المساعد الشخصي الرقمي

مشاهدة النسخة كاملة : [بورديم دجاج بس في الكوشة] من مطبخ علياء السلفية



علياء السلفية
11-29-2012, 11:10 PM
السلام عليكم ورحمة الله وبركاته,,,

معروف عندنا انه البوردين يجي في حفرة في الارض , بس هدا اسهل يكون في الكوشة وطعمه حلو وصحي


المكونات :

دجاجتين كاملتين او مقطاعت يعتمد على دوقك والطاجين المتوفر عندك

(ادا كان حوافه عاليه تجي فيه الدجاجة كامله وادا كان قصير الحافه قطعي الدجاج)

ملعقه طاعم ونص ملح وطبعا عينك ميزانك, ملعقتين طعام توابل خاصه بالدجاج,

ملعقة طعام فلفل احمر, اكليل , خمس فصوص توم , ربع كوب زيت زيتون

. وادا ماعندكش توابل دجاج استعملي توابلك المفضله

وبالنسبة للرز وتتبيلته :

تحتاجي اربع الى خمس اكواب واكيد حسب حاجتك ,اربع طروف

بصل يابس, قرنين فلفل اخضر او تلاته , بازيليا , تلاته طروف طماطم

اخضر , اربع طروف بطاطا بدون تقشير وكل الخضرا قطعيها دوائر

بالعرض .ونفس التوابل الي حطيناها للدجاج نستعملوا نص الكمية

للرز والخضرا. (وحطي زبيب وعوينة ومشمش مجفف ادا تحبي)

بالنسبه للطريقة :

نبدوا بالدجاج اغسليه بالمية والليم (بدون ما تطبخيه عشان تركب عليه

التوابل كويس) خودي كل الخلطه ماعدا الزيت والتومة خلطيهم في

صونية وبعدها خودي الدجاج وادعكيه بيهم كويس وبعدها صبي زيت

الزيتون في الطاوة (المقلاة) بس ماترفعي الحرارة هلبا لان زيت الزيتون

مايتحملش الحرارة القوية وحطي الدجاج بعد تتبيله كويس بس ماتخليشي

يطلع اميته يعني تكون الحرارة كافيه انه يتحمر من برا بس تشويح فقط بدون

ما يطيب من داخل لانه حيكمل تطييب في الكوشة بس لانه بدون جلد لازم

نحمروه ونعطوه اللون المطلوب والي تحبيه .وبعد ما تكملي تحميره حطي عليه التومة .


طريقة الرز :

خودي الرز حطيله شوية زيت زيتون( وخلطي معاه الفواكه المجففة ادا

تبيها اني ماحطيتهاش ) , تبلي الخضرا كلها وبعدها ستفي البطاطا من

تحت بحيت تبطن الطاجين وبعدها حطي الرز وغطيه بالخضرا كلها وبعدها

ستفي الدجاج وصبي حوالي كباية ونص مية ويعتمد على نوع الرز صبيها

من جيهة الحاشيه متع الطاجين وبعدها غلفي بالسلفر وللكوشة طول .ياخد

ساعه ونص اكتر او اقل عشر دقيق اهم شئ اول ماتفوت ساعه افتحي وشوفي .


http://www.libyan-kitchen.com/gallery/images/photo21.jpg

http://www.libyan-kitchen.com/gallery/images/photo2asa.jpg

http://www.libyan-kitchen.com/gallery/images/photo1mkm.jpg

http://www.libyan-kitchen.com/gallery/images/photo11.jpg

نسمه ليبيه
11-30-2012, 12:08 AM
طريقتك عجبتنى وفكرتها جديده
بس اختى عليا اتبعى قوانين المنتدى فى انزال الموضوع عشان المشرفات مابحذفوش موضوعك
بانتظار المزيد من اطباقك

علياء السلفية
11-30-2012, 12:24 AM
بارك الله فيك وخيتي على مرورك وتعلقيك الطيب , نبهتيني لاني مخالفة شئ بس مافهمتكش ياريت تقوليلي شني هو , او ادا ممكن الادارة يعدلوا الشئ المخالف !!

رميساء
11-30-2012, 01:14 AM
السلام عليكم
بارك الله فيك أختي علي الشرح والصور
شرحك ممتاز بالصحة والعافية عليكم
جاري التقييم

نسمه ليبيه
11-30-2012, 01:24 AM
من عيونى علياء شوفى الرابط


http://www.libyan-kitchen.com/kitchen/showthread.php?474-%C5%DA%E1%C7%E4-%C5%CF%C7%D1%ED-%DE%E6%C7%E4%ED%E4-%C7%E1%E3%D4%C7%D1%DF%C9-%C8%C7%E1%E3%E6%C7%D6%ED%DA-%DD%ED-%C7%E1%E3%D8%C8%CE-%C7%E1%E1%ED%C8%ED

علياء السلفية
11-30-2012, 02:31 AM
وفيك بارك الله رميساء, وكدلك نسمة ليبيا فهمتك وتقريبا عدلت المطلوب ممكن الصور المفروض يجوا كبار قعدوا صغار .

مغتربة 7
11-30-2012, 03:31 AM
http://www.libyan-kitchen.com/kitchen/attachment.php?attachmentid=1127&d=1354220389

حي عليا عيوني طلعوا بجديااااااااااااااااااااات قلبي الصغير لا يتحمل

بسم الله ماشاء الله لاقوة الابالله
يمييييييييييييييييييييييييييييي
دجاج يجنن ورز ياخد العقل
بجد سهفتيييييييييييييييني فى ها الليل
وان شاء الله انجرب طريقتك
تسلم الايادي المبدعة
موضوع رااااااااااااااااااااااااائع ويستحق التقييييييييم والنجوم كلهم


حبيبة ياريت تكتبي اسمك على الصور حفظا لحقوقك
بشوية بشوية راح تتعلمي كل شي على المنتدى
فى انتظار المزيد من ابدااااااااااعاتك:)

لوتي
11-30-2012, 11:56 AM
ماشاء الله تبارك الله عليك علياء رز يفتح النفس ومنظره مش عادي تسلم إيدك وزي ما قالت مغتربة7 إكتبي اسمك واسم المنتدى علي الصور حفظا لحقوقك وتصغري الصور شوي أهلا بيك بينا وليك التقيييم تستحقيه
س- شن هيا بهارات الدجاج يعني من شنو متكونة؟

علياء السلفية
11-30-2012, 12:45 PM
الله يسلمك وخيتي مغتربة وبارك الله فيك ع التنبيه ,الله يبارك في وخيتي لوتي وبالنسبه لسؤالك بهارات الدجاج فيها منها انواع اني الي عندي من ايران . بس موجودة في ليبيا في المحلات وهي عبارة عن تتبيله مشكله حسب نوعها يعني فيها كسبر وحبهان وقرنفل وجوزة الطيب وفلفل اسود وشوية كركم حسب نوعها فيه الي تكون خاصة بالبرياني وفيه الي خاصه بصالصه المصاله بس زي ماقتلك ادا ماتوفرتش ديري الفلفل الاحمر وحطي توابلك المتوفره الا كمون الحوت لانه حيغير الطعمة.وتاكلي بالصحة ان شاءالله

luba
11-30-2012, 02:21 PM
بسم الله ماشاء الله
ربي يعطيك الصحه علي الطبق اللي مش عادي
ويستحق التجريب ان شاء الله
بس عن جد تحفه طااااالع من ايديك
وتم التقييم ليك وللموضوع
واني معزومه مع مغتربه 7 هلبه فيها هدا هيا وصغارها
والا شنو غي غي يادوب يسد
المهم عزيزتي شكله عندك خلفية مليحه علي البهارات
عندنا موضوع في التجارب والفوائد تصوير والتعريف
بي بهاراتك اللي في بيتك
فياريت تشاركينا ونكون لك من الشاكرين لنستفيد وخاصه في البهارات
ويالوتي لو من طرابلس في سوق التلاتاء الحديت وين مايبيعوا في اللحم
تلقي غادي فازوات صغيره مكتوب عليها بهارات الدجاج الليبيه الهندية
وانواع هلبه جربته وحاجه مش عادية بكل
غير من ريحته ساااااد
ةهدي صونيتي معزومه مع مغتربه وصغارها محد ياكل معانا يادوب

http://www.libyan-kitchen.com/kitchen/attachment.php?attachmentid=1127&d=1354220389

علياء السلفية
11-30-2012, 02:32 PM
حياك الله اختي لوبا , ياريت نقدر نوصلهولك انت وكل البنات تستاهلوا , خلاص بادن الله نخش عالموضوع متع التوابل ونشارك ادا قدرت . وادا في طرابلس زي ماقلتي انت في سوق التلاتاء وحتى الدالي وسوق المهاري موجودة فيه البهارات الهنديه

om_adnan
11-30-2012, 02:40 PM
سلم إيديك علياء,بورديم إيجى فى الخاطر,صحتين وعافيه.

أم أيوب
12-01-2012, 02:45 AM
ماشاء الله علياء أكثر من روعة

تستحقي التقييم عزيزتي

ومن بعد اذنك كتبت اسمك على الصور وعاودت تحميلها عشان ماحد يسرق مجهوداتك

ربي يحفظك

علياء السلفية
12-01-2012, 05:48 PM
السلام عليكم ,,

اختي امي عدنان الله يسلمك ويعافيك بارك الله فيك ع المرور الطيب .
وكدلك اختي ام ايوب ربي يحفظك ويبارك فيك شكرا على اهتمامك.

حبيبتهم
12-01-2012, 08:25 PM
ماشاء الله تسلم ايديك على احلى دجاج

جاري التقييم

الصابرة
12-02-2012, 02:20 AM
سلم إيديك علياء
بورديم إيجى فى الخاطر
صحتين وعافيه
ولك احلى تقييم وجاري التطبيق اكيد

نسيبة
12-03-2012, 11:36 PM
تسلم الايادي غالية لك احلى نجوم مباش يمشي التقييم طريقة رائعة

حماك الرحمن

علياء السلفية
12-09-2012, 02:11 AM
السلام عليكم ,,, بارك الله فيكم حبيباتي وسامحوني مارديتش لاني معاش خشيت اليومين هادوا

أمـ ساره
12-09-2012, 05:55 PM
ماشاء الله وخيتي علياء بور

ديم ايهبل ويجي في الخاطر

سلمت ايدياتك المبدعة على الطريقة والشرح المفصل


نبي نسألك على الرز نحسه هلبة لو قعد في الكوشة ساعة أو أكثر

الا لو كان الحبة الطويلة صح أو لا


وتستاهلي التقييم لك وللموضوع اللذيذ

بنت حواء
12-09-2012, 06:30 PM
اممممممم يشههههههههي
يشبه المندي بس أسهل وأكيد طعمه روعة
تسلم يديك ولك أحلى نجووووووم

sweet nona
12-13-2012, 08:58 PM
جيت متأخرة خساارة..لكن وصفة مش عادية

ممممم ريحته وصلتنى بجديات طريقة جديدة من ايديم مانعدمها

واحلى تقييم

المصراتيه
12-27-2012, 01:08 AM
ماشاءالله لا قوه الا بالله
يههبببببببببل وعجبني خصوصا منظر الدجاج وهوا كامل
يعطيك الصحه وتسلم يدياتك
وليك احلي نجيمات

samira
01-09-2013, 01:00 AM
تسلم الايادي

علياء السلفية
04-16-2013, 11:10 PM
بارك الله فيكم ع المرور الطيب والتشجيع انا ليا فترة طويلة معاش خشيت المنتدى @نسيت كلمة المرور للمرة التانيه @

بنت الاشراف
04-17-2013, 12:45 AM
سلمت يداك

أم عبادة الليبية
04-17-2013, 02:42 AM
فعلا طريقة حلوة ومميزة وجديدة , سلمت يداك علياء , وتم التقييم .

http://www.libyan-kitchen.com/gallery/images/photo21.jpg