[ مبروك صيامك يا زينه ... وتى روحك للكوجينه ]

[نسمه ليبيه]

السلام عليكم ورحمة الله..


كل عام وانتن بخير.

بعد عناء يوم طويل وحافل فى المطبخ حطى برحالك هنا.


كلنا اذان صاغيه..لنستمع ونفضفض عن ختام يوم حافل وزاخر

بماقدمتيه وبما جرى معك من احداث مطبخيه

ماذا طبختى .ومن ساعدك..وماهو شعورك ومعنوياتك..


نحن فى الانتظار

ونحتسب كل اعمالنا عند الله جل وعلي

[luba]

بارك الله فيك نسومه وفي ادارة المنتدي علي هذه المساحة
وكل عام وانت وكل البنات بخير ينعاد عليكم وربي يتقبل منا ومنكم

[أمـ ساره]

اللهم بلغنا رمضان لا فاقدين ولا مفقودين

كل عام وانتم بخير حبوبات وربي يبارك لنا في رمضان ويقدرنا على صيامه وقيامه يارب العالمين

وربي يرحم موتانا وموتي المسلمين يارب بالعالمين

[المصراتيه]

بارك الله فيك نسمه
وكل عام والكل بخير

[أم خديجه]

كل عام وانتم والف خير ورمضان كريم يارب

[luba]

السï»»م عليكم
السبت كان اول يوم صيام تقبل الله منا ومنكم
الجو حموووو ماجت الساعه 9 وتلت اï»» واني الرؤية قريب مدغبشة
طيبت شربة عصفور و تارت البدنجان للمصراتية حلوووو
واامحارة بالجï»»ش و خبزة حوش و كنتاكي وسï»»طة ومسير
الحمد لله اللهم ادمها نعمة واحفظها من الزوال
بيش تخشوا تخبرنوا علي سفراتكم ويومكم وتشاركوا في المنتدي بجديدكم وتطبيقاتكم

[المصراتيه]

ماشااااءالله لوبا يعطيك الصحه اي ده كله صحتين عليكم وصيامكم مقبول ان شاءالله
ربي يصبرني علي غدوه اول يوم والحال زيكم المغرب التسعه والفجر 3 والجو ساخن
ان شاءالله ربي يقدرنا عليه
صورينا سفرتك خلي نتعشو معاك

[بنت حواء]

السلام عليكم
مشكورة نسومة على الموضوع الحلو
لوبا صحتين فطور ماشاء الله

كل عام وأنتم بألف خير ربي يعينا على الصيام والقيام وتلاوة القرآن

[صعبه المنال]

كل عام وانتن بالف خير خواتى :)

[حبيبتهم]

كل عام وانتم بخير اني كملت فطوري جاهز نراجي في المغرب درت شربة وامبطن وبيتزا

[لوتي]

صحتين صبايا كل عام وإنتن بخير

[luba]

هلا صبايا اليوم اهون من امس.
بنتعودوا اليوم عشاي
مكرونه مسقية وشربة وفطاير الطعمية
في الفرن ومقلية و امبطن و درت فيونكة معسلة
لزينب محمد تهببببل ماشاء الله
تو بنزل التطبيقات و الجديد
تقبل الله منا ومنكم وصحة شربتكم الكل

[خدوج]

مبروك عليكم رمضان وكل عام وانتم بخير

[زينة ونحولين]

السلام عليكم ورحمة الله وبركاته رمضانكم مبروك وكل عام انتم بخير تقبل الله منا ومنكم وأعتق رقابنا ورقابكم من النار وحفظ ليبيامن كل شر

[بنت حواء]

لوبا صحتين فطوركم يهبببببببببل ماشاء الله

خدوووووووووج نورتي ليك وحشة كيف حالك؟

زينة أهلا بيك في المنتدى آآآآآآآآآآآمين

[luba]

هلا بيكم الكل

كيف حالك خدوج وانت بخير
هلا لوتي شن فطوركم وانت بنوته شن فطوركم
والا بتخلوه مفاجاة علي مسابقة لقطة للسفرة

بصراحة المنتدي مكسد هلبه و المشكله مافيش وقت
كله جري جري والوقت يطير

[luba]

واللي يخشوا ياخدو ومايعطوا و لا حتي يشجعوا المشاركات
لاحول ولا قوة الا بالله الصبر وخلاص

[نسمه ليبيه]

السلام عليكن وكل عام وانتن بخير
شفت خدوج والا انا نحلم
وشفت وجوه جديده صعبة المنال وزينه ونحولين..
انا طبعا اول يوم عند اهل زوجى
واليوم درت شربه وباميه وطاجين البرجر لام ساره
وبيتزا وكفتة التن
والله تقريبا السفره ردت زى ماهى
اها ونسيت نقوللكم مش انا جبت تنور ودرت اليوم خبزة صقع عليكن ^_^
هى من ناحية الطعم ماشاء الله لكن الشكل تقدرى تقولى سداسي اوخماسى او شبه منحرف..مازلت نتعلم فيها لما تضبط معايا حنوريها لكن ....

[نسمه ليبيه]

لوبا خطر عليك الخير..
اليوم راجلى جاب باذنجان قلت شن بندير بيه..
حندير تارت المصراتيه..

[حبيبتهم]

خدوج ؟؟؟ مش معقولة الحمد لله عالسلامة
وصحة فطوركن اني اليوم درت شربة وعصبان وبوريك النشا والحمد لله اللهم ادمها نعمة واحفظها من الزوال

[نسمه ليبيه]

صحه حبيبتهم..بس نحس العصبان دسم واجد صاح..والا عادى

[أمـ ساره]

السلام عليكم ورحمة الله وبركاته

صحة شربتكم وفطوركم يا بنات
وبالهني عليكم ما ليتوا يارب

بالنسبة لي من اول يوم تلخبيط وجري بنتيساره مرضت قبل المغرب
قعدنا في الجري حاشكم حرارة نبردوا فيها وبعدين فطرنا وما كملنا حتى هرب الضيء
ومن امس لليوم وحني في هروب الضيء حاشاكم ما يجي ساعة الا يغيب 3 او 4 ساعات
والليل ما فيه نوم من النو ومن حرارة بنتي يادوب الصبح رقدت ساعتين وشوي وبعدها رفعها بوها للمستشفى
ودارولها دخول لأن لقوا نسبة الالتهاب عندها هلبة بالله ادعولها بالشفاء حبوبات
طيبت الفطور بسرعة وجري ومع بناتي الصغيرات سلامتهم وبعد العشاء مشيت قعدت معاها في المستشفى لحد ما روحت حناها
وارتاحت في الحوش ورجعت الساعة 2 ونص واني روحت لبناتي ويارب غدوة يكتبولها خروج يارب


امس طيبت فليفلة وكوردن بلو وشريبة وعززتي درات امبطن وكفتة
واليوم طيبت شريبة بيتزا وفركاسي وكفتة دجاج نفس فكرة البركان لكن بتعديلات مني حسب ذوق العيلة
وللأسف ما عندي وقت للحلو ولا للتصوير ان شاء الله الايام الجاية نلحق نصور وانزل

وشامحوني طولت عليكم لكن بجد بنفس على روحي شوي هني

[المصراتيه]

السلام عليكم

انسسسستي خدوج ونروري وينك فيسع ومشيتي كل عام وانتي بخير

صحتين عليكم


ام ساره ربي يشفيها ويعافيها ان شاءالله يارب مافيش اوعر من الحراره لصغار تخوووف اني يوم تجي لبنتي نبدا قريب نموت من الخوف ربي يلطف بيها ويعافيها وتتشوفيها احلي عروس ان شاءالله

حبيبتهم صحه العصبان شوفتيييييني امتي نروح لي ليبيا ونلقا طنجرة عصبان قدامي ;)

الحمدلله اليوم مشي الجو عطش وجي صاحبنا تعشي عندنا والنهار طووووويل والفجر علي طول مايدن ربي يصبرني علي صيامه ونرضع ودهاااش احح


صحتيييين يا بنات وان شاءالله سفرتكم دايما وصيامكم مقبول

[بنت الاشراف]

تقبل الله منا ومنكم درت شريبة وسادة بدحاح وكروسان بالطن وبيتزا

[بنت حواء]

نسومة هلا كل عام وأنت بخير وصحتين الفطور الحلو
لكن خسارة ليش ماياكلوش؟ شكلهم دايرينها على السوائل وخلاص
ومبروك التنور تبيديه بالهنا عادي مش مهم شكلها الخبزة المهم طعمتها
واااااااو قديش خاطري فيها لكن الله غالب

أم ساره ألف لاباس على بنيتك ربي يشفيها ويعافيها والله واعرة الحرارة
كيف حال باقي بنياتك وزوجك معاكم السنة ولا لا؟
صحتين الفطورات الحلوات ربي يديم النعمة

حبيبتهم صحة العصبان والفطور كله ربي يديم النعمة
شكلك روحتي الحمد لله على سلامتك وآنستي

بنت الأشراف ياهلا منورة وصحة فطوركم

[كيميائيه]

كل عام والجميع بخير

[نسمه ليبيه]

السلام عليكملاباس ام ساره على بينوتك ربي يشفيها شفاء لايغادر سقما.بنت الاشراف صحه فطوركبنت حواء ياريتك جارتى راهو عطيتك من خبزتىالمصراتيه ربي يعينا اجمعين النهار طويلوبنسالكن انا افليلفله عمرى مادرتها نتخيا لما نحطها المفروم يطيح من الجنبين هل فى طريقه معينه تديروها بيش الحشو مايطيحش

[حبيبتهم]

السلام عليكم
ام سارة ان شاء الله لاباس علي بنتك وربي يشفيها
ويا نسومة مش ثقيل العصبان في الصيام متعودين عليه انديروا فيه في الصيام
ويالمصراتية وبي يكون في عونكم وان شاء الله تروحي بالسلامة وتشبعي في العصبان
بنت حواء قصدك عليا اني روحت ؟؟؟؟ كان تقصدي اني بنقولك راهو قاعدة صامدة في الحوش لا طلعت ولا سافرت بيش انروح هههههه

[أمـ ساره]

وعليكم السلام والرحمة يا بنات


الله يسلمكن ويبارك فيكن يارب على الدعوات يا حبوبات
الحمد لله اليوم روحت لكن مازال علاجها يبي فترة




نسمة
بالنسبة للفليفلة لا ما يطيح الحشو وهذا يعتمد على حشوتك والاه ما يكون فيها هلبة خبزة
حتكون بتها مش حلوة جربي طريقة زينب محمد او الشيف رضا العالم جربتها وطعمتها حلوة


اليوم فطوري كان

بيتزا وخبيزة كسكاس بشاورما اللحم بطريقة زوبة
وعزوزتي دارت شربة وطعمية ولحم مقلي


وصحيحة شربتكم

[نسمه ليبيه]

صحتين فطوركن

[luba]

هلا بيكم صحة فطوركم ماشاء الله
ممكن نجربها اليوم الفليفله ام ساره خطرتيها عليا

ان شاء الله لاباس علي بنتك ماتشوف شر
ربي يزيد من شفائها بس شنو سبب الحرارة ؟
هيا نفسها بنتك اللي ترقالها الحرارة بدون سبب

امس عشاي شربة الخضار للمصراتية في مسابقة الصحي
و شعرية بالخلطة علي طريقة زينب محمد
و شربتنا و بيتزا وسلاطة البدنجان المقلية

حبيبتهم خطرتي عليا العصبان تو بنديره هاليومين
الحق ماعاد خاطري نخش للمطبخ من كتر الحمو
ومافيش مكيف لانه صيفهم قصير ممكن شهر بس
اكيد توا غاطسات في المطبخ

ان شاء الله اليوم عشي من امس فاضل
بنزيد عليه بوريك مورق بالنشا لام ملك
والفليفله لزينب
هيا صحة شربتكم وسحوركم

نسمه خطرتي عليا ايامات التنور من احلي ايامي بالصحة
تبيديه بالهني

[نسمه ليبيه]

خامس يوم رمضان..فعلا ضيفنا مستعجل..
اليوم ناويه ان شاء الله
كيما..وشربه..وبرودو.ومينى بيتزا.وفطيره تركيه.
والحلو حنطلع مقروض من الفريز
طبعا بالاضافه لخبزة التنور....

[نسمه ليبيه]

لوبا كان صحت معاك الفليفله حتشجعينى ونديرها

[نسمه ليبيه]

يابنات اللى عندها فكره عالتنور ياريت تفيدنى

شن سبب لصق الخبزه فى التنور جننتنى

[أمـ ساره]

السلام عليكم ورحمة الله وبركاته


صحة شربتكم وفطوركم يا بنات وربي يتقبل منا ومنكم ويعينا ويعينكم

بالله منو الي زيني ناقصة نوم وما ترقد كويس
استاحشت النوم بجد تصوروا يوميا نرقد 6 او بعد وطبعا كل شوي انوض للبنات وللدواء
الحمد لله على كل حال

لوبا

اني بناتي 3 مشكلتهم في الحرارة وسبحان الله الفترة الاخيرة ونقصد من شهور لازم وضروري كل شهر اقل شيء يمرضوا 2 منهم
انتي تقصدي بنتي الوسطية لالا الحمد لله ما عاد جاها التشنج زي قبل
ممكن لان نسعفوا فيها وقتي ونبردوا فيها وبعد ما قريت عليه وفهمت الحمد لله ماعاد عانيت منه هلبة
والي مرضت توا ساره الكبيرة وقبلها الصغيرة والاثنين بالتغذية والمضاد في الوريد والحمد لله على كل حال
ربي يحفظهم ويشفيهم يارب ويحفظ لكم صغارك ويفرحكم بيهم



نسمة

للأسف ما عندي عليه خلفية ولا نعرف كيف يديروها
ان شاء الله وحدة من البنات تفيدك

[بنت حواء]

السلام عليكم
نسومة تقصدي اطيح منك وماتلصق ولا تلصق معاش تحول بلكي ناقصة طياب
وكان اطيح منك يقولو لازم تحمي التنور واااااااااجد وبعدها تمسحي الجوانب بفوطة
لأن الدخان اللي في الجوانب مرات يتسبب في طياح العجينة غير انه مش كويس
الحق عمري مادرتها لكن نشوف في من يدير فيها بهالطريقة

أم ساره مابعدك ربي يشفي بنياتك ويعينك
خوذيلك حتى في النهار ساعة نوم تريحك شوي

ماقلتو شنو فطوركم
بنااااااااااااات وينكم خيره المنتدى مكسد
وحتى الموضوع هذا اللي هدرزة وبس هاربين منه

مصراتيه ولوتي وخدوج ومغتربة ونسيبة وصبورة
وميرولاكي وزوبة الطيوبة وأم عدنان وبارني وامة الله وحبيبتهم ويييينكم


هيا اللي تخش هنا حتى كان عضوة جديدة
تكتب وتهدرز شن فطورها وشن دارت وشن بدير :rolleyes:

[نسمه ليبيه]

ام ساره...جارتى بنتها يجيها فى تشنج طلعت بيها للأردن طلع نقص فيتامين ب6..ربي يشفيهن لك انا ترقد 5 وانوض 12 عشان وليدى عنده قرانيه..
بنت حواء الخبزه تلصق ولما بنحولها الجهه الداخليه تقعد لاصقه فى التنور ونحصل غير الجهه الخارجيه -_-
وفعلا بنت حواء كيف ماقلتى.مافيش تفاعل ابدا .يعنى هنا كلام بس ومافيش مشاركه

[نسمه ليبيه]

اليوم خاطرى فى ملوخيه

[نسمه ليبيه]

ماصارش من الملوخيه
فطرتنا تمت عند هلى

[luba]

ام ساره ان شاء الله ï»»باس عليهم
اصعب شئ مرضت صغار بالجملة تحسي في روحك زي
فاقده الوعي تجري وماتحسي ربي يهون عليك وعليهم
نسمة ممكن عجينتك رطبة هلبه هيا تكون عجنتها تفريها بيديك
ما اطيحش من الجوانب يعني العجينة تكون متماسكة وتحسيها تقيله
يعني حتى لما ترميها تقعد دائرة ماتتغيرش هلبه في شكلها
جربي ديريها عجينة متماسكة مش رطبة احني بعد تتخمر نقرصوها
كور ونغطةها لحد تنقص النار وبعدها بجريدة تغطسي في المية
وتلفيها علي جوانب التنور من داخل لفتين و بعدها تغطحي خبزتك لكا تفطحيها ماتستعمليش هلبه زيت و ما تكونش رطبة تسيح معاك واï»» تجري فيسع في التفطيح
ان شاء الله وصلت القصه سامحيني طولت دكرتها ممكن في فصل ناقص
عندك اضيفيه
فطوري معاد انطيب كان في وجبات رئيسية مرة مرة ندير شربة وحاجة
وحدة اليوم فطوري كان برياني بطريقة حبيبتهم
غير اني نختصر نحط في اللحم والبهارات الصحيحة طول في. الصالصه
والبصل جوانح لقيته يغطي اكتر في الرز
وامس حريرة و كسكسي بس
صحة شربتكم ولي عودة غير هاليومين مشغولة عندي امتحان
كان نجحت تو نخبركم امتحان شنو ههههه يستر الله قراية بالهون

[أمـ ساره]

وعليكم السلام والرحمة

وبارك الله فيكم على دعواتكم يا بنات وربي ما يوريكم باس في قريب ولا حبيب يارب
ويحفظ غواليكم واهلكم واحبابكم




بنوتة

ليك وحشة يا مراة وقريبا حنتلاقوا ان شاء الله بندير حساب في القريب العاجل
ما قلتي شنو تفطري وشنو جوك اتأقلمتي او لا



نسومة

نيالك والله ما فيه أحلى من فطور جاهز يا سلام خاطري نجربه هالشعور بجديات
ونوم اعوافي يارب ياريتني نرقد الحمد لله على كل حال


لوبا

موفقة وبالنجاح يارب وربي يعاونك

وبصراحة احسن شيء شربة وحاجة غليظة معاها تستر ونفس الوقت تعب أقل


اليوم فطوري كان مكرونة شعيرية بطريقة زينب ونزلتها اليوم
ودرت قلاية لان زوجي ما ياكل في الشعيرية
ودرت سمبوسة هندية جربتها اليوم وبصراحة اتهبل ان شاء الله نصورها مرة ثانية ونحاول انزلها

وأم زوجي درات ضولمة (براك) وبيتزا والشربة عليها كل يوم


وأمس درت
كفتة البطاطا بالجينة وجت اتهبل خفيفة وحلوة ودرت تارت صغيرة
حشيت منهم مفروم وجبنة مبشورة وشوي بيض ومنهم بخليط أجبان وفلفل حل وزيتون وطماطم أخضر
وللأسف ما لحق نصور شيء يالله كملت مع المغرب

[بنت حواء]

نسومة ذكرتيني بالملوخية قديش خاطري فيها
جو عاد أهلك يابختك صحة فطوركم

لوبا بالتوفيق ان شاء الله جاني فضول شن تقري
وصحة فطوراتك الحلوات حتى المسقي حلو

أم ساره هلا صحة فطوراتك نحس فيك تكثري في الأشكال
وأنت بلا نوم ومع بنياتك كيف دايرة ربي يعاونك
والله أنا قاعدة تعبانة لاتطييب لاشي مرة مرة حد يبعثلي حاجة
كان جت نيتي فيها ناكلها وكان هذا نقعد على الخفيف وخلاص وربي يستر

يلا سلام

[نسمه ليبيه]

بنت حواء فتره وتعدى ...
درتها اليوم الملوخيه ومعاها دجاجه محمره وطاجيت برجر وتبولهولوجى بنتى اصرت انها تدير بيتزا ودارتهاومازال عالمغرب ساعه وكملت ولله الحمد

[بنت حواء]

صحة صحة يانسومة أنت وعويلتك كلهم
فطور يشهي ماشاء الله
وربي يحفظ بنيتك باهي تعاون فيك صار
النهار طويل تكملي حوستك والمغرب مازال هذا حال الصيف

[حبيبتهم]

السلام عليكم
مساء الخير
نسومة خبزتك تلصق يا اما من العجينة يا اما من التنور نفسه امي تنورها ايلصق في الخبزة بعد اتقرصها كور تدهن صفرة بالزيت وترشها بالدقيق وتطرح عليها الخبزة وتخليها ترتاح بعدها تلصقها في التنور جربي حتى فردة واحدة بالطريقة هذي وشوفي في فرق والا لا
والا ادهني الخبزة الجهة اللي بتلصقيها في التنور بماء وشوفي الفرق ديري يوم جربي فيه كل فردة بتجربة وخبرينا شنو ايصير

[نسمه ليبيه]

الله يسلمك بنت حواء
حبيبتهم توه نجرب الطرق اللى قلتى عليهن ونقولك شن صار معايا

[أم خديجه]

مرحبا يابنات ربي يدوم جمعتنا
ام سارة
الف لاباس علي بنتك طهور ان شاء الله
نسومه
مبارك التنور تو خبيزة التنور منك فريده لكل وحده
احنا في الغربه دايرين الطنجرة تنور وعلي الغاز ماشاء الله اتجي كاينها تنور
لوبا
ربي يعطيك الصحه وبالتوفيق

اللهم ادمها نعمه واحفظها من الزوال يارب
امس فطوري عصبان وارز بالخلطه ودشيشه وسلطه

ماشاء الله عليكن كل وحده سفرتها متنوعه

[الصابرة]

السلام عليكم

كيف حال الجميع مع ان واجعني الحال مافيش نشاط بكل لكن الحمدلله البركة في الموجودات

ام سارة
ربي يشفي بنياتك يارب ويريح خاطرك

حبيبتهم
كيف حال ونورتينا

بنت حواء
ربي يعينك ويسهل امورك يارب

لوبا
ان شاءالله موفقة وربي يعينك على الصيام

المصراتية
ربي يعينك ويسر امورك يارب

ام خديجة
صحة فطورك ومنورة ديمة ان شاءالله

خدوج
بعد هالغيبة كلها كلمتين بس
طمنتينا عليك على الاقل وكيف حالك

نسومة
كيف حالك حبيبة ومبارك التنور الله ذكرتيني بخبزة امي لما المغرب يذن تخش علينا بيها سخونة ولما كنا نرفعوا منها للجيران
الله عليك ايام

ان شاءالله مانسيتش حد

حبيبة اني نقولك على الطريقة اللي تعلمتها من امي راهي وخيتك شاطرة فيها غير ماعنديش وين نحطه التنور

امي ادير في صونية فيها مية وزيت وتكوني مخصصة خيشة احسن شئ لهذه العملية
تغطس امي الخيشة طبعا يكون حجمها كبير شوي بيش تكون يدك بعيدة عن الحرارة وتبرم بيها على التنور من الداخل قبل ماترمي الخبزة على طول وفي نفس الوقت لما بتجي ترفعي العجينة غطسي ايدك في المية والزيت نفسها طبعا اني ماشية عليها وهكي تضمني خبزتك ماتلصقكش وكان جربتي هذه الطريقة وماصارش منها معناها التنور مش تمام يمكن مش طايب كويس عني اللي صنعه )

بالنسبة لي
اني نفطر في حوش العيلة يوم وفي حوشي يوم
لما نمشي لحوش العيلة نرفع حاجة حلوة وحاجة حارة
وفي حوشي اني نفطر الساعة 12 وراجلي يسحر يعني متخالفين ام الفطور يكون تمر وعصير وحليب وخلاص

اليوم فاطرة في حوش العيلة ان شاءالله
ورافعة معاي كريب بحشوة التونة وطبعا الكريب من غير بيض لحبيبة قلبي نسومة
والحلو درت كيكة باردة ان شاءالله حنزلها
وهذه اخباري وان شاءالله انكون على تواصل معاكم

[نسمه ليبيه]

ام خديجه والصابره انستنا فى الكوجينه
ام خديجه المهم انك تديري فى خبزة حوش. وان شاء الله تروحى لليبيا وتديرى تنورك. انا راجلى يعشقها موت عشان هكى جبته ونتعلم فيه مرات نطلع بفريده وحده اللى تديرها العميه ياكلوها ظناها
..الصابره وعليش تفطرى الساعه 12 مانصدقوا المغرب يأذن نحن.
وانا نفطر فى حوشي باستثناء عزايم العيله..
ومانحكيلكمش مازالت عزومتى نخمم من توه شن ندير

[أم خديجه]

الله يانسك نسمه
ربي يعطيك الصحه مع الوقت تتقنيها
وان شاء الله ربي يسترك ويعاونك يوم عزومتك

[نسمه ليبيه]

السلام عليكم وصحه شريبتكن
اليوم عطشت عطش شديد وبعد الفطور صداع ماقدرتش نتحرك لانى نايضه ولانى راقده
الحمد لله تميت شغل المطبخ قبل الفطور من تسييق الارضيه وغسل الغاز وتلميع ..
فطورى اليوم
رز بلاو..وطاجين. .وبوريك الجبد..وخبزة تنور
اليوم طلعت معايا كويسه

[أمـ ساره]

السلام عليكم حبيبات

صحة شريبتكم وفطوركم وبالهني عليكم
وسلمت ايدياتكم حبوبات على كل الي اديروا فيه


بنوتة

لالا ما نكثر بالعكس انوع لكن الكمية شوية وما تنسي نتسحروا بيهم ما نطيبوا في السحور


أم خديجة والصابرة

الله يسلمكن حبوبات وبارك الله فيكن على الدعوات
الحمد لله هالفترة باتي كويسات بس مرة مرة عندهم اسهال مش عارفة ليش ؟


نسومة
لاباس عليك وطهور ان شاء الله وربي يشفيك حبيبة
والعطش ربي يعينا عليه يارب مس قريب شربت م كثرة العطش غير ربي هداني واذكرت اني صايمة




بالنسبة لي امس كان يوم غريب عجيب اقسم بالله قعدت نشهد وما توقعت يوصل فيا المغرب

الضيء هارب وكان مش هارب ضعيف بكل متعبني وكانت عندي عزومة
خشيت من الساعة 3 وكملت قبل المغرب بنص ساعة واكثر
نزلت عند عزوزتي وقعدت جهز في السفرة معاها وبعد المغرب نزلت صليت ولما نزلت
لقيت الضيوف والي هم لراجلي واكلين وما يبو شيء حتى القهوة ما شربوها
قريب هديت عليهم بالميم طاء وحتى النية من العشاء طارت
شربت قهيوة وخذيت شوي كيكة كراميل درتها لهم وخلاص

وعلى اساس اليوم ما نبي نطيب لكن وراي عويلة بالله خشت الساعة 7 للكوجينة
ودرت بيتزا وطاجين بورجر بشكل جديد وخبيزة كسكاس بالشاورما وعزوزتي درات سمبوسة

[luba]

هلا بالغاليات
بارك الله في كب من دعاء لي
نجحت في اï»»متحان وهو امتحان تحريري في القيادة
كل عام نقول بنديرة ومايصيرش من المشي ï»»نه
في مدينة تانية هالمرة لف وجي عندنا ودرته وغلطت غلطة وحدة الحمد لله.
وتو نبدو في الجديات يستر الله
فطوري محشي وشربة وكبسة و الفليفلة لزينب جت تهبببببل
ديريها يا نسمة وانت مطمنه الحق رووووعه وخفيفة
مانحسابها هكي حلوة وساهله بارك الله فيك زينب
هيا سلامات كيف طالعه من المطبخ عيوني نجوم
بنعدي ناكل سمينسة عباد الشمس هدا سحوري

[أم خديجه]

الف لاباس عليك نسمه
ام سارة ربي يعطيك الصحه
لوبا الف مبروك وعقبال امتحان العملي
روحي لليبيا اتسطربي هههههه
فطوري امس كان دشيشه وامبطن وسلاطه وفتات
وفطوري اليوم
شربة سمك وسمك في الكوشه وارز وسلطه
اللهم دمها نعمة واحفظها من الزوال

[نسمه ليبيه]

خيرات شن الجووو

من بدت تمل من الكوجينه -_-

[بنت حواء]

وعليكم السلام
لوبا بالتوفيق في الامتحان ان شاء الله
يابختك تعلمتيها القيادة برا
لكن لما تروحي بتسوقي بتتلخبطي ههههه
القوانين كلها بالعكس ههههه

صحة فطوراتكم
وينكم مغطسين معاش صمتو لافطرتو امالا؟

[أم خديجه]

اهلين بنت حواء كيف حالك
الحمد الله نسومه مازلت اشوي بس معاش انطول روتين
اليوم فطورنا كان
بيتزا وشربة عدس و كرات البطاطا بالجبنه للصابرة بس درة لحم مفروم وجبنه
والحلو لسان العصفور لزينب محمد
تسلم ايديهن روعه وعجبوا عيلتي هلبا

[نسمه ليبيه]

صحه ام خديجه..
وماصورتيش تطبيقك الكرات ولسان العصفور؟؟
انا اليوم كنت عازمه اهل زوجى وخوته.
مانحكيلكمش رجليا نحس فيهن مش عالقات فى جسمى..
درت رز بالخلطه وشربه وبرودو وبراك ومبطن ودجاج محشي وتارت البرجر وبوريك الجبد وسندوتشات التوست ومينى بيتزا وباميا وسلاطه
والحمد لله كل شي جا تمام بالاضافه طبعا للتنور

[أم خديجه]

اهلين نسمه ربي يعطيك الصحه
صورتهن ياغاليه ان شاء الله في اقرب فرصه انزلهم

[بنت حواء]

ماشاء الله نسومة عزومة مقومة مكثرة عندك حق تتعبي مابعدك
وحتى خبزة تنور ماشااااااااء الله ان شاء الله غير كلو كويس
بالصحة عليكم

[نسمه ليبيه]

الله يسلمكن بنت حواء وام خديجه..
كلوا يابنت حواء الحمد لله .نحب لما نطبخ لضيف ياكل وكله كويسه