[حلوة النيدو ] من مطبخ ام عبسي

[ام عبسي]

http://www.libyan-kitchen.com/gallery/images/h1.gif


السلام عليكم

حلوة النيدو او كرات العسل او حلوة الباكستان كلها مسميات لنوع واحد من انواع الحلويات
واللي ياكل منها بصراحة معاد يقدر ايخليها و قريب اتولي صنف رئيسي في الافراح والولادة
عندنا

المقادير
16 ملعقة كبيرة ومملوئة حليب نيدو بودرة
5 ملاعق كبيرة وممسوحة دقيق
ملعقة صغيرة وربع بيكنج بودر
طاسة شاي صغيرة مملوءة ماء دافي
ونفس الطاسة نعبي ربعها زيت
بيضة واحدة
قليل من الفانيليا والافضل نستعمل بودرة كيس واحد
عسلة بالنسبة لطريقتي في العسلة(6 اكواب سكر +4 اكواب ماء )بعد مايصفر لونها وتخثر شوي نعصر نصف ليمونة ونخليها لين تعقد شوي ونطفيها

الطريقــة
نخلط السوائل مع بعض(البيضة مع الفانيليا وقطرات ليمون علشان ريحة وطعمة البيض+الماء +الزيت)
ونخلط الجواف مع بعض(حليب النيدو +الدقيق +البيكنج بودر)
نبدا نصب السوائل تدريجيا على الجواف لين تتكون عندي عجينة يمكن تشكيلها كور صغيرة بسهولة
ومش شرط اتكملي كمية السوائل كلها اللي في الطريقة
وبعدين انشكلوا العجينة شكل كور صغيرة وممكن ايكون التشكيل بشوية زيت في اليد للمساعدة
ونكون قبلها حاطين الزيت ع النار وشرط يكون الزيت يسخن علي نار هادية من الاساس
ونحط الكور في الزيت ونقلبه عل مهل ونار هادية لين تتحمر او تاخد اللون الاشقر
وبعدين على طول اول مانرفعها من الزيت ونسقطرها كويس انحطها في العسلة الباردة
هي الحق تاخدشوي وقت في التطييب علشان اطيب كويس من داخل ومن برا
هذا شكلها النهائي

http://www.libyan-kitchen.com/gallery/images/2012110131.jpg

http://www.libyan-kitchen.com/gallery/images/201211uqu.jpg
وصحتين و عافية
سامحني علي قلة الصور لأني مادرتها وهذي الصورة كان زوجي جايبها جاهزة فخطرت علي بالي وقلت انزلها ليكن
ولكن بأذن الله لما انديرها انزلها ليكن بالخطوات وعندي اختي ادير فيها ماشاء الله لاقوة الا بالله

[luba]

رووووعه وشكلها تهبل
اول مرة نعرفها وياريت كل مرة تعرفينا
بأكل وعادات اهلنا بالجنوب
وخاصه في المناسبات
وهادي الحلوية شكلها مش عادية
تو نجربها ان شاء الله بعد ننفض الخمول من عليا
جاري التقييم مشاركة رائعه
ننتظرها من مطبخك في اقرب وقت

[أمـ ساره]

ماشاء الله أم عبسي شكلها ايهبل ومغري

تقول تعالوا كولوني

هي نفس لقمة القاضي أو تفرق عليها

عجبتني الصراحة وما نقدر نديرها

سلمت ايدياتك الحلوة وتستاهلي النجوووم

[ام عبسي]

تسلمي حبيبتي لوبا
ان شاء الله شوي شوي وانزللكن اكلات الجنوب
اللي نعرفهن طبعا
وربي يطعيك اصحيحتك
مشكورة حبيبتي سارة عالرد الحلو
هي مختلفة تماما عن لقمة القاضي
وان كان اذوقيها تنسي لقمة القاضي
ان كانك تسكني في ليبيا وما عندكم
منها في البلاد اللي انتي فيهاقولي لاي حد ماشي لسبها
يجيبها لك هي متواجدة في محلات المواد الغدائية
او اذا كان تعرفي حد يمشي ويجي علي سبها حاضر
اندزها لك معاه والعنواين انقولوها ع الخاص

[المصراتيه]

ماشاءالله شكلها مغري وتهبببببل
يعطيك الصحه وتسلم يدياتك
وجاري التقيـم والتطبيق بادن الله

[الصابرة]

سلم مجايبك ودياتك يارب
اصلا طالما فيها كلمة نيدو معناها العيون طلعوا قلوب قلوب
والله اني خوي الفترة الجاية ماشي لسبها توا انوصيه عليها
يعطيك صحيحتك
لك تقييمي

[نسمه ليبيه]

صحتين للى كلوها

وهى نفس المشيمشه صح؟

[sweet nona]

مشكورة ام عبسى عالطريقة ةالشرح

اختى تسكن فى سبها حكتلى عليها وحتى هيا ادير فيها

بس اول مرة انشوف شكلها مممم

تسلم ايديك بس المرة الجاية نبوها من ايدياتك

[ام عبسي]

شكرا اختي المصراتية
وان شاء الله اديريها وحتعجبك بأذن الله

سلمك حبيبتي الصابرة ومادام خوك ماشي
اولا ان شاء الله يمشي وايجي بالسلامة
وثانيا قوليلى يسئل في محلات المنشية
اكثر شى

اختي نسمةليبية سلمك وينجيك
وهالحلو مش زي المشيمشة
وما ذقت اي حلو زية

بارك الله فيك وخيتي سويت
وغريبة اختك تسكن في سبها وادير فيها
وماذوقاتك ولادزتلك منها لا لا لا ضروري تعاتبيها
لانها فهلا ما اتفوت

وان شاء الله اتجربنها وصحتين على قلوبكن
وبأذن الله انوريكن الخطوات من مطبخي
بعد مانوفر مكوناتها:o
ومشكورات ع المرور الحلو والردود الاحلى واللي احلى منهم كلهم اللي كتبو هالردود