[ عاداتي في العيد شاركونا عاداتكم ] عيدنا الاضحي في الغربة من لوبا

[luba]

السلام عليكم ورحمة الله
كل عام وانتم بخير
عاداتي في العيد في الغربه

لازم في العيد يحضرني نوع او نوعين من الحلويات
وهد العيد درت اكليوة بس
عاداتي في الخارج تختلف عن عاداتي في ليبيا
لانه هني بروحي ويادوب نكمل عمل الاضحية من الصبح حتي الليل
والطقس يلعب دور مهم معاي
ومفاجأة هدي العيد انه دبحنا اتنين من الخرفان

اليوم الاول جري وبس في جرت الاضاحي ومعاها شوايه بس في الطاجين
كان الطقس باااارد جدااااا مطر ماتوقفش وحرارة 4 درجات
وغسلت البطون برة تحت المطر والسميطري
ودرت معاهم قديد ولحم العصبان والشواء لباقي الايام

http://www.libyan-kitchen.com/gallery/images/la736.jpg


تاني يوم انطيب البازين وهدي عاداتنا في ليبيا في اول يوم يتغدوا الاقارب الكل مع بعضهم
وهدي العادة سواء في بيت اهلي او بيت اهل زوجي زي بعضهم وهني عشان بروحي
وماعندي جهد اول يوم فدرته تاني يوم

وننشر القديد في تاني يوم

وتالت يوم شوينا بره علي الفحم وفهمنا ولدي علي العيد وخدي عطله
مني مايمشي للمدرسه عندنا عيد وحضر دبح الخرفان

ومع الشواء درت فطاحة وجتني تهبل
طبعا 2 كوب دقيق ورشه ملح وملعقة صغيرة خميره
وريحتها شوية ورميتها علي طاجين الشواية الكهربائيه بعد قلبته علي الجهه التانيه
ودرت معاها سلاطه مشوية ولحم خروف ودجاج

http://www.libyan-kitchen.com/gallery/images/la739.jpg


http://www.libyan-kitchen.com/gallery/images/la740.jpg


هدي اخر فطاحتين صورت بعد ماتمينا اكل جري في جرت بعضه هههه
http://www.libyan-kitchen.com/gallery/images/la733.jpg

كلينا وربي يديمها نعمه ويحفظها من الزوال ولله الحمد

ضمينا وغسلنا وفي اخرها بخرنا بالبخور اللي يحضرني في كل مكان
بره الحوش وداخله

http://www.libyan-kitchen.com/gallery/images/la734.jpg


وهدا الكوينين اللي هربته معاي عبر الحدود هههه
وهدي طريقتي في تطفايت الفحمه بيش نستعملها تاني
http://www.libyan-kitchen.com/gallery/images/la735.jpg

وكل عام وانتم بخير

اما اهلي شواء وسلاطه مشويه وحلويات حاجة اواتنين لانه في الغالب يدبحوا 3 او اتنين
مافيش وقت لي شي غيرهم
ومن العام للعام واكتب لي ليبيا تكون ديما علي بر الامان ياااارب

[الصابرة]

ااااااااااااامين يارب
وماشاءالله يالوبا عادات حلوة
وان شاءالله ربي يساعدك والله تعب بروحك
وجو صقع بكل لو كان اني يلقوني مومياء من الصقع
ربي يونسك بصغارك وراجلك يارب

[sweet nona]

فعلا كل واحد بعادته

تو احنى البازين مستحيل انديروه فى ايام العيد

بس اكيدة فى العيد الكبيرة نوع او 2 لانه عيد لحم اكتر حتى الضيوف بعد ايجو

بضوقيهم من اللحم

وماشالله عليك حتى فى امريكا امدايرة كل شي

كل عام وانتى بخير وربى يدوم نعمه على كل المستلمين

نورتى

[مغتربة 7]

ماشاء الله عليك يالوبا
يهببببببببببل عيدك ربي يعطيك الصحة
وجعتيني فى الصقع تنظفي
ما نقصتي شي ويهبل الكانون
ان شاء الله كل عام وانتم بالف خير
موضوع رائع ويستحق التقييييييم

[مغتربة 7]

ما باش يمشي التقييم لي عودة ان شاء الله

[أمـ ساره]

ماشاء الله عليك لوبا وعلى جو العيد عندك

ربي يهنيكم يارب ويفرحكم حلو الجو الي مدايرتيه

خاصة مع البخور والكانون ما احلاه مش عادي

موضوع مميز حبيبة وربي يرجعك لبلادك بخير وعافية

وتعيدي مع أهلك وأحبابك يا رب

[رميساء]

السلام عليكم
عيدك مبارك وتقبل الله منا ومنكم
بالهناء والعافية عليكم الشواء وخبزة الفطاحة
وربي يُحفظلك سفيان
والبازين باللحم الخروف ِعز الأكل
ماشاء الله عليك
جاري التقييم

[luba]

بارك الله فيكم بنات علي المرور الرائع
وربي يقرب كل بعيد وصحيتوا علي الدعوات والكلام الزين

رميساء كيف عرفتي انه عندي سفيان
شكرا لكل من مرت وقيمت وعلقت وشاهدت مشكوووورات يا حبوبات

[رميساء]

السلام عليكم
أختي لوبا بصراحة من وصفاتك بسكويت جوز الهند
كتبتي سفيان يُساعد في التقطيع
تصبحي على خير يا أُم سفيان

[زهرة الحبق]

كل عام وانت بخير تسلم ايديك ماني عارفة يجيك التقيم والا لا اني بنقيم وان شاء الله يجيك

[حبيبتهم]

كل عام وانتي بخير يا غالية

وربي يسعدك ويهنيك مع زوجك واطفالك

[om_adnan]

وعليك السلام ورحمة الله لوبا....كل عام وانتى واسرتك بالف خير,ربى يعطيك الصحة ,فعلا فى الغربه كل حاجه انديروها بروحنا ,مش كيف البلاد مع بعض كل شى يهون ويكون ساهل,ماشاء الله كل حاجه درتيها ما نقصتى على اسرتك شى,على فكرة العيد عطلة دينيه رسميه عندنا لا يعتبر غياب,مش عارفه هل عندكم نفس الشى,قولى وين نشرتى قديدك؟عندك الحق كونين يستاهل التهريب,تبيده بالهنى.

[دانية]

ماشاء الله اجواء روعة ربي يسلمك لسفيان وبوه وكل عيلتكم كل سنة وانتو سالمين...

[دانية]

فعلاً زي ماقالت ام عدنان ... وين نشرتي قديدك في هالصقع؟؟:confused:

[luba]

بارك الله فيكم بنات
اسعدني مروركم وتعليقكم والصراحة نفرح بوجودكم
كاني حضرت العيد في ليبيا

ام عدنان ودانية اجابتي
اني اني اول مرة اندير قديد علي مدة غربتي وهي تصل 4 سنوات

نسمع ونشوف في البنات ينشروا قدام الدفايات
بس التدفئه عندي مركزية وتلف الحوش كله علي شكل مستطيل صغير تحت الحيوط فمانقدرش ندير
تحتهم ولكن جهاز التدفئة مع المية محطوط في دار في البيت
ديمه دافي صيف اشتي وكانك فاتحه الكوشة علي 50 او 60 اعتقد
فنشرته علي منشر متاعات الملابس وحطيته فيها تحتها نايلو وجرايد
وجف في خلال 3 ايام ومرات اقل غير احتياطي تالت يوم
ودرته وجاني ياسلام ونودة ليكن الكل
وكل مشكله وليها حل الحمد لله فرحانه قريب انطير
ماتصدقوا قديش فرحت وكان نفسي اندير عصبان الكرشه
انقولوله اللواوي
بس خفت المرة الجايه بنديره ان شاء الله بعد النتيجه المرضيه
وانت ام عدنان وين تنشري فيه ؟
اكيد دانيه انت بره عاد مصر محماطي

[نسمه ليبيه]

كل عام وانتوا بخير وينعاد عليكم بالصحه والعافيه

شوايات يهبلن

[om_adnan]

لولو والله شعور متبادل ونعمه الناس,لى زمان ما درته ,فكره جنب السخان ,اكيد اسرع,ننشر فيه على رف الفرن بجانب فتحة التهوئه اللى فى الارض ونقعد انقلب,صحتين وعافيه قديدكم ولما اتطيبى بيه كولى كم كشيك باسمى .:rolleyes:

[المصراتيه]

هاتي الكانون جاي
هههههههههههه مش عاديه كانون مره وحده ههه والله حلوه التهريبه
فوح صنتك ياحنه خخخخخخخ

عيدكم مبااااارك وان شاءالله كل عام
ماشاءالله عيد تهبل ووين صور الحلويات ماوريتيهنش ولا ماتبيش اضوقينا
اييييييييييييييي
وياعيني علي الشواه والفطاحه محلاهن
يعطيك الصحه وربي يطولكم في عمركم وكل عام تشو وتقددو وتغسلو الكراشي ان شاءالله:o

[بنية بوها]

اوووووو اجواء مش عاديه لكن يكون ربي عونك في هالصقع وعطيك الصحه
وان شاءالله كل عام وانتي بالف خير وتشوي وتقددي

[بنت حواء]

ماشاء الله أجواء حلوة بس مشكلة الصقع ان شاء الله ربي يحفظك
ويحفظلك زوجك وأولادك عيد كامل حتى القديد صار؟؟ ماشاء الله
وأحلى حاجة هذا

http://www.libyan-kitchen.com/gallery/images/la734.jpg



سلم يدياتك وربي يعطيك الصحة وراحة البال
وكل عام وأنت بألف خير

[luba]

نورتوا الموضوع وبارك الله فيكم
علي المشاركه وربي يعطيكم الصحة
فرحني وجودكم وتعليقكم

[luba]

للرفع

[لوتي]

ربي يدوم لمتكم كل سنة وإنتي طيبة