[ مشاركة تشجيعية في مسابقة تجهيزاتك المطبخية لشهر رمضان والعيد] أدوات منوعة من مطبخ أمـ ساره

[أمـ ساره]

السلام عليكم ورحمة الله وبركاته


http://www.libyan-kitchen.com/gallery/images/tool.gif


بعد غيبة طويلة اتمنى تسامحوني عليها ولكن الظروف أقوى مني

حبيت نشارك معاكم ببعض الحاجات هي بسيطة ولكن حبيت نترك بصمة في المسابقات


مجموعة أدوات عادية جداً لكن نحتاجوها في المطبخ في رمضان وفي سائر الايام طبعاً


بسم الله نبدأ


http://i1159.photobucket.com/albums/p637/the_faithe/adawat.gif

http://i1159.photobucket.com/albums/p637/the_faithe/adawat1.gif

صفاي بلاستيك عملي ومرات أفضل من الالمنيوم من حيث الصدأ وأيضاً التفاعل

يعني نحط فيه الخضرة واني مطمنة

والادوات من اليمين

مجموعة أقماع عددها 3 وبأحجام مختلفة

وبعدها أقماع للمعجنات عندي قبل 3 وزدت 2 حتى صار عندي 25 قمع

والي بعدها حفارة الفلفل الحلو لنزع اللب تنفع للمحشي

والي بعدها أداة فصل البياض عن الصفار

وآخر شيء فازو (برطمان) بلاستيك للتوابل والبهارات

وعلى فكرة كل الي في الصورة نفس السعر بدينار بس (مش المجموعة كلها القطعة بدينار )

وخيتكم طاحت في محل ياسلام وما قصرت كالعادة لأني من قبل لقيتهم بأسعار أكثر



http://i1159.photobucket.com/albums/p637/the_faithe/adawat5.gif


وهذه أيضاً بدينار وقبل خذيت منهم بس تشكيلة ثانية وبسعر أغلى

وعلى فكرة مش تقول النوعية أو الجودة تفرق بالعكس نفس الشيء غير الاسعار مختلفة



وهذا المترد من نفس المحل لكن سعره 3 ونص دينار

http://i1159.photobucket.com/albums/p637/the_faithe/adawat7.gif

http://i1159.photobucket.com/albums/p637/the_faithe/adawat6.gif


والحاجات الجاية من محل ثاني مش نفس الاول وأسعارها المعروفة


http://i1159.photobucket.com/albums/p637/the_faithe/adawat3.gif

http://i1159.photobucket.com/albums/p637/the_faithe/adawat2.gif

من اليمين

سلتين (سبات) بلاستيك للخبز بس اني خذيتهم لغرض ثاني



وهو وضع فازوات (أوعية) الزيت والخل والحاجات الي نستخدم فيها دائما ونحط فيها جنب الغاز

وبعدها حافظات 3 خذيتهم لصلصة البيتزا والهريسة ولصوصوات بشكل عام

لأن تسكريتهم حلوة ومحكمة ان شاء الله يكونوا واضحات

وبعدها صواني بلاستيك الي لونها وردي خذيت 3 منهم الوحدة بحوالي 2 دينار

وقوالب التارت عددهم 6 يجو مع بعض وسعرهم تقريبا 3ونص أو 4 الا ربع مش متذكرة بالضبط

والي بعدها قوالب الايس كريم عجبوني وخذيت منهم 2 وسعرهم حوالي 3 تقريبا مش متأكدة

والشنتروات الي تحت ان شاء الله يكونوا باينات خذيت منهم 4 وحجمهم متوسط ولنين ذهبي وفضي

وفرشاة صغيرة سيليكون لدهن المعجنات ولحاجات ثانية

وهذه صورة اوضح للسبات والشنتروات

http://i1159.photobucket.com/albums/p637/the_faithe/adawat9.gif



وهذه حافظة للطعام تنفع للكيكات ولبواقي الطعام

تسكريتها محكمة وفيها يد تقدري تمسكيها منها تنفع حتى للطلعات

وسعرها تقريبياً 8 ونص

http://i1159.photobucket.com/albums/p637/the_faithe/adawat4.gif




وان شاء الله لو فيه جديد يكون عندكم أكيد

ويارب حاجاتي المتواضعات تعجبكم

وسامحوني على التقصير

[الصابرة]

تتهني بيهم ام سرو
الحق عجبوني وقديش الحاجة البسيطة ادير فرق في مطابخنا وديكوراتنا
وعجبوني هلبة استخدامك لسلة البلاستيك حلوة

[زوبة الطيوبة الحبوبة]

تعيشي وتشري يام سرو وتبيديهم بالهناء
حاجات قنينة وتنفع في المطبخ
وكل عام وانت بالف خير..

[رميساء]

وعليكم السلام ورحمة الله

بارك الله فيك علي المشاركة
وعجبني (السبات)
مُبارك عليكِ الأدوات الجديدة
مشكورة
تسلمي

[رميساء]

تم التقييم

[أمـ ساره]

الله يسلمكن ويبارك فيكن وخياتي

ومشكورة على هلبة على مروركن السمح

وخلونا نشوفوا تجهيزاتكم حتى انتم زي ما عودتونا بالمشاركة

وشكراً على التقييم

[ترهونيه حره]

حاجات بسيطه ومهمه فى الطبخ
تبيديهم بالصحه والعافيه. وين
حصلتيه محل دينار ؟؟

[أم خديجه]

ما شاء الله
حاجات عمليه ورائعه
عجبتني حفارت الفلفل
ربي يهنيك ان شاء الله وتبيديهم بالهناء

[luba]

كالعادة حاجاتك حتي ولو بسيطة قنينة وحلوة
تبيديهم بالهني والصحة
ومشكورة عالمشاركة البسيطة بالنسبة ليك ولكنها مهمه بالنسبة لي
تم التقييم

[أمـ ساره]

الله يسلمكن ويبارك فيكن وخياتي

وشكراً لمروركن وكلامكن الطيب

ترهونية المحل هذا في مسلاته وتقريباً حتى في الخمس فيه



وشكرا على التقييم

[ام عيوشة]

رائعات جدا قعدت نضحك واني نتفرج والله نفس الحاجات خديتها اليوم هنشاء نصوموا رمضان بالصحة والهني
ام عيوشة

[شروق الشمس]

ماشاء الله حاجات حلوه تتهني بيهم

[مغتربة 7]

مشاركة رائعة زي صاحبتها
حاجات حلوات تتهني بيهم يارب
وتستخدميهم بالهني والعافية
جاري التقييييييييم

[أم عدى]

حلوات .... تبيديهم بالصحة و العافية
حلوات .... تبيديهم بالصحة و العافية

[ميرولاكى]

رايفنا عليك يا ام ساره
وماشاااااااااء الله تبيديهن بالهناء ياااااااارب

[أمـ ساره]

الله يسلمكن ويبارك فيكم وخياتي

وهيونكم الحلوة أكييييييييييييييييييد

شكراً لرودوكن الحلوة الي ترفع المعنويات



ميرولاكي

على فكرة انتي في بالي وكنت بنرسل لك

لكن الحمد لله اليوم شفتك معانا

[المصراتيه]

ماشاءالله حاجات مهممممه وحلوات كلهن
بنسالك علي الاقماع الطرف ب دينار ولا 5 مع بعضهن بدينار؟؟؟؟
تبيديهن بالهني ان شاءالله وكل رمضان وانتي بخير يارب
بارك الله فيك علي المشاركه الحلوه

[أمـ ساره]

اهلين ميمي

الله يسلمك وخيتي ويبارك فيك يارب

عيونك الحلوات يا حلوة

لالا الاقماع الخمسة مع بعضهم بدينار لأنها مسكرة

ومن قبل واخذتهم لكن أغلى شفتي النصيب سبحان الله

مشكورة على مرورك العطر

[زهرة الحبق]

حلوات والاسعار تمام تبيديهم بالهنا

[بنت حواء]

ماشاء الله ياأم ساره حاجات كلها حلوة وعملية ومهمة ومريحة
وأسعارها مغرية الحق ماشاء الله أنت وصبورة طايحين في محلات روعة
وحدة في مسلاتة ووحدة في زليتن شكلي بنمشي مخصوص هههههه
تسلمي ياحبوبة تتهني بيهم ان شاء الله
وربي يبلغك رمضان وأنت بألف صحة وعافية

[نورية المصراتية]

تبيديهم بالهني

[نسمه ليبيه]

تتهنى فيهم يارب

[بنت أبوها]

http://www.libyan-kitchen.com/kitchen/images/icons/icon1.png


ماشاء الله ولاقوة الا بالله