دردشه من القلب

[om_adnan]

بسم الله الرحمن الرحيم


ديما تفكيرى لو نزعل او نخطئ كيف نتصرف بالحق,مش فى الوسع او بالمثليات,هل ندربوا أنفسنا على كيفية التعامل مع الرائ الاخر ؟؟؟اما ننتظر حتى نتعرض لموقف ونأخذ درس....
ممكن الانسان يزعل حد عزيز عليه بردود فعله,ممكن تخلى انسان يفكر ويلوم نفسه على شئ ما يستاهلش,ممكن تقضى على صداقه تحمل ذكريات جميله,ممكن رد فعل على موضوع تافه وقد يصل ليكون عراك بين اطفال,الكبار يقلبوه قطيعه,ممكن يخلق عداء ما فيش داعى ليه,وهذا كله من ردودنا السلبيه....هل لدينا القدرة على التخلص من السلبيات؟؟ هى ليست قدره او طبع, الطبع شماعة ممتازة لتعليق الاخطاء عليها,بل الامر مجرد تدريب وتمرين الذات وهومن اصعب التمارين.
انا حنبدأ نشارك شنو الاسباب اول حاجه العناد وياريت تشاركونى بارائكم من وجهة نظركم.

[luba]

تسلم اناملك اللي كتبت والدماغ اللي يفكر

صح العناد

كنت عندية بس الان الحمد لله تغيرت كتيرا بسبب تدريب نفسي علي الصمت اكتر من اي شئ

اني وحدة من الناس اللي مرات اندير مشكله ونندم عليها

بس اني كدلك من الناس اللي يصالحوا علي طول مانخليهاش تبات

ونحاول اني نوقف عن العصبية الزائدة حتي مع اطفالي وهدا اهم سبب

وكدلك من اسباب المشاكل الاخري

ومرات نفرح وين نلقي ردة فعلي بسيطه علي كتير من الاشياء بس في اشياء تخليك تطربقي

مش تحمقي بس

والحق ليا مدة هلبه هلبه اندرب في نفسي علي ردة الفعل الصحيحه وان شاء الله نلقي نتايج

وابديت نفكر قبل الرد لكن مرات نتهور كان الموضوع من قبل حارق اعصابي وبيني وبين نفسي

وأحد فتحه قدامي يالطيييف شنو يشدني

موضوع راائع و احد طرق تدريبي انقول دايما بيني وبين نفسي

انا هادئة انا متفهمه انا افكر انا قوية واكررها لعدة مرات في اليوم وكل يوم

[مغتربة 7]

موضوع رائع بس قولينا من مزعلة ولا من مزعلك ههههههههههه
يختلف التزعيل على حسب المواقف بعض المواقف ما يتقبل فيها الطرف الاخر الرأي الاخر وهذه مفروض الواحد يعود نفسه عليها
ولكن بعض المواقف زي ما قولتي تزعل بردود فعل اي الفاعل يخليك تردي ههههههههه ويصير لوم وتفكير زي ما قولتي
وزي ما قالت لوبا الواحد مفروض يعود نفسه ويكون منتبه دائما الى ردود فعله ويكون مجهز نفسه الى الرد على الناس المستفزين بدون حرق اعصاب ولا تجريح
والعناد اااااااااااكيد ليه دور فى تشحين الزعل


وربي ما يجيبلك زعل ياغالية

[شروق الشمس]

موضوع مهم جداا جداااا
و يستحق النقاااااش ..........

[نسمه ليبيه]

انا عندى نكون انا الزعلانه ولايكون حد زاعل منى


وانا عكسك يالوبا هههههههه
كنت نسكت لما نزعل من شخص وسكوتى كان يشعرنى بالاهانه

وتوه قاعده ندرب فى روحى على انى مانسكتش خخخخخخخخخخ حيه عليكن راهو وحده تزعلنى خخخخخخخخخ نبصر معاكن والله وسعة البال ديمه مردودها كويس فى اى شى

[barney]

ربي ايجيبها وسعت البال يا نسمه
اني انقول ان العناد هو اساس المشاكل لكن لولا التسرع لاتحدث المشاكل بالنسبه ليا اني اكثر مشكله انعاني منها هيا اني ما انحبش نعتذر نعرف روحي غالطه لكن مستحيل نعتذر
ويوجعني الشخص اللي وجعته وظلمته لكن انقول خليني انفوتها وانهدرز عادي مع الشخص اللي صار بينا خلاف ونضحكوا عادي لكن المهم ما انجيبوش سيرت المشكله بيش ما نعتذرش
وتوا لما اتجوزت القيت روحي ماعنديش حل الا اني نعتذر فنعصر ع خشمي ليمه ونعتذر وفوق من نفسي مش طايب عليا تلقيني قارنه حواجبي كيف اعتذرت لكن ان شاء الله انحولها
الصفه السيئه اللي فيا
فيه مثل يا ام عدنان ايقولوا فيه ع كلامك امي الله يذكرها بالخير ديمه اتقول ايديروها اصغار ويوحلوا فيها لكبار وفيه مثل ثاني مش مذكراته زين ايقول اصغار يلعبوا ولكبار يوحلو

وسلامتكن

[أمـ ساره]

وعليكم السلام ورحمة الله وبركاته

مراحب بأم عدنان وبكلامها السمح والحلو


معاك حق حبيبة أغلبنا نعانوا من هالمشكلة

العناد وتسكير

واني نزيد عليها العصبية الي متعبتني هلبة هلبة

بس الحمد لله مع تحطني في مواقف مع الناس البرانية

لكن مع العيلة حدث ولا حرج وأحسن شيء اني نروق بسرعه

ونحاول نعدل بقدر الامكار الاخطاء الي درتها

لكن مرات يجيك موقف والله العظيم حتى لو انتي هادئة ورايقة وما تبي المشاكل

تخليك تتفجري ويطلع منك كلام تندمي عليه بعدين

ومرات العكس

تقولي ياريتني رديت أو تصرفت في وقتها على قولة نسمه



مع ان هلبة يستغربوا لما نقول لهم اني عصبية وعنايدية

يقولولا لي شكلك هادية هلبة وديمة رايقة هههههههه




وربي يهدينا جميعاً يارب ويهنينا ويريح بالنا

ونقتدوا برسولنا الكريم صل الله عليه وسلم في أخلاقه وتعامله مع الناس

[om_adnan]

نتمنى الموضوع هذا يكون حلقة نقاش نستفيدوا منها,اوخيتى لوبا...حتى انا زيك كنت عنيدة وتوا خفة درجة العناد وتقريبا الملاحظ العناد فى النساء اكثر ولومش طيبة قلبهن كان راحة ليل,نقطة مهمه جدا انتى قلتيها هى التفكير بصوت عالى بطريقه ايجابيه لها مفعول مضمون على المدى البعيد,غاليتى مغتربه...ربى ما يجيب زعل ,وانتى عارفه لو فى شى حيكون عندك علم ,تعرفى ليش كتبت لانى ديما نقرا فى تعليق المواضيع كلام حلو ,فكرت لو العكس شنو يكون ردة الفعل؟,شروق .. فى انتظار افكارك,نسمه...صدقينى عمره السكوت ما كان اهانه بل ضبط نفس وكان على الكلام ديما فيه فرصة ولكن العكس لا,المشكله مش الاهانه ,المشكله يفهم السكوت ضعف وممكن تخلى الطرف الاخر يتمادى,بارنى ...كويس كلامك معناهافيه نضوج,انا عندى الاعتذار شجاعه ونبل ولكن مش انتى بس اتفضل الهروب من المشكله حتى انا فى بعض المواقف مثلك,بالنسبه للامثله هى التى تحدثنا عن الماضى وواقع الحياه,الظاهر الان الكبار يعطوا اهميه لمشاكل الصغار اكثر من اللازم لدرجة توصل بالبعض ان يملا قلب الطفل بالكره ,يكون هو ناسى ما عندهش مشكله وهى تذكره,ام ساره..وعليك السلام ليك وحشه...شوفى اختك توا تفسر عصبيتك نتيجة الامومه والحمل ,ولكن المشكله لو كانت قديمه ولكن احلى حاجه فى كلامك انك عارفه موضوع العصبيه وهذا يسهل عليك واجد التعامل معاها,نحاولوا نستفيدوا من الموضوع المطروح ومناقشات سلبيات حتى ما تكونش فينا,تعرفوا اكثر شى يساعد فى تقبل الاخرين ,هو البعد عن اليقين ,يعنى ممكن تكونى مقتنعه بحاجه عمرك ما اتدريها ,كونى متأكده فى يوم ما انتى او شخص قريب منك ممكن ايديرها,او شخص يتحدث امامك ما تخليش الوسوس ايقول لك انك المعنيه بالامر وبشويه لباقه ودون هجوم ممكن تسألى الطرف الاخر ماذا يقصد,الغالب ليس لديه شجاعه على الحديث المبطن ولو حاول,مجرد تنبيه ,تخليه يتراجع,طولت عليكم ولى عوده.

[حبيبتهم]

السلام عليكم ورحمة الله وبركاته

مساء الخير للغالية ام عدنان ولكل الغاليات

اني بنخبرك على حقيقتي ههههه

اني زمان ماكنتش نتكلم هلبه وخجولة
لكن توا بالعكس عادي نتكلم مع ناس مانعرفهمش وهكي
ولكن تصرفي في اي موضوع مرات نتجاهل مانردش على اي شئ مايعجبني ومرات نتجاهل ومرات نتجاهل مانرد وبعدها ماعاد نقدر ننفجر بالكلام ومايهمني حد
وكان غلطت وعرفت اني غالطة نعتذر والله مرات وصلت اني اعتذرت واني مش غالطة ولتوا قاعدة في خاطري اعتذرت بيش ماتكبر المشكلة وبس

[sweet nona]

هلا بأم عدنان وبالغاليات كلهم..موضوعك حلووو ويشجع

لانه كلنا نحتاجو هيالتدريب النفسى انى اكبر مشكلة عندى انى عصبية هلبا

زيك يام سارة بس برعة نهدا ونروق خليني شوي بس

بس مع اقرب الناس هكى ..لكن لو حد بعيد خلاص ناخد موقف بينى بين نفسى مش ضرورى ايكون واضح عليا

بس ننفجر عالظلم

وفعلا كلامك صح من الكتب الى نحاول ديما نقراها انى وخواتى

كتب ابراهيم الفقى الله يرحمه ويوسع عليه يارب

رجل عظيم بعقله وتفكيره والعظمة والكمال لله وحده

بس دروسه النفسية اترت فى خطوات فى حياتى مستحيل ننساها

وشكراا وانى تابعة الموضوع بقلب بس كملى الدروس

والعناد صفة سيئه لانها احيانا من موقف بسيط بسبب عناد يكبر ويخلف مشاكل بعده

وياريت لو كانت الدروس مدعومة بالقصص والدلالات طماعة هههه

بس المواضيع هادى تلمس فى احساسى كتيرا

[لوتي]

موضوع حلو أني بنقول إننا بشر غصب عنا بنمرو بمواقف اتعصب لكن أهم حاجة نعرفو كيف انصيطرو علي الموقف
أني من رايي إن الإعتذار أو لسكوت مش دليل ضعف بالعكس مرات تسكتي بيش مشكلة ومتكبرش أو متخصريش شي لأن الإنسلن وهوا عصبي مرات يطلع منه كلام جارح جدا لذالك السكوت أفضل شي قال عز وجل :-( والكاظمين الغيض)
قال رسول الله صلى الله عليه وسلم :- (ما نقصت صدقة من مال ولا زاد الله عبدا بعفو إلا عزا وما تواضع أحد لله إلا رفعه الله ) فهرس مسند أبي يعلى

والمرأة متعرضة لهلبا مواقف يعني بتكون أم وبتربي وبتابع أمور حوشها بتساير الناس وتواصل وبتحمل الكبير والصغير ومرات مثلا الكبير حتى لو غلط متقدرش تتكلم إحتراما ليه
فكرة التدريب حلوة لكن أني انحس إن فيه مشاكل متستحقش أكبر من قدرها يعني تخش من وذن تطلع من الثانية
أما يديروها الصغار ويوحلو فيه الكبارصح لأن الكبار هما اللي يتعاركو بينما الصغار ينسو بسرعة ويولو لذالك أني نعتقد إن مشاكل الصغار ضروري تتواجه بحكمة من الكبار

[لوتي]

نسيت انقول إن الظلم حار ومتقدريش تسكتي عليه مش قلتلكم بشر

[الترياق]

السلام عليكم
الموضوع حلو و كل الأراء و النقاشات حلوة و عجبني تفكير لوتي,,في أن الأنسان بشر,,
تعودت ديما أني لما يصير موقف يمكن أني نتحمله مانرد من أول مرة,,و كان قدرت نفوت اللحظة هذه لأني لو رديت ممكن ننزل لمستوي مانحباش,,و نحكي الموقف لأشخاص ممن حولي ع الموقف و شن رايهم فيه من وجهة نضرهم,,فأحياناً وجهة النضر المختلفة و الحيادية تغيير كل الموضوع أو ع الأقل تخفف تأثير الموقف..
و ل لوتي نقولها هذه قناعتي في الحياة زيي ماذكرتيها و دليتي عليها بالأحاديث,,بس من قريحتي:-

أن كان تكرار تسامحي ذل فأنا أعشق ذلي.
و أن كانت طيبتي غباء فلأني كفرت بمذهب الأذكياء.
فأنا أعيي أني لا أعيش ف الجنة أو في زمن الأنبياء.
و لا أدعي الكمال و لكني أريدكم أن تبوؤو بذنبي ففي ضعفي قوة و كبرياء.



هذا بالفصحى أما بالليبي

هذه ليك يا أم عدنان صديقتي العزيزة سكيننة دائماً تقول طنش تعش منتعش.
و الحقران يوجع المصران.هههههههههههههه عشان هكيي كاثر عنا أمراض القولون.:p

سامحوني ع الأطالة و حبيت نغيرلكم الجو شويي بمقولات سكيننة ربي يفرج عليه و يسهللها حملها و ولادتها قولو أميين.
:confused:( بس نصيحة دائماً الأبتسامة في وجه الشخص الموسيئ أليكي تأثبرها عليه أشد من صفعه علي وجهه).