البيت والعمل

[موودة]

السلام عليكم ورحمة الله وبركاته




سيداتى العزيزات سيدات المطبخ الليبي

طبعا هذه مش قصقصة
بس عشان نستفيدو من خبراتكن وكيفية تنظيم حياتكن
بحيث مايكونش فيه تقصير من اى ناحية
خاصا ونحن عارفين ان المرأة حياتها كلها تضحيات لحنانها وكبر قلبها




البيت والعمل

http://www.libyan-kitchen.com/gallery/images/nmnnmn.jpg



من فيكن تشتغل؟

ومن متفرغة لــ بيتها فقط ؟

ومن كانت تدرس وتشتغل وبعد الزواج سيبت وتفرغت لــ بيتها؟



يعنى اللى تشتغل توة وعندها اولاد هل شغلها دوام كامل وتروح مع زوجها ؟

اذا كان كذلك امتى اطيب الغداء واطفالها لو مدارس كيف دايرة معاهم

ولو اطفال صغار عند من تحط فيهم وقت ماهى قاعدة فالعمل؟



ولو عملها دوام مش كامل زى المعلمة مثلا كيف منظمة امورها

امتى تروح وامتى تسوى الغداء وهل زوجها يطلع من العمل عشان يروح بيها او مدايرلها سيارة ؟


http://www.libyan-kitchen.com/gallery/images/7bwb.jpg


وماعنداش مانع ان زوجته تتصرف فى امورها وتنظمها كيف ماتبي

http://www.libyan-kitchen.com/gallery/images/6lfl.jpg





هل شغلها سببلها اشكالية مع زوجها؟؟

هل زوجك مقدر وموافق على شغلك لــ درجة انه مرات يساعدك فى شغلك فى البيت ؟

http://www.libyan-kitchen.com/gallery/images/4xcx.jpg


(مع انى عارفة ان الراجل الليبي مش شوره الحاجات هذين)





ولو ست بيت ومتفرغة لــ بيتها كيف دايرة وامتى تبدا تخش للمطبخ


http://www.libyan-kitchen.com/gallery/images/1vev.jpg


وهل لأنها ماتشتغلش معوضة الموضوع فى كثر الطلوع للمناسابات واللمات؟

او انها بيتوتية وتحب مملكتها وخصوصيتها ؟




هل ست البيت تمل من البيت وتبي تشتغل او مبسوطة بروتينها؟





احكولنا بكل صراحة لأن البيت عبارة عن مدينة

والزوجة فى نظرى هى رئيسة المدينة مش الزوج

يعنى لو مسيطرة على شؤون بيتها حتكون المدينة متوازنة

وحيكون السكان من افضل مايطلع للمجتمع




لكن الكلام سهل والواقع فيه مطبات

ومهما الواحد حاول وتعب اكيد حيجيه وقت ويغلط ومرات مش عارف انه غلطان



خلاصة الكلام




نبو نستفيدو بخبراتكم حتى لو اختلفت الظروف والناس وغيرها

اكيد بحكم عاداتنا وتقاليدنا وحبنا لأتباع الأفضل



حنطلعوا الزبدة من الموضوع ولا لا؟


تحباتى
مودة

[دانية]

يهبل يامووودة الموضوع مش عادي .. وعشن هكي نبي نبدأ اول وحدة نثرثر في الموضوع ...

ياحنة طبعاً انا نشتغل بس بصدق دوامي مش اكثر من 3 او 4 ايام في الاسبوع يعني يعتبر مريح لكن ربي يعلم بحالي كيف نضغط على نفسي ...
دوامي عالأغلب من الساعة 8 ومرات من ال 10 اتنوضي بدري وتوتي الفطور وتبرمي عالحوش ... وتوتي اخرى ايش تبي اديري الغدا ..ها امالا شنو هظا اذا كنتي ماوتيتيه من الليل ..

لما انجي انوتي الصغار للمدرسة لأنهم يقرو عشية وجري في جري مانحكيلكش .. واغلب شغلي عاللا بتوب فنحاول اني ننهي شغلي في مكتبي افضل من الحوش لأن العيال مايهنوني وانا نطبع مثلاً ...

انجو توا للزوج طبعاً حظك قمة لو الراجل ايساعدك بس ما تتعشمي واجد لأن الليبي ماأعتقدش .. باهي مانبوش ايساعد لكن لو حس بتقصير يهلب حاجة حاجتين يعني مايقعدش اينق على كل صغيرة و كبيرة ايفوتله شوية وهو هكي ايكون اجمل عليك ..

واخيراً...نتمنى الهنا لكل وحدة داخلة عالزواج جديد ..

[luba]

موضوع حلو ومقدمة راائعة يا مودي

بنخش طول في الموضوع كنت نشتغل قبل الزواج وبعده وفاصل بين الغربتين اشتغلت

وكان عندي ولدي عمره عامين وزوجي يشتغل بعض الايام في طرابلس

بصراحة كنت نطلع من الساعه 8 الي 2 و نمشي مع اختي للعمل مع اني لست محتاجة للراتب ولله الحمد بس

كان نوع من الاستقلاليه بالنسبة ليا وتعب بوي في تدريسي مايمشي هكي لازم نفيد بيه نفسي والمجتمع ومايكون عندي وقت فراغ

وولدي نوتيله فطوره قبل مانطلع نحطه علي مفرش كبير يكون نايلوا والكوب متاعه نوع المص

و نفتح له براعم الاطفال الكوب يعني حاجه ماتبزع عليه وساندويتش جبن او تن وتفاح وبيضه مطبوخه

ونعدي للعمل مرات زوجي قاعد ومرات لا و ندعي اللهم اني استودعتك ابني يامن لا تضيع ودائعك

ونوصي عليه عمتي و سلفتي يسكنوا بجنبي والايام الاولي كنت مشغوله عليه واني درت اختبارات ليه قبل مانقرر نتركه

كنت نوتي الفطور ونلبد في دار تانية ونحقي فيه كيف يتصرف بدوني و شفته كيف الحمد لله يفطر ويتفرج اهم شي كانت

في حياته براعم وينادي عليا شوية ويلهي في التلفاز ولو سمع صوت الصغار بره يقعد يدق الباب وتفتحله عمتي عندها مفتاح لي بيتي

وبالنسبة لي زوجي ربي يحفظه ويخليه لينا ويحرسه من شر الحاسد ادا حسد مرات كنت نجهز في غداي من الليل ونسخن

عنده عادي ومرات مانديرش نلقاه هو مروح وموتي الغداء ومجهز ولدي ربي يخليه لينا يارب والحق يساعد فيا ومايحب حد لو اني مرضت او اطفالي

يقوم بمساعدتنا ويعمل علي راحتنا غيره لا اهلي ولا اهله اما الان فأني فاضيه وهو مشغووول جدا جدا و لكن ادا مرضت فيدهب للمطعم ويحضر الاكل ويلف علي الصغار لو يبوا شي

والحق عمتي و سلفتي ربي يخليهم كانو ديمة تعدي لابني اما قبل اينوض او بعد مايفطر وكل مرة ادير عليه في طله

الحمد لله الحمد لله اللهم صلي وسلم علي سيدنا محمد ولا حول ولا قوة الا بالله واسفة علي الاطاله

[موودة]

دانية

ماشاء الله ربي يحفظك لزوجك ولــ عيالك واهلك
وربي يهنيك ويسعدك يارب
بس احكيلنا عالمطبخ شنو نوع الأكل اللى ممكن يبات او يتحضر من الليلة اللى قبلها
او اكل سريع التحضير لما تروحو الساعة 2 مثلا

لوبا
انت الحلوة وكلامك احلي
وقصتك وحياتك مشوقة ويارب يخليك لزوجك واولادك ويحفظكم ويعوض تعبك راحة
والله لو تكتبى 100 صفحة محد يمل
خطرتى عليا خالتى كانت تخلى بناتها فى دار وتسكر الدار بالمفتاح وتحطلهن امية
واكل مع التلفزيزن وتقول مانخلى عيالي لحد وتقضى مشوارها وماطولش عليهن



احكولنا بالتفصيل وكلامكم يخش القلب ومش ممل ابدا
خواتى نستنى فى مشاركاتكن

[مغتربة 7]

موضوع تحفة
لي عودة ان شاء الله

[الصابرة]

الموضوع حلو وشيق يا مودة وليا عودة حكايتي طويلة

[موودة]

الله بخليكن

وانا متشوقة لحكاياتكن

وفى الأنتظار

[موودة]

فى الأنتظار.................

[المصراتيه]

موضوع حلو ومفيد وراجعه ان شاءالله

[الصابرة]

اني حكايتي طويلة ولان حياتي مش زي حياة معظمكم اني نخدم لكن في البيت يعني شغلي يدوي يندار في البيت اول ماتزوجت كملت قرايتي عند راجلي جيته سنة اخيرة وكان ماشاءالله حتى لما يبي حاجةايدير فيها بروحه وماينوضش فيا من على كتاباتي وبعد التخرج درت لروحي شغل في بيتي والحمدلله تمام موفقة بين راجلي وشغلي وطبعا اللي مساعدني اكثر ماعنديش اطفال وراجلي لا يساعد فيا في شغل البيت الا لما اكون مريضة اما غير ذلك فلا يوجد لدي مايستحق ان يساعدني فيه وفي نفس الوقت عمل راجلي من الساعة 10 صباحا حتى 10 مساءا معظم الاوقات واحيانا يتاخر ولا اعمل الا في وجبة واحدة وجبة عشاء واحيانا كثيرة اجهز العشاء من الساعة 4 عصرا بيش نقعد فاضية لخدمتي والنت فحياتي مافيهاش تعب وبالنسبة للزيارات من قبل الزواج زياراتي محدودة يعني لاشخاص مقربون مني جدا لكن اعشق الرحلات والزرادي وانا من عشاق الوحدة في حالي حتى ايام الدارسة صديقاتي معدودات وبعد الزواج زيارتي ايضا محدودة بين الاقارب وفي الحاجة المهمة وبصراحة ليس بسبب اني لا احب الذهاب اليهم لكن وانا في بيتي اكون بعيدة عن رفع ذنوب فوق اكتافي ومستمتعة برفقتكن الطيبة ووقتي مقسم من عند ماستقيظ بين النت وخدمتي والاستعداد لزوجي عندما يرجع من العمل اكون على سنقة عشرة هههههههههههههه وانا مرتاحة في في وضعي لان والحمدلله عندي رجل متفهم حتى ماخاطريش اندير حاجة على طول يجيب البديل وتقدروا تعتبروني بيتوتية بدرجة اولى وتصدقي راجلي زيي يحب لما يقعد عنده وقت فراغ يحب يقضيه معاي في البيت واحيانا نخرج واعذروني اذا اطلت عليكم

[نسمه ليبيه]

حطيتى يدك عالجرح ياموده

انا ان شاء الله نبى نعاود للعمل بعد غيبة اربع سنوات وخايفه زى الطفل اللى بيمشى اول يوم للمدرسه لكن لازم نمشي سادنى راحه

اشتغلت وانا مخطوبه وبعد ماجبت بنتى الكبيره ولما حملت بالتوم ولما جبتهم اشتغلت سنه وحده وبعدين صارت الامور تصعب وارتحت اربع سنوات وتوه نبى نعاود للعمل وزوجى مش من النوع المتعاون فى البيت ابدا

وعنده اهم شي طفلى الصغير عمره خمس شهور مايبينيش نشتغل عشانه وانا كان تبعت الظروف نين تتعدل اكيد مش حنشتغل ابدا
لذلك لازم نتكيف مع الظروف ونشتغل

ادعولى ربى يوفقنى فى عملى وبيتى

[حبيبتهم]

موودة
اهلين بالعروسة ماتخافيش تمشي الامور ان شاء الله الامر ومافيه انه تعود علي نوع من الحياة لو تعودتي انه فيه شغل وتحبي شغلك اكيد بنقهري اي ظرف سهل او صعب
بالنسبة ليا اني مانشتغلش وما اشتغلتش من قبل درست وكملت دراستي وخلاص قاعدة في حوشي
وربي يهنيك ويسعدك ويوفقك

[موودة]

تسلمو على المشاركات المميزة

ربي يسعدكن ويهنيكن ويحفظكن

يخليكم ليا

[نسيبة]

بارك الله بك وخيتنا موضوعك رائع و يمس كثيرات ان شاء الله لي عودة

[موودة]

وفيك بارك الله ونحن فى انتظارك ان شاء الله

[أمـ ساره]

ماشاء الله على مودة وعلى موضوعها الحلو

حبيبة ما تخممي هلبة زي ما قالت لك حبيبتهم

لو انتي تحبي شيء تقدري ترتبي نفسك على هالأساس واطبقيه


بالنسبة لي اشتغلت قبل الزواج وخذيت غايتي فيه

بس الآن ربة بيت وأم بس وهذه بروحها بالنسبة لي عمل

وعادي منسقة وقتي حسب زوجي وبناتي

وبالنسبة لعمل البيت بصراحة اندير براحتي ما عندي وقت معين لأني بيتوتية وما نطلع ولا نخش ولا حد يجيني

يعني كله ريلاكس ومن غير حرق اعصاب


وربي يوفقك حبيبة في حياتك ويوفقنا جميعاً يارب

[العفيفة]

السلام عليكم...ماشاء الله موضوع ممتاز

بالنسبة ليا قاعدة مكملتش دراستي ...انا في سنة اولي صيدلة لما تزوجت


وبعدين قعدت في الحوش ووقفت قيدي علي امل نكمل دراستي


وبعدين حملت وجبت ولد ومفيش كيف نكمل ....وبعدها حملت بعد عام ونص


وجبت بنت وماصار من التكميل ,,((,قعدنا كان نجيبو:(هدي وضيفتناا))


المهم....بصراحة انا مع البنت تكمل دراستها وتخدم في حالة تفرغها


لكن ضد انها لما تتزوج تخدم وتسيب حوشها لأن صعب بصراحة

انها توفق بين شغلها واطفالها وبيتها وزوجها المرأة مكانها الحوش

واني نعرف هلبة نسوان يخدمن يقولن والله هملنا حوشنا وازواجنا

واطفالنا وزادت المشاكل في الحوش والتوتر بين الزوجين


وفيه اللي قالت لولا الضروف نقعمز في الحوش مالي ومال هالتعب


والمشاكل ....ولو تشوفو علي قوقل صفحة الأجابات لسؤال

هل تفضل المرأة العاملة ام ربة البيت



بصراحة كانت الأجابة لأغلب الأزواج افضل ربة البيت


وعندنا واحد قريبنا برفوسور قاعد في بريطانيا متزوج مرأة


دكتورة وعندها شهادات عالية من الأمارات و

ولها عدة نشاطات


المهم صارت مشاكل بينهم وطلقها

وتوا تزوج وحدة مش قارية ربة بيت



((واضح ان الراجل فد من مرته الأولي ))


هدا لا يعني ان ربة البيت تنسي القرايةوتقعد تمسح وتنضف وتطبخ وتعاني في الصغار بالعكس لازم تتطلع وتقرأ وتتصفح النت وتواكب العصر بيش تطلع جيل واعي ينهض بالبلاد والأمة


سامحوني عالصراحة ...بس هدا رأيي

[om_adnan]

موضوعك شفته من زمان بما انى عمرى ما اشتغلت ما فكرتش نكتب ولكن انا اؤيد شغل المراه وبقوة ولكن فى اطار انها تحافظ على بيتها, الوحدة تقرا كم سنه وتسهر الليل ليش,العمل ايخلى ا لمراة تساعد الرجل لمستلزامات الحياه,والمراه لما تذوق الشغل مستحيل ترضى تقعد فى البيت وتقول هكى فى الوسع,ونحن فى ليبيا العمل مناسب للمراه المتزوجه,مش احسن ما اللى صاير توا الملاحظ من الفراغ..التسوق الجنونى واللمات اللى لها بدايه ما لهش نهايه ولكن اولا واخيرا يكون العمل بالتراضى بين الطرفين والتنظيم كل شى يصير منه.

[موودة]

ام سارة

العفيفة

ام عدنان

بارك الله فيكن على المشاركة
وربي يهنيكن ويسعدكن


واكيد رأيكن يهمنا ومع اختلاف ارائكن فأنا اؤيد كلام كل وحدة فيكن
ام سارة ربي يهنيك شكلك العقل كله
عفيفة كلامك صح وانا معاك لكن لا ينطبق على جميع النساء
ام عدنان اكثر رأى يشبه رأيي

فأنا على حسب اعتقادى ان العمل مهم فهو نتاج تعب سنوات طويلة ويبعد الفراغ وبعض العادات السيئة والأهم العامل المادى فالزوج منهك بمصروفات البيت ولا اعتقد انه سيكون سعيد بمتطلبات ثانوية وغير اساسية للزوجة فكلنا نعرف مناسباتنا ومتطلباتها
الفستان ولا 2 وكوافير ومكياج وزلوف وهدايا وغيرها من طلبات تتحشمى تطلبيهن كل ماتجى مناسبة
وهذا غير مصاريف البيت ومرات بتشرى حاجات غالية من ملابس والعاب لأطفالك ومرات تتسهفى على تحف ولا ستائر ولا فرشة جديدة
صح الحاجات هذين شور الراجل بس حيقولك اللى عندنا كويس ليش التبذير واكيد عنده الحق لكن الزوجة هذا طبعها لازم تتسهف على حاجة ولا اثنين

المهم عندى ان الشغل مايكونش دوام كامل ولو كان هكى انا حنسيبه ونقعد فى الحوش
ولازم الوحدة تعرف روحها تقدر توفق بين الأثنين او لا والكفة دائما مرجحة للبيت

واكيد كل واحد وظروفه


بس عزيزاتى لعند توة مافيش وحدة تشتغل وعطت حل للغداء امنى اديره وكيف اتسويه كامل ولا نص سواء
يعنى كيف امشية امورها؟

[نسيبة]

الكريمة مودة موضوعك رائع بالفعل المراة من الاحسن ان تكمل تعليمها و لكن ليس للكثيرات

سبيلا الى ذلك

بسبب ظروف خارجة عن الارادة او بعدم رغبتها في ذلك و للناس فيما يعشقون مذاهب


ولكن اذا تزوجت المراة من الاولى لها ان تكون ملتزمة ببيتها و زوجها و اولادها لان في

ذلك اعظم الاجر قد يكون للبعض من السيدات حسن تدبير في التوفيق بين الداخل و الخارج


بين البيت و العمل ولكن 90% من النساء لا تسطيع التوفيق في ذلك


وكن معي سيدات يشتكين من هذه و تلك قد يكون هذا سببا في اهملها اما التقصير بعملها او

في بيتها

وكم من ازواج تزوجوا سيدلت حاملات اعلى الشهادات و حصل الانفصال بينهم كما روت ذلك

العفيفة و الشواهد

مثلها كثيرة جدا خاصة في مجتمعنا الليبي ومنهن من عندها اولاد لم يشفع تقصيرها في بيتها ان تدمر حياتها الخاصة

ومنهن من تريد نجاحا مرموقا في العمل و تضرب عرض الحائط بمملكتها من زوج واطفال و ما

اكثرهن

على المراة وخاصة الفتاة قبل الزواج ان تعي مسؤليات الحياة الزوجية انها ليس خروج و نزهات

و احلام


انها واقع حياتي يتطلب منها الجهد و التفرغ لراحة زوجها و اولادها وهي مشكلة المشاكل كل

البنات يتخيلن الزواج حسب مفهوم

ضيق فقط على المر اة تعي ذلك جيدا الفتاة الراغبة في الزواج يجب ان تكون فتاة ناضجة بما

فيه الكفاية والا فانها

سوف تقف بين مفترق طرق وليس امامها خيار الزواج مؤسسة تنحج بتعاون الزوجين و تكاتفهما وهناك من تاخذ سنوات

تاسس فيها بيتها و اطفالها وبعدها تعود للعمل واولادها كبروا قليلا هناك من تبرر ان الظروف

المادية صعبة


ولكن ليس هناك خيار عليهما التضحية وهذه مشكلة المشاكل الغلاء في المعيشة تسبب في عمل المراة هناك من تتذرع بذلك

ولها الحق هذه وجة نظر كثيرات انقلها لك ممن اعرف و اسمع ولكن امما اثار استغرابي في هذه الايام

ظاهرة اريدا زوجة تشتغل للررجل وجة نظر اخرى و اقف هنا متعجبة البعض القليل منهم يرى

ذلك ولكن يحسب لهم حساب هل تغير الرجل و فكره

للكل قادة شواذ موضوعك شيق استرسلت فيه نقلت لك اراءا متبانية و مختلفة ولكنى ارى ان ممكلة المراة بيتها خروجها للعمل ان كان من غير ضرورة صعب عليها فكرا و جهدا

في كثير من الدول الغريبة يعطون المراة سنوات مجانية لاعتبارات الحضانة يعروف انها تاسس
جيلا اما الفشل نصبه او الرعاية و التربية حصاده

سلمت و سلم بناك اخية تقبلي شكري لك
دمت في عناية الرحمن

[luba]

مودة اني رديت علي سؤال الاكل وهدا يعتمد علي نوعية زوجك

اما ان تطبخيه من الليل تم تتركيه يبرد وتضعيه في التلاجة وفي اليوم التاني تسخنيه

او انك متلا اطيبي بعد اتروحي

نعرف بنات في عيلة وهما يشتغلوا ابلات ينوضوا من الصبح يطيبوا في غداهم قبل ايعدوا للعمل

والحق اني مرة درتها قالي اخر مرة وحتي اني جوي تكهرب لانه الصبح الهواء نقي وممتع مش جو طبايخ

والحق خيرني اما اطيبي وادسي او بعد اتروحي اني اخترت الاول انطيب

في الليل واغلب اللي معاي في العمل هكي يديروا

و اني ماكنتش محتاجة للعمل ولليوم مش محتاجه ليه بس نوع من الاستقلاليه وتحقيق الدات توه بدون عمل قريب نهبل فرااااااغ مش عادي

زعندي اصغار الصغار مرات مدرسة بدخليهم دورات شنو ديمه بتخليهم تحتك

الحياه مش كلها فلوس الحياة فيها نجاحات تحسي بروحك تساعدي في ناس محتاجه وهدي نوعية عملي

نفرح مع الناس ونحزن ونبكي معاهم وعليهم وياما اروح زعلانه ومهمومه لو حد ماقدرنا انديروله حل او نساعدوه

لدرجة انه مرات النوم مايجيني او ماناكل كويس

[بنت حواء]

بالنسبة ليا نشتغل في حوشي طبخ وترتيب وغسيل وووو
وعلى قولة أم ساره هذا بروحه عمل
ربة بيت وبيتوتية جدااااا هههههه
نموت في بيتي مملكتي وخصوصيتي
مبسوطة ببرنامجي مانحب الطلوع هلبة إلا لسبب أو تدهوير مرة مرة
نحب الطبخ نجرب حاجات جديدة
نتصفح النت
ندير تمارين
نجرب أقنعة وخلطات لما نكون بروحي :d
حوستي وتطييبي على مهلي المهم كل شي في وقته
عادة الطبخ غداء
نخش المطبخ مع ال1 لو حاجة ساهلة وبسيطة
نخش المطبخ مع ال11 ونص 12 لو تشكيل وتطويل عادة ال2 ونص ال3 نكونو متغديين
في الصبح نكون شغلت الغسالة ورتبت الحوش وكان بنكوي حاجة وكان بندير قناع ولا خلطة ووو
بعد الغدا نضم المطبخ وناخذ قيلولة لأني ننوض بكري
والعشية نقضيها على النت وبعد المغرب شوية تمارين ودراجة وندير حمام
العشا خفيف ولو في طلوع وتدهوير يكون وقت العشا
هذا برنامجي يمكن مايفيد العاملات لكن حبيت نشارك

وموضوعك حلو يامودة ليك وحشة ياريت ترجعي للمنتدى فقدناااااااك

[أم فهد]

شكرآ يا مودة ع الموضوع المميز...انا ح نتكلم عن نفسي وبالتفصيل..طبعآ انا خريجة طب بشري تزوجت بعد عملي ب سنة وعملي طبيبة اطفال بعد الزواج ما كانش في البداية في روتة ليل صبح من 8 حتى 2 او عشية من 2 حتى 8 جبت بنتي بعد سنة من الزواج .قبل ما نجيب كان اخف التعب وانا نسكن حوشي فوق حوش عمتي .ناكلو معاهم لما تنكون في العمل هيا تطيب الغدا ولما انكون اوف نطيب انا .وبعدين تميت نمسك ليل وجبت فهد وزاد التعب عندي كذلك عيادة خاصة يومين في السبوع ساعتين فقط...بس بصراحة لاغية الطلوع للمات والافراح نمشي للمقربين فقط والحمد لله حوشي ديما نظيف وعيالي كذلك مع الضغط على نفسي.بس توا تبي ندير نقل للعيادات الخارجية يومسن فقط وما فيش ليل.عشان ما نحبش نطول على عيالي.والواحد قاري وتاعب مش عشان يقعد في الحوش .وزوجي مساعدني .وتعودت ع السرعة في كل شي عشان نلحق وعيالي لما نمشي للعمل نحطهم عند عمتي .لو صبح يقعدوا راقدين هيا تمر عليهم..وانا بيتوتية واجد نحب حوشي ونحب المطبخ لما نكون قاعدة نحب نطيب وندير كيكات او بيتزا لان زوجي يحبهن.واهم شي عنده الحوش نظيف اهم شي الوحدة تنظم وقتها وماتكترش طلوع واجد.متلا لو ما عنديش عمل نظم حوشي ونجلى الحمام والمطبخ .ولما تقعدي ديما تضمي وتلمعي ما يقعدش عندك تراكم حتى لو تشتغلي.....ان شاءالله انكون افدتكم وسامحوني ع الاطالة.