استفسار على عجينة المقروض وكيفية تشكيلها

[رولا]

السلام عليكم ا..اليوم نضت ناشطة جئ عابالى ندير مقروض وهذه اول مرة نديره فى حياتى المهم طبقت وصفة الاخت زينب ربى يسلمها غير نقصت فى المقادير بدل 6ك سامدينا انا درت 4ك والباقى طبقت نفس الوصفة ونفس الخطوات لكن بعدين لما جيت بنشكلها طلعت العجينة ماتتشكل معاى جيتنى متفترشة زى التراب ومابت تتشكل عندى والله زعلت وانكسر خاطرى:(
فاحبيت نسألكم شن سبب العجينة جت معاى هكى هل لانها ناقصة سامدينا او ناقصة ماء العجن الساخن ؟؟؟وهذه ص981ورة العجينة المتفترشة:confused::confused:

[luba]

عزيزتي رولا مرحبتين بيك وربي يدوم عليك النشاط

ممكن تكون تبي زيادة امية شوية لانه ياخدو منها شويةالعجين و يصبوا عليه اميه

ويعجنوا وبعدها يشكلوا

جربي شوية بكل زيديها مية شوية بالتدريج وشوفي النتيجة

ولو مازبطت راجي تو زينب والا وحدة من البنات اللي داروه يردوا عليك لو مش مستعجله

[حبيبتهم]

اهلين اختي رولا
العجينة بتزيديها الماء الساخن اللي تلقيه في المقادير بالشوية بالتدريج لوين تكون متماسكة
وتقدري تتحكمي فيها وتشكليها
وزيدي راجعي موضوع زينب تلقي فيه الشرح واضح

وربي يوفقك

[barney]

يا اختي رولا خودي صونيه اصغيرة وحطي فيها اميه ساخنه وشوية امية زهر او عطر اذا كنت ترغبين ولو تبي اميه بس عادي وخودي صونيه ثانيه اصغيرة وخودي من عجينة المقروض تعبايت يد بس وحطيها في الصونيه وخودي بالملعقه من لميه الساخنه وصبي ع الصونية اصغيرة اللي فيها المقروض اللي صبيتيه تعبايت يدك واعجنيها بروس صوابعك كان القيتيها مازال يابسه زيديها ملعقة اميه ساخنه الى ان تصبح رطبه لكن مش سائله فقط لين تقدري اتشكليها وبعدين ابرميها ع الطول اللي تبيه وديريلها حفرة من الوسط وحطي فيها التمروسكريه والجهه اللي سكرتيها خليها هيا اللي تحت لانك لو خليتيها فوق تنفتح وقصيه بالموس والباقي موجود عندك في صفحة زينب

ان شاء الله اتكوني فهمت عليا وان شاء الله انكون افدتك ولو تبي اي استفسار تفضلي