عرض للطباعة
شوفوا يا اخواتي انا عندي لمة خفيفة , وانا مهتمة ان يكون كل شى نقدمه افضل من التاني وبالتالي نبي ندير عشاء رقيق يعني كل واحدة وصونيتها وبندير حلو للقهوة او الشاهي ونبي حاجة بعد العشاء ونبي مساعدتكم بصدق وكل واحدة تعطيني اقتراحاتها لكل نوع العشاء والسلاطة والحلو وعلى فكرة اللمة يوم السبت الجاي فارجوكم تساعدوني وتعطوني النصيحة و انا باذن الله حنصور كل شي درته وننزله في المنتدى
حبوبة مانبيش نظلم اي اكلة موجودة في المنتدى لانه يزخر بالابداعات بس حنعطيك افكار وانت ديري جولة في المنتدى واختاري اللي يناسبك وتحسيه يمشي مع المناسبة
ديري رز بالمكسرات او شعيرية بالمكسرات و3 انواع سلاطة وحدة مشوية وتانية بالمايونيز والتالتة باذنجان مع بوريك الجبد بالمفروم او السبانخ وكباب او شيش طاووق او اسكالوب دجاج او حوت او قطع دجاج كنتاكي ومعهم نوع معجنات زي باي المالح اي التارت المالح عجينة التارت العادية او السليلة والحشوة من اختيارك ودوقك واذا كنتي من محبين المحاشي تقدري اديري محشي الفلفل الاخضر الحار هده بعض الافكار اللي تحضرني الان وكل مانتفكر تاني انقولك
الحلو الزمنيات لايعلى عليها بس لاباس من التغيير حنعطيك فكرة جديدة ديري تشيز كيك او ترميسو او تارت بالكراميل نفس السليلة بس كبري الفورمة وديريه لشخص واحد
وان شاء الله يعجبك
اولا ربي يعينك
بالنسبه للعشاء ديري رز بالخلطه او رز بالشاورما منزلته ام ايوب انا درته فى لمه عندى ونال الاعجاب. وسلطة الملفوف(كول سلو)
ومثلا نوعين بالدجاج ونوعين بالمفروم مثلا شيش طاووق والجزيره او الشورما
وكباب ملفوف ومبطن
وبعد العشاء ممكن تقدمى ترايفل
وماتنسيش تنزلينا الصور
وطبعا القصقصه ضرورى منها اللمه بمناسبة شنوووووووووووو
ديري رز بالخلطه ومعاه دجاج في الكوشه اي نوع والموالح اعملي بوريك بالمفروم وإلاتن ونوع محشي وتقدري تديري عجة كوسة وسلطة باذنجان سلطة ثانيه والحلو كيك كراميل وإلا أكلير محشي كسترد أوحلى الشعرية
وربي يساعدك
شكرا على اقترحاتكم اخواتي ومازال نستنى في اراء باقي الاخوات وبالنسبة للمة هي بمناسبة زيادة مولود جديد علينا اما الضيوف والحبايب معظمهم جوني في زيارات فردية لاني جبت في فترة الاحداث والثورة المباركة وماكانش مناسب الوقت باش ندير اسبوع او لمة كبيرة وفاضل هالمجموعة من زوجات اصدقاء زوجي بيتعرفوا ويباركوا ولازم ندير الواجب وخصوصا في اللي اول مرة يجوني وبالتالي قلت نشاوركم واكيد حتساعدوني
حبيبة
ركزي على العشي والحلو جيبي تورتة جاهزة مع كابتشنو
العشي ديري زي ما قالولك البنات رز بالخلطة او شعرية بالمكسرات حتى هيا حلوة ومعها 3 انواع سلطات و3 او اربعة موالح جهزي من اليوم الى قبلها وتقدري فكرة مسابقة على البيبي فى الاخير وكان تبي انواع المسابقة نعطيك .. موفقة
لاتعليق
ماشاء الله الحبوبات ما قصروا ربي يبارك فيهم
مني اني نحب الحاجات المعروفة الكلاسيكية الي ايديروا فيها اغلب الناس
ان شاء الله ربي يوفقك وخيتي وتطون النتيجة أحسن من الي متوقعتيها
وربي يسترك مع ضيوفك
الله يعينك ياوخيتى
مش هنضيف وخياتى كفوا ووفوا
بصراحة اللى قالوا عليه كويس جدا
ومبروك المزيود وانشاءالله يتربى فى عزك
حتى انا زدت فى الاحداث وطبعا
انت عارفة الزاوية وشو صار فيها
والله ستر ربى علينا والحمد لله
حتى انا درت لمة بعد التحرير ودرت فيها رز بالمكسرات +نوعين سلطة+سلة حارة المفروم+جردنيا+ الجزرة الحارة+جبن شرائح محشى باللحمة..
اما للحلو درت البكلاوة