ما رأيك فى اللى صار؟

[نسمه ليبيه]

السلام عليكم اخواتى

انا قتلنى التفكير هل قتلة السفير الامريكى عمل صح او خطأ


من جهه نحن لنا غيره على ديننا وعلى رسولنا عليه الصلاة والسلام ومانتحملوا حد يمسه بكلمه هو و ال بيته الكرام


ومن جهه ثانيه نقول السفير شن ذنبه لا هو ممثل ولامنتج ولامخرج فى الفلم وهو برئ


كنت نقرا فى ردود فعل العرب على الموضوع الى صار فوجدت من قال الليبيين رجاله وان السفير كافر ومصيره للنار

ووجدت من قال ان اللى قتلوا السفير اساءوا للسلام اكثر مما اساء الفلم

وشفت لقاء مع مسئول العلاقات الامريكيه الاسلاميه قال ان الفلم رخيص ولم ينشر فى امريكا وان نحن بهذا الفعل جعلنا للفلم اهميه كبيره



فما هو الصح ومادورنا اتجاه من يهين الرسول عليه الصلاة والسلام

[luba]

اخ اخ في قلبي غصة مانحكيلك كيف

1- اعطوا للفيلم اهمية وهو منشور في اليوتيوب والنت ماتقدر حد تشديه فيه

عدوا يامصريين دوروا قبل اللي فاتح صفحة الفيس بوك شخص مصري من داخل مصر

فيها اكتر 250 الف لايك يسب ويشمت في الحبيب

اهو قريب منكم قاعد بيناتكم ورونا فلاحتكم علي من تقدر ياجحي والكارته انه المسلمين داروله لايك وبهكي الصفحة

زاد عددها وماعاد تتسكر هدا جهل وساهموا اكتر في ادية الرسول بي اللايك متاعهم هالاغبياء

والفيلم مانشراتاش في دور السينما امريكا لتحاسب و اللي ماسمع بيه خلوه يسمع ويتفرج عليه ويدوره

2- السفير واللي ماتوا معاه وجعوني مع انهم كفار مرات يكونوا قتلوا شخص

من اللي يحترموا في جميع الديانات ويدافع عليها ولا تزر وازرة وزرة اخري

طلع قاتلكم طلع شتمكم طلع دار حاجه عاملوه كيف ماعاملكم لكن هيهات من يفهم معاملة الاسلام


3- من قبل بعد تحررت ليبيا رسموا حبيبنا برسوم ساخرة في احد الجرايد

ليش ماطلعوا فيها وقلبوا الدنيا هما او غيرهم وجابت الجزيرة الخبر ولا حد تحرك له ساكن

هدي الرسوم بعد الرسوم الاولي اللي قطعنا فيها المنتجات الدنماركيه هادي تانية رسوم من واحد اعتقد بولندي او روسي

العرب لم يتحركوا وكانت اجرح من الفيلم لانها كانت هلبه هلبه والجريدة ماتوقفتش عن اصدار العدد والرسوم

4- اهم شي شوهوا سمعت الاسلام واخزيااااه الله اكبر علي كل من هدم الاسلام

اني نغير هني في فكرة الناس عن الاسلام والقاعدة ويجوا هالهمج بتفكيرهم الغبي وتصرفاتهم الحمقاء ويقلبوا اللي

اني غيرت فكرة شوية من الناس عن الاسلام الحقيقي والقاعدة وصارت ليبيا القاعدة بعينها توا مش قادرة نفتح فمي بنص كلمه وندافع

هدا اسلامنا هدا علمنا الرسول الكريم وغير اللي طلعوا يديرواا اللي قاللهم عليه ويتبعوا سنته قبل وبعدين يديروا فيها مرجله

تلقي واحد سكير حشيش طالع بيضرب وبيكسر احتمال حتي مايعلم عليش طالع

وفي اللي خداته حموة مصر خيرها مصر تطلع واحني لا مش خير منا شن يقولوا علينا الناس هدا تفكيرهم

واللي يحبه يتبعه ومش يشوه سمعته

ربي يهدي الجميع وهدي وجهه نظري واكتروا من الصلاة علي حبيبنا ونبينا محمد

صلي الله عليه وسلم في كل مكان وفي اي وقت

انا اسف انا غلطان انا اللي تهنتي ياسيدي انا اللي اداني كل مهان وتاه الحق من اديدي

انا اللي اتهنت مش انت لانك في حمي ربي مقامك

في السما عالي وانا الل انداس علي قلبي

[luba]

نبي نحكيلك قصة في عهدنا هدا صارت في بريطانيا بيش يعرفوا انه الدين معامله وتوا اللي يسلم

تعرفي بنقول غير كيف اسلم بس

رجل مسلم يسكن بحدا عجوز كافرة كل يوم تسب فيه كل صبح وترمي في القمامة بحدا بيته

وتسب في الاسلام وووو كل يوم هكي صبح وليل وماعاد تبيه يقعد بحداها لانه مسلم

وهو ولا يرد عليه حتي كلمة يصبي يسمعها وبعدين وين اتم يعدي

وفي يوم العجوز في شهر رمضان ماجتش للراجل كالعادة وسباته وانتظرها يوم تاني وماجتش

عدي لي بيتها و دق الباب مافتحت ففتح الباب بروحه لقاها ملوحة علي الارض رفعها واسعفها

وبعد ناضت تجيه كل يوم اتقولة خبرني عن الاسلام والدين متاعكم لين بعدها اعلنت اسلامها

وبعدها بمدة ماتت وهي مسلمة

اسفة علي الاطاله بس رسولنا عطانا كيف نتعاملوا مع كل زمن و هدا الزمن ماينفعش فيه القوة ينفع فيه الاقنااااع

بيش قتلك قلبي معبي

[الصابرة]

اللهم صلي وسلم على سيدنا محمد
وحطي غصة على غصة لوبا واني معاك في الكلام اللي قلتيه كله
المشكلة الرسول عليه الف صلاة وسلام وصى على الرسل والسفراء والمبعوتين من دول الغير بغض النظر عن ديانته
وسوف ابحث عن نص الحديث الذي ذكر فيه ذلك واحضره لكم
وهو يعتبر ضيف هل نعامل ضيفنا هكذا مهما كانت ديانته
مع اني حتى اسمه لا اعرف ولكنه لماذا يموت هكذا ؟
والمشكلة انهم بالفعل اثبتوا للغرب ان الاسلام يعني الارهاب
ولا الومهم على ذلك فاعمالنا هذا مايثبت
وياريتهم اتبعوا الرسول في تفكيره واحترامه للغير
ترى يعدوا ايديروا فلاحتهم على المصدية كلينتون اللي قالت نحن متاسفين للفلم لكن لايمكننا فعل شئ لايقافه
مش يجوا يناري على الذي لايملك حول ولاقوة
واللي يقهر اكثر ان اللي قتلوه وفزعوا للرسول
تلقيهم يديروا في كل شئ يغضب الرسول
واني مسميتهم اللي ياخذوا من الاسلام مايبوا بس
حسبي الله ونعم الوكيل
مع احترامي للبعض من السلفيين اللي فعلا ماشيين على سنته بجد وقلب
ااااااااااايه لوكان نحكي نبي لبكرة الصبح واني نكتب من القهر
اللهم صلي وسلم على سيدنا محمد

[نسمه ليبيه]

شكرا الصابره ولوبا على ردودكن حسيت انكن خففت عليا شوى من ضيقتى ربنا يهديهم الشباب



واللى صار بغض النظر عن صحته او خطأه فهو مش وقته بالنسبه لليبيا

والمغرب عجبونى بانهم صلوا بحدا السفاره الامريكيه






http://a8.sphotos.ak.fbcdn.net/hphotos-ak-snc6/c38.0.403.403/p403x403/251781_408423589211519_100670230_n.jpg

[sweet nona]

اللهم صلي وسلم على سيدنا محمد

http://a8.sphotos.ak.fbcdn.net/hphotos-ak-snc6/c38.0.403.403/p403x403/251781_408423589211519_100670230_n.jpg

انى من رايي هادا احسن رد لكل من حاول الاساءة لديننا

انتم شفتو السودان شن دارو مالقوش سفارة امريكية حرقو سفارة المانية

وبعدين هوا روح ومليشي اي ذنب بس ...الله يستر من الجاي

ويارب تعلى كلمة الاسلام والمسلمين

وتقهر اعدائك اعداء الدين

[المصراتيه]

لا حول ولا قوه الا بالله
بالنسبه ليا هدي اكبر غلط واكبر جريمه قتله هدا الشخص في النهايه هوا شن دخله

يعطيهم الصحه حركه مش عاديه بالنسبه للمغرب

لا اله الا الله محمد رسول الله

[موودة]

الرسول الكريم عليه افضل الصلاة والسلام علمنا ان لانرد الأساءة بالأساءة ولو كان هؤلاء القتلة لهم خلفية بسيطة على الدين الأسلامى ولو كانو اصلا يتبعون سنة رسوله لما فعلو هذه الأفعال الشنيعة لكن بعض الشباب لهم توجهات خاطئة يدعون فيها انهم دعاة واوصياء على الأسلام وهو بعيدين كل البعد عنهم وهذا بسبب نقص الثقافة الدينينة وفشل الأعلام وعدم الأستقرار الأمنى وخروقات خارجية للأمن لدينا فواجب الأن على الدولة ان تلملم اطرافها ونصبح يد واحدة للرفع من امكانيات هذا البلد فقد واجهنا الأصعب لذلك حتما يمكننا مواجهة الصعب

اما اليهود لعنهم الله الى يوم الدين فهذا هو شغلهم الشاغل تحطيم صورة الأسلام وتشويه صورة الرسول امام الديانات الأخرى وتحن بدل الفوضى يجب علينا الدفاع بشتى الطرق سواء كانت اعلامية ثقافية وتوعوية ونشر سيرة الرسول العطرة بكل اللغات واذا زادت الأساءة فيكون بالأحتجاج السلمى ولا نجعلهم يصلو لأستفزازنا فكلنا نحب رسولنا الكريم

عليه افضل الصلاة والسلام

[زينب محمد]

https://fbcdn-sphotos-c-a.akamaihd.net/hphotos-ak-prn1/546314_449554118420804_478177506_n.jpg


قتل السفراء حرام وهو فعل لا يمت للاسلام باي صلة

ماهكذا تكون نصرة نبينا الكريم صلى الله عليه وسلم

نصرته تكون بالتعريف به وبخلقه العظيم ونشر سنته وتوزيع نسخ مترجمة من القرآن الكريم

والدعوة لدين الله ومقاطعة المنتجات الهولندية لضرب اقتصادهم

وليس بقتل الابرياء الامنين دون وجه حق

ان قتل السفير مخالف لتعاليم ديننا وسنة نبينا الكريم كما انه مخالف لاخلاقنا

فنحن اليوم بهذا الفعل اللامسئول اسأنا لديننا ولرسولنا عليه الصلاة والسلام بحجة نصرته

[om_adnan]

وعليك السلام نسمه....والله قلبى تقطع على بنغازى,ما تستاهل ولكن اللوم مش على اعداء الوطن او الناس اللى عقولها بسيطه,,اللوم على الحكومه,بيش تعرفوا قداش بنغازى تعانى ,لا سيارة مطافى ولا اسعاف ولااهتمام,بيش تشوف الحكومه واهتمامها بالليبين ,هناك ١٩ شخص مواطن عادى,ساعدوا الناس اللى فى السفاره وفى منهم مصابين,حكت عليهم والا دارت حاجه؟,اللى صار ما حد يرضى بيه وان شاء الله مافيه الا الخير وتوا جت رساله قوية اللهجه للحكومه ,تعالوا اهتموا ببنغازى اللى كنتوا نسينها,ولا يهمك نسمه الشعب الليبى كلنا قلبنا على بعض,ردى بالك ما يكون الحق واضح قدامك.
اللهم صلى وسلم على سيدنا محمد افضل الصلاه.

[حبيبتهم]

السلام عليكم
مساء الخير
اللي صار واضح من وقت حدوثه انه عمل ارهابي وطبعا مافيش شخص عاقل يؤيد الارهاب
الفيلم الذي ظهر في اليوتيوب ليس هو السبب واليوم القاعدة تبنت العملية وقالت انها انتقام لمقتل ابو يحيى الليبي
اني حاليا صعب اني ننسخ اي شي لاني نكتب من الموبايل بس اللي تبي تعرف قصة الفيلم وتشوف انه هو حتي الممثلين فيه تم خداعهم واستغلالهم تشوف موقع قناة العربية بكرة لو تيسر لي ان شاء الله ننسخ لكم الموضوع
اما الدفاع عن الرسول يكون باتباع تعاليمه وسنته وتعاليم ديننا الاسلامي لا تقول اقتلوا الابرياء والمعاهدين ابدا هذا تشويه للاسلام
ربي بحفظ بلادنا من الارهاب

اللهم اجعل بلادنا امنه وسائر بلاد المسلمين

[نسمه ليبيه]

الحمد لله كلنا متفقين