المصارين الرقاق

[الصابرة]

السلام عليكم

جيت طالبة مساعدتكم بعد جميع محاولاتي بائت بالفشل
مشكلتي مع المصارين الرقاق ديمة ينفتحو في التطييب

نقبتهن شوي انفتحن
نقبتهن هلبة انفتحن
نعبي شوي بكل لدرجة ان المصران لما يطيب يبان اقل من حجمه بهلبة
طيبت في الكساس ماصار شئ
طيبت في طاجين البيتزا برضو لازم ينفتح جزء منهن
طيبت في طنجرة مكمور نفس الحكاية
طبختهن في امية نفس الرواية

وصلت اخاري معاهن ووحلت
مشكلتي اني ماناكلش غير فيهن هنا بس ويكمل عصباني ونا ناكل في حشو مفرط وخلاص
اللي عندها افكار او تجربة ناجحة غير اللي ذكرتهن ياريت تساعدوني

[زوبة الطيوبة الحبوبة]

وعليكم السلام ورحمة الله وبركاته
اختي الصابرة .. جربي ماتطيبهمش وقت طويل..

[لوتي]

ممكن صبورة خرطيهن هلبا أو رزهن أكثر من خضرتهن أو محشيات هلبا والله أعلم لأ إحني إنطيبو فيهن في الكسكاس ويجن حلوات

[الصابرة]

زنوبة
ممكن صح نخلي فيهن هلبة ع النار تو انجرب اني نفطن ليهن اول مايطيبن انطفي طول

لوتي مشكورة حبيبة
اللي قلتي عليه جربت نقصت من الارز وخليت الاعشاب اكثر وماسلمش الموضوع
والحشو نقص فيه لدرجة ان المصاران يبان كانه خيط ضي

وبارك الله فيكن على الرد على موضوعي

[بنت حواء]

صبورة والله وجعتيني صايرتلي كم مرة
ينفجرو المصارين نحس في روحي قريب ننفجر معاهم
بالنسبة ليا اكتشفت أني نخلي فيهم هلبة على النار
المفروض مش أكثر من نص ساعة
خضرتي تكون مقطعة رقيقة هلبة ونحطهم في الكسكاس بروحهم
والطنجرة تحت فيها باقي العصبان
وبعد نص ساعة نحول الكسكاس ونخلي الطنجرة
وبعد يبرد شوية ننزلهم من الكسكاس
لأن وهما ساخنات هلبة مرات يتقطعو مني
وحاجة تانية لما تنظفيهم بالخل ماتنقعيهمش فترة طويلة
شوية وشطفيهم بالمية بسرعة لأن الخل يسهل في عملية الطهو للحوم
هذا اللي نعرفه وان شاء الله تمشي الأمور تمام

[لوتي]

خلاص صبورة جربي متخرطيهمش هلبا

[الصابرة]

مشكورات وخياتي وبارك الله فيكن
جربت جميع النصائح والحمدلله الخسائر في الارواح قصدي المصارين جت بسيطة جدا بعد ماجربت جميع النصائح والحق تقريبا اول مرة ناكل منهن وكله سمحة