[ عاداتي في العيد شاركونا عاداتكم ]مطبخ موودة

[موودة]

السلام عليكم وكل سنة وانتن طيبات وبالصحة والعافية

اول عيد ليا مع اهل زوجى ومافيش اختلافات كبيرة عن اهلى

بعد صلاة العيد نلتمو ونتفرجو ع الذبح

وكل واحد من سلوفايا ذبح خاروفه وزوجى ذبح لأول مرة وطبعا وثقت الحدث بالتصوير
وبعدها سلخو وقطعو وعميمة الله يخليها قطعتلى الحولى متاعى قطع صغيرة وخذو منها ربع وعطتنى ربع لــ ماما وطرف لحم لعيت جدى عشان اول عيد ليا
والدوارة
بعيد عنكم قريب رجعت
وسلفتى الكبيرة نظفتها ليا التنظيفة الأولى وانا غسلتها وحطيتها فى كيس وشلتها لــماما {سر بينى وبينكم} عشان باقى التنظيف والخرط
وبعد العيد حنشيله لعربي عشان نديرو عصبان مع بعضنا

وطبعا الغداء هم دارو كسكسو ونحن فى حوش هلى نديرو طبيخة بطاطا وبعدها يبدا جو الشوايات والفتلكة
وانا طبعا ساعدتهم فى غسل المواعين وباقى السلفات والصبيات نظفن المنور والمطبخ والمواعين الكبار
وكان يوم حلو وعدا على خير لأنى كنت شايلة همه من قبل مانتزوج هههههههه كله كوم والكرشة كوم ههههه

واللمة كانت حلوة واجد

وكل سنة وانتو طيبين

[موودة]

نسيت
نديرو فى عيش (عصيدة)
بس اهل زوجى ماداروهاش

[مغتربة 7]

ماشاء الله ياميمي عيد يهبل
ومحلاها اللمة ربي يدوم عليكم
كله كوم ورفعت البطن لي امك كوم هههههههههههه عطيك السلامة
لكن وين هاربة وراك وراك مصيرك راح اديريها
وين الصور؟؟؟؟؟؟
كل عام وانتم بالف خير حبيبة
وربي يعقد عسلك انتي وراجلك

[موودة]

تسلميلي ياغالية
كنت نقول يارب جيبلى راجل مايحبش العصبان ..جانى عاشق العصبان ههههههههه
حاضر الصور مغير نحصل الوصلة

كل سنة وانت بألف خير وعافية

[رميساء]

السلام عليكم
موودة عيدك مبارك يا عروسة
إلمة حلوه في العيد
وتعاون مع بعضكم في العيد كويس
ربي يحفظكم لبعض

[أمـ ساره]

ماشاء الله على عروستنا منورة المنتدى حبيبة

وبارك الله فيك على المشاركة الحلوة

والله فرحت بيها هلبة

ينعاد عليك بالصحة وطول العمر حبيبة


وحلو عيدكم كلهم تعاون وماشاء الله مدللينك أول عيد

وبالنسبة للدوارة مع الوقت ان شاء الله تتعلميها

وكل عام وانتي بخير وخيتي

[حبيبتهم]

كل عام وانتي بخير يا مودة والحمد لله عالسلامة من الكرشة هههههههالحمد لله يومك كان حلو. احلى لقطة انك بترفعي الدوارة لامك اتنظفها تعلمي من امك كيف تنظفيها بيش العيد الجاي والا شي يوم تصدمينا وتفرخينا انك نظفتي دوارة بروحك وربي يسلملك سلفتك اللي عاوناتك وان شاء الله كل عام وانتم. ر

[luba]

نقري وشادة شدوقي
كل عام وانت بخير ينعاد عليك بالصحة
حلوة هالحركات اللي درتيهم اسمعي كانك متعيفه منها البسي قوانتي متاع المستشفيات
وكمامه نتكلم جديات زمان درتها وعلقوا وماعدلت لين تعودت وحولت الكمامات طبعا هههه
والقوانتي لو ماحصلت رقمي نلبس كبير في الاول الغسل بالقوانتي والخرط بدون
وربي يكون في عون امك شكلك من توه بتعبيها
باهي تبي خطه العام الجاي ديري بيبي بس متخيله حتي البيبي امك اتغيرله ههههه
جوووووعليك وخلاص ربي يعطيك السلامه هههههههههههههه

[om_adnan]

اهلين بعروستنا,شنو فى حنه على العيد والا ما زالت حنة العرس قاعده,المهم كان جوك فى العيد تمام,بحكم اول مناسبه بعيده على اهلك ومع غرباء اصبحوا من المقربين,مش مشكله تعطى الكرشه للوالده وطبعا مش لازم الكل يعرف,بس دائما حاولى تعطى انطباع وخصوصا الانطباع الاول انك فالحه ومافيش حاجه ما تعرفيش اتديرها وسلم المنتدى خير مساعد لك,هذا كله حيكون فكرة عن مووده,ربى يحفظك ويهنيك.

[نسمه ليبيه]

صار شلتى الدواره لامك
اختى قالت كل سنه نخفظ غسلة الدواره وننساها لانى تمر سنه وماغسلتهاش
باهى شريتى لبسة عيد؟ وريها لنا

[المصراتيه]

ماشاءالله عيدكم حلوه
اولك عيد مع عيالك ان شاءالله بطولت عمرك يارب
وكل عام وانتي بخير

[الصابرة]

ماشاءالله عليكم
جو حلو ربي يدوم لمتكم ديمة
ويخليك سلفتك اللي عاونتك وان شاءالله العام الجاي اديري كل حاجة بروحك
ولما ترفعي المصارين لامك شوفيهن كيف ادير فيهن

[بنت حواء]

أهلاااااااااااا وسهلاااااااااا بدووودي
عروستنا .. في أجواء العيد هههههههه
ياعيني على الدلع
هوا حلو الدلع أول عيد كان لقيتي من يدلعك
ماشاء الله سلم سلفتك الطيوبة اللي عاوناتك
وسلم مامتك اللي بتكملها هههههه
والعصبان من بيديره أسمعي أهل بنغازي مشهورين بالعصبان الحلو
نبوك فالحة واديري العصبان :d لعاشق العصبان هههههههه
طبعا لازم حد يعاونك أول مرة لكن أنت اللي أوقفي عليه رسمي
والصور بسرعة حطيهم فكينا من أسلوب التشويق هههههه
سلم يدياتك على المشاركة الحلوة
ربي يهنيك ويسعدك دووووووووووووووم
وكل عام وأنت بألف خير

[موودة]

رميساء
ام سارة
حبيبتهم
لوبا
ام عدنان
نسمة ليبية
المصراتية
الصابرة
بنت حواء

تسلمولى عزيزاتى الغاليات والله انا فرحانة بيكم وبتشجيعكم وصحبتكم الحلوة
بنقوللكم انى درت طبيخة بطاطا وطلعت طعمتها حلوة

ونصائحكن على عينى وراسي
والحنة طارت يا ام عدنان بس زوجى مايحبهش يعنى مش حنديرها الا فى افراح اقرب الأقارب

جيبتلكم صورة الدوارة وهى طازة ههههههههههههههههه
.
.
.
.
.

http://www.libyan-kitchen.com/gallery/images/2hih.jpg



وهذه صورة اول اكلة ليا زى ماوعتكم المفروض مكرونة جارية بس بقدرة قادر طلعت جافة هههههههههههه

.
.
.
.
.
http://www.libyan-kitchen.com/gallery/images/1tlt.jpg



بس ثانى مكرونة جت حلوة وجارية وسمحة واوتكلت كلها

[الصابرة]

صحة على قلبك
ومع التجربة تجي الحاجة تمام
وماتخافيش انها تفسد لانك لو خفتي حتى ولو درتي كل حاجة تمام
تفشل فديمة قولي لروحك توا انديرها تمام
تعرفي اني المكرونة تميت شاطرة فيها بنصائح زوجي
قبل كنت انحب اندير كل حاجة الا المكرونة ماتزبطش لكن نصائح زوجي خلاني فتلاكة في المكرونة

[مغتربة 7]

ضحكتيني يا ميمي ههههههههه ربي يسعدك يارب
تو تبدي خبرة مع الايام
ان شاء الله ربي يهنيك يارب

[حبيبتهم]

ماشاء الله يا مودة
احلى حاجة صورة الدوارة الطازة مش غير دوارة طازة بس خروف كله طازة

ربي يوفقك

[sweet nona]

ماشالله عليك وربي يبارلك وبهنييك

وان شالله كل عام وانتى بخير