يا بنات انتن كيفي؟ معدش عرفت نطلع!! [الأرشيف]

للاهم

12-23-2010, 08:28 PM

يا بنات راني في حالة من المطبخ الليبي لزينب محمد
اليوم قلت نخش شوية نتمم موضوعاتي واللي ردن عليا والتقييمات
ونشوف الطيابات شنو نزلن
ونستلهم فكرة لعشاء اليوم
معدش عرفت نطلع
الحوش يقلب يعور
حايس
وانا مشتشتة وبروبي مازلت
والمشوار اللي بنطلعه شكله عدى فيها
وقاعدة متيبسة عالكنبة متلفلفة شخاشير وطاقية صوف
وحاله باهي اللي ما يشوف فيا حد
وراهو صبح عندي
فارق التوقيت طبعا
وانتن متنهنهات في الوطن الغالي متعشيات اسم الله عليكن
وتستعدن للسهر او النوم
او الاحلام الهنية يا رب
وانا النهار كيف بادي عندي
ياربي قريب يكمل وانا معمشة عيوني ف الشاشة
طلعوني
سكري عليا يازوبة من عندك
يا مشرفات يا مراقبات
كراعي راقدة
راجن ما تسكرنش في موضوع حلو شفته يمشي ف الشاشة
خلي نشوفه ونسكر بعدها
زعمك!!!!
طلعوني
:d

السمحة

12-23-2010, 08:43 PM

هههههههههههههههههههههههههههههههههههههههههههههههههه هههههههه
هذا حال النت
ردى بالك من حوشك اولا
والله عندى راجل لوكان يلقة حاجة فى الحوش مش هية يقلبة عالى واطى خليك مرة هكى ومرة هكى

للاهم

12-23-2010, 10:10 PM

حي عليا ما قدرتش نصبر
سكرت مرغمة
وحطيت صبغة علي راسي
ولفلفته بشكارة بدال طاقية الصوف
وقلت يللا نخش حسني رايفت عالمنتدى
مش مغير يالسمحة
تي انا راجلي كان مايشوف الدواليب مرتبات زي المحلات ينجن
كملت هالسنتين مغير نرتب ونحدد وننشي في الياقات
واتفاقنا اني مانفتحش النت لما يجي للحوش
ولا نغسل مواعين ولا نقرب حاجة
مغير نقمعز حذاه نونسه وهو من جزيرة لعربية لسي ان ان وياقلبي لا تحزن
وانا يدي تاكل في نفتح النت
مرات يحن عليا لما يشوفنيتقول مقمعزة علي شوك
افتحيه قلقت من سكاتك عارفك عقلك ف النت
واول مايخش يقول كلمتي هلك كلموك كسدتي معاهم شبعتي؟
هابا لولاه
سلمكن وناسات
بس شوره الموضوع ماعجبش الطيابات محد خش وشارك
:(

خدوج

12-23-2010, 10:16 PM

مراحب يالاهم
الله يعينا عالنت لومنى نقعد طول اليوم عالشاشة
بس نقول الحوش يبى والصغار
بس والله فايدته كبيرة
والله المستعان

ليبية

12-23-2010, 10:37 PM

ههههههههههههههههههههههههههههههههههههههه
والله ضحكتيني يا لاللهم :D
يعطيك الصحة تهدريزك محلاه :rolleyes:
شن بنقولك بالنسبة ليا اني عمره ماكان النت مدايرلي مشاكل او ادمان الا بعد مافتحت زنوبة هالمنتدى :p
عقلي ديما بدي مشغول بيه لما نطلع نفكر فيه ولما نظم بالي عليه (شن يسموه هذا ):confused::confused::confused:
حب من اول نظرة خخخخخخخخخخخخخ :D
لكن قلت بعون الله من يوم السبت بندير جدول تنظيمي يشمل ساعات قعادي على النت
لأنه حتى عيوني بدوا يوجعوا فيا:eek:

طمطم

12-23-2010, 11:49 PM

ههههههههههههههههههههههههههههههههههههههههههههههه يعطيك السلامة ياللاهم
يامحلا تهدريزك..... ربي يسلمك من كل شر....
هالمنتدى خدالنا عقولنا
ميزته ياناس (بالنسبة ليا) إني حسيت إني أول مرة نكون في مكاني وبين أهلي

ربي يبارك في اللي كان السبب وراء افتتاحه

نسمه ليبيه

12-23-2010, 11:54 PM

انا كنت برنامج ادمان عالنت

بس توه حديت عهد مانفتحش النت الا لما نكمل كل حاجه عندى
واهو ماشى الحال

بنسالك انت شرقاويه؟ ومن وين؟

طمطم

12-24-2010, 12:09 AM

هذا حالنا ياللاهم
http://www.libyan-kitchen.com/gallery/images/001t051mo7.jpg

http://www.libyan-kitchen.com/gallery/images/029.jpg

ههههههههههههههههههههههههههههههههههه

ام لبنتين وولد

12-24-2010, 12:19 AM

تهبلي تهبلي محلاه تهدريزك ياوخيتي شكلنا احنا اللي معاش بنوضو من تهدريزك الحلو
وانا حتي انا نحب نقعمز عالنت لكن بعد مانتم شغلي وحوستي بعدين نقعمز وتوة لان راجلي مش قاعد فعندي وقت نخش هلبة لكن بعد مايجي ماعاد تشوف فقاعة وجهي خخخخخخخ

ابريكه

12-24-2010, 12:23 AM

للاهم ماك عادية
هههههههههههههههههههههههههههههههههه
عجبتني عفويتك
والله نحاولو مانقصرو في شي هههههههههههههههه
اني نحس فية نشطني يعني نكمل خدمتي فيسع ونكمل غذاية ونقعمزلة
كان قعمزتلة معادش بنوض معناها
لذلك كمل خدمتي كلها نخش بعدها
اسلوبك قنين ماشاء الله
سلمك هدرازة ههههههههههههههههههه

فضااوي

12-24-2010, 12:30 AM

هههههههههههههههه
يعطيك الخير ياللاهم مش غير انتي متبسمره على النت حتى انا
وكان جاك من خبرك مشتركة في عدة منتديات وعندي مسئولياات فيهن
تميت نجري بينهن كيف المكلوبة ههههههههههههه
بس اللي يخش هالمنتدى معاش يعرف يطلع
الله يديم عليناا اللمة الحلوة والصحبة الطيبة والاخوة في الله
الله يجمعنا في جنات عروشهاا دانية مثل ما جمعناا في الدنيا الفانية على هالشاشة

أمـ ساره

12-24-2010, 12:41 AM

ههههههههههههههههههههههههههه

يعطيك الهني يا للاهم

والله الحال من بعضه حبوبة لازم نخش كل شوي ونطمن عالمنتدى

حتى راجلي يقولي هبلك النت

تعرفي البارح مريضة وحالتي حالة رقدت ونضت قلت خلي نقعمز على النت باش انغير جوي

حاشاك حتى في المرض ما رحمناه المنتدى منا

وبصراحة معانا حق

هذا اول منتدى ليبي يجمعنا ونفرحوا بيه ونشاركوه فيه واحني مطمنين

والحمد لله وان شاء الله نستمروا من حسن لأحسن

وربي يكون في عون رجالتنا والله

السمحة

12-24-2010, 12:48 AM

حى حى ياللاهم تعرف توا خشيت على البنات فى الدردشة وقلتلهم تصبحوا على خير وقعدت كيف الهبلة انفكر اكيد البنات ايهدرزو واكيد ام سارة دخلت الهدرزة وزوجى ايقولى سهرى امعاى شوى البنات والمنتدى خذوك منى حى لورايتى حالهم
ربى يستر الرجالة مايسيبوناههههههههههههههههههه

omhammam78

12-24-2010, 01:26 AM

أما أني مانفكرش فيه الا بعد ما نرقد الصغار وبالخنبة وانقول تعبانة من أشغال الحوش حال الغربة نلقى روحي نعطل

للاهم

12-24-2010, 09:21 PM

هههههه والله نتخيل فيكن يا بنات الحال من بعضه
وعطك عصيدة يا طمطم من قالك تسربي صورنا يا طمطمليكيس ( على وزن ويكيليكس)
افطنن يا بنات راهي تنزل باقي صوركن وانت متمسمرات عالنت
مبارح شوي تكت بيني وبينه
اضطريت نسكر وعين تبكي وعين تضحك بيش ما يفطنش لحالتي
زيدن اكتبتن نراجي
مغير مستعجلة ناوية كيكة كريم كراميل ومعدش في وقت

سنابل

12-24-2010, 11:16 PM

يعطيك العافيه على كلامك الي يقطر عسل أنتي والباقيات والله شنوا أنقولك الحال من بعضه
بس أوخيتك أتكمل حوستها وتجي أتقعمز عليه وبعدين تبدا في الغددا وتقعد ماشيه جايه
وراجلي وهاذي رحمة يتغدى الساعه أربعه يعني من الصبح لللأربعه فترة كويسه نمسح فيها كبدي ولكن أنقول بلكي لما أندير أصغار توا نعقل ونخفف أشوي علشان ماعاد يقعد عندي وقت
أدعولي بالذريه الصالحه تحياتي

روح مغتربه

12-25-2010, 02:37 PM

السلام عليكم حبوبات
حلفتك بالله يا اللاهم انحددي يوم انهدرزو فيه امعاك وانفش البغبوغه
والله ضحكتين يعطيك الهناء وسعاده.........
علي العموم مزال فيك امل ما دام متفكره شعرك وتصبغي فيه
والله اني نحاول اني انسيطر علي الوضع يعني ما نقعمز الا لما يكون راجلي مش موجود لانه مازال ما كلمنيش علي الموضوع بس حاسه انه قريب ينفجر

sema

12-25-2010, 07:03 PM

ههههههههه
ربي يعاون كل وحدة وراها شرطي
شكله مافيش غيري فريييييييييي
القراية هي الشرطة متاعي
صح انا جديدة عليكم
بس كل شوية نخش نشوف في الجو ونبي نشارك معاكم في الهدرزة نتفكر امتحاناتي
نطلع نجرييييي حتى وانا نقرا نفكر نقول راهو البنات يهدرزوا انجي ندير دورة عليكن
ونتجسس على هدرزتكم وننتش في ايديا من الحسرة وخلاص
حاسدتكم ههههههه
ان شاءلله ربي يجمعنا ديما ع الخير
والله منتدى مش عادي بكل
ربي يحفظكم حبيبات قلبي

طمطم

12-25-2010, 07:29 PM

ههههههههههه شن هادي طمطمليكس؟؟؟
لا لا ماتخافيش باقي الصور شركتهم
يعطيك السلامة وخلاص..... الله يعطيك مافي خاطرك على هالضحكة اللي رسمتيها على وجهي
نبييييييييييييييي نرووووووووووووووووح خلاص... حاسة بالغربة ومكتئبة وضارباته بوز هكي كبره وقد مادار فيا ياناري قداش يوم واني مبومة في وجهه
كان يجي يلقاني الفم على وسعه توا..........................!!!!!

اللهم يرزقك الذرية الصالحة ياسنابل انت وسلفتي وكل المسلمين قولو آمين

وااااااااااااااااااااااك يا سما اهرب من الغول اطيح في سلّال العقول
والله ماحرف من الراجل إلا هالامتحانات
واني عندي الزوووووووووووز

سنابل

12-25-2010, 07:34 PM

حبيبتي طمطم بارك الله فيك على الدعوة الحلوة ويعطيك اللي في بالك
وياحبيبتي ربي يعينك على الغربه ويرجعك لبلادك سالمه غانمة

طمطم

12-25-2010, 07:49 PM

آمين يارب .... شكرا ليك اختي سنابل

للاهم

12-25-2010, 07:56 PM

ما هو يابنات ماكملتش عالصبغة وشن صار فيا منها
انا كارسة من العملة
خلن نفضي ومش بس حتموتن من الضحك
راجني وعلي ما جيت زيدن شاركن

للاهم

12-25-2010, 08:00 PM

خطرها وتوا شي يوم نخش الهدرزة نجربها ونتعرفو ونضحكولنا شوية
نبرد غدايدي علي راي صاحبتي ل ي متاع السمان المشوي
اه من الغربة
نمشو فيها بالضحك والوكال والنت وسلم مطبخنا الليبي وخياتي الطباخات الماهرات
وتحية صباحية لزينب محمد اللي لمتنا
ربي ينولها اللي في بالها وينولكن كلكن ما تمنيتنا
وينولني أنااااااااا
قولن آمين

طمطم

12-25-2010, 08:15 PM

آآآآآآآآآآآآآآآآآآآآآآآآآآآآآآآآآآآآآآآمين
شن دوة هالصبغة؟

إرتواء

12-25-2010, 10:50 PM

ضحكتيني ياللاهم ,,,, يعطيك السلامه ودوتك حلووه هلبه ,,,,منووره وربي يونسنا ببعض ,,,,

سنابل

12-25-2010, 11:11 PM

ربي يسعدك يالأهم ويعطيك اللي في بالك إنتي وكل اللي في هالمنتدي الراقي بكل معنى الكلمة

ام الجميلات

12-26-2010, 08:20 AM

محلاها خفت دمك تهبل
عندك حق حتى اني مهبولة نت زيك مكتنش هكي الا بعد ما سجلت في لك وتوا في المطبخ
لكن بعد ما نتهنى على حوستي وغداي لان عندي راجل صعب شوي مانقدرش نفتح لين نكون مسيطرة على الوضع

للاهم

12-27-2010, 10:09 PM

خطرها يا بنات عالصبغة ، مش قلت حطيتها ولفيت راسي بشكارة المغسلة اللي جت مع صواري- بسلامته - عمامة هذا كبرتها على راسي وقمعزت عالنت نهدرز مع امي وخواتي وبناتهن وضحك علي عمامتي ومنظري وبين طرالها وجرالها ، مرة ينقطع منهم وكان فتح يستك جهازي
المهم من هنا لهنا وعياط وشياط مع الواي ماكس عبر القارات سكر معد ابا يفتح
فطنت عندها ان الصبغة لها يجي ساعتين فوق راسي مديت يدي تحت العمامة نتلمس طلعت معايا خصلة مورية – - بنفسجية
خصلة كاملة من جذورها
حي عليا حي
طرت نجري عالحمام وسلحت العمامة بشويش خايفة نلقى شعري كله فيها
وووك
شعر موري اخرى ومنملط!
الله يسامح النت وهبالي
وراجلي قريب يجي
غسلت شعري برقة مش موجودة فيا
وقلبي يطقطق على اخر درجات ميزان ريختير
والمية نازلة منه مورة مورة
هابا
ماكملت غسله نين طلعت روحي
وانا قارصة عيني وسط الشامبو نراقب في الخصلات قاعدات والا طارن كلهن
وخليته ف المنشف لعند قب
وحالتي من عمامة هندية
لعمامة فرعونية
المهم يا حناتي
قاعد مازال الشعر
والموري عدى مع المية
اللون جا كويس
بس قعد شعري يومين اللي نهلب منها تكهربه
ويصبي تقول فاجعني كلب حاشاكن
ما نقدر نلمسه بيدي
الا ما يلصق فيها
ولا بالمشطة يلصق فيها
توا ليا يجي كم يوم غسلته مرتين
تعدل واللون استقر
بس من هذك الفجيوة الصغيرة مكان الخصلة اللي طارت
غيرت فرقي بيش نغطيها وغيرت كرسي على طاولة الاكل
بيش راجلي ما يفطنش
هههههه ما يصير لي الا انا هالشي
شكرا لكل خياتي المعلقات
سامحني في كل مواضيعي مرات ما نقدرش نرد عليكن بالوحدة
ونحط رد جملة
بس ممتنة لكن وااجد
سلمكن متابعات

خدوج

12-28-2010, 12:57 AM

تسلمى ياللاهم
روعة روعة روعة تهدريزك حلو

ومبروك الصبغة وسلامة راسك
وان شاء تنبت خصلة حلوة مكان اللى طارت
وديرى بلسم لشعرك باش تقدرى تمشطيه
وكثرى كريم اوزيت على شعرك حتى يتغدى شعرك ويطيب
وسلامات ياحبيبة

للاهم

12-28-2010, 01:03 AM

تسلمي خيتي خدوج ناخذو بنصيحتك الرائعة
راهو كله ضحك وفرفشة

زينب محمد

12-28-2010, 04:35 AM

ههههههههههههههه

الحمد لله على سلامة شعيراتك للاهم

كويس انها مرت على خير و مطلعش شعرك لونه موف

نتخيل فيك و انت تغسلي في شعرك و خابفة يجي في يديك

بعيد الشر

و في نفس الوقت تبيه يجف بسرعة حتى تشوفي اللون

موقف لا تحسدي عليه حبيبة

تنذكر و ما تنعاد ان شاء الله

ردي بالك تعيديها مرة اخرى و تطولي بالصبغة لما تصبغي شعرك

طمطم

12-28-2010, 08:48 AM

هههههههههههههههههههههههه الله يعطيك الهني ياللاهم
عجبتني .... رقة مش موجودة فيا..... ومن عمامة هندية لعامة فرعونية...... مستحيل إلا تكوني كاتبة...... تشبيهاتك متاع وحدة تحب الكتابة..... هيا قوليلنا هالسر.... كام اون.... اني مصرة لازم نعرف تكتبي والا لأ..... عالأقل بيكون عندك خواطر!!!!!!
لكن تعال جاي ماقلتيلناش كيف بدا لونه شعرك بعد ما خطرله موف؟؟؟؟؟؟؟؟؟؟؟؟؟

ربي يعطيك السلامة وخلاص

نعومي نت

12-28-2010, 09:17 AM

ههههههههههههههههههههه
للاهم يعطييك الصحة
ضحكتيني والله الحال من بعضه يا دوبك كيف طالعة من الدوش افتحت النت
قلت خلي نشوف مني فاتح انزبلح في نفسي وبري عاد غير اني زي ما تعرفوا مراة وحدانية نص وقتي في الشغل وساعتين للحوش و الباقي والله ما نحكيكم غير باهي راجلي علي جوه ما يكلمش فيا عليه حتى هو من الجزيرة للعربية يا قلب لا تحزن
يلا توا بالسلامة وقت عليا و حتي السميطري ضربني

للاهم

12-28-2010, 06:19 PM

ههههه طمطومة مش نعرف قبل اسمك في العربية القحة قبل ما تبدي تقصقصي وتجيبي اجلي!
عندي خرابيش في ساس راسي
وعندي كلام فاضي ما يواسي
وعندي طبايخ
وعقل دايخ
وعندي مطبخ ليبي
ماسك تلابيبي
لا نرقد لا نقيل
فيكن نتخيل

ها شن بتقولي :)

للاهم

12-28-2010, 06:24 PM

نعومي هابا الحال من بعض
حتى انا وحدانية بس لا نشتغل لا نقرا... منتسبة لمعهد زينب محمد وبس
بس مش كيدهن عظيم
انا لما يكشخ عليا راجلي عشان النت
نقعد نتململ حذاه لما يحط الجزيرة ونفقفق ونتأفف
لعند ما يكتشف وجودي جنبه يقولي باهي باهي فهمنا يا ودي
افتحي ضري - مذكر ضرتي
مسكين

ام لبنتين وولد

12-28-2010, 06:25 PM

لا ياللاهم زي ماقالت طمطم اكيد تكتبي في شعر قصص حاجة زي هادي كلامك ماشاء الله زي العسل

ام لبنتين وولد

12-28-2010, 06:30 PM

لهدرجة ياللاهم النت داير فيك ربي يعينك

للاهم

12-28-2010, 06:32 PM

طمطم قعد لونه زي قبل
الشيبات بح
والله اللون هذا الوحيد اللي زبط معايا
قبل ديما جذوري اول الايام كأني مخططة قبوعة راسي
وتبيلي ما نطرب وننسجم مع شكل شعري
اكتشفت ان اي صبغة ترمي عالموف او الموري تعطي نتيجة ممتازة
حتى مرة وحدة من صاحباتي غاوية ميش قالتلي تبي نتيجة الميش تكون كويس حطي فيه نقيطات تنتورا مورية .
رد بالكن اتبعن كلامي راني عمري ما جربتها
بس هي ادير فيها
ممكن اللي اديرنه لما تشرن ميش اختارن اللي لونه يعطي عالموري = موف

للاهم

12-28-2010, 06:33 PM

حتى انت يا ام البنيتين والوليد
الله يسامحك اللي يتبع طمطم يتعب وبتعب الناسس معاه
اطلعن منها
انا غلبـااااانة

طمطم

12-28-2010, 07:41 PM

ههههههههههههههههههههههههههههههههههههههه
هكي باهي توا؟؟؟؟؟؟؟؟؟ خش عليا راجلي قالي هذا شن الضحك كله في مني تكلمي.... ترا ترا وريني في مني تكلمي

بالنسبة لاسمي من ناحية قح فهو قح قح.... يعني العزايز والشيابين اللي يقولي مناظر... واللي يقولي طناجر.... واللي يقولي طماطم
وصاحباتي زعميته أرقى لقو طمطم وطمطوم مناسب أكتر رغم انه أبعد من أسامي الشيابين والعزايز

المهم ما علينا من اسمي

أما الكليمتين اللي كتبتيهم بعد هكي فهما الجواب على سؤالي طبعا..... توا انت مطالبة تعرضيلنا بعض من كتاباتك.... ولو ادلينا عالمدونة يكون أحسن ....صح والا يا أم البنتين والولد؟

وبالنسبة للشعر..... هادي أحسن نصيحة حصلتها....اني والشيب في صراع دائم واني المغلوبة فيه
بنديرها عالموف..... ومرات نحول عالازرق مرة وحدة..... شن الانجليز خير مني؟؟؟؟؟؟؟؟؟؟؟!!!!!!!!!!!

وبالنسبة للنت... والله راجلي أحرف مني
مدايرها عالداونلود ديكومنتري وفلك وبرامج هلبة ندوخ وهو يشرح

للاهم

12-28-2010, 08:02 PM

ههههه وانتِ لها يا اخت العرب
اهذه مضارب بني مضر؟
أحللت اهلا وسهلا :)

طمطم

12-28-2010, 08:22 PM

ههههههههههههههههههههههههه أظن أنها بني سليم....... ما شأنك بامرأة تلف حول عنقها نعلي اخيها رثاءً

طمطم

12-28-2010, 08:24 PM

ماتهربيش خيرلك راهو.... وراكي وراكي ياللاهم

للاهم

12-28-2010, 08:53 PM

2
ma

ضريتيني

طمطومة

دافنشي كود

:)

طمطم

12-28-2010, 09:05 PM

يعيك الصحة ياللاهم... جبتيه

نعومي نت

12-28-2010, 10:06 PM

http://www.libyan-kitchen.com/kitchen/tahasoft.com_1/misc/quotes/quot-top-left.gifاقتباسhttp://www.libyan-kitchen.com/kitchen/tahasoft.com_1/misc/quotes/quot-top-right.gifhttp://www.libyan-kitchen.com/kitchen/tahasoft.com_1/misc/quotes/quot-by-left.gifالمشاركة الأصلية كتبت بواسطة للاهمhttp://www.libyan-kitchen.com/kitchen/tahasoft.com_1/misc/quotes/quot-by-right.gifhttp://www.libyan-kitchen.com/kitchen/tahasoft.com_1/misc/quotes/quot-top-right-10.gifطمطم قعد لونه زي قبل
الشيبات بح
والله اللون هذا الوحيد اللي زبط معايا
قبل ديما جذوري اول الايام كأني مخططة قبوعة راسي
وتبيلي ما نطرب وننسجم مع شكل شعري
اكتشفت ان اي صبغة ترمي عالموف او الموري تعطي نتيجة ممتازة
حتى مرة وحدة من صاحباتي غاوية ميش قالتلي تبي نتيجة الميش تكون كويس حطي فيه نقيطات تنتورا مورية .
رد بالكن اتبعن كلامي راني عمري ما جربتها
بس هي ادير فيها
ممكن اللي اديرنه لما تشرن ميش اختارن اللي لونه يعطي عالموري = موف
http://www.libyan-kitchen.com/kitchen/tahasoft.com_1/misc/quotes/quot-bot-left.gif
http://www.libyan-kitchen.com/kitchen/tahasoft.com_1/misc/quotes/quot-bot-right.gifههههههههههههههههههههههههههههههه
اسمعي للاهم لما وصلت لكاني مخططة قبوعة راسي انطلست مني ضحكة عااااااالية شبحلي راجلي بطريق خيرها المراة هدي هبلت وقاللي إن شاء الله ربي يتبث علينا العقل والدين و الله بلحق إن شاء الله ربي يعطينا خيره هالضحك
من الاخير دمك شربات ربي يحفظك
;)

للاهم

12-30-2010, 07:41 AM

امغير وين عديتن شكلكن لقيتن وصفة سحرية تشفي من القعاد ليل نهار في المطبخ الليبي لزينب محمد
انا ليا ساعة - قصدي ساعات - نلج في شوارع المنتدي من طاجين لمقطع ومن عصبان لدبلة ومن عصير لرز معجن عصافير بطني زقزقن ولا وحدة منكن اونلاين
علقت نين بطلت وقريت نين انبطن عيوني
ماسمعت الا صوت قبقابي اللوح يشلك في صالون الضيافة
فطم فطم فطومي خبيني في بيت المونهِ
هبلت قيسني
خلي نرقد
بس المشكلة انا نرقد وانتن تنوضن
صباحكن مبروك
وغداكن شهي
اتبقن علي خير