[مشاركة في ملف الأرز ] ارز مسقي من مطبخ لوبا

[luba]

http://www.libyan-kitchen.com/gallery/images/pyppyp.gif





السلام عليكم ورحمة الله

الارز المسقي


http://www.libyan-kitchen.com/gallery/images/la451.jpg


المكونات والطريقة :

لحم دجاج او احمر - 2 بصل مقطع جوانح متوسطة السمك

حمص منقوع - زيت حوالي ربع كوب - بطاطا مقطعة نصفين

ملعقة صغيرة ملح و نصف ملعقة كبيرة فلفل احمر بودرة -

ملعقة كبيرة معجون طماطم ( حكة)- ربع ملعقة صغيرة حرارات المشكله


نحط طنجرة الكسكاس الدور الاول علي النار

http://www.libyan-kitchen.com/gallery/images/la438.jpg


نحط فيه الحمص والزيت وقليل جدا من البصل واللحم نخليهم يسخنوا شوي ونضيف

الطماطم والملح والفلفل الاحمر و البهارات ويمكن اضافتها في الاخير بالنسبة للبهارات


http://www.libyan-kitchen.com/gallery/images/la439qjq.jpg


نقليهم شوي نضيف كميه قليله من الماء ونخليهم يغلوا 3 دقائق


http://www.libyan-kitchen.com/gallery/images/la440.jpg


تم انضيف باقي الماء لين يغطي اللحم وبعد يغلي نحط البطاطا للانه البطاطا اللي عندي تاخد في نصف ساعه

يمكن اضافتها في الاخير ادا كانت سريعة الطهي

نغسلوا حوالي كوب ونصف او اكتر من الارز قصير الحبة ( المفضل عندي في المسقي )

نغسله كويس لين تصير اميته شفافه

نحطه في الدور التاني اللي هو الكسكاس

ونسكر عليه الغطاء ونخلي النار متوسطه

http://www.libyan-kitchen.com/gallery/images/la441.jpg


بعد مرور 10 دقائق نجهز ربع كوب او اكتر بقليل ماء ساخن وندوب فيه ربع ملعقة صغيرة ملح


http://www.libyan-kitchen.com/gallery/images/la443.jpg

ونرش بيهم الارز وهو في الكسكاس ونحركه ونغطي عليه ونخليه حوالي 20 دقيقة يبوخ


http://www.libyan-kitchen.com/gallery/images/la447.jpg


نفتح علي الارز ونحركه بالساقم ( الملعقة الكبيرة ) ونصبة في صحن غريق

وناخد من الطبيخة ( المرقة ) متاع اللحم ونصب علي الرز لين تحسيه شوي ويتغطي بالطبيخة

http://www.libyan-kitchen.com/gallery/images/la444.jpg


ونخليه يشرب المرقة كلها

http://www.libyan-kitchen.com/gallery/images/la445.jpg


تفضل شوي من الطبيخة لو مافضل كمية باهيه لتغطيه باقي البصل ضيفي شوية ماء

نحول لحم الدجاج والبطاطا لو طابوا ولو احمر يترك مع المرقه

اني نحب لحم الدجاج نشويه في الفرن او نقليه في شوية زيت قبل التقديم او يترك بدون

نصب باقي البصل في المرقة مش لازم تكون هلبه المهم تغطي البصل ونحركه كويس


http://www.libyan-kitchen.com/gallery/images/la446.jpg


ونسكر عليه بالكسكاس ونحط الارز في الكسكاس ونغطيه بالغطاء في الاول نقوي النار

لين يطلع البخار بعدين انقصوها للمتوسطة ونخلي البصل يطلع اميته مع المرقه والبخار يطيب باقي الارز

بعد حوالي 10 دقايق شوفي المرقه لو خترت واضغطي علي حبات الارز بين اصابعك لو نكسرت او انهرست يعني طاب

والمرقه نشوفها لو خاترة وبصلها طايب نرفعها ونسقي والا نخليها وانقص عليها النار

لين يطيبوا


وبعدها نحط علي الارز المبوخ في الكسكاس ملعقة صغيرة زبدة او سمن وربع ملعقة صغيرة قرفه


http://www.libyan-kitchen.com/gallery/images/la448.jpg


نحركهم كويس لين يدوب الزبدة

ونغرفها في الصحن ونسقيها بالطبيخة ( المرقة )

http://www.libyan-kitchen.com/gallery/images/la449.jpg


http://www.libyan-kitchen.com/gallery/images/la450.jpg


ونحط عليها اللحم

http://www.libyan-kitchen.com/gallery/images/la452.jpg


http://www.libyan-kitchen.com/gallery/images/la453.jpg

وهدي طريقتي ان شاء الله ماتعبتوا معاي كيف ماتعبت اني نحكي فيها

[الصابرة]

ماشاءالله ارز يجي في الخاطر
سلم دياتك وربي يبارك فيك
تستاهلي على التعب احلى نجوم

[om_adnan]

وعليك السلام لوبا...ربى ايخليك لينا,نحن الحق تمتعنا ما تعبنش,ان شاء الله فى ميزان حسناتك,صحتين وعافيه.

[بنت حواء]

http://www.libyan-kitchen.com/gallery/images/la452.jpg


ماشاء الله أنا الحق مش تعبت؟ تعذبت وأنا صايمة وجيعانة
ونتفرج على هالطبق اللذيييييييذ يممممممم :p
تعرفي ليا شهر ولا أكثر على الرز بنموووووووووت عليه
سلم يدياتك وربي يجازيك خير على التعب وتنزيل الحاجات الروعة
وصحة وهنا

[luba]

شكرا لمروركن وربي يعطيكن الصحة وراحة البال

[أمـ ساره]

ماشاء الله على الرزيزة المقومة والي تقيم القلب

سلمت ايدياتك المدبعة لوبا

بالرغم من طريقتك تختلف عن طرقي الي نعرفها

لكن شكلها ونتيجتها رووووعه

بالهني والعافية على قلوبكم

وتستاهلي أحلى نجيمات

[بنت طبرق]

ماشاء الله
رز امبوخ من الاخير

[شروق الشمس]

ماشاء الله
ارزيزة فايحه
الله ايبارك لك في وقت
و ايسلم ايدياتك

[مغتربة 7]

عطيك الصحة يااحلى لوبا
رزيزة تسهف ماشاء الله
تسلم الايادي
جاري التقييييييم

[luba]

اهلين بيكن و بطلتكن الحلوة ربي يعطيكن مافي بالكن

ويسعدكن دنيا واخرة

[أم أيوب]

الله الله يالولو عالرزيزة اللي تهبل

تعرفي نموت عليه الرز المبوخ بالبصلة وطالع منظره تبارك الرحمن

حوش عمي كل يوم يديروا في الرز بس يا اما مطبوخ على مرقة الدجاج أو بالشاورما

يسلمو يا لولو

[luba]

اهلين بي ام ايوب منورة الصفحة عزيزتي قليل مما عندكم