[استفسار] عن الرز الابيض

[مغتربة]

السلام عليكم اخواتي:
لو سمحتن عندي مشكلة مع الرز الابيض (رز بلاو) جربته بجميع الطرق مرة ينجح معاي وعشرة لا !! يااما يجي معجن او يجيني مش طايب..
وجربت انديره في الكسكاس حتي هو يجيني معجن او قاعد يابس مش طايب.ارجو من الاخوات اللي خبرة فيه يعطوني المقدار الصحيح للماء والرز والطريقة المضمونة لنجاحه وياريت مع الشرح..بحيث يجيني حبة حبة وطايب.. وشكرا لكن من قرأ استفساري ورد عليه.

[مغتربة 7]

وعليكم السلام

حبيبة حسب نوع الرز تقدري تتحكمي فى مقدار الماء والمرق

مثلا اني الرز الى نستخدم فيه اندير فيه كوب رز وكوب مرق مع التحبيب الاخير بقليل من السمن

ولو راح نستخدم ماء فقط لاازم انحبب الرز بالسمن او الزبدة

وفى انواع رز تطيبها يبي اكثر ماء زي البسمتي
يعني ادير كوب رز بسمتي وكوب ونصف ماء

يارب انكون افدتك

[أمـ ساره]

ماشاء الله وخيتي مغتربة ما قصرت

حتى اني نفس طريقتها بالضبط

خاصة الرز المصري يا دوب كوب ماء بكوب رز



أما بالنسبة للرز في الكسكاس

لما بتنزلي الرز بعد التبويخة الأولى ما تنقعيه بهلبة مية

يا دوب مية ما تغطي الرز أو أقل وتخليه لين الرز يمص المية

وبعدها ترجعيه فوق النار مع التقليب مرتين أو 3 بس



ان شاء الله نكون أفدتك حبيبة

[رميساء]

السلام عليكم
اختى مغتربة نقوم بغسل وتنقيع الارز حوالى من 10 الى 12 دقيقة ثم يصفى
نضع الطنجرة على النار ونضع فيها ملعقتين زبدة او زيت مع كوب الارز المغسول
وقليل من الملح ونضيف كوبين ماء مغلى اليهم بعد الغليان لمدة 3 الى 4 دقيقة
نقوم بتغطيت الطنجرة بالسلفر من الاعلى ثم غطاء الطنجرة على السلفر باحكام
حتى لا يخروج البخار وتكون النار هادية جدا جدا جدا ويترك على نار لمدة 7 الى 10 دقيقة
هذه المدة على حسب نوعية الارز
ملاحظة لا اقوم بتحريك حتى انتهاء المدة او النضج
ثم يُسكب فى صحن التقديم

[الصابرة]

ماشاءالله الاخوات ماقصروا
طريقتي وجي حبة بحبة
نكيل لكل كوب ارز كوب ماء او مرق
نضع ملعقة زيت / مع ملعقة سمن او زبدة والملح
ثم نضع كوب الارز واقلبه قليلا حتى كل حبة ارز تلمع
ثم نضيف كوب ماء او المرق واتركه يغلي حتى تتشرب الماء قليلا
ثم نهدئ النار كثيرا نغطي الطنجرة بفوطة او قطعة قماش مخصصة للمطبخ
ونضع الغطاء واتركه من ثلث الى نصف ساعة ويكون جاهز وحبة بحبة
اتمنى ان اكون افدتك

[luba]

هنعطيك طريقه تجي مع كل انواع الرز
بس في حالتين

اولا لازم تغسلي الرز زين زين لين اميته تصير شفافه
عشان يطير النشا متاع الرز وهدا اللي يسببلك ممكن في التعجين

تانيا انك بعد ايطيب الرز لو حسيتيه معجن اطفي عليه النار
وتخلي الغطاء مفتوح


تالتا والاهم لما بتحركي الرز تحركيه من الجوانب بحركه دائريه
ترفعي من تحت وتقلبي مش من الوسط او تقعدي ماشيه جايه
بين الحبات لا وهدا يسبب التكسير والتعجين لانه ساخن وانت
كسرتي الحبوب وعجنتيهم


رابعا تكون التكييل للمية والرز بنفس الكوب


نجو لطريقه التطييب

اولا : ادا انت مستعجله وتبي اطيبي الرز طول

تغسليه كويس المية تتحول من بيضاء الي شفافه

تحطي زيت علي النار او زبدة مخلطه بزيت درة
ادا تبيه ملوون ترمي فيه حفنه ايديك رز تقليهم
وادا لا استغني عن هدي الخطوة


متلا انت بدير 1 كوب رز مش منقوع مغسول بس
تحطيه مع الزيت قلبيهم شوية حتي يسخنو لو ماتبيهم يتلونو

تصبي عليهم كوب ونصف ماء مغلي مع بهاراتك وملحك وفلفل اسود
والزيت مايغطي الطنجرة قاعدتها فوقها شويييي

وتغطيه بسلفر تم بمغطة الطنجرة في الاول تخليه

علي نار عاليه لمدة 3 دقايق تم تخفضي النار

علي اخر شي او بالعكس

اما بتجي اطفي الغاز قبل مااطفيه شوي

تقعد كيف الشمعه وتخليه مابين 25 الي 30 دقيقه



تانيا :
لو نقعتيه في ماء عادي بعد تغسليه كويس
لمدة 15 او 10 دقايق طبعا مع ملح عشان ماتتكسر الحبوب

زي فوق بس اهني مقدار
كوب ماء يساوي كوب ارز

ومدة الطهي تكون اقل يعني في الغالب 25وبعد ايطيب اتبعي التعليمات اللي فوق

وبعد هدا كان ماصرتي فنيات في الرز

والكل يسالك عليه وان شاء الله انكون افدتك