[استفسار] عن وجبات الأطفال في عمر العام

[أمة الله]

السلام عليكم
بالله نبي منكم مساعدة أنا أم جديدة بنتي عام معش عرفت شن انوكلها في الفطور معش تبي تاخد الزبادي والجبنة والبسكويت وهي ترضع طبيعي ولا تبي الفواكه
والغداء مانعرفش الا المكرونة والرز والبرودو وشربة العدس الا كرهتتها نتمناكم اتساعدوني

[ميرولاكى]

وعليكم السلام ورحمة الله وبركاته
ربى يحفضلك بنوتك ويخليها لك
بالنسبه لعمر العام ماشااااااااء الله كبرت وتقدر تاكل كل انواع الخضار وكل انواع الفواكه وحتى حصص من اللحوم
اهم شى تكون خاليه من الملح والتوابل القويه يعنى مجرد التنكيه باعشاب طبيعيه
وبالنسبه لافكار الفطور
ممكن الحليب بالفواكه_او حبوب الكورن فلكس ومنها انواع ممكن تشكليلها اسبوع بالشوفان واسبوع بالقمح واحيانا قليله بالشكلاطه
وممكن مهلبية الشوفان حلوووووووووه بالمره على الفطور ومغذيه وتشبع بنتى كانت متعوده عليها وتحبها وااااااااجد
ممكن توست بالزبده والمربى او بزبدة الكاكاويه مغذيه جدااااااا
ممكن بيض مقلى بس بالخضار يعنى ممكن اومليت ضيفيله بازلاء او طماطم وجبن او بطاطا يعنى زى العجه بس بدون دهن يادوب قطرات
ممكن تحببيها فى الفواكه بتقطيع فواكه ملونه وضيفيلها عليها الياغورت او حتى بعصير برتقال
والله الافكاااااااااااار وااااااااااااااااااااجد وان شاء الله نكون فدتك ولو اذكرت حاجه تانيه نكتبلك ان شاء الله

[أم خديجه]

بارك الله فيك ميرولاكي افكارك رائعه تسلمي

اختي امة الله الاخت ميرولاكي قالت لكي افكار ان شاء الله تستفيدي منها

بنتك في عمر بنتي اتحب التنوع ونيتها مش مطلوقه لاكل واجد وما تقدرش اي شئ فيه حليب دائما محتاره معاها
فطور الصبح انيرلها في سحلب القصب خداته فترة و تو غيرتلها علي الكورنفلكس او الشوفان وانحليلها فيه بالسكر مخلط بالماء

ومرات بيضه مسلوقه تاكل منها اشوي
قطعة خيار او قطعة فطاحه
من الفواكه تاكل في البرتقال مش كل البرتقاله بس الي تاخده منها نعتبر فيه كويس قطعة مانجو
الغداء
نعطي فيها في سمك قطع جزر مسلوق في مرقة دجاج اتحب تاكلهم بروحا انحطلها في الصونيه ونعطي فيها ملعقة و اتحوس فيها الطفل لازم تخليه يعتمد علي نفسه مع المراقبه
اسلقيلها اي نوع خضرة واعطيها وضوقيها اكلكم انتم

ان شاء الله تستفيدي

[الصابرة]

ماشاء الله الامهات ماقصرن

[أمة الله]

أختي ميرولاكي بارك الله فيك أن شاء الله انجرب لكن عندي أسئلة
الحليب إلا بندير بيه المهلبية وبنديره مع الفاكهة متاع الأطفال البودرة أو ألا نأخدو فيه المحلى
وبالنسبة لمهلبية الشوفان كيف الطريقة والكرون فلكس عادي يعطى للعمرهم عام بارك الله فيك على الأفكار فعلا استفدت منها

أم خديجة ربي يحفظلك بنتك فعلا السحلب مابتش تأخده بكل بنتي ولا البيض المسلوق ولا البشكطي متاع بلاسمون وشدا غير الخبزة وتبيه فأضية
شك أختي ألصابرة

[ميرولاكى]

السلام عليكم
بالنسبه للحليب اكيد المخصص لعمرها انا بنتى لحد العامين نستعمللها فى الحليب المخصص لعمرها
ومهلبية الشوفان سبق ونزلتها فى المنتدى وهذا الرابط ان شاء الله تجربيها وتعجبها العسوله

http://www.libyan-kitchen.com/kitchen/showthread.php?6908-%E3%D4%C7%D1%DF%C9-%E1%E3%D3%C7%C8%DE%C9-%C7%E1%C7%DD%D8%C7%D1%C7%E1%D5%C8%C7%CD%EC-%C7%E1%DA%C7%C6%E1%EC-%E3%E5%E1%C8%ED%C9-%C7%E1%D4%E6%DD%C7%E4-%E3%E4-%E3%D8%C8%CE-%E3%ED%D1%E6%E1%C7%DF%EC&highlight=%E3%E5%E1%C8%ED%C9+%C7%E1%D4%E6%DD%C7%E4

والكورن فلكس اكييييييييييد عادى ماتخافيش اهم حاجتين انه يكون بحليبها الخاص وتانى شى تاكد انه ترطبت الحبوب قبل ماتعطى ليها

وان شاء الله نكون افدتك واى سؤال انا حاااااااااااضره لانى حاسه بيك حتى انا بنتى الاولى بس لانها توا عامين فخبرة فالعام الاول لانى هبلت دكتورها وانا ماشيه جايه عليه بالاسئله وهدى كلها المعلومات منه

[أمـ ساره]

ماشاء الله الاخوات ما قصروا بارك الله فيهن

حتى اني بنتي في عمر السنة توا ونعاني معاها هلبة

مشكلة الاطفال ما يحبوا الروتين أبداً يعني لازم التنوع والتغيير


بنتي كانت تحب الزبادي هلبة وكل ما تشوفه ما تاكله الاهو وتسيب أي شيء

بس حالياً ننوع لها كل مرة حاجة على الفطور


جبنة شرائح بدون خبز أو موز أو زبادي أو قشطة أحيانا مع شوية عسل وخبزة

ونعطيها التونة كويسة حتى هي هو يفضل سمك بس دائما حسب الموجود

وأحيانا تتقبل الجبنة البيضاء

وأيضاً الكورن فليكس نعطيها فيه مرات بدون حليب

والفواكه تحب البرتقال بأنواعه والكمثرى وخاصة الايطالي وأحيانا التفاح


وجربي ديري لها فروبي أو عصير فواكه طبيعية بنتي تحبه هلبة والحمد لله

وجربت اعطيتها العصيدة بالرب وبالعسل ما قبلتها هلبة


بالنسبة للغذاء أو العشاء

الحمد لله متقبلة اللحم والدجاج ونحاول نعطيها تطيبنا العادي حتى ما اتعبني زي أختها الكبيرة

وتحبها بصراحة عندها أفضل من باقي الأكل

جربت مرة شوربة الشوفان والخضار لحورية المطبخ وبصراحة بناتي الـ 2 حبوها

وحتى أمهم لأن طعمتها روووووعه





وربي يعينك حبيبة لأني مجربة بنتي الكبيرة تعبتني هلبة

ممكن بدت تاكل بعد السنتين قدرت ندير لها وجبات

لكن طالما بنتك ترضع طبيعي فهذه حاجة كويسة وفي صالحك ولله الحمد

يعني حتى لو ما كلت هلبة يا دوب اذوق الحاجات فتفرحي بيها أكيد

وربي يحفظها لك يارب ويفرحك بيها وتشوفيها عروسة

[أمة الله]

أختي أم سارة نشكرك على ردك لكن انبهك على العسل في عمر العام ماينعطاش لأنه خطير ويسبب مشاكل ابحتي عليه وشوفي