استفسار عن الفلفل الأحمر كيفية تجفيفه لعمل الهريسة او المعجونة؟؟؟؟

[أم الحلويين]

السلام عليكم ..أرجو من الأخوات مساعدتي:زوجي جابلي فلفل أحمر قرون ويبيني انديرمنه الهريسة العربية وكذلك الهريسة أوكما يسميها البعض اللوسة او المعجونة اللي هيا بالطماطم المجفف والمعجون ..فلو سمحتو اللي تعرف اتقولي عليه من الألف للياء ولو سمحتوا اللي تعرف طريقة اللوسة او الهريسة او المعجونة تكتبهالي وجزاكم المولى عني كل خير

[بنت حواء]

أهلا وسهلا بك ياأم الحلوين
بالنسبة ليا مانجففش فيه الفلفل نبوخ فيه تبويخ
ولو تتصفحي المنتدى (ركن المقبلات الليبية)
تلقي فيه هلبة طرق للهريسة والمعجونة
ومضمونات أكيد ان شاء الله
وربي يوفقك

[ام مؤيد]

اهلا وسهلا ورمضان كريم بالنسبة للهريسة بغسل فيه الفلفل ونخليه ايجف شوية وبعدها انحي الزريعة ونرحيه ومعه التوم وبعدين انطيبها علي النار اما اللوسة معنديش عليها فكرة

[زوبة الطيوبة الحبوبة]

بالنسبة ليا تعلمت الطريقة من امي عمل الهريسةالعربية وهيا ناخذ الفلفل الاحمر ونغسله غسل خفيف بكل
يعني نرشه رش بالماء باش مايمصصش هلبا مية وبعدين ( يخمر ) وناخذه ونمسح كل طرف بروحه باش نحي منه التراب العالق
وبعدين نفرشه يوم واحد في الشمس يعني يجف من الماء المرشوش عليه
وثاني ننقله للظل ويقعد في الصيف مدة 5 الى 6 ايام حسب الحرارة يعني لين يذبل وكل يوم قلبيه
وبعدين نقشر له شوية ثوم ونرحيه ومعاه الثوم وبعد مانكمل نرش عليه الملح ونخليها تمصها ليلة كاملة
وثاني نكيسها ونحطها في الفريز ونطلع حسب الاستهلاك
ولو اللوسة خلي الفلفل يجف مدة طويلة في الشمس حتى 7 ايام في الصيف
وخوذي بصل كمية مناسبة لكمية الفلفل وقطعيه جوانح وانشريه حتى هو في الشمس لين يجف
ولما ترحي الفلفل حطي زيت على النار بكمية يعني مش كبيرة ولا صغيرة ( متوسطة )
وحطي البصل المجفف في الشمس واقليه فترة فيه يعني لين يطلق بنته
وبعدين حطي الهريسة عليه وحركي لين تحسي الفلفل طاب حوالي لمدة ربع ساعة ونزليه يبرد
وحطيها في اكياس وخزينها في الفريز..
ملاحظة : لو كمية الفلفل كبيرة متع اللوسة طيبيها على دفعات يعني كل مرة صبي زيت وبصل وحطي الهريسة مع التحريك المستمر والنار الهادئة..
وان شاء الله افادتك ..