زعلانة هلبة منكن وخياتي

[الصابرة]

السلام عليكم

الحق ترددت كثيرا في كتابة هذا الموضوع لكن معاش اقدرت انتحمل

لينا فترة منزلين مسابقة المعجنات في الركن الليبي والعالمي

لكن المشاركات بصراحة قليلة ولعضوات معروفات بارك الله فيهن

يعني معقولة من 250 واكثر عضوة نشيطة لانجد الا ممكن 4 عضوات هن اللي اكثر تفاعل في المسابقة

معقولة نحن الليبيات مانديروش في معجنات حتى ولو في الاسبوع مرة لا اعتقد ذلك

لان المعجنات اصبحت من الشئ الضروري في مطبخنا الليبي

هل تعلموا ان نحن المشرفات صار لنا احباط

وكنا نجهزوا لمسابقات كثيرة ومتحمسين

يعني كانت في ركن الحلويات الليبية في مسابقة للحلويات الليبية بشكل جديد

وفي الحلويات العالمية كانت في مسابقة للحلويات المكسرات والحلويات الباردة

وركن الاطباق الرئيسية مسابقة للصلصات

والمقبلات كان بتكون في مسابقة

هل عرفتم مانحن كنا نجهز له وهذا كله ليس الغرض منه الا الفائدة لكن ولنا

وخصوصا لم يتبقى سوى شهور معدودة على شهر الخير رمضان الكريم

لكن وبهذا الوضع سوف نتردد الف مرة قبل عمل اي مسابقة

واتمنى ان تتقبلن كلامي هذا برحابة صدر

اختكم في الله الصابرة

[أم خديجه]

عندك الحق اختي الصابرة
الحماس في المسابقه هذه اقل بكثير من المسابقات السابقه منذ اشتراكي في المنتدي
حتي من غير المسابقه الرد علي المواضيع والتفاعل فيهن قليل جدا واعضاء معينين و معدودين مش بجهد ووقت صاحبة الموضوع
والفتره هذه تناقص العدد هلبا
ان شاء الله البنات يتفاعلوا اكثر من هكي لرقي بالمنتدي
وبارك الله فيكن انتن المشرفات علي المجهود الاكثر من رائع

[حبيبتهم]

اهلا بالصابرة
السبب واضح جدا غياب عدد من العضوات وبالذات المشرفات اكثرهن غايبات
اكيد كل واحدة بظروفها وان شاء الله يرجعن قريبا

[الصابرة]

مشكورات وخياتي ام خديجة وحبيبتهم
فعلا عندكن حق في هلبة عضوات ومشرفات غايبات كل وحدة وظروفها ان شاءالله ربي يرجعهن بالسلامة
لكن انا عتابي الاكثر على العضوات التي تدخل لا رد ولا حتى مشاركة
نحن مانجبروش في حد يشارك بالغصب لكن الامانة تتدعي انهن مثل ما استفدن المفروض يفيدوا غيرهن
لكن هيا ان شاءالله الجاي احسن

[barney]

السلام عليكم ورحمة الله وبركاته
يا الصابرة كلامك ما ايوجعش واني ندخل لكن والله ما نفتحش عالطبخ اكثر شيء صالون الضيافه
وذلك بسبب ظروفي اعذريني وان شاء الله لما انصح بإذن الله انشارك كيف قبل واكثر
بارك الله فيك ع حماسك ونشاطك ان شاء الله ربي اينولك مافي بالك يارب

[luba]

بارك الله فيك صبورة علي الموضوع

واني خاطري ناخد ميكريفون وبصوت عالي في اودانهم

اللي ياخدو و ما يشاركوا اللي يوجعك ياخدوها من اهني

ويرفعوها للمنتديات العربية ولصفحات الفيس بوك وينسبوا في الوصفه لارواحهم وهنا الكارته الاكبر

وهما ليبيات والاولي بيهن منتدي ليبي لرفعه للعالي بدل مايرفعوا منتديات عربية منافسة وهي مرفوعه حتي بلاهن

حاجة الحق تكسر في الرقبة وتفلفص فيها

لو كان معارضين علي اسمه لانه الكتير معارض علي انه يصحبه اسم زينب محمد خلونا واضحين احسن

بس زينب هيا اللي تاعبه فيه من حيت انه مش مجاني وماحد يساعد فيها فيه ومن حيت الاعطال الفنية والمشاكل

الكبيرة والصغيرة من وراه

ومن غير الضغط عليها في مراقبة سير العمل ومسايرة الناس علي حساب المنتدي

وليها الفضل الكبير جدا جدا علي كل النسوان اللي فاتحات صفحات خاصة بيهن علي الفيس

اولا شجعتهم وتانيا ياخدوا منها في وصفاتها وياخدوا عليها 200 و 300 لايك وهيا نسخ لصق من زينب

وغير هدا تعلمتوا منها الكتيييييييير اللي ماتعلمتوه في بيوتكم

والحق لا احد يضاهيها في عالم النت خاصة في الاكل الليبي بالتحديد

في طبخها وتقديمه لكم بامانه وصدق و الشرح المفصل من القلب

فيستحق ان تسميه المطبخ الليبي لزينب محمد

ولي الشرف الكبير في العمل معها وربي يجعله في موازين حسناتها

واللي يرد ويشارك مايفكر في الاسم ايفكر في منتدي المطبخ الليبي اللي فتحاته لكل الليبيات

وزي ماقالت الصابرة كل كلامها تعزف فيه علي الوتر الحساس قمة الاحباط المشاركات

الا من البعض فبارك الله فيهن وفي بيوتهم وفي عائلاتهم وربي يباركلهم في وقتهم وجهدهم

معا يدا بيد كانوا دائما والبعض نعرف انه يشارك وهو يتوحم وتاعب من الحمل ربي يقومكم بالسلامة

نتمني التفاعل ولو ببارك الله فيك نسخ لصقلانه بردرودكم يرفع المنتدي في محرك البحت قوقل

وفي موقع اليسكا المقيم للمنتديات نتمني رفع المنتدي والمشاركة ورفع معنوياتنا للعطاء اكتر واكتر لكم ولنا

مشكوووووووووووووورة صبورة علي الاقل خليتيني انفس علي روحي في المكان المناسب خير من نتفجر سلامي

[أم عبادة الليبية]

والله ياصابرة ولوبا كلامكم صحيح , وربي يعينا على الرفع من مستوى المنتدى .

أنا عارفة إنه مقصرين هلبا , وأنا وحدة من الناس اللي نعترف بتقصيري , والسبب إن صغاري ما شاء الله 3 وأنا متزوجة ليا أربعة سنوات فقط يعني على بعضهم .

فنحاول حتى كان ماشاركت بمواضيع من مطبخي إني نشكر إلي يشاركوا وندعمهم ولو بكليمة , وربي يعيني الفترة الجاية انزل أكثر من مشاركة .

وبالنسبة لعنوان المنتدى هذا من حق الأخت زينب لأنها هي من أنشأته لاخلاف , ومن قال يكون في منتدى اسمه منتدى المطبخ الليبي , إلا بفضل الله ثم بجهود هذه المرأة عالية الهمة والطموح , نسأل الله أن يرفع قدرها في الدنيا والآخرة.

وعذرا على الإطالة أخواتي .

[نسمه ليبيه]

والله يالصابره بتتعبي وانت تحكى

هذوما نحن نحبوا ناخذوا ومانعطوش

نصيحتى ماتعبيش نفسيتك وخلى شغلك لله

[زهرة الحبق]

السلام عليكم انا بصراحة الي الان ما نعرف نزل الصور وظروف الحمل والولادة ومابعد الولادة ماخلتني الي الان نتعلم ولازم الواحد يفيدو يستفيد وكلام الاخت لوبا صحيح ويقولو وصفاتنا سارقتهم صفحات اخري وهما في الاساس وخدينهم من المنتدي

[أمـ ساره]

صبورة يا حلوة كل شيء ولا زعلك أكيييييييييييييييييييييييد

وربي يبارك فيك وخيتي وكلامك كله صح 100 % ومعاك كل الحق




لوبا يا حلوة

وسعي بالك وخيتي وزي ما قالت لك نسمة هذوم متعودين ياخذوا بالساهل وما يحبوا التعب

وياريت يقدروا تعب وجهد غيرهم وياما تكلمت لكن للأسف ما نلقى الا الحظر منهم

فما فيه كلمة الا حسبنا الله ونعم الوكيل




بالنسبة لي انتم عارفات ظروفي وادعوا لي ربي يسهل عليا ويشفيني يارب

وباذن الله نحاول نشارك على الاقل بمواضيع جديدة أو تطبيقات

عندي صور لكن ما عندي وقت نعدلهم وأول ما نحصل وقت نقعمز على صفحة الفيس

وطبعاً مع النت الايام الاخيرة حالة عندي يفصل هلبة ومرات المتصفح يقول لي غني ما بينزل شيء

سامحوني يا بنات على التقصير وادعولي


وياريت تدعوا لزينب بالشفاء وربي يتمم عليها بالصحة ياااااااااااااااااااااااارب

اعتقد تستحق منكم الدعوات ولو بظهر الغيب وخياتي

[luba]

يارب يا ام الحلوات يا ام ساره يشفيك واحني عارفين ظروفك اكيد

وربي يعطيك الصحة والجهد لرعاية بناتك وزوجك يااارب

وزينب ربي يشفيها ويعافيها ياااارب ودعواتنا ليها في كل وقت


وترجع لينا بخير ياااارب انت وياها وتنورونا اكتر من قبل

ام ساره ماتضغطي علي روحك وانت عارفه انه الكلام موجه للعضوات

وتقصير من البعض وليس الكل ربي يهديهم ياااارب

[om_adnan]

عندكم الحق ومنكم السماح.

[أمـ ساره]

الله يسلمك ويبارك فيك لوبا

وصحيتي على كلامك الحلو حبوبة

والله العالم نتمنى نرجع زي قبل وأحسن لأني استاحشتكم هلبة هلبة

وتوا ندير في دورة على الاقسام ونعدل الي نقدر عليه



وربي يشفي زوبة يااااارب عاجل غير آجل


ربي يعطيك ما تتمني لوبا وعلى قد نيتك الطيبة وخيتي
ويفتح عليك يارب ويرزقك من أوسع أبوابه

[دانية]

تسلم الصابرة على طرحها المميز لهذا الموضوع ...وكل وحدة شاركت انحيي فيها روح الحماس للمنتدى اللي بصدق كلنا استفدنا منه...

وانا نبدأ بنفسي عارفة روحي مقصرة بس واللهي على قد ظروفي اللي ربي عالم بيها انحاول اني حتى نرفع معنويات الاخوات اللي منزلات مواضيع وتعبانات فيهن ...
مع انه ظروفي مابين الحمل وصغاري وقرايتهم والامر والادهى قرايتي حتى انا .. لكن الحق يقال لايمكن نكران فضل هالمنتدى الرائع علينا بعد فضل الله طبعا نتمنى له كل الاستمرارية المتوجة بأحلى عطور النجاح والتميز...

[الصابرة]

مشكورات وخياتي كلكن على الرد وعلى البوح بمكنون خواطركم ولم تهملوا موضوعي
واني الحق ماقصدت بكلامي اللي ترد حتى بكلمة شكر او تساهم هذين حشى لله ان انكر فضلكن على رفع المعنويات سوى بشكر او مشاركة
لكن اني نقصد وخياتي وسامحوني في هذا التعبير الميتات من كل شئ الضمير والمحبة والاهتمام والعطاء
والله اني لما نصفح وصفة في موقع اجنبي او على الفيس انقول لازم انديرها وانصورها وانزلها لكم
وخصوصا كان هي حلوة عشان الفايدة تعم علينا لان عندنا اخوات لايملكون حساب على الفيس بوك
ورغم اننا لايمكننا هنا ذكر الاشخاص على حسب قوانين المنتدى لكن نقول ان هذه الوصفة من تجولي في النت يعني لا انسبه لي
والمشكلة اني اجد اخوات كثيرات واخذات وصفات بحذفيرها زي ماقالت لوبا
لكن عادي ربي كبير
لكن اللي نبيه اننا انحاولو نبذلوا مجهود اكثر حتى يرتفع المنتدى
على الاقل حتى لما صاحبته ترجع ويزيده الله من الشفاء نكون قد احسنا في حمل الامانة والارتقاء بها
وقبل ان يكون منتدى زينب فهو المنتدى الذي استفدنا وزدنا خبرة منه وتعرفت فيه على اروع واحلى واجمل وانقى اخوات لي في الله مثلكن فربي يحفظكن
وهيا معانا نحن وكل المشرفات يد بيد لنرتقي بمنتدانا الغالي

[نسمه ليبيه]

يسلم بؤك

[الصابرة]

الله يسلمك نسومة

[أم خديجه]

ان شاء الله ربنا يوفقنا جميعا للعطاء بحب و اخلاص

[الصابرة]

ان شاءالله

[زوبة الطيوبة الحبوبة]

السلام عليكم ورحمة الله وبركاته
ربي يشفيك يازينب ويشفي كل مريض عاجل غير اجل ... والف الف شكر لكل من تعبت وتتعب باش تقدملنا مانستفيدو منه واختي الصابرة الحق معاك في كل كلمة قولتيها
وسامحوني يابنات لاني ماعنديش مشاركات مع اني من هواة الطبخ ونحب نتعلمه والحق استفدت من المنتدى هذا هلبا وبارك الله في كل من اعطت وتعبت وتعطي وتتعب على خاطرنا
وانا ليا قريب شهر مادخلتش المنتدى علشان ظروف علاج والدي ووالدتي بالخارج بالاضافة الى مسؤلياتي في العائلة بالكامل والى ظروف عملي في المصرف واللي مع
زحمة الطريق نوصل للحوش الساعة 4.5يعني يادوب الدوب
والحق نحاول نشجع كل المشاركات وحتى لو فيه وصفة نفكر ننزلها راهو الحق وبصوت عالي مازال مانعرفش انزل اي موضوع
وحقكم عليا اني نساهم بالتشجيع لاي موضوع وسامحوني مرة ثانية.. وجزاكم الله كل خير على كل مساهمة وموضوع نستفيدوا منه وجعله في ميزان حسناتكم ...

[الصابرة]

مشكورة اختي زنوبة
وربي يساعدك ان شاءالله ويشفي والديك يارب
احني وخيتي لومنا على اللي حتى بكلمة باخلين باعطائها
لكن انتي ديمة تشجعي في اخواتك وربي يحفظك
وتوا نبعت ليك روابط تساعدك زي ماساعدتنا على كيفية تنزيل الصور وعمل موضوع في المنتدى
لان نبو همتك معانا في الشهر الكريم

[زوبة الطيوبة الحبوبة]

ربي يطيب خاطرك ياصبورة على هالكلام الطيب ويعطيك كل ماتتمني
لانه في اغلب الاحيان الكلمة الطيبة تداوي الجروح وترفع المعنويات

[ام ساره وعبدالعزيز]

انا نعترف بتقصيير لكن والله يابنات شريت تلفون جديد وكل مرة نقول لرجلى ساعدنى في تنزيل الصور كل ىوم بة بكرة بعدة لعند ماهلبتنى المسابقة وتوا لاهية في حوسة رمضان تنضيف وتنكيد ونفكر نزل موضوع خاص بالشهر الفضيل سامحينى صبورة وربي يعطيك الاجر
حبيت نسال على زينب لاباس شن فيها ياريت اطمنونى عليها