قائمة مشتريات رمضان ( المطبخ) للمرأة الليبية

[موودة]

السلام عليكم ورحمة الله وبركاته

رمضان ع الأبواب وكل سنة والجميع بخير وصحة وعافية

تحياتى لكل اخواتى فى المنتدى اللى ساعدونى من رمضان اللى فات

وبرمضان هذا نكون ان شاء الله سكرت معاكم سنة

واكيد استفدت وااااجد من هالمنتدى الرائع والعضوات الأروع ولكن منى خالص الشكر والعرفان

وانا توة الحمد لله ماشي حالى ... مش كل حاجة اساسية تعلمتها لكن فيه تقدم كبير

وبما ان هذا اول رمضان ليا فى حوشي فأكيد مش عارفة شنو اللى حنستحقلة ونحتاجله فى رمضان

من بقوليات وتوابل ومعلبات ومعجنات وغيرها من السلع المطبخية

http://www.libyan-kitchen.com/gallery/images/ghgghg.jpg

فأتمنى انكن تساعدونى فى كتابة قائمتى وحطو فى الأعتيار انى نبى نفتلك ونبدع
ههههههه :D (مدابرة روحى)

يعنى كل وحدة تكتب قائمتها عشان نستفيدو من بعضنا

ولكن منى خالص المحبة

http://www.libyan-kitchen.com/gallery/images/imagespkp.jpg


.

.

[luba]

اهلين مودة كيف حالك وينك ليك وحشة

وكل عام وانت بخير وربي يوفقك يارب

بالنسبة ليا ماعندي قائمة يعني الحاجات العادية اللي في كل الشهور نفسها

في رمضان بس نشريهم بزيادة علي خاطر زحمة السوق والحمو وين كنت في ليبيا


وعندك المختلف عليا التجهيز المسبق علي خاطر عدم التعب و الحوسه و التفرغ للعبادات

متلا زي الكسبر والمعدنوس تفرميهم وتحطيهم في حافظات بلاستك

مش نايلون لانه النايلون يخليهم لونهم اسود لازم بلاستيك

او تحضري وتغسلي مصارين وبطن الخروف تلقيهم واتيات لرمضان

و عندك الحمص ومغتربه 7 نزلت موضوع توا عليه في كيفية تجهيزه في ركن الافكار المطبخية

وعندك الكتير من الافكار الحلوة والتجهيزات المسبقة في ركن الافكار المطبخية

اما القائمة فهي نفسها زي كل الايام غير زيادة في الكمية فقط متلا الجبنة لو خديت

منها قبل طرف او اتنين انزيد العدد في رمضان و هكدا

واني الافضل عندي انت تشوفي شنو انواع الطبخات اللي بتطبخيهم

مرات في وصفة جديدة تكون فيها بعض الحاجات

الغريبه او الجديده عليك وتكوني دايره بالك علي مكوناتها بيش تتوفرلك في رمضان

ربي يسعدك ويحفظك وينور دربك

[موودة]

تسلميلي عزيزتى لوبا وعلى ردك الشامل والحلو

وانتوا ليكم وحشة اكثر حبيبتى

وكل سنة وانت طيبة يارب

وشكرا على فكرة المعدنوس والكسبر وحنديرهن ان شاء الله

وشكرا ع النصائح

ورمضان مبارك عليك وعلى اسرتك الكريمة يارب

[موودة]

وين قوائمكن يا صبايا؟؟؟

[أمـ ساره]

مراااااااااااااااااااااااااااحب بمودة الحلوة

نورتينا حبيبة وربي يهنيك ان شاء الله ويقويك

ليك وحشة كبيرة والله ياريت نشوفوك معانا قريب ةتنورينا بمشاركاتك


القائمة تعتد عليك انتي وعلى عيلتك شنو يحبو وشنو متعودين يطيبوا طبعاً


بس الحاجات الاساسية تقريبا والي اغلب الليبين يديروا فيها

تجهيز الخبزة المرحية والنعناع الجاف واللحم المفروم ولحم الشربة

والمعدنوس الاخضر ممكن تنظفيه وتقرضيه صغير وتحطيه في مكعبات الثلج

وتصبي عليه مية وتحطيه في الفريز وتستعمليه للشربة في رمضان

و ممكن تجففي الحبق والمعدنوس والكسبر

وأيضا لو تستعملي في الثوم ممكن تشريه وتحطيه في الفريز

والبنات ربي يبارك فيهم نزلوا هلبة طرق على طريقة حفظه


وطبعا حاجات الحلو زي البيكنغ باودر والفانيليا والكريما

واحاجت المحلبية زي النشا والكاستردا وجوز الهند والزبيب


واهم شيء الحمص تنقعيه وتكيسيه في الفريز للشربة وللمسقي بالبصلة لو اطيبوا فيه

وطبعا تقدري تجهزي صلصة البيتزا واطيبيها واتحطيها في الفريز على هيئة وجبات


ولو تفكرت شيء ثاني ان شاء الله نخش ونقولك

كن ننصحك ديري دورة في ركن الافكار وحتجيك القائمة بين ايديك


وربي يبلغنا رمضان لا فاقدين ولا مفقودين يارب العالمين

وكل عام وانتي بخير

[موودة]

عزيزتى الغالية ام سارة .. كيف حالك وشن اخبارك

وليك وحشة اكثر والله

وان شاء الله حنكون معاكم فى رمضان

وشكرااا جدااا ع النصائح الحلوة

واكيد حنلف ع المنتدى لأنه انتم وهو منقذينى :cool:

بارك الله فيك وكل سنة وانت طيبة يارب

[رميساء]

وعليكم السلام ورحمة الله

اللهم يبلغنا شهر الكريم بالخير وبركة
مودة هذه مجموعة من الأشياء

1- اللحوم مثل المفروم والدجاج ولحم الشربة
ولحم الشورما والمصارين

2- التوابل والأعشاب مثل القرفة والهيل وبهارات الدجاج
والزعتر لبيتزا وسمسم وحبة البركة للمعجنات
فيه ملف خاص بالتوابل لمغتربة 7

3- الاجبان بأنواعها

4- الخبزة المرحية جففي من توه ورحها
وحطيها في الثلاجة أو الفريز
وكذلك النعناع الجاف

5- قومي بتحضير العسل (الشربات) للعوامات والبسبوسة والكنافة

6- منديل المطبخ ورق الزبدة وسلفر وأسياخ الخشبية
وماء العطر والزهر

7- المكسرات مثل اللوز والكاكاويا وزبيب وجوز الهند

8- كريمات وشكلاطة للكيك

9- عجينة الباف باستري والبكلاوة والكنافة

10- قومي بتحضير الهريسة العربية وصلصة البيتزا
وسلطة المشوية

رآك تنسي مودة تصوير أكلاتك في الرمضان