[عاداتنا في العيد ] عادات العيد من أمـ ساره

[أمـ ساره]

السلام عليكم ورحمة الله وبركاته


عاداتي في العيد بسيطة بصراحة لأن زوجي ما يحب التقييد بحاجات معينة

واغلبها متعلمتها من بيت أهلي ربي يحفظهم

ونحاول دائماً ندير جو حلو في العيد وخاصة توا بنتي تكبر ولازم تتعلم زي ما اني تعلمت



صباح العيد


نضت من الفجر وحاولت نقعد فايقة نجهز لزوجي حاجاته ونسقده للعيد

وبعدها نبدل لبنتي ونجهز بضاعتها وننزل نعيد على عزوزتي

طبعاً بعد صلاة العيد وبعد ما يعيدوا المصلين على بعضهم يروح زوجي وسلفي

نعيدوا ونجهزوا ارواحنا وبضاعتنا ونمشوا لحوش جيراننا نذبحوا عندهم

وهم من عاداتهم أول يوم بنظفوا الدوارات حاشاكم (البطون) ويشوطوا الرووس وبس

غذاهم يكونوا مجهزينه من الصبح شربة عربية وخبزة فرن وفطيرة مسلاتيه مش عادية

يبدوا في الذبح الرجالة ومرة مرة يبعثوا لنا حصتنا من الشواء

والصغار يجروا ويلعبوا ويكونوا فرحانين وشكلهم حالة يضحك بس حلو


ونروحوا بعد الظهر او قبل العصر حسب عدد الخرفان

ونبدوا في جونا حني


اني نكون مطيبة الفاصوليا البيضاء ومكيستها في الفريز

وأول ما نروحوا بخروفنا نقول لراجلي يعطيني طريفات لحم

نطيبهم لمرقة الفاصوليا

ونجهز بعض السلطات والخضراء للشواء والتوابل واللوازم كلها

http://i1159.photobucket.com/albums/p637/the_faithe/LAHEEM1.gif


نبدوا نقطعوا في خروفنا ونشووا في اللحم والكبدة

هذا ضروري منه


http://i1159.photobucket.com/albums/p637/the_faithe/LAHEEM2.gif


http://i1159.photobucket.com/albums/p637/the_faithe/LAHEEM4.gif


http://i1159.photobucket.com/albums/p637/the_faithe/LAHEEM.gif


http://i1159.photobucket.com/albums/p637/the_faithe/LAHEEM3.gif




ونقسم اللحم ونكيسه ونحطه في الفريز

الشاكلات نديرها بين ضلوع نجهزها للشواء أو لحم للتطيب العادي

وناخذ الهبرة نقسمها بين قلاية وبيم لحم للفرم وبين لحم للبورديم


والقلاية ندير يا دوب حساب وجبتنا أول يوم بس وما ندير في قديد لأني ما نحبه لا اني ولا زوجي

والمصارين أغلب الأعياد نعطي فيهم حتى هم ما ياكلهم راجلي يعني من غير عصبان



لو كملت حوستي أول يوم نجهز نفسي ثاني يوم نمشي لحوش أهلي ونبات عندهم لثالث يوم

أو نمشي ثالث يوم لو مازال عندي شغل

وكل مرة ندير شواء بشكل مرة كباب مرة شيوش مع الخضرة

ومرات لحم مشلح عادي من غير توابل انوع شوي

وهالعيد عيدت مع عزوزتي وسلفي لأن زوجي مسافر

أول يوم ما درت شيء بعد ما روحنا من الذبح لكن ثاني يوم

شوينا لكيدة ودرت قلاية وشوية شيوش بالخضار




وعيدي بدت من خامس يوم بعد ما روح راجلي من السفر

وان شاء الله انزل لكم بعض طرقي في اللحم والشواء


سامحوني ما فيه هلبة صور

لأنه المطر دارتها فيا وكل شيء درته بسرعة

مع اني كنت مجهزة الكاميرا وبنصور أغلبى الحاجات



وكل عام وانتم بخير وعافية

[om_adnan]

وعليك السلام ام ساره....عيدكم مبارك,دوختينى ام ساره ,جهزتى حوايج زوجك لصلاه العيد وقصدك بعدها سافر,مش عارفه عيد بلا عصبان وقديد كيف .... بس فعلا تتمتعوا بجو الشوايه و الاكيد طعمة طبيخة فاصوليا العيد حاجه تانيه,محلاه العيد فى اللمه,ربى ايخليكم لبعض انتوا وجيرانكم,زمن توا مش بسهوله تلقى جيران بالشكل هذا,كويس كان فيه مطر,انا سمعت يبوا ايدرو صلاة استسقاء

[أمـ ساره]

مراحب بأم عدنان الغالية

نورتيني حبيبة وشرفتيني بحضورك الحلو زيك


شوفي حبيبة اني نحكي على اعيادنا بشكل عام هكي نديروا

بس هالعيد زوجي كان غايب

واكيد اللمة حلوة وخاصة مع المعاونة والحوسة


وبالنسبة للمطر هي مش قوية يادوب تبشبش ايام ايام والحمد لله


وكل عام وانتي بخير حبيبة وكل اهلك واحبابك

[بنت حواء]

ماشاء الله أجواء حلوة في عيدكم
الذبح عند الجيران فيها لمة حلوة أكيد
لكن ليش مااديروش متحبوش العصبان؟؟
ولا قصدك مافيش وقت في العيد؟
سلم يدياتك يا أم ساره على المشاركة الحلوة
والصور
وكل عام وأنت بألف خير

[نسمه ليبيه]

كل عام وانتوا بخير بس شن قصدك ببضاعتنا
وينعاد عليكم وان شاء الله ماتفقدى زوجك

[أمـ ساره]

مراحب بنوتة

شوفي حبيبة اني نموت في حاجة اسمها عصبان

بس راجلي ما يحبه لهذا ما ندير فيه

يا أما نعطي الدوارة لحد أو مرات نرفعها معاي لبيت أهلي نديرها عندهم


الله يسلمك ويبارك فيك على مرورك العذب بنوتة

[أمـ ساره]

مراحب نسومة

نورتيني بحضورك وخيتي وردك الحلو

حبيبة بضاعتنا يعني الصواني متاع الحوسة

والأمواس ( الماس متاع الذبح والسلخ )

وشوية من لوازم العيد مشروب وعصائر وفواكه

واني ندير في حاجة حلوة نرفعها معاي

وحلوة وبالونات للصغار وحاجات زي هكي


وبضاعة بناتي طبعاً ضرورية

[الصابرة]

عاداتكم حلوة
وذكرتيني بأيام الشرق لما نلتموا احنا والجيران الله على هكي ايام ياريت يعاودن

وعيدكم خفيف مافيش تعب هلبة خصوصا انكم مااديروش في العصبان اول يوم
تتهنو بيه يارب ويهنيك ربي ببنياتك وعزوزتك وراجلك وسلفك

[مغتربة 7]

ماشاء الله عيدكم حلو حبيبة وخفيف
واجواء العيد تهبل
ربي يدوم لمتكم وفرحتكم
وكل عام وانتم بالف خير

[رميساء]

وعليك السلام ورحمة الله وبركاته
عيدك مبارك ياأم سارة
وربي يحفظكم جميعاً
بالنسبة الفاصوليا فيه عائلات إيديرو فيها في العيد الفطر هي والفطيرة
واللحم الرأس ماديروش فيه
والشواء روعة
مشكورة

[حبيبتهم]

ماشاء الله عيد ولمة
ربي يخليكم لبعض ويرجعلك زوجك بالسلامة
وكل عام وانتم بخير

[luba]

ماشاء الله اجوائك حلوة ام ساره
اول مرة نعرف الجيران من غير اقارب يدبحوا مع بعضهم
سبحان الله عيد المحبه والالفه :)
ربي يعطيك الصحه واول مرة نعرف حد ماياكل في القديد
وعجبني تقسيمك لي اللحم
:rolleyes:وفكرتيني بحاجات ناسيتها تو بنديرها وين نقسمه
قاعدات الاتنين علي اربعه كل واحد في الفريز:( وكل عام وانتم بخير
وربي يقومك بالسلامه

[sweet nona]

ياودى نجى هالعيد الحلو والخفيف

عيد الاجانب الى حتى العصبان ماياكلوه احسن حاجة

تسلمى وان شالله ربى ينوضك بالسلامة ويخليلك عيلتك