيتسا ملفوفه,فطيره بالخضره للاموره صابره,طباهج -اول مره انديره فى رمضان-,بطاطا امبطنه من امس,

موودة
07-24-2012, 11:41 AM
بجد ماشاء الله عليكن ربي يحفظكم انتو ستات بيوت ولا شيفات ؟؟ صقع والله
بجد شكرا على ترحيبكن ودعمكن
بنت حواء
luba
لوتى
ام سارة
وكل اخواتى الفاضيلات
وامس دخلت مع ماما المطبخ
واليوم ان شاء الله نبي ندير حاجة اكيد وحنقوللكن عليها بعدين
تجنوو انتن
ربي يحفظكن

بنت حواء
07-24-2012, 02:22 PM
السلام عليكم
احححححححححم وأخيرا
أمس جتني وخيتي فطرت أنا وياها بروحنا
وهيا تعبانة شوي ماتاكلش اللحوم الحمرا والمقليات
وجتني شبه فجأة وأنا تلاجتي معبية فااااااكهة وبسسسسسس :o

شنو انديييييييير

:confused:

:confused:

:confused:

:confused:




آآهه عندي فخذة ديك رومي قاعدة في الفريز
باهي شنو اندير بيها

:confused:

:confused:

:confused:

:confused:

:confused:


آآهه عرفت :rolleyes:


شوربة حمرا
مقلوبة
طاجين جبن

باهي وشنو تاني؟؟


عرفت :rolleyes:


كانلوني بالتن والبطاطا

وووووو

ووووو

وووو

ووو

وو

و

بيييييتسا

وووووو

ووووو

ووو

وو

و

سلطة بطاطا
و
عصير كوكتيل

وووووو

ووووو

ووو

وو

و



خلاااااااص :o


التحلية كانت:

مهلبية الشوكولاتة
و
بسبوسة جوز الهند
مع
قهوة عربية



والحمد لله خشيت الظهر
وجري جري

[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])

كملت العصر





وكليتها وكلة نييييييييين عرفته وكال

[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])


ههههههههههه ماتضحكوش عليا الصيام مع الريجيم أثرو فيا

يلا سلاماااااااات

barney
07-24-2012, 05:16 PM
السلام عليكن ورحمة الله وبركاته
بارك الله فيك يا مغتربه على التهنأه وانشالله رمضان مبارك عليك وع كل الاخوات وكل العام والكل بخير وانشالله لاباس عليك ام رميصاء وامال ومرحبتين بيك يا مودة وانقول لام سارة ماشالله عليك ديمه متواجده الله ايبارك واتحمسي في القعدة لكن وين سويت نونا امغيبه وماشالله عليكن اطيبن واتكثرن اني والله راجلي ما ياكل في حاجه وما ايحبش الحاجات الحارة ولا الحلوة لكن ياكل في الشربه العربيه وفطيرة عاديه ضروري مع الشربه يوميا وعصبان لكن اني ما انحبش العصبان واندير في حاجات اخرى مع الحاجات هذي امس كان فطوري شربه ليبيه وفطيرة وعصبان و كبه وعجة طاجين وامبطن والحلو كاستاردة وقطايف خطرها راجلي ايحب القطايف هذا ما ايحب في الحلو وانشالله نتلاقو وانخبركم حتى اني ع يومياتي

luba
07-24-2012, 05:42 PM
ام ساره وبنت حواء وام ايوب وام عدنان وبارني صحة شربتكم
وصحة شربة ك الغايبات والحاضرات

بنت حواء دسي منه اللي درتيه بيش تاكليه مع الروجيم ههه

ام ساره من قدك شكله يدلعوا فيك صحة صحة

ام عدنان وين ماشية بيه هدا صحتين هدا غير روجيم باهي وين الصورة النهائية
هي مانبوش نتعبوك الاخيرة بس

مودة منورة وهيا شمري علي اكمامك وابدي مرة تصيب ومرة تخيب عادي ما تحبطيش معنوياتك

بارني نفس الحالة هدا الرجل الشرقي الشمالي اللي متمسك بي شرقيته
ومع دلك انطيب وحتي الحاجة اللي ماياكلها نطيبها لي عمري ويجرب مرات يعجبة ويقول
عاوديه ومرات لا زي المهلبيات
تو بدي يعجبة التغيير اللي يصير عليها

شروق الشمس
07-24-2012, 07:41 PM
السلام عليكم و رحمة الله
ماشاء الله عليكن نويشطات ربي يبارك
عجبني الجو و اللمه الحلوه ربي ايدوم ان شاء الله
لكن الحق ماعندي وقت للنت بكل
ان شاء الله دائما في طاعت الله
و ربي يرحمنا و يغفرلنا و يتجاوز عن سيئاتنا
و ينصر اهل سوريا في القريب العاجل
و كل عام و الجميع بخير

موودة
07-24-2012, 11:29 PM
منورين جميعا بارنى لوبا الجميع والكل
انا اليوم درت انجاز درت كرات البطاطا المحشية جبنة وجت حلوة وحبوها فى الحوش
طبعا انا فردت عضلاتى وقلت حندير حاجة حلوة نكمل بيها انجازاتى
وطبعا لزوم الرجيم اللى عمره ماصار منه قلت ندير غريبة النخالة والشوفان وبطريقتى قلبتها بيتى فور بالمكسرات والشوكلاتة وصورته وفتلكته وقلت نحطه فى المنتدى ونرفع راسي لكن اول ماذقته طلع تقول خبزة شعير وقلت معلش ملحووقة اهو جربت

أمـ ساره
07-25-2012, 01:38 AM
مرحبتين بالغاليات وصحة شريبتكم

نسلم عليكم وحدة وحدة نفرة نفرة زولة زولة

شنو اخباركن اليوم



اليوم دارها فيا النت مقطوع طول النهار

اليوم شبه مادرت شيء مع اني تاعبة يا ساتر لو تنتكس حالتي ونتعب من جديد

المهم درت

قطايف عضافيري لزوبة ودرت بوريك بالبطاطا

وكفتة ودرت خبيزة بالتن لكن جتني يابسة تدمغ تقول اول مرة نديرها

وفطرت عند عزوزتي اليوم

اعطيتها دارت لي الطعمية وهي دارت الشربة وبعض الحاجات الي قاعدة من أمس

نسيت شنو كان فطورنا كله



والساعة 12 في الليل خطر لي ندير اقماع جوز الهند للصابرة

هذا الكساد ما يدير وحدة قاعدة بروحها وما عندها نت

درت كمية بسيطة بنعطيها لسفلي يرفعها معاه لحوش صاحبه



وغدوة مش عارفة شنو بندير

نفكر ندير بيتزا وشريبة وخبيزة بالتن (( وراها وراها لين تجي كويسة ))

وممكن مكرونة بشاميل >>>> كل يوم نقول بنديرها وما يسخر ربي الحال


هي اقترحوا عليا حبوبات

الساجدة لله
07-25-2012, 03:24 AM
صحة فطوركم ياغاليات

فطوري كان شربة خضرة + بوريك الجبدة بالسبانخ واخر بالمفروم + بروكلو من عزوزتي + لازانيا من امس قاعدة + بيتزا + خبيزة محشية بالتن

السلاطات : سلاطة الباذنجان التركية + سلاطة الطماطم + سلاطة عربية .

اعيييت من التقليدي نحس في روحي بكرة بندير دجاج مشوي وسلاطات وشربة كرات وجزر اذا درتها بكرة معنها بنزلهالكم

والحلو التراميسو قاعد عندي

om_adnan
07-25-2012, 04:01 AM
أهلين يابنات شنو أحوالكم مع رمضان,ان شاء الله تمام,للاسف الى الان لم استطيع التصويرفقط بعض الصور النهائيه,اليوم فطورنا شربه,رز مع تيكا ماسالا,محشى وبيتسا وفطيره من امس,فطيره محشيه بالمفروم,سمبوسك الهنديه من قسم المنقول ,جات كويسه اضفت لها ملعقة بيكجن باودر.

مغتربة 7
07-25-2012, 04:25 AM
السلام عليكم وخياتي
ماشاء الله عليكم وعلى النشاط
صحتين شربتكم وهيا تعالوا اشربوا معاي قهيوة

[فقط الأعضاء المسجلين يمكنهم رؤية الروابط]

[فقط الأعضاء المسجلين يمكنهم رؤية الروابط]

أم أيوب
07-25-2012, 05:01 AM
السلام عليكم ورحمة الله وبركاته

منورين منورين

اليوم فطورنا شربة عربية بلزم منها يومي هي والبرودو والرز الابيض

ودرت عن نفسي سبرنج رول محشي مفروم وشوية محشي سلك وجبنة

ودرت المريشة بطريقتي ودرت معاها الحلو بسبوسة بالحليب المكثف المحلى

ودرت شوية مكيرينة جارية جاني خاطري فيها

خيتكم صايرلها شد في رقبتها وكتفها لا قادرة نلف يمين ولا يسار ادعولي والله حاسة روحي خلاص معش نقدر نحرك رقبتي

barney
07-25-2012, 05:51 AM
انشالله لاباس عليك يا ام ايوب وام سارة وبارك الله فيك يا لوبا لكن والله مهما اندير راجلي امصمم يبي وجبات امبوخ بس وانطيب لروحي ولبنيتي عمرها عامين ماعندهاش ايكال ووليدي عمرة عام نحشيله بالسيف وراجلي كان كثر بكل ياكل طرف بيتزا ايسايرني بيه واليوم روح من الجامعه لقاني اندير في عصبان ومحاشي وعاجنه كيكه حارة واموتيه الكانيلوني قالي والله مانك دايرتيهم بالله عليك اتفكينا منه اليوم نبي رز امبوخ درت رز امبوخ وسلاطة خيار وسلاطه خضرة عاديه وعصبان ومحاشي والحلو كاستاردة وقطايف مقليه وبس وقالي ديرينا وجبات اربع ايام في الاسبوع واني هنا طبعا لاجارات ولا اوخيات قاعده اني وراجلي واصغاري طول اليوم وخلاص هو يمشي للتراويح واني انضم حوستي نغسل اماعيني ونختمها ابدوش وصلاة العشي ونرقد بيش انوض قبل الفجر بنص ساعه انوتي السحور ونغسل اماعيني ونرقد انوض الساعه سبعه الصبح من اصغاري معادش نرقد الى 12 في الليل وهذا روتيني امتى انروح لليبيا بيش نتبنن رمضان معليشي طولت عليكم وهدرزة زايده ماليهاش داعي لكن والله اعييت من الوحدة
خلاص سامحـــــــــــــــــــــــوني طولت عليك



رمضــــان كريـــــــــــــــــم


م[فقط الأعضاء المسجلين يمكنهم رؤية الروابط]

anhr
07-25-2012, 06:40 AM
السلام عليكم ورمضانكم كريم,انى مغتربه واليوم عندنا طويل,طبعا بنسه ليا منحبش انطيب هلبه,وعندى زوجى ميحبش المقلى,كان يلقانى منقلى شى ههه,ومرات انطيب حاجات ليومين زى البيتسا والمحشى,طبعا فطورى الشربه اساسى وانحاول انغير ,والبيتسا حتى هى اساسى,اليوم كان فطونا شربه محشى قرعه وكرنب وبيتسا وشاورمه,وطاجين طبعا فى حاجات من امس والحلو لقمة القاضى,وطبعا لازم نغسل امعانتى وبعدين الشاهى والقهوة والكاكاو هه,وسلام

عهود
07-25-2012, 08:44 AM
كييف حالكم واحدة واحدة بدون تسمية اسماء وبدون استثناء كان هذا بنكتب مجلة وجريدة :cool:

واهلا بالعضوات الجدد مرحبتين بيكم


ااشيه ليا ساعتين وربع واني نقرا بالصفحة ونضحك من قلبي
ياربي يسعدكم ويهنيكم واحدة واحدة ورمضانكم مبروك كل عام والجميع بخير

خطرتو عليا وجع الرجلين سجودة ووووك عليا رجليا يسطرو من فوق للوطى وبالذات لما نقعمز يزيدو عليا

ليا يومين في ليبيا نطيب في حوش عزوزتي لستة قبائل
الحق مش بروحي نتعاونو مع بعض اني وحماواتي وسلفاتي
لاكن تعب رمضان فيه سر رباني ومع هذا تعب
اليوم اول يوم بنطيب بروحي في حوشي واحسن حاجة راجلي مايعدلش ع الحلو بكل ولا عنده متطلبات بكل
ياكل لي ايجيه قدامه ويقول بارك الله فيك وشكراااا

امس درت روحي فلحوسة ووبندير لقمة القاضي
طلعت تحشم لن دسيتها من الحشمة في اخر الغاز من لوطى قلت بعتالي نلوحها بطريقة سرية من غير من يزبطني وتبدا فضيحة بجلاجل قدام عيلة راجلي
جت كيف الكفتة المفطسة لي عافسة عليها طانطة :mad:

اليوم عندي نية بندير شربة ومحاشي وبيتزا وبوريك لتو ماقررتش بوريك شن لاكن في الاغلب بوريك مفروم مع السبانخ نموت فيه
والحلو مهلبية بس ;) ماعنديش عليه الحلو حتي اني



ليا عودة غير نضت بنضم الحوش ليه فترة مسكر باش نبدا عراك وبوني مع المطبخ
والمواعين حتى هما مافهمتش سر مايتموش بكل

بنت حواء
07-25-2012, 11:19 AM
السلام عليكم

أهلا بالعضوات الجدد كلهم صحة فطوركم
ماعادش حد يقول طولت بالدوة وسامحوني والجو أهوا
المنتدى للجميع والموضوع سماه دردشة يعني بندردشووووووو :D
............

كيف حالكم وحدة وحدة ان شاء الله تمام؟
أم أيوب ألف لاباس عليك ربي يشفيك ان شاء الله
...........

ههههههههههههه
عهوووووود ضحكتينييي هههههههه
الحمد لله على سلامتك ورمضانك مبارك وكل عام وأنت بخير
صحة شريبتك ولقيمتك ;)
ديما صايرة هذي متاع دس في الكوشة من لوطا
نين تتلوح بالسر هههههههه
حتى أني ماعنديش فيها لقمة القاضي ديما جايتني رطبة ولا مشنشبة :o
وألف لاباس عليك ان شاء الله
.................

أم سارة ماشاء الله وهذا بروحك أنت وعزوزتك عشاااااااء مقوم
بالصحة عليكم وألف لاباس عليك ان شاء الله

..............

مغتربة شكرا على القهيوة الفايحة والبكلاوات هممممممم جعت :p

يلا سلامااااااااااااات

الصابرة
07-25-2012, 11:52 PM
السلام عليكم

صحة فطوركم

باركولي مش تميت اخطبوط
ايد تفرد وايد تحرك في الحشوة وايد تشوف في الطنجرة وايد تشوف في الكوشة مش قلت ليكم اخطبوط

امس واليوم كانت عندي عزومة
امس كانوا الحمدلله ناس حبايب خفاف على القلب اللي تعبي يهون عشان خاطرهم
واليوم رجالة بس والحمدلله انسترت
درت فطور

شربة وربي يبارك في لوبا درت شربتها جت تهبل ومضبوظة طبعا اني مانكلش فيها لكن راجلي هو اللي قالي كويسة قريبة زي بتاعت امي
وبقلاوة حارة ومجبنة وبراك وبطاطا محشية وارز بالشوارما وفطاير التونة وطاجين بطاطا امبطنة جابتهن صاحبتي امس
ومهلبية اللوز وطبعا الفواكه والعصير والحليب

انجي لوخياتي توا
ان شاءالله ماعليك باس اختي ام ايوب
وليك وحشة عهوووووووودة
وعندك حق حتى اني لقمة القاضي مشروع فاشل معاي هيا والباسطي مش اصحاب اني وتطييبهن
وكيف حالكن وخياتي كلكن وحدة وحدة وحدة خايفة نسمي ننسى وحدة
سامحوني ليا هلبة انشوف في هدرزتكم الحلوة نقرا ونطلع ديمة مستعجلة لكن اليو فضيت روحي عشان نهدرز شوي
طبعا من اول يوم رمضان واني نمشي لحوش العيلةاهل راجلي
لكن امس واليوم قاعدة في الحوش عشان العزومات
وامس عزومتي تهبل مع انهم ماطولوش وغيرت جو بالهدرزة معاها ماتخيرش عليكم
طولت معليش لكن اسمها دردشة

أمـ ساره
07-26-2012, 12:54 AM
السلام عليكم ورحمة الله وبركاته


صحة شريبتكم وفطوركم يا حلوات


بارني

يا حلوة مدامنا معاك المفروض ما تحسي بالوحدة

وفضفضي زي ما تبي هنا امالا ليش فتحنا الموضوع هذا


أم أيوبي

ان شاء الله لا باس عليك وخيتي وربي يشفيك

وطهور ان شاء الله

ماحرها علقة الرقبة هذه ربي يفكك منها


عهود

يعطيك الهني انتي ولقمة القاضي ضحكتيني

تعرفي اني حالفة عليها ما نديرها بكل لأن أول مرة نجربها

انحرقت في وجهي من الزيت منها ما عاد درتها مع ان زوجي يحبها ويبيها


مغتربة 7

سلم ايدياتك على القهيوة فكرتيني بيها اندير فيها توا



لوبا

بنت حواء

أم عدنان

سجودة

الصابرة


شنو حالكم حبوبات وربي ما يغيبكم يارب وديمة ملتمين مع بعض



مرحبتين بالحلوة anhr نورتينا وخيتي

ومدامك معانا ان شاء الله ما تحسي بالغربة

كثري من جياتك يا حلوة

عهود
07-26-2012, 05:16 AM
شن حالكم حبيبات

الله يسلمك بنت حواء وكل عام وانتي بألف خير
منورة حبيبة


تسلمي الصابرة حتي انتم ليكم وحشة هكي كبرهاااا
انتي يخي اتجيك الحلويات مرة مرة نشوفلك في وصفة باهية
لاكن اني والله الا يفضحو فيا الحلويات مع ان الموالح فالحة فيها لاكن الحلويات يكرهوني في الدم


ام سارة اني نحبها لقمة القاضي ونتمنى مرة في حياتي تطلع معاي مقومة

مرة درتها في حوش بوي جتني كيف العشرة قروش المفطحة وصممت اني نحطها في العسل ههههههههه دخلتها ع خوتي ضحكو عليا لاكن كلوها وكملوها



اليوم طيبت شربة خضار
قلت نختصر من الدهان والحار مرة مرة نغير
حطيت تقريبا اغلب الخضار بعد غليتهم طحنتهم في الماكينة لي تهرس الخضرة وتحول قشورهم ع جنب

ودرت محشي فلفل احمر واخضر واصفر
وقرعة محشية
طبعا بالمفروم والرز
وسمبوسة مفروم بالبصل
وسمبوسة بالدجاج
وتبولة وسلاطة خس وجرجير
والحلو جايبة من حوش امي بكلاوة وكنافة الحوش

وهذا هو :o

luba
07-26-2012, 05:47 AM
اهلين باالغاليات كلهن اه يا ام ايوب ربي يشفيك وحاسة بيك
مانحبها هدي اللي اسمه عناد

الصابرة ماشاء الله ياريتك صورتينا السفرة اخرها مادامك في بيتك وهدا كله ارحمي نفسك
وين هدا ماشية بيه ربي يكتر عليك الخير ويعطيك الصحة ويابخت من زارك

غي غي صحيتي علي القهوة استاحشتها مش انت هههه القهوة هههه

عهودة انستينا ياحلوي عجينة كيف حالك وحال عزوزتك
مرة درتها في عيد ميلاد ولدي جتني باهيه تو نعاودها كان جتني باهيه انزلها ليكن
قبل رمضان درت لقمة لقاضي خديتها من المنتدي جتني نية واصلا الصغار هبلوني
دسيتها في الغاز باش نرميها لما بنطلع كيس القمامة ينوض ولدي الفالح يطلعها
ويبدي فيها ايكال حشاكن لين رجع منها ولبز الحوش زوز كوارت لقمة نيه فساد نعمه وصنة الحوش حاله
والولد لبزلي الحوش وهدي عمايلي ووراها ووراها لين نجيب راس غليص

كيف الحال ام ساره وبنت حواء والساجدة شن اخر تطورات السلاطات يابختك عندك ناس تاكل فيهم بكل الاشكال
ومودة شن اخر التطورات
اهلين بي انهار
وين نسومه ودانية وبنت بلادي وام عبد الرحمان وشروق الشمس ولوتي كيف حالكم وين غطستوا

كيف حال نوارتنا ام عدنان وحال البنات الفالحات الحلوات ربي يحفظهن يارب

كيف حال بارني علي قولت الاكل قرر سي السيد الشرقي في دمه والشمالي
في طبعه علي حسب البوصلة الشخصية ياكل تقليدي مكرونة امبكبكة ومن اطباع هدي الشخصيات
اللي عندي وعندك انهم تقليديين وروتينيين ربي يعينا

barney
07-26-2012, 06:04 AM
صحه اشريبتكن وانشاء الله ديمه باهيات وفي اخيار الخير

سلمك يا ام سارة انشاءالله مانفقدوك وانت امنورة الدردشه بهدرزتك وخطك المميز اللي مجرد مانشبحه انقول ام سارة من غير ما نقرا الاسم .

وينك يا ام ايوب طمنينا عليك انشاء الله ما عليك سو

كيف حالك يا الصابرة وخطرها عالصابرة اليوم زعميتني بندير البكلاوة الحارة جت اتحشم قبل بنديرلها كيف لقمة القاضي امتاعت عهود في الدرج اللوطي من الغاز لكن ما لحقتش الممهم ياحنه درت العجينه نفس

المقدار وجت العجينه ناعمه واتهبل لما دربتها بالنشابه وكثرتلها النشا زي ماقلتي وجن اكويسات الفرادي لكن المشكله اني كثرتلها الزبده جت عايمه اعوامه في الزبدة بعد 4 طبقات حطيت المفروم لكن لما طابت

اللي تحت المفروم جي كانه طبقه وحدة واللي فوق المفروم تنفج وارتفع ولما فتحت الكوشه بنشوفها طابت من لوطا او لا القيتها تجلب في الزبدة عايمه اعوامه المهم قلت لابد لما اطيب تتغير واتريح اقنينه لما طابت

الله لا توريكم كيفها اتحشم رفعت الطرف القيته من تحت زبده غدير دايراته المهم في الفطور مابيتش انجيبها شوي راجلي قالي وينها البقلاوة الحارة اللي امبكري اديري فيها وجهي انسلخ جبتله اطريف كبده لعبت

ياروحي وقعدت بجمادها ما قربها حد حتى ابنيتي انزلبح فيها بيها بالك ترفعي معنوياتي اتقولي اخي يا ماما وهذي القصه القصيرة امتاعت البقلاوه

اليوم فطوري كيف العاده شربه وفطيرة عاديه وعصبان ودرت امعاهم كانيلوني بالتن اول مره انجربه بالحشوة هذي وكيكه حارة وسلاطه ( وبكلاوه حارة ):p

وسلامتكن

anhr
07-26-2012, 06:31 AM
السلام عليكم وصحه فطوركم,وشكرا ليك ام ساره انا متابعتكم لاكن منشاركش نتمنى انى نعرض اكلاتى ههه,اليوم افطو رنا كان شربه وشاورمه وخبيزات تن وبيتزا ملفوفه ومقلوبه,اوخياتى الى متنجحش معاهم لقمة القاضى جربو الطريقه هده وحاتدعولى,
المقادير
2 كوب دقيق
2 ملعقة كبيرة حليب نيدو
2 ملعقة كبيرة نشا ( يمكن استبداله بالكاسترد )
ملعقة كبيرة سكر
2 ملعقة صغيرة خميرة فورية
رشة ملح
نص كوب حليب سائل عادي
كوب ماء دافئ
درتها امس والله جتنى حلو ولامانه هى من النت,واضربو المقدير 3 دقيق بالمضرب اليدوى, وخلوها تخمر ساعه اواكتر وقبل ماتقلوها لازم اتحركوها وخودو بالكاشيك متوسط وغطسوه فى الزيت قبل وخدو وحطو فى الزيت,لازم بسرعه مش متنحركش, طبعا الى بتجرب ادير نص المقدار,وحتى ممكن اتفرزوها وقت الحاجه بردوها وعلى عسل اسخون,وجوز هند ويسلام ,سامحونى طولت عليكم

الصابرة
07-26-2012, 06:44 AM
السلام عليكم حبوبات
يالوبا الله يبارك فيك
والسفرة اكيد بنزلها غير الكاميرا شحنها كمل انراجي فيها تشحن بيش انزلها على الجهاز
واهلين بالوخيات كلهن
واختي انهار ان شاءالله انجر بوصفتك ويستر الله
بارني حتى اني صارتلي في البقلاوة الحلوة مرة شنو درت بعد ماطابت
صفيت الزبدة خذيت سفرة غطيت بيها الطاجين وصفيتها طبعا وهيا ساخنة بعد ماتعسلت مش الحال
كان جربتي صفيتي الزبدة
واذا هبا مازالت قاعدة سخنيها وصفي الزبدة وشوفي بلكي يصير منها
والله عاد شنو انقولك وخيتي ومفروض نبهت ان الزبدة تكون معقولة

نعاجية حرة
07-26-2012, 01:25 PM
السلام عليكم ورحمة الله وبركاته
كيف حالكم بنات
كل عام وانتن بخير
ورمضان مبارك

استغفر الله واتوب اليه

om_adnan
07-26-2012, 03:07 PM
أهلين باأخواتى الحلوات...

ام ايوب انشغلنا عليك,ان شاء الله ربنا يشيفك,مع الصغار صعبه شويه,جربى تمارين تساعد واجد

عهود..مرحبتين ان شاء الله امورك تمام

وينك ام ساره وعبدالعزيز ان شاء الله المانع خير

الصابره ان شاء الله ديما مستوره فى عزايمك

شنو ترهونيه صار منها العمرة,ما تنسى تدعى لينا فرد فرد وخصوصا لصابره

لوبا الحق تبارك الرحمن نشيطه ربى يحفظك

امال قبل ما تخشى المنتدى على حسب المتوفر قررى شنو تبى اتدير وادخلى المنتدى وابحثى على الوصفة,هكى اسهل

يالوتى يادلع تمتعى توا بعدين ساهل

بنت حواء شنو اخبارك انتى والريجيم ان شاء الله تمام

موودة عروستنا شنو الجو...قاعدين انراجو

دانيه محلاه خبزه حوش مع الشربه

بنت بلادى فى انتظار مشاركاتك

شنو نسمه شكلك هاربه صح مبارك الغساله

ام ميوسه كلنا زيك تعب ولكن نموتوا فيه وانحبوه

بارنى ربى يعنيك على الغربه حاسه بيك

انهارفى انتظار مشاركاتك شكرا على وصفه لقمه القاضى

نعاجيه كل عام وانتى بخير فى انتظار مشاركاتك.

ساجده دائما حنتذكرك انتى ورمضان ومش عارفه علاش سلطة الباذنجان

ام ساره يارب سلمها هى ومواضيعها السمحه

توا نحكيلكم على,امس قبل المغرب قعدت نحكي ليكم ونضحك انقوللكم اهوا يابنات كيف العزوز قربت نوصلكم وصورت جزء من السفرة,الوقت يجرى ولما ايكون اكثر من واحد يجهز تلقى الصحون مشوا, حنزل لكم الصوره هنا

لوتي
07-26-2012, 07:47 PM
مرحبتين منجديد بالكل ماشاء الله عليكن وعلي هدرزتكن أني اليومين إللي فاتن كنت مشغولة واليوم قلت انرد نسلم عليكن كلكن عضوة عضوةأه علي فكرة سلامات أم أيوب طهورولي عودة بإذن اله تعالى

لوتي
07-26-2012, 08:01 PM
نسيت انقول شكر كبير للي نقلت موضوعي للمسابقة

أمـ ساره
07-26-2012, 11:11 PM
السلام عليكم

وصحة شريبتكم وفطوركم يا حلوات

اليوم جيتكم طول بنسلم وجايبة سفيرة قهوتي معاي

الي تبي ترفع ايديها لكن بنبهكم راهو قوية وناقصة

ومعاها طريفات من اقماع جوز الهند للصابرة ربي يبارك فيها يارب

درت منها لسلفي حتى يرفعها معاه لحوش صاحبه ودرت معاها 2 طواجين كيكة


المهم شنو اخباركم يا حلوات

بارني سلمها ياربي الي تعرفني من خطي الحمد لله ما نكتب بخط ايدي

كان هذا ما تفهموا شيء مني تقعدوا اترجموا بس


انهار حبيبة هي ورينا اكلاتك الحلوة وشاركينا راهو كلنا نتعلموا من بعض

أم عدنان الجملتين الاخيرات ما فهمتهم بصراحة

انتي بتحكينا او حكيتيلنا سامحيني قاعدة ما صحصحت




وباقي الحلوات بدون ذكر اسماء كيفنكن وشنو اخبارك رمضانكم اليوم



اليوم فطوري كان

البيض الاسكتلندي لزوبة ربي يبارك فيها

وكفتة لحم بطريقة البخار ان شاء الله ننزلها

كنالوني محشي دجاج وجبنة واعشاب


وعقاب الوقت قريب الساعة 7 خطر لي ندير بيتزا زخبيزة بالتن

طبعا الحل عجينة ال 10 دقايق وقبل الوقت كان جاهزة

واكيد شريبة ليبية عروسة سفرتنا

والحلو درت كريم كراميل الوصفة من حليب نستلة

وجت اتهبل زي الجاهزة بالزبط


وسليمتكم يا حلوات

نسمه ليبيه
07-27-2012, 02:22 AM
السلام عليكم كيف حالكن وشن دايرات


على \كر الطعام انا طايحه فى عيله ماياكلوش لا الراجل ولا الصغار مقهوره تصدقن اليوم الشربه ماكلش منها حد الا انا

الرز بالتقليه كلا منه راجلى بس

وصغارى عيونهم البيتزا والفركاسي هذوم اللى كلوا منهن
لدرجة خاطرى بنعزم حد عالفطور بيش يشجعنى عالوكال
كل يوم نقول خلاص معش نطيب لكن نرد فى كلامى على طول

barney
07-27-2012, 06:01 AM
السلام عليكم ورحمة الله وبركاته

كيف حالكن اليوم وشن دايرات انشالله ديمه امنورات وابخير ياربي ام عدنان نقرا في رسالتك وانراجي في اسمي حسيتها كيف شن حظك اليوم ههههههههه سلمك ياربي ويحفظك ام سارة صح نعرفوك من خطك لكن الفايدة مش في خطك الفايدة في اسفراك اللي ايحلن العين لمغمضه

ماشالله عليك فالحه . اليوم عندي عزومه ودرت فطوري شربه عربيه وعصبان وفطيرة كيف العاده وامعاهن طاجين بطاطا امبطنه وبيتزا وكوسه محشيه اعيوني انموت فيها وفطائر تونه وكيكه حارة وسلاطه عاديه وسلاطة بنجر ورز باللوز والكبدة والزبيب ودجاج امحمر

طبعا احني في الغربه مانعزموش في حوشانا او بالاحري الليبيين اللي في ولايتنا انطيبوا ونبعتوه للعزابه قبل اذان المغرب ايكون واتي ويوصلهم في الحوش امسلفر وواتي وانحطوا بالزايد للسحور

وسلامتكم على قولت ام سارة

ام سارة علميني كيف انزل صور حتى اني لكن خطوة خطوة لاني انسيت الكمبيوتر وكيف يخدموا عليه بالله مابعدنا وعلميني كيف اندير تقييم وكيف اندير بروفايل وبارك الله فيك

barney
07-27-2012, 06:15 AM
بارك الله فيك يالصابرة وانشالله في البكلاوة الجايه انرد بالي وناخد بنصيحتك لان هذي عزاك فيها بارد اتلوحت حشا النعمه ربي يحفظك انشالله

يا انهار بارك الله فيك انشالله انجربها

نسمة ليبيا الحال من بعضه ربي ايعينك
والنعاجيه وينك امغيبه نورتي الدردشه ماتقطعيناش

ام ايوب طمنينا عليك

سويت نونا وينك انشالله ماهناك سو

حتى اني بندير كيف ام عدنان الله يذكرها بالخير شوفي اسمك وين واقري حظك هههههههه

مغتربة 7
07-27-2012, 08:21 AM
السلام عليكم

سلمهم ياربي الناشطات كل ما نخش نلقاكم فوتوا نقعد نقرا على السريع يعني كلمة انشوفها وعشرة لا
ام سارة حسك قولتي قهوة اني نشرب معاك قهوة راني مدمنة قهوة بس من غير غش
مش تقولي قهوة وما انشوفوها هاتيها نبي انشوفها بعيوني :rolleyes:قصدي كنت عماهم

دانية
07-27-2012, 02:44 PM
مرحبتين بالغاليات والله جو الدردشة مش عادي ربي يدوم المحبة

امس كنت فاطرة عند هلي انا وأختي وماشاء الله لمة اتهبل ..

اليوم عجنت الخبزة وقلت ناخذ طلتي عالمنتدى وبالنسبة لتكتيكاتي الحربية اليوم للفطور كالتالي:-

شربة- بشاميل - سمبوسة( عجينتها واتية) - كيميا - فروبي ..

والحلو مهلبية وممكن كيكة جوز الهند..

أمـ ساره
07-27-2012, 02:48 PM
مساء الخيرات حبوبات


بالاحرى صباح الخير عندي ليا أقل من ساعة فايقة


نسومة حبيبة ديري زيني ما تكثري من الماكلة

تعرفي ندير بس في 8 طروف بيتزا وزيهم خبيزة بالتن

يادوب بالعدد نحن 3 بس نفطروا مع بعض

ولو فضل ندسه لثاني يوم ما ندير غيره

وكثري من الحاجات الي ياكلوا فيها بس




بارني حبيبة غالية والطلب رخيص شوي ويصلوك المواضيع في ملفك

وعليك وعلى قسم الدعم الفني فيه هلبة مواضيع تساعدك

وياريتك تشاركي معانا قريب يصير لي احباط من قلة مشاركات العضوات


نبي نسألك عن الفطيرة كل يوم تكتبي فيها قصدك فطيرتنا الليبية ؟؟






غوغو حبيبة باذن الله نصور لك سفرة قهوة ونعزمك عليها ولا يهمك




وباقي الحبوبات وينكم هيا قولولي شنو فطوركم لليوم


اليوم مقررة نخش متأخر للكوجينة حاشاكم رجليا حالة وخايفة نتعب

وكل مرة نقول بنجرب حاجة من المنتدة وما عرفت شنو لتوا

أمـ ساره
07-27-2012, 02:54 PM
ماشاء الله على الناشطة دانية

نيالك مجهزة الخطة الحربية اني قاعدة نفكر ونعصر في دماغي

ومشكلتي لما نخش المطبخ نغير جدولي كله

نقول بندير حاجة نلقى روحي في حاجة ثانية

حبيبتهم
07-27-2012, 03:16 PM
السلام عليكم جميعا
كيف حالكم اليوم

ام سارة ماتتعبيش روحك هلبه
معليشي من شنو يوجعن فيك رجليك


اليوم ان شاء الله فطوري
بوريك بف باستري و بندير معاه بوريك بالسبرينج رول او سمبوسة (عجينتها جاهزة )
ونفكر اندير رز ان شاء الله لكن ماقررتش لتوا اندير رز بالخلطة او رز في الكوشة
وطبعا الشربة اللي مايحلاش الفطور الا بيها


وسلامات لكل البنات

luba
07-27-2012, 05:19 PM
اهلين بالبنات اليوم مقررة من الصبح نجرب لقمة القاضي لي حبيبتهم
نايضة نحلم بيها اللهم صلي علي النبي علي حبيبتهم

والفطور مش عارفة كيف ام سارة ديما نغير في التخطيط
علي طول شهر رمضان مقررة نطبق من المنتدي حاجة او اتنين
امس طبقت عجة المجشية لي لوتي ربي يخليها ويعطيها ماتتمني
اليوم ممنكن فطوري

ممكن فطاير الدجاج لي زينب محمد طبعا رحت فيها اسطي فطاير

وشربة وسمبوسة الباف بعجينة من ايديا يعني مش باف باف محرفة

والوجبة احترت وعييت من التفكير ممكن كسكسي او مكرونة صالصة
ان شاء الله ماتتغير الخطة

باهي ياربارني مالقيتش اسمي في حظي اليوم شكله بالهون حظي ههه


سلامي للجميع الحاضرين والغايبين

أمـ ساره
07-27-2012, 11:57 PM
اهلين بحبيبتهم ولوبا الحلوات

صحة فطوركم

حبيبتهم اني التعب يجيني من الهبوط

ورجليا يوجعوا فيا من كثرة الوقوف


اليوم خشيت للكوجينة الساعة 6 وبالسيف واقفة على رجليا

درت سلاطة مكرونة بالخضرة المقلية

والجردينة

وطبقت الطماطم المحشوة لأوركيد بصراحة مش عادية

وعزوزتي درات شربة ومبطن وكفتة


والحلو فاضل من امس كريم كراميل

أمـ ساره
07-28-2012, 12:44 AM
وهذه سفيرة قهوتي لعيون مغتربة

واتفضلوا يا حلوات الي تجي الأولى تسبق



[فقط الأعضاء المسجلين يمكنهم رؤية الروابط]

om_adnan
07-28-2012, 12:52 AM
أخيرا وصلت هذا جزء من سفرتنا,كفته الارز لزوبه,كرات البيتسا المقليه من قسم المنقول لاسماء,بس للامانه العجينه من السمبوسك وهى من المنقول كذلك,بوريك محشى سلق وجبنة مثلثات وسماق,اليوم فطورنا شربة ورز وكارى خضره وبوريك فى الفرن بالدجاج,لى عودة.

[فقط الأعضاء المسجلين يمكنهم رؤية الروابط]

om_adnan
07-28-2012, 12:53 AM
[فقط الأعضاء المسجلين يمكنهم رؤية الروابط]والله حنقسم علينا كلنا,صحتين وعافيه للى كلى وشرب القهوه ,جزاك الله خيرا.

أمـ ساره
07-28-2012, 01:17 AM
ماشاء الله على سفيرتك أم عدنان

ان شاء الله ديمة عامرة بأهلها

سلمت ايدياتك الحلوة

وياريتك تنزليها في السفر الرمضانية معانا


وبالنسبة للقهوة صحيحة على قلبك هذه قهيوتي نشرب فيها بروحي الله غالب

barney
07-28-2012, 05:41 AM
السلام عليكم ورحمة الله وبركاته


كيف حالكن اليوم انشالله ديمه بخير وفي خير اني ديمه عاقبتكن توقيتي يختلف عن ليبيا ب6 ساعات لما انجي مانلقى في حد انفضي اللي في خاطري ونطلع



ام سارة يعطيك الصحه عالقهيوة لكن مانشربش فيها والفطيرة العاديه لان راجلي مايبيش خبزة مع الشربه ايحب الشربه بالفطيرة امعودينا بيها اهله قال مانعرفوش الشربه الا بالفطيرة طبعا اني ماعاشرتش اشيابيني ومانعرفهمش لاني من الكوشه للطائرة

شكرا عالمواضيع اللي بعتيهم واستفدت منهم وكانوا واضحات وانشالله الايام الجايه انزل كامرتي مليانه صور من قبل رمضان





luba انشاء الله حظك ماهو بلهون وانشالله ديمه في الهني وراحت البال يارب خبرينا ع لقمة القاضي شن صار فيها انت كيفي اني حتى اني ولمس بندير البكلاوة الحارة من الصابرة الليل كله نحلم بيها . ضروري منها الوجبه سعدودكم تاكلوا انشاء الله بالصحه يارب


ام عدنان انشالله بالصحيحه وانشالله سفرة دايمه ياربي



وسلامتكن

مغتربة 7
07-28-2012, 06:24 AM
سلم عويناتك يارب يام سارة

[فقط الأعضاء المسجلين يمكنهم رؤية الروابط]

الله ريحتها فايحة سلم ايدياتك

موودة
07-28-2012, 12:55 PM
مرحبا بأحلى سيدات

كيف حالكم ... يارب بخير

وشكرا واااجد على السؤال عنى والله فرحتونى

بالنسبة لأخبارى المطبخية هه ماشى الحال

ندخل مع ماما ومرات اندير ومرات نكتب

امس درت رز بالخلطة بس تحت اشراف ماما لأنها حالفة ماتطلع من المطبخ خايفة مانوكلش راجلها وولدها هههههههههه

وطلع طعمته كويسة

وعاودت درت كرات البطاطا بالجبنة لأن طعمتهن حلوة واجد وكلوها كلها

وهذى صورتها وهى اتبكبك ع النار


[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])

بنت حواء
07-28-2012, 02:17 PM
السلام عليكم ورحمة الله وبركاته
كيف حالكم كلكم وحدة وحدة ان شاء الله تمام
وصحة فطوراتكم كلكم

ماشاء الله القهوة فايحة نشم فيها وعزومات وجوووووووو
أم سارة وكان حطيتي في السفرة فنجان تاني؟
راهو حتى أنا نبي حصتي أصلا مدمنة قهوة لكن نحبها سادة
ولو معاها حلو ياسلااااااااام :p
ههههههه معليشي جيعانة ودايخة

باهي أمس رايقة متعشية عشاء حلو
مشينا للعويلة (أهل زوجي)
أنا درت بوريك النشا باللحم المفروم
ودرت طاجين جبن بالدجاج
ودرت رز أصفر بالبازيليا والقلاية
ورفعتهم معاي

وهما دارو شوربة ليبية حمرا
وسلاطة عربية
وخبيزة الكسكاس محشية جبنة ودحي مطبوخ وطماطم أخضر
بالتفصيل :o

هذي السفرة اللي رفعتها


[فقط الأعضاء المسجلين يمكنهم رؤية الروابط]



مالحقتش نصور الرز معليشي
الحلو كان بسبوسة جوز الهند مع قهوة عربية وبسسسسسسس
ويلا سلاماااااااااااات

حبيبتهم
07-28-2012, 02:43 PM
السلام عليكم
كيف حالكم كلكم يا بنات
ام سارة
ان شاء الله لاباس عليك
هبوط الضغط يعطوا عليه في علاج قطرة امشي للدكتور يكتبهالك اني قبل مانفعتش الا هي معاي ديمة ضغطي هابط (70\40)


ام عدنان
ماشاء الله سفرة مشهية ياريت تشاركي بيها

مودة
اهلا بك يا حبوبة عندها الحق امك الحال حال صيام وكان تخليهم جعانين هههههه

صحيتي كرات الجبن باين عليهم طالعات روعة غير ماتكثريش ديمة بالك يكرهوها تعلمي حاجة ثانية وجربيها في اهلك خير من لما تتزوجي راجلك يقعد ايقولك تتعلمي فيا



بنت حواء
ماشاء الله عليك ديمة حاجاتك شكلها روعة
وصحتين عليكم



بنت حواء

أمـ ساره
07-28-2012, 03:16 PM
مراحب الحبوبات

بارني

ان شاء الله نشوفوا مواضيعك وحتى لو الصور قديمة نزليها عادي



مغتربة الله يسلمك ويبارك فيك حبيبة


مودة

ماشاء الله تعلمت حاجة بسرعة معناها عندك مستقبل زاهر في الطبخ



بنت حواء تلاقينا صار نفس القهوة اني وياك

خلاص كل ليلة نديرها ونسمي باسمك فنجان ليا والثاني ليك

أما الحلو بروحه هذه قطايف زوبة درتها

وعجبتني لكن اني ما نحب نحشيها

يا دوب نحطها في الزيت ونعسلها هكي نفضل ناكلها




حبيبتهم

الله يسلمك ويبارك فيك وخيتي اني ضغطي في الغالب 90 \ 60

يقولولي كثري الملح بس ما يعطوني في العلاج




اليوم نايضة بالسيف ورقيتي توجع فيا ورجليا من التسطير دايرين فيا حالة

من الركبة للقدم يسطروا ربي يستر ونكمل النهار على خير



والفطور كل مرة نقول بندير حجاة قاعدة ما قررت بالضبط

ليا فترة خاطري في الطاجين التركي نحبه هلبة لو قدرته اليوم نديره

ومعاه بيتزا تقريبا هذا الي نقدر عليه

ولما نخش الطوجينة نزيد نفكر على حسب الموجود

حبيبتهم
07-28-2012, 03:34 PM
السلام عليكم

ام سارة
ان شاء الله لاباس عليك
غريبة ايقولوا لك كثري الملح
اني الدكتورة تقول لي كثري سوائل بالذات الماء وعطتني القطرة والله نسيت اسمها كان هذا كتبتها لك
بالنسبة لرجليك اني هالايام ركبتي توجع فيا نستخدم لها في دواء ياسلام اسمه
Fastum واسمه الكيميائي 2.5% Ketoprofen
اسألي عليه الصيدلي وجربيه هو جل وريحته كويسة تشبه الزهر
وان شاء الله لاباس عليك

دانية
07-28-2012, 05:59 PM
وأخيراً وصلت بعد معارك كر و فر في الكوجينة ...

شن اخباركن ؟؟ اليوم فطوري شربة / ابراك/ محشي فلفل / قلاية كبدة / بيتزا / وعصير لوز بالحليب .. وماننسوش الخبزة اللي مايحلى جو رمضان الا بخبزة الحوش..

والحلو مهلبية .. امس درت كنافة محشية بالموز ..وربي ايعاونا علي رمضان ...وصلن علي سيدنا محمد ..سلام

luba
07-28-2012, 06:59 PM
ام ساره ربي يعينك ووه مااصعبه مع الحمو
ربي يقومك بالسلامة

بارني ربي يسلمك كيف حالاتي من الزفة لي الطيارة
بس روحت وتعرفت عليهم

ام عدنان ماشاء الله ياريتك تشتركي بيها

مودة منورة بقوة عاد انراجوا في مواضيعك اهو طلع الدبش السمح

بنوته ماشاء الله عليك بوريكك مجرباته وراجلي قال ممتااااااز


حبيبتهم كيف الحال ونزلت التطبيق لي اللقمة حاجة روووعه

دانية عليه افضل الصلاة والسلام وصحة فطوركم

زعمة كيف حال امال وخدوج وشن صار فيهم ربي يشفيهم

اللهم حرر شعب سوريا من بشار وازلامه والطف بحالهم يالله

ميلا
07-28-2012, 10:41 PM
السلام عليكم كل العام والجميع بخير ماشاء الله المنتدى فيه اعضاء اجدد .. انا العضوة ميلا لماأشارك منذو بداية الاحداث حبيت نسلم على الجميع ان شاءالله رمضان خير عليكم اليوم فطورنا شربة طبعاً ومحاشي وبوريك وبيتزاء والحلو كنافة بالقشدة وبسبوسة جوز الهند

ميلا
07-28-2012, 10:52 PM
السلام عليكم كل العام والجميع بخير ماشاء الله المنتدى فيه اعضاء اجدد .. انا العضوة ميلا لماأشارك منذو بداية الاحداث حبيت نسلم على الجميع ان شاءالله رمضان خير عليكم اليوم فطورنا شربة طبعاً ومحاشي وبوريك وبيتزاء والحلو كنافة بالقشدة وبسبوسة جوز الهند

لوتي
07-28-2012, 11:11 PM
السلام عليكم كيف حال الكل إن شاء الله بخير
نغطس وبعدين انولي انخش صحا القهوة أم سارة وإن شاء الله لاباس عليك طهورلهبوط الضغط ضروري تعرفي السبب وتعالجيه وتشربي السوائل
مودة ماشاء الله طالع منظرهم تحفة
بنت حواء صحا علي هالأكلات الفايحة يسلموو
حبيبتهم مرحبتين بيك وصحيتي علي اللقمة الحلوة
دندونة عليه أفضل الصلاة والسلام صحا عليك الفطور و
بارني فعلا الواحد عليش متعود أحني متعوديين البيتزا رفيق الشربة كل يوم نبوها
لوبا محلاه الترايفل توا تشوفيه في التطبيقات بإذن الله تعالى
ميلا مرحبتين بيك وكل عام وإنتي بخير
أم عدنان صفيرة تحفة صحا صحا
من شاف ف سويت ولا سمع عليها حاجة يطمنا ليها فترة مش مبينة
ووين الصابرة وغرووبة وباقي الصبايا
أما أني اليوم فدرت ترايفل لوبا وأخيرا قديش ليا خاطري فيه ودرت كفتة توا بنزلها إن شاء الله تعالى
وياربي فرجها علي كل مهموم وانصر كل مظلوم عاجل غير أجل أمييين

أمـ ساره
07-29-2012, 12:32 AM
السلام عليكم وخياتي وصحة شريبتكم


شنو حالكم واحوالكم وشنو فطوركم


اليوم وخيتكم أمـ ساره صارت فيها حالة

رقبتي توجع فيها التهاب ونحس في روحي بنطيح من طولي

يا دوب درت بيتزا وطاجين تركي وطبقت قوارب الفلفل والباذنجان المحشية لأم هداية

ودرت سلاطة عادية خيار وطماطم وفلفل جي خاطري فيها

وحاشاكم وقت الفطور ناكل بالسيف وما قدرت نتبنن شيء

نحس في روحي بنرجع بس





حبيبتهم بارك الله فيك وخيتي وعندي مساج ان شاء الله نستعمله

لكن مدامنا كل يوم واقفين نحس ما فيه شيء يفلق فينا لين نرتاحوا

وبالنسبة للحبوب توا ما نقدر ناخذ شيء لين نجيب

لكن ديمة هكي وخيتي ما ينفع شيء معاي الضغط هو هو



دانية صحة شربتكم وخيتي وماشاء الله فطور قنين لكن وين الصور



ميلا مرحبتين بيك وخيتي وعاش من شافك في المنتدى ووين هالغيبة كله



لوبا ربي يعينا جميعاً لكن اني الحمد لله في المكيف ما نحس في النو

لا خشة ولا طلعة بس تعب الكوجينة هو الي زايدني وما نقدر ما نطيب

كل يوم نحب التطيب هلبة وخاصة لما نجرب حاجة جديدة



لوتي مرحبتين بيك وخيتي وربي يسلمك حبيبة

هذا لما نعاين يقولولي ليه علاقة بالوزن وانتي ضعيفة وهذا طبيعي

وبرى من هالكلام هذا لكن الهبوط يجيني لما نتحرك هلبة ونتعب






مغتربة

بنت حواء

أم عدنان

وباقي الحبوبات وينكم اليوم هاربات

ميلا
07-29-2012, 01:00 AM
الله ايسلمك اختي امسارة وشنو قصة الطاجين التركي وقوارب الفلفل والباذنجان المحشية لأم هدايةوين نلقاهم خاطري نجرب حاجة جديدة

أمـ ساره
07-29-2012, 01:31 AM
الطاجين التركي ان شاء الله انزله قريب

اليوم حاولت نصور لكن من تعبي ما جاني كويس

وانحرق شوي

قيه طريقة لخدوج منزلتها في المعجنات العربية والعالمية

تختلف شوي عن طريقتي

وبالنسبة للقوارب تلقيهم في ركن الأطباق الرئيسية العربية والعالمية

وفركسي كويس وان شاء الله تشوفي هلبة حاجات جديدة

جربي على كيفك

om_adnan
07-29-2012, 05:29 AM
اهلين ومرحبتين ب.........



لولاكم....., يابنات أنتوا اللى تفهمونى وتعوضونى عن التعب,لما ندخل للموضوع ننسى كل شى ونفكر فى هالبنات الحلوات اللى فتحوا بيتهم ومملكتهم فى المطبخ لاخواتهم,حتى التعب ننسو

,وتوا على قولت بارنى على الابراج

لوتى يا قمر...من التمور الى الشوربات الى بيت ال........

أم ساره...انقول لو جبتى ولد سميه رمضان لان حتى هو طلع من عيونه

نسمه...عندك الحق ...الونسه حلوه لما تأكلى.

بارنى....ماشاء الله كسبتيها لما تفطرى العزابه.

دانيه....احلى فطور ,فطور العيله.

حبيبتهم....سيدة لقمة القاضى الاولى.

لوبا....فى انتظار السفره الخامسه.

مووده.....روعه الكرات الجبنه.

بنت حواء....ياسلام على البوريك وطاجين الجبن.

ميلا....عود أحمدى.

barney
07-29-2012, 06:05 AM
السلام عليكم ورحمة الله وبركاته

كيف حالكن اليوم وصحه اشريبتكن ورمضان كريم علينا وعليكن انشالله

ام سارة انشالله لاباس عليك يا غاليه وعجبني كل شيء امنزلتيه سلم ايدياتك تطبيقك رائع رائع انشالله بصحيحتك ياربي

ام عدنان سلمك ياربي وشكرا لانك ذكرتيني طول قعدت اندور في اسمي قريته وبعدين قريت رسالتك كامله

luba وين بالله اني انحس فيه راجلي خطفني ديمه انقوله انت خطفتني من اهلي ليا اربع سنوات ماريت امي الا مرتين او ثلاثه عالنت من بداية ماجيت هنا وشيابيني تعرفت عليهم بالهاتف وتوا ليهم شهر تقريبا دارو انترنت قعدنا نتكالموا باستمرار لكن صوت بلا صورة

لوتي امعاك حق الواحد عليش يتعود حتى اني انحبها بالبيتزا

ميلا وعليك السلام ورحمة الله وبركاته آنستينا ونورتي لمتنا عاوديها الجيه ىوردي بالك تقطعينا

دانيه اللهم صلي وسلم على سيدنا محمد يعطيك الصحه مازال مافات شيء من رمضان قاعدين فالعشرة الاولى اول مرة انحس برمضان طويل هكي اطيبي واتكملي واتقعمزي عالتلفزيون وتقري قرآن ومازال ما يذنش المغرب انشالله فيها خيرة عند رب العالمين يارب

وتوا خليني انقوللكم شن فطوري اليوم مادرتش حاجات واجدة درت شربه وخبزة محشيه طبعا بعجينة العشر دقايق وفرق بيني وبينها هالعجينه نبي اندير حاجه نلقى روحي في نقناق درت اختراعات بالعجينه وشيش طاووق وعندي عصبان من امس وامبطن من امس

وسلامتكن

anhr
07-29-2012, 06:38 AM
اهلين اوخياتى ,ان شاء الله كلكم تمام,اليوم افطورى كان شريبه وازر بلاو,وبيتسا ,ودجاج مقلى اشتحشته ههه,لان زوجى ايفضله فى الكوشه,وعندى محشى من امس,وتو نبيكم اتساعدونى ,عندى عزومت رجاله بعد بكره, متلخبطه شنى انطيب دبرو عليا,طبعا بندير رز بلخلطه غير بندير احمر يعنى امتبل مش ابيض,وضولمه سلك وكرنب,وبنجرب قوارب القرعه لزوبه,والحلو بندير كيكة كرميل وكيكه بارده بالفواكه وخلطه كريم تشيز ولقمه القاضى,وتو نبيكم اتنورونى,طولت عليكم,

موودة
07-29-2012, 11:31 AM
سلامات لأحلى سيدات صح

بنت حواء : كيف حالك عزيزتى سفراتك ديما يهبلن ويشوقن

حبيبتهم : اهلين بيك عزيزتى - تسلميلي بالنسبة لخطيبي قتله رانى مانعرف اندير شي وهو قاللى ديري حتى مكرونة كل يوم عادى وانا عارفته كلام فالعسل ههههه الراجل عند بطنه واستوب ؤاهو قاعدة نساعد فى روحى معاكم ع الأقل يتفاجئ شوية بأكلاتى

ام سارة : كيف حالك عزيزتى ماتنفخينيش واجد قعدت نقول نفسي فى الأكل حيطلع بالوراثة زى ماما عشان هى ماشاء الله وانا عابية على هك ههههههههههه
وان شاء الله اليوم صحتك احسن

دانية : كيف حالك "اللهم صلي على سيدنا محمد" ياربي ديما سفرتك عامرة

Luba : كيف حال الغالية هذا نورك الواضح فى المطيخ والحوش كله .. ان شاء الله حندير حاجات حلوة

ميلا : مرحبا بيك عزيزتى والحمدلله ع سلامتك

لوتى : مراحب عزيزتى تسلمى كلك ذوق وبجد عطيتونى حافز عشان نشتغل

ام عدنان : مرحبا عزيزتى انت الروعة بحضورك

barney : صحة شريبتك عزيزتى ورمضان كريم عالجميع

anhr : مرحبا عزيزتى وربي يساعدك .. طبعا انا الخبرة فى المطبخ عمرها ايام بس ممكن نقترح عليك السلطات الحارة والمتبلة مرغوبة اكثر والبطاطا المبطنة يحبوها الرجالة .. وربي يعينك

om_adnan
07-29-2012, 04:58 PM
أهلين يابنات أمس فطورى كان نوع ما خفيف,ومن غير شربتنا ,اللى مافيش شربه تجى مكانها مع انى درت شربة عدس وشربة ابروكلى,سمك فى الفرن,كيما بالدحى,رز ابيض,كارى خضره من امس,بطاطا فى الفرن واحلى حاجه كان الفتوش,اليوم حندير شربتنا,ابراك,لازانيا,بوروغى-اكله خفيفه-حنحكى لكم عليها,.توا بس شفت كلامك انهار,ان شاء الله ربى يسترك,واتجى عزومه كيف ما تتمنى,الباين اللى تبى اتديره كله حلو,بس حاولى ما تكثريش لانه فيه تنويع,السلاطات والطحينه يعطوا منظر للسفرة مع لمسات ديكور لو تقدرى.

لوتي
07-29-2012, 09:35 PM
أهلين بأحلى عضوات
ألف سلامات عليك أم سارة ردي بالك من روحك وشوية من الحركة تحركيها وإنتي مقعمزة زي تقشير الخضرة مثلا
أم عدنان كلامك صح المنتدى عوضنا علي هلبا حاجات وأني أول وحدة إنقضي في وقتي في حاجة فيها فايدة وولينا زي الخوات فيه
بارني صحا فطورك
أنهار ربي يسترك ويعاونك في عزومتك وأني من راي أم عدنان نوعي في السفرة ومتنسيش السلاطات وحاولي اتديري حاجات ساهلات ومادا بيك لو جهزتي تجهيز مسبق وكان عندك وقت صوري سفرتك نبو نشوفوها
مودة علي إقتراحاتك علي أنهار ماشاء الله عليك متضلميش نفسك وتقولي خبرة أيام
ام عدنان متنسيش الأكلة اللي قولتي عليها خاطري نعرفها وإلا نزليها
أما يومياتي إكتفيت اليوم بعمل حلو بارد لكن اليوم حسيت بحزن لما دورت كتاب الأكلات وملقيتاش علي قد ما دورت عليه ماما قالتلي معنداش وين إيريح لكن الكتاب هذا إرث يعني قيم من أيام التصوير بالأبيض والأسود والورق من أقدم أنواع الورق أخ بس أمتا نلقاه

لوتي
07-29-2012, 09:48 PM
نسيت اقول للوبا الحمد لله سترني ربي معاك وعجباتك العجة صحتين

أمـ ساره
07-29-2012, 09:50 PM
أهلين بالحلوات

وخيتكم اليوم مقالبها هلبة

أولها حرقت صبعي البنصر في اليد اليمين بس لكن محره وبعدها حرقت باطن ايدي اليمين

وطيحيت صينية محلبية الرز كنت منتزلتها لسلفي وعزوزتي وبناتي

مساكين واحد منهم بيقعد من غيرها

وبعدها كنت شادة بنتي سجو نلعب فيها وخبطت لها راسها في الطاولة

لكن الحمد لله جت سليمة وقعدت تضحك مسكينة وجعتني بنيتي

فقلت خلي نريح روحي ونركب نرقد خير لي

أحسن ما ندير مقلب ثاني فيهم مساكين



وبالنسبة للفطور حرام ما تبننت حاجة من رقبتي

كثرت العصائر بس

فطوري كان

قوارب البطاطا بطريقتي أول مرة نجربها

وكنالوني بحشوة البرجر لكن ما عجبني هلبة لأن تتبيلة البرجر قوية

ودرت خبزة ملفوفة بحشوة السلك والجبن

عزوزتي دارت بوريك بحشوة البطاطا والبيض

وشربة

ومن أمس فاضل حلقات الفلفل والباذنجان

وسليمتكم



ان شاء الله نرجع مرة ثانية نسلم عليكم بالوحدة

وشكرا لكل من ذكرت اسمي حبوبات

دانية
07-29-2012, 10:17 PM
كيف حالكن اليوم ؟ ان شاء الله ربي يقبل منا الصيام يارب.. اليوم فطوري

شريبة/ كاني لوني/ كيميا/ الفليفلة المحشية للأخت زينب محمد وطلعت سمحة سلم ايديها/ وطبعاً خبزة الحوش .. وجبتها معاي هيا سمن بسم الله ومدن ايديكن .. وصلن على رسول الله..


[فقط الأعضاء المسجلين يمكنهم رؤية الروابط] ([فقط الأعضاء المسجلين يمكنهم رؤية الروابط])

om_adnan
07-29-2012, 10:24 PM
بارنى ......اه منك انتى والعصبان,ذكرتينى بيه.

مووده...نؤمن بالوراثه فى الطباع ونفس الاكل للبنات حتى لو تختلف الدرجه وهنا تدخل العمه كذلك ,معناها اتطمنا عليك.

لوتى.....ان شاء الله تلقى الكتاب ,يستاهل.

ام ساره.....يوم مقالب ختم على خير.:d

lolo1971
07-30-2012, 02:06 AM
سلام اخواتى فى منتدانا الغالى كل عام وانتم بخيرليا فتره وانتابع فيكم ونكتب مايجول فى خاطرى لكن مايصير شىء الكلام كله ايريح لان كان عندى مشكله فى الرد وبارك الله فى الاخوات اللى ساعدونى :::::::::::::::::::::: وسلامتك توا

مغتربة 7
07-30-2012, 04:35 AM
[فقط الأعضاء المسجلين يمكنهم رؤية الروابط] جيت وجبت القهوة والمهلبية [فقط الأعضاء المسجلين يمكنهم رؤية الروابط]

السلام عليكم وخياتي شن اخباركم وصحتين شربتكم
تقبل الله صيامكم وقيامكم وصالح اعمالكم
سامحوني على التقصير ربي عالم بحالي وظروفي
اليوم فطوري اني وصغاري بس على خاطر الرجاله متعشين مع بعض مدايرين خليطة ههههه اني عليا الشربة

وطيبت لصغاري دجاج محمر ورز ابيض وبوريك وعندي فاصوليا من امس

barney
07-30-2012, 06:15 AM
السلام عليكم ورحمة الله وبركاته

كيف حالكن اليوم وتقبل الله صيامكن وقيامكن

خيرك يا ام سارة اليوم . شكله رمضان امأثر فيك غير اصبري هذا وين طقينا العشرة ولاباس ع صبعك وكفك وسجو وتاخد سوك الصونيه وسعدودك عايشه مع شيابينك ياريتني اني

خيركن اليوم كلكن كانيلوني ماشاء الله اتقول متفقات

اليوم جربت بلح الشام من ام سارة وطلع ايهبل وراجلي عجبه وسلم ايدياتك يا ام سارة نورتي وجهي انشاء الله ربي اينور وجهك ويعطيك لين يرضيك

وجربت البريوش لام هدايه حتى هو طلع مش عادي سلمها ياربي ويفتحها عليك

صحه لقهيوه يا مغتربه مطرح مايسري يمري لكن اني ما انحبهاش لكن المهلبيه شوري ناكل منها ومانشبع

صحيتي يا دانيه ع لخبيزة وبالصحه انشاء الله





رمضان كريم وانشاء الله من عوادة



واختي لو لو مرحبتين بيك ونورتينا 841

om_adnan
07-30-2012, 06:36 AM
سلم اللى تعزم باأحلى قهوه واحلى محلبيه من احلى مغتربه,حتى وهى تعبانه ما تقصر.

نسمه ليبيه
07-30-2012, 06:49 AM
سلام للكل بدون استثناء

ادعوا لى يوم الثلاثاء ان شاء الله عازمه اهل زوجى وسلفاى على الفطور ادعوا لى ربى يسهل عليا وكل حاجه تكون زى مانبيها

هو اكيد التعب حيكون كبير لكن عشان لمة العيله كله يهون

سلام

om_adnan
07-30-2012, 06:52 AM
شنو نسمه حتدير لهم لقمة القاضى,ان شاء الله العزومه اتجى كيف ما تحبى وتنسترى,حاولى ما اتعبيش روحك,بيش حتى انتى اتمتعى باللمه.

الصابرة
07-30-2012, 10:00 AM
السلام عليكم

سامحوني وخياتي والله نخش للمنتدى لكن نبدى مش مركزةنقول انرد على المواضيع وبعدين نخش نهدرز
بعدين نلقى روحي مسكرة بدون مانخش على الهدرزة

واني زعلانة اللي مافقدني منكم وحدة غير لوتي ربي يحفظها يارب

يوم الخميس والجمعة عديت لزليتن لاهلي وتغيير جو

كيف حالكم جميعا فردا فردا وربي يحفظكم

ربي يخليك ام عدنان ومشكورة حبيبة على توصية ترهونية عليا ربي يحفظك
فيك بارك الله بارني وخلاص انراجي المرة الجاية
ماشاءالله عليك مودة وعلي كرات البطاطا بالجبنة شكلها مشهي سلم دياتك
ام عدنان سفرتك حلوة شاركي بيها معانا
اهلين بيك وخيتنا ميلا ونا شاءالله نشوفوا مشاركات ليك وكل عام وانتي بخير
صحيتي لوتي وبارك الله فيك انك تفكرتيني
ان شاءالله لاباس عليك ام سارة وربي يحفظك من هكي مقالب والحمدلله بنيتك جتها ساهلة
وعلى فكرة ام سارة لقيت معلومة في الفيس بوك تقول ان عندما تحرق اليد ضعيها في دقيق حتى يخف الالم فكهذا لان تسبب اي علامة ولن تشعري بالالم مرة اخرى
عليه الف صلاة وسلام.... سلم دياتك دانية خبيزة تهبل
لوتي ياغالية ان شاءالله تلقي الكتاب حتى اني كان يغيب كتاب او كراسة من كراستي حتى عقلي يغيب معاه
اهلين بلولو 1971 منورة حبيبة وبما ان المشكلة انحلت ياريت انشوفوا مشاركاتك
صحيتي غروبة على المهلبية ام االقهوة مانشرب فيها
وخيتي نسومة ان شاءالله ربي يسهل امورك ويسترك معاهم يارب وفعلا اللمة حلوة رغم تعبها
وحاولي توتي حاجاتك من اليوم اللي قبله بيش التعب ينقسم خصوصا في الحاجات الحارة اللي تنحفظ في الثلاجة
ومثلا احاجات الحلوة اللي طول ديريهم حتى هما تلقي روحك ثاني يوم وهو يوم العزومة التعب خاف

وكيف حال لوبا وبنت حواء وام ميوسة وام ايوب وعهود
وان شاءالله نلقوا اخبار على سويت ليها وحشة وفاتها الجو
وكيف حال الجميع اون شاءالله مايزعل مني حد كان نسيت اسم والله التركيز في الباي الباي

om_adnan
07-30-2012, 01:43 PM
أهلين يابنات ....فيه هلبه بنات ماعادش بانو,ان شاء الله المانع خير.

ميلا
07-30-2012, 02:40 PM
مرحبا صحة فطورك جميعاً شكرا ليكم جميعا على الترحيب

ام تغريد
07-30-2012, 03:40 PM
السلام عليكم

كيفكم اخواتي في المطبخ ان شاء الله الجميع بخير

ورمضانكم مبارك وينعاد عليكم بالخير والله ليكم وحشة

متابعة مواضيعكم بي نخش نتصفح ونطلع الردود دارتها فيا



ما شاء الله عليكم منورين وصحة شريبتكم وفطوركم

luba
07-30-2012, 04:02 PM
اهلين بيكم منورين الصفحة كلكم امس كان فطوري كسكسي مسقي ومبطن و سمبوسة خضرة في الفرن

وشربة و درت هريسة من الصابرة تو بنزلها جت بنه تهبل وعندي عزومة بعد ايام قررت انديرها هيا ولقمة القاضي

ربي يسترك يا نسومة زي ماقالت الصابرة حضري من اليوم الاول وخلي فطورك اليوم الاول حاجات شوية وسريعة

ونسلم علي الكل وحدة وحدة واللي جابني صنة القهوة العربية اللي مشتاقتلها من ام ساره وغي غي

سلامي للكل وصحة شربتكم اللهم صلي علي النبي

الصابرة
07-30-2012, 06:43 PM
السلام عليكم
كيف حالكم
اني قاعدة انراجي في راجلي يجي بيش نمشي لحوش العيلة
قلت انخش نسلم عليكم
ودايرة بوريك دايرتلي الورق بتاعه اختي دادي
وشوربة عدس وعصبان
وكاسديا تركية طالبها مني سلفي عجباته لما درتها في المرةالاولى
والحلو كب البسيمة وبودينغ

دانية
07-30-2012, 06:55 PM
يامية مراااحب بكل البنات ... اليوم فطوري برودو/ بيتزا ملفوفة / امبطن / مفروم زاد من المبطن اخترعتله شوية زيتون مع جبنة شرائح وقعد شكله ايهبل :d

اول يوم نشعر بالعطش .. هجمت عالموز وعصرته في الخلاط مع مية متلجة .. تحياتي لكل الناشطات اللي ديما ملتمات .. وصلن على رسول الله.

om_adnan
07-30-2012, 07:53 PM
اللهم صلى وسلم على سيدنا محمد

الصابرة
07-31-2012, 02:17 AM
اللهم صلي وسلم على سيدنا محمد
ماصار من مشيتي لحوش العيلة راجلي جي قبل المغرب بشوي
وبعدين تعبت شوي بطني قريب قتلتني من الالم
وهذا وين خفت عليا
وتوا حالي باهي
كيف حالكم كلكم الان ان شاءالله بخير

حبيبتهم
07-31-2012, 02:42 AM
السلام عليكم


كيف حالكم يا بنات

ام سارة
ماكنتش نعرف انك حامل
ان شاء الله ربي يسلمك
ةالحمل هو سبب هبوط الضغط وحتى وجع الرجلين بالذات لو في الاشهر الاخيرة


الصابرة
معليشي خيرها في غيرها
وان شاء الله لاباس عليك


ددانية
ماشاء الله عليك
وصحتي ن

وكل البنات
ان شاء الله تكونوا بخير

نسمه ليبيه
07-31-2012, 03:17 AM
السلام عليكم

الف لاباس عليك الصابره وكيف درتى فى فطورك؟


وبالنسبه للعزومه بكره ماصار منها شي تأجلت لحين اشعار اخر سلفتى سبقتنى وهى عازمتنا بكره مع انى بديت نجهز لكن هى صممت انها تعزمنا بكره بعون الله

ميلا
07-31-2012, 03:53 AM
مرحبا اخواتي اليوم انستكم بفطورنا والله اتذكرت انصور الا في اللحظة الاخير درنا شربة وبيتزا وكانليوني وطاجين بطاطا والحلو كان قطايف

[فقط الأعضاء المسجلين يمكنهم رؤية الروابط]


[فقط الأعضاء المسجلين يمكنهم رؤية الروابط]


[فقط الأعضاء المسجلين يمكنهم رؤية الروابط]

مغتربة 7
07-31-2012, 04:03 AM
السلام عليكم وصحتين فطوركن يا احلى صبايا
تقبل الله صيامكم وقيامكم وصالح اعمالكم

ميلا ياغالية الصورة ما فتحتش معاي خسارة

صابرة حبيبة الف لاباس عليك ان شاء الله
وباقي وخياتي شن اخباركم نسومة معليشي انتي خودي الاسبوع الجاي ان شاء الله

اليوم فطوري عبارة عن شربة مكرونة صالصة بالمفروم بيتزا وامبطن الزنبقة وطبعا ما لحقتش انصور

وين القهوة اليوم ؟؟؟؟؟؟؟؟؟

مغتربة 7
07-31-2012, 04:05 AM
ميلا تبارك الرحمن فتحت الصور القطايف تهببببببببببببببل
والبتزا والكانيلوني يمييييييييييييييييييييي
تسلم الايادي وصحتين
شاركي بيهم فى المسابقات

أمـ ساره
07-31-2012, 04:14 AM
السلام عليكم روحمة الله وبركاته

مرحبتين بوخياتي الحلوات وحدة وحدة بدون ذكر اسماء

صحة شريبتكم وفطوركم


صابرة لا باس عليك حبيبة بالك تشربي في المية المسقعة وخيتي

تعرفي اني البارح بطني منفوخة ومضايقتني هلبة

وقبل الفجر نضت بنتوضأ وحاشاك بديت فيها ترجيع

المية المسقعة اتعب ردي بالك



حبيبتهم الضغط ديمة هكي حتى من غير حمل مرات في الحمل يتعدل شوي

والرجلين من كثرة الوقوف في الكوجينة لأن ما نقدر نقعمز هلبة

أكثر حاجاتي بالواقف




مغتربة صحيتي على القهيوة الفايحة

وربي يكون في عونك حبيبة


بارني الله يسلمك ويبارك فيك حبيبة

قاعدة نتعلم حتى اني يوم باهي ويوم شين

امس فطوري كان حالة تقول وحدة تتعلم والسبب رقبتي والزكمة

فقلت اليوم ندير خفيف والحمد لله جي كويس وعجبهم





اليوم فطوري كان عالخفيف لكن عجبني وعجب عزوزتي وسلفي الحمد لله

درت عجينة الزبادي وشكلت بيها بيتزا وخبيزة محشية بالتن وكلااوسان محشي بالجبن والنعاناع الجاف

وخبيزة عادية وما نحكيلكم على العجينة وخفتها وروعتها

حتى من سلفي الي ما يعرف شيء في التطيب قالي العجينة حلوة اليوم

ربي يبارك في صاحيتها ويعطيها ما تتمني يارب

ودرت كفتة بالدجاج والبطاطا وحتى هي جت خفيفة وحلوة والأحلى درت فيها هرسة عربية ولا ألحى

وعزوزتي دارت الشربة

وكان فاضل من أمس خبزة ملفوفة بالسلك والجبنة وكنالوني

لكن اليوم اكثر شيء كليته الكرموس حاشاكم زي الي يقولك جمل وطاح في باسطي هذه اني اليوم


وبعد العشاء طلعنا بنشري للبنات حاويج وروحنا قريب الثلاثة ومعاها

يعني يادوب تسحرت وجيتكم لكن ما نحكيلكم على التعب

أمـ ساره
07-31-2012, 04:19 AM
ميلا

ماشاء الله فطور قنين سلمت ايدياتك

وياريت شاركتي بيهم في المسابقات زي ما قالت لك غروبة



مغتربة

مرحبتين بيك حبيبة منورة

معاك الحق اليوم ما فيه قهوة اني بروحي ما لحقت نشربها

الصابرة
07-31-2012, 04:41 AM
ان شاءالله ماتشوفي باس حبيبتهم
ان شاءالله ما تشوفي باس نسمة ليبية
الفطور مع اني دايرة حاجات نرفعها للعيلة
لكن فطورنا تمر وعصير وحليب
راجلي ما يفطرش لكن يسحر
ومش مشكلة تاجيلت العزومة عوضيعها مرة اخرى
وخيتي ميلا ماشاءالله عليك
قطايف وبيتزا و كريب يجي في الخاطر يعطيك الصحة
ان شاءالله ما عليك باس غروبة وربي يحفظك يارب
ان شاءالله لاباس عليك ام سارة
والله حبيبة مانشرب فيها المية المسقعة وحتى انكان شربتها نشربها مخلطة بماء عادي عشان اللوز
واللي طلع امسبب الوجيعة لبطني الم توا تعرفيه بعد ماتولدي بالسلامة يارب
وماشاءالله عليك هذا وانتي تعبانة ماشاءالله ربي يحفظك

barney
07-31-2012, 06:07 AM
السلام عليكم ورحمة الله وبركاته
تقبل الله صيامكن وقيامكن ماشالله اليوم الصفحه منورة
امسارة انشالله حملك من قسمك وانشالله لاباس عليك
الصابرة الخيرة فيما اختاره الله الحمد لله ع كل شيء وانشاء الله لاباس عليك وما عليك سو وحسك قلتي مشيتي لزليتن قديش انحبها هالبلاد وانحب ناسها انموت فيهم نعرفو ناس واجده غادي وخوالي زليتن
ميلا ماشاء الله عليه فطورك اقنين وانشاء الله بالصحه ياربي
نسمة ليبيا خيرها في غيرها وبجوده بيك
ومرحبتين بيكن يابنات من غير ذكر بيش ماننساش حد
اليوم فطوري شربه وصفيحه وبوريك اول مرة نحشيه بالمفروم طلع محلاه عجبني طبعا اني اندير في البوريك اللي عجينته سايله ودرت شيش طاووق ومنكوت وطبعا المنكوت هو حشو لبراك لما ايكون مش ملفوف احني في حوش اهلي انقولوله منكوت وخبزة حوش بس والحلو كاستاردة وبلح الشام من امس وبريوش من امس
وسلامتكن

الصابرة
07-31-2012, 06:13 AM
بارني الحمدلله على كل شئ
ربي يبارك فيك
اني اهلي من زليتن لكن انولدت اني وخوتي و عشنا وكبرنا في طبرق وبعدين من حوالي 10سنوات جينا لبنغازي
وتوا ردوا لمكانهم اللي طلعوا منه زليتن واني اتزوجت في طرابلس
وحلوة زليتن تجيها زيارة

om_adnan
07-31-2012, 06:40 AM
أهلين باأحلى بنات الحاضرات منهن والغايبات.....

شنو أخبار رمضان معاكم.

الصابره...ان شاء الله لابس عليك,يعنى انتى قريتى ثانوى فى بنغازى,اهل زليطن ناس طيبه.
ميلا...ماشاء الله على القطايف وصحتين فطوركم على الاقل ,قدرتى تصورى بعض الصحون.
أم تغريد...انستى,ان شاء الله تلحقى وتقدرى تكتبى الردود,قبل ما يتم رمضان.
لوبا...اللهم صلى وسلم عليه,ربى ما ايغيب سلامها.
دانيه...ياأم الاختراعات,ردى بالك ,مع ان الوقت خلاص ,ان شاء الله تكونى شربتى كويس.
حبيبتهم....أم ساره حامل,ومن ادراك من غيرها,ربى يسهل عليهن ويقومهن بالسلامه,ان شاء الله تكونى فى خير الخير
نسمه ..خيرها فى غيرها والاهم اللمه,ربى يحفظكم.
مغتربه...حبيبتى قلبى,ربى ايخليها لى.
ام ساره...لابأس عليك حمل ,ترجيع,زكمه,هلبه عليك,بعيد السو,احسن حاجه ترتحى على حوائج العيد,كل عام وانتى بخير
بارنى ..تقبل الله منا ومنك,نحن الليبين لو تشوفى بطريقه او اخرى الا تلقى الناس تعرف بعض,صحه فطوركم,

.

الصابرة
07-31-2012, 07:36 AM
اهلين بيك وخيتي ام عدنان
لا اني لما جينا لبنغازي كنت ثاني سنة جامعة
وماقريتش في بنغازي كملت قرايتي في طبرق رغم ان اهلي يسكنوا في بنغازي
لاني من عشاق مدينتي الغالية طبرق واللي ما يجي شئ في مكانها ويكفي انها مسقط راسي فيها وليا الشرف طبعا
كبرت وعشت لعند عمري 24سنة بعدين تزوجت وسيبتها كاني سيبت روحي فيها
لكن الحمد لله ربي عوضني بزوجي صبرني على فراقها

بنت حواء
07-31-2012, 12:38 PM
السلام عليكم ورحمة الله وبركاته
كيف حالكم ياحبوبات وحدة وحدة
ماشاء الله هلبة ومانبيش نذكر أسماء باش ماننسى حد
المهم ان شاء الله تكونوا بخير وتقبل الله صيامكم وصحة فطوراتكم
وياريت تشاركونا بيهم في المسابقات قبل يتم رمضان وتريح عليكم :o

ويييييييين ماشميتش قهوة اليوم خسااااااارة :p

............

صابرة ألف لاباس عليك ان شاء الله حالك كويس توا
عادي خيرها في غيرها

..........

أم سارة لا باس عليك ان شاء الله حالك أحسن توا
ماشاء الله ديما تقولي خفيف وتبدي تعدي في الحاجات الهللللبة
بالصحة عليكم
..........

أنا اليوم أقنعت راجلي قتله قريب نص رمضان فات
وماطيبتش حاجة لروحنا وكليناها
خلينا اليوم نكسرو البرنامج شوية والله نخش على المنتدى
نتسهف نيييييييين نهبل هههههههه
وخاطري حتى انطيب ونصور باش نشارك بحاجة
شنو قاعدة نتفرج ونقوللهم صحة صحة وخلاص؟؟ ههههههه

و............ أخيييييييرا........... اقتنع
توا بنوض بعد شوي ندير عشانا يممممممممم :p

هيا سلامااااااااااات ليكم كلللللللكم وحدة.. وحدة.. وحدة

موودة
07-31-2012, 01:37 PM
كيف حالكن وحدة وحدة والله منورات
وشكرا ليكم على المتابعة والتشجيع كلكن ذوق
وستات بيوت صح وان شاء الله نقعد كيفكن

بس انا معش خشيت للمطبخ:(

متعاركة انا وخطيبي وواصلة معايا لفوق وقلت معش نبي نتعلم خلينى نتعلم فيه وياكل سمح ولا شين

عارفة ان الكلام هذا هبال بس هه شن بتقولو معاندية وراسي يابس ومتعقدة ومتنكدة وجتنى الحالة

دانية
07-31-2012, 03:55 PM
سلامات ياغاليات ...

اليوم قاعدة نصفح في المنتدى بكل استرخاء ...وجنبي نقالي رن علي راجلي قال: اعبي بأربع رجالة عالفطور ...هكي دغري بدون اي مقدمات ..

وانا اللي كنت ريلاكس .. جري كالصاروخ شور الكوجينة وبديت وربي ايعاوني وقلت انخبر البنات بالك وحدة اتشمر اكمامها واتخش امعاي ..

هيا بسرعة نرجى فيكن ..راني بديت في الشربة .. وعجينتي خمرتها وطاجين بطاطا بديت فيه ..هيا همتكن معاي ..

حبيبتهم
07-31-2012, 04:04 PM
السلام عليكم

كيف حالكم اليوم

بنت حواء
واخيرا بتغيري الروتين
ربي يعاونك وماتنسيش كل اللي بتطيبه اليوم نبوا انشوفوه
الصفرة وكل طبق بروحه بطريقته


موودة

يعطيك السلامة ضحكتيني
صار تبي تتعلمي فيه هههههههههه خله يستاهل
لكن مفروض حتى مش على خاطره تخشي تعاوني امك

دانية
ربي يعاونك
واوصفي العنوان نجيك هههههههه
شنو قررتي بتديري


زسلامي لكل البنات

أمـ ساره
07-31-2012, 05:03 PM
مساء الخيرات على بنات بلادي الحلوات


وحدة ما ليها ساهة فايقة من النوم ما تعلقوا عليا راهو والله من التعب

وسبحان الله الزكمة كل يوم تزيد لكن الحمد لله



صابرة

الله يسلمك حبيبة ويبارك فيك اني وين والولادة وين لين تدهشوا وانتم تستنوا

وربي يشفيك حبيبة وطهور ان شاء الله

وماشاء الله عليك وعلى ايدياتك الفالحات ما نجي شيء قدامك



بارني

بارك الله فيك على الدعوة حبيبة والعقبة ليك ان شاء الله

وصحة فطورك ماشاء الله كلها مشهي وين الصور



أم عدنان

سلمها ياربي الي حاسة بيا والله تعب فوق المضاعف

لكن شنو بنديروا الحمد لله وخلاص مشكلتي ما نقدر نقعمز ونرتاح لازم نطيب

مع ان زوجي مسافر لكن هكي رمضان يبي




بنت حواء

مرحبتين بيك وخيتي الله يسلمك حبيبة

ماشاء الله والله فرحتلك اليوم نحس بيك بديري كل شيء على الفطور اليوم

ربي يعينك وتاكلوه بالهني يارب




مودة

يعطيك الهني ضحكتيني ههههههههههههههه

ادلعي يا حنة ليش لا مدامك مازالك على البر خودي راحتك

ربي يهنيك حبيبة ويتمم لك على خير ان شاء الله



دانية

يا أن الروقان انتي هههههههههههه اهو جاك الجري

ربي يكون في عونك حبيبة وادللي لو نعرفوا وين نجوا ونعاونوك

لكن ماشاء الله انتي قدها وقدود ربي يسهل عليك ويسترك يارب




حبيبتهم


منورة بمشاركاتك الحلوة واضافتك للمنتدى

ماشاء الله على ايدياتك خليك هكي ديمة ترفعي لي في معنوياتي



نسومة

خيرها في غيرها حبيبة على الاقل تزيدي تفكري شنو بديري

بالرحة وتوتي روحك بالوساع حتى تجيك عزومة زي ما تبي



لوبا الحلوة

ماشاء الله عليك حبيبة وربي يهنيك ويحفظك

وان شاء الله ترجعي لليبيا قريب وتاكلي الي في خاطرك

الرشدة والكنافة وكل شيء والقهوة خليها عليا



أم تغريد

نورتينا يا حبيبة والله ليك وحشة

كيف حالك وحال العويلة كلهم وشنو جو رمضان عندكم

واشتقنا لأكلاتك الحلوة وابداعاتك




وتوا جينا لمشروع الفطور

مرة نقول بندير ومرة لا ونرعف روحي لو خشيت للكوجينة مافيه مفر

نخمم في رز بالشاورما لأم أيوب الحلوة وبوريك بالدحي خاطري فيه

وبندير بيتزا بعجينة الزبادي والحلو عندي بسبوسة من امس

ان شاء الله لو الليلة فضيت انزل طريقتها واخذتها من منال العالم


وسلامتكم

anhr
07-31-2012, 09:01 PM
السلام عليكم ورحمة الله وبركاته كيف حالكم ياحبوبات
وحده وحده,ان شاء الله تكونوا بخير وتقبل الله صيامكم وصحة فطوركم,وطبعا امس كانت عندى عزومه,وعادى تعرفو كيف تصبحى, لاكن ليوم اضراب على التطييب,تسخين وبس ههه, لاكن بندير شربه عدس هه,المهم العزومه كانت تمام والحمد لله ,طبعا انى شقتى صغير والمطبخ جاى فى المدخل وراجلى قالى بنقعمزو فى الصاله لا فيها مكيف ههه ,نحكى فى التفصيل,المهم كنت لازم الكوجينه قبل ليجو تكون نطيفه وموتيه الماكله لرجلى بيش يخطها,يعنى اتلخبيط اكيد المغتربات يفهمو عليا,وكانو 11 براجلى,حاولت قدر الامكان انكمل بكرى,وطيبت ازر بلخلوط وشربه كنت مرعوبه لانى منعرفش اندير كميه كبيره,وقوارب القرعه لزوبه وبيتسا وخبيزات تن وامبطن الزئبقه وكفته بطاطا وبوريك,وطولمه وسلطه مشويه وخضره وسلاطت لملفوفه بليونيز وكيك فواكه وكريم كرميل وبكلاوه لفيتها رى سويرول وقصيتها وجت نازكه الصراحه وكانت عندى سليله حشيتها مكسرات ونتوتيلاه وعصاير ومشروب ,وشاهى اخضر واحمر وقهوه كلهم دارهم جوزى,لان معنيش طرامس,لانى قريب راجعه لليبيا فمكترت الشرى ,ولى ينقص ينقص,احكيت قصة حياتى, اتعب لاكن ان شاء الله باجره , لاكن حرام قعدت هلبه ماكله,اكلو ا كتر حاجه الرز والشربه ولحم فى الكوشه ودجاج انسيت مكتبتهمش ,وراجلى يقولى قتلك متكتريناش هالمقلى ههه,يقصدكل انواع المشقشقات هههه,لاكن ارز افضل اشويه فرزته زعمه يصير يتفرز,حرام التلويح والله ,انقول كان فى ليبيا الحاجه متقعدش فى العويله هلبه ماشاء الله وشكر لاخوات الى عطونى افكار وطبعا مصورتش, خديت صوره لصحن شكلته كان فيه نصيب انحطه متقبلن

أمـ ساره
07-31-2012, 09:51 PM
ماشاء الله لا قوة الا بالله عليك يا انهار

الحق كثرت هلبة حاجات

لأن تعرفي في رمضان الناس تشدها على السوائل أكثر شيء

والحمد لله ربي سترك مع ضيوفك والاهم مع زوجك


ويصير حبيبة تفرزي عادي أحسن من تلوحي النعمة

حتى اني زيك الي يقعد ندسه لثاني يوم


ونستنوا في الصور يا حلوة

أمـ ساره
07-31-2012, 10:25 PM
جيتكم وجبت معاي القهيوة يالا مدوا ايديكم

سامحوني عالسريع لأني مستعجلة بنطلع



[فقط الأعضاء المسجلين يمكنهم رؤية الروابط]





اليوم فطوري كان ارز بالشاورما لأم أيوب

وبيتزا ساندويتش بطريقتي

وخبزة محشية بالجبن والنعناع وشيطت مني


وعزوزتي درات وردات بالمفروم وشريبة

والحو درت محلبية الرز للصابرة >>> اعتمدتها رسمي على خاطر سجو

وبسبوسة التمر فاضلة من أمس


وسليمتكم

بنت حواء
07-31-2012, 11:25 PM
[فقط الأعضاء المسجلين يمكنهم رؤية الروابط]


آآآآه آآآه ياراسي محلاها القهوة فااااايحة يمممممممم :p
شكرا ياأم سارة بالصحة عليك القهوة والفطور
............

أنهار ماشااااااااااااااء الله خيرك اتعبي في روحك هكي؟؟
راجلك بروحه قالك ليش مكترة
ماشاء الله مالح وحلو كله كترتيه وياناري قعدتي بلا عشاء؟؟
عادي عوضي بما أنه فضل تاني يوم طيحيلها ماكلة هههههههه
..............

كيف حالكم كلكم الباقيين وحدة وحدة وصحة فطوراتكم اللي فطرت
واللي قاعدة تجري ربي يعاونها
وتقبل الله صيامكم
وليا عودة ان شاء الله
يلا سلاماااااااات للجميييييييييع

barney
08-01-2012, 01:52 AM
السلام عليكم ورحمة الله وبركاته
تقبل الله صيامكن وقيامكن انشاء الله احني مازال المغرب:(

وانهار سهفتني وحسني جاعانه وعطشانه وما شاء الله عليك يا انهار هذا كله درتيه والوقت كيف سدك بيش وتيتي والمطبخ ايكون مضموم وحاطه كل شيء في الصواني حلو وحار يعطيك الصحه انشاء الله وعلي قولتك المغتربات عارفين وحاسين وهما الاجانب ايدره الكبد تصميم

حوشانهم لازم يا اما المطبخ في باب الحوش والصاله تفتح فيه يا اما حشاكم الحمام في الكوجينه واني هكي حوشي لكن احني حليناها المشكله هذي لما ابتعزمي ارفع لحوش العزابه ويلتموا غادي بيش هما ياخدوا راحتهم وحتى احني وانت وين في اوروبا او اميركا او كندا ؟

ام سارة صحه اشريبتك ويتقبل الله منك لكن وين مستعجله مش امس مشيتي كل يوم اتلجي سادك شدي حوشك وانت تقهري فينا يومك والثاني طالعه


وسلامتكن ليا عوده بعد نفطر توا معاد عندي جهد نشبح لوحة المفاتيح انحس في لبطم خشوا في بعض ههههههههههههههههه سامحوني كاني لخبطت في الدوة

أمـ ساره
08-01-2012, 05:17 AM
مراحب وخياتي

تعرفوا عيوني معبيات نوم من التعب

روحنا الساعة 3 حتى اليوم والحمد لله شبه كملت خلاص وارتحت

لأني ما نحب زحمة الايام الأخيرة والوحدة بدل ما تقعد تلم حسنات في الايام الاخيرة

بالعكس تاخذ غير السيئات من كثرة الزحمة والدنيا خاشة في بعضها

البعض ليل ونهار

تعرفوا اتقول المحلات فاتحين على خاطرنا هالايام ما فيه زحمة

ولا دعاك تاخذي راحتك في الشري




بنت حواء

صحيحة القهوة حبيبة وصحة فطورك


بارني

يعطيك الهني ياسرك بلا حسد خيرلك يابنت راهو

امالا كان انقولك حتى غدوة بنطلع شنو اديري هههههههههههههههههههههههه

ربي يونسك حبيبة في الغربة وان شاء الله ترجعي لليبيا بالسلامة وتتونسي باهلك واحبابك يارب


ووين باقي الفالحات الليبيات وين غاطسات

مغتربة 7
08-01-2012, 06:35 AM
[فقط الأعضاء المسجلين يمكنهم رؤية الروابط]

الله يام سويرة جت فى وقتها

كيف حالكم يابنات وشن اخبار العبادات معاكم
اليوم صورت فطوري وراح انزله ان شاء الله

ام سارة ربي يعينك يارب

بنت حواء معاش تلاقينا اني وياك شن اخبارك ياغالية
وباقي وخياتي يارب تكونوا بخير كلكم

anhr
08-01-2012, 06:48 AM
السلام عليكم,ام ساره ماشاء الله ايبيدوهم بالهنى,وصحه افطيركم,اليوم درت شربة عدس وجت حلوه وخفيفه,وامس كنت عاجنه افطيره ملحكتش انطيبها,فدرتها اليوم,
اخت بارنى ياريت يرفع لحوش العزابه لاكن راجلى لازم ايجيبهم هه,والله انطيبلهم كل يوم كنهدا,درت الضولمه بس اليوم الى قبله الساعه 2 والباقى من 8 الصبح وانى فى الكوجينه ل3 فى لليل والمعين منحكيش,هدا غير عبيت العسله,ياحبيبه انى جارتك ههه كندا,قريبا رجعا لبلادى ولله ازهكت, منى فيكم عندها طريقه بسبوسه حلو,ولله بنموت عليها ومتنجحج معاى

om_adnan
08-01-2012, 06:51 AM
اهلين بالفالحات اللى يكتبوا واللى مستعجلين.

يعطيكم الصحه والقوه على اكمال رمضان على افضل وجه,ربى يعين الجميع.
لما نكتب ليكم كأنى انهدرز,بس الرد ما يكونش سريع.

الصابره...كلامك من ذهب,صح الانسان لا ينكر أصله,بس الولاء والحب والفزعه للمكان اللى عشتى فيه,كبرتى فيه,اتعلمتى فيه,فرحتى وزعلتى فيه,شنو بديت اتفكرى فى حلاوات العيد.

بنت حواء..شنو اخبارك يوم اللى طيبتى,الواحد لو خذ على قلته ايحسه رزين,المهم جبرت خاطر وطيبتى,نبى نسأل سفرتى ناقصه عادى انشارك,شكرا على تشجيعك.

مووده..والله الليبيه طيبه,تلقى روحك من غير ما تندرى فى المطبخ,واذا راضك,تطبخى بدل الاكله اتنين,ربى ايهنيك وهذا وقت الدلع والدلال تمتعى.

دانيه..انضحك كيف عندنا قدرة الانتقال من حاله الاسترخاء الى الطيران,ان شاء الله أمورك مشت تمام,وكسبتى الاجر.

حبيبتهم..نصيحتك لمووده عجبتنى.

أم ساره..ياخوفى كلمة شبه كملت تقعد فترة طويله,هذا حال كل الامهات,ان شاء الله رمضان الجاى تكون اسرتك متكامله بصاحب بيتك والبيبى .

أنهار .. يعطيك الصحه,ماشاء الله وليمه,ان شاء الله ديما بيتك عامر,ديما انقول الضيق فى الصدر مش المكان, ياما اللى عندهم قصور وحتى اقاربهم ما يستقبلهمش.

بارنى..حتى وكان الرؤيا ملخبطه ولكن كلامك مزبوط.

ربى يعين الجميع على العبادات ويحفظكم ويهنيكم.

حبيبتهم
08-01-2012, 10:09 PM
السلام عليكم

كيف حالكن اليوم
شنو هالكساد كله تغطيس في المطبخ والا في السوق

ام عدنان
ورينا ابداعاتك حتى لو السفرة ناقصة لانك حاجاتك ماشاء الله سمحه


انهار
اهلا بك
اني بنعطيك طريقة بسبوسة ومقدار صغير
ولكن لو تحبي البسبوسة بالبيض فوتيها ماتجربيهاش
لانها بدون بيض
المهم
المقادير
كوب سمدينا مرات اندير فيها حتى بالسميد العادي غير تطلع مش ناعمة
نصف كوب دقيق
نصف كوب جوز هند اختياري حسب الرغبة
نصف كوب سكر
3\4 ملعقة صغيرة بيكنج بودر
خلطيهم مع بعض و صبي عليهم
ربع كوب زيت وربع كوب سمن
وخلطي زين
وبعدها صبي عليهم نصف كوب حليب مكثف غير محلى لو حسيتيها ثقيلة هلبه زيدي شوية حليب لكن هي تكون ثقيلة مش رطبة هلبه
وادهني طاجين بسمن واطرحي فيهالعجينة وزينيها بلوز مزلط وقصصيها وطيبيها بعدها عسليها بشراب ثقيل
خليها لوين تبرد بعدها قطعيها
وصحتين

وسلامي لكل البنات

نسمه ليبيه
08-01-2012, 10:44 PM
السلام عليكم

صحه فطوركم

انا اليوم متمنقهه اخر منقها فاطره عند هلى لان راجلى فاطر بره مع اصحابه وسلم صبايا خوتى واختى اللى دارن فطور متكتك وامى الله لايحرمنى منها قاعده عالعاله
لكن حسيت اليوم طويل لانى ما دخلتش للمطبخ

om_adnan
08-02-2012, 12:41 AM
يابنات اخيرا قدرت انصور حاجه,الا وهى القطايف,ان شاء الله انزلها بعد الفطور,تحياتى للجميع,فطورنا اليوم شربه, رز ابيض ,محشى فلفل من أمس,دجاج كنتاكى,سمبوسه وعندى معاها قصه,فتوش.

حبيبتهم عجبتنى طريقتك فى البسبوسه,هل السمن سايح.

نسمه...نيالك,صحتين وعافيه.

om_adnan
08-02-2012, 01:00 AM
يابنات فرحانه,هذا طبعا لاحظته الفتره الاخيره,الاعضاء الناشطين وصلوا ٥٠٠ ,ماشاء الله وان شاء الله فى زياده,شكرا لكل من ساهم حتى ولو بكلمه بسيطه ولم يكن بخيل,كل واحد عارف نفسه.

حبيبتهم
08-02-2012, 01:15 AM
اوخيتي ام عدنان السمن ايكون بحرارة الغرفة وماتذوبيشي عالنار

وصحتين عليكم ونراجوا في قطايفك

أمـ ساره
08-02-2012, 01:37 AM
السلام عليكم يا بناويت بلادي

صحة شريبتكم وفطوركم وبالهني عليكم وعلى أهل بيتكم يارب



مرحبتين بمغتربة الغالية والله مخلية مكانك يا مراة ربي يعينك ان شاء الله





انهار

الله يسلمك ويهنيك ويبارك فيك وخيتي والعقبة ليك ان شاء الله



أم عدنان

لالا حبيبة اني قنوعة ان شاء الله غدوة ونكمل باذن الله

اليوم ما طلعت واخذين راحة

وبارك الله فيك على الدعوة الطيبة ياريت والله

توا 4 سنين ديمة رمضان ناقص عندي




حبيبتهم

ايه والله حبيبة حال التغطيس في الكوجينة اني اليوم من 4 خاشة





نسومة الحلوة

نيالك حبيبة الراحة باهية مرة مرة وصحة فطورك




وباقي الحلوات

وينكم غياب ما عاد بينتوا

يالا انتي وياها انشطي وورونا ابداعاتكم والاكلاتكم الحلوة

سادكم بخل علينا





وفطوري اليوم

عزوزتي درات شربو وطاجين بطاط ومفروم

ووخيتكم درات

بيتزا بالبطاطا والجبنة

وطبقت سويسرول الدجاج لأم ميوسة ايهبل سلم ايدياتها

واحد ثاني حشيته بالبطاطا المهروسة والجبنة ومعه معدنوس وشبت

وطيبته في الفرن وجي ايبهل بصراحة

وطبقت لفائف الباذنجان لزوبة بصراحة ساهلات وحلوات

ودرت طاجين برجر بطريقتي

وكفتة بطاطا ودجاج جت خفيفة وحلوة



وسليمتكم يا وخياتي

دانية
08-02-2012, 02:11 AM
سلام يانويشطات..
ام سارة, ام عدنان, حبيبتهم.,انهار, نسمة ليبية ’,الصابرة, مودة, بنت حواء , لوبي, لوتا...وان شاء الله ماننسى اسم

ربي يبارك في مساهماتكن ويجعلها ربي في موازين حسناتكم ..

انا اليوم فطوري برودو وسمبوسةوالمجبنة للأخت الصابرة ومفروم بالفلفل المقلي والعصير موز بلحليب والحلو الكنافة اللي بالموز ...
وربي يعينا على طاعته بصدق حاسة روحي تعبانة الصغار وهمهم والكوجينة وتعبها والواحد ايخاف ايقصر مع ربه ..الله المستعان

om_adnan
08-02-2012, 04:05 AM
رساله إلى مووده...شوفى شغلتينى عليك أنتى وخطيبك,تطلعوا تراضيتووما قولتلناش,يقعد فيها حق وباطل,إن شاء الله أمورك تمام.

سلمها أم ساره... منظمه أمورك,ماشاء الله.

شكرا حبيبتهم.. على الاجابه.

دانيه..ما قلتيش شنو صار فى عزومتك.

دانية
08-02-2012, 05:11 AM
سلمك نشادة ياأم عدنان ..العزومة ياحنة عدت على مايرام عقدني راجلي شوية امصبي عند راسي عند الكوشة وامركب علي : بسرعة الدجاج مازال ماتحمر طولتي راكي .. رقالي الضغط لكن الحمد لله الامور عدت تمام..:rolleyes:

om_adnan
08-02-2012, 06:10 AM
لا لا,شكلها القصه نفسها فى هلبه بيوت,المهم مشت العزومه على خير.

barney
08-02-2012, 06:34 AM
السلام عليكم ورحمة الله وبركاته

تقبل الله صيامكن وقيامكن ودعاءكن يارب العالمين

انشاء الله ديمه متهنيات وملتمات بين اصغاركن واهلكن ورجالتكن يارب العالمين

ام عدنان ماشاء الله عليك حسيتك تكتبي وانت متريحه وبشويا عليك ومنسجمه ربي ايسلمك انشاء الله

ام سارة باهي اللي شديتي حوشك ومبروك ماشريتي اتبيدي بالهني انشاء الله وبارك الله فيك ع التنبيه ع كتابة كلمة انشاء الله والله نسمة ليبيا ربي يحفظها ديمه اتنبه فيا عليها انشاء الله في ميزان حسناتكن ياربي وانشاء الله كل شيء بالنيه وانحاول انسقمها لكن لما نكتب
مستعجله انلصقها في بعض اعزك الله

نسمة ليبيا انشاء الله ربي ايعزك ويفتحها عليك حتى الراحه مرة مرة باهيه وبصحيحه انشاء الله وماصارش من عزومة اشيابينك؟

مودة ادللي لكن مش واجد. وكان تعاركتوا ما اديريهاش ع التطييب , لانك انت ما بطيبيله هو بس , كان عليه هو ايحبك واللي من ايديك عنده عسل , لكن تعلمي ع خاطر اهله هو وعزايمه بيش اتنوريله وجهه قدام اهله خير من انك كل مايعزم اتنادي خواتك او خواته ,وامك ما

ابتلحقك في حوش راجلك , انت توا في الوقت بدل الضائع تعلمي وما اتفوتيش ثانيه وحطي في بالك مرات ربي يكتبلك وتتغربي كيف حالاتنا شن بديريها عالمطاعم والله اتملي ومافيش اطيب من ايكال الحوش وفيه حاجه ثانيا يا مودة ما اتعقديش روحك واتقولي ما نعرفش

اتصدقي وقت ايجد الجد تلقي روحك مافيش حاجه ماتعرفيهاش اكيد تشبحي في امك كيف اطيب وكيف تحرق في بداية التطييب مافيش وحدة ماتعرفش اطيب فيه اللي هايبه وخايفه وماعندهاش الجرأة لكن لما تنحط في موقف واتسكر راسها تلقى روحها تقدر كل شيء

والله يا مودة عندي اختي اتجوزت وماتعرفش كيف يقلوا في الدحي وسكنت مع اشيابينها في دار اقسم بالله وعزوزتها كبيرة في العمر وماعندهاش حل وسكنت بعيده عن اهلها اقسم بالله ضربت راسها في الحيط وراجلها اصحابه واجدين يومك والثاني عزومه تعرفي

عزوزتها بعيد عنك انجلطت الحوش مليان تريس ونسوان اقسم بالله اقسم بالله طيبتلهم الغدي والعشي وابروحها حتى احني خواتها ما خلتنا انخشوا امعاها الا وربي شاهد عليا خلتنا انوتوا السلاطه بس توكلي ع الله وخليك جريئه ومتفكريش في راجلك فكري في اهله

واصحابه وسامحيني كان طولت عليك وانشاء الله ربي ايعاونك

دانيه وين اسمي يا حنه سميتي لين دهشتي واسمي نقزتيه ربي ايسلمك انشاء الله وما شاء الله ع فطورك وبالصحيحه

حبيبتهم شكرا عالبسبوسه استفدنا منها كلنا انشالله انطبقوها

والمغتربه صحه اشريبتك وانشاء الله ربي يحفظك وايعزك يارب ويعطيك الهني مغلا عليك القهوه

انهار انشاء الله اتروحي لاهلك سالمه غانمه يارب

اليوم مادرتش فطور امقوم لاني كنت في السوق او المحلات العربيه وهنا بعاد علينا واجد روحت قريب الساعه 6 من الساعه 12 الظهر طبعا انجيب في حاجات لمطبخ لحم حاجات حلال يعني والمغتربات اكيد الكل يفهم فيا روحت طيبت لاصغاري غداهم درتلهم رز بالمفروم غالي عليهم

والله من التعب ماكلوشي مساكين يبو يرقدوا بس ودرت عشانا رز بالشاورما لام ايوب ربي ايسلم ايدياتها انشاء الله كيف ما نورت وجهي قدام راجلي ودرت امعاه طبيخت بازيليا لان راجلي ما ايحبش الرز من غير طبيخه وحمص بالطحينا جاهز من المحل العربي وباذنجان امتبل حتى هو

جاهز من المحل العربي ايبعوا فيه في احكاك بس هذا مادرت عشاي وضربت فربي فطرنا بيه وبلح الشام مازال ماكملناه ليه من يوم الاحد


وسلامتكـــــــــــــن

دانية
08-02-2012, 02:09 PM
معاك الحق يابارني ...سامحيني وكان هذا توا انسيروا عليكم ;)

واهو ياستي كتبت اسمك بالعريض والملون عشن ترضي ..ربي يحفظك.

أمـ ساره
08-02-2012, 06:08 PM
مساء الخيارت بنات بلادي الحبوبات


بارني والله ما تبي الا طريحة على يديك عدلي الكلمة يابنت راهو المعنى يفرق هلبة

اكتبي ان شاء اللهوما تلصقيها ما تخسري شيء لو درتي مسافة بينهم

وربي يحفظ لك صغارك ويرجعك لبلادك سالمة غانمة يارب




دانية

الحمد لله ربي سترك مع ضيوفك وان شاء الله ديمة مستورة




أم عدنان

سلمها الرايقة والمتهنية ان شاء الله ديمة

شنو فطورك اليوم




اليوم وخيتكم بايرة ما خاطرها في شيء

نخمم ندير بوريك بالدحي

وبندير سلة نحشيها بالشاورما

وعندي من أمس سويسرول دجاج محشي بالبطاطا والجبنة

وفيه البركة

كل يوم نشكل والي يقعد أكثر من الي ناكلوه

قلت نشدها عبادة خير لي واحني مش مبطلين ماكلة

والحمد لله وربي يديمها نعمة يارب



وسليمتكم لتوا

لوتي
08-02-2012, 07:19 PM
السلام عليكم جميعا كيف حال الكل
أم سويرة نفس التفكير معاك سبحان الله تقول قاعدة في عقلي حتى أني نحب العشرة الأخيرة بدون طلوع المحلات وكان نلفى اللي عندهم صغار يشرو حتى قبل رمضان مبارك علي عويلتك الحاجات إللي شريتيهم
أنهار ماشاء الله علي عزومتك تبارك الرحمن عليك
مودة وينك طمنينا عنك
نسومة ما شاء الله عليك متستحقيش مساعدة فالحة ودللي لما تمشي لأهلك إن شاء الله ديما ملمومين علي الخير
صبورة ماشاء الله عليك سعدودك شفتي ليبيا في شرقها وغربها وبجودة وكيف حال عرايسكم الجدد وأهلك
أم عدنان إن شاء الله ديما فرحانة وهذا أقل واجب منا إتجاه المنتدى لو تعرفو قديش إستفدت وتغيرت حياتي منا الحمد لله الفضل له سبحانه وتعالى ثم للمنتدى
دندونة شكرا لأنك ذكرتيني
بارني ربي يعينك وكلامك صح علي المسؤولية ربي يحفظلك وخيتك وردي بالك من كلمة إن شاء الله ديما عدليها سلم وخيتي
والباقي نسلم عليكم وحدة وحدة بون مانذكر وبدون مانزعل حد وتوا بسأل
لوبا وين
صبورة وين
وبنت حواء وين
وغروبة وين معاش مبينات

luba
08-02-2012, 09:02 PM
اهو اني هني لوتي جيتك نجري

كيف حال الكل اللي في صفحتنا واللي غايب عليها ربي يردهن سالمات وان

شاء الله الكل مرتاح ومتهني

الايام هادي ضاربتني بورة مش عاديه

وجبه رسميه وحاجة وحده خفيف ومرات ندخل عليهم شربه

تو كان عيلتني كبيرة باهي حد يهون عليك خشتك المطبخ وياكل

هو الولد نحلف فيه ونحمرله في عيوني باش ياكل رايح خيال يحشم فيا قدام الاجانب هههه

والراجل تقليدي شادلي في هالوجبات قديش نكره الكسكاس في رمضان منظره غير مقبول فيه

وهدي قصتي هاليومين

انهار ماشاء الله عزومة هدي والا عرس اللهم صلي علي النبي ربي يعطيك الصحة

ام ساره اه اه اه دكرتيني بايام العيد والملابس واطلع خش والبس واقلع وهات و رود

ربي يهنيهم ويبيدوهم بالصحة

بارني كيف الحال وبديني نخافوا ننسوك عاطيه

اللي قبلنا علي راسهم ههههه واعطوها علي راسها مودة شكلها دلوعة الماما والبابا

هكي يامودة من توه عراكات ومن توه زعلات حطيها خرص في ودنك الراجل مايحب المراة النكدية و اللي ادقق

علي كل شي يحبها لو المشكله بسيطة تفوتها بزعلة خفيفة مع ابتسامه زعولة ديري بالك اطولي فيه

وكيف حال ام عدنان جبارة الخواطر ربي يهنيها ويرحم والديها كيف حال بناتك ام عدنان قولي قداش عندك صغار

دانيه منورة تعرفي نفس الحال امس قتله اطلع بره بيش نعرف شنو ندير وماقلتيش شنو درتي في العزومه السريعه

نسمه يابختك ربي يدوم عليك اللمات والله مشتاقه لي لماتنا وعشاواتنا

ربي يسلمنا احني مش شويه اللهم صلي علي النبي قريب تقولي مدرسه هههه مبالغ فيه الوصف راهو

حبيبتهم صحيتي هلبه علي الوصفة وجاري التطبيق باهي لو الواحد مادار جوز الهند يعوض بداله بدقيق او لا

الصابرة تسلمي علي هالبكلاوة والعجينه اللي تهبل ربي يسلمك ويريح بالك

عهود كيف حال صحتك وكيف حال عزوزتك توا

وسلامي الحار للمغطسين سجودة وبنوته و مغتربه

وسلامي للغايبات : امال ونسيبه وخدوج وسويت

الساجدة لله
08-02-2012, 11:33 PM
السلام عليكم يابنات

هو رمضان حلو باللمة الحلوة الي فيه

بس انا هلكت وتعبت اقسم بالله كرهت المطبخ

شوفو ياحنة برنامج العيلة

الفطور مقسوم الى مائدة الرجالة بروحهم
مائدة النساء بروحهم
والاطفال سفيرتهم بروحها

انا وسلفاتي وحماتي الصغيرة ماشاء الله مع صغرها

ااااااااااااااااااااه

تعبانة بصدق الضمان والتطييب مدايريين كل وحدة ادير حاجات وتجيبهم عند حوش العيلة متع عزوزتي

والكميات زي ماتعرفو بتكون كبيرة

بالحق طبت وصلت لدرجة اني معش ناكل خلاص تنسد نيتي على الاكل وقت الفطور يادوب مع 12 ناكل

ونمد رجليا المنفخات من الوقوف

نحساب اول يومين بس الفطور في حوش عيلة لقيت اللمة عجبت الجميع هههههههههههههههههه

الا انا وسلفاتي وحماتي لان تعبنا من الغسيل والضمان ههههههههههههههههههههههههههههههه

ااااااااخ رجليا

ام امير
08-03-2012, 12:40 AM
​السلام عليكم
حبيتكم وحبيت هدرزتكم وحبيتكم لما تسالو وادورو فى بعضكم
نبى نهدرز معاكم من اول يوم رمضان لكن تحشمت قلت هما مايعرفونيش :(
اليوم قلت لازم نخش ونسلم كيف حالكم يابنات

دانية
08-03-2012, 01:35 AM
مرحبتين بكل وحدة اتخش للركن هذا بالذات لأني بصدق انحبه

ومليون مرحبة بأم امير ..خشي وهدرزي براحتك كلنا خواتك ..

وان شاء الله ديما الخير عامر بيناتنا..

anhr
08-03-2012, 06:42 AM
السلام عليكم,وخياتى ان شاء الله اموركم تمام,طبعا فى النص الثانى من رمضان يبدا الكسل ههه,حتى انتم زينى,امس بنهدرز مفيش وقت قريت وطلعت,انى والصغار عراك على الكمبيوتر,والله جيلهم ايتعب,وشكرا لكل من اسال عليا وشكر العزومه,لاكن والله اندمت الى طيبت هلبا ,قولت العزابه مرات مشتاقين للماكله,انى ديما هكى وراجلى عزايمه بالهلبه فكل مرة انقول بنديرلهم حاجه امسقيه وصلاطه وبس نلاقى روحى ياغمه ههه,والله اكتر الاكل اتلوح ربى ايسمحنى,فرزت وسخنت ,راجلى معنداش على البايت ,وصغار البيتسا وبس,,على كلا اليوم افطورنا شريبه,وخبزه فرن فى الكوشه لزوبه,لاكن لصقت فى الطاجين منعرفش اعلاش مع انه سخون,ولازانيا,وطلعت من رز العزومه,والله كان طازه مطراله شىء, وتوست المقلى احشيته شورما وسلاطه مشويه وخضرا, تعرفو فى الايام الاخير ماعش انطيب يقولى درينا امبكبكه وساد,وسلامات ,ايوه والحلو درت الزلابه لزينب جت حلوه لاكن رطبه اشويه علاش زعمه, وشكرا حبيبتهم على البسبوسه لما انجرب انقولك

موودة
08-03-2012, 01:10 PM
حبيياتى خواتى والله وحشتونى كلكم وهدرزتكن الحلوة خليتونى نتمنى نشوفكم بالحقيقة وشكرا على سؤالكم عليا

حبيبتهم
حبيبتى بالنسبة لــ ماما ماتصدق نطلع عشان المطبخ مملكتها وماتبيش حد يداعكها فيه هى اللى مخيبتنى;)
كان تسمعنى حتهزبنى وتقولى تعالى خشى عاونيني انا مش مانعتك ههههههههه

ام سارة
على قد ماتفكرى قاعدة ندلع عارفة بعدين تو نحصل لكن مرة مرة تجى على راسي
تسلميلي يا غالية وربي يهنى الجميع

بنت حواء
كيف حالك خيتى وكيف الصحة وشن اخبارك؟

الصابرة
ان شاء الله تكونى بخير وصحة ونشوفوك دوم

نسمة
كيف حالك عزيزتى وربي يعطيك الصحة والهناء

مغتربة7
صحة فطورك وربي يحفظك

anhr
ربي يساعدك وتسعدى كل من ياكل طعامك الحلو

الساجدة لله
ربي يعطيك الصحة ويسلم ايدياتك اهم حاجة لمة العيلة ربي مايباعدكم

ام امير
هلا وغلا بخيتنا احكيلنا شن بديرى فطور اليوم او شن درتيه

لوتى
تسلمى ياغالية وشكرا عالسؤال

دانية
ماشاء الله عليك مانك مقصرة ربي يحفظك

luba
هههههه حاضر حنسمع الكلام ماهو عارفة هذه فرصتى توة عشان قاعدة بعيدة لكن عارفة بعدين جو النكد يقلب عليا عشان هكى حنمشى عشان الحياة تمشي
تسلميلي عزيزتى

barney
عزيزتى الغالية ربي يخليك ويحفظك وكلامك على عينى وراسي وبجد اثر فيا وقريته لــ ماما وقالتلى قوليلها يسلم فمك
وان شاء الله حنكون على قد حالى ومش بس انطيب بل حنبدع زيادة لأنى مؤمنة ان الزوج والبيت والعيلة هى رفم واحد فى الحياة ورضاهم من رضا ربي
وحنقعد زى ماما فى طبخها وفى صبرها وفى تضحيتها الكبيرة واجد فى كل حاجة

ام عدنان
ايه والله كلامك صح انتم عارفين انى مش حنديرها مغير دوة وخلاص
وتسلميلي وربي يبارك فيك
وان شاء الله ماتنشغلي على غالي
نقولك الصراحة نحن تصالحنا تقريبا من يومين:o وماتزعليش منى اول امس كنا معزومين عند حوش خالتى
وامس دخلت مع ماما المطبخ والحق هو مفاجأة يارب تفرحكم
وهى انى امس اول مرة ندير براك ومحشى فلفل ومحشي كوسا وطلع حلو وطعمته كيف ما ادير فيه ماما
ودرته بروحى وبدون مساعدة
يعنى الحمدلله فيا امل هههههههه يصير منى

ام امير
08-03-2012, 01:44 PM
مساء الخير
اليوم فطورى بندير امبطن وكفتة وشربة اكيد وبندير طرابيش البيتزا والحلو طبعا عروسة سفرتى يوميا لقمة القاضى بنزيد معاها كيكة الكنافة
اليوم بنفطر عند عزوزتى وعزوزتى ماعندها حد يعنى بروحها مافيش صبايا وحيفطروا سلافى لان نساوينهم عند اماليهم ااه نسيت وبازين بالفول لان عزوزتى عندها السكر فدرته على خاطرها
ااااااه نسيت نقول لموودة اهو ماشاء الله عليك لما تنوى اديرى الحاجة لكن تعرفى لما تتزوجى حتبدى تبدعى وتبدى تبى تعرفى راى زوجك عجباته ولا وكان عجباته هتتشجعى واديرى اكثر

موودة
08-03-2012, 03:42 PM
ام امير
تسلمى ويحفظ ايدياتك وصحة فطورك مقدما
عارفة توة ماما كانت تعلم فيا كيف نحشى المصران ..صح بطيئة لكن ماشي حالي
انا خايفة من حاجة وحدة بس فى العيد الكبير شن اندير ندير روحى عروسة ومانقرب شي مش حلوة بكل فى حقى:eek:
وانا ماعمرى نظفت الدوارة والكرشة مشعارفة كيف نصرف؟؟

أمـ ساره
08-03-2012, 04:36 PM
السلام عليكم وخياتي

كيف حالكم اليوم وشنو اخباركم


امش بنشارك لكن ما حصلت وقت للأسف وكنت مجهزة القهوة

لكن انزلها ليكم اليوم ان شاء الله ونشربوها مع بعض


ونبدأ في أبراج مطبخنا الليبي توا




لوتي

يا حلوة ربي يهنيك ويبارك فيك وخيتي وان شاء الله ربي يهدينا ويصلح حالنا يارب

شنو اخر ابداعاتك يا حلوة مغطسة ما عاد شفنا شيء منك



لوبا

ههههههههههههه مازال انتي تتفكري بس قاعدة تعرفي اني سلامتهم بنياتي صغيرات وخاصة سجة مسكينة لين تعيط لما نقيسلها ونحي

وساره ما تبي تقعد في مكان تلعب بس لين ادهشني وراها واني بروحي نقلق لكن شنو بنديروا هي لازم منه


وبالنسبة للتطيب الحال من بعضه نطيب لي وعزوزتي وسلفي والي يقعد اكثر من الي يتكل مع اني ما نكثر بالعدد

لكن العيلة شادتها على السوائل اكثر شيء




سجودة

وأخيراً شفناك معانا حبيبة واني نقول وين غاطسة

ربي يعينك وخيتي وكله يهون مع لمة العيلة وفرحة الصغار




أم أمير

مرحبتين بيك حبيبة المهم تخشي برجلك اليمين واتفضلي الحوش حوشك مش برانية انتي

وهي ورينا ابداعاتك وطبخاتك زي ما نشوفوا في اكسسواراتك الحلوة

ماشاء الله عليك وعلى ايدياتك المبدعة

عجبوني هلبة وماشاء الله عليك ذوقك


وماشاء الله على فطيرك السمح تاكلوه بالهني

نبي نسألك على طرابيش البيتزا كيف طريقتهم وياريت تنزلينا الموضوع بالصور




دانية الحلوة

مرحبتني بيك دندونة وما قلتينا فطورك شنو اليوم وهي ورينا صور لسفرك الحلوات




موودة

انت يا مدلع شنو حالك واحوالك

اهو ماشاء الله عليك تهني وشكلك فالحة كله داسيتيه لبعدين

وزي ما قالت لك أم أمير تلقي روحك تبدعي وتشكلي وتتفنني مع الوقت حني كلنا زيك

وبالنسبة للمصارين عادي حبيبة تتعلميهم وساهلات فيه هلبة مواضيع في

ركن الاطباق الرئيسية توضح طريقة التنظيف

شوفي موضوع لزوبة من الألف للياء شارحة وموضحة فيه كل شيء ماشاء الله عليها


تعرفي اني لحد توا عمري ما نظفت مصارين الا مرة وحدة في حياتي ومش بروحي

وراجلي ما ياكل في العصبان مع اني نموت فيه لهذا مرتاحة من عناده





وتوا نجو لفطور اليوم الي مش عارفة شنو هو


على الخضرة لو جتني

بندير فلفل محشي وكوسا محشي

ونفكر ندير خبزة الكسكاس بعجين الزبادي

والحشوة تن وهريسة وجبنة أو شاورما مش عارفة


قاعدة ما حددت بالضبط فطوري

om_adnan
08-03-2012, 04:50 PM
ام ساره....خيرنى انا طايحه من القفه,ولا يهمك حتى انا انتوقع انديرها,بس قلت نكتب لك بيش انهدرزو.

أمـ ساره
08-03-2012, 05:09 PM
حاشاك يا أم عدنان بالعكس مكانتك كبيرة

بس الابراج متاع الي خشو وردوا اليوم

واني خذيت من آخر رد ليا بس


انت فوق الراس وخيتي

شنو اخبارك واحوالك

om_adnan
08-03-2012, 05:36 PM
اهلين بالجميع...مش مصدقه وصلنا للنص,ان شاء الله انكونوا من عتقه
والله يا ساجده شغلتينى,بس هذا ايقولوا له التعب الحلو,وربى ايطول فى عمر عزوزتك وتكونوا ديما ملتمين,بعد كم سنه حتكون عندك ذكريات وزنها ذهب وفيه ناس واجده تتمنى تكون فى مكانك,بس كلنا عارفين التعب فى لحظتها ما ايخليكش تتمتعى والسر يكمن فى ما تضغطيش على نفسك واجد,
بارنى...اوخيتى,رد ى بالك فى الدين مافيش بصاره مع انى مانعرفش شنو المقصود بكلمة انشاء ,ولكن انتذكر السمحه الله يرحمها كانت فى شعار التوقيع متاعها النهى عن ذلك,وعندك الحق والله منسجمه معاكم على الاخر ,ونعم الاخوات.
دانيه...اكتشفت لو نزعل منك ,اكيد حنكسب لان قلبك كبير.
ام ساره...ياريت انا بايره زيك,ما شاء الله عليك,ركزى على الكميه مادام انتوا شويه.
لوتى...أهلين بالغاليه,فعلا عندك الحق بالنسبه للبنات ,بالنسبه لمغتربه مشغوله ولكن اتقول لى تبى اتنزل مشاركات.
لوبا العزيزه....أخيرا شفناك,وسلمها اللى ما تنسى حد,بالنسبه لولدك جربى خففى السوائل وخصوصا الساعات اللى قبل الاكل,يعنى لما يطلب يشرب عطيه شويه,وممكن ايكون عوده هكى وراثه,حتى انا زيك لما كونوا صغارى صغار كنت انقول نبيهم هكى شويه بصحتهم.
أم أمير...انتى دخلتى بقوه مع قطع الديكور وعندنا عضوه الصابره ,اكيد حتكون اصحاب حتى هى زيك,خوذى راحتك معانا وفى انتظار اتهدرزيك معانا,بس ماتنسيناش
انهار وعليك السلام...تقدرى ترفعى الزايد للجامع,ما تكلمى حد اتحطيه جنب المطبخ,صدقنى انتى توا فى نعيم,راجى لما ايكبروا,على فكره جربت طريقتك فى لقمة القاضى ميزتها سريعه,انا زدت شويه الكسترده,ممكن عشان هكى ما جتش اتقرمش هلبه,بس بصراحه حلوه وهادى صورتها.

[فقط الأعضاء المسجلين يمكنهم رؤية الروابط]

مووده....ربى يحفظك,فى انتظار مواضيعك.
أم ساره....فعلا حتى انا زيك,نرجع لاخر تعليق لى,انا كتبت مش قاصده معنى الكلام ,بس كسبت منك جبرت خاطر,الله يجبر بخاطرك.

luba
08-03-2012, 06:00 PM
كيف حال الكل منورات

الف الف مبروووك لمودة علي المحشي والمصارين والدوارة ساهل

اهم شي اديريهم وبحداك شيشمة تجري ديمه ههههه

اني ندير فيهم بكمامه وقفازات لو انت علي الصنه واللمس ماتعدليش قوي راسك كيف المحشي

وباهي شن بيصير في البازين تعصيدة و تبريمته

ام امير انستينا وشرفتينا دخلتي اهلا ونزلتي سهلا زي مااديري اكسسوارات ماتنسينا من الطبخات
وزي ماقالت ام ساره شنو هما طرابيش البيتزا

ام عدنان شكرا علي النصيحه

الساجدة ربي يكون في عونك ويعطيك الصحه

بارني ودانيه ونسومه وميلا و انهار ولوتي وحبيبتهم والصابرة ومغتربه وبنت حواء

نسلم عليكم سلام حار

حقة نسيت فطوري اليوم بااااااااااااااازين بس بس ياسلالالالام

أمـ ساره
08-03-2012, 06:08 PM
ههههههههههههههههههههههههههههههههه

يعطيك الهني أم عدنان ضحكتيني على البيارة

تعرفي توا كيف خشيت للكوجينة وبنعجن عجينة العشر دقائق

ندير بيها حاجة او 2 وربي يستر

بالنسبة للكمية تعرفي اندير في طريفات معدودات ومع ذلك يفضلوا


وان شاء الله خاطرك ديمة مجبور حبيبة




لوبا

ماشاء الله اليوم زردة عندكم فطوركم بازين بس

صحتين على قلوبكم حبيبة

موودة
08-03-2012, 06:09 PM
ام عدنان

تسلمى ويسلمن ايديك ع اللقيمات يشهن

ام سارة

تسلميلي يارب ساعدتونى واجد
بالنسبة للعصبان ندعى نقول يجيبلي واحد مايحباش لكن الله غالب اللى يخاف من العفريت يطلعله هههههه

luba

عزيزتى الغالية الله يبارك فيك والعقبة للبازين هههههههه

luba
08-03-2012, 06:12 PM
حقة بنات مخبرتكمش علي الفالطة اللي صارتلي

في مع عجينة الباف بستري غباء من حضرتي وطلعت بعجينة سمبوسه رائعه

وتتقرمش او تتفترش زي غريبه الحلقوم والمعمول ومافيهاش زيت بكل وتقعد لبعد وقت وهيا مقرمشه

حضرتي قلت هيا ندير بدل كوبين دقيق ندير 5 وندسهم

وطبعا وين جيت حطيت عليها الزبدة ونسكر ونفرد فقدت السيطرة هنا اولا الجو كان حار

الكميه كبيرة الزبدة حتي هيا ضاعفتها

المهم طلعت من كل مكان حمقت منها حطيتها في الصونية في التلاجه وخليتها لليوم التاني

جيتها حامقه وقسمتها نصين وشديتهن بالوحده صبيت عليهم دقيق وزدت عجنتهم كويس بيديا

وخديت العصا اللي هو الشوبك وعطيتها طريحة و فردها وطبقتها ونفرد ونطبق وبدون لا خود راحه لا تلاجه رقالي منها اقواز

قريب فردتها وطرحتها اكتر من 5 مرات والعجينه رطبه وقنينه هدا اللي موسع بالي معاها

المهم قلت نجربها قلي وكوشه الحق في القلي جتني روووعه والكوشه حتي هيا كويسه ورطبه

وان شاء الله حنعاودها الغلطة هادي

وحنعاود طريقة الباف بمقاديرها بدون فلاحه زايدة واللي عجبني فيها تقعد بعد هلبه وقت وهيا ماتتغير متقرمشه كيف ماهي

لا تهبط ولا تصير رطبه وطبعا خديت طريقة الباف من قسم المعجنات العالميه من مطبخ المصراتيه ربي ينجيها ويخليها

om_adnan
08-03-2012, 06:24 PM
مووده احلى حاجه فيك روح الشباب وانتى فى المنتدى طايحه فى كمشه ,كلنا متزوجات,كلنا نتذكروا ارواحنا لما كن زيك,بصراحه يامووده نصحية ليك توا تناقشى مع خطيبك فى مواضيع تهمك ولازم تعرفى رايه وهويعرف رايك فى مواضيع تهمكم انتم الاثنين وفى نفس الوقت لو عارضك ردى بالك تغضبى بالعكس,ولكن اعرفى انك تبى تشتغلى اكثر على الموضوع بيش توضحى وجهة نظرك,فى الوقت الحاضر اكبر خطأ تقع فيه المرأه وخصوصا الليبيه بقوه,هو انك تهتمى بنظافة بيتك,واتطيب اكل شهى وتهتمى بصغارك وخلاص ولكن الصح تهتمى بنفسك وتعطيها أولويتها بدون انانيه وهذا ينعكس على البيت,تمنياتى لك بحياه زوجيه سعيده وعذرا اذا قمت بدورالاخت الكبيره بدرى شوى.

om_adnan
08-03-2012, 06:30 PM
عندك الحق لوبا,مرات غلط تكتشفى حاجه تانيه,حتى انا لما درت السمبوسه اول مره انسيت الزيت ضفته بعد ما عجنت,تانى مره طبقتها صح طلعت الاولى احلى,قولى انتى نفس المقادير بس زدتى الدقيق ٥اكواب وضاعفتى الزبده فى العجينه .

luba
08-03-2012, 06:34 PM
ام عدنان كل شي ضاعفته العجينه وزبدة التوريق
وخليك بعدين طلعتها وزدتها دقيق بيش نخفي الزبدة اللي غرقت فيها
وعحجنت وطبقت وفردت كله في وقت واحد وخايفة نعاودها وماتتطلعش نفس الاكتشاف ههههه
العجينه دسيتها ليوم العزومه لوصار منها من توه نغني عليها

om_adnan
08-03-2012, 06:41 PM
تضحكى على لوبا,بس انا صايمه,ما فهمتش الخطأ منك كان وين ,واللى قصدك فى طريقة تعاملك مع العجينه والفرد,جمعه مباركه على الجميع

luba
08-03-2012, 06:50 PM
ام عدنان لو تشوفي كيف يديروا في العجينه تعرفي

قتلك الزبدة طلعت وفقدت السيطرة والعجينه تشركت

من كترت الزبدة وعومت في الزبدة بيش نتخلص منها عجنتها عادي بدقيق

وفردت وطبقت بدون حشوة زبدة ان شاء الله فهمتي

والنتيجه اللي طلعتلي سواء اللي في الكوشه او المقليه مختلفة عن الباف الاصليه

موودة
08-03-2012, 09:14 PM
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــ
اقتباس من ام عدنان

مووده احلى حاجه فيك روح الشباب وانتى فى المنتدى طايحه فى كمشه ,كلنا متزوجات,كلنا نتذكروا ارواحنا لما كن زيك,بصراحه يامووده نصحية ليك توا تناقشى مع خطيبك فى مواضيع تهمك ولازم تعرفى رايه وهويعرف رايك فى مواضيع تهمكم انتم الاثنين وفى نفس الوقت لو عارضك ردى بالك تغضبى بالعكس,ولكن اعرفى انك تبى تشتغلى اكثر على الموضوع بيش توضحى وجهة نظرك,فى الوقت الحاضر اكبر خطأ تقع فيه المرأه وخصوصا الليبيه بقوه,هو انك تهتمى بنظافة بيتك,واتطيب اكل شهى وتهتمى بصغارك وخلاص ولكن الصح تهتمى بنفسك وتعطيها أولويتها بدون انانيه وهذا ينعكس على البيت,تمنياتى لك بحياه زوجيه سعيده وعذرا اذا قمت بدورالاخت الكبيره بدرى شوى.
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــ

احلى نصيحة واحلى اخت وانا مبسوطة بكلامك ومبسوطة بيكن وبلمتكن وحكاياتكن الحلوة
وبالنسبة ليا انا وخطيبى مافى حاجة وما حكينا فيها ههههههه وماتخافيش عليا انا مهتمة بنفسى لدرجة انى ناسية المطبخ
وتوة بعد قرب الفرح المطبخ كيف خطر عليا وقلت لازم نلحق روحى ويانلحق ولا .... طبيخة هههههه

لوتي
08-03-2012, 09:47 PM
سلامات للجميع ومشكور من سأل عليا للأسف اليوم كنت حزينة لما تلقيت خبر وفاة بنت نعرفها بكيت هلبا ومازلت حزينة لا حول ولاقوة إلا بالله إنا لله وإنا إليه راجعون

موودة
08-03-2012, 10:00 PM
ربي يرحمها ويسامحها وانشالله اخر الأحزان عزيزتى لوتى

om_adnan
08-04-2012, 01:20 AM
وعن عبدالله بن مسعود رضي الله عنه ، عن النبي صلى الله عليه وسلم قال : ( ما أصاب عبدا هم ولا حزن فقال : اللهم إني عبدك وابن عبدك وابن أمتك ناصيتي بيدك ماض في حكمك عدل في قضاؤك ، أسألك بكل اسم هو لك سميت به نفسك أو أنزلته في كتابك أو علمته أحدا من خلقك أو استأثرت به في علم الغيب عندك أن تجعل القرآن ربيع قلبي و نور صدري وجلاء حزني وذهاب همي ، إلا أذهب الله همه و حزنه وأبدله مكانه فرجا ) .
عزيزتى لوتى,ربى يصبرك,ويخلى اللى حواليك ,الله يرحمها وهى محتاجه لدعائك بالتثبيت عند السؤال.

الساجدة لله
08-04-2012, 01:43 AM
حبيباتي استاحشتكم هلبه هلبه هلبة

اعدروني الصورة النهائية لسفرة ماقدرتش نصورها ولايوم من اللي فاتو

ننحرج قدام العويلة لاكن اللي نطيبه نصوره وللان تعتبر مكررة

لاكن امس درت بانينة امتع التن والهريسة بمقادير جديدة

وبطريقة جديدة رح انزلها

ومازال نوعين معجنات تانية نبي نعطيهالكم ممتازات الحق

وبالنسبة للحلويات انا مش احباب معهم والقهوة للان شربت مرتين بس

نسكافيه وكليتهم مع الترميسو ومرة مع تمر مرة تانية قلت نبي اندير حاجة حلوة ونزلها اهني

مش مسمية اسامي الحلوات نبي نسلم عليكم كلكم كلكم كلكم حبيباتي

ربي يعينا يارب على طاعة الله

ام امير
08-04-2012, 11:31 AM
لوتى ربنا يتقبلها برحمته كلنا ليها يابنتى هم السابقون ونحن الاحقون
انى اليوم فاطرة فى حوش بوى يعنى راحة سلم مرت خوى ماشاء الله عليها حندير حاجة حلوة نرفعها معاى ومازال مانعرفش شنى هى

دانية
08-04-2012, 01:21 PM
احلى سلامات لكل وحدة دردشت معانا في رمضانياتها...

امس كنت فاطرة في حوش هلي .. واللمة زي ماانتو عارفين اتجنن..

والفطور كان : بطاطا امبطنة. كيميا.ابراك. طاجين . رز . شربة. والحلو كنافة والموالح مع الشاهي :

كيكة حارة . سمبوسة . بيتزا . كاني لوني .. والمشاريب :

لوز بالحليب . والمشاريب الغازية..

واليوم فطوري انا وعويلتي وراجلي حسب التخطيط المبدئي اللي من الممكن ان يتحور:
شربة . كبدة مقلية . ابراك . بيتزا . وبس مع الشقاشق اللي بعد التراويح اليوم خاطري في لقيمة القاضي ...
وصلن على رسول الله

ام امير
08-04-2012, 01:46 PM
اللهم صلى وسلم على حبيبى محمد وعلى اله وصحبه اجمعين
يابنات انى فرحانة هلبة هلبة هللللللللللللللللللبة اليوم نتيجة ثالثة اعدادى طلعت وولدى احمد نجححححححححححححححح

حبيبتهم
08-04-2012, 03:04 PM
السلام عليكم

كيف حالكن يا بنات
وشنو اخباركم

ام امير ان شاء الله مبارك على ولدك ويارب تشوفيه في اعلى مراتب العلم

دانية
صحتين عالفطرو مع اهلك وان شاء الله ديمة ملتمين عالخير


الساجدة
اهلا بك وربي يكون في عونك ان شاء الله بأجره


لوتي
الله بصبرك
ربي يتقبل البت برحمته


لوبا
انتي يا مخترعة
هههه ضحكتيني المهم طلعت حاجة باهية خير من الرمي والفساد ومرة ثانية طبقي اي وصفة تمام ماتزيديش من راسك


سلامي لكل البنات
دانية انهار بارني
الصابرة ام سارة بنت حواء
مغتربة 7 نسمه عهود
وكل البنات

موودة
08-04-2012, 03:05 PM
الساجدة لله

يسلمن ايديك ونحن فى انتظار اكلاتك

دانية
صح فطورك وربي يحفظك

ام امير
الف الف مبرووووك وربي يفرحك ديما يارب
المفروض اديريلنا تورتة واتنزليها لنا حلوان النجاح

دانية
08-04-2012, 03:38 PM
الفين مبـــــــــــــــــــــــــــــــروك ياأم امير

وان شاء الله تفرحي بيه وهو عريس

om_adnan
08-04-2012, 04:31 PM
اللهم صلى وسلم على سيدنا محمد,الف مبروك أم أمير على نجاح أحمد وان شاء الله اتشوفيه عريس.

أمـ ساره
08-04-2012, 04:35 PM
مساء الخير حبوبات

ونسلم عليكم وحدة وحدة توا وبعدين لو قدرت نفصلكم بالوحدة



أم أمير مبارك على وليدك وخيتي والحمد لله انه نجح عقبال الشهادة الكبرى يارب

ما تنسوه في الزردة الوليد فرحوه

والعقبة لوخي يارب




والله يا بنات شكل فطوري اليوم خبزة وبيض بس

رجليا مش حامليني ورقبتي اليوم زادت عليا حالة ومش قادرة نتحرك

شكلي بنكملها نوم اليوم وخلاص

نشوفكم بعدين حبوبات

om_adnan
08-04-2012, 04:50 PM
اللهم صلى وسلم عليه
الساجده...حتى نحن استاحشنك,ودخولك السريع ما هو الا دليل على المحبه,ربى يعين الجميع على طاعته.


دانيه ...كيف انتوا اتقسموا الفطور قبل وبعد صلاة التراويح,فى ناس ايقولوا يفطرو خفيف,بيش يقدرو يصلوا,ربى ايهنيكم وديما ملتمين

حبيبتهم...اول ما قريت طريقه البسبوسه,عرفت انها حلوه,سلم إيديك.

مووده...كنتى مستعجله فى الاجابه ,لانى نحكى ليك على بعد الزواج.

أم ساره ..كيف صار فى النحله النشيطه,يوم راحه ,بيش اتجهزى نفسك على العيد,واحن قاعدين فى انتظارك.

بارنى ...وينك,امخليه مكانك,خذيت على قراءة مشاركاتك فى الدردشه.

دانية
08-04-2012, 05:31 PM
سلامات.. ام عدنان .. المالح اللي بعد الفطور عشن امي الله يحفظها كانت عندها لمة ديما ادير فيها في رمضان ...

لكن فعلاً وين بــــــــــــــــــارني مش باينة

أمـ ساره
08-04-2012, 06:17 PM
الله يسلمها أم عدنان الحلوة والهادئة ويبارك فيها

شورني بناخذ راحة البارح اتعبت لما طلعت مع اني روحت بكري

لكن الحمد لله كملت كل شيء الي فاضل بس حاجات نشريها لحلويات العيد

وهذه على سلفي بروحه



دانية

ماشاء الله سفيرة عامرة ان شاء الله ونيالك بلمة أهلك

وصحة فطوركم اليوم مسبقاً




بارني

وين مختفية حبيبة ان شاء الله المانع خير




موودة

ماشاء الله على الفالحة شكله المدسوس بيطلع توا قبل العرس

ربي يهنيك حبيبة ويكملك على خير يارب



سجودة

ليك وحشة وخيتي والله مخلية مكانك وربي يعينك ويقويك ان شاء الله




أم أمير

حتى اني خوي نجح اليوم والحمد لله

ماشاء الله نجاح وعمرة كنت نخمم فيه لكن الحمد لله ربي نجحه

ويكمل عمرته على خير يارب ويرجع هو وأهلي سالمين

والله استاحشتهم هلبة




مغتربة

لوبا

الصابرة

حبيبتهم

وكل الحلوات ان شاء الله ما نسيت حد

وينكم غايبات اليوم

luba
08-04-2012, 06:52 PM
اهلين بكل الحلوات

ام امير الف الف مبروووك ولووووولوووولووووولوووولييييييييييييييييييي

وعقبال تشوفيه بكنتك

دانيه اللهم صلي علي النبي والله مشتاقة اللمات ربي يهنيكم ويدوم عليكم

ام ساره الف مبروك علي وخيك ياربي تشوفوه عريس وتفرحوا بيه

ارتاحي حبيبة مايصير شي يوم او يومين تفوتوهم وجبه وحده ديروا وجبه رسميه وخلاص

امس اني درت بازين علي خاطر الشرقي وشربة و كريب بالتن علي خاطري

ووين بارني شورها واخدتها سباحه عميق اما في السوق او المطبخ

وين نسومة وبنوته و غي غي يلفوا غادي وفايتينه هنا

ام عدنان ربي يسلمك والله اني نحس فيك اختي الكبيرة كله كلامك ومشاركاتك جواااااهر

حبيبتهم راح انعاودها الغلطة قلتلكم جتني منها سمبوسة مقليه تخوخم اطير العقل تقعد مقرمشة

لحتي تاني يوم

مودة داخله بقوة اليوم رينا منك الهريسة تهبل ةتجنن معناها مقدورة عليها الدوارة والبازين

االصابرة ماعاد نتلاقوا انت ماعاد تدخلي الا في الفجر في ليبيا او الصبح واحني راقدين


سجودة الله يكون في عونك ويساعدك بس حلوة اللمة والله تقعدي كيفي تقولي انديرهم

حتي بروحي غير نحصل حتي لمه وحده

وسلامي للكل الحاضر والغايب والسموحه لو نسيت وحدة من اخر مشاركة ليا

om_adnan
08-04-2012, 07:17 PM
يابنات وصلت لاكتشاف مذهل,الشعب الليبى حشيشته القصقصه,وهذا ممكن نقطه لصالحنا فى البلاد,لان الموضوع قرب يوصل٤٠٠٠ مشاهده والمشاركين ما جو حتى ٣٠٠,شنو رايكم,فعلا اللى ما جا ليبى فاته الجو.

لوتي
08-04-2012, 11:14 PM
السلام عليكم جميعا كيف حال الجميع بارك الله في كل من رد عليا
موودة بارك الله فيك علي ردك عليا
أم عدنان بارك الله فيك ذكرتيني بالحديث
أم أمير بارك الله فيك وألف مبروك علي وليدك إن شاء الله تفرحي بتخرجه وحصوله علي الشهادة العليا
دانية صلى الله عليه وسلم
حبيبتهم ربي يرحمنا جميعا برحمته مشكورة أختي
ربي يحفظكن جميعا فعلا كلامكن زي البلسم

أمـ ساره
08-05-2012, 03:24 AM
مساء الخيرات حبوبات

اتفضلوا القهوة



[فقط الأعضاء المسجلين يمكنهم رؤية الروابط]


[فقط الأعضاء المسجلين يمكنهم رؤية الروابط]


معليشي متأخرة النت دارها فيا






لوبا الحلوة

ياريت والله نقدر نرتاح ما يهنيني خاطري عندي سلفي يبي ياكل

واني تعرفي الحمل ويشب في خاطري هلبة حاجات بس اندير الي نقدر عليه





أم عدنان


ههههههههههههههههههههههه ضحكتيني يعطيك الهني

اكيد الي ما جي ليبي فاته الجو كله

وحتى اني نشوف فيهم هلبة يخشوا يقروا من غير ما يشاركوا

ومرات حتى مش عضوات من برا المنتدى


لوتي

ربي يرحمها وخيتي ويجعل مثواها الجنة ويغفر ليها يارب

ادعيلها توا في هالايام المباركة

وربي يصبرك وخيتي الفرقة وعرة لكن هذه ارادة ربي

اني كل يوم نفقد في خالتي الله يرحمها

لكن الي يصبر فيا اني ندعيلها بالمغفرة والرحمة




ووين اليوم باقي الليبيات الفالحات



فطوري اليوم

أرز بالخضرة المقلية وبيتزا وبس

عزوزتي دارت الشربة

والحلو عبارة عن آيس كريم ( جيلاطي )

هي اختاروا وحلو


[فقط الأعضاء المسجلين يمكنهم رؤية الروابط]


أمس فطوري كان بيتزا وخبزة الكسكاس بالتن والدحي المطبوخ والطماطم والزيتون

وبوريك بطاطا وجبنة في الكوشة والحلو كان زلابية لزوبة

حبيبتهم
08-05-2012, 04:28 AM
السلام عليكم صحيتي عالقهوة ام سارة تسلم ايديك وبناخذ جيلاتي عملاق سلامي لكل البنات غير اني توا نكتب من التليفون ونراجي في الفجر. واكتشفت حاجة من التليفون نبعت من الرد السريع عادي يمشي مافيشي مشكلة وسلامي للكل

الصابرة
08-05-2012, 05:08 AM
السلام عليكم وخياتي

وبيش ماننساش حد

سلامي للجميع وحدة وحدة

ان شاءالله ديمة ملتمين على الخير

والله عارفة روحي مقصرة معاكم لكن لو تعرفن السبب اكيد حتفرحوا لي
وهو اني من اول يوم رمضان واني ناوية اني اختم القران الكريم مرتين والحمدلله اليوم ختمت اول مرة
وبديت في الختمة الثانية ان شاءالله ربي يقدرني ونختم
واني نضامي مخالف شوي عليكم اني ناخذ في الليل دبابي وانتم ترقدوا
نقضيه اندير في حاجات نرفع فيهن لحوش العيلة وقراءة القران
والوقت اللي نفضى فيه انزل موضوع او اثنين في المطبخ
ومع هذا مازال عندي هلبة مشاركات ان شاءالله ربي يقدرني انزلهن قبل ان يكمل الشهر
وفي نفس الوقت بديت استعدادات حلويات العيد
ومشكورة كل من سئلت علي
والف مبروك اختي ام امير ان شاءالله تشوفيه عريس ومن حفظت الكتاب يارب
وان شاءالله ما عندك باس اختي ام سارة
وان شاءالله نتلاقوا وخيتي لوبا والله استحشتك
واكيد ام عدنان بديت حبيبة في التفكير لحلويات العيد وانشاءالله بعد يومين ابدء التنفيذ
وان شاءالله اجد عندكن العذر بعد معرفة السبب
واللي انطيب فيه انزل فيه اول بأول
وباقي وخياتي ربي يبارك فيكن يارب
واشتقت لكن جميعا

أمـ ساره
08-05-2012, 05:25 AM
مرحبتين وخيتي الصابرة

وربي يكون في عونك حبيبة وعندك الحق تعب عليك

وماشاء الله نيالك كملتي الختمة الأولى والعقبة للثانية

حتى اني كملت حوسة حوايج العيد والحمد لله

وبديت نجهز لمشروع الحلويات لأني ناوية ان شاء الله ندير كمية كبيرة

منها للعيد ومنها لأهلي لما يروحي سالمين من العمرة ان شاء الله



وبكري هرب الضيء الساعة 11 ونص عندنا فكسدت

نضت للكوجينة وقلبتها فوق تحت وضميتها

كملت قريب 3 وتوا نحس في روحي خفيفة نظيفة

مازال نقيم شوية من حوسة معايني الزايدات وخلاص




وربي يتمم علينا رمضان بالخير يارب ويبلغنا ليلة القدر

ويجعلنا وأهلينا من عتقاءه من النار

ام امير
08-05-2012, 12:42 PM
السلام عليكم
حبيبتهم
موودة
ام عدنان
ام سارة
لوبا
لوتى
الصابرة
شكرا ليييييييكم كلكم لانكم شاركتونى فرحتى
ام سارة م​بروك على وخيك النجاح والعمرة ماشاء الله ان شاء الله تشوفيه عريس

بنت حواء
08-05-2012, 01:41 PM
السلام عليكم ورحمة الله وبركاته
كيف حالكم وحدة وحدة جميييييييييييعكم بدون استثناء
ان شاء الله تكونوا بخير يارب وربي يعينا وإياكم على الصيام والطاعات
.............

لوتي أعظم الله أجرك في صديقتك ادعيلها في هالشهر بالرحمة والمغفرة
..........

أم أمير ألف مبروك نجاح وليدك
وأم سارة ألف مبروك نجاح وخيك
وعقبال ماتشوفوهم شباب دكاترة وتفرحو بيهم عرسان
...........

والله تعرفو أنا نخش نقرا مرة مرة
لكن مانعرف شنو بنكتب الموضوع (دردشة مطبخية)
ونشوف فيكم ماشاء الله تعدو في الحاجات اللي مطيبينها
وتحكو على فطوراتكم والمطبخ
واللي مشت لأهلها واللي مشت لعربها
أنا لا مطبخ لا ماكلة لا مشيت لحد خاطي يوم الجمعة
نمشي لأهل راجلي نفطرو وبسسسسسسس
الجمعة أول أمس أنا درت
طنجرة براك... وكرواسان بالسلك والجبنة المالحة
ورفعتهم معاي لقيتهم دايرين
عصبان... وشربة عدس... وشوربة ليبية... وسلاطة ليبية
وللأسف ماصورت شيئ في حوشي كنت مستعجلة ونسيت
وغادي انحرجت من التصوير......... معليشي
وتوا نخمم في حلويات العيد شنو؟؟ وكيف؟؟ وكم؟؟
وهذا ماعندي مانحكي..... ويلا....... سلااااااااامات للجميييييييييع

دانية
08-05-2012, 06:57 PM
سلامات لكل العيون اللي متابعة دردشة...

شن اخباركن كلكن ؟؟ اليوم فطوري شربة وكيميا وفطيرة الدجاج وكرات البطاطا وفروبي الموز بالتمر باللوز

وزي ماأنتن شايفات كبر استفادتي من منتدانا الرائع يعني اليوم فطيرة الدجاج وكرات البطاطا خذيتهن من هذا المنتدى الغني بكل جديد ..

ولذلك نتمنى دائماً كل توفيق لكل وحدة فادتنا حتى ولو بشئ بسيط ..

وصلن على رسول الله..

أمـ ساره
08-05-2012, 10:44 PM
صحة شريبتكم وخياتي




أم أمير

الله يسلمك ويبارك فيك وخيتي وان شاء الله تفرحي بوليدك وتشوفيه عريس




بنت حواء

خشي سلمي علينا وقولينا شنو كليتي

حاسداتك في قلة التعب سعدودك راهو وقتك كله ليك



دانية

صحة فطورك حبيبة وربي يهنيك ويتقبل دعواتك يارب





فطوري اليوم

بيتزا بعجين الزبادي

وشكلت منها خبزة برجر حشيته برجر جاهز وبيض وجبنة وكاتشب

ودرت سلاطة مشوية وشيش طاووق

والشربة كالعادة من عزوزتي




وينكم من امس هلبة غايبات ان شاء الله المانع خير

ام امير
08-05-2012, 11:54 PM
ام سارة

ان شاء الله ياحبيبة وانتى حية يوووووووووم ان عاش ههههه

بنت حواء
تمتعى بيها الراحة باااهى حيجيك وقت تتمنيها وصحيتى على التهنئة

انى اليوم نضت فاشلة وعندى دوخة وماخاطريش فى شئ انديره ورجليا نكر فيهم كر وكان نلقى نحط راسى على المخدة وماعاش انوض لكن بالسيف شنى بياكلو
المهم درت رشتة كسكاس وسلاطة خس وشاورما والشاورما طريقة جديدة اول مرة انديرها وجتنى زى متاع المحلات والله يابنات فضيعة صورت جزء من التحضير ان شاء انزلها فى القسم المناسب بادن الرحمن

خواطر حساسة
08-06-2012, 01:18 AM
سلام للجميع رمضان السنة صايمه في حوشي بسبب الوحم واللوي اللي متعبني ومعاها ضيق خاطر حتي العمل اخدت اجازة منه فطوري مره صقع ومرة علي قد الجهد اليوم مثلا بس لحم مشوي وبيتزا وخبيزة بالتن والشربة من عمتي ربي يخليها ليا

نسمه ليبيه
08-06-2012, 05:10 AM
السلام عليكم

كيف حالكم

اليوم كانت عزومة اهل زوجى والحمد لله جت كيف مانبىالحمد لله كل شى تماموالفطورهو

مكرونه بالخلطه

شربه

برودو

باميه

بيتزا اقراص جزء بالجبنه وجزء بالمفروم

ابراك

شاورما

الخبيزه المحشيه

بطاطا مبطنه


والسلاطه والمشاريب

والحمد لله سلم بنتى اللى عاونتنى (غسالة الصحون) بصراحه توفر فى الوقت والجهد بطريقه غير عاديه

نسمه ليبيه
08-06-2012, 05:12 AM
ونسيت خبزة الحوش

وعلى فكره الخبزة المحشيه من زينب محمد غير عاديه يابنات كأنكن تاكلن فى قطن درتها بالحليب النيدو ننصحكن تجربنها