للاهم
01-03-2011, 09:17 PM
خير يا بنات
هذي طبيخة ربيع مكوناتها موسمية
نراجو الربيع بفارغ الصبر بيش يكبر القعمول ويكثر في المنطقة الشرقية
جغرافيا تواجد القعمول في ليبيا
بالتحديد ما نعرفش الحدود الاكيدة للقعمول
بس نبدوها من بنغازي وامشي مشرق لعند البيضاء شفته
درنة ما نعرفش عمري مازرتها
في اجدابيا برضو ما نعرفش اذا كان ينبت القعمول غادي والا لا!
http://www.libyan-kitchen.com/gallery/images/img1586.jpg
المهم القعمول نبات شوكي يفترش الارض وتخرج منه ثمرة شوكية مثل الخرشوف اللي نسموه نحنا قعمول مصري
ف الربيع نطلعوا زرادي ومتعة الزردة في تلقيط القعمول والطريقة كالشو بمقدمة الحذاء
وياما خربن من كنادر في سبة القعمول
والطريقة هذي فيها انانية مش كويسة
لأن الكالشو يقطع قعمولة وحدة ويخرب الباقي الصغير اللي يدوب طالع ومرات يقلع النبتة من منبتها
http://www.libyan-kitchen.com/gallery/images/img1589.jpg
والطريقة الاكثر اناقة واكثرمحافظة على البيئة ان يكون معاكن موس وقصعة
تقطعن بالموس وتحطن ف القصعة
شكارة لا واللا تاكلن من بز الشوك نين بس وانتن شايلاتها
ممكن سطل زواق فاضي
وهذا منظر تشوفوه في الربيع في الشرق
بياعين القعمول متستفين علي حواشي الطرق وقدامهم سطولة الزواق وباكوات الماكاوة مليانات قعمول
http://www.libyan-kitchen.com/gallery/images/img1590.jpg
وما احر شوكه!
في اللي يتحسس منه
انا لا
بس امي مسكينة كان قشرت قعمول تقعد اسابيع صوابعها يوجعن فيها من بز شوكه
وتقشيره متعب وله فن خاص وشطارة
وانا من الشاطرين فيه
هههه نقشر فيه بالكميات
وننسجم عالاخر
وداستله موس خاص
وتبقى ضحكتي خضرة من الوذن للوذن
:D
اه اه يا يوم في هذك البلاد السمحة وهذك الربيع الصابة
هاتن البصل نقرض ونبكي
المهم هو يتقشر من تحت بالدور الداير
وبعدين نبدو نقشروا فيه بالورقة
وتعرفن شنو احسن جزء في هالمهمة الصعبة؟
تقرقيض الورق
هذد الطريف الصغير الهبيرة البيضة محلاها
ومحلا فمكن وسنونكن لما يقعدن خضر وبعدين سود
واللي واكل قعمول مفضوح
بس سلم الليمون اتحّكن بيه فويماتكن وسنيناتكن
وصويبعاتكن
يعدي كله
ههههه
بس تلتيغت اللسان والفم مشكلة
كأنكن واكلات غمق – بلح مش طايب
المهم تقشرن سيدي القعمول وطلعن قلبه الابيض السمح المدور
نغسلوه ونحطه في امية فيها ملح وعصرة ليمونة
ونخلوه
نفصصو الفول الاخضر والحبة الكبيرة نقصوا منها شوية من الجنب
واللي فاضية مكسدة منكن وماوراها شي تقشر الفول
وما تبدلن بقشوره حد فككن!
وتينا الفول والقعمول
توا نتقعدوا للطبيخة
كيف اي طبيخة ليبية معقدة معنقرة
نشوحوا البصل المقرض ف الزيت مع الفلفل الاحمر
حسب درجات احتمالكن للحار ومناعة حلوقكن
وفكونا من بشر البصل
خلونا كيف جداتنا نقرضوا البصلة فوق الطنجرة محلاها
نحطوا اللحم الضان
ونتبلوه حرارات بزار فلفل اكحل ملح
ونحطوا الطماطم المعجون والحب
مانتسنش قرينات الفلفل
مقدسات في المطبخ الليبي
ونقلوا شوية
نحطوا شوية امية ونخلوا الطبيخة تسبك
نزيدوا شوية
لعند يطيب اللحم
نحطوا الفول
وبعدها القعمول بعد غسله من امية الملح والليمون
ونزيدوا الشبت المقرض
ونخلوالطبيخة علي نار هادية نين يطيب الفول والقعمول
ويطلع دهاااانها
كولن وادعنلي
اه بس وينه القعمول
زمان كنت ندز فيه لوحدة قريبتي في مصر في باكو كندرة
قولولي من ايدزه ليا توا؟
ولا تزعلن انا نعوض فيه بالخرشوف
تقريبا نفس الطعمة
بس بقعيميلنا ابن واطعم
جربن وقولن قالتها للاهم
خطرها القعمول نحطوه فيه مع خضرة الكسكو مش عادي
وفي اللي فاضية وبالها رايق تحشي فيه طبعا تختار القعمولات الكبار
عصاج
وتمرغيد في دقيق ودحي وبشماط
واهم حاجة تعرفنها ان القعمول ما يطولش عالنار مسرع ما يطيب
ما تهبزنش وتقولن هضا شنو والله نوروها للاهم
حاجة اخرى مهمة القعمول غني بالحديد ومفيد للكبد ومساعد على تقليل نسبة الكوليسترول ف الدم
يعني دق في وثق
ويقولوا ان في شركة سويسرية قاعدة تدير في اختبارات لاستخراج دوا منه
يستر الله ما يقرضوه من المنطقة
سامحني ما عنديش صورة الطبيخة توا نديرها شي يوم بعد يطيح الفول والخرشوف ف السوق
هذي طبيخة ربيع مكوناتها موسمية
نراجو الربيع بفارغ الصبر بيش يكبر القعمول ويكثر في المنطقة الشرقية
جغرافيا تواجد القعمول في ليبيا
بالتحديد ما نعرفش الحدود الاكيدة للقعمول
بس نبدوها من بنغازي وامشي مشرق لعند البيضاء شفته
درنة ما نعرفش عمري مازرتها
في اجدابيا برضو ما نعرفش اذا كان ينبت القعمول غادي والا لا!
http://www.libyan-kitchen.com/gallery/images/img1586.jpg
المهم القعمول نبات شوكي يفترش الارض وتخرج منه ثمرة شوكية مثل الخرشوف اللي نسموه نحنا قعمول مصري
ف الربيع نطلعوا زرادي ومتعة الزردة في تلقيط القعمول والطريقة كالشو بمقدمة الحذاء
وياما خربن من كنادر في سبة القعمول
والطريقة هذي فيها انانية مش كويسة
لأن الكالشو يقطع قعمولة وحدة ويخرب الباقي الصغير اللي يدوب طالع ومرات يقلع النبتة من منبتها
http://www.libyan-kitchen.com/gallery/images/img1589.jpg
والطريقة الاكثر اناقة واكثرمحافظة على البيئة ان يكون معاكن موس وقصعة
تقطعن بالموس وتحطن ف القصعة
شكارة لا واللا تاكلن من بز الشوك نين بس وانتن شايلاتها
ممكن سطل زواق فاضي
وهذا منظر تشوفوه في الربيع في الشرق
بياعين القعمول متستفين علي حواشي الطرق وقدامهم سطولة الزواق وباكوات الماكاوة مليانات قعمول
http://www.libyan-kitchen.com/gallery/images/img1590.jpg
وما احر شوكه!
في اللي يتحسس منه
انا لا
بس امي مسكينة كان قشرت قعمول تقعد اسابيع صوابعها يوجعن فيها من بز شوكه
وتقشيره متعب وله فن خاص وشطارة
وانا من الشاطرين فيه
هههه نقشر فيه بالكميات
وننسجم عالاخر
وداستله موس خاص
وتبقى ضحكتي خضرة من الوذن للوذن
:D
اه اه يا يوم في هذك البلاد السمحة وهذك الربيع الصابة
هاتن البصل نقرض ونبكي
المهم هو يتقشر من تحت بالدور الداير
وبعدين نبدو نقشروا فيه بالورقة
وتعرفن شنو احسن جزء في هالمهمة الصعبة؟
تقرقيض الورق
هذد الطريف الصغير الهبيرة البيضة محلاها
ومحلا فمكن وسنونكن لما يقعدن خضر وبعدين سود
واللي واكل قعمول مفضوح
بس سلم الليمون اتحّكن بيه فويماتكن وسنيناتكن
وصويبعاتكن
يعدي كله
ههههه
بس تلتيغت اللسان والفم مشكلة
كأنكن واكلات غمق – بلح مش طايب
المهم تقشرن سيدي القعمول وطلعن قلبه الابيض السمح المدور
نغسلوه ونحطه في امية فيها ملح وعصرة ليمونة
ونخلوه
نفصصو الفول الاخضر والحبة الكبيرة نقصوا منها شوية من الجنب
واللي فاضية مكسدة منكن وماوراها شي تقشر الفول
وما تبدلن بقشوره حد فككن!
وتينا الفول والقعمول
توا نتقعدوا للطبيخة
كيف اي طبيخة ليبية معقدة معنقرة
نشوحوا البصل المقرض ف الزيت مع الفلفل الاحمر
حسب درجات احتمالكن للحار ومناعة حلوقكن
وفكونا من بشر البصل
خلونا كيف جداتنا نقرضوا البصلة فوق الطنجرة محلاها
نحطوا اللحم الضان
ونتبلوه حرارات بزار فلفل اكحل ملح
ونحطوا الطماطم المعجون والحب
مانتسنش قرينات الفلفل
مقدسات في المطبخ الليبي
ونقلوا شوية
نحطوا شوية امية ونخلوا الطبيخة تسبك
نزيدوا شوية
لعند يطيب اللحم
نحطوا الفول
وبعدها القعمول بعد غسله من امية الملح والليمون
ونزيدوا الشبت المقرض
ونخلوالطبيخة علي نار هادية نين يطيب الفول والقعمول
ويطلع دهاااانها
كولن وادعنلي
اه بس وينه القعمول
زمان كنت ندز فيه لوحدة قريبتي في مصر في باكو كندرة
قولولي من ايدزه ليا توا؟
ولا تزعلن انا نعوض فيه بالخرشوف
تقريبا نفس الطعمة
بس بقعيميلنا ابن واطعم
جربن وقولن قالتها للاهم
خطرها القعمول نحطوه فيه مع خضرة الكسكو مش عادي
وفي اللي فاضية وبالها رايق تحشي فيه طبعا تختار القعمولات الكبار
عصاج
وتمرغيد في دقيق ودحي وبشماط
واهم حاجة تعرفنها ان القعمول ما يطولش عالنار مسرع ما يطيب
ما تهبزنش وتقولن هضا شنو والله نوروها للاهم
حاجة اخرى مهمة القعمول غني بالحديد ومفيد للكبد ومساعد على تقليل نسبة الكوليسترول ف الدم
يعني دق في وثق
ويقولوا ان في شركة سويسرية قاعدة تدير في اختبارات لاستخراج دوا منه
يستر الله ما يقرضوه من المنطقة
سامحني ما عنديش صورة الطبيخة توا نديرها شي يوم بعد يطيح الفول والخرشوف ف السوق